رواية مشاعر مؤقتة الفصل الثالث بقلم مجهول
جمانة : كعدت الصبح واني راسي يريد ينفجر
كمية التعب والقهر الي دعيشة مو طبيعي
اتوضيت وصليت وسويت ريوك تريكت وكلعادة
ابلش اعجن من ال ٥ عجنت ٤ نجاين كبار
انهد حيلي لما كملت عفتة يختمر ورحت كعدت
علمكينة اخيط بين ميختمر العجين
كعدت امي سويتلهة ريوك ونطيتهة علاجهة
رحت شفت العجين لكيتة مختمر
رحت شغلت التنور وبلشت اخبز مخلصت غير
واني مكسور ضهري ورى مشوار اجوي العالم
ياخذون خبزهم والي يريد يشتري خبز
وراهة نظفت وسويت غدا اندك الباب عبالي
جهال يريدون خبز فتحتة شفتهة تغريد
تغريد : صباح الخير جمانة
جمانة : هلا تغريد فوتي
تغريد : فتت وكعدت على كرسي بالحديقة
اي جمانة خما زعلانة مني بسبب الي حجيتة
البارحة ترى وحق كل حرف بالقران اني مقصدي
شي بس ردت اساعدج واساعد عمة ابتسام
جمانة : لا تغريد مزعلت هذا مو غلطج
هذا غلط الدنيا الي تحير شلون تلطش بية
تغريد : الله يفرجهة جمانة ميضل شي على حالة
جمانة : امين يارب
تغريد : اني والله لو عندي ماقصر بس ماخذة سلفة
علراتب من اشتريت هذا البيت ولساعني مكملت
الاقساط
جمانة : اعرفج متقصرين معذورة والله
تغريد : اني كايمة يلة الحك اسوي غدا
جمانة : اني سويت فاصولية وتمن ضلي يمنة
اليوم عليش رايحة
تغريد : اي والله هم صدك اشو ثنينة مكابلات
الحياطين خل نكعد نسولف احسن
جمانة : رحنة للمطبخ اني اغسل خضرة وهي تسوي
زلاطة منو هاي صديقتج الي عرضت عليج موضوع
الزواج
تغريد : مرية جانت ساكنة كبالي بذاك بيتي القديم
جمانة : وهي شنو وسيط
تغريد : اي ترتب الزواجة والهة نسبة ليش
دتفكرين بهلموضوع جمانة
جمانة : ماعرف تغريد امي دتون الليل كلة
البارحة ضليت افركلهة حتى منمت زين
تغريد : يعني شنو تريد توافقين
جمانة : هذا الموضوع ضد مبادئي وامي اذا عرفت
تتخبل بس اني مجبورة لو اشتغل سنوات مادبر
هذا المبلغ واني علية مصاريف كومة
تغريد : ماعرف جمانة بس هو زواج مؤقت يعني
فترة ويخلص وكلمن يرجع لحياتة
جمانة : واني شلون احترم نفسي بعد ؟
تغريد : ليش شمسوية انتي حتى متحترمين نفسج
جمانة : راح ابيع جسمي مقابل الفلوس
تغريد : لامو بيع هذا مهر حالج حال اي وحدة تتزوج
جمانة : ماعرف كلبي ممرتاح لهذا الموضوع
واحسة بي مذلة الية واهانة وامي اذا عرفت
شراح يصير بيهة مراح تتحمل هيج شي
تغريد : والله مادري شبيدي عليج اني عرضت
عليج شي وانتي بكيفج فكري زين بالموضوع
حتى ارد لانوار خبر
جمانة : حسيت الدنيا دتضغطني حيل ودتجبرني
اغير مبادئي والاشياء الي تربيت عليهة اصعب شي
من تشوف شخص عزيز عليك بوضع صعب وانت
عاجز متكدر تساعدة داخلي منهار والافكار دتتصارع
بعقلي بلاخير فازت الفكرة الاقوى فازت عواطفي
الي اخذتني لهذا القرار اللي بعدني ممستوعبة
شلون اخذتة بلحضة طلعت هاي الكلمة من لساني
قرار متسرع وغبي وممدروس بس مشاعري وحبي
لامي هو انتصر مو مهم شيصير بية المهم امي تكون
بخير ومتتوجع بعد حتى لو ثمن هذا الشي غالي
تغريد اني موافقة رديلهة خبر لصديقتج
تغريد : شنوووو شبسرعة وافقتي فكري زين مو لعب
جهال هو مو هسة توافقين بعدين تتندمين وتتراجعين
ترى كلهم ناس طاكين وبالدولة لتورطينة الله يرضى
عليج فكري ومخمخيهة زين بعقلج
جمانة : شفكر تغريد اني دموت من اشوف امي تتوجع
لو بيدي اخذ وجعهة كلة وماخليهة تتوجع وج هاي
