رواية الوصفة الأولي الفصل الثاني بقلم هنا محمد
- أيوه يا ماما، أنا تعبت من الشغل!
- تعبتي إزاي يا تيا؟! ده أول يوم ليكي، وبعدين إحنا متوسّطين ليكي علشان تلاقي فرصة، تقومي إنتِ هتضيعيها علشان أسلوب ياسين مش عاجبك؟!
- ده هزقني يا ماما! إزاي أشتغل بعد الطريقة دي؟!
- بصي يا تيا، انسي جو إنك بنت الأكابر ده، خلاص مبقاش زمنه. إحنا أفلسنا، ولازم كل واحد يشتغل علشان نصرف على البيت ده.
- وأنا ذنبي إيه؟! اشتغلوا إنتوا!
- واضح إني دلعتك زيادة عن اللزوم. إنتِ اللي في سنك فاتحة بيت يا تيا! إنتِ خلاص 28 سنة، استوعبي ده بقى وبطلي تصرفات طفولية!
أخذت تيا حقيبتها من فوق الأريكة واتجهت نحو الباب بعصبية واضحة.
- ماشي يا ماما، والله هشتغل وهيبقي معايا فلوس وهسيب البيت
- أحسن، أهو نرتاح من وجع الدماغ. وبعدين فوقي، دي الحياة اللي غيرك بيعيشها وإنتِ مش بتحسي بحد أبدًا!
- وأنا مالي أحس بحد ليه؟! وبعدين خلاص، أنا بقيت زي أي شخص عادي، مش محتاجة أحس ولا غيره. سلام يا ماما!
- سلام يا تيا، متتأخريش علشان في حاجة عايزة أكلمك فيها بعدين.
توقفت تيا عند الباب والتفتت إليها.
- طب ما تقولي دلوقتي؟
- لأ، موضوع مش بيتقال وإحنا واقفين كده. يلا روحي، ولما ترجعي نتكلم.
هزت تيا رأسها بضيق وخرجت، بينما عادت والدتها إلى مكانها وهي تتنهد.
*********
كانت الساعة الثامنة صباحًا عندما وصلت تيا إلى المطعم. دخلت من الباب الرئيسي، ثم اتجهت إلى الاستقبال حيث كانت الموظفة تجلس خلف مكتبها.
- صباح الخير.
- صباح النور يا تيا، إنتِ جيتي بدري النهارده!
- أيوه، قولت أحسن ما أتأخر.
ابتسمت الموظفة وأشارت إلى الممر المؤدي للمطبخ.
- لسه بدري على بداية الشغل، بس ماريا موجودة جوه. ادخلي اقعدي معاها لحد ما الباقي يوصل.
- تمام، شكرًا.
اتجهت تيا نحو المطبخ، وما إن دخلت حتى وجدت ماريا تقف أمام إحدى الطاولات وهي ترتب بعض المكونات.
- صباح الخير يا ماريا.
التفتت ماريا إليها بابتسامة.
- صباح النور! إيه ده؟ إنتِ جيتي بدري كده ليه؟
- هو مش المفروض أجي بدري؟
- المفروض، بس مش للدرجة دي. لسه قدامنا وقت على الشغل.
ضحكت تيا وجلست على أحد المقاعد القريبة.
- قولت أبدأ بداية جديدة بقى.
- يا سلام! هو ياسين سمع الكلام ده؟
- لا، متفكرينيش بيه دلوقتي.
ضحكت ماريا وهي تواصل ترتيب المكونات.
- على فكرة، هو مش موجود لسه. تعالى أعرفك على باقي الفريق قبل ما الدنيا تزحم.
اقتربت تيا منها، وبدأت ماريا تشير إلى كل شخص موجود في المكان.
- ده عمر، مسؤول معايا في القسم الساخن، وجوزي بالمناسبة.
كان عمر يقف أمام موقد الطهي، فالتفت إليهما بمجرد سماع اسمه.
- صباح الخير، إنتِ الموظفة الجديدة صح؟
- أيوه، أنا تيا.
