رواية ورطة لقائنا الفصل الاول
- بقالك قد إيه بتخونها معايا؟
بصلي ومردش، ضحكت بسخرية وكملت:
- ما ترد.. بقالك قد إيه بتخون مراتك معايا!
مردش، فقُمت من مكاني.. مسكت شنطتي وكنت همشي مسك ايدي، كمل بصوت خافت:
- مريم.. اسمعيني، علشان خاطري اسمعيني.. أنا بحبك من الأول، طول عمرك حبيبتي، حتى لما اتجوزتها اتجوزتها علشان الظروف حكمت بكده
بصيت له بعدم تصديق، ضحكت بسخرية وشديت منه ايدي بعُنف:
- أنتَ مستكفتش بإنك جبان، أنت رجعت بعد كل ده ترسم عليا الحبتين بتوع الحبيب اللي اتجبر يمشي.. وبغبائي صدقتك، متجوز ومعاك عيل مكملش السنتين يا جاحـ.د! ابنك ذنبه ايه في اللي بتعمله..
سكتت ثواني وكملت بإستنكار:
- ومراتك! مراتك ذنبها ايه تعيش القر.ف ده.. أنتَ اصلًا كده بتخون مين فينا يا عمر؟
بعدت خطوة علشان مضربهوش، بعدين رجعت تاني كملت بإنفعال:
- أنتَ.. أنتَ مريض نفسي، صدقني هفضـ.حك، هقول لأمك وهقول لأخواتك، هقول للست اللي مخدوعة فيك..
مسحت دموعي وضغطت على شنطتي وأنا ماشية بسرعة، جيه ورايا مسك ايدي وكمل:
- مريم.. اسمعي أنا مش فارقلي حد غيرك قولي للي تقوليه أعملي اللي تعمليه، أنا عايزك أنتِ
شديت ايدي منه، وزقيته بعيد عني:
- هبلغ عنك لو قربت مني تاني.. هقول إنك بتتعرضلي، اياك تيجي جنبي تاني.
خرجت بسرعة، وبنفس سرعتي كان ورايا.. وقفت تاكسي وركبته، حاول يفتح الباب قفلته في وشه وطلبت من السواق يمشي بسرعة، كنت حاسة بأنهيار جوايا، ومش قادره اداري حتى صدمتي فيه، مكنتش عارفة أعمل إيه، حاسة إن كل جزء جوايا مشلول.. مش عارفة اتصرف ازاي أو أقول لمين، إن حبيب عمري وأول راجل احبه في حياتي، الشخص اللي فكرت إن حبنا خلص وحكايته خلصت، رجع تاني على إنه راجل ناضج وعاقل، خطوبتنا كانت هتبقى كمان اسبوع!
مسحت دموعي وأنا ببص للطريق بتعب، سندت راسي وأنا بتنهِـد، وكل اللي في بالي سؤال واحد؛ ليه رجع طلاما هو لقى حياته بعيد.. ليه يأذي اتنين!
"مكُنتش أعرف قبل النهارده إن العيون دي تعرف تخون بالشكل ده، ولا كنت أصدق قبل النهارده إن الحنان ده يقدر يكون بالشكل ده!"
وصلت البيت، كنت حاسة إني مهزومة.. انهزامي كله ظاهر عليا، على جسمي وعلى قلبي، رميت الشنطة على الكنبة وقلعت الشوز.. سمعت صوت ماما جاي من المطبخ:
- أنتِ جيتِ.. أستني احطلك تاكلي
مكنتش قادرة أرد، اتنهِـدت وكملت بإرهاق وأنا داخلة الأوضة:
- مش جعانة يا ماما.
