رواية ورطة لقائنا الفصل الثاني
(٢)
- أدهم! بابا..
جابوا السرير بسرعة واتنقل بيه لجوا، دخلت وراه أنا وبابا وماما.. دخلوه الطوارئ.
- متقلقوش هو بس ضغطه علي شويه ولحقناه، ده غير إن الخبطة كانت صعبة ومحتاجة راحة.
حركت راسي بإيجاب وكملت وأنا ببص لبابا:
- حصل إيه؟
- متشغليش بالك أنتِ..
- احكيلي يا بابا بالله عليك
اتنهِـد وكمل بهدوء:
- عمر كان جاي هنا يدور عليكِ لما جيه سأل على اوضة أدهم ودخل ومحدش واخد باله، هو اصلًا كان عرف إنهم بيدوروا عليه وراحوا سألوا عليه في بيته اللي هنا.. المهم دخل جوا لقاه نايم فكان هيتهجم عليه، في نفس الوقت اللي كنت داخل فيه فاتخانقت معاه وأدهم قام وقتها على صوتنا..
بصيت لأيده:
- والدم؟
أخَد نفس عميق وخرجه:
- كان هيخبط الواد اللي هو مديرك ده، فأنا عورته بس بالغلط..
شهقت بخضة:
- عورته فين، تعويره ولا حاجة تاني؟
- لا تعويره عادية.. وبعدين ما قدامك أهو خدوه، اكيد مكنتش هسيبه يموت الواد يعني
حركت راسي بموافقة، كان أدهم فتح عيونه فروحت ناحيته:
- أنا بقيت حقيقي المصيبة اللي نزلت عليك اول ما نزلت مصر..
ابتسَـم بصعوبة:
- أنا معرفش إيه الدنيا دي والله حياتي كانت هادية أوي
- بقت دوشة؟
ضحك وهو بيحط ايده على دماغه:
- بقت فوضى.
ابتسَـمت غصب عني، كان باين على ملامحي التوتر.. كمل بهدوء:
- متقلقيش الليلة دي هتعدي على خير وإن شاء الله نتعرف من أول وجديد..
- او ترفدني بكره من الشركة وتبقى خلصت نفسك.
ضحك وكمل:
- ودي برضوا فكرة مش بطالة خالص.
بابا كمل وهو بيحط ايده على كتفي وبيقف جنبي:
- تعالى النهارده معانا، عندي شقة أخويا فاضية لسه مسافر من كام يوم بات فيها لحد ما تخف وبعدين ارجع بيتك علشان متبقاش لوحدك، وعلشان قلقان اسيبك في المستشفى بعد اللي حصل.
حرك راسه بنفي وكمل بابتسامة:
- كفاية تعب حضرتك والله، مش مستاهلة هيحصلي إيه ما هو كده كده اتحبس
ماما كملت بإصرار:
- يابني الليلة دي طولت أوي، تعالى معانا الدكتور قال إنك محتاج راحة، وسيبك من أكل المستشفيات أنا هعملك أكل، ونديلك العلاج وتبقى تحت عيننا احسن من المستشفيات دي بتمرض اكتر..
بصلي فحركت كتفي، اتنهِـد بأستسلام:
- طيب ممكن.. بس النهارده بس
بابا كمل وهو بيمد له ايده:
- ان شاء الله
رجعنا من المستشفى وقفنا تاكسي كان معدي بالصدفة وركبنا، وهو كلم حد من الشركة ياخد العربية ويجيبها على اللوكيشن عندنا، مكنتش فاهمة إيه اليوم الطويل ده.. سندت راسي على كتف ماما وغمضت عيوني، الهوا كان ضارب في وشي لدرجة اني محستش بحاجة غير وهم بيصحوني، ماما مسكت ايدي وأنا طالعة لإني كنت نايمة وبابا كان بيساعد أدهم.
