رواية جزيرة غراب الوادي الفصل الاول
1- أولاً تعريف الجزيرة 🏝💫
جزيرة تابعة للأراضي الصعيدية تقع في بقعةٍ معزولة عن باقي القرى وكأنها عالمٌ قائمٌ بذاته.
أهل الجزيرة متماسكون ومترابطون يعملون معًا بجد ويتشاركون المشقة قبل الرفاهية.
بينهم أعمالٌ خفية تجعل الشرطة تتردد على الجزيرة بين حينٍ وآخر وتنشأ بينهم وبينها عداوةٌ لا تنتهي.
لا يخرج أحدٌ من سكان الجزيرة إلا بإذن وإذا خرج أحدهم إلى الخارج لا يتحدث عن موطنه ولا عن مكان إقامته ولا عن عمله.
لأهل الجزيرة كل ما يحتاجونه من صحةٍ وتجارةٍ وأعمال داخلها أما التعليم فيتجهون إلى الأراضي الصعيدية خارج الجزيرة.
تبدو الجزيرة كعالمٍ مغلق له قوانينه الغريبة التي لا يفهمها إلا من نشأ بين أهله.
قد يتصارعون فيما بينهم داخلها لكن ما إن يخرجوا منها يصبحون يدًا واحدة في وجه أي غريب
ـــــــــــــــــــــــــــــــــــــــــــــــــ**
2- البـطل
جلال آل جهدان 31 عامًا الابن الثاني لعائلة الجهدان وابن عمدة وحاكم الجزيرة.
يسيطر مع عائلته على زمام الأمور فيها ويشغل منصب قائد حرس الجزيرة.
رجلٌ غامض لا يعلم أحدٌ حقيقته؛ أهو أشد شراسةً من والده وأخيه الأكبر أم أنه يخفي خلف قسوته قلبًا طيبًا لا يظهره لأحد؟
كلمته أمر وهيبته تفرض نفسها على الجميع... لكن ما يخفيه جلال قد يكون أخطر مما يظنه أهل الجزيرة.
ــــــــــــــــــــــــــــــــــــــــــــ**
3- البطلة
موج 22 عامًا الابنة الكبرى لأحد عمال الجزيرة
ولها ثلاث شقيقات أصغر منها. لم يستطع والدها إنجاب ولد فكان يتحامل عليها دائمًا ويحملها مسؤولية أكبر من عمرها.
تحاول موج أن تظهر قوية أمام عمال وحرس الجزيرة حتى لا تُسحق هي وشقيقاتها وسط مجتمعٍ لا يرحم الضعيف.
تحمي أخواتها بكل ما تملك وتعمل مع فتيات الجزيرة لمساعدة أسرتها.
فتاة اعتادت أن تكون سندًا للجميع... رغم أنها لم تجد من يسندها.
ـــــــــــــــــــــــــــــــــــــــــــــــــــــ
«مهلاً... لا تعبر النهر فبعض الضفاف لا تملك طريقاً للعودة.»
♡بداية الحكاية♡
﷽
ليست كل الجزر خُلقت للرفاهية والملاذ فبعضها يُولد من رحم العزلة ليكون مخبأً لأشياء أخرى... وكما تحتفظ أعماق البحار بأسرارها الغارقة
هناك أسرارٌ أشد خطورة؛ تطفو فوق السطح تتنفس الظلام وتتحرك بين البشر تحت حراسة مشددة من الصمت.
في «جزيرة غراب الوادي» حيث يقف النيل شاهداً على تاريخٍ لا يرحم لا تعني المياه الأمان بل تعني الحصار.
أرضٌ أغلقت أبوابها على قوانينها الخاصة واستمدت هيبتها من سطوة «آل جَهْدَان»؛ لا يطرقها غريب إلا وابتلعت سرّه
ولا يخرج منها ابنٌ لها إلا وقد حمل الوصية ذاتها: من يُولد في الجزيرة يبقى سرّه فيها.
ـــــــــــ♡
وفي إحدى ليالي الجزيرة المعتمة كان جلال كعادته يتجول في شوارعها الضيقة على ظهر حصانه يتفقد أحوالها بعينٍ لا تخطئ الصغيرة قبل الكبيرة ليطمئن أن الأمور تسير على ما يرام.
