رواية قط وفار والقلب احتار الفصل الثاني والعشرون 22 بقلم شيماء يسري زهران

 


رواية قط وفار والقلب احتار الفصل الثاني والعشرون بقلم شيماء يسري زهران


بص مراد ورا لقاني بحاول اقف مش قادرة وبقع تحت الماية، جري عليا وشالني وقال:

- في ايه!! 

- رجلي..شد عضل تقريبًا، مش قادرة اقف.

حضنته من رقبته وبصيت ورايا عليها وابتسمتلها في انتصار وانا بنام على كتفه براسي..

- رجلي مش قادرة يارب.

خرج بيا ع الشط وهو شايلني وقرب يحطني ع الكرسي، اتكلمت هالة:

- هو حصل ايه؟

قولت وانا بتو.جع:

- رجلي جالها شد عضل في نص البحر.

ساعدني مراد وقال:

- حاسة انك احسن؟

- شوية، بس تعبانة، انا همشي يا ماما، مش طالبة معايا بحر تاني.

- ليه يابت! ما البحر حلو اقعدي معانا واحنا شوية وهنمشي.

- لأ مش عايزة..عايزة انام.

قال مراد في تردد:

- طب هوصلك أنا..

بصيتله ومرديتش، اتحرج مراد من نظرات الكل، قال:

- شيماء تعالي معانا..وبالمرة ممكن تقعدي معاها.

- لأ أنا عايزة اعوم!

قالت حنان:

- يابت روحي معاهم يوصلها وابقي ارجعي معاه.

قامت شيماء معانا وسندني مراد طول الطريق..

| في الشقة|

وقفت شيماء تحت البيت تستنى مراد.. دخلت اوضتي قعدت، لقيته قعد ع طرف السرير جمبي:

- على فكرة شيماء تحت ومينفعش تقعد هنا لوحدك.

- مانا طول عمري بكون معاكي في الأوضة بتاعتك.

- لأ دلوقتي مفيش حد خالص في الشقة..انزل.

- انا مش بفكر في أي شيء غبي بتفكري فيه.. أنا بس.. أنا عايز..عايز اصالحك.

- وانا مش عايزة اصالحك! لأن مفيش بينا حاجة خلاص عشان نحاول نحلها.

اضايق جا.مد من كلامي وقال في نبرة رجاء:

- متبقيش ر.خمة، يعني ايه مفيش بينا حاجة! 

- يعني مفيش بينا حاجة، اوعى بقى اخرج برا!

قرب ايده بيحاول يمسك ايدي، قومت وقفت ع السرير متعصبة:

- قولتلك اخرج برا!
استغرب وهو بيبص ع رجلي وقال:

- هو أنتِ متأكدة رجلك وجعاكي؟

اتوترت وعملت نفسي وقعت ع السرير ومسكت رجلي:

- اه و.جعاني، ايه هكدب ليه يعني!

ضحك وقرب مني يكتف ايدي الاتنين فوق بعضهم، بحاول ازقه برجلي:

- عشان كنتي غيرانة مثلًا؟

- اوعى هعض ايدك دي واخليها تجـيب د*$*م.

- بس فرك برجلك اسكتي! أنتِ كنتي غيرانة صح؟

بصيتله ومرديتش..لكن فجأة مشاعري غلبت عليا وهو باصصلي..افتكرت كل لحظة عيشناها سوا، عيني دمعت وقولت:

- انا بكرهك.

- ليه يا قلبي تكرهيني هو أنا ليا غيرك يحبني طيب؟

هو بيتنحنح ليه؟ عايز يضحك عليا صح؟ وانا هبلة وبصدق..

- عشان انت فضلت هاجر عليا، روحت تنقذها وسلمتني لحسام.

داس على ايدي وهو مضا.يق:

- أنتِ بتتكلمي بجد؟؟ يعني انتِ مصدقة اني ممكن اسلمك لحسام؟ 

سكت شوية..رديت بعدها وانا بحرك راسي في نفي وقولت:

- بس انت أنقذت هاجر!

