رواية حكاية حب الفصل الاول 1 بقلم ملك عبدالله


 رواية حكاية حب الفصل الاول

ـ أختك بتلف على خطيبك وهو على هواه، افهميها بقى!

ـ مستحيل! دي أختي وده خطيبي، إنتِ مستوعبة إنتِ بتقولي إيه؟ ده اسمه سوء ظن، ومينفعش أفكر بالطريقة دي أصلًا.

ـ للحظة دي مش فاهماكي يا آسية، بجد! كل حاجة قدام عينيكي وباينة، لكن عقلك فين معرفش!

ـ عقلي موجود، بس إنتوا اللي فاهمين غلط، وممكن بقى كفاية كلام عن الموضوع ده بجد كفاية!

حوّلت نظري للي قاعد قصادي، عيونه متثبتة على تليفونه، وكأنه مش موجود معانا بالأساس، ولا يعنيه أي حرف بيتقال.

ـ إيه يا عم أدهم، مش ناوي تعقل أختك؟ أنت شايف كلامها إزاي؟

رفع رأسه بهدوء مستفز، وقال ببرود موجه كلامه لـِ ليلى:
ـ كل واحد أدرى بمصلحته يا ليلى، وبنت خالك شايفة إنها صح، يبقى خلاص، اللي تشوفه.

كان رده بالنسبالي كارثي! مش قادرة أفهم إزاي أدهم بقى بيتعامل معايا بالعدوانية دي؟ وإزاي مش فارق معاه اللي بيحصل في حياتي إزاي قدر يبعد نفسه عني بالشكل ده، وكأن مستقبلي ومصيري مالهمش أي علاقة بيه؟!

ـ بس دي حياتي يا أدهم! مستقبلي! إزاي شايف إن أنا بس اللي أشوف مصلحتي وأنت؟

بصلي بنظرة خالية من أي تعبير، ورد بفتور:
ـ عايزة إيه يا آسية؟ مش أنتِ اختارتي خلاص يبقى استحملي اختياراتك.

بصيتله بغضب، ورديت بتعالِ وأنا بحاول أخفي الوجع اللي سببهولي كلامه:
ـ متقلقش، أنا فعلًا اخترت وواثقة في اختياراتي. أنا وعُمر بنحب بعض، وعمره ما هيبص لأختي ولا لغيرها؛ عشان هو بيحبني، وأنا كمان بحبه.

من غير ما يضيف كلمة واحدة، قام من مكانه، خد موبايله ومفاتيحه، وساب القعدة كلها ومشي.

ـ طب هو مشي ليه؟ أومال مين اللي هيروحني؟

هزّت ليلى كتافها وردّت بمنتهى اللامبالاة:
ـ ابقي قابليني لو جه قبل الفجر، باتي هنا وخلاص.

استغربت كلامها، وبصيتلها باستفهام:
ـ هو بجد كل يوم بيرجع الفجر؟ من إمتى وهو كده؟

ـ من زمان، باين عليه مجروح.

كانت بتلمّح لحاجة، بس أنا مفهمتش قصدها. مجروح من إيه؟ أدهم بالنسبالي راجل مثالي، مفيهوش غلطة، ومش من النوع اللي ممكن يتجرح بسهولة، أو على الأقل ده اللي كنت متخيلاه عنه!

ـ طب هقول لبابا وعمر الأول إني هبات هنا.

رفعت حاجبها وردّت باستنكار:
ـ أبوكي وفهمنا، هتقوليليه ليه أومال خطيبك ده تقوليله ليه مش فاهمة، هو الوصي عليكي ولا إيه؟

اتنهدت بضيق من طريقة كلامها، ورديت:
ـ معرفش دماغك في دماغه ليه! عمر محترم، وابن صاحب بابا المفضل، ومستحيل تكون تربيته وأخلاقه زي ما بتقولي. وبعدين إحنا بنحب بعض.

هزّت رأسها ببرود، وقالت بسخرية:
ـ آه آه، بتحبوا بعض! أوعى قصة الحب اللي منعرفش عنها حاجة دي بدأت إمتى يا ترىٰ!

سبتها تكمل كلامها من غير ما أرد، وطلعت أكلم بابا. وفعلاً كلمته، ووافق من غير أي اعتراض، وده كان الطبيعي عمومًا؛ لأن ده مش بيت خالو وبس، دي دار العيلة كلها. أهل ماما كلهم هنا، وجدو وتيتا كمان، ووجودي وسطهم مش غريب عليّا، بالعكس، ده شيء متعودة عليه من زمان.

