رواية خلف الأضواء الفصل الواحد والعشرون بقلم نور الهادي
روز بابتسامة: مش هتبركيلي؟ أنا حامل من جاسر جوزك.
كانت ديما مصدومة وهي بتبص لروز بصدمة.
روز بابتسامة: حامل من جواك... أنا شايلة ابنه. مش هتقوليلي مبروك؟
ديما: إنتِ بتقولي إيه؟ إنتِ مجنونة، مش كده؟
روز: الصدمة كبيرة، أنا عارفة.
ديما: اللي معاكي ده تروحي وترميه في أقرب زبالة، لأن الحركات دي مش هتمشي عليا.
روز: ثقتك فيه عالية أوي فعلًا، واثقة للدرجة دي إنه ميعملهاش؟
ديما: أنا مش واثقة، أنا عارفة ومتأكدة كمان. واخرجي بره بدل ما الحراس هما اللي ييجوا يرموكي بره.
روز: أنا جاية أنور بصيرتك، بلاش تستغبّي ومتفتحيش عينك صح.
ديما بثبات غاضب قوي: إنتِ سمعتي قولتلك إيه؟ اطلعي برااا! أي كلمة هتقوليها مش هصدقها. إنتِ واحدة رخيصة رمت نفسها عليه. جاسر لو كان راحلك، هو كان بسببّي، فأي كلمة هتقوليها مش هصدقها، لأنه بيحبني. فاخرجي من هنا أحسنلك.
روز: بيحبك؟ وقرب مني وخلاني حامل بابنه؟ مش كبيرة دي يا ديما؟ أهو اللي قالك إنك السبب، ولا إنتِ اللي ظنيتي كده؟ بس هو رجعلي بإرادته، وعلى فكرة قضينا وقت حلو أوي مع بعض، والنتيجة ابننا اللي جاي في الطريق.
بصت ديما لبطنها وقالت:
ديما: إنتِ كدابة.
روز بابتسامة ساخرة: أنا كنت عارفة إنك مش هتصدقي، فجبتلك دليل.
بصتلها ديما بشك، وفضلت تبص للتحليل اللي في إيد روز.
روز بتخرج تليفونها وبتديهولها: اتفرجي واحكمي بنفسك.
ديما بتاخد تليفونها، بس عينها وقفت على الصور اللي قدامها، واتجمدت مكانها، وإيدها ابتدت ترتجف من اللي بتشوفه. كانت صور لروز وجاسر في الجناح هنا في الفيلا، الجناح بتاعها هي وهو.
فضلت تبص للصور وهي بتقلب فيها بصدمة، وعينيها بتدمع بعدم تصديق. كانت لقطات قريبة وحميمية للغاية.
قربت روز منها بابتسامة وقالت:
روز: في فيديو هيعجبك أوي.
قلب ديما كان بيتعصر، وإيدها وقفت وهي بترتجف على فيديو. ولما فتحته، الدنيا اسودّت قدام عينيها من كتر دموعها اللي ابتدت تنزل، وهي شايفة المشاهد الحميمية للغاية، وبتسمع صوت جاسر وروز، وصوته بيصب في قلبها زي السكاكين.
إيدها وأعصابها كانوا تالفين، وهي مش مصدقة.
ديما: مستحيل!
روز: مستحيل إيه بالظبط؟ إنه يخونك؟
رفعت ديما عينيها بغضب وقالت:
ديما: كدب! كدببب!
روز: ليه يا ديما؟ الدليل في إيدك.
ديما: ميعملهاش!
روز: لو مش مصدقة الصور والفيديوهات، روحي اسألي أسامة، أصله كان موجود ليلتها وأنا خارجة من عنده... اسأليه وهتعرفي الحقيقة.
ديما بصدمة: أسامة؟ مكنتش مصدقة إن حتى أسامة شاف خيانته وسكت!
روز: آه، هو حارسه الشخصي. هتلاقيه يعرف عنه أكتر مني ومنك... صدقتي إنه بيحبك بجد؟ فوقي لنفسك، إنتِ مخدوعة فيه.
ديما: اسكتي!
روز: ممكن مكنش يعمل كده، بس ده لو كان بيحبك أصلًا زي ما إنتِ متخيلة... وآه، أنا مش بتكلم من غير دليل. هسمعك حاجة هتعرفك قد إيه إنتِ اتخدعتي واتغدر بيكي.
نتشت روز التليفون من إيد ديما، وفتحت مسجل الصوت.
صوت جاسر: «ديما مش منكم ولا زيكم، دي مجرد عدوة فمترأفوش بيها... دخلتها وهستخدمها في الوقت الصح والمناسب ضد أحمد السيوفي».
قلب ديما اتصدم، واتكسر ميت حتة، لأنه كان صوت جاسر فعلًا.
سمعت صوت راشد:
راشد: «إنت اللي بتعمله ده بجد؟ إنت هتتجوزها إزاي؟ بتحبها؟ قالي إنك اعترفت إنك بتحبها».
جاسر: «مستحيل أحب بنت أحمد، ولا تحت أي سبب. اللي قولته كان كدب وخطة همشي عليها... وجودها معايا شيء كويس، هتساعدني. منها تكون معانا، ومنها لو اتأذت، فأحمد يكون بيأذي نفسه... أما عن جوازي منها، فهو جحيم أكبر ليها. أنا مستحيل أميل بقلبي ليها، لأنها مش دي اللي أختارها، هي عدوة لا أكتر ولا أقل... عدوة زيها زي أحمد. أنا عارف نفسي وعارف أنا بعمل إيه كويس، متقلقش، مستحيل أرقّ ليها».
أعصاب ديما باظت من اللي بتسمعه في التسجيل، من صوت جاسر، ومن كل كلمة قالها. كل كلمة كانت بترجعها لليوم ده، وهما على اليخت، وهو رافع سلاحه عليها وعينيه مليانة شر:
«حياتك متفرقش معايا، لو متكلمتيش هتموتي هنا».
كانت مرعوبة وقتها، وهي بينهم زي الغريبة وسط وحوش، ومحدش قادر يحميها منه، وهو مستغل ضعفها.
روز: عمره ما حبك يا ديما، إنتِ بس اللي اتخدعتي فيه.
ديما افتكرت جاسر في أول مرة قالها فيها: «تتجوزيني؟ أنا بحبك».
افتكرت حضنه ليها، وإنها في اليوم ده مكنتش مصدقة. كانت لسه من دقائق بتكاد تموت، زي ما كان هيقتلها، لكنها ماتت فرحًا من اللي قاله أكتر. افتكرت سعادتها وهي بتحضنه وبتقوله:
«بجد يا جاسر؟ إنت... إنت بتقول إيه..بتحبنى انا؟»
كانت غير مصدقة من فرحتها وقتها، ودلوقتي، وفي اللحظة دي، بتعرف إن لحظة اعترافه ليها وعرض جوازه منها كانت مجرد خطة منه للانتقام، مجرد خدعة.
