رواية أنس وندي الفصل الاول 1 بقلم سلسبيل احمد


 رواية أنس وندي الفصل الاول

روان! أقسم بالله لو لمستي حاجتي تاني، هزعلك!

خرج صوتي من الأوضة وأنا بدور على الطرحة اللي كنت حطاها على الكرسي، واللي اختفت كالعادة بسبب الهانم بنت خالتي.

روان من الصالة: «والله ما لمست حاجة يا أختي!»

ندي: «آه طبعًا، الطرحة قامت مشت برجليها!»

روان: «طب ما يمكن زهقت منك وقررت تسيبك!»

خرجت من الأوضة وأنا ماسكة طرحة تانية، لقيتها قاعدة على الكنبة بتاكل شيبسي وبتتفرج عليا بمنتهى البرود.

ندي: «إنتِ مش عندك محاضرات؟»

روان: «عندي، بس مش مستعجلة على فراقك.»

ندي: «يا رب أرتاح منك يوم واحد.»

روان: «ده إنتِ هتوحشيني.»

ندي: «مش للدرجة دي يعني.»

ضحكت روان، ورميت عليها المخدة اللي كانت جنبي، لكنها لحقت تمسكها.

سيبتها ودخلت أكمل لبسي.

أنا ندي، عندي خمسة وعشرين سنة، خريجة تمريض وبشتغل في مستشفى خاص. 
يمكن شغلي متعب، ويمكن ساعات برجع البيت مش قادرة حتى أتكلم، بس بحبه جدًا، وبحب إحساسي إني بقدر أساعد حد محتاجني.

عايشة مع خالتي نهلة وبنتها روان، واللي بالنسبالي مش مجرد خالتي وبنت خالتي، دول عيلتي كلها.

ماما وبابا الله يرحمهم ماتوا وأنا صغيرة، وخالتي هي اللي ربتني واحتوتني، وعمرها ما خلتني أحس إني ناقصني حاجة.

خرجت من الأوضة بعد ما لبست دريس  الزيتي الطويل وطرحه بيج ، وخدت شنطتي ونزلت أقعد معاهم.

نهلة: «تعالي يا حبيبتي، افطري الأول.»

ندي: «حاضر يا ماما.»

نهلة وهي بتحطلي طبق الجبنة: «ربنا يهديكم يا بنات، هو مفيش يوم يعدي من غير خناق؟»

ندي: «اسألي بنتك يا خالتو، دي بتستفزني من غير أي مناسبة.»

روان: «أنا؟! ده أنا ملاك.»

ندي: «ملاك مين يا بنتي؟ إنتِ لو شافوكي الشياطين تستعيذ منك.»

ضحكت خالتي، وروان بصيت لي بصدمه مصطنعه .

نهلة: «خلاص يا ستي، كلي عشان تلحقي شغلك.»

قربت منها وبوست خدها.

ندي: «حاضر يا حبيبتي، ادعيلي.»

نهلة: «ربنا يحفظك يا بنتي، وخلي بالك من نفسك.»

ندي: «حاضر.»

خرجت من البيت وأنا بفكر في يومي والشغل اللي مستنيني.
____________________

«يا جدو، إنت لسه بتفطر؟»

رفعت عيني من الموبايل وبصيت لجدي اللي كان قاعد قدام طبق الفطار، وبيشرب الشاي بمنتهى الهدوء.

عبد العزيز: «هو أنا في سباق يا أنس؟»

أنس: «لا يا سيدي، بس إنت بقالك كتير قدام الطبق.»

عبد العزيز: «وإنت مالك؟ مش عاجبك إني بفطر؟»

أنس ضحك وقعد قصاده: «لا، عاجبني جدًا، كمل براحتك.»

دخلت أم محمود وهي شايلة طبق فاكهة، وأول ما شافتني ابتسمت.

أم محمود: «صباح الخير يا حبيبي.»

أنس: «صباح النور يا أم محمود.»

أم محمود: «إنت فطرت ولا لسه؟»

أنس: «أيوه يا أم محمود، فطرت.»

