رواية حكاية حب الفصل الثاني
آخر مرة غنيتلي فيها كانت من خمس سنين وآخر مرة سمعتك بتغني كانت من خمس شهور!
رفع عينيه ناحيتي، وملامحه مفيهاش أي تعبير واضح، قبل ما يسألني ببرود:
– وإنتِ ليه لسه فاكرة يا آسية؟
سِكت ثـانية، وكأن سؤاله سحب مني كل الكلام اللي كنت محضّراه، لكن قدرت اسأله بصوت مخنوق:
– أنت ليه بقيت غريب عني يا أدهم؟
بص ليّ لـ دقيقة، وقال بنبرة هادئة زادت من وجعي:
– جاية هنا ليه يا آسية؟
«كنت نازلة أقعد تحت، النوم كان مجافيني، ومكنتش متخيلة إن الليلة دي هتخليني أفتكر حاجات كنت فاكرة إني نسيتها.
وأنا نازلة، سمعت صوت حد بيغني وقفت مكاني، متصنمة، مش قادرة أخد خطوة واحدة ولا حتى أستوعب إن الصوت ده ممكن يكون صوت أدهم.»
أدهم!
صوته كان دايمًا حاجة استثنائية، مدهشة، كأنه مش بيغني لمجرد الغُنا، كأنه بيحكي حكاية محدش غيره يقدر يحكيها.
زمان، كنت بتمنى يكون صوتي حلو زيه عشان أقدر أنافسه، وكنت بحسده أوقات على الموهبة اللي ربنا ادهاله، لكن مع الوقت، الحسد ده اتحوّل لإعجاب، والإعجاب بقى عشق لصوته ولتفصيلة فيه محدش غيري كان واخد باله منها.
كان نفسي شريك حياتي يكون بيعرف يغني، ويكون صوته حلو، وكنت كل ما أتخيل الأمنية دي، ألاقي أدهم هو أول شخص بييجي في بالي.
مكنتش أعرف إن الإنسان ممكن يفضل متعلق بتفصيلة في حد، حتى بعد ما يبقى الحد ده غريب عنه.
– كنت فوق مع ليلى، وكنت نازلة أقعد تحت، سمعت صوتك فجيت.
هزّ رأسه بصمت، وكأنه استقبل إجابتي من غير ما يكون عنده أي تعليق عليها، و عاد للصمت من جديد.
كنت لسه عايزة أسمعه، كان نفسي يكمل غُناه، يمكن عشان أسترجع لحظة من لحظات زمان، أو يمكن عشان الصوت ده كان وحشني أكتر مما كنت مستعدة أعترف.
لكن فضّلت الصمت أنا كمان.
لفيت ناحيته وبصيت له، وبعد لحظة تردّد سألته بهدوء:
– أنت شايف عُمر خطيبي مناسب ليا يا أدهم؟
رفع عينيه ليا، فكمّلت قبل ما يرد:
– أنت طول عمرك معايا وجنبي، حتى لو من بعيد، ورأيك بيفرق معايا أوي.
مش قادرة أتخيل إنك شايفني باخد قرار ممكن يوجعني، قرار ممكن يرميني في النـ.ار،وإنت واقف ساكت، من غير حتى ما تحاول تفهمني إذا كنت ماشية في الطريق الصح ولا لأ.
بص ليّ بنظرة طويلة قبل ما يسألني:
– يعني أنتِ شايفة إنك بخطوبتك من عُمر هتترمي في النـ.ار، ومكمّلة عادي، ومستنياني أنا اللي أوقفك؟
اتلخبطت من طريقته، ورديت بسرعة:
– أنا مقولتش توقفني، بس تصدقني وتصدق إن عُمر إنسان كويس. ليه من وقت الخطوبة وأنت بتعاملني بجفا؟ أنا عملتلك إيه عشان تبقى بالشكل ده معايا؟
– معاملتي متغيّرتش معاكي يا آسية طول عمري بعاملك زي ما بعاملك دلوقتي، من إمتى وأنا كنت قريب للدرجة اللي تخليكي تحسي إني بَعِدت؟
سِكت.
هو عنده حق.. يمكن فعلًا عمره ما كان قريب بالشكل اللي أنا متخيلاه، ويمكن أنا اللي كنت بدي لكل موقف منه معنى أكبر من حجمه.
بس أنا مكنتش منتظرة منه المعاملة دي كان جوايا وجع خفي، وجع مش عارفة أحدد بدايته ولا حتى أشرح سببه.