- طب قوليلي كنت المفروض اعمل ايه؟ ما سليم كان معايا يابنتي ولازم كنت أنقذها ماهي هاجر دي قريبتنا واهلها كانوا مرعوبين.

- تقوم سايبني!

- يابنتي وربنا ما اعرف اني في غدر هيحصل واجي الاقيكي مش في العربية..انا كنت هتجـ.نن عليكي يا مرام، لو كان حصلك حاجة كنت هفضل طول عمري مش قادر اعيش.

عيطت غصب عني، حرك كف ايده على دما.غي وقال:

- انا اسف طيب..

- انا زعلانة اني ضيعت حقي ومجيبتش سيرتها في التحقيقات.

- عشان أنتِ جميلة وطيبة..هي تستاهل كنتي تجيبي سيرتها بس أنتِ مقدرتيش عشان أنتِ انضف من كده.

- منظر امها تاني يوم لما الظابط ده اتصل وهي بتعيط وتترجاني وتقولي مجيبش سيرة بنتها..خلاني مقدرتش بجد..انا ضعـ.يفة وساذجة عشان هي بكل بساطة اذ.يتني وانا قولت ازاي هحـ.بس بنت عمي!

- بس اللي مستغربه ازاي ابوها عدى الحوار عادي، مدلعينها ع الأخر عشان كده طلعت دي تربيتها.

- أيوة.. انت متخيل اللي سمعناه في التحقيقات من ملك؟ بتقول كانت بتنقلها اخباري انا وانت وهي اللي خلت ملك رجعت تغل مني تاني وقر.رت تنتقم، ولما عرفت ان هاجر ناحيتها مشاعر تجاهك قدرت تستغل ده وعرضت عليها حوار الخطف..هي هاجر مش كده تعتبر مشا.ركة في الجر.يمة؟

- اه طبعًا..بس أنتِ بقى اللي اتنازلتي قدام الظابط بحكم اننا قرا.يب وكده، انا مكنتش راضي عن ده واتخضيت من ردة فعلك.

سكت الكلام فجأة بينا، زقيت ايدي من ايده أبعده..وانا بصاله بقر.ف:

- وملك كانت وحشاك؟ اصل كنت بتبصلها اوي كده.

ابتسم من غير ما يرد..قرب مني وعايز يهزر:

- أنتِ بتغيري عليا يا عسل؟ بتغيري على أبيه مراد؟ 

- سـ.خيف، ابيه مراد الأ.هبل.

- أبيه مراد اللي بيحبك ..

سكت ثواني بصاله من غير ريأكشن وهو فرحان، زقيته وقولت:

- وانا مش بحبك، شيلتها كويس وانت بتنقذها؟

قالي في استفزاز:

- اه، لفت أيدها حوالين رقبتي.

- عقبال الحبل.

ضحك بصوت عالي وقال:

- والله أنتِ بت ز.بالة، دي كلمة تتقال؟

- ودي حركة تتعمل! ياريتني كنت لبستها الجر.يمة دي معاهم وكانت لبست حبـ. س زيهم.

- مانتي لسه عملاها ع البحر وأنتِ عاملة نفسك رجلك وجعا.كي..

- انا مرام! انت بتقارني بيها!!

قرب مني ومسك ايدي تاني يتعافى عليها:

- أيوة صح أنتِ مرام ..مرام حبيبتي.

- اوعى ايدي هخـ.بطك بالطبق ده.

لقينا فجأة شيماء ع باب الاوضة:

- ما يلا انا زهقت!

اتعدل مراد في خضة وقام وقف وقال:

- مرام تعبانة شوية ولازم حد فينا يقعد معاها.

قولت في توتر:

- واكيد شيماء اللي هتقعد، صح يا شيماء؟

اضايقت وهي بتشوح بايدها:

- لأ بقى انا جاية المصيف اعوم مش اقعد..سلام أنا رايحة البحر تاني.

ندهت عليها وانا خايفة وبقوم من ع السرير اخرج برا الأوضة:

- استني يا شيماء مش هينفع.

نزلت شيماء وقفلت الباب، بصيت ورايا لقيته واقف بيضحك عليا..

- انت بتضحك على ايه!