دخلت أوضتي وقفلت الباب ورايا، أترميت على السرير بكل تعبي.. دموعي وقعت قبلي، غطيت نفسي بالبطانية جايز أدفى، الوضع يكون جوايا أهدى، غمضت عيوني وأنا بفتكر كل حاجة عيشتها معاه.. أول مرة ظهر قدامي تاني بعد سبع سنين، أول مرة قالي إنه لسه بيحبني زي الأول.. كل مرة بصلي بحب لدرجة إني صدقت إني الست الوحيدة اللي في قلبه وفي حياته، ده حتى مكنش ظاهر عليه إن فيه حاجة تانية واخداه! رغم كل رفضي حاول مرة وأتنين وتلاتة، قالي بحبك.. ومش هبطل أحاول علشانك، معقولة كل ده كان كذب!
حسيت برجفة في جسمي نتيجة الرعشة اللي حسيتها في قلبي، حسيت بالباب بيتفتح.. ماما دخلت وقربت مني شويه:
- أنتِ كويسه؟
مردتش عليها فكملت:
- اتخانقتِ أنتِ وعمر؟
فتحت عيني وغمضتها تاني بتعب، اتنهِـدت وخرج صوتي بهدوء عكس مشاعري:
- عمر متجوز ومعاه عيل
شهقت بصدمة وهي بتقوم من جنبي:
- أنتِ بتقولي إيه! مش معقول..
كملت بهدوء:
- اخرجي وسيبيني لوحدي يا ماما
- يا بنتي بـ..
قاطعتها بإنفعال:
- ارجوكِ يا ماما لو سمحتِ سيبيني في حالي، عايزة ابقى لوحدي لو سمحتِ..
خرجت من الأوضة وسابتني، أنا كمان مكنش عندي استعداد افكر أكتر من كده، غمضت عيوني وصوت عمرو دياب في بالي:
"أنتَ أول كل حاجة والبداية في كل شيء، حب أول مرة يجي لما قلبي كان بريء.. أنتَ أول كل حاجة وأنتَ كنت إيه، أنتَ أول حد يمشي ودمعتي تنزل عليه."
***
فتحت عيوني بإنزعاج علشان الشمس كانت جامدة، اتنهِـدت بزهق وأنا بودي وشي الناحية التانية، حسيت بحركة الموبايل فمسكته.. كان فيه أكتر من 70 ميسد كول، منه لوحده 68.. اتنهِـدت بزهق، مسكت تليفوني فتحت الفيس بوك ودورت على اكونت البنت اللي بعتتلي، كانت بعتالي لينك اكونت والد مراته علشان مراته معندهاش فيس، بعتله الصور بتاعته معايا.. وحكيت له كل اللي حصل، وإني مكنتش أعرف إنه متجوز اصلًا، بلكته وبلكت حماه وقمت بصعوبة وتقل من على السرير، كنت حاسة كل حاجة تقيلة.. الساعة اتأخرت وشغلي اتأخر، اتنهِـدت بتعب وأنا بقوم علشان ادخل الحمام اغسل وشي واتوضى وأصلي، لبست هدومي وفتحت الموبايل.. بعتت لنور إني اتأخرت علشان تعبانة فتبلغ المدير.
"طب متجيش النهارده احسن وخديه اجازة"
كانت المسج اللي ردت عليا بيها، نور مبتحبش مبدأ الاجازات.. فاستغربت، عملت نفسي مشوفتش حاجة، وخرجت لبست الشوز ونزلت.
طلبت اوبر ووصلت الشركة في حوالي نص ساعة.. كانت الشركة مقلوبة بطريقة غريبة، كله مشدود وكله باين عليه التوتر.. وصلت المكتب اول ما نور شافتني كملت باستغراب:
- إيه اللي جابك، مش أنتِ تعبانة؟
- آه بس مش لدرجة إني مجيش خالص، هيتحسب نص يوم.. ولو متحسبش انا مش عايزة أقعد في البيت
بصتلي بأستغراب ورفعت حاجبها:
- حصل إيه؟ اتخانقتي مع عمر..
