رواية حكاية من قلب الصعيد الفصل الثاني
تاني يوم الصبح، السرايا صحيت بدري زي عادتها.
الحاجة زينب كانت واقفة في المطبخ من الفجر، وهاجر بتساعدها، ومريم نازلة وراهم على طول.
الحاجة زينب: صباح الخير يا بنتي، نومتي كويس؟
مريم بابتسامة: صباح النور يا أمي، الحمد لله، نومت كويس. تحبي أعملك إيه النهاردة؟
الحاجة زينب: ربنا يبارك فيكي يا مريم، إنتي اللي شايلة البيت كله على كتفك، من غير ما تطلبي حاجة.
مريم: ده بيتي يا أمي، وإنتِ أمي التانية، وأنا بعمل ده بحب، مش واجب.
هاجر: والله يا ست الكل، ست مريم دي مفيش زيها، من ساعة ما دخلت السرايا وهي قلبها على الكل.
الحاجة زينب ربتت على كتف مريم: ربنا يعوضك يا بنتي، ويرزقك باللي يفرح قلبك.
في نفس الوقت، كان الحاج محمود قاعد في المندرة، وبيشرب قهوته، وحمزة دخل عليه.
حمزة: صباح الخير يا حاج.
الحاج محمود: صباح النور يا ولدي، اقعد جنبي.
حمزة قعد: يوسف لسه نايم؟
الحاج محمود ضحك: سيبه، ده جاي من سفر، وتلاقيه تعبان. زمانه نازل دلوقتي.
بعد شوية، نزل يوسف وهو لابس ومتشيك، وسلم على أبوه وحضنه.
يوسف: صباح الخير يا حاج.
الحاج محمود: صباح النور يا ولدي، نورت دارك.
يوسف: البيت منور بأهله يا أبويا.
الحاج محمود: تعالوا بقى، اقعدوا معايا شوية في المندرة، وحشتوني قعدتكم.
حمزة ويوسف دخلوا وقعدوا جنب أبوهم، والحاج محمود بص لهم بفرحة وحب، وقال:
الحاج محمود: ربنا يخليكم ليا يا ولادي، البيت من غيركم ملوش حس. طمنوني عليكم، كل واحد يقولي عمل إيه الأسبوع اللي فات.
حمزة بدأ الأول بابتسامة: أنا يا أبويا الحمد لله، الأسبوع ده كان كله خير. ظبطت الأرض اللي في الشرق، وصلحت الساقية اللي كانت بايظة، واتفقت مع الرجالة على تجهيز الأرض للزرعة الجديدة. وعديت على عمك أبو سيد وطمنت عليه، كان تعبان شوية، وقعدت معاه شوية.
الحاج محمود بحب: ربنا يعينك يا ولدي، إنت شايل الحمل كله هنا، وربنا هيعوضك خير على تعبك.
حمزة: ده واجبي يا أبويا، دي أرضنا ودي عيلتنا، وأنا مش بعمل حاجة زيادة.
يوسف كمل: وأنا يا حاج، الأسبوع ده في القاهرة كان مضغوط أوي، بس الحمد لله خلصت شغل مشروعين كانوا متأخرين، واتفقت مع ناس جديدة إننا نبدأ شغل جديد الشهر الجاي. وكنت كل يوم بكلم حمزة أطمن عليه وعليكم، وعلى أمي.
الحاج محمود: ربنا يعينك إنت كمان يا يوسف، ويوسع رزقك. إنت بتتعب في القاهرة عشان عيلتك، وربنا مش هيسيب تعبك.
يوسف: دعواتك يا أبويا هي اللي ماشية معايا في كل حتة.
الحاج محمود بص لهم الاتنين بفرحة: أنا فرحان بيكم يا ولادي، كل واحد فيكم بيحقق حلمه في مجاله. حمزة شايل الصعيد وأرضه وأهله، ويوسف شايل شغله في القاهرة ورافع راسنا. ربنا يعوضكم خير، وتفضلوا دايمًا سند لبعض.
حمزة بص ليوسف: طول ما إحنا مع بعض، مفيش حاجة هتقف قدامنا يا أخويا.
يوسف حضن أخوه: ربنا يخليك ليا يا حمزة، إنت ضهري، ولو حصلي حاجة، عارف إنك هتشيل عني.
الحاج محمود: هو ده الكلام، الإخوات سند لبعض، واللي ملوش أخ، ملوش ضهر. أنا طول عمري بقول، الفلوس بتروح وتيجي، لكن الأخ مبيتعوضش.
حمزة: عندك حق يا حاج، وأنا ويوسف عمرنا ما هنختلف، مهما حصل.
يوسف: صح يا حمزة، إحنا تربينا على كده.
وفي الصالة، كانت الحاجة زينب قاعدة مع ليان، وليان قاعدة مسكة تليفونها ومش مركزة مع حد.
الحاجة زينب: يا ليان يا بنتي، قومي اقعدي معانا، بلاش تفضلي قاعدة لوحدك.
ليان من غير ما تبص: حاضر يا طنط، بس أنا مستنية مكالمة مهمة.
الحاجة زينب سكتت، وبصت لمريم اللي كانت داخلة شايلة الصينية، فيها الشاي والقهوة.