معقول استغفلها وهي زي المغفلة صدقته؟
روز: الموضوع صعب، ولو لسه عندك كرامة، امشي وسيبيه قبل ما هو يسيبك.
نظرت ديما إليها، فقالت روز:
روز: مبقاش في سبب تعاندي عشانه. أنا جبتلك كل حاجة، الدور جه عليكي.
ديما: اطلعي برا.
بصتلها روز من نبرتها، وقالت:
روز: ماشي يا ديما، بعتلك كل حاجة تليفونك... الصور والفيديو والتسجيل كمان. محتاجة تقعدي مع نفسك وتعرفي مين فينا اللي مضحوك عليه، أنا ولا إنتِ.
مشيت روز وتركت ديما، اللي كانت مصدومة، وقعدت على الكنبة غصب عنها من رجليها اللي خانوها. إيدها كانت بتترعش من اللي سمعته، وقلبها بيتفتفت ميت حتة.
............................
كان جاسر واقف مع الظابط.
الظابط: متقلقش يا أستاذ جاسر، هنلاقيها.
جاسر: أتمنى تلاقوها بسرعة. معاك رقمي، ابقى بلغني لو في أي حاجة.
الظابط: حاضر. هي تقرب لحضرتك إيه البنت دي؟
جاسر: أخت مراتي.
الظابط: حضرتك متجوز؟! مبروك، بس مفاجأة كبيرة، لأني متابعك وهي مظهرتش لينا قبل كده.
جاسر: مبحبش أظهرها لحد.
الظابط بابتسامة: هي نفسها اللي ذكرت وجودها في لقاء، وقلت إنك حبيت؟ عمومًا مبروك، وهنلاقي أخت زوجتك قريب.
أومأ له جاسر بابتسامة هادئة ومشي. وهو خارج من القسم، رن تليفونه. كانت ديما.
ديما: إنت فين؟
جاسر: لسه خارج من القسم، في حاجة؟
ديما: تعالى، محتاجة أشوفك.
ابتسم جاسر بهدوء وقال:
جاسر: جاي.
قفل المكالمة وهو بيمشي، لكنه وقف لما شاف محل ورد كبير. دخل جاسر، وكان في بنت واقفة، حطت إيدها على بقها بصدمة من شوفته.
جاسر: كنت عايز باقة ورد.
الراجل: اتفضل يا...
ابتسم لما شافه وقال بدهشة:
الراجل: مستحيل! جاسر الهاشمي! اتفضل، أنا بنتي بتحبك أوي، ممكن توقّع هنا؟
بيديله قلم، خده جاسر ووقّعله على الحيطة. ابتسم الراجل وقال:
الراجل: الكل هييجي هنا يشتري ورد.
جاسر: عايزها تكون حلوة.
الراجل: هعملك أحسن باقة ورد حالًا، بس... لونها إيه؟
سكت جاسر وهو بيفكر، وافتكر فستانها لما كانوا مسافرين، كان لونه أبيض وكان لايق عليها. الأبيض يليق بيها في أي شيء.
جاسر: أبيض.
أومأ له الراجل بابتسامة.
.......
وصل جاسر بعربيته ونزل قدام الفيلا، ودخل وهو ماسك باقة الورد عشان يسعدها، وكأنه بقى بيفكر في أي حاجة ممكن تسعدها.
شاف ضوء من الصالة، فراح هناك.
جاسر: ديما؟
دخل وشافها، ابتسم بهدوء وقال:
جاسر: إيه اللي مصحيكي لحد الفجر؟
ديما: كنت فين؟
استغرب جاسر من سؤالها ونبرتها، ومن عينيها اللي مش بتبصله.
جاسر: كنت في القسم، ما إنتِ عارفة.
قرب منها وهو بيمد إيده بالباقة، بس ديما رجعت لورا. بصلها جاسر باستغراب شديد.
ديما: كنت فين؟
جاسر: مالك يا ديما؟ ما أنا قولتلك كنت فين... لو اتأخرت، فده عشان كنت بجيبلك ورد.
بصت ديما للباقة اللي في إيده، وابتسمت ابتسامة باهتة وقالت:
ديما: كتر خيرك.
جاسر: ديما، مالك؟
كأنه حس بالغصة اللي بتتكلم بيها.
جاسر: في حاجة يا ديما؟
ديما: عايزة أعرف الحقيقة.
استغرب جاسر جدًا وقال:
جاسر: حقيقة إيه؟!
ديما: حقيقة الكدب والخداع والخيانة... حقيقتك يا جاسر... حقيقة الشخص اللي قدامي. حقيقة الكدب والغدر في كل مرة بتتكلم فيها، بيبقى وراها ألف كدبة وألف غدر ليااااا!
صرخت في آخر جملة، وجاسر نظر لها بشدة من تحولها المفاجئ.
جاسر: إنتِ بتقولي إيه؟!!!
ديما: بقول إيه؟ أمممم...
خرجت تليفونها، ووقعت عين جاسر على الصور اللي شافها. أخد التليفون منها بهدوء، وبدأ يشوف صور ليه مع روز في أوضاع حميمية للغاية. ولما قلب في الصور، ظهر الفيديو، فوقفت عينه عليه بصدمة.
ديما: أنا أقولك إنت كنت فين... مكنتش في القسم. إنت كنت بتكدب زي ما كدبت عليا إمبارح وقولت إن عندك شغل، وكنت عندها.
بص جاسر لديما، فقالت:
ديما: كنت معاها وفي حضنها، وبتقرب منها وبتعيشوا لحظاتكم المقرفة مع بعض، وأنا هنا قاعدة مستنياك!
جاسر: إنتِ بتقولي إيه يا ديما؟
ديما بصراخ: الحقييييقة! بقول الحقييييقة!
مسكت التليفون وقالت:
ديما: إنت ولا مش إنت؟!
جاسر: مين بعتلك ده؟
ديما بسخرية: مين بعتلي؟! ده كل اللي يهمك مين بعتلي؟ ميهمكش حجم اللي إنت عملته فيااااا؟!
بصتله في عينه وقالت:
ديما: خنتني يا جاسر!
جاسر: ديما، الفيديو ده مش حقيقي.
ديما: كدداااب! إنت كداااب يا جاسر... لأنها جتلي وقالتلي إنها حااامل مننننك!
بصلها جاسر بصدمة وقال:
جاسر: إنتِ بتقولي إيه؟
ديما: اللي سمعته! متقولش إنك مكنتش عارف.
جاسر: جبتي الكلام ده منين يا ديما؟
ديما: مننننها! مننن حبيبتك... جتلي لحد هنا وورتني التحليل، وهي بتعرفني إنها حامل منك... حامل من جوزي، شايلة ابببببنك!
دمعت عيون ديما وهي بتقبض على إيدها، بتحاول تاخد أنفاسها من وجع قلبها. كان جاسر مصدوم، قرب منها وقال:
جاسر: مستحيل... ديما بتكدب عليكي. أنا ملمستهاش، الفيديو ده كدب زي ما بقولك، أنا ملمستهاش ومش حامل مني، لأن محصلش بينا حاجة أصلًا.