اتنهِـدت بتعب:
- متجيبيش سيرته تاني، موضوع كبير هحكيهولك بعدين.. بس فهميني أنتِ فيه إيه مالهم برا
اتنفست بتعب وزهق:
- الراجل اللي اشترى اسهم في الشركة، وصل النهارده من المانيا وشادد الدنيا جامد أوي، بيراجع الحسابات، بيراجع الفايلز وبيراجع العمال مين شغال مين مش شغال، قالب الدنيا واصلًا سأل عليكِ.. رنيت مرتين مردتيش.
بصيت لَها واتنهِـدت:
- فقال إيه؟
- اللي يغيب منغير عذر بلغيه ميجيش تاني
- علشان كده قولتيلي مجيش؟
حركت راسها بإيجاب، بعدين كملت بهدوء:
- شكلك تعبان اوي فعلًا، ممكن لما الدنيا تهدى شويه نكلمه..
حركت راسي بإيجاب وحطيت شنطتي على المكتب:
- أنا هكلمه
خرجت من المكتب وأتجهت ناحية مكتبه، خبطت مرتين.. فتحت لما سمعت صوته وهو بيسمحلي أدخل، بصلي بأستغراب:
- أنتِ اللي هتجيبي الحسابات؟
حركت راسي بنفي:
- أنا مريم، تيم الداتا انتري..
- اللي مكنتيش موجودة في مكانك؟ متأخرة ساعة ونص!
- مش عادتي، بس كنت تعبانة شويه
بصلي ورفع حاجبه بأعتراض:
- لدرجة عدم مقدرتك إنك تبلغي عن غيابك او تأخيرك؟ أنا معنديش مانع مع الظروف، عندي مشكلة في قلة التقدير.
- كنت تعبانة لدرجة إني مقدرتش أبلغ للأسف، وطبعًا متفهمة حضرتك.. بس أنا مش حابة أسيب الشغل، واصلًا فيه ضغط شغل فأنا هلتزم مكاني وهاخد ساعة اكسترا بدل اللي اتأخرتها.
بصلي ثواني، بعدين كمل بهدوء:
- ونص.. على مكتبك وجهزيلي الداتا بتاعت الكلاينتس القديمة.
أخدت نفس براحة وحركت راسي بإيجاب وأنا ببتسم، خرجت بسرعة وأنا رايحة ناحية مكتبي، دخلت وأنا بفتح اللاب فنور بصتلي بأستغراب:
- هاخد ساعة ونص زيادة..
- مفيش خصم؟
حركت كتفي بعدم معرفة، فضحكت بهدوء:
- المهم إنه تمام، يلا ورانا شغل كتير.
قعدت على الكرسي بسرعة وأنا ببتسم براحة، مش متخيلة كان إيه ممكن يحصل لو خسرت الشغل كمان.. أنا اصلًا بهلك نفسي في الشغل علشان أكون كويسه، محسش بالألم.. اتلهي في الإرهاق، يمكن الساعة ونص دول عقاب من المدير.. بس بالنسبالي هم إضافة وقت أقدر اشغل بيه نفسي عن التفكير.
كُنت شغالة بجد لدرجة إني مش حاسة بالوقت، كان طالب نخلص الداتا ونجيبها بكره بس أنا خلصتها قبل ما شيفتي يخلص أصلًا بربع ساعة.. بصيت بأستغراب لما ملقتش فيه حاجة تانية، ببص في الساعة لقيتها ٨ وربع، باقي نص ساعة وأمشي المفروض.. تقريبًا مخرجتش بريك، ونور ماشية مأخدتش بالي.. بصيت على مكتبه لقيته منور، فبعتله الحاجة على الإيميل وروحتله المكتب، الباب كان مفتوح.. خبطت خبطتنين فرفع عينه بأستغراب.
- أنتِ لسه هنا؟
كمل بتذكُر وهو باصصلي:
- آه.. أنتِ، تقدري تمشي خلاص مجتش من ربع ساعة كله مشي اصلًا
بصيت لُه وكملت بهدوء:
- أنا خلصت الحاجة، بعتها لحضرتك على الإيميل.