- بابا فين؟
- بابا تحت بيفتح لأدهم الشقة وبيديله علاجه وحاجته وطالع، ادخلي نامي
حركت راسي بإيجاب، دخلت اترميت مكاني على السرير وأنا مش حاسة بأي حاجة، بس عدم احساسي مخلاش الموضوع يمر مرور الكرام.. أنا كنت حاسة طول ما أنا نايمة كأني في فيلم، بشوف عمر شويه وهو بيحاول يمسكني.. وبشوف مستر أدهم، بابا، ونور، ده حتى كان فيه قطة في الشارع شوفتها.. أمتى أنام منغير ما أحلم، منغير ما اشوف الدنيا كلها؟
***
صحيت من النوم على صوت ماما، كانت الساعة 9.. فتحت عيوني بصعوبة:
- الشغل
كملت بضحك:
- ما الشغل تحت اهو
اتنهِـدت بتعب:
- مش مبرر إني اتأخر يعني
- ما هو عارف اللي فيها، قومي غيري أنتِ نايمة بلبسك
بصيت على نفسي لقيتني لسه بلبس الخروج، قمت غيرت هدومي ولبست الإسدال ونزلت علشان اديله البرشام علشان بابا كان راح الشغل.. خبطت مرتين فقام فتح الباب، ضيّق حاجبه فكملت:
- كنت نازلة اخد اجازة من الشغل..
ضحك وهو بيكمل:
- طب ما أنتِ خدتيها اهو
مديت له ساندوتشات ماما كانت عملاها:
- ماما بتقولك خد العلاج، وبتقولك مريم اجازة النهارده علشان عايزة تنام
ضيّق عينه:
- دي ماما برضوا؟
كملت ببراءة:
- امال هكذب عليك يا مستر أدهم؟
أخد نفس وكمل بهدوء:
- أنا نفسي اعرفك..
بصيت لُه بأستغراب، وكملت بضحك:
- مكفكش اللي عرفته أمبارح؟
- مش غريبة يعني واحدة أشوفها امبارح تعيشني كل ده؟
حركت كتفي بعدم معرفة:
- غريبة.. اصلًا اللي حصل في حياتي من يومين للنهارده غريب، بس الجو النهارده حلو وهادي.. هوا، والدنيا مغيمة اعتقد حياتي هترجع هادية تاني.
ابتسَـم وكمل بهدوء وهو بياخد مني الساندوتشات:
- هاخد العلاج، وهستنى اعرف أنتِ مين في وقت من الأوقات
ابتسَـمت وكملت ببساطة:
- أنا مريم.
قولتها ومشيت من قدامه علشان أطلع بيتنا، كنت حاسة عينه عليا لحد ما اختفيت من قدامه، اتنهِـدت بتعب وأنا بقفل باب الشقة بتاعنا.. اترميت على الكنبة وأنا ببص للسقف بعدم تصديق لفيلم الاكشن اللي عيشته اخر كام يوم ده، اخدت نفس عميق وخرجته.
- ابوكي كلمني بيقولي عايزينكم في النيابة أنتِ وأدهم وهو علشان اللي حصل
نفخت بزهق:
- هو الموضوع ده أمتى هينتهي أنا تعبت
- لما تروحوا النيابة.
حركت راسي بموافقة، وبعدين كملت:
- هو نروح دلوقتي؟
- آه، أنا هنزل أقول لأدهم على ما تغيري
- طيب ماشي
دخلت اوضتي، غيرت هدومي.. لبست چيبة وكوت، وخرجت لبست بوت صغير، ونزلت له.. الجو كان برد للدرجة دي فعلًا، نزلت لقيت أدهم مستني على الباب.. شاورلي:
- يلا بينا ننهي الجدل اللي حصل ده..
- لأ أنت قلت فوضى
ضحك وكمل بهدوء:
- أنتِ اللي فوضى، اللي بيحصل في حياتنا برضوا فوضى.. بس اللي هننهيه دلوقتِ جدل
بصيت لُه بعدم فهم فضحك:
- بقول اي كلام انزلي
- هو أنتَ هتسوق ازاي معلش؟
حرك كتفه بعدم معرفة فكملت:
- أنا معايا الرخصة، ممكن أسوق أنا
- لو مش هتعملي بينا حادثة أوكيه.
بصيت لُه ورفعت حاجبي، فكمل:
- هو في الشركة عرفوا منين إن حصل حاجة لينا سوا
- معرفش بس اكيد علشان مروحناش الشغل، وامبارح كنا ماشيين في نفس الوقت ده غير إن طبعًا الموضوع اتعرف في المكان
حرك راسه بإيجاب وفتح الباب وشاورلي أخرج، خرجت فعلًا وركبت العربية بتاعته وهو ركب جنبي.
