رواية قناص الغرام الفصل الاول
في منزلٍ بأحد الأحياء الراقية يسكنه الهدوء، لا يوجد به أحد سوى شخص واحد، يبدو عليه الهدوء عكس النيران التي تشتعل في صدره كل يوم؛ نيرانٌ أشعلها الغدر ولن يطفئها سوى الانتقام.
هو قاتل مأجور، قناص الداخلية الأسبق الذي ترك وظيفته عندما عرقلت خطته الانتقامية، يثأر لدمٍ لم يجف بعد في مخيلته، يراه كل ليلة يطارده في أحلامه؛ دم والده الذي سقط غدرًا أثناء تأدية عمله العسكري.
حاول معرفة من القاتل مرارًا وتكرارًا حتى أصابه اليأس، وبعد وقت علم من هو القاتل الحقيقي، فحاول أخذ ثأره بالقانون، ففي الأول والأخير هو رجل يمثل القانون.
بعد أن فشل ترك وظيفته. لم ينفك عن ملاحقة القاتل دون هوادة، وكل مرو تأول إلى الفشل في القبض هذا القاتل؛ يبقى يحاول ويحاول.
وفي ظل هذه المحاولات، كانت تقع تحت يديه قضايا أخرى، ملفات لم تستطع الشرطة أن تحقق فيها العدل بسبب التحايل على القانون، مما أثار رغبته في التحقيق العدل، كان يرى قاتل والده مثلهم فينتفم منه ومنهم، لذا أصبح قاتلًا مأجورًا يحقق العدالة بسلاحه وينهي ظلم واعتداء كل غادر. والآن هو سبب من أسباب نشر العدالة الحقيقية؛ تحت مسمى جديد وقانون خاص: ما أُخذ بالقوة لا يُسترد إلا بالقوة.
أشرقت الشس على هذا المنزل، وهبط الدرج فارس إبراهيم، قناص الداخلية الملقب بـ عيون الصقر، وذلك لأنه لا يخطئ بهدفه أبدًا، جلس على الطاولة، وجلس بجواره صديقه ومساعده الخاص حاتم. وأثناء تناول الطعام قال حاتم: شكلك برضه مانمتش كويس؟
فارس: النوم بقى بالنسبالي رفاهية يا حاتم.
حاتم: من كتر التفكير يا فارس... يا ابني مش كده، خف على نفسك شوية.
فارس بضيق: مش قادر... كل أما أنام بتخيل منظره وهو بيموت على إيدي وبيقولي: "هاتلي حقي!" منظر أمي لما عرفت الخبر وماتت في ساعتها وراه. وقفتي وأنا بدفن الاتنين مع بعض، مع بعض يا حاتم! أنسى إزاي! أعيش حياتي عادي إزاي! أنا ادفنت معاهم وبقيت آلة بتقتل بس، آلة بيحركها كلمة مظلوم، كلمة هات حقي من اللي ظلمني، مابقتش بني آدم خلاص.
حاتم: طيب خلاص، إهدى بقى.
فارس: هادي... قولي، فيه أخبار؟
حاتم: رائد كلمني الصبح وقالي إن غانم فراج ظهر على الساحة تاني.
قذف فارس الخبز من يده وقال وبحدة: وقاعد من الصبح وإنت عارف المعلومة دي وساكت!
حاتم: يا ابني أنا لحقت؟! أهدى بس وهفهمك... هو قالي إن فيه بلاغ عن تهريب صفقة آثار جديدة هتم النهاردة، وفيه كلام إن غانم هو اللي هيعملها، يعني الكلام مش أكيد. وبعدين رائد مابقاش عارف يقول المعلومات كلها الفترة دي بسبب إن كل عملية بيعرف عنها معلومة بيلاقوا القناص موجود، وده فتح عليه العين... حاسس أصلًا إنه عارف معلومات تانية ومش قادر يقولها.
فارس: رائد هيتصرف، أنا واثق فيه... لو متأكد إن اللي قتل أبويا هيبقى موجود وأقدر أخد طاري منه مش هيتردد ثانية إنه يبلغني.
