رواية جريمة علي شط اسكندرية الفصل الأول بقلم ياسر عوده
-ايوه يا ريهام، ابني محمد فين؟
-هو لسه ماوصلش عندك يا ماما؟، طيب ازاي دا من حوالي ساعه كلمني وقالي انه وصل للمحطه عندكم في الاسكندريه، وقالي هيخرج من المحطه ويركب أي تاكسي وهيرحلك.
-ازاي اللى انتي بتقوليه دا، المسافه بنا وبين المحطه ماتخدش اكتر من نصف ساعه، ازاي بقاله ساعه وماوصلش لغايه دلوقتي.
-مش عارفه يا ماما، معقول يمكن راح لحد من اصحابه اللى اوقات بيروحلهم لما بيجيلك؟
-عمره ما عمل كده، محمد لازم يجيلي الاول ويطمأن عليا ويسلم عليا، معقول اول لما يوصل للاسكندريه مايجليش ويروح لـ اصحابه.
-مش عارفه يا ماما، انا كده قلقت انا كمان، خليكي معايا هتصل عليه تاني يمكن الشبكه وقعه ولا حاجه.
-طيب كلميه وانا معاكي على التليفون، انا خايفه عليه اوي ولما اتصلت عليه لقيت تليفونه مقفول.
-حاضر.
وفعلا ريهام اتصلت على محمد وانا كنت معاها على التليفون، بس المشكله انه حصل معاها نفس اللى حصل معايا، والتليفون مغلق او غير متاح، وقالتلي:
-مقفول او غير متاح يا ماما، انا قلقانه عليه اوي ومش عارفه اعمل ايه، البس واجي واسيب العيال مع ماما وبابا ولا اعمل ايه؟
-لا هتيجي تعملي ايه، ايه اللى هيجيبك من المنوفيه للاسكندريه، بصي انتي روحي اعملي محضر في اقرب قسم عندك، وانا كمان هنزل واعمل محضر في اقرب قسم عندي، كده الشرطه هتدور عليه وهيوصلوله.
-حاضر يا ماما مع اني مش بتفاقل بموضوع الشرطه دي، بس ربنا يسترها ويجيب العواقب سليمه يا رب.
وقفلت الاتصال مع ريهام، ودخلت غيرت هدومي ونزلت الشارع، مع ان الجو كان وحش اوي، انتم ماتعرفوش الجو عندنا في الاسكندريه في الشتا عامل ازاي، بيبقى صعب اوي، خصوصا مع وحده ست كبيره في السن زيي، بس اعمل ايه انا قلقانه على محمد ابني حبيبي، ربنا يحفظهولي ويجيبه بالسلامه يا رب.
ونزلت وروحت القسم، واول لما دخلت شوفت قدامي واحد من العساكر، فقولتله:
-انا عاوزه اقابل حضره الضابط يا ابني.
-خير يا امي، عاوزه حضره الضابط ليه؟
-عاوزه اقدم بلاغ ابني متغيب ومش عارفين نوصله.
-طيب تعالي يا حاجه هوديكي عند الامين وهو اللى هيبلغ الضابط.
وفعلا روحت معاه لـ واحد من امناء الشرطه، وقاله:
-الحاجه دي جايه علشان تقابل حضره الضابط يا فندم، عاوزه تقدم بلاغ عن اختفاء ابنها.
وقتها رد الامين وقالي:
-مش محتاجه تقابلي حضره الضابط يا حاجه، انا هكتبلك محضر التغيب.
وقتها انا رديت عليه وقولتله:
-معلش يا ابني، خليني اقابله الله يباركلك.
اتنهد وقتها وقالي:
-هدخل اقوله، ولو وافق هدخلك.
وفعلا راح الامين وبلغ الضابط، وبعد دقيقه لقيته جاي وقالي:
-ادخلي يا حاجه، الضابط مستنيكي جوه.
-شكرا ربنا يكرمك.