كان ساند راسه لورا وحاطط ايده ورا راسه، بصيت لُه وكملت:
- دماغك تعباك؟
- آه شويه، بس تمام يعني.. وأنتِ شاطرة في السواقة خلي بالك متركزيش معايا.
حركت راسي بإيجاب وكملت:
- ممكن تنام على ما نوصل
ضحك ضحكة خفيفة:
- اخاف تعملي حادثة بينا انا مبقاش فيا حتة سليمة
- هي دماغك بس اللي مش سليمة
- طب ما دي متكلفة على فكرة.
ضحكت ومردتش عليه، فضَلت افضل ساكتة وأسيبه يريح، وصلنا كان بابا واقف مستنينا.. ركنت العربية ونزلنا، طلعنا النيابة كانت مراته وابنه موجودين.. حسيت إن قلبي اتقبض، وإني قلقانة، كان واقف معاها راجل كبير واضح إنه والدها، قرب ناحيتي وكمل بتساؤل:
- أنتِ مريم.. اللي بعتيلي على الفيسبوك؟
حركت راسي بإيجاب فكمل:
- إيه اللي حصل في اليومين دول.. وايه وصله لهنا!
سمعت صوت من ورا، كان صوت مامتها:
- حسبي الله ونعم الوكيل في اللي تاخد واحد من مراته
بصيت لَها بأستغراب وكملت:
- تفتكري لو كنت أعرف إنه متجوز كان زماننا وصلنا هنا؟
- أمال ازاي كنتِ معاه؟
كنت لسه هرد عليها بابا بصلي:
- الناس موجوعة متتناقشيش، سيبي اللي يشوف حاجة يشوفها المهم أنتِ إيه..
بصيت لهم ثواني، كانت مراته قاعدة وابنها على رجلها وساندة راسها على الحيط، روحت ناحيتها وقربت منها:
- أنا اسفة، أنا مكنتش أعرف.. صدقيني لو أعرف مستحيل كنت اوافق يرجع حياتي.
- مش ذنبك، هو عمره ما نسيكي أنا اللي غلطت وسكتت..
عدلت راسها وكملت وهي بتبتسِـم بقهر:
- يمكن لو مكنتيش قولتي كنت فضلت عايشة معاه على أمل إنه يحبني، مع إني مأجبرتوش يتجوزني، هو اللي جالي.. هو اللي مقاليش إنه بيحب، حتى بعد ما عرفت فضلت إني متكلمش واسيبه للايام يمكن يحبني، مقولتش لحد علشان ابني اللي في بطني، اهو ابني جيه.. وهو خاني، وطلقني ولا كأننا عيشنا سوا يوم واحد، ده حتى ابني هيكبر يلاقي ابوه رد سجون..
دارت دموعها اللي بتنزل وهي بتسند راسها تاني:
- علشان قررت اسكت في اول حملي.
دموعي نزلت، فبابا قرب مني.. أخدني وروحنا علشان طلبونا، أدهم كان واقف متابع الموقف من بعيد، بصلي بمعنى إني أهدى.
كنت متوقعة التحقيق يكون بسيط عليا، بس كنت حاسة بإنهيار وأنا بحكي كل تفاصيل اللي حصل.. مكنتش مصدقة إن كل ده أصلًا حصل، خرجنا وشوفناه وأحنا ماشيين.. كان شكله بالنسبالي مقزز، بابا حاوطني بأيده واحنا معديين من جنبه، وخدني ومشينا.. نزلنا تحت كانت نور مستنياني هي ويوسف معانا في الشركة، أول ما شوفتها حضنتها فطبطبت عليا.
- معلش يا قلبي كل حاجة خلاص خلصت، اهدي..
أدهم كمل بهدوء:
- بقولك إيه يا مريم.. تيجي أشربك قصب
خرجت من حضنها وبصيت لُه بأستغراب فضحك ضحكة بسيطة:
- ما يمكن الحل في القصب
حركت راسي بنفي، فكمل:
- خلاص تعالي يوسف يسوق هو أنتِ مش قادره وأنا دماغي بتوجعني
حركت راسي بموافقة، نور ركبت جنب يوسف وأنا ركبت ورا أنا ومستر أدهم.
كنت ساندة راسي على الشباك ودموعي بتنزل من الإرهاق، كنت تعبانة.. زعلانة، وعايزة أفصل لوحدي.