دمعت عيون ديما، وجاسر قرب منها يحاول يلمسها، فقال:
جاسر: ديما، أنا مخونتكيش والله. لو كنت دخلتها حياتي كان بسببك، بس مخونتكيش.
ديما: في الجناح اللي دخلتني فيه، في البيت اللي قولت عنه إنه بيتي... عملت هنا فيه! الصور دي فيه! عايزة أسمع الحقيقة، إنت عملت كده؟
سكت جاسر من عيونها اللي كانت بتبصله، وقال:
جاسر: كنت شارب، كنت مجروح منك لأني حبيتك، مكنتش عارف أنا بعمل إيه، بس مغلطتش للدرجة دي. معملتش حاجة معاها، مقربتش من واحدة غيرك من ساعة ما دخلتي حياتي.
ديما: قصدك منمتش معاها؟
بصلها جاسر من جرأة جملتها اللي قالتها، فقالت ديما:
ديما: دي الخيانة في عينك؟ أما إنك تقرب منها في الأوضة وعلى سريرنا، دي مش خيااانة؟ النوم عندكم بس اللي خيانة؟ إنك تعمل معاها علاقة دي بس اللي خيانة؟ لكن إنك تكون مع واحدة غيري دي مش خيانة يا جاسر؟
سكت جاسر قدام كلماتها، ودمعت عينيها وقالت:
ديما: إزاي عملت فيا كده؟
جاسر: ديما...
ديما: مفكرتش فيا؟ مفيش مرة واحدة فيها فكرت فيا؟
جاسر: ديما، اهدي، خلينا نتكلم.
ديما: أنا كنت بالنسبالك إيه أصلًا يا جاسر؟
بصلها من اللي قالته، فقالت ديما:
ديما: إيه اللي بمثله في حياتك؟ متبررش اللي عملته، في الأول والآخر أنا مكنتش إلا مجرد أداة بتستخدمها زي ما إنت...
بصلها جاسر بشدة من اللي قالته عن نفسها. قربت ديما منه وبصت في عينه وقالت:
ديما: استخدمتني كويس يا جاسر.
جاسر بصدمة: بتقولي إيه؟
ديما: فاجأتك؟ أصل روز مكنتش هنا بس عشان تقولي عن خيانتك... طلع الموضوع أكبر من خيانة، طلع غدر وقتل وموت بالبطيء... عرفتني قد إيه أنا... أنا كنت نكرة.
دمعت عينيها، وقرب جاسر منها وقال:
جاسر: بتقولي إيه يا ديما؟ قالتلك والله ما حصل، هي محاملش مني، كدابة، كدابة! عارف إني غلطت، بس متصدقيش كلامها، كله كدب.
ديما: بس ده كلامك إنت يا جاسر... كلامك بلسانك وإنت بتقوله، وإنت عارفني... عارف قد إيه الغبية اللي قدامك تكذب الكل، لكن تصدقك إنت... بس اللي سمعته كان منك إنتتت!
زقته بعيد عنها جامد، وهي بتفتح تليفونها وترميه، وفجأة اشتغل مسجل الصوت، وجاسر سمع الكلام اللي قاله:
«هستخدمها ضد أحمد، دخولها مجرد فرصة هشتغلها صح...»
كان جاسر بيسمع كلامه وهو مصدوم. حس إن سره اتكشف، وإنه بقى عريان قدامها، وإن كل حاجة خاف إنها تظهر بسبب ماضيه وبسبب حبه ليها، دلوقتي اتفضحت، وكل شيء ظهر قدام عيون ديما اللي كانت بتبصله بعيون مليانة وجع وصدمة.
قالت ديما وعيونها مليانة دموع:
ديما: ده إنت مش كده... في المسجل ده صوتك، ومفيش حاجة واحدة كدب زي الصور والفيديو...
كان ساكت وصامت، بعيون حمراء مدمعة، وهو بيبصلها بحزن.
ديما ببكا: إنت... إنت...
حطت إيدها على قلبها وهي بتتعذب قدام عيونه، وقالت:
ديما: إزاي عملت فيا كده؟
جاسر: ديما، اسمعيني.
ديما: في إيه تاااني هسمعه منك؟! هتعرفني إيه تاني؟ وهتكسرني إزاي إنت؟! إنت كسرت كل حاجة، مبقاش فيا حاجة واحدة تتكسر!
سالت دموعها على خدها وقالت:
ديما: إزاي قدرت تلعب بيا كده؟ ليه الغدر كان ييجي منك إنت؟
مسكت راسها وهي بتبكي، وقالت:
ديما: وأنا كنت زي الهبلة، زي الغبية، وإنت بتقولي بحبك، وإنت بتعترفلي وبتطلب الجواز مني، وأنا مش مصدقة! زي غبية، حلم متخيلتوش بيتحقق... ولا على بالها إن دي مجرد تمثيلية سخيفة من نجمها وفنانها المفضل!
بكت وهي بتفتكر نفسها، وقالت:
ديما: لما رفعت سلاحك كان حقيقة، لما حاولت تقتلني كان حقيقة، كرهك كان حقيقة... بس حبك والجملة اللي قولتها عمرها ما كانت حقيقة!
قربت منه وقالت:
ديما: قد إيه كنت غبية! قربت منك وقلت إن مستحيل أرفض مهما كان الموضوع غريب، فأنا كان إعجابي بيك واضح. كنت متأكد إني هترمي عليك من كتر فرحتي إنك تقولي كلمة بحبك... وأنا زي الغبية عملت كده فعلًا! كنت زي الغبية قدامك وقدامهم كلهم، بيضحكوا عليا وبيتغدر بيا، وأنا زي المغفلة!
جاسر: ديما...
ديما: ديما ماتت يا جاسر!
رفعت عينيها المكسورة وبصتله وقالت:
ديما: إنت دبحتها... كانت أول ليلة بينا مبنية على الكدب والانتقام. مكنتش معايا بقلبك، كان كل الكره في عينيك... كره وانتقام وغل، وإنت مش فارق معاك إذا كنت بتوجع ولا لأ. إنت كنت بتنتقم زي ما بتنتقم من أحمد، عدوك... مكنتش ليلة اتنين بيحبوا بعض، كانت انتقام وغل وكرههه!
قربت منه وقالت:
ديما: استمتعت يا جاسر؟
بصلها جاسر من اللي بتقوله، فقالت ديما:
ديما: متعتك ولا لأ؟ الإحساس مكنش عاجبك؟ وإنت بتاخد مني براءتي، وإنت بتلمسني وواثق إنك أول راجل في حياتي، وإنت بتكسرني بين إيديك... مزعلتش عليا؟ محسيتش إن مليش ذنب باللي بينكم؟ ليلتها كانت نزوة زي بقية نزواتك؟ كنت زي أي واحدة قضيت معاها وقت حلو... معاملتنيش حتى كمراتك، إنت اعتبرتني أداة مستني ترميها!
جاسر: أنا حبيتك.
ديما: إيااااااك!