- خا.يفة مني؟ من امتى ده؟

- معرفش بقى، انا زمان مكنتش كده..بس انتوا الرجالة ملكومش امان.

قرب مني وهو بيحاول ميضحكش وقال:

- أيوة صح، الشيطان شاطر وأنتِ حلوة..

فتح الباب وقالي:

- تعالي ننزل نقعد في اي حتة.

| على الشط|

واقفين هالة وهاجر بعيد عن الشمسية شوية، متعصبين على بعض.

- هاجر طلعيني برا الحوارات دي، تمام؟؟

- يعني ايه!!! أنتِ مش قولتيلي هتساعديني وتكلمي سليم كل شوية!

- يا هاجر مانا كلمته كتير وقعد يقولي مراد مش متقبل كلام خالص، وبعدين أنتِ ازاي طايقاه من ساعة ما ضر* بك بالقلم!

- ياستي انا اشتكيتلك؟ انا على قلبي زي العسل هو كان متعصب بس.

- لأ هو كان متعصب عشان مرام .. المفروض ده يخليكي تكرهيه.

- هالة هتساعديني ولا لأ؟؟ هاتيها على بلاطة!

- يابنتي اساعدك في ايه؟؟ هما مش متخا.نقين اصلا وبطلوا يكلموا بعض؟

- بجد والله؟ مانتي شوفتي بعينك أنه راح يروحها من شوية وشالها كمان وهي كانت قاصدة تكيدني.

- طيب يا هاجر انا خارج كل العبث ده، انا كده سليم هيروح مني.

- بجد؟؟؟ طب مترجعيش تزعلي.

- أنتِ بتهدد.يني يا هاجر!! دي اخرتها؟؟ انا ياستي مش عايزة ادخل نفسي في مشا.كل والمفروض انتِ كمان تتلمي، لولا امك اترجتها كنتي هتروحي في الرجلين اخر مرة!

جات شيماء قدامهم لوحدها، وقفتها هاجر:

- جيتي لوحدك ليه؟

- مراد قالي مرام رجليها وجعاها، بس انا مش عايزة اقعد في الشقة معاها، قعد هو.

سابتهم شيماء وجريت ع البحر تعوم. 

| تحت الشمسية|

اتكلمت حنان بصوت واطي وهي بتاكل الترمس 

- ألا قوليلي يا بت يا فوزية..

- أيوة يا حنان؟

- مش حاسة حاجة غريبة كده الفترة دي؟

- حاجة غريبة يعني ايه؟

- بين ابني وبنتك.

اتوترت ماما وقالت:

- يعني ايه تقصدي ايه يا ولية؟

- يعني..حاسة بسهوكة غريبة كده.

- وايه الجديد ما طول عمرهم صحاب!

- لأ.. سهوكة من نوع تاني كده، هو أنتِ مش قايلة لبنتك تقرب من الواد زيادة ولا حاجة؟

- يوه!! ايه الكلام ده يا حنان! ما تخليكي سالكة في كلامك يا حنان! انا يعني هسلط البت تقرب من ابنك؟ تاني اسطوانة اني طمعا.نة في الواد؟ ابنك ده ابني.

- خلاص وطي صوتك ياختي ايه لما صدقتي..انا قصدي..يعني..اكيد لاحظتي.

- بصراحة؟

ردت حنان وهي بتاكل الترمس:

- اه عايزة الصراحة..

- انا حسيت .. بس معرفش بكدب احساسي، اصل معقولة؟ ده اخوها.

كانت نوال رامية ودنها وعاملة نفسها مش سامعة، هي مضا.يقة اه بس شالت أيدها من الحوارات دي كلها من اخر مرة بنتها كانت هتتـ.حبس، رغم موضوع خطـ.ف هاجر مكنش ليها دخل بردو، بس اهي حرّمت وفقدت الامل في الحوار ده.

ردت حنان:

- ما ده اللي شاغلني، ازاي ممكن ده يحصل والاتنين متربيين سوا!

- يمكن تهيوءات يا ولية؟ هاتي هاتي ترمس.

| وقفني قدام مطعم|

- تعالي ندخل.

- انا مش جعانة.

