رواية مشاعر مؤقتة الفصل الثاني بقلم مجهول
الدكتور : لا هيج عمليات لازم على حسابج تسويهن
واني عندي مستشفى اهلي خاص بية هاي عملية
حساسة ومو اي طبيب تنجح عندة انصحج لتخاطرين
جمانة : زين متكدر تدليني على دكتور
يسويلهيا بالحكومي ماعندي والله
امكانية اني ارملة واشتغل خبازة
الدكتور : والله يابنتي ماكدر اساعدج
بهيج شي وكتلج هاي عملية مكلفة ميسووهة
بالحكومي
جمانة : زين دكتور عليك بداعة مصاب الحسين
قللنة السعر ماكدر على هيج مبلغ اني
الدكتور : اني متعاطف وياج بنتي بس ماكدر
وياريت هسة تطلعين لان المراجعين برى
دينتضرون دورهم
جمانة : طلعت واني نفسي مكسورة اول
مرة بحياتي اكره وضعي وفقري جنت راضية
بالقليل ومتحملة وصابرة بس من شفت امي
تتوجع واني مابيدي شي وماكدر اساعدهة
كرهت نفسي وكرهت حياتي
تغريد : شبيج جمانة كولي يالله كلشي
الة حل ربج ميكطع باحد
جمانة : جاوبتهة بقلة حيلة ونعم بالله
رجعنة للبيت نومت امي عالسرير مالتهة
ورحت سبحت ضليت ابجي جوة الدوش
من جنت طفلة ليهسة اني عايشة بحرمان
ومو مثل الناس بس الي جان مصبرني انو
امي بخير وساندتني واني اليوم واكفة عاجزة
انو اساعدهة طلعت من الحمام ورحت سويت
عشى وصبيت الية ولامي وكعدنة ناكل
ابتسام : شبيج يمة ليش هيج مهمومة
جمانة : لا ماكو شي حبيبتي انتي اكلي
حتى تاخذين علاجج
ابتسام : يمة ادري بيج شايلة همي بس
اني كبرت وهو هذا الانسان من يكبر
تطلع عيوبة واني تعبت بحياتي
بالخبز والخياطة بس حتى ماشوفج
مهمومة لو ناقصج شي امي العملية
تكلف هواية وانتي متكدرين لهيج مبلغ
خليني علمسكنات لما الله ياخذ امانتة
جمانة : ذبيت الخاشوكة من ايدي ودموعي
نزلت رحت حضنتهة وابجي بحضنهة لا ماما
ماعوفج تتوجعين بس اصبري فترة لحد ما ادبرهن
ابتسام : يمة منين تدبرين هيج مبلغ
جمانة : الله كريم ماما الله ميكطع بعبدة
واني دوم اساعد الفقرة رغم وضعي
اكيد الله مراح ينساني
ابتسام : الله يرضى عليج يمة
جمانة : رحت غسلت المواعين واني اباوع
عالبيت ماعندي حتى شي ينباع كلة اثاث
قديم ومحد بحالة شسوي ياربي
تغريد : جنت كاعدة ودك التلفون انوار صديقتي
انوار : ها ولج شو متسألين من شلتي من يمنة
قلت اتصالاتج شنو البعيد عن العين بعيد عن الكلب
تغريد : لا مو هيج بس التهيت والله
انوار : اي شلونج اخبارج
تغريد : الحمد لله انتي شلونج
انوار : والله ماشية بين الصالون والبيت
تغريد : بعدج على سوالفج
انوار : ياسوالف قصدج هن هواية سوالفي ههههه
تغريد : تعرفين قصدي ولج بعدج يومية متزوجة
ومتطلكة
انوار : اي شسوي لعد قابل اتغير
تغريد : ايا طايحة الحظ
انوار : وانتي متزوجتي
تغريد : لا قابل مااستحي واتزوج بهيج عمر
انوار : العمر مجرد رقم بعدين هواية نسوان
اكبر منج ومتزوجات
تغريد : مالي شغل بالعالم بعدين اني كرهت الزواج
من اهلي زوجوني واني طفلة لواحد شايب
وحرموني من طفولتي ومن انو اكون ام ويصير
عندي اطفال الله يسامحهم
انوار : اوي تغريد شذكرج بهلسوالف صدك
نسيتيني اني اتصلت عليج اريد منج شغلة
تغريد : وهي
انوار : ماعندج بنية شابة منا منا
تغريد : شتسوين بيهة
انوار : اهو تغريد دجاوبي بلاول ماعندج
تغريد : لا ماعندي بس من صدك شتسوين بيهة
انوار : واحد زبون عندي يريد بنية شابة
تغريد : زبون شنو ولج انتي شتشتغلين بالظبط
انوار : شبيج ولج وين راح بالج يريدهة للزواج
تغريد : لعد شنو زبون
انوار : مو اني ادور بنات الهم والي نسبة
تغريد : منو همة ولج
انوار : اوي تغريد تحقيق هو ناس اعرفهم
طاكين قسم تجار وقسم عسكريين اشكال
