رواية جزيرة غراب الوادي الفصل الثاني
مرّروا الصلاة على من أضاء بنوره القلوب ﷺ.» 🤍
«لن أستسلم، فالإنسان يُمحى حين يفقد قدرته على الرفض.» غسان كنفاني
(على أطراف التمرّد)
﷽
تزعزع جسد الحارس فور سماع الصوت وترك ذراع موج وتراجع للخلف قليلاً.
جلال (بثبات وهيبة): بأي حق بترفع يدك على بنت؟!
الحارس: البت دي تفـ ـت علي وشي وشتمتني!
جلال: اسمك إيه؟
الحارس: هي اللي غلطت مش أنا...
جلال (بنبرة قاطعة): اسمك!
أخبره الحارس باسمه فأكمل جلال بأمر حاسم:
جلال: ماشي.. روح داركم دلوك.
نظر الحارس بقلق ثم التفت وغادر المكان دون رد.
التفت جلال لموج قائلاً بتفحص:
جلال: بتعملي إيه هنا؟
موج: مستنية أخوي يروحني.
جلال: وأخوكي المفروض ياجي قبل ما تطلعي من مكانك ولا تستنيه في الشارع؟!
موج: ميهمش.. عادي أخر شوي.
استوقفت كلمة "ميهمش" جلال قليلاً ثم قال:
جلال: اسمك إيه؟
موج: صبـ.. احم موج!
جلال (باستغراب): موج؟!
موج: اه.. إيه؟
جلال: بنت فايز النجار؟
موج: اه.. تعرف منين؟
جلال: عشان بينادوه بأبو موج وعشان اسمك عفش زي أسلوبك دلوك!
موج: احم.. كلمني زين لشَكِيك!
جلال (بابتسامة خفيفة لم تظهر): لمين؟
موج: لريسك!
جلال: سي جلال مش كده؟
موج: اه.
في هذه اللحظة وصل حليم إليهم مسرعاً وقال:
حليم: سلام عليكم!
التفتت إليه موج قائلة بعتاب:
موج: تأخرت كده ليه؟
حليم: فين ده؟ مسافة السكة!
ثم نظر لجلال وقال باحترام:
حليم: عن إذنك يا جلال بيه.. هنروحوا.
موج (بتمثيل الاندهاش والذهول): مين؟!
جلال (وهو ينظر لحليم): أخوكي كيف وأبوكي مخلفش غير بنات؟!
موج: ما هو يبقى ولد خالتي وأخوي في الرضاعة.
جلال: اه.. طيب روحوا.
التفتت موج لتغادر سريعاً فاستوقفها جلال للمرة الأخيرة:
جلال: خلي بالك تاني مرة تطلعي لحالك فالليل!
التفتت موج إليه قائلة بجرأة:
موج: بس أنا مطلعتش قبل!
جلال: مش انتي اللي كنتي بتدوري على البرشام لأمك؟
حليم (باندهاش): وه البرشام خلص تاني؟ أنا لسه جايبه مكملش كام يوم!
موج (وهي تنظر لحليم بغيظ): اسكت يخربيتك!
جلال: روحي يا "صباح".. آخر مرة أشوف فيها وشك بعد العشا بره!
أومأت موج رأسها بتوتر ثم غادرت مع حليم المكان مسرعة.. بينما وقف جلال يراقب أثرها بتفكير وعينين حادتين.
ثم دلف إلى داخل قاعة الزفاف بهدوء.
ـــــــــــــــــــــــــــ**
بعد وقت وصلت موج إلى منزلهم.. التفتت لحليم قائلة:
موج: مشكرين على التوصيلة يابو خالو.
حليم: انتي بتطلعي في الليل يابت؟
موج: مرة ساعة الدوا بس!
حليم: خلي بالك الموضوع مش لعبة.. الحرس أسلوبهم ناشف ممكن حد يحبسك أو يرزل عليكي ده غير جلال ده وشه هادي بس كل الناس خابرة إنه شَديد ومش بيرحم!
موج: له مش هطلع تاني كده خلاص.. المهم روح، الوقت عوّق.
حليم: طيب اعزمي بكباية شاي!
موج(بسخرية): الوقت عوّق وهنتخمد اشرب في بيتكم!
حليم: ماشي خلصي مصلحتك ووزعيني.. تصبحي على خير.
موج: وانت من أهله.