امي ومو مثل كل ام كضت عمرها تشتغل علمود
تعيشني ومتخلي شي بنفسي قصرت على روحهة
بهواية شغلات حتى زواج متزوجت وفنت عمرها
كلة لخاطري شلون هسة اني واكفة عاجزة واني
اشوفهة يومية دتذبل اكثر وتون من الوجع
تغريد : شبيدج انتي سويتي اللي تكدرين عليه
ومقصرتي وهو كلة بيد ربج فوضي امرج لله
وهو احسن الكل
جمانة : ونعم بالله سوينة الغدة وتغدينة نطيت لامي
علاجهة ونامت وكملنة الشغل غسلنة مواعين ونظفنة
البيت للعصر كملنة وهي راحت لبيتهم واني كعدت
اخيط وافكر بقراري ياترى تسرعت لو لا
تغريد : رجعت للبيت ودكيت على انوار اول مدك جاوبت
انوار : هلو تغريد هابشري وافقت البنية ترى الرجال
مستعجل وكل يوم يخابرني
تغريد : اي وافقت بس المبلغ اللي تريدة جبير
انوار : شكد تريد يعني
تغريد ،،،،،،،،،،ملايين
انوار : حيل شدعوة هالكد بس مو مشكلة اكلة يجوز
يقبل عاد هي تسوى هذا المبلغ بلد دزيلي صورته
تغريد : دزيتلهة صورة جمانة بعد موعدتني متحفظهة
عدهة ولاتشوفهة لاحد
انوار : والله حلوة وصغيرة حقهة تطلب هيج مبلغ
تغريد : انوار اذا هذا الرجال مو خوش لتورطيهة ترى
البنية يتيمة وفقيرة ومتعوبة ومتستاهل تتبهذل
انوار : لا ولج خوش رجال ومن اهل البصرة اني صح
ممتعاملة وياه قبل بس من تصرفاتة يبين ابن اوادم
تغريد : الله يعديهة على خير سديتة منهة واني
بين ضميري اللي ديأنبني لان حطيت جمانة بهيج
موقف وبين اواسي نفسي انو ماكو غير طريقة
ومحد يساعد احد بهذا الزمن وهي محتاجة ولازم
تضحي لخاطر امهة ضلت الافكار تاخذني وتجيبني
لحد مغفيت من التعب كعدت على صوت التلفون
شفتهة انوار دتدك فتحتة وحطيتة على اذني واني
كوة فاتحة عيوني الووو
انوار : هاي شنو نايمة
تغريد : اي كعدت على صوت التلفون
انوار : باعي باجر جيبي البنية وتعاي الرجال مستعجل
اليوم اجة وشوفتة صورتهة واقتنع بيهة باجر جيبيهة
حتى يعقد عليهة
تغريد : ماشي اخابرهة واردلج خبر سديتة منهة خابرت
جمانة وكلتلهة تحضر نفسهة لباجر وهي تخبلت على
شبسرعة وليش هيج مستعجل
تغريد : ماعرف والله باجر شوفي واتفاهمي وياه
اني باجر العصر امر اخذج ونروح لبيتهة
جمانة : وامي شلون منو يضل يمهة اذا تخربطت
او احتاجت شي شلون
تغريد : والله مادري انطيهة علاجهة ومن تنام نطلع
جمانة : مادري تغريد دحسهة ورطة بديت اتندم
لان وافقت
تغريد : ها مو كتلج فكري زين ليش ورطتينة لعد
جمانة : ماشي منا لباجر الله كريم
تغريد : دايم كريم حضري نفسج تريدين اجي اساعدج
جمانة : شحضر يعني
تغريد : ولج شبيج سوي شيرة واني اجي باجر الصبح
احفلج قابل تروحين للرجال ممجهزة نفسج
جمانة : ماشي
تغريد : يلة باي هسة اريد اسوي عشة جعت
جمانة : باي سديتة منهة وضليت افكر يعني شنو
هسة لازم اجهز نفسي مثل اي عروس وادخل انسان
غريب لحياتي واتقبلة شتريد تسوي بية الدنيا بعد
ياربي رحت سويت جدرية شيرة وانتضرت امي تنام
وضليت ساعتين اسوي بجسمي والوجع يشوغ الروح
كملت ورحت سبحت مشطت وتمددت بفراشي
وافكر باللي راح يصير باجر واحسب الف حساب
ضليت اتكلب وميجيني نوم لحد مأذن الفجر
رحت توضيت وصليت ونمت لان تعبت ونعست
كعدت الصبح مالي واهس اخبز ومحد موصيني
كعدت اخيط بلعشرة جتي تغريد
تغريد : ولج عوفي الخياط وتعاي احفلج
جمانة : تغريد بطني دتمغصني وخايفة ولج اني
التهيت ونسيت مصيبتي شلون اذا عرف بية