أثناء سيره لمح طيفًا يسرع بخطوات مرتبكة يخفي رأسه ويحاول التواري عن الأنظار. بدا قليل البنية وطريقة سيره أثارت ريبته وشكوكه.
لم يتردد بل أسرع بحصانه حتى قطع عليه الطريق تمامًا.
وما إن وقف في مواجهته حتى اتضح له أنها فتاة رغم الشال الذي يغطي وجهها إلا أن تفاصيلها وحركتها كانتا واضحتين للغاية.
فزعت ما إن وجدته أمامها وتراجعت خطوة إلى الخلف وقد باغتها ثقل الموقف وهيبة الرجل الذي يقف أمامها.
(بتقصٍ ونبرة حادة)
جلال: إنتِ مين... وطالعة دلوك ليه؟
موج (محاولةً إخفاء ارتباكها بتحدٍ): طالعة لمصلحة ضرورية.
جلال: إيه مصلحتك؟
موج (بندية): ميهمش... مش الضرورات تبيح المحظورات ولا إيه؟
نزل جلال من على حصانه ببطء وثبات ثم اقترب منها بخطوات معدودة حتى صار قريبًا بما يكفي ليرى حدة عينيها من خلف الشال.
جلال (بصوت صارم) : عشان كده سألت... إيه مصلحتك؟
موج: طلعت أجيب لأمي دواها.
جلال(باستخفاف): آه... ضروري دلوك يعني؟
موج: أكيد.
جلال(عاقدًا حاجبيه): مش في حرس بيعدّوا فالشوارع؟ ليه ما بعتيش مع واحد منيهم وإنتِ أكيد عارفة إن البنات والحريم ممنوع يطلعوا آخر الليل؟
موج (بسخرية ومرارة): ما طلبتش... عشان بيعتبروها «مِنّة» علينا رغم إننا بندفع حق الخدمات اللي أصلًا مش بناخدها.
جلال: يعني إيه مِنّة؟
موج(بحنق): يعني الحارس بيقرفنا عشان يجيب الحاجة غير إنهم منفخين على الفاضي ولا ليهم لازمة... بيقضّوها تسكّعه فالشوارع وبس!
جلال(بحدة): لما ميكونش فيه حريم بتطلع هيتسكعوا ليه؟
موج(باستهزاء): والله دي ترجع للي حاكمهم ومسؤول عنهم!
اقترب جلال أكثر حتى كاد يطوقها بحضوره ثم قال بنبرة تحمل تهديدًا خفيًا:
جلال: إنتِ تعرفي أنا مين؟
موج (بكل عناد ودون خوف): له... وميهمنيش بردو أعرف. أكيد واحد من الحرس ما هو أسلوبك زيهم!
ضاق صدر جلال من طريقتها وأسلوبها الجريء في الحديث رفع حاجبيه ببرود.
جلال: وايه هيا الطريقه؟
موج: مابيسدقو يلمحو بنت ويجرو كلام واساله قالي يعني عشان الامان.. بس كلها مسايره زي مابتعمل دلوك.
جلال: امممم.. مسايره.
اقترب أكثر ومد يده نحو وجهها وهو يحاول نزع الشال.
جلال: اكشفي عن وشك.
تراجعت موج للخلف بسرعة.
موج: حيلك! نزل يدك والا هاشكيك.
جلال: لمين؟
موج : لريس الحرس بتاعك.. سي جلال.
جلال: وهاتقوليلو ايه؟
موج : هاقولو ينشف معاكم شوي اظاهر انه رخي عشان كده اسلوبكم كل مادا يتنزع منيه الحيا!
جلال (بابتسامة غاضبة): ينشف؟
موج : اه.. انت هنا حارس وحامي مليكش سلطه تكشف وشي وبعدين من سكتي بقالي نص ساعه واقف وياك كل ده عشان علبة برشام وياريت لقيتها!
جلال: هاسيبك.. بس الاول اسمك ايه وبت مين فالجزيره؟
موج: اسمي صباح بت عامل من عمال الاراضي.. يالا اتلحلح!
لفت من خلفه وخلف حصانه وغادرت مسرعة دون الالتفات خلفها بينما التفت جلال ينظر في أثرها بغرابة.
جلال: طلع في عندينا بنات ملهاش شاكم!
فكر قليلاً وعقد حاجبيه.
جلال: صباح.
تنهد بحدّة ثم امتطى حصانه مرة أخرى وغادر المكان.