ما إن دخلت حتى بدأت عليها الحيرة والتوتر.. خرجت إليها والدتها قائلة:
سعدية: انتي رجعتي يابتي.. الفرح ودميانة عاملين إيه؟
موج: زينة يا ماي.. أبوي راح فين؟
سعدية: مخبراش جاه تلفون وطلع!
موج(بضيق): التلفون أهم مني؟! مش عارف إني في الفرح وقال هاجي آخدك؟!
سعدية: يمكن شغل.
موج: أحلى حاجة فيكي يا ماي على قلبك مراوح.. خلي بالك ليكون متجوز عليكي عشان الواد!
تركت والدتها ودلفت إلى غرفتها لتبدل ثيابها.
ـــــــــــــــــــــــــــــــــــــــ**
بعد انتهاء الزفاف والمراسم عاد جلال للمنزل في وقت متأخر من الليل.
جلس وحيداً يفكر في أمور تخص الحراسة وشاهين ثم مرت على ذاكرته ما حدث مع موج.. رغم أسلوبها وطول لسانها إلا أن كلامها في البداية عن الحرس كان صادقاً؛ فقد رأى بنفسه أسلوبهم غير اللائق مع فتيات الجزيرة.
وقف وخرج أمام الباب ونادى أحد حراس المنزل.
الحارس: نعم يا جلال بيه؟
جلال: بكره تلملي من كل مكان في الجزيرة حارس أو تنين.. مش عاوزهم من مطرح واحد.
الحارس: ليه يا بيه خير؟
جلال (بنبرة صارمة): خير.. المهم الصبح بدري مع أول ضو للشمس.. وفيه واد منهم تجيبهولي من دارهم قبل الكل!
الحارس: حاضر.. مين هو؟
أخبره جلال باسم الحارس الذي اعتدى على موج ثم تركه ودلف للداخل.. لتمر الليلة بهدوء.
ـــــــــــــــــــــــــــ**
خرج جلال في الصباح الباكر إلى أحد أماكنهم على الجزيرة.. كان الشاب صاحب حادثة موج موجوداً وأخرون من الحرس كما طلب.
دخل إليهم ومعه "منعم" الحارس كان جميع الموجودين ينظرون إليهم وإلى بعضهم البعض لا يعلمون ماذا في الأمر!
ألقى السلام بكل هدوء ثم اقترب من الشاب قائلاً:
جلال: طبعاً مش عنديك شك ممكن أكون جبتك ليه.. دلوك سؤال وجواب مختصر عشان عاوز أنام إيه حصل الليل قدام القاعة من الأول؟
الشاب (بتلعثم ومحاولة لتبرير موقفه): محصلش غير إني سألت البت ديتي بتعملي إيه وليه هنا لقيتها اتطاولت علي وتَفّت على وشي!
التفت جلال للبقية متسائلاً:
جلال: حد فيكم وقف بنت قبل وسألها نفس السؤال وشتمته أو غلطت؟
أجابوا جميعاً بـ "لا".
نظر جلال للشاب ببرود وقال:
جلال: عيب يعني كلام عيال.. لكل فعل ردة فعل!
الشاب: بس البت ديتي يمكن غير للبقية.. هي لسانها طويل!
جلال: ولو قولتلك إني قابلتها قبلك وسألتها نفس السؤال ليه معملتش زي ما عملت معاك؟
الشاب: عشان أنت جلال بيه.. غيرنا الحرس!
جلال: ماشي...
التفت جلال لمنعم وهو يشير إلى ذراعي الشاب كأنه يتذكر شيئاً ثم استقر عند أحدهما وقال:
جلال: اه.. ده منعم اكسرلي دراعه!
استغرب الجميع من الكلام واستفزع الشاب قائلاً:
الشاب: يعني إيه؟!
جلال (بنبرة حادة وصارمة): الدراع اللي اترفع إيه فاكرها تكية أبوك هتمشي تعمل حالك ولي وتتهجم على خلق الله بكيفك؟!
اقترب منعم ففزع الشاب وتراجع للخلف:
الشاب: أنا قولت مكلمتهاش!
التفت جلال لمنعم وقال بنفاذ صبر:
جلال: خلصني قولتلك عاوز أنام!
أمسكه حارسان وفردا ذراعه ثم هوى منعم بضربة قوية بقطعة حديدية على ذراعه حتى تعالت صرخاته المتألمة من شدة الوجع!
قال جلال بكل برود وجمود:
جلال: أحمد ربك إني لحقتك.. لو دراعك نزل عليها كان هيبقى قطع مش كسر!