- لأ جعانة تعالي..

خدني غصب ودخلنا جوا قعدنا ع ترابيزة:

- هي عافية؟

- اه عافية، خلاص بقى يابت انتِ متزعليش قولتلك.

ابتسمت وقولت:

- انت تعرف إن انت حيو.ان يا مراد؟ ولا دي معلومة جديدة؟

- لأ عارف أيوة، بدليل اني بحب كلبة بديلين، مفيش انسان هيعمل كده.

ضحكت وانا بزق عليه الترابيزة وقولت:

- اتنيل شوف هنطلب ايه.

- تطفـ.حي جمبري؟

- ماشي.

| كانت الساعة بقت حوالي المغرب|

قاموا من ع الشط راجعين البيت، سأل جدو عني وحكت ماما اللي حصل، وكملوا مشي.

وصلوا البيت لكن ملقوناش، بصت عمتو حنان لماما وكأنهم اتاكدوا من اللي شاكين فيه.

حر. يـ.قة  هاجر زادت من جواها، اتكلمت نوال:

- اومال العيال فين!

ردت هالة في قلة صبر بصوت واطي:

- يا ماما يمكن خرجوا عادي، ملناش دعوة بقى.

ردت بصوت عالي:

- جرا ايه يابت أنا قولت حاجة؟؟

اتحرجت هالة ودخلت الأوضة.

رد جدو وهو بيقلع العوامة:

- حبايب قلب جدو أخيرًا اتصالحوا سيبوهم يتفسحوا.

قال بابا:

- يتفسحوا ايه يابا مش بعيد يكون حد خنـ.ق التاني في نص الطريق هما دول طايقين بعض!

| في كافيتريا|

- مش يلا نرجع؟ اكيد هما رجعوا...

قال وهو بيشرب الشاي:

- عادي ياستي مش دي اجازة وجايين نخرج؟

- أيوة بس خايفة.

- خايفة من ايه؟

- مش عارفة..هو ممكن حد يشُك فينا؟

نزل كوباية الشاي ورد:

- مرام..انا مش عيل في اعدادي واخدك يومين..مرام أنا عايز افضل معاكي على طول بس مش عارف.

- مش عارف يعني ايه؟؟

- لأ مش قصدي كده، انا قصدي اني..يعني انا مش قادر اشوف حد غيري معاكي ولا انتي قادرة تشوفي حد معايا..احنا ملناش غير الجواز.

اتخضيت من كلمته بس في نفس الوقت حسيت اني فرحانة اوي..مش قادرة اصدق اصلا.

- جواز!! 

استغرب من ردة فعلي:

- ايه؟؟ كنتي بتتسلي بيا ولا ايه يابت انتِ!

ضحكت وقولت:

- ازاي أهلنا هيوافقوا؟

- ما ده اللي بتكلم فيه، ازاي حتى اقدر افتح معاهم الموضوع..صعبة، هنا شايفينا اخوات حرفيًا.

سكت مردتش عليه..كمل هو:

- انا مش هنكر مشاعرهم، انا كمان طول عمري بشوفك اختي بالمعنى الحرفي..هو ايه اللي حصل!

- اللي حصل إن بنت فضلت طول عمرها تحكي مشاكلها لولد والولد يحكي مشاكله لنفس البنت، ويهونوا على بعض الحياة وعايشين سوا..طبيعي كل ده يتحول لمشاعر .

- وايه خلاه يتحول طول مانا شايفك اختي!

- هو انت مضا.يق اوي كده يعني؟

- لأ يا قموصة، بس مستغرب..انا حاسك ملكي، يمكن عشان كبرتي على أيدي.. اشربي العصير.

|في الشقة|

كانت الدنيا حوالي واحدة بالليل، لما كنت قاعدة في البلكونة مع نفسي بسمع اغاني والهوا بيحرك شعري.