شراح يسوي
تغريد : ميسوي شي اصلا يكيف
جمانة : مادري احس راح اتخربط الليل كلة منمت
خايفة هواية خايفة ماكدر اكمل خايفة اتورط
وماكدر اطلع نفسي بعد من هاي المصيبة
تغريد : ماعرف انوار كالت مبين خوش رجال
اعتبري شغل راح تسوي وتاخذين فلوس بلمقابل
عوفي مشاعرج على صفحة وخليج هادئة
جمانة : الايدة بالمي مو مثل اللي ايدة بالنار
مراح تحسين ابد باللي جاي احسة هسة
تغريد : لا جمانة حاسة وعشت كل اللي دتعيشي
وخاف انتي هسة شابة ودتسوين هذا الشي بختيارج
اني جنت طفلة عمري ١٤ واهلي باعوني لرجال شايب
علمود الفلوس حتى خلفة مخلفت اني عشت التجربة
بمشاعري وعانيت هواية عوفي مشاعرج وخليج عملية
واذا متريدين ومترددة كولي من هسة حتى ننهي كلشي
قبل متتورطين
جمانة : اسفة لان حجيت وياج هيج وحضنتهة وكمت
ابجي واشهك
تغريد : ولج اني مازعل منج انتي بنتي اللي مجبتهة
انتي غالية علية هواية اتمنى لو اكدر اساعدج
ولا اشوفج هيج جاي تتعذبين بس مابيدي شي
جمانة : ادري بيج متقصرين هذا اختبار من رب العالمين
واني لازم انجح بي ولازم اضحي لخاطر امي مثل
ماهي ضحت بهواية امور لخاطري
حفتلي تغريد وراحت وكالت امر العصر عليج
صبيت غدا لامي واني مشتهيت اكل احس بطني
تمغصني كعدت اريد اخيط ايدي ترجف ومتوترة
مدري شلون مر الوكت اندك الباب فتحتة طبت تغريد
تغريد : وين عمة ابتسام نايمة لو كاعدة
جمانة : لانايمة
تغريد : اركضي جيبي عباتج واذا سألت عود نكلهة
طلعنة نشتري لوازم خياطة
جمانة : ماشي طبيت لبست عباتي بسرعة وطلعت
وياهة اخذنة تكسي وكالتلة للسايق علعنوان واني
ضليت اباوع علجامة احس دمشي بطريق جهنم
وادري هذا الشي نهايتة مراح تكون مدمرة الية
تغريد : اي اخوية نزلنة هنا جمانة يلة انزلي جمانة
جمانة : جنت صافنة وفزيت على صوت تغريد نزلت
شفتة بيت راقي دكينة الباب ورى شوية طلعت مرية
بلتلاثين بس لابسة تراكسوود وصابغة شعرهة احمر
تغريد : هلو انوار هاي جمانة اللي كتلج عليهة
انوار : اللهم صل على محمد وآل محمد هاي بلحقيقة
احلى يلة فوتن للاستقبال فد شوية يجون
جمانة : طبيت البيت اثاثة كلة من فخم ومرتب
كعدنة بلاستقبال جابتلنة عصير وكيك بس اني
مكدرت اكل او اشرب اي شي
انوار : باعي حبيبتي هاي صورتة
جمانة : جتي كعدت يمي وشوفتني صورتة جان رجال
جبير يطلع فوك الاربعين بس مرتب ولابس عسكري
انوار : ها عجبج
جمانة : نزلت راسي وضليت افرك بيدي
تغريد : انوار خما يريد يشوفهة باليل ترى متكدر امهة
مريضة بالبيت ومتكدر تطلع بالليل
انوار : طبعا يريدهة باليل هو ميحلى الشغل
غير بالليل هههههه
تغريد : هسة مو وكت سخافتج شلون بهاي السالفة
جمانة : باوعتلهة واني خايفة شنسوي هسة ماكدر
اطلع باليل شكول لامي
تغريد : اتفاهمي وياه بلكت يقبل تشوفيه بالنهار
جمانة : بأثناء حجينة اندك الباب وراحت انوار تفتح
الباب ورى شوية فاتوا زلم اربعة واحد منهم لابس
عمامة عرفتة السيد اني احس اختنكت ومكدرت
ارفع راسي جتي انوار لابسة شال بس وصاية
واني مستغربة شلون مرية تفوت زلم لبيتهة
شنو ماعدهة اهل احس نفسي دخلت مستنقع
وغصبا عني لازم اتوسخ يلة اطلع
انوار : بس من رخصتك استاذ عقيل جمانة
تريد تحجي وياك شوية على انفراد عدهة
اموار تريد تتفق وياك عليهن
جمانة : اني رفعت راسي اباوعلهة بعدين باوعتلة