نغزات صغيرة ومؤلمة في قلبي، بتزيد مع كل كلمة بيقولها، وفي نفس الوقت ملامحي ثابتة، وصوتي هادي، وكأن مفيش حاجة بتحصل جوايا.
كنت بتوجع من غير ما أبين، وبخسر حاجة مش عارفة أسميها، وكل اللي كنت متأكدة منه إني مكنتش عايزة أخسره بالشكل ده.
بصيت له للمرة الأخيرة وقلت:
– كنت أخويا يا أدهم بس فهمت خلاص.
ابتسمت ابتسامة باهتة، وكملت:
– وعامةً، شكرًا على كل حاجة عملتها معايا حتى لو أنت مش شايفها، بس كفاية إني أنا شوفتها ومقدّراها. شكرًا يا ابن خالي.
مكنتش مستنية منه رد، ولا حتى كنت قادرة أستحمل أسمعه.
لفيت ومشيت، وسِبته ورايا، ومع كل خطوة كنت باخدها بعيد عنه، كان فيه إحساس بيقولي إني مش بس بسيب مكان كنت واقفة فيه.
أول ما خيط النهار بدأ يشق عتمة الليل، ما استنيتش أكتر من كده، لمّيت حاجتي ومشيت على طول. كنت محتاجة أبعد عن أدهم، وعن كلام ليلى اللي فضِل يرن في وداني طول الليل، خصوصًا اتهاماتها لأختي وخطيبي اتهامات مش قادرة أستوعبها، ولا قادرة في نفس الوقت أطردها من دماغي.
وصلت البيت، ولما دخلت لقيت بابا وماما ومريم لسه قاعدين بيفطروا.
بس الغريب إن عيني راحت لمريم تلقائيًا، وفضلت متعلقة بيها وأنا بحاول أقرأ ملامحها، أدور على أي حاجة ممكن تكشفلي الحقيقة.
هل فعلًا ممكن مريم تعمل فيّا كده؟ أختي اللي عارفاها طول عمري، واللي المفروض تكون أقرب الناس ليا؟
رجع صوت ليلى يتردد في دماغي من جديد:
«دي مريم.. مريم اللي بتغير منك ومش بتحبك، وإنتِ عارفة ده كويس».
اتنهدت بضيق، وحاولت أطرد أفكارها من دماغي، قبل ما أروح لبابا وماما وأسلم عليهم بحب، أما مريم فاكتفيت بنظرة سريعة، من غير ما أديها حتى فرصة إني أبصلها أكتر.
- آسية، اقعدي يا حبيبتي افطري معانا.
سحبت الكرسي وقعدت بهدوء، وحاولت أندمج معاهم، لكن عقلي كان في حتة تانية خالص.
كل كلمة سمعتها من ليلى كانت بتفتح جوايا باب جديد من الشك، وكل ما أبص لمريم أحس إني بقيت غريبة عنها، وكأني بشوفها لأول مرة.
لحد ما قطعت أفكاري بصوتها وهي بتوجه كلامها ليا:
- أدهم عامل إيه يا آسية؟
رفعت عيني ليها، وبصتلها لثواني. نبرتها كانت عادية بما يكفي إنها تعدّي على بابا وماما من غير ما يلاحظوا حاجة، لكن أنا كنت فاهماها كويس. كان في حاجة مستفزة في طريقتها، وكأنها بتختبر رد فعلي أو بتلمّح لحاجة مش عايزة تقولها صراحة.
رديت وأنا برجع عيني لطبقي:
- كويس.
ابتسمت ابتسامة صغيرة، باردة ومستفزة، ورجعت تكمل أكلها بمنتهى الهدوء، كأنها ما قالتش حاجة.
فضلت باصة لطبقي شوية، وبعدين رفعت عيني ناحيتها من غير ما تحس.
لأ.. مستحيل.
مستحيل مريم تكون بتجري ورا عمر، أصل واضح أوي مريم بتجري ورا مين.
طلعت أوضتي عشان أبدّل لبسي وألحق الجامعة، لكن قبل ما أدخل وقفت مكاني، وعمر جه في بالي من تاني.
مسكت موبايلي ورنيت عليه، مرة واتنين، لكن مفيش أي رد.
فضلت باصة للشاشة شوية، مستنية يمكن يرجع يتصل، لكن لما مفيش حاجة حصلت، قررت مبقاش أنا اللي أجري ورا حد. رميت الموبايل على السرير، وقعدت جنبه بزهق، وأنا بمرر إيدي على وشي بتعب.