- بس بس..
مسحت دموعي وبصيت لُه بأستغراب فكمل:
- ازيك إيه الأخبار
رفعت حاجبي فكمل:
- بقولك إيه الأخبار؟
- زي ما أنتَ شايف كده..
ابتسَـم:
- جميل جدًا، تعالي نتعرف؟ أنا أدهم.. مديرك في الشغل، لسه جاي مصر من أقل من أسبوع، قابلت موظفة عندي متأخرة شويه وقعدت لوقت متأخر.. فربنا شاء إن يحصل حاجة وحد يضايقها وأنا اكون موجود فأعيش معاها أصعب يومين في حياتها.. بس بالنسبالي كانوا مغامرة غريبة ولذيذة بالنسبة لحياتي الهادية المملة اللي مليانة ورق وحسابات، كشفت لي عن إني لسه جوايا جزء شقي.. بيعرف يدخل خناقات.
اتنهِـدت وكملت وأنا ببتسم:
- وأنا مريم، موظفة عندك.. عايشة طول عمري حياة جميلة وهادية فيها حاجات صعبة بس مش صعبة لدرجة إني انهار، عيشت قصة حب مع واحد جبان مكنش قد الحب فسيبنا بعض، رجع ظهر في حياتي بعد سبع سنين أقنعني إنه لسه عايش على ذكرى حبي، حاول معايا كذا مرة لحد ما وافقت يقابل بابا ونقرأ فاتحة.. وفجأة اكتشفت إن الراجل ده متجوز ومخلف وبيخون مراته معايا، لدرجة إني معرفش أنا دلوقتي ضحية ولا جاني
مدلي منديل وكمل بهدوء:
- أنتِ حد شاف حاجة وحشة، بس مش مضطرة تعيشي بدور الضحية.. وطبعًا مش جاني بالعكس أنتِ مجني عليه، اتصرفتِ صح وأنقذتِ ست زيك من إنها تعيش مع راجل خاين، وأنقذتِ نفسك من علاقة فاشلة، فأنتِ بنت قوية وعاقلة وبتعرفي تواجهي.
بصيت حواليا فجأة وكملت:
- هو بابا راح فين؟
نور كملت:
- عمو رجع الشغل تاني كان واخد إذن
حركت راسي بإيجاب، ورجعت سندت راسي تاني على الشباك.
"دورت فيكِ على الأمان ومحستوش، الكل بيداري في حقيقته ورا الوشوش.."
يوسف كان شغل الأغنية، قبل ما تكمل أدهم شاور له:
- أنتَ هتاخد خصم تلات ايام على اختيارك للأغاني، أما دي اختياراتك للأغاني في المواقف امال باقي حياتك عامله ازاي؟
بصيت لُه ثواني، بعدين ضحكت غصب عني.. ضحكت كتير علشان فعلًا عنده حق، كنت بفكر ليه مفتحش العربية وأرمي نفسي والله.
- مريم بالله عليكِ كفاية، اقسم بالله وحشني وشك وأنتِ بتضحكي.. وحشني شكلك وحركاتك
بصيت لنور وكملت وأنا بحاول معيطش:
- هو أنتِ بتضغطي عليا ليه
يوسف ضحك وكمل بهدوء:
- ايوه سمعينا صوتك كده، يا شيخة حسبي الله ونعم الوكيل في اللي يزعلك..
مستر أدهم كمل وهو بينكشني:
- إيه ده هي بتضحك وكمان ليها صوت؟
بصيت لُه وضيّقت حاجبي:
- إيه مفكر عندي إحتقان في الزور ولا إيه.. ما بتكلم بقالي تلات ايام اهو
- وبتعيطي.
كملت بإستنكار:
- هو أنتوا عايزني ارقص وأنا متخانة وبلف على المستشفيات والاقسام؟
نور كملت ببساطة:
- فاكرة لما اترفدنا من الشغل وقعدتي تضحكي بصوت عالي في الشارع؟
- آه ما أنا كنت اتجننت ساعتها
- يعني أنتِ اتجننتِ علشان أترفدتي ومتجننيش علشان اتخانتي؟
أدهم كمل وهو بيخبطه بازازة ماية:
- بقوا ست أيام يا يوسف..