بصلي بأستغراب، وبص على الإيميل عنده.. فتحه، كان باصص بأستغراب بعدين ابتسَـم وكمل بهدوء:
- ماشاء الله، بالسرعة دي! كويس إني متسرعتش في حكمي..
ابتسَـمت وكملت بهدوء:
- لسه فيه أيام كتير يا مستر أدهم تتعرف فيها على شغل كل حد فينا، كويس إنك مخسرتنيش.. أنا مجتهدة جدًا.
قفل اللاب وبص لي بإعجاب:
- واضح جدًا
ابتسَـمت بتكلُف واستأذنته، لفيت وشي تاني وكملت:
- هو أنا هيتخصم مني؟
- ليه!
- علشان اتأخرت..
حرك راسه بنفي:
- طيب ما أنتِ قعدتي وقت زيادة، ليه هتتحاسبي مرتين.. وشغلك خلصتيه قبل وقته، اتطمني.
ابتسَـمت له بهدوء، وحركت له راسي بإمتنان وروحت مكتبي اخدت شنطتي ومشيت، نزلت لقيت عمر واقف قدام الشركة.. بصيت لُه بزهق وكنت همشي جيه ورايا بسرعة، مسك ايدي وكمل:
- أنتِ بتعملي كده ليه، ليه مبتفهمنيش كل مرة.. بقولك كان غصب عني، وابوها قالي اطلقها، هطلقها يا مريم ونتجوز يا حبيبتي أنتِ حبيبتي الاولى والوحيدة
زقيته بقرف بعيد عني وأنا ببصله من تحت لفوق:
- أنتَ مش طبيعي والله العظيم مريض نفسي.. ابعد عني وشوف حياتك، خليك راجل مرة
قرب مني تاني فبعدت خطوات، قبل ما يقرب مني سمعت صوت.
- فيه إيه!
لف له بأستغراب وكمل:
- وأنتَ مالك واحد وخطيبته
بصلي فحركت راسي بنفي وأنا بكمل:
- خطيبتك إيه يا حيوان، روح لمراتك وابنك ولا شوف حياتك، شوفلك خرابة بعيد عني..
بصله بأستغراب ورجع كمل:
- هو متجوز ومصاحبك!
كملت بأنفعال:
- هو إيه مصاحبك دي أنتَ كمان، كان مكلم اهلي وقاريين فاتحة!
بصلي بأستنكار:
- وهو متجوز!
كملت بزهق وزعيق:
- مكنتش أعرف، وهو لو كنت أعرف كنت هبقى معاه!
كان لسه هيتكلم فقام ماسكه من التيشرت:
- هو إيه البجاحة دي يا معلم! أنتَ خاين وبجح وكمان بتطارد الناس!
عمر قرب منه أكتر وخبطه في راسه فشهقت، بصله بصدمة.. وبعدين ضحك:
- ده أنتَ قلبك جايبك بقى..
وده بقى جاي من المانيا ولا من المنيا؟ بصيت لُه بصدمة لما لقيته بدأ يضربه، قربت شويه وأنا بكمل:
- بس بقى خلاص..
شاورلي:
- روحي..
- هو إيه اللي روحي، بقولك سيبه خلاص
عمر بصلي بإنفعال:
- اسمعي الكلام وروحي زي ما بيقولك
بصيت لُه بصدمة وخبطته برجلي:
- هو أنتَ بتديني أوامر بتاع إيه
مستر أدهم بصلي بصدمة، فكمل:
- أمشي علشان مخصملكيش أسبوع
كنت لسه هتناقش، بس ليه مروحش.. ما يموتوا بعض أنا مالي، واحد بجح والتاني مش سامعلي كلمة، سيبتهم ومشيت فعلًا.. بس كنت حاسة إني قلقانة يحصل حاجة في الاخر هيكون بسببي.