بعد ما خلصت المكالمة، خرجت بره شوية، محتاجة أتنفس هوا وأبعد عن جو الكلام والخناقات اللي مش بتنتهي، وفي نفس الوقت أعرف أكلم عمر وأطمنه إني هبات هنا.
طلعت موبايلي ورنيت عليه، أول مرة مردش، وتاني مرة، وبعد وقت طويل من الرن، رد أخيرًا.

ـ عُمر.

ـ أيوه حبيبتي، فيه حاجة؟

ـ لأ، بس كنت هطمن عليك.

ـ أنا كويس، إنتِ عاملة إيه؟

ـ كويسة الحمد لله.

ـ تمام، ماشي، هبقى أكلمك بعدين عشان أنا دلوقتي مع صحابي. سلام.

وقبل حتى ما ألحق أرد، كانت المكالمة انتهت!

فضلت باصة لشاشة موبايلي للحظات، وأخدت نفس عميق وأنا بحاول أظبط ضربات قلبي اللي كانت أسرع من الطبيعي.

وفجأة، كلام ليلى رجع يتردد في دماغي، بنفس نبرتها ونفس نظرتها، وكأنها لسه واقفة قدامي:

«أختك بتلف على خطيبك وهو على هواه».

الجملة كانت غريبة عليّا، تقيلة على قلبي، ومش قادرة أستوعب إزاي ممكن تكون حقيقة أصلًا!

يعني إيه أختي وخطيبي؟ إزاي ممكن أفكر فيهم بالطريقة دي؟!
مستحيل دي أختي، وده خطيبي.

حتى لو علاقتي بيها مكنتش مثالية، وحتى لو كان بينا خلافات كتير، دول في النهاية أقرب اتنين ليا، والناس اللي المفروض أكون مطمنة معاهم، مش خايفة منهم.

بس ليه كلام ليلى مخرجش من دماغي؟

الحكاية بدأت من خمس شهور، لما بابا قالي إن ابن صاحبه متقدم ليا. وقتها كنت في مرحلة صعبة من حياتي، مرحلة كنت بحاول فيها ألمّ شتات نفسي،وأبني حياة جديدة، وأتخلص من كل حاجة وجعتني قبل كده. 

كنت بدور على بداية مختلفة، على حاجة تطمني إن اللي جاي ممكن يكون أحسن، وإن مش كل اللي بنخسره بيكون خسارة، ساعات بيكون تمهيد لحاجة أجمل.

لما بابا كلمني عن عمر، حسيت إنها إشارة من ربنا، يمكن دي تكون عوضه ليا، الشخص اللي هيقدر يخليني أنسى كل اللي فات، ويكون سند وضهر أقدر أستند عليه من غير ما أخاف إني أقع.
وبالفعل وافقت.

عمر كان من وجهة نظر أي حد راجل مفيهوش غلطة؛ ناجح في شغله، مسؤول عن نفسه، بيعرف يتصرف، وعنده من الاستقرار اللي يخلي أي بنت تتمناه زوج ليها. اتقدم رسمي، واتعملت خطوبة بسيطة وسط العيلة، وكنت يومها فرحانة بشكل يمكن أكبر من حجم المناسبة نفسها. 

كنت متمسكة بأمل جديد، أمل يخليني أبتسم من قلبي، وأصدق إن المرة دي مختلفة.

لكن مع الوقت بدأت أكتشف إن الصورة اللي رسمتها في خيالي مش هي الحقيقة.

عمر مكنش الشخص اللي تخيلته، أو يمكن أنا اللي كنت متخيلة فيه حاجات مش موجودة من الأساس. 

كان فيه مسافة بينا بتكبر يوم بعد يوم، مسافة مش عارفة أحدد سببها، ولا عارفة إمتى بدأت بالضبط.

مكالمات قصيرة، اهتمام بييجي على فترات، أسئلة محفوظة بتتكرر كل يوم، وكأننا بنؤدي واجب اجتماعي مش بنبني حياة بين اتنين المفروض إنهم بيحبوا بعض.

كان ممكن أقعد أحكيله عن يومي بالساعات، وفي الآخر أكتشف إنه مش فاكر نص الكلام، أو إنه كان مشغول بحاجة تانية وأنا بتكلم. كنت بحاول أشاركه تفاصيل حياتي، أفكاري، مخاوفي، وحتى الحاجات الصغيرة اللي بتفرحني، لكنه مكنش بيبذل نفس المجهود عشان يعرفني.