ثم التفت إلى بقية الحرس محذراً:
جلال: إحنا مشغلينكم تحموا الناس وتلبوا طلباتهم وفي المقابل بتاخدوا ضعف أي مال بتاخدوه من أي شغل تاني..
أي شكوى هتاجي منكم كبيرة أو صغيرة خصوصاً من البنات والحريم مفهاش مسامحة وهيحصل فيكم اللي تستحقوه
خلي بالكم عيني عليكم.. واللي يقرب علي بنت من الجزيرة على حسب قرب قد إيه.. يعني لو اتماديتوا هاتلفكم وتقعدوا جار أمهاتكم زي البت البكرية مع الفرق متصلحوش للجواز.
ثم أردف موجهاً كلامه لمنعم:
جلال: منعم.. الواد ده غوروه المستشفى يجبّس دراعه ولما يصحى شوفله شغلانة زينة في الأرض خفيفة كده على كيفك يمسكها.
ثم خرج من المكان وامتطى حصانه عائداً إلى منزله تحت نظرات القلق والتوتر الشديد من الجميع.
ـــــــــــــــــــــــــــــــــــــــ**
في ذلك الوقت كان السكون يُخيّم على منزل فايز قبل أن ينكسر مع شروق الشمس وحلول موعد استيقاظ الجميع؛ فمنهم من يتأهب لمدرسته ومنهم من يستعد لرغيف عيشه كـ موج ووالدها.
وعلى مائدة الإفطار سطا صمتٌ ثقيل قطعت موج جموده وهي تتطلع بوجه والدها بنظرة محملة بالشك والتساؤل:
موج: يا بوي.. خير؟ العشية طلعت ومردتش عليّ عشان ترجعني!
فايز (بهدوء مريب وجفاف شتت نظراته): مصلحة شغل ضرورية ونسيت إنك في الفرح.
موج (بعتاب مكتوم): نسيت!.. ماشي.
أكملوا إفطارهم في وادي من الهدوء الحذر قبل أن يغادر الجميع المنزل كلٌّ إلى مقصده.
ــــــــــــــــــــــــــــــــــ**
في دوار الحاكم غنام
ما إن عاد جلال حتى كان "شاهين" أخوه الأكبر يخطو خارجاً من الباب الخارجي..
تقابلت أعينهما في لحظة خاطفة ليعاجله شاهين بنبرة متسائلة:
شاهين: صباح الخير.. دوراتك كل ما دا بتعوّق يعني!
جلال: صباح النور.. مفيش شغل.
شاهين: اه ماشي ياجلال بيه أسيبك ورايا شغل.
تركه شاهين وغادر دون كلمة أخرى وكأن جدران الصمت بينهما أسمك من صلة الدم.
دلف جلال إلى الداخل فوجد بقية العائلة ينهون فطورهم في الساحة.. ألقى السلام بوقار فردّ الجميع التحية.
غنام: اقعد يا جلال إفطر.
جلال: ألف هنا.. سبقتكم بدري أنا ومنعم.
انطلقت ضحكة ساخرة من وليد الأخ الثالث الذي يصغر جلال بثلاثة أعوام وهو يعلق بتهكم:
وليد: الروس اتساوت بقينا نفطروا مع الحرس كمان؟!
خضرة (بدسّ السم في العسل): هو جلال كده.. هايخلي الخدم يرفعوا عينهم!
جلال (دون أن يلقي بالاً لهما موجهاً حديثه لوالده): عن إذنك يا بوي داخل أنام.
غنام: روح يا ولدي ريح.
استدار يسير نحو غرفته وقبل أن يضع يده على المقبض استوقفه صوت "يونس" أخيه الشقيق اصغر بأربع أعوام:
يونس: يا خوي!
التفت إليه جلال بملامح أرهقها السهر:
جلال: خير؟
يونس: كنت عاوزك في موضوع.
جلال: دلوك؟
يونس(باصرار): اه.. يعني لو فاضي.
جلال: قول.
اقترب منه يونس بخطوات خفيضة ونبرة يحفها الحذر:
يونس: فاكر البت اللي جات الجزيرة من فترة وفتشنا عليها؟
جلال: اه.. مالها؟
يونس: عرفت راحت فين ولا له؟
جلال: خير.. مهتم يعني؟ اه عرفت كانت عيانة في دماغها وابوها جه لشاهين وخدها بعد ما تأكدوا من كلامه.
ارتسمت على وجه يونس ابتسامة غامضة وقال بنبرة خافضة تحمل في طياتها خبيئة ثقيلة:
يونس: له.. ده اللي شاهين قاله!