بصيت لُهم ثواني بعدين ضحكت:
- أنا بجد مش فاهمة إيه العبث ده، أكيد حروب الجيل الخامس حروب نفسية.. بتخلينا نفقد مشاعرنا
أدهم أخد نفس وكمل بابتسامة:
- يعني هو مين لسه عنده مشاعر يا مريم
بصيت لُه وسكتت، أصل عنده حق.. مشاعر إيه اللي لسه عندنا، ومشاعر إيه اللي مستنية أعيشها أو نعيشها، حاسة طاقتي أستُنزفت، مشاعري خلصت.. بس طلاما عايشة، يبقى لازم أعيش.
وصلنا البيت، وطلعنا سوا.. مكنتش أعرف هيمشي أمتى بس عرفت إن بابا طلب منهم يفضلوا معايا النهارده، طلعوا معايا الشقة فماما استقبلتهم، هي تعرف نور ويوسف.. نور صاحبتي من زمان من أيام الجامعة، ويوسف عرفناه من الشركة.
أدهم دخل قعد على الكرسي بتعب فماما كملت بقلق:
- أنتَ كويس يا بني؟
حرك راسه بإيجاب:
- أنا حاسس إني تاعبك معايا أوي والله
- لا يا حبيبي تعب إيه، كفاية وقفتك معانا كل اللي حصلك بسببنا..
بصيت لَها بزعل بسيط، فكمل هو بهدوء:
- مش بسببكم، بسبب عيل مريض.. أي حد مكاني كان هيعمل كده.
كملت بوِّد:
- ربنا يباركلك يارب.
نور دخلت مع ماما المطبخ، وأنا دخلت أعملهم قهوة.. كنت بعمل كل حاجة وأنا حاسة إني فاقدة طاقتي، يعني بعملها وخلاص، خرجت لهم القهوة ودخلت البلكونة، كانت الساعة 6 إلا ربع.. بس الدنيا ليّلت نسبيًا مش باقي غير ضوء بسيط.
الجو كان برد والدنيا مغيمة، قعدت على كرسي وأنا ببص للسما، عيوني متعلقة بيها كأني شايفة نفسي فيها.. نفسي أطير، أكون حرة من أي ألم، طول عمري اصلًا كان نفسي أبقى طير.. علشان هو أكتر كائن حر، بكره شكل الحمام جوا القفص.. شكل العصافير جوا البيوت، الطيور مكانها السما.. وأنا كمان حلم حياتي أطير فيها.
كُنت مغمضة عيوني وأنا باصة للسما وماسكة القهوة في ايدي، حاسة بسخونة دموعي على خدي.
"طير في السما وملهوش عنوان وفي ايده خاتم سليمان، كان عايز في الضحكة يغير ويتوب كل الاحزان.. عاش الحلم كأنه حقيقة وافتكر إن الدنيا بريئة، طيبته سلم لحبيبته وحبيبته بتبيع في دقيقة."
حسيت بنفس جنبي ففتح عيوني بخضة، كان أدهم واقف باصصلي وساكت، لما فتحت عيوني قرب كرسي وقعد قدامي:
- خسارة الدموع في عيونك يا مريم
اتعدلت في قعدتي وسيبت كوباية القهوة، المرة دي مقدرتش أمسح دموعي.. دموعي زادت فحطيت إيدي على وشي، حاولت على الأقل ميكنش صوت عياطي عالي.. كان باصصلي بهدوء، كمل وهو بيمدلي منديل:
- عيطي براحتك، متخليش الزعل يخسرك كل حاجة.. أنا عارف احساسك كويس
حركت راسي بنفي:
- لأ مش عارف، محدش عارف..
ابتسَـم بهدوء:
- صدقيني عارف كويس، بس حاولي متخليش الاحساس ده يشل الجزء اللي بيحب جواكِ يا مريم.. أنا بديكِ نصيحة كان المفروض حد يقدمهالي.
مسحت وشي وكملت وأنا بحاول اتكلم وسط عياطي:
- أنا.. أنا معرفش هو ليه عمل كده فيا، معرفش ليه عمل كده في مراته، أنا حتى شايلة من نفسي حق الزعل علشان شايفة إن إيه زعلي جنب زعل مراته! أنا مش زعلانة عليه حتى خلاص ده اوبشن مش موجود.. أصل هزعل على إيه! بس زعلانة أوي على اللي عيشته، صدقني أنا مستاهلش..