ـــــــــــــــــــــــــــــــــــــــ**
عادت موج إلى منزلهم مسرعة وما أن دخلت حتى استقبلتها والدتها سعدية.
سعدية (بقللق وخوف): إيه يا بتي كل ده؟ أخرتي كده ليه وقعتي قلبي!
موج(وهي تحاول التظاهر بالهدوء): مفيش يا ماي متأخرتش ولا حاجة.. خفتي ليه؟
سعدية: أفرض حد مسكك ضايقك الشوارع بتكون خالية!
موج: له متقلقيش.. أبوي رجع عاوزين ناكلوا؟
سعدية: لسه جاي في السكة.
موج: حرام الليل راح!
سعدية: هانت.. المهم جبتي البرشام؟
موج : ملقتهوشي خلصان من هنا.. بكره نشوف حد طالع بره الجزيرة يجيبه.
سعدية: إن شاء الله ربنا يسهل.
في ذلك الوقت دخل والد موج من الخارج.
فايز: سلام عليكم.
موج: عليكم السلام حمد الله بالسلامة يا بوي.. كل ده في الشغل؟
فايز: الله يسلمك أخرنا شقة عريس.. عقبال شقتك.
موج (بحرج طفيف): تعيش يا بوي.
دلفت خلف والدتها لتجهيز مائدة الطعام.
ــــــــــــــــــــــــــــــــــــــــــ**
بينما كان جلال في الخارج يكمل دوراته الليلية وصل إلى مساعده ورفيقه هاني.
هاني: خطوة عزيزة مكنتش ناوي تاجي ولا إيه؟
نزل جلال من على حصانه ببطء وثبات.
جلال: له.. انت عارف لازم أجي. بقولك إيه يا هاني إيه أخبار الحرس اللي بيطلعوا فالليل؟
هاني: يعني إيه مش فاهم ما انت بتقابلهم.
جلال: وهما بيعرفوا إني بقابلهم مرة وخلاص.. بعد كده بقى بتعرف بيعملوا إيه مين شايف شغله ومين له؟
هاني: كله تمام.. في حاجة؟ حد شكى؟
جلال: له.. اسمع من بكره تبعت وراهم رجال في الخفا كام واحد كده عشوائي يدوروا ويراقبوا مين منتبه ومين له.. بيضايقو حد.. أسبوع كل يوم يروحوا مكان وبعدين يخبرونا أخبارهم.
هاني (بفضول وريبة): اه وماله.. بس المراقبة دي مش من فراغ!
جلال (بشرود وهو ينظر للنهر): صباح.
هاني (باستغراب وضحكة خفيفة): صباح إيه؟ لسه بدري انت شارب إيه النهاردة؟
التفت جلال إليه بجمود ثم قال:
جلال: صوح.. شاهين أخوي طلع من المغرب محدش قالك راح فين؟
هاني (وهو يغمز بابتسامة خبيثة): طلع من الجزيرة مع جدعين.
جلال: ليه؟
هاني: هايكون ليه يعني؟
جلال (بضيق ونبرة حادة): أه.. مش هايجيب أجل الجزيرة غير شاهين وسرمحته!
هاني: له.. هو حريص وأكيد بيعمل حسابه.
جلال: ربنا يستر.. صوح البت اللي دخلت الشهر اللي فات راحت فين دلوك مبتجيبش أخبار عنها ليه؟
تبدلت ملامح هاني للحظات وظهر التوتر على نبرة صوته.
هاني: له.. ما طلعت خلاص.
جلال (بعينين ضيقتين): طلعت فين؟
هاني: طلعت مريضة وعنديها هلاوس وجِه أبوها قعد مع شاهين وأثبت بالتقارير الطبية وخدها.
جلال (بنبرة استجوبية): ميتا؟
هاني: من يومين تلاتة.
جلال (بقسوة وثبات): والله؟ وانت مخبرتنيش ليه؟ ولا شاهين قالّي؟
هاني: عادي.. الموضوع مش مستاهل وهو اتأكد خلاص.
جلال : انت شغال معايا أنا.. مش مع شاهين ولا أبوي آخر مرة يا هاني.. تقولي نسيت وشك مش ناسي.
هاني (محاولاً الهروب من الموقف): ماشي.. غير السيرة وقولي فيك إيه النهاردة؟
جلال: مليكش صالح!