ضيّق جلال عينيه بحدة ونظر إليه بتقصٍّ وشك وقد تطاير النوم من جفنيه:
جلال: قصدك إيه تعرف حاجة تاني غير دي؟!
يونس: مش متأكد.. بس البت ديتي مطلعتش من الجزيرة واصل!
جلال (بعقدة حادة بين حاجبيه واستغراب شديد): تقصد إيه مطلعتش أمال فينها؟!
يونس: الوقت اللي شاهين قال أبوها جه خدها وطلع كنت أنا مع الحرس عند المعدية بيدخلوا بضايع للجزيرة.. لا حد غريب دخل ولا خرج!
ولما شكيت في كلامه رحت لرجب المراكبي سألته يمكن يكون حصل في وقت تاني وشاهين ناسي.. قولتله حد غريب جه وطلع ببنت من الجزيرة؟ قالي له.. محدش دخل غريب من أسبوع غير الحكومة!
جلال: كيف ده وأنا سائل الحرس اللي كانوا عند البيت اللي قعّدناها فيه قالوا مشت! تعرف هي فين؟
يونس: له.. فتشت معرفتش كأن الأرض انشقت وبلعتها!
طوق الصمت المكان لثوانٍ ثقلاً ألقى بظلاله على صدر جلال.. أغمض عينيه برهة يتنفس بغضب مكتوم يزن الأمور في عقله ويمحص الشكوك التي بدأت تتشابك حول تصرفات أخيه الأكبر شاهين.
تنهد جلال بحيرة وثقل ثم وجه نظرة صارمة ليونس:
جلال: ماشي.. هشوف الموضوع ده وأنت اخلع يدك واوعاك تكون اتكلمت ويا شاهين!
يونس: له.. مكلمتوش.
جلال: زين.. روح شغلك أنت دلوك.
أومأ يونس برأسه والتفت مغادراً الدوار باتجاه عمله بينما دلف جلال إلى غرفته بخطوات ثقيلة.
أبدل ثيابه وألقى بجسده المنهك على الفراش يطالع السقف بعينين جافين وتفكير عميق ينهشه الشك والغموض.. حتى غلبه النوم من شدة الإرهاق.
ـــــــــــــــــــــــــــــ**
طوال ساعات العمل كانت موج تشعر بطفش وخنقة تجثم على صدرها؛ فالجلسة دون دميانة رفيقة عمرها وسرها باتت باهتة ومثقلة بالملل وكان المقعد الشاغر أمامها يذكرها في كل لحظة بمرور الأيام وغربة المكان.
حتى حلّ وقت العصر وقبل أن تلملم أشيائها لمغادرة المشغل اهتز هاتفها باتصال.. وما إن ألمحت اسم "دميانة" على الشاشة حتى فاضت حبوس دموعها وانفجرت باكية بنوح طفولي ملتاع وهي تجيب:
موج (ببكاء وصوت مخنوق): ألو..
دميانة (بدهشة وقلق): وه مالك بتعيطي ليه يا موج؟!
موج (وهي تمسح دموعها بظهر يدها بحنق): ماليش صالح أخرتي.. يامين وترجعي الشغل تاني!
دميانة (بنبرة حنونة وابتسامة ملؤها التأثر): يا قلبي.. بتعيطي على شاني؟!
موج: هاني مش أهم مني أنا صاحبتك من وإحنا عيال وهو متجوزك مكملش يوم!
دميانة (بمزاح): خلاص يا ستي هغضب واجيكي!
موج (بجفاء شقي): له اطلقي أسهل!
انفجرت موج ودميانة في ضحك متواصل وسخرية أزاحت ذلك الثقل عن صدريهما في لحظات.
موج (وهي تتنفس براحة): عامله إيه؟
دميانة: زينة.. انتي عامله إيه؟
موج: مكتأبة بس هتعود.
دميانة: والله انتي كمان وحشتيني وجالي اكتئاب من الشقة والقعده لحالي!
موج: قوام كدة جابلك اكتئاب؟ قولتلك من الأول مش مرتاحاله!
دميانة: له يا شيخة ده أطيب من بهاء سلطان!
موج (بسخرية وسرعة رد): دي حلاوة البدايات يا هبلة.. المهم دلوك خلاص مليت من بعدك شوفيلي عريس خلال أسبوع بالكتير.. عاوزه أروح على بيت حبيبي نعيش مع بعض فيه!