- أهلًا بيكي. متقلقيش، إحنا هنا كلنا طيبين ... مش زي ياسين
رفعت ماريا حاجبها ونظرت إليه.
- كلنا؟ إنت بالذات آخر واحد يتكلم عن الطيبة.
-(ضحك عمر قائلا )
ما هو أنا لو مش موجود، المكان هيبقى ممل من غيري بس محدش حاسس بقيمتي والله
أكملت ماريا التعريف وهي تشير إلى القسم الآخر.
- ودي رهف، معانا في قسم الحلويات والمخبوزات.
كانت رهف تزين أحد الأطباق، فرفعت رأسها وابتسمت بحماس
- أهلًا يا تيا، عاملة إيه؟
- الحمد لله، إنتِ أخبارك إيه يا رهف ؟
- كويسه وده مؤمن ... خطيبي
رفع مؤمن يده بتحية بسيطة
- أهلًا وسهلًا يا انسه تيا نورتي
- (ابتسمت تيا ابتسامه بسيطه )
أهلًا بيكم.
أشارت ماريا إلى فتاة تقف أمام طاولة مليئة بالأطباق الباردة
- ودي نارين، مسؤولة القسم البارد
التفتت نارين إليهما وقالت بثقة وعدم اهتمام :
-شكلك مبتدأه جدا ... عموما نورتي
- هو أنا جيت اشتغل ولا داخلة حرب؟
- الاتنين تقريبًا ... اصل انا معروفه اني موهبه يا تيا ف مظنش في منافسه بينا حتي
-(تدخلت ماريا قائلا )
اهدي شويه يا نارين تيا جديده بلاش افوره !
ثم أشارت ماريا بصوت هادئ إلى شاب يقف بالقرب من ثلاجة حفظ اللحوم
- وده آسر ... خطيب نارين بردو مسؤول تجهيز اللحوم والدواجن
رد آسر بابتسامة:
- أهلًا بيكي، لو احتجتي أي حاجة في القسم بتاعي اسألي نارين الأول، هي اللي بتعرف كل حاجة
التفتت نارين إليه.
- الله! يعني أنا بقيت مسؤولة عنك كمان؟
ضحك الجميع، بينما أشارت ماريا إلى رجل يقف بالقرب من أحواض الغسيل.
- وده خالد، مسؤول الغسيل والأدوات ... يستحسن تغسلي الطبق قبل ما يروح له
رفع خالد رأسه للحظة وقال:
- صباح الخير ... شكلك نضيفه مش كده
- صباح النور ... ايوا بس ايه العلاقه ؟
-طب طالما كده تعالي اغسلي الطبقين دول
-(قالت نارين وهي تضحك )
وهي بتعرف تعمل كبايه شاي علشان تغسل بس بالله عليك يا خالد
عاد خالد إلى عمله دون كلام إضافي، فاقتربت تيا من ماريا وهمست:
- هو ماله؟
أجابتها ماريا بصوت منخفض:
- متسأليش، ده لو لقى معلقة في غير مكانها ممكن يقوم يدور فينا الضرب ومش ببالغ !
سمع خالد حديثهما، فالتفت إليهما.
- سامعك يا ماريا!
ضحكت ماريا وابتعدت قليلًا.
- خلاص يا عم
وأخيرًا أشارت إلى شاشة الطلبات الموجودة بالقرب من مدخل المطبخ.
- وده إيلاف، مسؤول تسجيل الطلبات ومتابعتها مع الأقسام.
كان إيلاف يراجع بعض الأوراق، فاكتفى برفع يده بتحية سريعة.
- ازيك يا تيا
نظرت تيا إلى الجميع، ثم عادت ببصرها إلى ماريا.
- هو إنتوا كلكوا بتشتغلوا هنا؟
- أيوه، وفيه ناس تانية كمان بس دول شيفتات قصيره .... بس دول أغلب الشخصيات اللي هتتعاملي معاهم
جلست تيا على أحد المقاعد، ثم سألت بفضول:
- طب هو إحنا بنشتغل كام ساعة هنا؟
ضحكت ماريا وهي تنظر إليها.