وبصوت مسموع بدأت أتكلم مع نفسي:
- مش فاهمة إيه اللي أنا فيه ده!
يعني يا رب، أنا بدأت أحاول أشوف حياتي وأفكر في نفسي، وأبطل أعلّق كل حاجة على حد تاني، لكن دلوقتي إيه اللي بيحصل؟ هو عمر فعلًا الاختيار الصح، ولا أنا بضحك على نفسي؟
سِكت للحظة، وبعدين كملت وأنا ببص للسقف:
- يا ترى أنا اللي بحلم؟ هو كل الرجالة كده؟ ولا أنا اللي مستنية حاجة مش موجودة أصلًا؟ أنا مش عايزة كتير، أنا بس عايزة أحس إني مع الشخص الصح، إني مش مضطرة أفضل أسأل نفسي كل يوم أنا واقفة فين من حياته!
فجأة سكتّ، وكأن في حاجة جوايا كانت بتحاول تخليني أواجه حقيقة أنا مش مستعدة أشوفها، حقيقة كل ما أقرب منها أرجع خطوة لورا.
غمضت عيني للحظات، وأخدت نفس طويل قبل ما أقرر أوقف التفكير.
يمكن أنا مكبرة المواضيع، ويمكن بكرة كل حاجة تهدى، ويمكن الأيام تروق من نفسها.
قمت أجهز نفسي، وخلصت لبسي، ولمّيت حاجتي ونزلت، لكن وأنا في طريقي لباب البيت قابلت مريم.
كانت واقفة بتاكل تفاحة، مستندة بكتفها على الحيطة بمنتهى البرود. مريم أكبر مني بتلات سنين، ومتخرجة.
أول ما شافتني، قربت خطوتين وقالت بنبرة هادية:
- إزيك يا آسية؟
وقفت وبصتلها باستغراب مش عارفة هي عايزة إيه المرة دي، ولا إيه اللي ورا الهدوء المفاجئ ده.
رديت بفتور:
- عايزة إيه يا مريم؟
رفعت حاجبها وهي بتقضم حتة من التفاحة، وبعدين قالت:
- سمعت إن أمك عازمة خطيبك وأهله على الغدا النهارده.
فضلت باصة ليها من غير رد، فكملت بابتسامة خفيفة:
- حاولي تيجي بدري بقى، عشان تلحقي تهتمي بنفسك وشكلك قدامهم.
اتغيرت ملامحي من طريقتها، لكني مديتهاش الفرصة إنها تلاحظ ضيقي. عديت من جنبها من غير ما أنطق بحرف، واتجهت ناحية ماما، والسؤال بيلح عليّا بشكل غريب.
لقيتها واقفة في المطبخ، فقربت منها وسألتها مباشرة:
- ماما، هو عُمر معزوم عندنا النهارده؟
بصتلي بابتسامة وهي بتكمل اللي في إيدها:
- أيوه يا حبيبتي، هو وأهله. أبوكِ عزم أهله امبارح وإنتِ مكنتيش هنا، ومريم عزمت عُمر.
وقفت مكاني وبصيتلها باستغراب شديد.
- مريم؟!
بصتلي ماما وكأنها مش فاهمة سبب استغرابي:
- أيوه يا حبيبتي، كنا هنكلمك عشان تبلغيه، بس هي قالت تكلمه أحسن، ما إنتِ كنتِ مشغولة عند خالك.
فضلت ساكتة، وعقلي بيحاول يستوعب الكلام.
مريم هي اللي عزمت عمر؟
ابتلعت ريقي وأنا بحاول أحافظ على هدوئي قدام ماما، لكن سؤال واحد فضل يلف في دماغي:
هو إيه بالظبط اللي بيحصل من ورايا؟
كل حاجة غلط.. كل حاجة غلط!
مش فاهمة إيه اللي بيحصل، وليه كل شوية أكتشف حاجة جديدة مكنتش أعرفها.
ليه مريم تكلم عمر؟ وليه معاها رقمه من الأساس؟ وإمتى أخدته؟ وليه حاجة زي دي تحصل وأنا معرفش عنها حاجة؟ والأهم من كل ده ليه عمر نفسه مقاليش؟!
فضلت واقفة مكاني للحظات، بحاول أرتب أفكاري، لكن كل سؤال كان بيفتح وراه أسئلة أكتر.