دميانة (بضحكة مرتفعة): تعالي أجوزك عمك باسيليوس!
موج (بشهقة وذهول شقي): أختاااااه لا يجوز! بعدين أبوكي خلاص راحت عليه ده لو كح مرتين ورا بعض طقم سنانه بيقع في حجره!
انفجرت دميانة بشدة في الضحك حتى انقطع نفسها ثم قالت:
دميانة: له ربنا هيعدلهالك.. انتي قرصتيني في ركبتي خلاص!
موج: يا مسهل.. يالا أسيبك لهاني عشان مبقاش عزول.
دميانة: مروحة؟
موج: اه خلاص هقفل معاكي وأروح.
دميانة: طيب المغربية هشيعلك الحاجات اللي طلبتيها.
موج: له كنت بتهزر وياكي والله!
دميانة: له.. انتي طفسة وهبعتلك يالا سلام دلوقتي عشان نصي التاني أهو جه.
موج: وقع نصك.. سلام.
أغلقت موج الهاتف وعلى شفاهها ابتسامة دافئة أعادت لها بهجتها ثم وقفت تلملم أشيائها للمغادرة والعودة إلى المنزل والهدوء يلف أزقة الجزيرة مع اقتراب غروب الشمس.
ـــــــــــــــــــــــــــــــــــــــــــــــ**
في منزل العمدة كان جلال يستعد للخروج بعدما عزم أمره على البحث والتقصي في أمر الفتاة الدخيلة التي اختفت في ظروف غامضة.
وقبل أن يخطو خطواته الأولى خارج السرايا استوقفته عمته نجاة وهي تبتسم بابتسامة عريضة:
نجاة: أهلاً بالعريس!
التفت إليها جلال وارتسمت على وجهه ابتسامة استغراب خفيفة:
جلال: عريس مين؟.. أنا؟!
نجاة (بفرحة وحماس): اه شد حيلك بكرة إن شاء الله رايحين نشوفوا عروستك ولو عجبتنا نخلصوا كل حاجة!
جلال (بنبرة تريّث جادة): ولو معجبتنيش ؟
نجاة: له هتعجبك إن شاء الله بيقولوا عنها بدر منوّر.
جلال: إن شاء الله ربنا يسهل.
نجاة (وهي تتفحصه بعناية): وه مالك مش فرحان ومتلهف كده ولا عامل تقيل؟
جلال: له.. ليه هو حد يكره الجواز؟
نجاة: صوح إن شاء الله تكون قسمتك ونصيبك.
جلال (بفضول هادئ): معرفتيش مين أو بت مين من معارف أبوي؟
نجاة: بت نجار من الجزيرة كان شغال مع أبوك من زمان وعارفه زين.
شعر جلال بناقوس ينقض سكون فكره فسأل بجمود:
جلال: نجار مين اسمه إيه؟
نجاة: فايز!
اتسعت عينا جلال بحيرة وذهول وخطرت على باله "موج" في تلك اللحظة فوراً؛ فقد حُفر في ذاكرته أنها ابنة فايز!
جلال (بتمتمة غير مصدقة): مش معقول!
نجاة (بدهشة من رد فعله): مالك بحلقت إكده؟ انت تعرفه؟
جلال: اه أعرفه.. البت اسمها إيه؟
نجاة: فرح.
تنهد جلال براحة وثقل في آنٍ واحد وكأن جبل أُزيح عن صدره ليعود فيتراكم بأسئلة جديدة:
جلال: ماشي.. عاوزة حاجة مني أنا طالع.
نجاة: له يا ولدي عاوزاك طيب.. الله يخضر طريقك.
تركها جلال وخرج من المنزل لكن اسم "موج" كان يطن في رأسه كعاصفة لا تهدأ وتواردت الأفكار إلى عقله: إن كانت تلك الفتاة سليطة اللسان والجريئة بهذا الشكل فربما أختها الصغرى تُشبهها في الطباع!
ـــــــــــــــــــــــــــــــــــ**
وفي تلك الأثناء كانت موج قد وصلت إلى منزلهم بإنهاك.
دلفت للداخل وأبدلت ثيابها في غرفتها.. وقبل أن تفتح الباب لتخرج هرعت إليها أختها الصغرى فرح وهي تنشج ببكاء ورعب شديد!
وما إن دخلت فرح الغرفة حتى أغلقت الباب خلفها بجسد يرتجف خوفاً.
اقتربت منها موج بقلق واندفاع:
موج: مالك فيكي إيه؟!