رفعت صباعها في وشه وقالت وهي بتصرخ:
ديما: إياك تقول الكلمة دي، لأن عمري ما هصدقها... عمري ما هصدق الكلمة دي تاني بسببك! كسرتني في أول يوم بتتمنى البنت فيه تبقى أسعد إنسانة في حياتها. سبتني في مكان لوحدي، معرفش فيه حد ولا ليا حد. وديتني هناك كأنك بترميني في جزيرة وبتعاقبني على ذنب مليش علاقة بيه. في اليوم ده أنا بكل غباء استنيتك برا، ونمت برا وأنا مستنية رجوعك... كل ده وأنا زي الغبية زعلانة وبعاتبك وبحاول أثبت إن أمي مش عدوّتك، رمتني في الخطر هناك وأنا معترضتش، لأني كنت بحسب إنك...
قبضت على إيدها وقالت:
ديما: كنت بحسبك بتحبني! كنت بحسب العائق اللي كان بينا هو أحمد وخوفك مني... طلع إن أنا اللي كان لازم أخاف منك، لأن من البداية مكنش في حب ولا حتى مشاعر، كان في تلاعب وغدر، كان في استغلال! كل ده وأنا بحبك وبثبتلك حبي زي المغفلة، ومعرفش إن كل ده وأنا في كددددبة!
جاسر: لا يا ديما، حبي ليكي مكنش كدبة. أنا حبيتك، غلطت في الأول، غلطت وعملت ذنب في حقك كبير، بس أما حبيتك بعدها والله حبيتك.
بكت ديما، وقرب جاسر منها وقال:
جاسر: أنا آسف، عارف إن ذنبي كبير، عارف إن غلطتي كبيرة، بس والله مكنتش أقصد أوجعك إنتِ.
ديما: بس أنا اللي اتأذيت.
جاسر: أنا آسف... سامحيني.
ديما: آسف؟!!! دلوقتي إنت آسف عشان أنا عرفت؟ أما لو مكنتش عرفت، كان زمانك مكمل وبتدوس عليا في أتفه غلطة، زي حسن. مصدقتش وخونتني... إنت عمرك ما حبيتني، إنت اتغصبت عليا، ولولا أحمد مكنتش دخلتني حياتكككك! أنا كنت أداااة، أداة لعبت بيييها!
بكت بانهيار وقالت:
ديما: إزاي تعمل فيا كده؟ أنا حبيتك، أنا اديتك كل حاجة، اعتبرتك عيلتي، اعتبرتك الكيان اللي لو وقعت هتسند عليه... مكنتش عايزة حد غيرك! ليه تعمل فياااا كده؟
بصلها جاسر بحزن، فقالت ديما:
ديما: إزاي كنت غبية كده؟ إزااااي؟ إزااااي تعملوا فيا كده؟ ذنبي إيه بينكم؟ كان ذنبي إييييه؟
جاسر: ديما، اهدي.
ديما: ابعععد عني! متلمسنيش، إياك تلمسني!
جاسر: ديما...
ديما: أنا عمري في حياتي ما هنسى اللي عملته فيا. كل حاجة وضحت، أنا دلوقتي شيفاك على حقيقتك... طلقني يا جاسر.
بصلها جاسر بصمت وحزن، مصدوم من اللي بتقوله.
ديما: طلقني!
جاسر: أنا بحبك.
قرب منها وقال:
جاسر: ادينا فرصة نتكلم، عشان خاطري. أنا بحبك، غلطت، بس دلوقتي ربنا يعلم بالحب اللي جوايا ليكي.
ديما: اللي اتبنى على باطل فهو باطل. إنت عمرك ما حبيتني، إنت شخص نرجسي، مغرور ومؤذي... عملت كل حاجة وحشة، إنت!
سالت دموعها وهي بتبصله وقالت:
ديما: إنت دمرتني، وخدت روحي وحياتي معاك. مسيبتش حاجة وحشة إلا وعملتها معايا... إنت عمرك ما كنت هتتخيل الحب اللي كان في قلبي ليك، عمرك ما هتتخيل أنا كنت شيفاك إزاي... زي حللللم!
قبضت على إيدها وهي بتتألم، وقالت:
ديما: كسرتني وأنا بحييييك... شكرًا لأنك قدرت تخليني أكرهك.
جاسر بخوف: لا يا ديما!
ديما: طلقني دلوقتي وحالًا!
جاسر كان ساكت، بيبصلها بصمت وحزن مطبق، لكنه قال:
جاسر: مش هطلقك يا ديما.
بصتله ديما بشدة، فقال جاسر:
جاسر: مش هقدر أطلقك.
ديما: هتطلقني يا جااااسر! طلقني بقولك!
جاسر: ديما...
ديما: في إيييه تاااني؟ لسه مزهقتش؟ ممتعتكش لسه؟ عايز إيه مني؟
جاسر: كفاية يا ديما.
ديما: كفاية... هو كفاية فعلًا!
نتشت سكينة وحطتها على رقبتها. اتسعت عيون جاسر وصاح:
جاسر: ديماااا!
ديما: إياك تقررررب!
بصلها جاسر بخوف وصدمة وقال برجفة:
جاسر: ديما، نزّلي السكينة.
ديما: طلقني... لو مطلقتنيش هموت نفسي!
بصلها بخوف وقال بحزن:
جاسر: ديما...
ديما: أنا مبقتش قادرة أستحمل، كفاااية! مش هتبقى إنت والدنيا عليا. طلقني بقى وريّحني!
جاسر: مقدرش يا ديما.
ديما: لا، تقدر! زي ما قدرت وقتلتني، تقددددررر!
جاسر: أنا آسف يا ديما، أنا آسف... أنا فيا كل العبر، بس نزّلي اللي في إيدك ده!
....
كان أسامة داخل، فوقف مكانه بصدمة لما شاف ديما رافعة سكينة على نفسها، وجاسر عينيه مرعوبة.
مي بصدمة: إيه اللي بيحصل؟!
جرى أسامة فورًا ناحية الجناح.
....
ديما: طلقني، وإلا هقتل نفسي يا جاسر!
ضغطت على رقبتها أكتر بجنون.
جاسر بخوف: ديما، لااا!
قرب منها بخوف، فقالت ديما:
ديما: ارجع ورا! إياك تقربلي! طلقني يا جاسر، بقولك!
بصلها جاسر بخوف ورعب، وفجأة جه حد من وراها ومسك ديما، وكان أسامة اللي دخل من الازاز. جرى جاسر عليها وسحب السكينة من إيدها فورًا ورماها على الأرض.
صرخت ديما وهي بتزقه وبتصرخ:
ديما: سيبني! ابعععد عنننني!
ضغط عليها جاسر وهو بيحضنها وبيثبتها جواه، وهي بتنتفض وبتحاول تبعده عنها.
ديما: سيبببني! اببببعد عنننني!
كان ماسك فيها كأنها روحه، وقال:
جاسر: أنا آسف...
بكت وانهارت في البكاء، وهو بيدخلها جوه أضلعه، وقال:
جاسر: متسبنيش، أنا بحبك.