لقيت رسالة ع الواتس:

" نسيت اقولك انك كنتي وحشاني اوي ال٣ اسابيع..😂"

ابتسمت وكتبت:

" وانت كمان يا جلـ.دة🥹😂"

"ما تيجي تقعدي جمبي شوية وباب الأوضة هيكون مفتوح وربنا🙂"

" اتلم، عايز تيجي تقعد معايا تعالى انت..باب البلكونة مفتوح بردو🙂😂"

" خايف مني يا عدسة؟ اخري ايه يعني هقلعلك النضارة؟😂😂😂😂😂"

" حيو.ان والله😭😂😂"

بعتلي اغنية لأم كلثوم..كلماتها خليتني اتحرجت اوي وبقيت انا شخصيًا فراشة.. 

الأغنية بتقول :

" يا ارق من النسمة، واحلى من ملَك، انت روحي وكل عمري ونور حياتي يا حياتي" 

كتب بعدها :

" والله احلى من ملَك وهاجر وكل البنات 🙂❤️".

سمعت صوت البلكونة اتقفل لفيت وانا بضحك مستنية اشوفه لكن لقيت هاجر.

- في ايه يا هاجر؟

قربت مني وقالت:

- مرام.. أنا عايزة مراد..عايزاه يحبني ويبعد عنك..ارجوكي ابعدي عنه.

اتعصبت وقولت:

- أنتِ ازاي بجحة كده!!!! احمدي ربنا اني محبستـ.كيش.

قربت مني رمت نضارتي ع الأرض، زعقت عشان مبقيتش شايفة كويس، شدتني من شعري وقالت:

- يبقى هتسيبيه غصب عنك حتى لو ده كلفني حياتي.

رفعت فونها في وشي وقالت:

- بصي انا حاطة صورته في كل حتة ع الفون ازاي..مراد ده انا بحبه من وانا عيلة..أنتِ فاهمة؟

- اوعي شعري ابعدي عني.

زقتني ع سور البلكونة خلاص هتقلب..اترعبت لأن السور قصير، صوت جا.مد:

- مراد، الحقوني، يا بابا.

جري مراد من الأوضة ع الصوت وفتح الباب، دخلوا كلهم يجروا وشافوا المنظر فعلًا..شهقوا مخضوضين ونطقوا اسمي.

هددتهم هاجر:

- اللي هيقرب مني هرميها!

قرب مراد في هدوء:

- طب اهدي..اهدي وهعمل اللي أنتِ عايزاه بس نزليها.

- مش هنزلها غير لما تقولي ليه هي وانا لأ.. مرام طول عمرها بتكرهني وانا بكرهها.

قرب مراد منها في هدوء وانا مرعوبة وانا ببص تحت، ده الدور السابع..

فضل يقرب مراد:

- مين قال كده؟ انا هفهمك يا هاجر.. 

- قولي انك هتقطع علاقتك بيها.

- هقطع علاقتي بيها..

- احلف..

قدر يمسكني من دراعي، قالت هاجر في غـ.ضب وحزن:

- لأ..

وقعت لورا، صرخت جامد والناس بصت، فضل ماسك دراعي مرعوب وهو بينطق اسمي وقدر يطلعني، اترميت حضنته وانا بعيط جامد وبترعش.

مسك فتحي هاجر وضر.بها بالأقلام:

- ايه اللي عملتيه ده!!!

زعقت نوال وكانت المرة دي بجد:

- أنتِ اتهبلتي يابنت ال***** تجيبي لنفسك مصيبة!!؟؟؟

ضر*بها فتحي تاني، صوتت وقالت:

-  طب هالة معايا وهي اللي اذ.ت مرام من العصير.

اتصدمت..اتصدمنا كلنا! قالت هالة في دفاع عن نفسها:

- أنتِ كدابة!!

مهتمش ابوها باللي قالته عن هالة، هو كمل ضر.*ب فيها ودخلها جوا يكمل عليها من اللي شافه، بص سليم لهالة مصدوم، دخلت جوا في احراج.

كنت حضناه جامد وبعيط، بس اهلي كلهم واقفين معادا ماما قربت مني  اتحرج وبعدني بعد ما شاف بابا بردو واقف، قال:

- خلاص اهدي عشان خاطري...

بص لبابا وقال في تردد:

- عمي انا..انا عايز اتجوز مرام.


شكرا لزيارتكم عالم روايات سكيرهوم

تعليقات