فرح (وهي تمسك بيدي موج وتتوسل بين دموعها): الحقيني يا موج.. عاوزين يجوزوني!
موج (بصدمة وجنون): يجوزوا مين إنتي اتجنيتي؟!
فرح (بدموع تتساقط برعب): عاوزين يدفنوني بالحيا من دلوك وأمي قالت هسيب المدرسة خلاص!
موج (وهي تمسك بكتفيها وبنبرة تحاول إظهار الثبات): وقفي عياط طيب تتجوزي تروحي فين؟! سيبك من أمك تقول براحتها أبوكي كلمك؟
فرح: أمي قالت إن أبوي موافق ومفيش رجعة في كلامه!
موج (بتنهيدة ثقيلة وحيرة تنكأ صدرها): مش فاهمة حاجة والله.. اشمعني إنتي بالذات أكيد فيه حاجة غلط!
أمسكت فرح يد موج بتوسل ودموعها تجري على وجنتيها:
فرح: عشان خاطري يا موج.. كلمي أمي كلمي أبوي كلمي أي حد وانجديني من الجوازة دي قبل ما تحصل!
موج: متخافيش.. هشوف أمي ولما أبوي يرجع هكلمه أكيد مش هيغصبك خليكي هنا.
خرجت موج من الغرفة وعيناها تطوف أرجاء المنزل بحثاً عن والدتها حتى رأتها تنزل من درج السطوح بخطوات متسارعة فاستوقفتها بعتاب حاد:
موج: خير يا ماي عريس إيه اللي جاي لفرح؟!
سعدية (بنبرة هادئة ومبتسمة): خير إن شاء الله.. عريس زين.
موج: مش قصدي زين ولا عفش قصدي يعني إيه أصلاً تدخّلوا حد قاصد فرح الدار؟ مين العبيط اللي يجوز بنت عندها 16 سنة؟!
سعدية (برفع حاجب وجفاء): ملكيش صالح يا موج بعدي روحك عن المواضيع دي.
موج: يعني إيه بتهزروا؟ أنتوا صوح واخدين الموضوع جد؟!
سعدية: اه جد الجد كمان وهياجوا بكرة ولو عجبت العريس وأهله هتتجوز كمان أسبوع!
موج (بدهشة وصدمة شلت لسانها): أسبوع هو فيه إيه أنتوا بتجوزوها ولا بتبيعوها في سوق العبيد؟! خير يا ماي شايفاكي ما صدقتي إيه.. عاوزة تتخلصي منها يعني؟!
سعدية (بحدة ونبرة غاضبة): قصدك إيه يا بت؟!
موج: انتي فاهمة قصدي حتى لو أبوي وافق انتي المفروض ميعجبكيش الأمر.. له ظاهرك مبسوطة وزي ما تكوني ما صدقتي هتخلصي من فرح بالذات!
سعدية (بسخرية وقسوة): وإيه كمان يا بت بطني؟ قصدك عشان مش أمها؟!
موج: اه.. ده قصدي!
سعدية: عشان نيتك سودة زي بختك إيه عاوزة إخواتك يقعدوا جارك ويعنسوا كيفك؟!
سقطت الكلمة كالصاعقة على صدر موج فسألت بصوت مخنوق:
موج: يعنسوا كيفي ليه؟ انتي كمان شايفاني معنسة؟!
سعدية: مش مهم أنا.. المهم الخلق شايفينك إيه!
موج (بحرقة ألم ونبرة مدافعة عن نفسها): أنا عندي 22 سنة تعرفي اللي قدي في اليابس ولا البندر دلوك بيعملوا إيه وعايشين كيف؟!
كلهم في العلام وعندهم طموحهم وأحلامهم مش بس قاعدين مستنيين راجل يلمهم ناس طبيعية مش زي هنا شايفيني معنسة!
سعدية: ملناش صالح باليابس والبندر لينا بالجزيرة اللي هتجوزي فيها شايفينك إيه اللي قدك معاهم عيلين وتلاتة وانتي محدش حتى بيطل في وشك..
آخر واحد اتقدمك مفكراش من ميتا وجنابك اتعدلتي عليه لما أهه.. قاعدة زي البيت الوقف!
حزنت موج وغار الكلام في حلقها من قسوة والدتها ثم قالت بنبرة منكسرة:
موج: ماشي يا ماي.. أنا عنست بس بردو فرح لساها صغيرة حرام عليكم ترموها للجواز من دلوك!