أنا بطبيعتي عشوائية شوية، مش بعرف أرتب مشاعري ولا أفكاري، ساعات بتكلم كتير وساعات بسكت فجأة، وبحب التفاصيل الصغيرة اللي يمكن غيري يشوفها تافهة، لكن بالنسبالي بتفرق جدًا. 

كنت محتاجة حد يفهم طبيعتي، يستوعب اندفاعي لكن عمر كان عكس ده تمامًا.

كان بيحب كل حاجة محسوبة، كل حاجة في مكانها، وكل حاجة تمشي بالطريقة اللي هو شايفها صح. 

ومع الوقت بقيت أحس إني مطالبة أغير من نفسي عشان أكون مناسبة ليه، أختار كلامي، أحسب تصرفاتي، وأفكر ألف مرة قبل ما أحكيله حاجة ممكن تضايقه.

والغريب إني كنت بعمل كل ده من غير ما أشتكي.
كنت ببرر غيابه بانشغاله، وبروده بطبيعته، وقلة اهتمامه بضغوط شغله، وكل مرة كنت بحس فيها إني مش مهمة بالنسباله، كنت بدور على عذر جديد أحطه قدام عيني عشان ماضطرش أواجه الحقيقة.

يمكن لأني كنت خايفة أبدأ من جديد، أو لأني كنت متعلقة بفكرة إن ربنا عوضني، فكان صعب عليّا أتقبل إن العوض اللي استنيته ممكن يكون مجرد اختيار مش مناسب.

كنت كل ما أحس إن العلاقة بتفلت من إيدي، أتمسك بيها أكتر، وأقنع نفسي إن بعد الجواز كل حاجة هتتغير، وإن القرب هيخلق بينا تفاهم، وإن الحب ممكن ييجي مع العِشرة.

لكن سؤال كان بيطاردني كل ليلة ومش بجرؤ أنطقه حتى بيني وبين نفسي
هو أنا فعلًا بحب عمر؟ ولا أنا بس بحب فكرة إن فيه حد اختارني، وإن أخيرًا بقى عندي حد أقدر أقول عليه سندي؟

كنت بهرب من الإجابة، لحد ما بدأت ألاحظ حاجات مكنتش باخد بالي منها، نظرات، تصرفات، ومواقف صغيرة كانت بتتكرر بشكل غريب.

والأغرب من كل ده إن أدهم، بدأ يتغير معايا بشكل مش مفهوم.

بقى عصبي، قليل الكلام، وكل ما أجيب سيرة عمر قدامه ألاقي ملامحه اتغيرت، وكأنه شايل كلام كتير جواه ومش عايز يقوله.

مكنتش فاهمة إيه اللي حصل له، ولا ليه بقى بيتعامل معايا كأني شخص غريب عنه.

أدهم بالنسبالي حاجة كبيرة.. كبيرة أوي، أكبر من إني أعرف أوصفها بكلمتين.
أنا قفلت صفحته من زمان، أو على الأقل كنت بحاول أقنع نفسي بكده، لكن الحقيقة إنه عمره ما خرج من حياتي فعلًا.

كان محور حياتي، موجود حتى في غيابه، قريب مني رغم المسافة اللي حطيناها بينا، ورغم الحدود اللي كان لازم تفضل موجودة؛ لأن طبيعة تعاملنا مكنتش تسمح بأكتر من كده.

مكنتش محتاجة منه حاجة، ولا كنت مستنية اهتمام أو سؤال، مجرد إني عارفة إنه موجود، وإنه في نفس الدنيا اللي أنا فيها، كان كفاية يخليني مطمنة.

وجوده كان بيعمل فرق، حتى في الأيام اللي مكنتش بشوفه فيها، وحتى في الأوقات اللي مكنتش بنتكلم فيها. كان فيه إحساس جوايا إن مهما حصل، فيه أدهم، وإن الدنيا مهما ضاقت هتفضل أهون طول ما هو موجود في حياتي.
مكنتش عارفة إن الإنسان ممكن يتعلق بمجرد وجود شخص بالشكل ده، ولا إن غيابه ممكن يخلي كل حاجة حواليه تفقد طعمها.

لكن دلوقتي..
مفيش أدهم.
مفيش صوته، ولا وجوده اللي كنت باخده كأمر مُسلّم بيه، ولا حتى نظراته اللي كنت بفهم منها حاجات عمره ما قالها.
مفيش راحة، مفيش أمان، مفيش سعادة.

والأصعب بجد إني مش عارفة أتصرف إزاي في غيابه، ولا عارفة أرجع نفسي لنفسي من غير ما يكون موجود.

وفي النهاية مفيش أدهم ومفيش آسية اللي كنت أعرفها.


تعليقات