هاني: طيب.. هاتقوم نكمل؟
جلال: يالا.
وقفا سوياً وغادرا لاستكمال باقي الدورية المعتادة معاً.
ـــــــــــــــــــــــــــــــــــــــــــــــ**
في غرفة موج وأختها خلود التي تصغرها بأربعة أعوام كانت تستلقي على تختها.
خلود: طيب ما انا بطلع للمدرسة انا اجيب لامي البرشام!
موج : انتي طريقك معروف وبتعاودي.. مينفعش تنزلي مكان تاني والا عاوزه ياجو يقرفونا ويقولوا كنتي فين ويفتحوا تحقيق؟
خلود (بتأفف): الواحد ضج من العيشة دي!
موج : اتنيلي واحمدي ربك.. اهه بتطلعي للمدرسة وتتعلمي وتقابلي ناس تاني غيرك مش طايل.
خلود: مش هافتري واقولك له.. عشان كده عاوزه افلح السنادي واكمل جامعة وافضل اكتر وقت بره الجزيرة.. يالا انام تصبحي علي خير.
موج : وانتي بخير.
لم تمر لحظات قليلة حتى غفت خلود.
نظرت موج للسقف ثم ابتسمت وقالت:
موج : العيار اللي ميصيبش يدوش!.. "تعرفي انا مين؟".. على أساس في حد فالجزيرة ميعرفش عيال غنام أبو جهدان.. يارب ينشف علي رجاله شويه بدل ماهما فالحين بس يقرفوا في خلق الله.
التفتت للجنب لتنام وهي تمتم:
موج : البنات بيقولوا عليه حلو.. كنت بشوفوا من بعيد اقول يمكن بس لما قربلي لقيته عفن ومشافش الحلاوة!
غفت موج وفي الصبح الباكر استيقظ أهل المنزل جميعاً ليغادر إخوتها إلى المدارس بينما تذهب هي إلى عملها المعتاد في المشغل.
ــــــــــــــــــــــــــــــــــــــ**
في منزل العمدة غنام التف الجميع حول مائدة الإفطار.
نظر غنام حوله ثم سأل زوجة شاهين الأولى.
غنام: خير يا كريمة.. فين شاهين؟
كريمة (بثبات ومواربة): احم.. مكنش عندي أنا.
تدخلت زوجته الأخرى وعد قائلة:
وعد: لساه نايم يا عمي رجع وش الفجر.
غنام : يعني إيه رجع وش الفجر؟ مش قولت لازمن يقوم الصبح بدري يشوف مصالحه!
خضرة (والدة شاهين تدفع عنه بلهفة): معلهش يا حاج أصله اتأخر في طلعته بسبب إنه راح ورا جلال يشوف ممشى شغله زين ولا له.
كريمة (بسخرية مكتومة): هه! شاهين اللي طلع ورا جلال؟!
نظرت خضرة تجاه كريمة نظرات نارية تجبرها على الصمت.
غنام (موجهاً حديثه لوعد): بعد ما تفطري تطلعي تصحيه.. راح ورا جلال ولا ورا الجن عنده شغل يقومله بدري!
وعد: حاضر يا عمي.
خضرة: طيب ما يصحوا جلال؟
نظر غنام لها بنظرة باردة وقاطعة.
غنام: قولتلك كتير يا خضرة.. ملكيش صالح بجلال خليكي في عيالك وبس.. جلال وأخوه له.
خضرة (باعتراض مكتوم): وه ليه جلال ويونس مش عيالي؟
غنام (بصلابة): له مش عيالك ولا هايكونوا.. لساكي بتقاوحي دلوك وتداري علي ولدك وعوزاه ينام ويرتاح وجلال اللي راجع الصبح يطلع مطرحه؟!
خضرة: أنا كنـ...
غنام (بحدة): مش كل يوم أكرر حديتي!
خضرة (وهي تخفض رأسها): حاضر يا عمدة.
وقف غنام للمغادرة وتركهم يكملون طعامهم.
التفتت خضرة نحو كريمة بغل شديد.
خضرة: إيه مالك؟ كان ناقص تقولي لعمك إن شاهين كان بره الجزيرة!
كريمة: ياريته يعرف يمكن يلمه شوي بدل الدوارة ورا الحريم والمسخرة ورجعته كل ليلة راسه طالعة من قلعتها!