كنت بتكلم، بتكلم كتير وهو بيسمعني بهدوء واهتمام.. مش بيرد، مش بيتناقش هو هادي وبيسمع، خلصت كلامي ومسحت دموعي فكمل بهدوء وهو بيبتسم:
- الدنيا دايمًا بتفاجئنا بحاجات عمرها ما كانت هتيجي في بالنا يا مريم، الدنيا دار بلاء.. متخليهاش تدوس على أملك في الدنيا، عيشتِ موقف صعب.. حقك تزعلي وتعيطي وتنهاري، بس لأ يا مريم متستسلميش علشان الدنيا مش هترحمك، دلوقتِ وقت زعلك بس متخليهوش ياخد من وقتك أكتر من كده..
ابتسَـم وهو بيخرج من جيبه شوكولاتة وبيمدهالي:
- تعرفي إني رجعت من ألمانيا علشان مش قادر استحمل اهلي هناك..
بصيت لُه بعدم فهم فكمل بهدوء:
- هقولك سر.. بيني وبينك.
حركت راسي بإيجاب فكمل وهو بيهمس:
- أنا كمان اتخانت.
بصيت لُه بصدمة، فضحك وهو بيسند ضهره على الحيطة:
- تخيلي اول حاجة اقابلها لما انزل تبقى خيانة بقى وأنا هربان منها هناك..
- هو مين العبيطة اللي تخونك؟
- يعني هو مين الحمار اللي يسيبك؟
بصيت لُه بصدمة، فحمحم وكمل:
- مفيش اكتر منهم في الدنيا، مضطرين نتأقلم مع الألم يا مريم
حركت كتفي بموافقة، فابتسَـم وكمل بهدوء:
- مامتك مصرة ناكل، فهناكل ونمشي.. من بكره هنرجع لحياتنا الطبيعية، نفسي اشوف شغلك بقى
ضحكت وكملت بهدوء:
- أنا لو مكانك أرفدني..
بصلي ثواني وكمل بابتسامة هادية:
- مستحيل.
خرجنا أكلنا سوا، بعدين مشيوا فعلًا.. قررت أدخل أخد شاور، بيچامة شتوي، ونشفت شعري ورفعته ورشيت برفيوم ودخلت انام.. وأنا عندي أمل بكره انسى كل حاجة صعبة عيشتها النهارده.
***
صحيت من النوم، فتحت الشباك كانت المطرة بتمطر.. ابتسَـمت وأنا بشم هوا نضيف، مش مصدقة إن عدى شهر ونص على كل الأحداث اللي حصلت، شهر ونص بنزل فيهم الشغل كل يوم زي الأول.. رجعت فيهم مريم تاني، وقدرت أستشعر فيهم النعم.
أنا آه متعافتش تمامًا.. متعافتش أصلًا، بس مبقتش بنام معيطة وأصحى عيني منفخة، مبقتش بحلم بكوابيس، بقيت بنام اسهل شويه.. مبتأثرش بمشاعر آه، مبصدقش حد ممكن، مبعيطش بسهولة فعلًا.. بس بتبسط اوقات، بضحك من قلبي ساعات، وبصدق أدهم في بعض الأحيان.
هو فعلًا راجل غريب، دخل حياتي بشكل غريب.. بقينا في حياة بعض أوي طول الوقت، مش مجرد مديري في الشغل وده طبعًا راجع لفكرة إنه كان موجود في أصعب ظرف في حياتي.. لبست چيبة سودا وچاكت وشال، واخدت معايا الشمسية وأنا نازلة علشان المطر كان شديد شويه ونزلت.
كان الأطفال بيجروا في الشارع تحت المطرة شويه.. وناس ماشية حاطة على راسها طاقية، وصلت للاتوبيس وركبته.. وصلت الشركة بعد ساعة إلا ربع تاني واحدة كالعادة علشان أول واحد بيكون مستر أدهم.
- فكرتك هتتعرقلي في الطريق
ضحكت وأنا بقفل الشمسية بتاعتي:
- اتعرقل؟ أنتَ ترجمة جوجل
ضيّق حاجبه وكمل:
- ياريت نحترم مدرائنا في الشغل يا موظفة..