- ليه؟ لسه بتسألي عن ساعات الشغل؟
- أيوه طبعًا، هو سؤال غريب؟
تدخل عمر من بعيد:
- على حسب الشيفت يا آنسة، ساعات بتخلصي في معادك وساعات بتنسي إن ليكي بيت أصلًا
نظرت إليه تيا بدهشة.
- إزاي يعني؟
ردت ماريا:
- متسمعيش كلامه، هو بيحب يبالغ. بس فعلًا ساعات ضغط الطلبات بيخلينا نخلص متأخر شوية.
- يعني ممكن نفضل لحد بالليل؟
- ممكن، حسب اليوم والشغل.
تنهدت تيا وهي تنظر إلى الساعة في هاتفها.
- يا نهار أبيض، أنا لسه في تاني يوم
-(قالت نارين وهي تصنع سلطه )
استني لما ياسين ييجي، هتتمني اليوم يخلص بدري
وفجأة جاء صوت من خلفهم:
- وأنا مالي بقى؟ هو أنا بقيت مسؤول عن مواعيدكم كمان؟
التفت الجميع، فوجدوا ياسين يدخل المطبخ وهو يحمل ملفًا صغيرًا.
ابتسم عمر وقال:
- صباح الخير يا شيف، كنا لسه بنتكلم عنك
نظر إليه ياسين بشك
- أكيد مش بالخير
ردت ماريا بسرعة:
- لا طبعًا، كنا بنقول إنك أحسن شيف في الدنيا ... ونتمنى نبقي زيك كده
نظر ياسين إليها للحظات، ثم قال:
- إنتِ عايزة مني حاجة؟
ضحك عمر، بينما عادت ماريا إلى عملها
وقعت عينا ياسين على تيا التي كانت تقف بالقرب من الطاولة.
- إيه ده؟ إنتِ جيتي بدري ليه؟
- مش المفروض أجي أتعلم؟
رفع حاجبه وقال:
- غريبة، أول مرة أشوف حد جاي يتعلم بمزاجه
- متفرحش أوي، أنا لسه بفكر اسيب الشغل يعني
ابتسم ياسين ابتسامة خفيفة.
- طب كويس إنك لسه مفكرتيش تنفذي الفكرة. تعالى ورايا
أخذها إلى طاولة التحضير، حيث كانت مجموعة من الخضروات موضوعة أمامهما.
- النهارده هنتعلم تقطيع الخضار.
- تاني؟!
نظر إليها باستغراب.
- هو إنتِ اتعلمتي إمتى علشان تقولي تاني؟
- أقصد يعني، مفيش حاجة جديدة؟
- لأ، لسه بدري على الأحلام الكبيرة دي.
أخذ ياسين ثمرة خيار وسكينًا، ثم بدأ يشرح لها طريقة التقطيع الصحيحة، موضحًا أهمية ثبات اليد واستخدام الأدوات المناسبة
- بصي، مش كل حاجة بنقطعها بنفس الطريقة كل صنف ليه حجم معين حسب الطبق اللي هيتقدم فيه.
أومأت تيا برأسها وهي تتابع حركته.
- تمام، سهلة أهي.
ابتعد ياسين قليلًا وأشار إليها.
- اتفضلي، وريني.
أخذت تيا السكين وبدأت تقطع، لكنها لم تستطع الحفاظ على حجم متساوٍ للقطع.
نظر ياسين إلى الطاولة، ثم رفع عينيه إليها.
- إيه ده؟
- إيه؟
- إنتِ بتقطعي خضار ولا انتي جزاره ؟
ضحكت ماريا من مكانها، بينما نظرت إليه تيا بضيق.
- ما أنا لسه بتعلم!
- وأنا بقولك اتعلمي، مش بتخانق معاكي بس دا مش منظر
أخذ منها السكين ووضعه جانبًا.
- استني، بصي تاني.
أعاد الشرح ببطء، ثم طلب منها المحاولة مرة أخرى.