خضرة (بشتيمة وغضب): طلعت روحك من جتتك المرة ستر لجوزها!
وقفت كريمة ثم نظرت تجاه وعد وأكملت بنبرة لاذعة:
كريمة: مرته الستر والغطا اهه عندك اتحدتوا سوا!
تركتهم ودلفت للداخل بينما نظرت خضرة لوعد بحنق.
خضرة: آخ.. اللي فارسني بعد كل ده إنه بيدافع عنها!
ـــــــــــــــــــــــــــــــــــــ**
في المشغل وصلت موج ورفيقتها ليبدأ يومهم ثم اقتربت من مجلسها بجوار رفيقتها دميانة.
جلست موج وأمامها دميانة ثم مالت على رفيقتها قائلة:
موج: يا بنتي والله لو أنا ما هوريكم وشي!
التفتت إليها دميانة بضحكة خفيفة:
دميانة: عقبالك يا أختي بعدين بستغل أي يوم.. متنسيش خلاص مهقدرش أجي تاني بعد الفرح.
موج (بتساؤل): مفيش أمل يوافق؟
دميانة: مستحيل.. انتي خابرة أصلاً من وقت الخطوبة عاوز يقعدني.
موج: معارفاش أفرحلك ولا أزعل عليكِ!
دميانة: متغفلقيش يومي الأخير.. صوح أبوكي هو اللي نصب الأوضة مقولتليش يعني؟ عرفت من هاني.
موج: صوح؟! اااه.. يبقى انتوا مكنتش أعرف طيب قولي بدل ما دعيت عليكم بشعر راسي.
دميانة (بمزاح): أخص عليكِ ليه إحنا ناقصين؟
موج: ما هو بعد شغله كلمناه للوكل قال رايح أنصب أوضة عريس وكنت جعانة!
دميانة: واطية!
موج: له خلاص هسحب الدعوة.. المهم أوعاكي تنسيني في حاجات العروسة والبسكويت!
دميانة: مش ناسية يا أختي أبقى أشيعلك.
أتت رئيسة العمال فتوقفت الحوارات والتفتت كل واحدة لعملها بجد حتى وقت العصر
ـــــــــــــــــــ**
خرجت موج ودميانة معاً.
دميانة (بقلق): مش هتأخر هاني لو شافني هاينكد عليّ.. انتي عارفة اليامين دول كلهم خناق!
موج: متخافيش هنشيعو مع حد يجيب الدوا من عند المعدية ونرجع.
سارتا إلى ضفة النهر عند آخر حد من حدود الجزيرة.
موج: مرحب يا عم رجب.
رجب المراكبي: مرحب يا بتي.
موج: متعرفش حد نازل اليابس ضروري؟
رجب: كتير نزل بدري كنتي جيتي الصبح.
موج: كنا في الشغل.
رجب: قوليلي عاوزه إيه وأي حد يعدي أشيعلك معاه.
موج (وهي تمد ورقة اسم الدواء): خد يا عم رجب.. ده برشام ضغط ضروري عاوزينه وملقتهوش في صيدلية الجزيرة.
قبل أن يجيب رجب أتى شاب من خلفها وخطف الورقة من يدها.
حليم (بمناكفة): إيه ده؟ اسم ممنوعات؟!
التفتت إليه موج بحدة:
موج: تعرف.. لو كررتها هَشيعك تتعرف علي قاح البحار
ضحك حليم كثيراً ثم قال:
حليم: تعرفي انتي.. لولا راضعين على بعض كنت أجوزتك وكسرت خشمك.. المهم إيه ده؟
موج: برشام خالتك.. انت نازل اليابس؟
حليم: اه.. خلاص أجيبهولك معاي.
موج: هتنزل دلوك؟ الليل هيدخل.
حليم: له أخدنا الإذن رايح أجيب بضاعة وصلت للدكان.
موج: ماشي.. بس خفوا من غش العطارة شوي ربنا هيحرقك انت وجوز خالتي!
حليم: لاحظي بتتكلمي على أبوي بعدين إلا الغش!
موج (بسخرية): الشيخ حليم خفوا يدكم شوية بس لجل ما تكسبوا بالحلال.
رجب: يالا هنطلع بالمعدية لو جاي.
حليم: حاضر يا عم رجب.. يالا يا بت روحي بكفاية كلام!