أم محمود: «طب خدلك فاكهة.»

أنس: «حاضر.»

عبد العزيز: «إنتِ هتفضلي وراه لحد ما ياكل البيت كله؟»

أم محمود: « ما أنا بخاف عليه.»

عبد العزيز: «ما هو كبير يا أم محمود.»

أم محمود: «حتى لو بقى عنده مية سنة، هيفضل صغير.»

بصيتلها وضحكت.

أنس: «ربنا يخليكي لينا يا أم محمود.»

أم محمود: «ويخليك ليا يا حبيبي.»

جدي عبد العزيز الشافعي، صاحب الشركة اللي أنا شغال فيها، وواحد من أهم الناس في حياتي.

كان طول عمره راجل نشيط، بيحب شغله وبيحب ينزل الشركة ويتابع كل حاجة بنفسه، لكن بعد ما صحته اتأثرت، اضطر يسيب إدارة أغلب الأمور ليا.

وعلى قد ما أنا بحب أشيل المسؤولية، على قد ما نفسي يرجع زي الأول، وأشوفه بيتحرك في البيت من غير ما يتعب.

عبد العزيز: «هترجع إمتى النهارده؟»

أنس: «مش عارف يا جدو، عندي شوية حاجات لازم أخلصها.»

عبد العزيز: «يعني مش هتقعد معايا؟»

أنس: «هحاول أرجع بدري.»

عبد العزيز: «كل مرة هحاول دي؟»

أنس: «خلاص يا سيدي، هخلص وأرجعلك.»

ابتسم جدي، فقمت وبوست راسه.

أنس: «خلي بالك من نفسك.»

عبد العزيز: «ربنا يحفظك يا حبيبي.»

خرجت من الفيلا، وركبت عربيتي متجهًا للشركة.
_______________
ندي

كان الشغل ماشي بشكل طبيعي، بين متابعة المرضى ومراجعة الأدوية وتنفيذ تعليمات الدكاترة.

كنت بساعد واحدة من المريضات في ترتيب حاجتها، لما سمعت صوت سيدة كبيرة بتناديني.

السيدة: «يا بنتي، ممكن تيجي؟»

ندي: «حاضر يا طنط، جاية أهو.»

دخلت عندها، لقيتها بتحاول توصل لكوباية المية اللي جنب السرير.

ندي: «استني بس، إنتِ هتتعبي نفسك ليه؟»

السيدة: «معلش يا بنتي، مش عايزة أتعبك معايا.»

ندي: «تتعبي مين بس؟ 
ده أنا هنا عشان أساعد حضرتك.»

ناولتها الكوباية، وبعد ما خلصت، ظبطتلها المخدة.

السيدة: «ربنا يفرح قلبك يا بنتي.»

ندي بابتسامة: «ويفرح قلب حضرتك يا رب.»

خرجت من عندها، ولقيت زميلتي بسمه  واقفة في الممر.
كانت بصالي شويه

ندي: «في إيه؟»

بسمه : «كل شوية ألاقيكي مع حد، شوية هنا وشوية هناك.»

ندي: «يا بنتي ما الناس تعبانة، يعني أسيبهم؟»

زميلتي: «ربنا يقويكي يا ستي.»

ندي: «آمين، وإنتِ كمان.»

كملت شغلي، وكان يوم طويل، بس الحمد لله مفيش حاجة خارجة عن الطبيعي.
_______________

رجعت الفيلا وأنا مرهق، وكل اللي كنت عايزه إني أغير هدومي وأقعد مع جدي شوية.

لقيت أم محمود في الصالة، وكانت بترتب شوية حاجات.

أنس: «مساء الخير يا أم محمود.»

أم محمود: «مساء النور يا حبيبي، حمد الله على السلامة.»

أنس: «الله يسلمك، جدو فين؟»

أم محمود: «فوق في أوضته.»

أنس: «طب كويس، هطلع أسلم عليه.»

أم محمود: «استنى يا أنس، هو كان تعبان شوية النهارده.»

وقفت وبصيتلها.