استنيت شويه في الشارع، بعدين رجعت تاني لقيت مستر أدهم مخبوط في راسه.. الغدار المقرف غدر بيه من ضهره زي عادته، جريت عليه ونزلت لمستواه، حطيت راسه على رجلي بقلق:
- أنتَ كويس..
فتح عيونه بصعوبة:
- دماغي تقيلة، عربيتي أهي.. حاولي تسنديني اركب
بصيت لُه بتوتر فكمل وهو بيتألم:
- بتعرفي تسوقي؟
- تقريبًا..
- طيب يلا، الاسعاف هتيجي هنا بعد كتير.. مش عايز أوصل المستشفى فاقد وعيي.
حركت راسي بإيجاب، قمت وقفت وسندته علشان يقف، ساعدته لحد ما وصلنا العربية، ركبته في الكنبة اللي ورا وركبت قدام علشان اسوق، كنت خايفة ومتوترة.. قلقانة يوقفني أي كمين، أنا حتى مش معايا رخصتي، بس عدت على خير ووصلنا المستشفى بسرعة.. ناديت على حد من جوا ياخده، وخرجت تليفونه علشان أكلم حد من أهله.
مكنتش عارفة اتصرف ولا افتح التليفون فكلمت نور.
- مستر أدهم في المستشفى تقدري تكلمي حد يوصلنا لأهله!
- مستشفى ايه وأنتِ مالك
كملت بإنفعال:
- يا نور والله ما وقته اخلصي وهبقى أفهمك
نفخت بضيق:
- طيب اقفلي هتصرف
خدت نفسي بصعوبة، وقفت قدام الاوضة اللي دخلها وأنا بحاول أخد نفسي بصعوبة، وطبعًا كان باين اثر الضرب فأتفتح محضر.
بتاع النيابة جيه وقف معايا علشان يسألني لو أعرف او شفت حاجة.
- آه كنت موجودة الأول، بعدين هو طلب مني أمشي فمشيت خمس دقايق وقلقت يكون حصل حاجة فرجعت له تاني لقيته واقع على الارض مخبوط في دماغه من ورا
- تعرفي اللي عمل كده؟
حركت راسي بإيجاب:
- معايا رقمه، وعنوانه، هو كان هيبقى خطيبي وحاول يتعرض لي فمستر أدهم اتدخل..
بص للظابط اللي جنبه:
- خد منها المعلومات على ما نشوف هو فايق ولا لأ.
كنت قلقانة عليه، هو دخل نفسه في حوار مش بتاعه علشان يحمي واحدة متخصهوش.. مع إنه كان ممكن يقول إني مجرد موظفة، برا حدود شركته فملهوش دعوة، فضلت واقفة شويه لحد ما الدكتور بلغني إنه فايق وإن الجرح كان سطحي بس الخبطة اثرت على دماغه علشان كده كان دايخ وإنه لحقناه بسرعة.
دخلت الأوضة واتنهِـدت لما لقيته فاق، أول ما شافني ابتسَـم ابتسامة خفيفة:
- مش لو كنت مشيتك من الصبح مكنش زماني هنا..
كملت بزعل بسيط:
- لو مكنتش سيبتك معاه مكنش ده حصل
- كنتِ هتحميني منه يعني؟
حركت كتفي بعدم معرفة وأنا بقعد:
- على الأقل مكنتش هتبقى لوحدك، لو حب يأذي حد كان هيأذيني.
- طيب ما هو اصلًا أذاكي باللي عمله..
بصيت لُه ثواني وأتنهِـدت بتعب:
- مكنتش أعرف إنه مقرف ومريض ومقزز كده.
ابتسَـم وكمل بتعب بسيط:
- هو مريض بيكِ، كل كلامه كان على إنه ممكن يعمل أي حاجة علشان يوصلك.. أنا معرفش إيه وصله لإنه يحبك كده، بس الراجل ده خطر عليكِ.. لازم تعملي فيه محضر
- آه كده كده هروح النيابة علشان اشهد معاك وهيتفتحله معرض تعدي عليا كده كده.