روحت الجامعة وأنا مش قادرة أركز في أي حاجة، حتى كلام صحابي مكنتش بسمعه كويس. كنت كل شوية أمسك موبايلي وأبص على اسمه، وأرجع أحطه تاني.
لحد ما في الآخر مقدرتش أستحمل
فتحت اسمه ورنيت عليه، والمرة دي رد بعد الرنة التانية.
-ألو.
أخدت نفس قبل ما أتكلم:
-صباح الخير.
-صباح النور يا آسية، إيه الأخبار؟
نبرته كانت عادية جدًا، وده زاد ضيقي أكتر.
-الحمد لله، كنت عايزة أسألك عن حاجة.
-خير يا حبيبتي؟
سِكت للحظة، وبعدين سألته مباشرة:
-مريم كلمتك إمتى؟
-مين مريم؟
غمضت عيني بضيق ورديت:
-أختي يا عمر، مريم أختي!
ضحك بخفة وكأنه افتكر:
-آه، مريم! مالها؟
-هي كلمتك إمتى؟
-امبارح تقريبًا، ليه؟
-وإنتوا اتكلمتوا في إيه؟
جالي رده بكل بساطة:
-يا آسية، هو تحقيق؟ البنت كلمتني عزمتني على الغدا عندكم، إيه المشكلة؟
ضغطت على الموبايل في إيدي وأنا بحاول أتحكم في نبرة صوتي:
-مفيش مشكلة، بس أنا مستغربة إن أختي تكلم خطيبي وتدعيه على الغدا من غير ما أعرف، والأغرب إنك مقولتش ليا!
رد ببرود:
-يا حبيبتي ما الموضوع مش مستاهل، هي عزمتني وخلاص، وإنتِ كنتِ مشغولة عند خالك، إيه اللي يضايق في كده؟
-مش موضوع يضايق يا عمر، أنا بس بسألك ليه مقولتش!
-يا آسية، هو أنا لازم أبلغك بكل مكالمة بتجيلي؟ دي مكالمة عادية جدًا، وبعدين مريم أختك مش واحدة غريبة!
سكت، مش لاقية رد مناسب، لكن طريقته كانت مستفزة بشكل خلاني أحس إني أنا اللي غلطانة لمجرد إني بسأل.
كمل بنفس الهدوء:
-المهم، أنا هكون عندكم على الغدا، عايزة حاجة أجيبهالي معايا؟
بصيت قدامي بشرود، وبعدين رديت بفتور:
-لا، شكرًا.
-خلاص يا ستي، أشوفك على خير.
-سلام.
قفلت المكالمة، وفضلت ماسكة الموبايل في إيدي، مش عارفة أنا متضايقة من إيه أكتر؛ من مريم اللي بتتصرف مع خطيبي من ورايا، ولا من عمر اللي شايف إن مش من حقي حتى أعرف!
بعدها بـدقايق، ولسه بفكر في مكالمتي مع عمر، لقيت اسم أدهم بينور على شاشة موبايلي.
قلبي دق بسرعة غريبة، وبصيت للاسم ثواني قبل ما أرفع الموبايل لودني وأرد بصوت خافت:
-ألو.
جالي صوته من الناحية التانية، هادي كعادته:
-إنتِ فين؟
-في الجامعة، ليه؟
-طب أنا جايلك، خليكِ مكانك.
اعتدلت في وقفتي باستغراب، وسألته:
-إنت جاي الجامعة ليه يا أدهم؟
-عايز أشوفك.
سكتّ للحظة، مش عارفة أرد بإيه، خصوصًا آخر مرة بينا مكنتش مريحة.
قلت بتردد:
-طب في حاجة؟
-لما أوصلك هنتكلم.
-أدهم، أنا عندي محاضرة كمان شوية.
رد بنفس هدوئه:
-مش هعطلك، عشر دقايق وهكون عندك.
وقبل ما أقدر أسأله عن أي حاجة تانية، أنهى المكالمة.
فضلت باصة للموبايل، وقلبي مش عارف يهدى، مش عارفة هو جاي ليه، ولا إيه الكلام اللي مستني يقولهولي المرة دي
بس كان عندي إحساس إن المقابلة دي مش هتعدي عادي.
بعد حوالي ربع ساعة، لقيت أدهم بيرن عليّا من جديد، بيقولي إنه وصل ومستنيني تحت.
لميت حاجتي وخرجت أقابله، وأول ما عيني جت عليه لقيته واقف جنب عربيته، ساند بضهره عليها وإيده في جيبه، وعينيه بتدور عليّا لحد ما لمحني.