أنس: «تعبان إزاي؟»

أم محمود: «كان بيشتكي من صداع وإرهاق، وأنا قلتله أكلم الدكتور، بس رفض.»

أنس: «طب ليه محدش كلمني؟»

أم محمود: «قال متشغليش أنس وهو في شغله.»

اتنهدت بضيق.

أنس: «هو لازم يعمل كده كل مرة؟»

طلعت بسرعة لأوضته، وخبطت قبل ما أدخل.

أنس: «جدو؟»

كان قاعد على السرير، وأول ما شافني ابتسم.

عبد العزيز: «أهو الباشا وصل.»

أنس: «إيه يا حبيبي؟ أم محمود بتقولي إنك تعبان.»

عبد العزيز: «شوية صداع، مفيش حاجة.»

أنس: «طب ما كنت كلمت الدكتور يطمن عليك.»

عبد العزيز: «يا ابني أنا كويس، إنت مكبر الموضوع ليه؟»

قربت منه وقعدت جنبه.

أنس: «أنا مش بكبر حاجة، بس مش عايزك تستهون بتعبك.»

عبد العزيز: «حاضر يا سيدي، هسمع كلامك.»

ابتسمتله، وقومت.

أنس: «هغير هدومي وأنزل أقعد معاك.»

عبد العزيز: «مستنيك.»

خرجت من الأوضة، وروحت أوضتي أغير هدومي.

مكنتش لسه خلصت لما سمعت صوت أم محمود بتنادي عليا من بره.

أم محمود: «يا أنس! يا أنس!»

خرجت بسرعة.

أنس: «في إيه؟»

كانت واقفة قدام أوضة جدي، وملامحها متغيرة.

أم محمود: «الحق جدك يا ابني، مش عارفة ماله!»

دخلت الأوضة بسرعة، وأول ما شوفته حسيت إن الدنيا وقفت بيا.

كان قاعد على السرير، لكن وشه مش طبيعي، وكلامه مش واضح، وإيده مش قادر يحركها كويس.

أنس: «جدو؟ جدو سامعني؟»

حاول يرد، لكن كلامه كان متلخبط.

قربت منه ومسكته من إيده.

أنس: «جدو، بصلي!»

بصلي بصعوبة، وحاول يرفع إيده التانية.

أنس بصوت عالي: «أم محمود! 
اتصلي بالإسعاف بسرعة!»

أم محمود: «حاضر يا ابني، حاضر.»

مكنتش عارف أعمل إيه غير إني أفضل جنبه وأكلمه.

أنس: «أنا جنبك يا جدو، متقلقش، الدكتور هيشوفك وهتبقى كويس.»

وصل الإسعاف، واتنقل جدي للمستشفى بسرعة.

طول الطريق وأنا ماسك إيده، وبحاول أتماسك قدامه، لكن من جوايا كنت مرعوب.

وصلنا المستشفى، واتنقل فورًا للطوارئ، والفريق الطبي بدأ يتعامل مع حالته.

وقفت بره وأنا مش قادر أستقر في مكاني.

أنس: «لو سمحت، حد يفهمني جدي ماله!»

الممرض: «الدكتور هيتابع الحالة يا فندم، وأول ما يكون عندنا معلومات هنبلغ حضرتك.»

أنس: «أنا عايز أطمن عليه بس.»

الممرض: «إن شاء الله خير.»

فضلت واقف، لحد ما خرجت ممرضة من جوه.
______________

ندي

كنت مكلفة بمتابعة الحالة مع الفريق، ولما خرجت عشان أبلغ حفيد المريض إن الدكتور لسه بيعمل الفحوصات، لقيته واقف قدام الباب ووشه متوتر جدًا.

ندي: «حضرتك قريب المريض؟»

أنس: «أيوه، أنا حفيده. جدي ماله؟»

ندي: «هو دلوقتي تحت متابعة الفريق الطبي، والدكتور بيعمل الفحوصات اللازمة عشان يحدد حالته.»

أنس: «يعني إيه؟ هو مفيش حد عارف هو ماله لحد دلوقتي؟»

ندي: «يا فندم، إحنا مش هنقدر نقول تشخيص قبل ما الفحوصات تخلص.»