وبعد عدة محاولات، استطاعت تيا أن تحصل على قطع أقرب إلى الحجم المطلوب.
نظر ياسين إليها وقال:
- أهو، مش بطال.
ابتسمت تيا بفخر.
- يعني كده بقيت محترفة؟
- لأ، بس على الأقل الخضار بقى شكله مفهوم ويتاكل
ضحكت ماريا بصوت مرتفع، فنظر إليها ياسين.
- إنتِ مالك النهارده؟ مش وراكي شغل ركزي في شغلك بقي
- ورايا، بس مش كل يوم بنشوف تيا بتعمل إنجاز تاريخي ... شكلها خلاص هتبقي صحبتي
ردت تيا وهي ترفع قطعة من الخيار:
- بقي كده يا ماريا بتتريقي ؟
- (تدخل عمر )
يا جماعة، سيبوها في حالها. البنت لسه بتبدأ، وإنتوا هتكرهوها في المطبخ.
رد ياسين:
- محدش بيكرهها في حاجة، بس لازم تتعلم صح.
ثم عاد إلى تيا وقال:
- كملي، وأنا هراجع وراكي.
********
مر الوقت سريعًا، وبدأت الطلبات تزداد داخل المطبخ. كان كل شخص منشغلًا بعمله، بينما تحاول تيا متابعة ما تعلمته دون أن تعطل أحدًا.
وفي إحدى اللحظات، كانت ماريا تحضر طلبًا جديدًا عندما اقترب منها ياسين.
- ماريا، خلصتي الطلب اللي فات؟
- أيوه، فاضل بس أراجع التقديم.
- تمام، خلي بالك من كمية الصوص علشان المره اللي فاتت
ثم التفت إلى تيا التي كانت ترتب المكونات.
- وإنتِ، خلصتي اللي طلبته منك؟
- أيوه.
تفقد ياسين ما أنجزته، ثم أومأ برأسه.
- كويس. المرة دي أحسن بكتير.
ابتسمت تيا، ولم تستطع إخفاء سعادتها.
- أخيرًا سمعت منك كلمة حلوة!
ضحك ياسين وقال:
- متتعوديش بس
ثم ابتعد لمتابعة باقي الأقسام.
نظرت تيا إلى ماريا وقالت:
- هو دايمًا كده؟
- أيوه، بس بصراحة هو النهارده هادي معاكي.
- هادي؟! أمال لما يعصب بيعمل إيه؟
- مش عايزه اخوفك بس ممكن يوصل للضرب
-بس دا غلط !
-مش بيضرب بنات اكيد بس ولاد
-يعني كده فرقت ما دا غلط بردو
-ممكن بس محدش بيضايق هنا لانه زي اخونا الكبير كده وبقالنا سنين مع بعض
-ليه هو عنده كان سنه؟
-اتنين وتلاتين بس ايه شعره ولا كأنه عشريني
-يعني تلاتيني كبير ما صغير بردو
-بالنسبه لينا ايوا
-ليه هو انتي كام سنه ؟
-انا خمسه وعشرين عادي بس مثلا رهف عندها عشرين سنه عيله جمبه ف بنشوفه كأنه عجوز
-عجوز الله دا علي كده لما اجيب التلاتين هتقوليلي يا تيتا
-(قالت ماريا بفضول )
ليه انتي كام ؟
-تمانيه وعشرين اهو كمان سنه وامي هتقعد تندب علي حظي وان قطر الجواز وفاتني بقي زي كل يوم
-(ردم وهي تضحك )
والله انا خامسه وعشرين وامي شايفه كده
*********
بعد فترة، هدأت حركة المطبخ قليلًا، وخرج بعض العاملين لاستراحة قصيرة.
كانت تيا ترتب الأدوات عندما اقترب منها ياسين، ووضع كوبًا من الماء على الطاولة القريبة.
- خدي، اشربي شوية.
نظرت إليه تيا باستغراب.
- شكرًا.
ظل واقفًا للحظة، ثم قال:
- على فكرة، أنا عايز أقولك حاجة.