حرك راسه بإيجاب، فكملت بهدوء:
- هو مين معاك في مصر ممكن أكلمه؟
- محدش هنا من أهلي كلهم برا، ماما وبابا في عمان وباقي أهلي علاقتي بيهم مش قد كده وفي البلد اصلًا، بتسألي ليه؟
- علشان حد يجي ياخدك متكنش لوحدك..
بصلي بأستغراب:
- ده معناه إنك هتسيبيني لوحدي وأمشي
بصيت لُه ورفعت حاجبي بأستغراب:
- أكيد مش هفضل معاك وأنا بنت لوحدي
- فتسيبيني راجل مصاب لوحدي مليش حد في المكان ده، معرفش حد..
ضيّقت عيني فضحك، وكمل وهو بيمسك راسه بألم:
- خلاص خلاص بهزر، امشي طبعًا كده كده الدكتور قال إني محتاج أريح النهارده مش هينفع يخرجني علشان يطمن إن كل حاجة تمام، وأنا هكلم مؤمن صاحبي يجي ياخدني الصبح
حركت راسي بنفي:
- طبعًا لأ، وبليل هتفضل لوحدك؟ دي حاجة وحشة
ابتسَـم وكمل ببساطة:
- مش محتاج حد، التمريض هنا والدكاترة هنا، ده حتى الشرطة هنا.. والصبح هاجي الشركة عادي
- أنت كده زودتها أوي مين بيتضرب بليل ويجي الشركة الصبح؟
حرك كتفه ببساطة:
- أنا هعمل كده..
حركت راسي بنفي:
- لأ مينفعش اكيد.
سكتت شويه وبعدين كملت:
- أنا قلت لنور تحاول تتواصل مع حد يعرفك
غمض عينه وكمل:
- هو ليه بنتصرف من دماغنا يا مريم؟
كملت بإنفعال بسيط:
- هتصرف من رجلي يعني؟ واحد مبطوح بسببي المفروض هعمل إيه؟
- عارفة يا مريم لو جت سيرة إنه بسببك هعمل فيكِ إيه؟
بصيت لُه ورفعت حاجبي:
- هتخصم لي تلات أيام؟
- لأ 15 يوم
- طب ما ترفدني أسهل..
كمل ببساطة:
- ومين هيعمل مشاكل؟ ده من أول يوم وخليتيني أعيش في مصر مغامرة معيشتهاش من تالتة ثانوي..
بصيت له بأستغراب:
- ده كتير يعني؟
- بتاع 10 سنين مثلًا..
بصيت على السوعة لقيتها 11 ونص فشهقت بخضة:
- يا خبر أبيض ماما رانه عليا كتير أوي هتموتني، أنا لازم لازم أروح، خلي بالك من نفسك..
مديت له موبايله وكملت:
- افتحه هكتبلك رقمي..
بصلي بأستغراب، فشاورت له يفتحه بسرعة، فتحه ومدهولي فأخدت الموبايل كتبت رقمي وكملت:
- سجل الرقم، لو احتاجوا اي حاجة او اي حد بليل كلمني وأنا هتصرف.. والصبح لما يكتبولك خروج كلمني اجي اخدك تمام؟
قلت كلامي ومشيت، بعدين لفيت راسي وكملت:
- انا مش عارفة اقولك إيه، معتقدش إن الشكر ليه لازمة بعد اللي حصلك بسببي، ولا حتى الآسف.. بس أوعدك إني هكون موجودة لو احتاجت اي حاجة..
كملت وأنا بضحك بهدوء:
- مع إني اشك إنك تحتاج حاجة مني أنا، بس هكون موجودة برضوا.
ابتسَـم لي بهدوء:
- متشكرينيش ولا تتأسفي، أنا معملتش غير واجبي..