ودخلت مكتب الضابط اللى اول لما شافني قالي:
-اتفضلي استريحي يا حاجه.
وقعدت ولما قعدت قالي:
-خير يا حاجه، انتي جايه تقدمي بلاغ عن ايه؟
-ابني يا فندم، ابني الباش مهندس محمد كان المفروض يجيلي النهارده من محافظه المنوفيه، ووصل لمحطه القطار من اكتر من ساعه، ولغايه دلوقتي ماجاش، مع ان المشوار مايخدش اكتر من نصف ساعه.
-يعني كل الحكايه انه اتأخر نصف ساعه زياده مش اكتر يا حاجه؟
-ايوه يا فندم، بس انا قلقانه عليه اوي.
-طيب انتي اتصلتي على تليفونه؟
-اتصلت ولقيته مقفول او غير متاح.
-طيب انتي شايفه الجو وحش اوي، احتمال يكون عيب شبكه، وكمان يمكن راح مكان تاني او مثلا حود على أي محل يشتريلك شويه حاجات، هو متغيب بقاله قد ايه؟
-تقريبا كده ست شهور، اصل مسافر لدوله عربيه، ورجع الاول على مراته وعياله في المنوفيه، وقعد هناك كام يوم وكان المفروض يجيلي النهارده علشان يطمأن عليا.
-يبقى احتمال كبير بيجيب حاجه وعلشان كده مش عاوزك تقلقي، وبعدين على حسب كلامك هو راجل كبير ومتجوز ومخلف كمان، وشغال مهندس يعني مافيش داعي انك تقلق عليه ابدا.
-بس انا ابني مستحيل يتأخر من غير ما يتكلم معايا، انا حاسه انه حصلتله حاجه.
-للاسف انا ماقدرش اعملك حاجه دلوقتي، ابنك كبير وطبقا للقانون لازم يمر على تغيبه 24 ساعه على الاقل، وهو اتأخر بس نصف ساعه او حتى ساعه على حسب اقوالك، فلازم نستني لغايه لما تمر الفتره القانونيه.
-علشان خطري يا ابني، انا مش هقدر اصبر كل الوقت ده، انا هموت على ابني.
وقتها الضابط حط ايده على وشه وهو بيفكر في كلامي، وبعدها قالي:
-دا قانون يا حاجه وماينفعش نتخطاه، بس مراعاه لصحتك ولسنك، انا هعملك استثناء، انا هخلي الامين يعملك محضر تغيب دلوقتي، بس احنا مش هنقدر نبداء في عمليه التحقيق والبحث الا بعد مرور 24 ساعه، ولما يمر الوقت هنتصل عليكي علشان ماتتعبيش نفسك وتيجي تاني، وهسألك بنفسي لو ابنك ظهر، لو قولتي ايوه يبقى خير وبركه ويجي نقفل المحضر، لو لا قدر الله ماظهرش وقتها هنتحرك في شغلنا بسرعه، تمام يا حاجه.
-تمام يا فندم ربنا يبارك في عمرك.
وقتها هو طلب امين الشرطه، ولما الامين جه قاله:
-خد الحاجه وخد كل بيانات ابنها، وصوره ليه لو معاها، واكتب المحضر وبمجرد مرور ال 24 ساعه، لازم تفكرني اتصل علي تليفون الحاجه علشان نكمل شغلنا.
-تمام يا باشا.
وبصلي الامين وقالي:
-اتفضلي معايا يا حاجه.
وقومت من مكاني وخرجت مع امين الشرطه، وروحت للمكتب بتاعه ولما قعدت قالي:
-قوليلي بقى يا حاجه اسم ابنك الثلاثي وكمان وظيفته، ولو معاكي صوره ليها طلعيها كل لما يبقى معاكي بينات عنه يبقى افضل بكتير.