تغريد : شنو طبيعة الزواج
انوار : شتقصدين
تغريد : تعرفين قصدي لتثولين روحج
انوار : زواجات مؤقتة بس مهر سيد
وكلهن ارامل ومطلقات وبحاجة فلوس
او بحاجة رجال بحياتهن
تغريد : انتي من كل عقلج هيج تسوين
شنو ذنبهن هيج تستغلوهن
انوار : واني شعلية شنو خاطفتهن كلهن نسوان
كبار ويعرفن يتصرفن وهن موافقات على الشروط
تغريد : جاوبتهة بتردد ااااشششكد ينطوهن
فلوس مقابل هذا الزواج
انوار : شنو كمتي تفكرين تتزوجين ههههه
ترى محد يكلبج يدورون شابات
تغريد : انجبي حيوانة وجاوبي عالسؤال
انوار : مو سوى والله حسب البنية شكد
تريد مهر وحسب جمالهة وشكلهة
تغريد : متأكدة هلسالفة مو حرام
انوار : اي طبعا مو حرام هو عقد سيد
وشهود بي بس بالسر وفترة معينة
تغريد : هي اكو بنية جيرانة ومحتاجة
كلش بهالفترة بس مااضن توافق على هيج شي
انوار : حلوة هي شكد عمرهة
تغريد : عمرهة٢٣واي حلوة كلش
انوار : ماشي حاجيهة ورديلي خبر
تغريد : سدتة واني ضليت افكر معقولة
جمانة ترضى بهيج شي شفت الساعة بل 9
كلت خل اروحلهة واحاجيهة
جمانة : جنت كاعدة دخيط واندك الباب
رحت حطيت شال على راسي وكلت منووو
تغريد : اني جمانة افتحيلي الباب
جمانة : فتحتة وطبت سلمت علية وفاتت
للهول كعدت عالقنفة
تغريد : ها شلون صارت عمة ابتسام
جمانة : اخذت علاجهة ونامت اسويلج جاي
لو تشربين شربت
تغريد : لا اكعدي ماريد شي جيت احاجيج
بشغلة
جمانة : شنية الشغلة وليش هيج متوترة
تغريد : باعي جمانة مهما كان اللي راح اكولة
ماريدة يأثر على علاقتنة تدرين بية شكد احبج
جمانة : شبيج تغريد شنو هاذا الحجي
تغريد : جمانة من الاخير اني لكيتلج طريقة
تحصلين بيهة فلوس حتى تسوين
عملية لامج
جمانة : اي ياالله لعد ليش هيج مرتبكة
تغريد : مو يجوز الطريقة متعجبج
جمانة : شتقصدين خما شي غلط او حرام
تغريد : لا مو غلط جمانة ولا حرام
جمانة : لعد شبيج هيج خايفة تحجين
تغريد : اليوم صديقتي خابرتني وكالت اكو
رجال يريد بنية للزواج تكدرين بفلوس
المهر تسوين عملية لعمة ابتسام
جمانة : بس اني مااريد اتزوج مو كتلج قبل
تغريد : هذا مو زواج عادي جمانة مؤقت
جمانة : جنت اسمع حجيهة ومستغربة وضعهة
بس من كالت زواج مؤقت احس الدم صعد
براسي وعصبت حيل
تغريد : شبيج جمانة هيج تعصبتي
جمانة : اذا اني ساكتة فلخاطر وكفاتج وياية
اما تواصل لهلدرجة ماارضى اشايفتني
وارضى بهيج شي شنو تخبلت
تغريد : اني بس قصدت اساعدج واذا مرضيتي
بكيفج ضلت يمج بس هو زواج بعقد وشهود
يعني مابي شي حرام
جمانة : لا حرام تغريد لتضحكين على روحج
هاي سوالف ناس سخيفة تتسلى ببنات العالم
بحجة زواج هذا العمل ميرضى بي الله
تغريد : انسي كل اللي كلتة جمانة واعتبريني
محجيت شي مادامج رافضة هسة اردلهة خبر
وميكون خاطرج الة طيب
جمانة : اسفة لان عصبت عليج تغريد بس
الموضوع مستفز ومهين الية
تغريد : اسفة مرة ثانية تصبحين على خير
جمانة : وانتي من اهلة راحت واني حطيت راسي
بيج رجلية وابجي واشهك معقولة وصل بية
الحال هيج شكد راح تهيني الدنيا بعد
ياالهي ارحمني وفرج كربي ياالله
مسحت دموعي وكعدت عالمكينة اخيط
مكدرت شمرت القماش وكمت
افتر بالحوش واباوع علاشجار
وكلساع تنزل دموعي وامسحهة
لحد منعست دخلت اريد انام سمعت امي تون
رحت لغرفتهة وفتحت الضوة ها يمة شبيج
ابتسام : يمة رجلية توجعني
جمانة : رحت جبتلهة عصارة مال دهن
من علاجهة وكعدت افركلهة
واني منعسة كلش كوة فاتحة عيوني
شفتهة رجعت نامت رحت بسرعة لغرفتي
اول محطيت راسي علمخدة غفيت من التعب