حاتم: على العموم أنا قولتله هكلمك كمان ساعتين تكون أتأكدت من المكان والمعاد، وقالي لو عرفت حاجـة هبلغك.
فارس: نستنى ونشوف.
حاتم: بالنسبة لغسان أبو العزم، هتعمل إيه في طلبه؟
فارس: هو كان عايز يقتل مين؟
حاتم: غندور المعداوي، رجل أعمال معروف عنه إنه واخد قروض بمبالغ كبيرة وهرب بيها برا البلد، وحاليًا بيحاول يرجع تاني ويدفع رشاوي عشان يقدر يفتح مشاريع جوا البلد.
صمت فارس يفكر قليلًا ثم قال: بس غسان أبو العزم برده حواليه شكوك كتير، وبعدين ما أنا رفضت أشتغل معاه قبل كده... هو ليه مصر للدرجة دي؟
حاتم: مش عارف... بس إنت سمعت عنه حاجة من رائد؟
فارس: لا... بس وأنا في الخدمة سمعت إن حواليه شبهات. لا، مش هشتغل معاه، مش عايز أدخل في تصفيات عصابات، أنا ليا طريقتي وأسلوبي، ولو دخلت في حرب العصابات دي هروح في داهية.
حاتم: طيب أسأل رائد وأتأكد.
فارس: أشوف موضوع غانم الأول وبعدين أبقى أتأكد براحتي.
انتهيا من الطعام، وبعد وقت اتصل رائد بحاتم، فنظر فارس الذي يقف أمام نافذة المنزل يتأمل المشهد الخارجي في صمت، ثم انتبه لحديث حاتم عندما سمعه يقول: أيوة يا رائد... اه أنا عنده في البيت.
رائد: طيب أنا عرفت إن احتمال كبير غانم هو اللي يقوم بالعملية، لما أقفل معاك هبعتلك العنوان، بس خلي بالك مايحاولش فارس يقف في مكان مكشوف أو قريب، لأن الداخلية هتبقى هناك برده مستنية أي إشارة عشان تهجم.
حاتم: تمام... هبلغه.
أنهى حاتم المكالمة وقص له ما قاله رائد وأرسل له العنوان، بدأ فارس في الاستعداد. وبعد أن أعد بندقيته؛ نظر إلى الرصاص في يده، وقعت عيناه على صورة والده ووالدته، فنظر إليهما في حزن ممزوج بالإصرار والغضب؛ نيران تلتهم صدره كلما تذكرهما، ينظر إلى المنزل الذي أصابه لعنة الصمت واليأس، عيناه تبحث عنهما في كل مكان: لا تقلقا، فيومًا ما سآتي عند هذا القبر أعلن لكما أني وفيت بوعدي وقتلت من تسبب في خراب هذا المنزل.
حل الليل، وذهب فارس إلى العنوان الذي أرسله رائد ووقف من بعيد.
بعد وقت، لاحظ تحركات رجال الشرطة في المكان وظل يترقب مثلهم. مرت ساعة حتى ظهرت سيارات تقترب من المكان، وظل يراقب إلى أن نزل الرجال ودخلوا المبنى. حاول فارس رؤية غانم ولكن فشل، فاستمر في المراقبة حتى وصلت سيارات أخرى ونزل منها أحد الرجال، ورأى فارس واحدًا من هيئته من الخلف يبدو وكأنه غانم.
ابتعد الرجل عن السيارة وبدأ يتقدم من المبنى في أثناء استعداد فارس لإطلاق الرصاص، ولكن لم يستطع أن يصوب عليه، فانتظر حتى يجد فرصة أخرى.
بعد لحظات، داهم رجال الشرطة المكان وحدث تبادل لإطلاق النيران داخل المبنى، وحينها رأى فارس غانم يهرب من الباب الخلفي للمبنى ومعه حارسان شخصيان، فاستعد فارس ليطلق الرصاص عليه بعد أن تأكد من أنه هو غانم حقًا.
حاول الشرطي المكلف بمراقبة المبنى من الخارج اللحاق بهما، وفي أثناء إطلاق فارس للرصاص، وقف الشرطي حائلًا بينهما والرصاصة قد خرجت من السلاح ليتلقى الرصاصة بدلًا من غانم!