ديما: طلقني.
جاسر: ديما...
ديما: طلقني يا جاسر!
سمع نبرتها الحزينة المكسورة، والدموع في عينيها، فقالت:
ديما: طلقني.
جاسر: أنا آسف يا ديما، مش هطلقك.
ديما: يبقى هيكون بينا المحاكم.
بعدت عنه، وشعر جاسر إن قلبه بيتنزع منه.
جاسر: رايحة فين؟
ديما: المكان ده مش مكاني.
جاسر: خليكي... أنا اللي همشي يا ديما.
ديما: قلقان عشاني عشان مليش مكان أروحه؟ متقلقش، أرض الله واسعة، بس أكيد مش هيكون هنا.
مشيت تحت أعين أسامة ومي، اللي مكنتش حتى بتبصلهم، وكأنهم اتحولوا من أصدقاء لأعداء في نظرها. خرجت وهي حالفة إنها مترجعش للمكان ده مجددًا، المكان اللي خرجت منه مذلولة ومكسورة ومتلاعب بيها.
كان جاسر صامت، قاعد في مكانه من ساعة رحيلها. الورد اللي جابهولها واقع على الأرض، ودموعها لسه على صدره، مجففتش بعد. كان قلبه بيشتعل نارًا وحزنًا، وكأن عالمه انهار في لحظة.
أسامة: عرفت إزاي؟
جاسر: المهم إنها عرفت يا أسامة.
سكت أسامة من نبرة جاسر، اللي قام بعدها بغضب ومشي.
مي بقلق: جاسر رايح فين؟
مسك أسامة إيدها وقال:
أسامة: سيبيه.
..........................
كانت روز راجعة الفندق، وهي بتقلب في الصور بابتسامة، والفيديو كمان، وقالت:
روز: كأنه حقيقي... مفيش غير صورتين بس اللي حقيقيين، ومكنوش كفاية إني أرميها في ملعبها.
فلاش باك
كان جاسر قاعد في جناحه، وفي إيده كاس، وهو بيفتكر ديما اللي كانت قدام عيونه من ساعة ما جتله، وهو بيفرغ غضبه فيها.
اتفتح الباب، ودخلت روز.
روز: جاسر...
جاسر مردش عليها. كانت لابسة لبس جريء يشبه قمصان النوم، وقربت منه وهي بتقعد على السرير جنبه، وقالت:
روز: إنت منمتش برضه؟
جاسر ببرود: بتعملي إيه هنا؟
روز: جيت أشوفك، أصلك وحشتني.
بصلها جاسر، فقربت إيدها وحطتها على كتفه، وسألته:
روز: هي البنت دي حبيبتك اللي كلمتني عنها؟
جاسر بحدة: متتكلميش عنها قدامي.
روز: أكيد، لو ده اللي إنت عايزه مش هذكرها. كده كده صفحة واتقفلت، مش كده؟
لمست صدره، وجاسر بص لإيدها، فقالت روز:
روز: تعرف إني بقيت عايزة العلاقة تتطور وترجع زي الأول؟
قلعت الروب اللي عليها وقربت منه، وقالت:
روز: أنا بحبك يا جاسر.
قرب جاسر منها، وبدأت هي تقلعه قميصه وتلمسه بإغراء، وبتحاول تضعفه أكتر وأكتر.
لكن قبل التمادي، جاسر بعد عنها وزقها بعيد عنه.
وقفت روز بصدمة، وبصتله باستغراب:
روز: في إيه؟
جاسر بحدة: اخرجي!
قربت منه بابتسامة وقالت:
روز: في إيه؟ كان كل حاجة مظبوطة!
صرخ فيها جاسر:
جاسر: سمعتي أنا قولتلك إيييه؟!
سكتت روز من طريقته، وخدت الروب بتاعها وخرجت من عنده.
فضل جاسر قاعد مكانه، مضايق ومخنوق، وكل اللي شايفه قدام عيونه هو وش ديما، اللي ظهر قدامه رغم محاولاته إنه ينساها.
باك
قبضت روز على إيدها وهي بتفتكر الليلة دي، اللي حاولت فيها معاه رغم سُكره، لكنه مقربلهاش. حاولت تستغل بُعدهم، لكن مخدتش اللي هي عايزاه.
قالت لنفسها:
روز: قريب أوي هتبقى ملكي يا جاسر.
خرجت من الأسانسير وهي بتروح أوضتها، وطلعت الكارت وفتحت الباب. وقبل ما تقفله، لقت حد بيزقها جامد، فاتخبطت وبصت بصدمة.
روز: جاسر؟!
جاسر: اتأخرت عليكي؟
خافت من شكله وقالت:
روز: إيه اللي جابك تاني؟ هو في حاجة؟
جاسر: عملتي الفيديو إزاي؟
سكتت وبصتله، وهي بتقف قدامه، وقالت:
روز: شكل حصلت مشكلة كبيرة بينكم... الفيديو أهم حاجة، عجبك؟ إيه رأيك نخليه حقيقة؟
لمسته بحب، فنزل جاسر بقلم على وشها بقوة. اتسعت عيون روز بصدمة.
جاسر: كنت عارف إن حركة زبالة زي دي تطلع منك... خليتيها تشوف شيء قذر ومقرف زي ده عشان توجعيها مني!
روز: إنت اللي وجعتها، مش أنا... أنا وريتها الفيديو والصور بس.
قبض جاسر على إيده وقرب منها، وسحبها من شعرها، فصرخت وقالت:
روز: أوعى! سيبني! آآه! بتعمل إيه يا مجنون؟!
جاسر: قولتلك بلاش أنا... حذرتك ومسمعتيش! بس لما الموضوع يتعلق بيكي، مش هيهمني إنتِ بنت ولا لأ.
زقها جامد، فوقعت على الكنبة، واتخضت وبصتله بصدمة وخوف.
روز: هتعمل إيه يا جاسر؟ جايلي في إيه؟
جاسر: مين بعتك؟
روز: أنا جاية مصر عشانك، جيتلك عشان إنت، وبعمل ده عشانك.
جاسر: إنتِ عارفة سؤال؟ مين كان ورا ظهوري في الفندق؟ اتكلمي! محدش يعرف إني سافرت لفرنسا، ولو عرف، فمش صدفة إنك تجيبي الفندق ورقم الجناح.
سكتت روز بتوتر.
جاسر: نقطة غبية تعرفيني سبب عدم ميلي ليكي.
غضبت روز، فقال جاسر:
جاسر: مييييين؟
روز: مدير أعمالك.
سكت جاسر من اللي سمعه، وقبض عليها أكتر بغضب.
جاسر: راشد؟!
روز: إنت بتغلط يا جاسر! سيبني!
جاسر: قالك إيه؟
روز: هو اللي اتواصل معايا عشان أرجعلك، وقال لي إنه هيساعدني. أمال هيكون السجل اللي بصوتك جبته إزاي؟
جاسر: منه؟!