موج: بت في عينك جيبلي حاجة معاك.
حليم (وهو يصعد المعدية): تدفعي كام؟
موج: كفاية مش هبلغ عن غشكم!
تبسم حليم وهو يبتعد بالمعدية بينما عادت موج إلى دميانة ليعودا إلى منزليهما.
أثناء سيرهم قالت دميانة:
دميانة: انتي خابرة مهطلعش شغل بس انتي تاجي وتكلميني كتير.
موج: مجي مَظنش لكن كلام يطباه يا أختي.. تفضي انتي بس!
دميانة: له هفضى.. هاني حساه هايسيبني ليلة دخلتنا ويروح الشغل!
ضحت موج ثم قالت:
موج: مش بعيد!
دميانة: في واحد يسيب نصب فرشه والتجهيز ويطلع شغل؟ خلاص كلها أيام قليلة وهو ولا هنا!
موج: يمكن رئيس الحرس مش راضي يديه إجازة.
دميانة: له.. قالوا اقعد من أسبوع ومرضيش هو قال كده!
موج: عادي.. أكيد بعد الجواز الموضوع هايتغير مش هايتأخر كده ولا يقضي يومه كله بره.
دميانة: هانشوف.. المهم، جهزتي فستان زين؟
موج: جبت واحد زين.. بس مش حساه.
دميانة: يبقى حلو! انتي مش بتحسي الحاجات الحلوة والعفشة بتدخلي فيها بدماغك على طول.. عاوزينك تلعلطي يمكن حد يجيه حول ويخطبك!
موج: أنا بالنسبة لأغلب الجزيرة معنسة.. 22 سنة ومعنسة ياناس!
دميانة: وأنا إيه ما أنا 21!
موج: بس بقالكم سنتين مخطوبين والظروف بتعطلكم.. بعدين نفسي وحلم حياتي أتجوز بره السجن ده!
دميانة: في ناس بره حلمها يعيشوا هنا.
موج: عشان أغراب.. لو ياجو مش هايتحملوا.
دميانة (وهي تتلفت بحذر): متحلميش.. عشان غنام بيه يقتلك لو حبيتي وطلعتي بره!
موج: حَرَق غنام وأبو غنام!
دميانة (بقلق شديد وهي تضع يدها على فمها): يخرب بيتك اسكتي حد يسمعك!
موج: مين يسمع؟ مدي خطوتك شوي أخرنا!
ــــــــــــــــــــــــــــــــــــــــــــــــــــــــــ**
في دوار العمدة غنام خرج جلال من غرفته استقبلته خضرة بابتسامة صفراء.
خضرة: مرحب يا ولدي.
نظر جلال باتجاهها ببرود ثم أجاب:
جلال: أهلاً.
خضرة: طالع دلوك؟
جلال (وهو يحاول المرور من جوارها): اه.. ليه؟
خضرة: عملت إيه في موضوع جوازك؟ عاوزين نروحوا للبنت!
التفت إليها جلال مرة أخرى وقال بثبات:
جلال: قولت لأبوي بعد فرح هاني ربنا يسهل إن شاء الله.
خضرة (بلسان لاذع): هاني مين؟! وانت مالك بهاني حتى الناس اللي شغالة عندنا ها ناكلوا همها؟!
جلال (بنبرة قاطعة ومحذرة): هاني شغال معاي.. مش عندي وصاحبي وبعتبره أخوي.
خضرة: ياريت زي ما بتفكر في الغريب تفكر في إخواتك.. عاوزين يجوزوا وابوك رافض جوازهم قبلك!
جلال: هايجوزوا متخافيش.
أتت نجاة عمة جلال باتجاههما.
نجاة: إزيك يا جلال يا ولدي؟
جلال: مرحب يا عمتي عاملة إيه؟
نجاة: الحمد لله بخير.. طالع قوام؟ مبنلحقش نشوفك!
جلال: معلهش.. هما اليومين دول وبعدين تتعدل. عاوزه حاجة؟
نجاة: له سلامتك.. ربنا يسهل طريقك.
تركهم جلال وغادر فالتفتت نجاة لخضرة قائلة:
نجاة: خير مال وشك؟
خضرة ( بحنق): أنا عيالي عاوزين يجوزوا يا أخوكي يجوز جلال يا مَيحَكُمش رأيه!