ترك فارس السلاح بذعر ونظر إلى هذا الشرطي في صدمة، فقد أرداه قتيلًا دون قصد. حاول فارس أن يسيطر على نفسه، ولكن كان غانم قد هرب بالفعل. قد حاول أن يأخذ بثأر والده وإذا به يقتل بريء لا ذنب له.
أخذ فارس سلاحه وغادر المكان على الفور وعاد إلى منزله، يقبض على المقود بكلتا يديه بغضب، ﻷول مرة تخرج الرصاصة من سلاحة وتخطأ.
كان حاتم ينتظره هناك، وعندما دخل المنزل وقف أمامه بقلق وقال: ها... عملت إيه؟
ألقى فارس حقيبته أرضًا وهو يتنفس بضيق ثم قال: قتلت واحد غلط! قتلت حد من البوليس غلط! أنا مش عارف إيه خلاه يجي يقف قدام الرصاصة في الوقت ده؟ أعمل إيه دلوقتي؟
حاتم بصدمة: يا نهار مش فايت! قتلت واحد من الشرطة؟! طيب هنعمل إيه في المصيبة دي؟!
فارس: مش فارق معايا أتحاكم ولا لا، أنا فارق معايا الراجل اللي موته بإيدي... راجل ملوش ذنب... بريء! عملت فيه اللي اتعمل في أبويا بالظبط، راجل خارج حاطط روحه على إيده عشان يحقق العدل ويقبض على الناس اللي خاربين البلد بالأسلحة والآثار وأنا قتلته! أكيد ليه أهل وزوجة وعيال... أنا مش هعرف أسامح نفسي على اللي عملته ده أبدًا، مش هعرف.
حاتم: أهدى يا فارس... ما أكيد مش قصدك يعني، هو اللي نصيبه يقف قدام واحد مايساوش ويموت بداله، مش ذنبك يا فارس... إهدى بس.
فارس: مش ههدى... أنا هموت من اللي عملته، مش قادر أنسى منظره وهو بيموت بسببي.
جلس فارس ووضع رأسه بين راحتيه، أنفاسه الحارقة تخرج بقوة وكأنه يحارب الدموع في عينيه. جلس حاتم بجواره وربت على عاتقه وقال: بص يا فارس... إحنا ماعندناش حل غير إننا نشوف أهله فين ونساعدهم، لو عنده أولاد صغيرين نصرف عليهم ونتكفل بيهم، لو مراته محتاجة فلوس نديها.
فارس: وده هيعوضهم عن أبوهم اللي راح؟ هيعوض مراته عن جوزها اللي مات من غير سبب؟ كان عوضني أنا!
حاتم: مفيش حاجة هتعوضهم، بس ماتنساش إن مفيش راجل شغال في الداخلية مش بيخرج كل يوم وهو عنده احتمال 90% إنه ممكن مايرجعش. إهدى بس... أنا الصبح هروح أشوف الدفنة بتاعته وهعرف كل حاجة عنه وهاجي أقولك، بس فيه حاجـة عايز أقولك عليها قبل ما تدخل أوضتك وماشفش وشك تاني النهاردة كالعادة؛ غسان كلمني تاني عايز يعرف هتعمل إيه.
فارس: مش موافق أشتغل معاه... بلغه بده وقوله مش هغير رأيي.
تركه فارس وهو يشعر بالضيق وذهب إلى غرفته، وكعادته اختلى بنفسه وبأحزانه وحيدًا، مثل كل يوم يعتزل صخب العالم من حوله.
حل الصباح وذهب حاتم ليتقصى ما يحدث، استطاع أن يحصل على معلومات عن الشرطي الذي توفى بالأمس، فهو لديه طاقم عمل يعاونه على جمع كل الأخبار الهامة، وحين عرف هويته بدأ في البحث عن موعد الدفن.
وبعد وقت كان يقف في جنازة هذا الشرطي، فوجد أن هناك فقط فتاة صغيرة ذات الثامنة عشر تقف وحيدة تتلقى العزاء وتبكي بشدة، لم يجد أحد آخر سوى رجال الشرطة من يقدمون واجب العزاء، ظل يراقبها من بعيد حتى انتهت مراسم الدفن، وحين عادت إلى منزلها تتبع أثرها من بعيد، كانت تسكن في أحد الأحياء القديمة، ودخلت منزلًا شبه متهالك، علم أن حالتها المادية ضعيفة ومن المؤكد تحتاج إلى المساعدة.