أنس: «طب ما حد يطلع يطمني بدل ما أنا واقف هنا!»

ندي: «حضرتك أنا فاهمة إنك قلقان، بس الفريق الطبي بيتعامل مع الحالة، والدكتور هيخرج يتكلم معاك بنفسه.»

أنس بصلي بضيق: «أنا مش فاهم إنتوا مستنيين إيه بالظبط!»

ندي: «مستنيين نتيجة الفحوصات يا فندم، وده لمصلحة جد حضرتك.»

سكت شوية، وبعدين سألني:

أنس: «هو واعي؟»

ندي: «الدكتور هو اللي هيقدر يوضحلك تفاصيل حالته بعد التقييم.»

أنس: «يعني مفيش إجابة واضحة؟»

ندي: «أنا مش هقولك معلومة مش متأكدة منها عشان أطمنك وخلاص.»

بصلي بنظرة ضايقتني، لكني حافظت على هدوئي.

ندي: «لو سمحت، استنى الدكتور هنا، وأول ما نعرف أي جديد هنعرفك.»

رجعت لجوه أكمل شغلي.

وبصراحة، أخدت عنه انطباع مش حلو خالص. 
كنت مقدرة خوفه على جده، لكن طريقته في الكلام حسستني إنه مش واثق في أي حد، وإنه شايف إن كل اللي حواليه مقصرين.

بعد شوية خرج الدكتور وبدأ يشرحله إن فيه اشتباه في جلطة دماغية، وإنهم بيستكملوا الفحوصات والتقييم بشكل عاجل.

وقفت بعيد أتابع شغلي، وشوفته بيسأل الدكتور أسئلة كتير، وكل ما الدكتور يجاوبه يرجع يسأله تاني.

كان واضح إنه خايف جدًا.

رجعت لأوضة المريض عشان أتابع المطلوب مني، ولما قربت من السرير لقيته بيحاول يتكلم.

ندي بهدوء: «متتعبش نفسك يا جدو ، خليك مرتاح.»

حاول يبصلي، وبعدها بص ناحية الباب.

كان واضح إنه بيدور على حفيده.

ابتسمتله وقلت: «هو بره مستنيك، متقلقش.»

وبعد ما اتأكدت إن كل حاجة تمام، خرجت تاني.

لقيت حفيده واقف لوحده، ماسك موبايله ومش مركز في أي حاجة حواليه.

عديت من جنبه، لكنه وقفني بصوته.
«لو سمحتي.»

لفيت ناحيته.

ندي: «أيوه؟»

أنس: «ممكن أعرف لو فيه أي تطورات في حالة جدي؟»

ندي: «الدكتور لسه بيتابع الفحوصات، وأول ما يكون فيه جديد هيبلغ حضرتك.»

هز راسه، وبعدها رجع بص ناحية باب الأوضة.

مكملتش كلام، ورجعت لشغلي.

________________

قعدت على الكرسي قدام أوضة جدي، وحطيت إيدي على وشي.

كنت بحاول أهدى، لكن كل اللي في دماغي كان صورة جدي وهو تعبان، وصوته اللي مش قادر يطلع منه كلام مفهوم.

طلعت موبايلي واتصلت بعمران.

أنس: «ألو يا بابا.»

عمران: «أيوه يا أنس، خير؟»

أنس: «جدو في المستشفى.»

صوته اتغير فورًا.

عمران: «إيه؟ ماله؟»

أنس: «تعب فجأة، والدكاترة بيعملوا فحوصات، فيه اشتباه في جلطة.»

عمران: «أنا هتحرك حالًا. خليك معاه وكلمني أول ما تعرف حاجة.»

أنس: «حاضر.»

قفلت المكالمة، ورجعت بصيت لباب الأوضة.

مكنتش عايز غير إني أشوفه خارج منها وهو بيتخانق معايا كعادته، ويقولي إني مكبر الموضوع.

لكن المرة دي، كل حاجة كانت مختلفة.


تعليقات