سعدية: والله دي حاجة ترجع لأبوكي انتي ملكيش تدخلي بعدين دي هتدخل بيت العمدة يعني هتكون ست هانم وليها سلطة وترفع مقامنا في الجزيرة كلها!
استغربت موج كثيراً وتجمدت ملامحها وهي تتساءل:
موج: بيت العمدة هايناسبو بيت نجار عادي.. يعني إيه.. هتجوز حد من عياله؟!
سعدية (بفخر واعتزاز): اه.. ومش أي واحد ده "جلال" اللي ليه شأن وشنشان واللي ميعرفوش يسمع عن مكانته!
اتسعت عينا موج وشهقت بصدمة عارمة:
موج: جلال وفرح أنتوا حصلكم إيه؟! ده راجل كبير!
تنحت سعدية بجفاء وسارت من جوار موج لتتركها واقفة بذهول وقالت وهي تغادر المكان دون أن تلتفت خلفها:
سعدية: خليكي في روحك ودوريلك على راجل يلمك!
وقفت موج في مكانها مذهولة تسري البرودة في أطرافها وهي لا تصدق ما يفعله والداها بقبول زواج طفلة من رجل بكبر جلال.
عادت موج إلى الغرفة بخطوات أثقلها الهم والتفكير.. استقبلتها فرح بعينين معلقتين بها تتوسلان أملًا:
فرح: عملتي إيه وأمي قالت إيه طمنيني!
التفتت موج إليها بنظرة هادئة تحاول بها بذر السكينة في قلب أختها الصغرى:
موج: لسه لما ياجي أبوي.. متقلقيش إن شاء الله خير.
فرح (بإنكاس ورجاء مفقود): يبقى مفيش فايدة!
موج: إن شاء الله فيه لسه محصلش حاجة.. اطمني.
**
ساد صمتٌ طويل بين أرجاء الدار وظلت موج تنتظر عودة والدها على أحر من الجمر.
وبعد أن انتهوا من تناول العشاء استغلت موج خلوّ الساحة وجلست جوار والدها لتفتتح معه الحديث بحذر:
موج: يا بوي.. عرفت إن فرح جاييها عريس؟
فايز (دون أن يرفع عينيه): اه.. عقبالك.
موج: عقبالي إيه يا بوي؟! انت عارف فرح عندها كام سنة ولساها في العلام.. مستعجلين عليها ليه؟!
فايز (بنبرة حاسمة وصارمة): نصيبها حضر ليه نردوه؟! بعدين أنا اتجوزت أمك وهي عندها 15 سنة يعني 16 زينة.. ناقصها إيه؟!
موج: مين قال إن جواز أمي في سن الـ 15 كان صح ده غير إن الزمن اختلف!
فايز: انتي عاوزه إيه يا موج؟
موج: يا بوي.. عارفة إن دول بيت العمدة بس الجواز مش غصب ولازم تفكر فينا إحنا مش في حد تاني!
التفت فايز إليها بجمود وهدوء مريب يقطع كل طريق للرجاء:
فايز: ريحي بالك.. أنا أصلًا اديت كلمتي للعمدة ومتدخليش يا موج!
موج: يا بـ...
فايز (بقاطعية ورفع أصبع التحذير): موج قولت متدخليش وبعدي عن أختك.. يا تقوليلها كلمة زينة يا تسكتي خالص وتبعدي نفسك عن السهراية دي!
صمتت موج وعجز لسانها عن الرد فقد بدا واضحاً أن القرار قد اتُّخذ وأُغلق الباب أمام أي نِقاش.
عادت إلى الداخل مطأطأة الراس ودلفت إلى الغرفة لتلحق بها خلود أولاً ومن خلفها فرح بعينين محمرتين.
فرح: عملتي إيه؟!
خلود (بقلة حيلة): باين على وشها.. مش محتاجة سؤال!
فرح (ببكاء مرير ينفطر له القلب): يعني إيه؟ كده خلاص هيجوزوني؟!
موج (بمحاولة لتسكين ألمها): لعله خير.. يمكن تعيشي مبسوطة دول بيت العمدة يعني هيكون وضعك زين هناك.
فرح (بحرقة وخذلان): والله مكملتيش كام ساعة عارفة وبقيتي تتكلمي زيهم ماشي.. زي ما انتوا عاوزين كلكم!
تركتهم فرح وغادرت الغرفة وهي تنتحب متوجهة إلى مضجعها.
جلست خلود على طرف الفراش وقالت بشرود:
خلود: العتب مش على أبوي.. يمكن أبوكي مش قادر يرفض عشان العمدة بس كيف هما يطلبوا لولدهم عيلة صغيره؟!