وقف حاتم بالأسفل ينظر إلى المنزل من الخارج، وبعد قليل وجد أحد الرجال يقترب منه، نظر إليه بتعجب وقال: واقف كده ليه يا أستاذ؟
حاتم: أنا كنت عايز أعزي في المرحوم، الشويش مهيب.
الرجل: الله يرحمه... أنا عطوة صاحب المحل اللي تحت بيته. واجبك وصل يا أستاذ... أصل هو مقطوع من شجرة ومفيش رجالة تاخد عزاه، أنا هبلغ بنته ندا إنك جيت تعزي، بس أقولها حضرتك مين؟
حاتم: أنا الظابط علاء، كنت معاه يعني في الداخلية وكده ومالحقتش الدفنة، فقلت أجي أعزي هنا... هو مالوش حد خالص؟
عطوة: لا يا باشا مالوش حد، هي بنته بس يا عيني الغلبانة دي، ده لسه حتى صاحب البيت قايلي إنه يا إما هيعلي عليها الإيجار يا إما هيطردها وهي لا بتشتغل ولا ليها دخل، وفين وفين على ما تاخد معاش أبوها.
حاتم: هي عندها أد إيه؟
عطوة: يعني 18 أو 19 سنة، حاجة كده يعني.
حاتم: بتدرس؟
عطوة: آه، في كلية فنون جميلة، دي رسامة إيه... درجة أولى!
حاتم: طيب بص يا عطوة ده رقمي، لو صاحب البيت طردها كلمني وأنا هاجي أخدها وهدبرلها مكان تبات فيه.
عطوة: تسلم يا باشا ربنا يكرمك يارب، ده أنت هتاخد فيها ثواب كبير، دي بت يتيمة وغلبانة.
حاتم: ربنا يقدم اللي فيه الخير.
عاد حاتم إلى منزل فارس الذي كان ينتظره منذ الصباح، قص له كل ما حدث، فقال فارس: يعني مالوش غير بنت واحدة؟ طيب لو الراجل كلمك بلغني وتعالى نشوف شغلنا.
حاتم: شكلك لسه متضايق.
فارس: وهفضل متضايق... بس خلينا نشوف الرجالة وصلوا لغانم ولا لا.
في المساء، اتصل عطوة بحاتم، حدثه بذعر وأخبره أن مالك العقار قد طرد ندا من المنزل، وألقى بثيابها وأثاث المنزل بالشارع وهي الآن تجلس عليه وتبكي وحيدة. علم فارس بما حدث وزاد غضبه ثم قال: يعني يطرد أنسة كده في نص الليل في الشارع! مفيش رحمة!
حاتم: هنعمل إيه دلوقتي؟ لازم نتصرف، ومش صح برده نخليها في أوتيل لوحدها، محدش ضامن هتتأذي ولا ﻷ.
تنهد فارس وقال: روح هاتها دلوقتي على البيت هنا.
حاتم: هقولها إيه طيب! هقنعها إزاي؟
فارس بحدة: اتصرف يا حاتم بقى، أنا مش طايق نفسي.
أومأ إليه حاتم وذهب إلى منزلها، وجدها تبكي وتنظر حولها بخوف، وكأنها تبحث عن الأمان الذي سلب منها في يوم واحد، بلا أب أو مأوى، تنهد بحزن واقترب منها، رفعت وجهها الشاحب تنظر إليه فقال: البقاء لله يا آنسة ندا.
نظرت إليه ندا ووجهها البريء تنظر إليه بعيون طفلة، من يراها يظن أنها أصغر من سنها، تبدو كالأطفال بتعابير الوجه الباكي ثم قالت بصوت ضعيف: حضرتك مين؟
حاتم: أنا حاتم، كنت أعرف والدك ووصاني عليكي كتير لو جراله حاجة أفضل جنبك أنا وفارس صاحبي.