نجاة: الصبر يا خضرة.. متسربعة ليه البنات مش هتطير!
خضرة: عقلي اللي هايطير المهم..جلال بيسمعلك ابقى اتكلمي وياه.
نجاة: إن شاء الله.. المهم العروسة زينة؟ مش برتاح لنقواتك!
خضرة (بتكبر): ليه بقى؟ زينة طبعا.. متنسيش هتدخل دارنا يعني لازم أنقيها حلوة وطوع إن كانت لجلال ولا لإخواته!
نجاة: هانشوف...
التفتت نجاة لتغادر بينما حدثت خضرة نفسها بغل ومكر من خلفها:
خضرة (في سرها): حلوة للأسف وزغيرة كمان.. عشان أقدر أخوفها و تسمع مني وكلّه يبقى تحت يدي ده غير إن أبوها يتمنى رضانا!
ــــــــــــــــــــــــــــــــــــــــــــــــ**
في المساء
طُرِقَ باب منزل فايز.. خرجت فرح ابنته الثالثة ذات الـ 16 عاماً مسرعة لتفتح.
عندما وجدت حليم أمامها تبدلت ملامحها لابتسامة خفيفة.
حليم: مساء الخير.
فرح (بخجل): مساء النور.. احم ادخل؟
حليم (وهو يمد يده بالدواء): خدي إدي العلبة دي لخالتي.
فرح: اه ماشي.
خرجت موج على الصوت قائلة:
موج: مين يا فرح؟
نظرت لمصدر الصوت ثم أردفت بسخرية:
موج: امم.. ياساتر انت؟!
حليم: اه يا أختي أنا!
موج (وهي تنظر للدواء في يد فرح): شكراً.. نردهالك لما تعيا إن شاء الله!
حليم: أعوذ بالله الملافظ سعد!
موج (بضحكة خفيفة): سعد أبوك على فكرة.. جبتلي حاجة ولا النتانة منعتك؟
حليم: مد يده في جيبه ثم أخرج...
أخرج زجاجة عطر صغيرة وناولها لها.
حليم: خدي هيصي ربنا يقدرني على طلبات الغلابة.
أمسكت موج الزجاجة تتأملها بفضول.
موج: إيه ده يا حليم؟
حليم (بمناكفة وابتسامة خبيثة): دوا للقمل أصل خالتي قالت لأمي إنك مقملة وكانت عوزالك حاجة من العطارة.
نظرت له موج بغضب واندفاع:
موج: روح.. روح من هنا!
ضحك حليم ثم قال:
حليم: له دي عطر خام.. كنت عاوز أجبلك "سد الحنك" بس مطلعتش بره سوق العطارة ده اللي لقيته بقى!
موج (وهي تبتسم برضا مكتوم): شكراً أوعى تكون غشيتها قبل ما تاجي بس!
حليم: دم أمك أسفلت يالا أروح.. تصبحوا على خير.
موج: وانت بخير.
التفتت موج نحو أختها فرح فوجدتها واقفة تنظر في أثر حليم بشرود وابتسامة هادئة.
موج (بغمزة وشك): امممم.. وإيه كمان؟
فرح (بتوتر وتلعثم): إيه؟ مش فاهمة!
موج: ولا أنا!
فرح (وهي تتهرب مسرعة): أدخل أذاكر أحسن!
دلفت فرح إلى الداخل بينما أغلقت موج الباب ودخلت خلفها وهي تبتسم.
ــــــــــــــــــــــــــــــــــــــــــ**
مرت أيام قليلة
حتى جاء يوم زفاف دميانة صديقة موج.
بعد أن تجهزت موج وارتدت فستانها خرجت لوالدها قائلة:
موج: يا بوي.. هاخد خلود معاي.
فايز (بنبرة حاسمة): له.. إخواتك ممنوع يطلعوا ولولا إنها صاحبتك مكنتش طلعتك ساعة وتكلميني !
نظرت موج خلفها نحو أختها خلود ثم أشارَت لها بحاجبيها؛ أي أنها لن تستطيع إقناعه.
فايز: يالا عشان أوصلك.
خرجت موج مع والدها ليوصلها إلى مكان الزفاف.