- خير؟
- بخصوص امبارح... أنا كنت عصبي زيادة عن اللزوم. كان المفروض أشرحلك بدل ما أتكلم معاكي بالطريقة دي.
تفاجأت تيا من كلامه، فلم تكن تتوقع أن يعتذر لها.
- عادي، حصل خير.
- لا، مش عادي. أنا مسؤول عن تدريبك، والمفروض أساعدك تتعلمي مش أخليكي تكرهي المكان من أول يوم.
ابتسمت تيا قليلًا.
- خلاص، قبلت الاعتذار.
هز ياسين رأسه بابتسامة خفيفة.
- تمام، بس متفتكريش إن ده معناه إني هعدي الأخطاء.
- كنت عارفة إن في حاجة غلط في الاعتذار ده!
ضحك ياسين للمرة الأولى منذ بداية الحديث، ثم عاد إلى عمله.
كانت ماريا تتابع الحوار من بعيد، وما إن ابتعد ياسين حتى اقتربت من تيا.
- إيه ده؟ هو اعتذرلك؟
- أيوه، مالك مستغربة كده ليه؟
وضعت ماريا يدها على صدرها بتمثيل واضح.
- أنا مش مصدقة! ياسين اعتذر! لازم نسجل اللحظة دي.
ضحكت تيا.
- إنتِ بتبالغي ليه؟
نظرت ماريا حولها، ثم اقتربت منها وهمست:
- بصي، أنا هقولك حاجة، بس متقوليش إني أنا اللي قولتلك.
- خير؟
- ياسين أصلًا مش بيحب يدرب حد مبتدئ.
- ليه؟
- بيحب الناس اللي فاهمة شغلها وعارفة هي بتعمل إيه. وأول ما يشوف حد مش عارف يمسك السكينة صح، أعصابه بتبدأ تتعب.
نظرت تيا إليها باستنكار.
- طب وأنا ذنبي إيه؟ ما أنا جاية أتعلم!
- استني، لسه مخلصتش. هو كمان شايفك شخص ميح ومش متعود على الشغل، وخصوصًا إنك جاية من عيلة غنية.
اختفت الابتسامة من وجه تيا قليلًا.
- هو ماله بالأغنياء؟
هزت ماريا كتفيها.
- بصراحة، ياسين مش بيحب الأغنياء عمومًا، ومش بيخبي ده كمان.
- ليه؟ حد فيهم ضايقه؟
صمتت ماريا للحظة، ثم قالت:
- معرفش كل التفاصيل، بس واضح إن عنده سبب. وصدقيني، دي مش حاجة بيحب يتكلم عنها.
نظرت تيا إلى المكان الذي اختفى فيه ياسين، ثم عادت ببصرها إلى ماريا.
- جميل جدًا... يعني أنا مش بس مش بعرف أطبخ، ده أنا كمان عندي مشكلة شخصية مع المدير من غير ما أعرف!
انفجرت ماريا ضاحكة.
- أهو إنتِ بدأتي تفهمي ياسين
ابتسمت تيا، ثم عادت إلى ترتيب الأدوات، بينما ظل سؤال واحد يشغل تفكيرها:
لماذا يكره ياسين الأغنياء إلى هذه الدرجة؟
***********
بعد انتهاء يوم العمل، جمعت تيا أغراضها وغادرت المطعم، وقد شعرت ببعض الإرهاق بعد ساعات طويلة قضتها بين تقطيع الخضروات ومتابعة تعليمات ياسين.
عادت إلى المنزل، ووضعت حقيبتها على الأريكة قبل أن تتجه إلى والدتها التي كانت تجلس في غرفة في الفيلا المعيشة.
- مساء الخير يا ماما.
- مساء النور يا حبيبتي، تعالي اقعدي، أنا عندي ليكي خبر مش هتصدقيه!
نظرت تيا إليها بتوجس، ثم جلست بجانبها.
- خير؟ إيه المصيبة المرة دي؟
- مصيبة إيه بس؟! ده خبر يفرح!