هو كاللهة اي شكو بيهة براحتهة بعدين باوعلي
اني خجلت ونزلت راسي كامت انوار واخذتنة
للصالة وطلعت اني ضليت واكفة وهو وكعد
عقيل : اكعدي ليش واكفة
جمانة : اني ارتبكت وكعدت بسرعة
عقيل : اي احجي يابة شنو الامور اللي تردين تحجين
وياية بيهة
جمانة : اني احس انخرست كوة طلع مني الحجي
اني اريد مبلغ ،،،،،، ملايين مهر لان محتاجتة ضروري
ولازم اشوفك بالنهار لان ماكدر اطلع بالليل
عقيل : المهر مو مشكلة بس لازم اشوفج باليل اني
عندي دوام لازم ترتبين امورج
جمانة : ماشي بس اريد شغلة بعد
عقيل : تفضلي
جمانة : انطيني فترة لان اريد اسوي عملية لامي
عقيل : شكد يعني
جمانة : ماعرف اقل شي اسبوعين
عقيل : ماشي انا هم راح انزل للبصرة
اجازة من ارجع ماريد اي حجة
جمانة : ماشي شكرا
عقيل : طلعت جكارة من الباكيت وصافن عليهة
حلوة هواية ومبينة فقيرة مو ملعبة وتوترهة
وخوفهة الواضح يبين هي مضطرة
جمانة : جنت كاعدة وكل مارفع عيني اشوفة يباوعلي
اني احس عركت وخفت هواية
عقيل : رتبي امورج الليلة اريدج لان باجر انزل اجازة
جمانة : كال هيج وطلع واني احس راح افقد الوعي
شنو الليلة مو كال لما يرجع زين امي شلون
كمت وكفت بعيد واشرت لتغريد همزين شافتني
جتي بسرعة علية
تغريد : ها اتفقتي وياه شكال
جمانة : وافق ينطيني مدة لحد ماسوي عملية لامي
بس كال لازم اشوفج بالليل شلون شسوي
وكال اريدج الليلة قبل لاانزل اجازة شلون دبريني
يمكن انهزم ماريد بطلت ماكدر اسويهة ماكدر
تغريد : ها ورطتينة منكدر نتراجع هسة ذولة واصلين
يروح يسوولنة مشكلة استري علينة
جمانة : شلون وامي متكول وين رحت
تغريد : اني ادبرهة مالج شغل
جمانة : شلون شتكليلهة
تغريد : دكلج اني اطلعلهة شغلة مالج شغل انتي
امشي يلة يريد السيد يروح مستعجل
جمانة : رحت كعدت وبدة السيد يعقد
اني احس روحي مزوهرة مثل السمجة اللي يطلعوهة
من المي احس جاي اعيش بمكان مو مالتي ولا يوالمني
محسيت غير تغريد تعس بية انتبهت عالسيد ديطلب
موافقتي كتلة موافقة وكمل العقد وباركلنة وطلع
طلعوا كلهم ضلت تغريد يمي ورى شوية رجع
عقيل : يلة كومي وياية
جمانة : اني احس بعد ماعندي رجلين انشلن رفعتلة
راسي وبلكوة كمت باوعت لتغريد بنضرة توسل
تنقذني بس هي نزلت راسهة عبك حصرتهة الدمعة
مشينة للسيارة فتحلي الباب وصعدت
مشى بالسيارة مسافة ربع ساعة تقريبا ونزل واني
فتحت الباب ونزلت و تقرب يمي
عقيل : غطي وجهج بالعباية
جمانة : غطيت وجهي اني هم اخاف لااحد يشوفني
ويعرفني وانفضح وكف يم بيت راقي بس صغير
وفتح القفل وفات واني ضليت واكفة
عقيل : فوتي شتنتضرين
جمانة : فتت واني كلبي يدك سريع خايفة بكل مقاييس
الخوف ومتوترة واريد ابجي من الموقف مضل احد
مسبيتة بهاي اللحظة من عمامي وخوالي الى الدكتور
الي مساعدني كلهة سبيتهة بقى يمشي واني وراه
لحد موصل لغرفة فتحهة وفات اني من شفت بيهة
سرير عرفتهة غرفة نوم ترددت افوت ضليت واكفة
ومنزلة راسي للكاع محسيت غير وكف كدامي
عقيل : راح تضلين واكفة تردين تسبحين حتى ترتاحين
جمانة : هزيتلة راسي بأي اشرلي علحمام وفات علغرفة
اني رحت ركض فتت وقفلت الباب والله ذب علية
البجي بذيج اللحظة ضليت ابجي لحد مندك الباب
عقيل : ليش تأخرتي
جمانة : هسة اطلع سبحت بسرعة ورجعت لبست
ملابسي نفسهن شفتة واكف على صفحة ويدخن
ذب الجكارة بلكاع وداسهة برجلة وتقدم عليه