بصيت لُه بأستغراب، بعدين ابتسَـمت له وخرجت، كنت طالبة أوبر.. معرفش المرتب بتاعي هيكمل معايا كام يوم بعد كل الاوبر اللي بطلبه رايح جاي ده، ركبت الأوبر وأنا عماله بفكر في الكلام اللي هقوله لماما وبابا لما أروح، بس كنت هعمل إيه! راجل اصلًا اللي حصله كان بسببي هسيبه وامشي ولا إيه!
وصلت بسرعة البيت، طلعت لقيت ماما مستنياني هي وبابا، وبابا لابس وهينزل الشارع.. التليفون كان فصل مني اصلًا اول ما ركبت اوبر، اتنهِـدت بخوف وأنا بحاول امتص غضبهم:
- يا بنتي وقعتي قلبنا حرام عليكِ قولنا حصلك حاجة ولا عمر عملك حاجة..
- ما هو عمر عمل، بس مش ليا
بابا بصلي بأستغراب وإنفعال:
- عمل إيه، وكنتِ فين لدلوقتي!
قعدت قدامهم وأنا بحاول أخد نفسي، كملت بهدوء:
- اقعدوا طيب علشان الموضوع طويل اوي، محتاج طولة بال شويه..
بابا كمل بزهق:
- ما تخلصي أنتِ هتنقطينا بالكلام..
غمضت بعيني وبصيت لُهم بتردد، بعدين بدأت احكيلهم الحكاية من الأول خالص.
كنت قاعدة عادي من كام يوم لقيت اكونت غريب باعتلي مسج ريكوست، فدخلت اشوف مين.. لقيته اكونت فيك مبعوتلي منه صور لعمر في فرحه، وصور ليه مع مراته وصور مع ابنه، صور الفرح وحتى فيديو بسيط فيه الفرح.. في الأول من الصدمة أنكرت وقلت أكيد Ai بس كان باين أوي إنه حقيقي، فكرت كتير اواجهه ازاي.. ارد اصلًا اقول إيه، البنت كانت بتحكيلي وقالتلي إنها متعرفش أنا أعرف ولا لأ، بس هي تعرفني شخصيًا فعارفة إن ميطلعش مني حركة زي دي وأنا عارفة إنه راجل متجوز، قررت أرد على البنت وقلت لها إني فعلًا معرفش وإنها تفهمني أكتر فحكتلي كل حاجة وإنه اصلًا كان متجوزها في بلدهم وجيه هنا لوحده، وإن اهله أكيد ميعرفوش العك اللي بيعمله.. اتفقت مع البنت ونزلت قابلتها وعرفتها فعلًا، بعتتلي عنوان مراته وبعتتلي الاكونت وكل حاجة، اخدت اجازة من الشغل وروحت اتأكدت بنفسي، عملت نفسي زميلته في الشغل.. لما اتأكدت طلبت منه اشوفه، وقابلته فعلًا وواجهته مأنكرش..
بابا كان بيسمعني بصدمة وهو حاطط إيده على راسه، كملت كلامي، وحكيت لهم باقي اللي حصل، قام وقف بنرفزة:
- ابن الـ**** لو مكانش اخرته على ايدي..
وقفت قدامه وكملت:
- بالله عليك يا بابا كفاية، مش عايزة حد يتأذي بسببي تاني.. كفاية الراجل اللي في المستشفى لوحده وبسببي.
- مش لوحده ولا حاجة أنا هروحله دلوقتِ..
ماما كملت وهي رايحة ناحيته:
- متروحش في حتة دلوقتي أما النهار يشقشق
بصلها وكمل وهو بيحط المفاتيح في جيبه:
- تبقى عيبه اوي مننا إن راجل يدافع عن بنتك ويتضرب بسببها ونسيبه لوحده كده..
قرب مني قبل ما ينزل وباس راسي:
- والكلب التاني ده هاخدلك حقك منه.