موج: له.. أبوكي قادر يرفض بعدين مش زعلان ولا حاجة باين عليه الفرحة إنه هيناسب جناب الحاكم !
قضتا وقتاً في الحديث والحيرة حتى وقفت موج قائلة:
موج: أروح أشوف فرح زعلت مني وأنا ماليش يد.
خرجت من الغرفة وتوجهت إلى غرفة أختيها الصغيرتين "فرح" و"ليلى".
**
دلفت للداخل فوجدت ليلى تمسك كتابها تدرس بجانب الفراش بينما كانت فرح مستلقية على التخت تغطي وجهها بالغطاء وصوت بكائها الخافض يملأ المكان.
جلست موج على أطراف الفراش وهزت كتفها برفق:
موج: فرح.. قومي دقيقة.
فرح (من تحت الغطاء): ملكوش صالح بيا!
موج: طيب قومي نتكلموا.
اعتدلت فرح وجلست وعيناها محاطتان بالسواد والدموع.
موج: أنا مش بتكلم زيهم.. أنا مش عاوزه أزيد همك بس أنا مرضياش وفي نفس الوقت مش قادرة عليهم.
فرح (بنبرة يأس حادة وشرارة خطيرة في عينها): أنا أقدر!
موج (بعقدة حاجبين): يعني إيه؟!
فرح: يعني لو تمموها في أي يوم أروح المدرسة أو حتى لو مرحتش تاني .. هروح المعدية وأرمي روحي في المي!
شهقت موج واندهشت من اندفاع تفكيرها فقالت بصرامة ورعب:
موج: وه انجنيتي هاتموتي كافرة؟!
فرح: خلي أبوي وأمي يفرحوا ويشوفوا هيجوزوا مين!
ليلى (بحماس طفولي وهي ترمش): أتجوزه أنا!
التفتت إليها موج باستغراب شديد وضيّقت عينيها:
موج: اخرسي يا بت انتي!
ليلى (وهي ترفع كتفيها بلامبالاة): عادي أنا زي فرح بينا بس ياجي خمس أو ست شهور!
ثم وضعت الكتاب من يدها وقالت بشغف:
ليلى: يا هبلة ده ولد الحاكم وكمان ريس الحرس عارفة يعني إيه.. الجزيرة كلها تحت يده ده غير بقى المال والعز
يعني لبس ودهب وحاجات ياما.. حليم ما يعرفش يجيبلك حتى خاتم أخره كيس لِبّ.
فرح (بضيق ورفض): وحليم ماله.. انتي أصلاً بتدخلي ليه؟!
ليلى (بغمزة وابتسامة خبيثة): على مين يا أختي؟!
موج (بنفاذ صبر وهي تُضيّق حدقتيها): هو ده طموحك يا بهيمة المال والعز؟!
امسكي كتابك وذاكري أحسن ما أقوم أخلع شعرك في إيدي دلوك!
ثم التفتت إلى فرح قائلة:
موج (بحرص وخوف ينهك صدرها): اوعاكي تفكري كده تاني!
فرح (بدموع متدفقة): مش هاتجوز يعني مش هاتجوز ولو غصبوني والله لندمهم!
موج: ربنا كبير.. جايز متعجبيهمش وهما اللي يرفضوا!
فرح: وأنا أستنى رحمتهم.. لو أعرِف أوصل للراجل ده كنت قولتله مش هاتجوزك!
صمتت موج فجأة وطنت في رأسها فكرة جريئة أضاءت عينيها بشرارة متمرّدة ثم التفتت إلى فرح وقالت بثقة:
موج: صوح.. معاكي حق!
فرح: يعني إيه؟
موج: إيه له.. بقولك إيه متخافيش وبكفاية عياط عندي حل.. طلعي الشياطين من رأسك وإن شاء الله هيجيب نتيجة.
فرح (بإمساك في قشة أمل): هتعملي إيه؟ وإيه الحل؟!
موج (بابتسامة غموض و تحدٍّ): ملكيش صالح قومي ذاكري أحسن وسيبيها عليّ!
فرح: مفيش حاجة هتتغير...
وقفت موج من مجلسها وقالت بعزم:
موج: إن شاء الله هتتغير.. ذاكري دلوك!
ثم فتحت باب الغرفة وغادرت مسرعة متوجهة إلى خلود لتكشف لها عن فكرتها المجنونة وتطلب مساعدتها.