- هو أنا عبدة، تشرب قهوة يا مديري؟
بصلي وابتسم، بعدين كمل:
- ياريت تبقى مظبوطة.
دخلت عملت لي قهوة وعملت له وأنا بدندن "رجعت الشتوية، ضل أفتكر في ضل أفتكر في ورجعت الشتوية."
دخلت له القهوة فكمل بهدوء:
- وراكِ حاجة وقت البريك؟
بصيت بتركيز، وبعدين كملت وأنا بحرك راسي بنفي:
- تقريبًا لا..
- خلاص يبقى هخطفك وقت البريك.
بصيت لُه وضيّقت حاجبي:
- لا والله قاطعة كاربوهيدرات وسكريات ورجالة..
ضحك وكمل بإصرار:
- معلش يا مريومي النهارده يوم فري
- هو بالله عليك فيه مدير وقور يقول مريومي؟ أنا لو مكانك استحي..
شاورلي على الباب وكمل:
- ياريت نشوف شغلنا.
مستحيل يكون طبيعي، أكتر حد مش مفهوم شوفته في حياتي.. أنا عرفته في وقت قياسي، بس بصراحة.. أنا عرفته كشخصية مش كشخص، عرفته كإنسان بتعامل معاه بس لا عرفت حياته ولا أهله مع إن هو عرف.. أدهم راجل لذيذ، أي واحدة تحبه بس أنا مش أي واحدة، أنا معنديش حاجة اصلًا أحبه بيها.. مش علشان مشاعري خلصت مع عمر بس علشان فعلًا كل ثقتي في الحب خلصت معاه، ومبقولش إن أدهم عايز يحبني.. بس بحسه طول الوقت عايز يوصلي حاجة وأنا مش عايزاها توصل.
يمكن لأني قلقانة، يمكن لأني خايفة، يمكن لأني مخدتش وقتي في التعافي.
- هو يوسف واسماء بينهم حاجة؟
بصيت عليهم وضحكت:
- أنا أول مرة اشوف اسماء بتضحك كده مع راجل
بصتلي ثواني وكملت وهي بتحط ايدها على خدها:
- وأنا كمان أول مرة أشوفك مبسوطة كده مع راجل
ضيّقت عيني بعدم فهم فابتسَـمت:
- مستر أدهم.
بصيت لَها بإستنكار:
- إيه العبط ده أنا مالي ومال مستر أدهم، يا بنتي ده مديري في الشغل.. وأنتِ عارفة إنه حد كويس وابن حلال، يعني أنتِ ادرى باللي حصل حتى.
أخَدت نفس وكملت بهدوء:
- مريم، هو أنتِ مبتشوفيش عينه بتلمع ازاي قدامك؟
- لأ مبشوفش يا نور، دي أوهام في دماغك.
كنت عارفة إنها مش بتتوهم، بس مش مستعدة تمامًا.. بعتلي لوكيشن اروح عليه، فكرت كتير أروح ولا لأ، لحد ما جيه وقت البريك.. فضلت افكر عشر دقايق بعدين اخدت حاجتي ونزلت، الكافية كان قريب جدًا من الشركة.
وصلت قدام الكافية، كانت عربيته واقفة برا، بقدم رجل وبأخر التانية.. أخدت نفس وغمضت عيني، فتحت باب الكافية لقيته قاعد وقدامه ورد فابتسَـمت بعدين حمحمت وداريت ابتسامتي، وصلت قدامه لقيته قام وقف.
- اتأخرتِ ليه؟
بصيت على الورد وعليه، وكملت بأستغراب:
- ده لمين..
- ده لـ..
فجأة سكت، فتح عيونه بصدمة.. كان فيه ريحة برفيوم حريمي جامدة جاية من جنبي، بصيت جنبي لقيتها بنت بصاله:
- أدهم، كأنك كنت حاسس إني جاية
بصيت لُه بأستغراب وضيّقت عيوني:
- مين دي؟
كملت وهي بتبصلي:
- خطيبته..
بعدت خطوتين وأنا ببصله بعدم فهم، وببصلها بعدم تصديق.. أنا محبتهوش، بس حاسة إني مش فاهمة ليه حاسة بألم في قلبي، ليه حاسة إني مصدومة مع إن عادي.. هو ولا حاجة
كملت وأنا ببصله:
- خطيبتك!