-حاضر يا ابني، وعرفته الاسم ووريته الصوره اللى كانت على تليفوني، وخد الصوره وقالي:
-ايه اللى حصل قبل ما ابنك يختفي يا حاجه؟
-انا ابني شغال مهندس في شركه في دوله عربيه، هو متعود بينزل اجازه مرتين في السنه كل ست شهور بينزل اجازه، الاول وزي العاده بيروح لشقته اللى عايش فيها مراته واطفاله واللى موجوده في المنوفيه، بيقعد معاهم تقريبا كده من 3 ايام لغايه اسبوع، وبعدها بيجي على الاسكندريه بيقعد معايا يومين او 3 ايام، بيسلم عليا ونقعد مع بعض شويه، واوقات بينزل يقابل اصحابه من ايام الدراسه، اصل ابني الباش مهندس محمد كان عايش معانا في الاسكندريه، بس بعد ما اتخرج من كليه الهندسه اشتغل في شركه في القاهره، دا قبل ما يتجوز بنت خالته ريهام ويعيش معاها في المنوفيه شويه وفي القاهره شويه بسبب طبيعه شغله.
رد عليا الامين وقالي:
-تمام يا حاجه، انا مش عاوزك تقلقي، ان شاء الله خير، انتي تقدري تروحي دلوقتي على بيتك، ولما تروحي ولو لقيتي ابنك في البيت، اتصلي على رقمي وعرفيني علشان اقفل المحضر ده.
-يا رب يا ابني.
وبعد ما خدت منه رقم تليفونه، خرجت القسم وروحت على بيتي، على امل اني لما اروح الاقي ابني وصل البيت، وطول الطريق وانا عماله ادعي واقول يا رب جيب العواقب سليمه.
لما وصلت البيت وفتحت الباب فضلت انادي على محمد ابني، بس للاسف مالقتهوش في الشقه، وقتها انا قعدت وفضلت اعيط، وماكنتش فاهمه اعمل ايه، بس بعد لحظات لقيت تليفوني بيتصل، واللى كانت بتتصل عليا هي ريهام بنت اختي ومرات محمد ابني، رديت عليها بسرعه وقولتلها:
-ايوه يا ريهام، قوليلي عرفتي حاجه عن محمد.
-انا بتصل عليكي يا ماما علشان اسألك لو عرفتي او وصلتي لـ حاجه بخصوص محمد، انا نزلت وروحت لـ قسم الشرطه علشان اعمل محضر تغيب لـ محمد، بس مارديوش يعملولي محضر، وقالولي ان جوزك كبير ولازم يمر على غيابه 24 ساعه على الاقل.
-انا كمان يا ريهام نفس الحكايه، بس ربنا كرمني بضابط شرطه وافق يعملي محضر بس مش هيتحركوا فيه الا بعد مرور ال 24 ساعه، انا مش عارفه محمد راح فين، انا مرعوبه عليه.
وقتها ماقدرتش امسك نفسي وعيطت، وكمان ريهام عملت نفس الحكايه وعيطت هي كمان، ما انتم ماتعرفوش ريهام دي تبقى ايه بالنسبه لـ محمد، دي حبيبه عمره دوول متجوزين عن قصه حب فضلت حوالي اكتر من سبع سنين، دا كان بيحبها من ساعه لما كان عندها 15 سنه، ولما لقيت ريهام مفحومه من العياط قولتلها:
-خلاص يا ريهام امسكي نفسك شويه، وماتخليش الاطفال يحسوا بحاجه انتي فاهمه، ماتقلقهمش وان شاء الله خير، ابني هيرجع بالسلامه يمكن قابل حد من اصحابه مثلا وراح معاه مشوار وتليفونه فصل شحن مثلا، كل حاجه وارده واحنا هنتعشم خير في ربنا باذن الله، عاوزك تتماسكي علشان الاطفال يا ريهام.
-حاضر يا ماما، بس بالله عليكي لو سمعتي أي خبر عنه او كلمك او حصل أي جديد طمنيني، وانا هبقى على اتصال معاكي.
-ان شاء الله خير، وهكلمك واطمنك باذن الله.