قربت منه بخطوات مترددة، وقلبي بدأ يدق أسرع من غير ما أفهم السبب.
-أدهم!
رفع عينيه ليا وبصلي بهدوء، قبل ما يقول:
-اطلعي، نروح مكان عشان نعرف نتكلم.
بصيتله باستغراب، وحاولت أفهم من ملامحه إذا كان في حاجة حصلت:
-نتكلم في إيه؟ إيه اللي حصل يا أدهم؟
مردش، وكل اللي عمله إنه لف وفتحلي باب العربية، مستنيني أركب.
وقفت لحظة ببصله، لكن لما لقيته مصمم على صمته، ركبت وأنا عقلي مليان أسئلة، ومش فاهمة هو عايزني في إيه بالظبط.
ركب جنبي وشغّل العربية، وانطلقنا من غير كلمة واحدة.
الطريق كله عدى في صمت غريب، كنت كل شوية أبص ناحيته بطرف عيني، مستنية يفتح كلام أو حتى يلمّح، لكنه كان مركز في الطريق، وملامحه مش بتكشف أي حاجة
وأنا من جوايا بدأت أقلق.
بعد شوية، وقف العربية قدام كافيه هادي، نزل وفتحلي الباب، وبعدها دخلنا سوا.
اختار ركن بعيد وقعدنا قصاد بعض
فضل ساكت ثـواني، وأنا بصراحة مكنتش قادرة أستحمل فضولي أكتر من كده.
-أدهم، ممكن تفهمني إحنا هنا ليه؟
بصلي نظرة طويلة قبل ما يرد:
-عشان في كلام لازم تسمعيه مني يا آسية ومش عايزك تقاطعيني قبل ما أخلص.
-فضلت باصة لأدهم وأنا مستنية يكمل، لكن ملامحه كانت جدية بشكل مقلق، لحد ما أخد نفس وبدأ يتكلم:
-لما قولتيلي امبارح إنك مش هتشوفني بترمي في النـ.ار وأنا أسيبك تترمي فيها، كان عندك حق.
عقدت حواجبي باستغراب، لكنه كمل من غير ما يسيبلي فرصة أسأله:
-بس مع إصرارك الغريب على عمر، وإنك بتحبيه ورافضة تشوفي أي حاجة على حقيقتها، قررت أجيبلك الدليل بنفسي.
بصيتله بعدم فهم، وقلبي بدأ يدق أسرع.
-دليل إيه؟!
مال بجسمه لقدام شوية، وثبّت عينيه في عينيّا وقال بجدية:
-علاقات عمر المتعددة، وإنك مش الوحيدة اللي بيكلمها، وإن في بنات كتير في حياته غيرك ومن ضمنهم مريم.
اتسمرت مكاني، وحسيت إن الكلمة الأخيرة اتقالت بصوت أعلى من كل اللي قبلها.
-مريم؟!
خرج صوتي ضعيف، وكأني مش متأكدة إني سمعت صح.
-مريم..مريم أختي؟!
هز راسه بهدوء، وده كان كفاية يخليني أتوتر أكتر.
-أيوه يا آسية، مريم.
ضحكت ضحكة قصيرة ومتوترة، وهزيت راسي برفض:
-لا، استنى إنت بتقول إيه؟ إيه علاقة مريم بعمر أصلًا؟ وإنت عرفت الكلام ده منين فين الدليل أنا واثقة فيهم هتلاقيهم بيتكلموا كلام عادي دي طبيعية مريم
لكن أكتر من اللي بتقوله أكيد لاء،أنتَ بتتكلم عن عمر خطيبي ومريم أختي
بصلي للحظات، وكأنه بيختار كلماته بعناية، قبل ما يقول:
-آسية، أنا مش جاي أقولك كلام وخلاص، ولا جاي أوقع بينك وبين أختك، أنا جاي أقولك الحقيقة اللي إنتِ مش عايزة تشوفيها.
اتنهدت بعصبية:
-طب قول الحقيقة دي بدل اللف والدوران!
سكت لحظة، وبعدها قال جملة خلت الـ.دم ينسحب من وشي ويأكدها:
-أنا وأنتِ عارفين إن مريم مش أختك يا آسية.
فضلت باصة له، مش مستوعبة كلامه، وحسيت إن كل الأصوات حواليا اختفت فجأة.
-يعني إيـه؟