ابتسَـمت وأنا بحضنه، عيوني دمعت فبصلي وكمل:
- مبنعيطش على شوية عيال يا ماما، ادخلي غيري ونامي علشان تبقي موجودة الصبح في شغلك ومتقصريش فيه، ولو عايزة تريحي ريحي وسيبي كل حاجة فداكِ..
- أنا بحبك يا بابا والله.
ابتسَـم وهو بيطبطب عليا:
- وأنا يا حبيبتي.
نزل وسابنا، اخد مني عنوان المستشفى ومكان اوضة أدهم، ماما قربت مني حضنتني وكملت بهدوء:
- خاين وغدار ميسواش متزعليش عليه..
- مش زعلانة عليه، أمبارح كنت زعلانة.. بس النهارده أنا مصدومة أوي يا ماما، ازاي يطلع منه كل ده! أدهم لو مجاش هو كان هيأذيني لو مردختش لكلامه، عيني كانت تخوف.. نظرته غريبة، أنا زعلانة أوي على مراته وابنه وعليا، زعلانة بجد.
طبطبت عليا وكملت:
- هيروح من ربنا فين يا بنتي، وبعدين هياخد جزاته دنيا وأخرة.
سندت راسي في حضنها وأنا بتنفس بتعب، كان نفسي كل ده يطلع كابوس وافوق منه، مش من امبارح بس.. لأ من ست شهور، من أول ما ظهر في حياتي تاني، من أول مرة رجعت اشوفه فيها.
دخلت اخدت شاور علشان كنت حاسة جسمي كله مكسر من التعب، وخرجت لقيت نور رانه عليا فكلمتها، حكيتلها كل اللي حصل من الأول للآخر.
- يا نهار ابيض! إيه يا حبيبتي فيلم الرعب اللي عيشتيه ده وازاي متكلمنيش
- هو أنا لحقت اخد نفسي علشان اكلم حد أو احكي لحد يا نور، ده حتى ابويا وامي لسه عارفين دلوقتي
- عيل مش كويس والله، ربنا ينتقم منه.. طب أنتِ كويسه يا حبيبتي؟
- معرفش، بس اكيد أنا احسن من إني كنت ابقى مع واحد متجوز يعني.. ومرتاحة اني قلت لابوها بصراحة، مكنتش هتقبل أخليها تعيش مخدوعة.
اتنهِـدت بهدوء:
- ربنا يكفيكِ شره يا مريم والله، طيب ومستر أدهم كويس ولا إيه؟
- بابا راح يشوفه، هرن اشوفه عمل إيه واكلمك تاني..
- ماشي يا حبيبتي
رنيت على بابا مردش، رنيت تاني مردش.. في المرة التالتة رد فسمعت صوته جاي وسط زحمة:
- اقفلي يا مريم دلوقتِ..
- إيه الصوت ده يا بابا؟
- اقفلي بقولك عمر هنا والدنيا مقلوبة
- حصل إيه أنت وأدهم كويسين؟
مسمعتش صوت غير صوت زعيق، صويت، زحمة.. دقات قلبي زادت بتوتر وخرجت بسرعة لماما حكيت لها اللي حصل، لبسنا ونزلنا بسرعة.
- خير يا ماما أهدي، خير ابوكي عاقل ميعملش حاجة..
بصيت لَها بشك وأنا بعيط فكملت:
- معرفش عاقل ولا لأ لما الموضوع يخصك، بس في العادي هو عاقل..
دموعي نزلت فخدتني في حضنها:
- ان شاء الله خير أهدي
الطريق المرة دي كان أطول، كنت خايفة أوصل.. وعايزة أوصل بأقصى سرعة عندي، عيوني كل مرة بتهزمني في المواقف دي، وصلت المستشفى كان فيه شرطة في كل حتة وبابا واقف هو وأدهم على باب المستشفى وايد بابا عليها دم.
جيت أروح ناحيتهم لقيت أدهم وقع فجأة على الأرض.. جريت بسرعة:
- أدهم!