ـــــــــــــــــــــــ**
دلفت إلى الداخل واجتمعت بصديقات المشغل ثم سلمت على دميانة.. كان الجو جميلاً وهادئاً حتى أشارَت لها دميانة بعد وقت لتصعد إلى المنصة (الكوشة) لتلتقطا صورة سوياً.
أثناء صعودها انزلق كعب حذائها انحناءً سريعاً على الأرضية الزجاجية فاختل توازنها لثوانٍ فامسكها أحدهم بيده بقوة كي لا تقع!
موج (بانفعال دون أن تنظر لشخصه): أوعي متمسكش يدي!
التفتت ونظرت لوجهه.. فكان جلال.
وقفت أمامه واتسعت عيناها بقلق وخوف شديدين بينما نظر هو إليها وعقد حاجبيه بتفحص حاد وكأن نبرة هذا الصوت حفرت في أذنه من قبل!
تركته موج فوراً وذهبت إلى دميانة مسرعة لتهرب من نظراته الصارمة.. التقتا بعض الصور سوياً ثم استأذنت موج من رفيقتها للعودة إلى المنزل قبل أن يلمحها مجدداً.
وقفت في زاوية المكان تمسك بهاتفها لتتصل بوالدها ليأتي ويأخذها ولكن دون رد!
اتصلت بأختها خلود فأخبرتها أن والدها خرج مسرعاً ولا تعلم أين ذهب.
خرجت موج من قاعة الزفاف وهي تتأفف بضيق:
موج: أروح أنا ولا أعمل إيه بس؟ أبوي لو رُوحت لحالي هايتخانق.. ومش بيرد!
ظلت تفكر لوقت حتى تذكرت حليم.. اتصلت به فوراً فجاءها صوته:
حليم: نعم؟
موج: حليم.. أنا في قاعة الأفراح وأبوي مش بيرد ما تاجي تروحني؟
حليم (بمناكفة): وانتي بتتسرمحي في القاعة ليه دلوك لحالك؟!
موج: خلص.. متبقاش بارد فرح صاحبتي هتاجي؟
حليم: طلباتك كترت.. ماشي جاي.
أغلقت موج الهاتف وابتعدت عن القاعة بضع خطوات قليلة جداً ثم جلست على الرصيف المجاور تنتظر حضور حليم.
أتى أحد الحراس الذين كانوا يمرون في الطرقات ووقف عندها قائلاً بصرامة:
الحارس: طالعة متأخر وقاعدة هنا ليه؟!
موج: كنت في الفرح هنا.. وهاروح.
الحارس: وإيه مانعك؟
موج: مستنية أخوي.
الحارس: طيب مستنتيش أخوكي في القاعة ليه؟
موج (بأَفَف وطَفَش وهيا تقف): خير أنا قدام القاعة بعينها.. إيه التحقيق ده؟!
الحارس: ردي بأدب انتي عارفة ممنوع الطلوع دلوك!
موج: وفيه سبب وقولت عليه.
الحارس: وافرض بتكدبي ومش طالعة للفرح؟
موج: ليه مش باين على منظري وبعدين العروسة صاحبتي اللي عريسها هاني ريسك.. خلي بالك لو دخلتلو هشيكك!
الحارس (بسخرية وهو ينظر إليها من الأعلى للأسفل): طيب قومي من هنا.. يا تروحي يا تعاودي الفرح.
موج: مينفعش أروح لحالي ولا أدخل تاني خلاص ودعت العروسة.. وأخوي مش هيأخر.
اقترب منها الحارس بطريقة مريبة ثم نظر لها نظرات غير لائمة ولا تليق:
الحارس: انتي مين و أبوكي مين؟
موج: ارجع مطرحك ولم نفسك يااد فكرت نفسك وكيل نيابة هتحقق معاي.. كمل شغلك أحسنلك!
الحارس: بحب البنات القوية.. بتكون عسل المكسورة الغلبانة مش حلوة.. ماتاجي .
لَفَت موج وجهها جانباً ثم بصقت على الأرض قرفاً
ثم قالت: الجايه علي وشك ياوسـ ـخ.
مما أثار غضب الحارس بشدة ومد يده إلى ذراعها بالوعيد.
الحارس (بغل وهو يمسك وجهه): يا بنت الكلب.. ده أنا هاربيكي !
رفع يده إلى السماء وقبل أن يحركها أتاه صوت حاد ورزين من خلفه يحذره:
جلال: نزل يدك مطرحها!