- طب قولي، قلقتيني.
ابتسمت والدتها ابتسامة واسعة، ثم قالت بحماس:
- في عريس متقدم ليكي!
ساد الصمت للحظات، وظلت تيا تنظر إليها وكأنها لم تستوعب ما سمعته للتو.
- نعم؟!
- عريس يا تيا، عريس! إنتِ سمعتي ولا أعيد؟
- لا سمعت، بس كنت أتمنى يكون عندي ضعف سمع في اللحظة دي بس
تنهدت والدتها بضيق مصطنع.
- يا بنتي ارحميني! ده مفيش زيه، دكتور ومحترم ومن عيلة كويسة، وأهله ناس في منتهى الذوق.
- مالو يعني؟
- مالُه إيه؟! دكتور يا تيا!
- وإيه المشكلة؟ هو الدكتور غير البشر مثلًا ما انسان عادي !
- يا بنتي ركزي معايا! ده شاب ممتاز، وأمه كلمتني النهارده، وعايزين ييجوا يتعرفوا عليكي.
رفعت تيا حاجبيها باستغراب.
- هو أنا قلت إني عايزة أتجوز أصلًا؟
- يا سلام! أمال هتفضلي قاعدة كده لحد إمتى؟
- لحد ما أحب أتجوز، مثلًا!
- طب ما يمكن تحبيه لما تشوفيه!
- ماما، أنا مش ناقصة وجع دماغ. أنا لسه راجعة من الشغل وقرف ياسين عايزة آكل وأنام، مش أقعد أتعرف على عريس.
- ومال ياسين ومال العريس دلوقتي؟!
- مفيش، بس إنتِ عارفة إني مش بحب الكلام ده.
حاولت والدتها كتم ابتسامتها، ثم قالت وكأنها تذكرت أمرًا مهمًا:
- وبعدين هو عنده تلاتين سنة.
اتسعت عينا تيا ونهضت من مكانها فورًا.
- تلاتين؟!
- أيوه، مالك؟
- مستحيل! أنا أوافق على تلاتيني إزاي؟!
نظرت إليها والدتها باستنكار، ثم قالت ساخرة:
- يا حبيبتي هو تلاتيني، مش طالع على المعاش!
- ماما، ده أكبر مني بسنتين!
- يا نهار أبيض! سنتين كاملين؟! طب نلحق نبلّغ عنه قبل ما يكبر أكتر!
- إنتِ بتتريقي عليا؟!
- لا يا حبيبتي، أنا بس بفكرك إنك قربتي على التلاتين إنتِ كمان.
وضعت تيا يدها على خصرها ونظرت إليها بصدمة مصطنعة.
- أنا؟! أنا لسه صغيرة!
- طبعًا، لسه في عز الشباب، بس العريس ده فرصة كويسة.
- مفيش فرصة ولا حاجة، وأنا مش موافقة.
- استني بس لما تشوفيه الأول، وبعدها احكمي براحتك.
- ماما، أنا قلت مش موافقة!
نهضت والدتها واتجهت نحو المطبخ، ثم التفتت إليها قبل أن تختفي من أمامها.
- على فكرة، هما هييجوا بكرة بالليل.
اتسعت عينا تيا مرة أخرى.
- بكرة؟! هو أنا وافقت إمتى؟!
- وافقتي على إيه؟ دي قعدة تعارف بس، مش كتب كتاب!
- مامااا!
- خلاص يا تيا، جهزي نفسك بس. الراجل وأهله هييجوا بكرة، ونقعد كلنا ونتكلم.
ظلت تيا واقفة مكانها للحظات، ثم رفعت يديها باستسلام.
- أنا مش مصدقة إن يومي بدأ بياسين وانتهى بعريس تلاتيني!
ضحكت والدتها من داخل المطبخ.
- أهو يمكن ربنا يبعتلك حد يعوضك عن قرف ياسين!
نظرت تيا إلى السقف بيأس، ثم تمتمت:
- أنا شكلي محتاجة إجازة من الحياه والله