روز بابتسامة ساخرة: بتمثل عليّا إنك مهتم بيها وبجرحها؟ مفيش حد هنا غيري أنا عارفة، وكنت واثقة إنك بتتسلى بوقتك وإنك مش بتحبها!
نزل جاسر بقلم قوي، فشهقت روز بصدمة، واتعورت شفتها.
جاسر: ديما هي حياتي، سامعاني؟ لو قربتي منها هقتلك!
رماها من إيده بقرف ومشي، وروز ماسكة وشها اللي بيوجعها، وشفتها اللي بتنزل دم، وصرخت بغضب:
روز: ديماااااا!
..................
كان أحمد في بيته مع ميرفت.
أحمد: أمال مراد فين؟
ميرفت: جتله مكالمة مهمة وخرج.
أحمد: مكالمة إيه؟!
ميرفت: معرفش، قالي شغل وممكن يتأخر.
سكت أحمد، لحد ما الخدامة خبطت على الباب.
الخدامة: أحمد بيه.
ميرفت: في إيه؟
الخدامة: الست منى بتسأل عنك.
أحمد باستغراب: منى؟!!
سمع صوت منى وهي بتدخل بغضب وانفعال.
منى: هو فين؟! ابعدوا من وشي، محدش يقدر يمنعني!
بصلها أحمد وميرفت بشدة من شكلها.
أحمد: منى، في إيه؟
منى: إنت السبب!
شاف دموعها وهي غاضبة، فقالت بانهيار:
منى: إنت السبببب! حبستني عندك لحد ما ضاعت مني!
أحمد: مين دي؟
منى بصراخ: بننننتي! رييييم!
انقضت عليه، ومسك أحمد إيديها، واتخضت ميرفت من تصرفها.
منى: أعمل فيك إيه؟! إنت قادر... قادر! ميقدرش عليك غير اللي خلقك! منك لله، منك لله!
ميرفت: في إيه يا منى؟
أحمد: اخرجي يا ميرفت.
بصت ميرفت لأحمد، وبعدين طلبت من الخدامة تخرج، وخرجت باستغراب.
أحمد: اهدي، إيه اللي حصل؟
منى: ريم تاهت مني... ريم ضايعة ومحدش لاقيها! خلتني عندك زي المخطوفة، وكل ده وهي مرجعتش البيت بسببك! معرفتش ألحقها وألاقيها، ودلوقتي ضاعت مني! إنت السبببب!
كانت بتصرخ بغضب، وقالت بانفعال:
منى: طول عمرك السبب في أي مصيبة بتحصلي! أي حاجة سودا بتصيبني بتبقى إنت وراها!
أحمد: اجمدي يا منى.
منى: كفاااية بقى! أنا مبقتش خايفة منك! خدت مني كل حاجة! البنت ضاعت، ضاااعت بسببك، ومعرفتش ألحقها بسببك! ضايعة ومش لاقياها، لأنك حبستني هنا!
قربت منه وهي بتبصله بحنق وغضب، وكملت:
منى: إنت الأذية الوحيدة اللي في حياتي من زمان! لما اتجوزت واحدة ملهاش حد، ولما لقيت غيرها تعليك واسمها يرفعك، رمتني وروحتلها... من زمان ومصلحتك فوق الكل!
بصتله بغضب وقالت:
منى: دلوقتي عامل نفسك الضحية لمجرد إني كدبت وخبيت ديما عنك؟! إنت عمرك ما كنت ضحية، إنت ما يليقش عليك غير دور الظالم!
سكتت لحظة، ودموعها بتنزل، وبعدين كملت بصوت مخنوق:
منى: إنت بريء من حياة بنتك وإنك متخلتش عنها، بس مش بريء من ذنبي واللي عملته فيااا... في كل مصيبة وكل حاجة بتحصل بيبقى وراها سبب واحد اسمه أحمد! حتى جاسر كنت إنت سببه الوحيد في فقد عيلته ويُتم طفل!
بصتله بغضب وقالت:
منى: عشان كده مقتلتلوش ولا أذيته، لأنك مشفق عليه وشايف إن الذنب ذنبك إنت! طول عمرك مذنببب في حياتنا كلنا!
كان أحمد صامت، لا يغضب ولا يقاطعها، وكأنه شايفها بتقول الحقيقة اللي مقدرتش تقولها وهي خارجة من هنا، عشان خافت يأذيها، لكن دلوقتي بتقول كل حاجة بكل غضب وقهر.
منى: دمرتني، وزعلان عشان خبيت بنتك عنك؟! لو مكنتش هددتني، مكنتش خدتها زي ما إنت هددتني وفضلت هنا، ومن وراك ضاعت ريم! طول عمرك مبتعملش حاجة غير إنك تهدددد، زي ما كنت هتحرمني من بنتي، ترميها في حضن غيري، وزعلان إني خدتها وهربت؟ زعلان إني دوقتك من الكاس اللي كنت عايز تدوقهولي؟!
أخدت نفسًا متقطعًا، وكملت بغضب:
منى: رضيتها عليا ومضايق إن نفسك دلوقتي مش عايزاك! ديما مش شبهك ولا هتكون، لأن قلبك من حججججر! وأنا مبقتش خايفة منك، لأني عانيت! أنا طول عمري بعاني، وإنت عايش حياتك مع عيلتك اللي أسستها، وأنا بعاني منك... عايش حياتك ورميت ماضيك، ولما رجعت تفتحه وقعتني تاني معاك، وحطيتني في مصيبة أكبر وأذيتني! إنت بس شغلتك تأذي اللي حواليك، شغلتك تأذيني أنا وببببس!
كان ساكت وهي بتفرغ كل الكلام اللي جواها، وبتبكي بانهيار، وكأنها أخيرًا لقت الفرصة اللي مستنياها من زمان عشان تبكي. اتأذت وسكتت، اتخلى عنها وسكتت، عرفت بجوازه من غيرها وسكتت... حتى إنها شافت جوزها بيبيع نفسه مع زوجة أرملة بابنها، وهيحرمها من بنتها.
لكن في اللحظة دي مسكتتش، زي ريم، هي اللي خلتها برضه متسكتش. لما قلب الأنثى يتعلق بالأمومة، مش بيصمت، بل بيصرخ بقوة لا مثيل لها.
أحمد: اهدي.
منى: لو في حد بكرهه، وجوايا كره وحقد ليه، فهو إنت يا أحمد السيوفي.
أحمد: عارف.
قرب منها ووقف قدامها مباشرة، وربّت عليها بهدوء، وهي بتبكي، وقال:
أحمد: اهدي وفهميني في إيه عشان أساعدك... وهنلاقيها.
......................
وصل جاسر للبيت ودخل زي الإعصار.
الحارس: جاسر باشا!
جاسر: هو فين؟
الحارس: جاسر باشا، لو سمحت...
جه الحارس يقف في وشه، لكن جاسر ضربه برجله ورماه على الأرض بحركة سريعة، ودخل من غير ما حد يقدر يمنعه، لحد ما اقتحم أوضة راشد.
راشد: جاسر؟!