نظرت إليه وهي تعقد حاجبيها وقالت: بس... بابا عمره ما حكالي عنكم.
حاتم: مافتكرش هيقولك على كل زمايله ومعارفه يعني. ماتخافيش يا ندا إحنا هنحميكي، اعتبري نفسك بقى ليكي أبين بدل واحد، قومي يلا وماتقعديش كده، هو شكله كان عارف إن صاحب البيت راجل مفتري وتوقع هيعمل فيكي إيه.
زاد نحيبها وقالت: ربنا يسامحه... ده بهدلني.
تنهد حاتم ومد يده إليها وقال: طيب قومي ماتخافيش... تعالي معايا.
حملت حقيبتها الصغيرة وبيدها برواز للوحة خاصة بأحد المشاريع الجامعية تقوم برسمها بنفسها وذهبت معه. كانت تشعر بالخوف والقلق منه وتتحرك خلفه بتوجس، تتقدم خطوة وتقف مرة أخرى، لاحظ حاتم ذلك فقال: ماتخافيش... أنا عارف إنك قلقانة وده طبيعي، بس لما تعرفينا مش هتخافي مننا أبدًا، إحنا هنحميكي زي ما مهيب قالنا.
نظرت له ندا بحزن وصمتت. هو يعرف اسمها واسم والدها، وحين أخبرها أنه شرطي مثله وثقت به نسبيًا.
صعدت السيارة معها وهي تحتضن اللوحة بقوة، ربما تستمد منها قوة زائفة ولكن كانت تطمئن قلبها بأنه لن يحدث أسوأ مما احدث.
صف حاتم السيارة أمام المنزل، ثم ترجلت ندا منها ووقفت أمامه، تنظر إلى منزل فارس من الخارج، المنزل هادئ وبمكان راقي، تعجبت من الأمر وقالت: ده بيتكم؟!
حاتم: ده بيت فارس صاحبي، إحنا عايشين مع بعض.
فتحت ندا عيناها بصدمة وقالت: وأنا هعيش معاكم؟!
حاتم: الليلة بس، ومن بكرة هبدأ أدور على مكان خاص ليكي، بس الوقت اتأخر أوي ومش هعرف أتصرف... ماتخافيش.
ابتلعت ريقها ووقفت مكانها لم تتحرك، حتى دخل حاتم ودخلت خلفه ندا بخطى مترددة، تشعر برهبة داخل صدرها وتنظر حولها في كل اتجاه حتى فتح حاتم الباب ودخل ليفسح لها المجال، فنظرت داخل المنزل يمينًا ويسارًا، ورأت فارس يوليها ظهره وينظر من النافذة بصمت كعادته، وقال حاتم: ادخلي يا ندا.
التفت فارس لتقع عينه عليها، وجدها شابة جميلة، كان يتوقع أن تبدو أصغر من ذلك، فعقد حاجبيه واقترب من حاتم وهمس له قائلًا: مين دي؟
نظر له حاتم وغمز بعينيها ثم قال: ندا مهيب. رحت أعزي زي ما قولتلك وأشوفها محتاجة حاجة ولا ﻷ فوجئت إن صاحب البيت طردها، تخيل الراجل الندل رماها برا البيت! طبعًا أفتكرت كلام مهيب إنه وصاها علينا وجبتها معايا.
نظر عند الباب ووجدها تدخل بخجل، اقتربت منه ليرى ملامح وجهها بوضوح.
توقف الزمن لدقائق، واختفت الأصوات من حوله ليسمع فقط صوت دقات قلبه؛ تعلو وتعلو دون هوادة. كانت تقترب منه وكل خطوة تقربها نحوه تعصف بكل ما به من صلابة.
نظر داخل عيناها ليرى لونها الأخضر الذي يعشقه، فهو يشعر بالهدوء فقط عند رؤية الزرع الأخضر ويبعث في قلبه الطمأنينة. صمتت الكلمات وتبدل حال فارس ليعلن قلبه عن ناقوس الخطر يضرب بصدره، منبئًا ببداية عشق ممنوع يطرق باب قلبه، بل لم يطرقه فقط، فقد دخل واستقر به دون استئذان...