جاسر: إنت عايز مني إيه؟
راشد: اهدى يا جاسر، أنا كنت هكلمك.
جاسر: في إيه يتقال؟! مصر تخليني قاتل؟! عايزني أقتلك وأخلص عليك؟!
دخل الحراس، لكن جاسر انقض على راشد ومسكه من هدومه، وقال بغضب:
جاسر: قولتلك بلاش! هيييي بلاش دييييما!
راشد: أنا مليش دعوة باللي حصل!
جاسر: النهارده أنا سمعت ومتأكد إنك السبب! روز مظهرتش إلا بيك، لما ساعدتها توصلي... عايز تخرب حياتي للدرجة دي؟! مش قادر تشوفني مرتاح؟! الراحة كتير علياااا؟!
قبض عليه جاسر أكتر، وقال:
جاسر: بتسجلني يا راشد؟! كل ده وإنت بتحصّن نفسك وبتسجل وعامل حسابك؟!
راشد: جاسر، اسمعني.
جاسر: لييييه؟! ليه أسمعك؟
راشد: لأني مش أنا اللي اديتها التسجيل، هي خدعتني.
بصله جاسر، فقال راشد:
راشد: أنا اللي سجلته، بس ماليش علاقة إنه يقع في إيد روز. هي وصلت لتليفوني اللي نسيته امبارح في المكتب، ولسه جايبه دلوقتي. لو مش مصدقني، اسأل الأمن اللي هناك.
جاسر: ليه؟
راشد: مكنتش عايزها معاك، كنت شايفها دايمًا مش مناسبة ليك.
جاسر: بأي حق تقررر؟!
راشد: لو كنت شايفني مذنب، فأحمد كمان مذنب. أحمد كان منهم.
جاسر: بس مقتلهمش! ما دلتهمش على بيته عشان يقتلوه وياخدوا موافقة بيعه!
راشد: غدروا بيه وبيا، ووصولي هناك كان لما عرفت باللي ناويين له.
جاسر: بس ملحقتهمش... إنت لحقت البقايا بتاعتهم، وهو أنااا؟
راشد: قتلتهم يا جاسر! قتلتهممم!
جاسر: قتلتهم عشان متقتلهمش إنت؟! بس اقتل أحمد عادي؟! إنت قتلتهم عشان ميكشفوش حقيقتك الوسخة! لو كنت بريء من دمهم، كنت اعترفت عليهم، مكنتش سكت على الجريمة! إنت كتمت لأنك مشترك فيها، خوفت على نفسك لأنك منننهم! إنت قاتل زيك زيهم، بس بتفرق عنهم لأنك قاتل أخوووك!
سكت راشد من كلمات جاسر المكروهة.
راشد: قولتلك إنها مش بقيالك، هي اختارت نفسها وبعدت، عشان كده إنت مضايق!
نزل جاسر بقبضة على وشه، فوقع راشد ومسك فمه. لأول مرة جاسر يدخل معاه في شجار ويضربه، لأول مرة يمد إيده عليه، وهو اللي اعتبره أبوه طول عمره.
مشي جاسر وسابه مرمي على الأرض، بينما كان أسامة واقف عند الباب مصدوم.
أسامة: أخوه؟! أبو جاسر أخوه... يعني عمه؟!
....................
كانت ديما قاعدة عند عتبة باب بيت مقفول. كانت الدنيا برد، والسما هتمطر، وهي قاعدة ساكتة، لا تشعر بأي حاجة.
وقفت عربية، ونزل منها مراد. قرب منها، وأول ما شافها قال:
مراد: أنا آسف إني اتأخرت، تعالي.
طلع مفتاح وفتح البيت، وكأنه صاحبه.
قعدت ديما على الكنبة، ومراد حط قدامها مية. خدتها ديما وشربت بصمت.
مراد: أنا مبجيش هنا إلا قليل أوي، تقدري تقعدي هنا براحتك.
ديما: أتمنى محدش يعرف إني كلمتك أو قاعدة هنا في بيتك.
سكت مراد من طلبها، اللي عارف إنها تقصد بيه أحمد السيوفي.
مراد: أمورك تمام؟ ليه مش عايزة تيجي عندنا البيت؟ هو بيتك، وبابا كان هيفرح أوي لو روحتي له.
ديما: لو عندك مشكلة من وجودي، أنا...
مراد مقاطعًا: أنا طبعًا مقصدتش كده، لا يمكن ده يكون قصدي. أنا بتكلم من باب الفضول، لأن حتى لو مشيتي من عند جاسر ومروحتيش الشاليه، لأنك مش عايزة تكوني موجودة في أي مكان يخصه... أيًا كان اللي حصل بينكم... فأنا كنت أقصد إن ليكي مكان وبيت عند بابا، وهنا بيتك برضه.
سكتت ديما ومردتش، فقال مراد:
مراد: ليه اتصلتي بيا وإنتِ عارفة إني ممكن أقوله، وإنتِ مش عايزاه يعرف أي حاجة عنك؟
ديما: حسيتك مختلف عنهم.
سكت مراد عند جملتها، فقالت ديما:
ديما: أتمنى متخلفش بوعدك.
مراد: بابا هيقلق عليكي. لو سأل، ممكن أطمنه إني أعرف مكانك، عشان أبقى صريح معاكي.
ديما: مش هتضطر، لأنه مش هيقلق.
مراد: ده اللي إنتِ معتقداه، بس لو مكنش قلقان عليكي، كان قتل جاسر وإبراهيم عشانك... كان بيدور عليكي عشان تكوني معاه، ولما رفضتي كانت خيبة كبيرة بالنسباله.
ديما: ممكن، لأنه كان ضامن إني هوافق.
بصلها مراد للحظة، واتأمل عيونها الصامتة الذابلة، وهو متأكد وعارف هي بتمر بإيه. بصتله ديما من نظراته اللي عليها، فقال:
مراد: أنا همشي، لو عوزتي حاجة كلميني. أنا هقعد بره شوية في الجنينة... اختاري الأوضة اللي تعجبك، واعتبريني ضيف.
بصتله ديما من كلامه، اللي كان بيحاول يطمنها ويهزر معاها.
ديما: شكرًا.
مراد: معملتش حاجة.
مشي، وعينه عليها من شكرها وامتنانها ليه. خرج وهو لسه بيفكر فيها.
....................
كانت ديما قاعدة، وفجأة رن تليفونها. لقت رقم غريب، فردت.
ريم: ديما!
أول ما سمعت ديما صوتها، قلبها اتقبض.
ديما: ريم... ريييم! إنتِ فين؟ إنتِ كويسة؟
سمعت صوت راجل بيقول:
الراجل: أختك معايا يا ديما.
ديما حست إنها سمعت الصوت ده قبل كده.
ديما: راشد؟!
ديما: إياك تقربلها! أنا جاية!
قفلت معاه فورًا وقامت تمشي بسرعة.
ريم بصت لراشد بابتسامة وقالت:
ريم: كده ديما هتلاقيني هي وماما، ولا لسه بيدوروا عليا؟
راشد: هتيجي، متقلقيش. أنا عارفها.
جت الخدامة وحطتلها عصير، وريم شربته بابتسامة.
....................
كان مراد خارج وهو بيطلع مفتاح عربيته، فلاقى ديما خارجة.
مراد: في إيه؟
ديما: ريم... لقيت ريم!
مراد: أختك؟! طب استني، أخدك عندها.
لكنها لم تستمع له قط
....................
كان أحمد خارج مع سامح من بيته.
أحمد: دوروا عليها؟
سامح: بعتنا رجالتنا، بس بخصوص المحضر، لقيت إن جاسر الهاشمي رفعه فعليًا.
أحمد: جاسر؟!
أومأ له سامح، فتنهد أحمد وقال:
أحمد: تمام، دوروا معاه. خلينا نعرف البنت فين.
أومأ له سامح بطاعة، وفي اللحظة دي جه حارس وقال:
الحارس: أحمد باشا، جاسر الهاشمي هنا.
اتعجب أحمد بشدة، وبص لسامح اللي مكنش عارف سبب وجوده. خرج، ووقف وعينه على جاسر وهو داخل.
أحمد: في حاجة يا جاسر؟
جاسر: ديما هنا؟
أحمد باستغراب: ديما؟! مش هنا.
سكت جاسر، وكأنه بيسأل نفسه: إذا كانت مش هنا، فأين ذهبت؟
أحمد: هي مش عندك؟
جاسر: لا.
أحمد وهو بيبصله بشدة: ومتعرّفش هي فين؟!
جاسر: لو كنت أعرف، مكنتش جيت سألتك... مش بترد على تليفونها.
كان هيكضي بس أحمد: ده ليه؟! إيه اللي حصل خلاها تسيب البيت ومش بترد عليك؟
جاسر: سوء فهم في موضوع قديم.
بصله أحمد، لأنه كان بيتكلم معاه عن روز وعن المشكلة اللي ممكن تحصل لو ديما عرفت زشافت الى وريتهوله
................
وصلت ديما لبيت راشد ودخلت فورًا.
ديما: رييييم!
قابلها راشد وقال:
راشد: داخلة بتجري ليه؟
ديما: فين ريم؟ خطفتها فييين؟!
راشد: قلقانة عليها؟
ديما: عملت فيها إيه؟! إياك تكون أذيتها!
راشد: اهدي، دي ممكن تشم ريحة خوفك. هي جوه.
دخلت ديما فورًا وهي بتجري، ولقت أختها قاعدة بترسم. جريت عليها، فقالت:
ديما: ريم!
ابتسمت ريم وحضنتها.
ريم: اتأخرتي أوي!
ديما: أنا آسفة، آسفة أوي.
بعدت ديما عنها وقالت:
ديما: بتعملي إيه هنا؟
ريم: قاعدة مع عمو ده، قالي إنه يعرفك، وشوفت صورة جاسر عنده.
بصتلها ديما، وارتاحت إنها متأذتش، خصوصًا إنها كانت بتضحك.
ريم: في حاجة يا ديما؟ إنتِ كنتِ بتعيطي؟
دخل راشد وقال:
راشد: متقلقيش، مأذيتهاش.
بصتله ديما وقالت:
ديما: خدتها ليه؟
راشد: أفضل إني أسيبها في الشارع ومتلاقيهاش خالص؟
ديما: ملكش مصلحة بوجودها، ومتعملش نفسك بريء! خليتها معاك ليه وإنت عارف إننا بندور عليها، وفي محضر بغيابها؟
راشد: كنت هضغط عليكي بيها عشان تبعدي عن جاسر.
بصتله ديما، فقال راشد:
راشد: بس هو كان هنا من شوية، واعتقد إن روز خلصت الموضوع.
قالت ديما بحنق وحزن:
ديما: أعتقد إن اللي إنت عايزه خدته، وأنا ريم هاخدها.
راشد: خديها، تقدري تخرجي من غير رجوع.
ديما: اطمن، مش راجعة.
قالت ريم بحزن:
ريم: ديما، مالك؟
وكأنها شافت دموع أختها المخفية. مسكت ديما إيدها وبدأت تمشي، لكنها وقفت عند راشد وبصتله وقالت:
ديما: ليه أنا مسببة لك خوف كده لمجرد وجودي معاه؟
راشد: المشكلة مش فيكي، في أبوكي... إنتِ وجاسر مينفعش تكونوا لبعض.
ديما: أحمد عاملك خوف كبير أوي.
راشد: لو مكنش أبوكي ظهر لكمال، مكنش كمال دلوقتي مش موجود، واتعرضوا له.
ديما: مترميش أخطاءك على غيرك. لو مكنش أحمد موجود، كنت إنت اللي قمت بدوره، زي ما قمت بيه ودلّتهم على مكانهم.
بصلها راشد، فقالت ديما:
ديما: جاسر قالي... وآه، بطمنك إن مش هيجمعني بجاسر أي شيء تاني.
خدت إيد ريم ومشيت، تحت نظراته.
..............
كانت عيون ديما بتدمع وهي ماشية.
ريم: ديما، بتعيطي ليه؟
لكن ديما مردتش عليها. كانت تعبانة، فاستندت على الحيطة.
ريم بقلق: ديما؟
حضنتها ديما وقالت:
ديما: خوفتيني عليكي.
ريم: أنا آسفة، بس عمو مكنش شرير.
سكتت ديما وهي بتحاول تمشي، فقالت ريم:
ريم: إنتِ كويسة؟
وفجأة وقعت ديما مغمى عليها. اتخضت ريم، وفي اللحظة دي وقفت عربية، ونزل منها مراد فورًا بصدمة لما شاف ديما مرمية على الأرض وريم بتحاول تفوقها.
ريم: ديما! ديما، افتحي عينك!
لكن ديما مكنتش بترد.
قرب مراد منها فورًا وقال:
مراد: في إيه؟ مالها؟
ريم: معرفش!
شالها وحطها في العربية، وقال لريم:
مراد: تعالي، هنوديها المستشفى.
ريم بقلق: هتبقى كويسة؟!
....................
في المستشفى، كانت ديما بتبص للأوضة وللدكتورة اللي واقفة قدامها.
الدكتورة: بقيتي أحسن؟
اتعدلت ديما وقالت:
ديما: ريم فين؟
الدكتورة: قصدك البنت والأستاذ اللي أسعفك؟ متقلقيش، هما بره.
قامت ديما، لكن الدكتورة قالت:
الدكتورة: مهملة في نفسك ليه كده؟ متعرفيش إن ده غلط على صحتك؟
ديما: أنا كويسة، مجرد دوخة.
الدكتورة: اهتمي بنفسك أكتر، لو مش عشانك، عشان ابنك.
رفعت ديما عينيها للدكتورة بشدة وقالت بصدمة:
ديما: ابني؟!
الدكتورة: متعرفيش إنك حامل؟
توقفت عيون ديما بصدمة.
شكرا لزيارتكم عالم روايات سكيرهوم