مريم بابتسامة: اتفضلي يا أمي، الشاي بتاعك.
الحاجة زينب: تسلم إيدك يا بنتي.
مريم راحت ناحية ليان عشان تديها القهوة بتاعتها:
مريم: اتفضلي يا ليان، القهوة بتاعتك من غير سكر زي ما بتحبيها.
ليان قاعدة على الكنبة ومسكة تليفونها ومستنياها تديهالها، ومقالتش حتى شكرًا.
في اللحظة دي، حمزة كان طالع من المندرة وشاف المنظر ده، وقف ونده عليها:
حمزة: يا مريم!
مريم بصتله: نعم يا حمزة؟
حمزة: تعالي، عايزك.
مريم حطت الصينية على الترابيزة وراحت له، وهي مستغربة.
حمزة بص لمريم قدام ليان وقال بصوت واضح والكل سامعه:
حمزة: يا مريم، ليان هنا زيها زيك.
ليان رفعت عينيها باستغراب: يعني إيه؟
حمزة كمل كلامه لمريم: لو عايزة حاجة تقوم تجيبها.
وبعدين بص لمريم وقال: اعملي اللي المفروض تعمليه بس. هي مش أحسن منك. إنتي عندك ورث وأرض وشهادة أحسن من أي حد، مفهوم؟
مريم عينيها دمعت من كلامه، وبصت في الأرض وقالت بصوت هادي:
مريم: حاضر يا حمزة، اللي إنت شايفه.
حمزة قرب منها ومسك إيدها وقال بحنية:
حمزة: يا بنتي قلبك الأبيض ده، هو اللي مخليكي ساكتة ومستحملة، بس أنا مش هسمح لحد يقلل منك، لا هنا ولا في أي حتة.
الحاجة زينب كانت واقفة وسمعت كل حاجة، وبصت لحمزة بفخر وقالت في سرها: ربنا يبارك فيك يا ولدي، راجل بجد، وبتحمي مراتك قدام الكل.
ليان وشها بقى أحمر، وقامت بسرعة خدت القهوة بنفسها من على الترابيزة، ومكانتش عارفة تقول إيه، ودخلت أوضتها وهي متضايقة.
مريم بصت لحمزة وقالت: ربنا يخليك ليا يا حمزة، إنت سندي.
حمزة: ويخليكي ليا يا بنت الأصول.
بعد اللي حصل، يوسف طلع فوق على أوضته، وليان طلعت وراه على طول، وقفلت الباب وراها وهي متعصبة.
ليان: يوسف، يلا نمشي من هنا، أنا عايزة أرجع القاهرة.
يوسف بص لها باستغراب: نمشي؟ إحنا لسه جايين يا ليان، في إيه؟
ليان: شفت أخوك؟ شفت بيقارن بيني وبين الفلاحة دي؟ هو عارف أنا مين وهي مين؟
يوسف وشه اتغير، وقال بصوت حاد:
يوسف: أخويا، متجبيش سيرته على لسانك. مستحيل حد يدخل ما بيني وبينه، فاهمة؟
ليان: أنا مقصدش، بس هو أحرجني قدام الكل.
يوسف: وبعدين إنتي مستنية مريم تخدم عليكي ليه؟ ما تخلي هاجر تجيب اللي إنتي عايزاه.
ليان بضيق: وهو إيه الفرق يعني؟ دي حتى لابسة النقاب ليل نهار، لو حلوة كانت أكيد خلعته، عاملة زي الخيمة، معرفش أهلك بيحبوها على إيه!
يوسف بص لها وقال بهدوء بس بحزم:
يوسف: يا ليان، إنتي جاية كام يوم، بلاش مشاكل. وبعدين هي كويسة مع أخويا وأهلي، وهو ده المهم. ملناش دعوة حلوة أو وحشة، ليهم هما.
ليان: بس محدش يقارن بيني وبينها!
يوسف سكت شوية، وبعدين قال:
يوسف: محدش قارن، حمزة كان بيدافع عن مراته، زي ما أنا هدافع عنك لو حد جه عليكي. ده راجل، ومراته دي شرفُه، ولازم تفهمي كده.
ليان قعدت على السرير وسكتت، بس جواها نار، وحست إنها مش قادرة تستحمل القعدة في السرايا ولا كلام حمزة.
وفي نفس الوقت، تحت في السرايا، كانت مريم قاعدة جنب الحاجة زينب، والحاجة زينب بتحاول تهديها.
الحاجة زينب: متزعليش يا بنتي، حمزة عمل الصح، وكان لازم حد يقولها إنك مش أقل منها.
مريم: أنا مش زعلانة يا أمي، أنا بس كنت بعمل ده بحب، مش عشان حد يطلب مني.
الحاجة زينب: عارفة يا بنتي، عارفة إن قلبك أبيض، وعشان كده ربنا هيعوضك.
أما حمزة، فكان قاعد مع أبوه في المندرة، وسرحان شوية، وحاسس إن اللي حصل ده مش هيعدي بسهولة، وإن ليان مش هتسكت.
بعد شوية، مريم دخلت أوضتها وفتحت اللاب توب وكملت الكورس الألماني بتاعها.
دخل حمزة وقال: كابسة!
مريم اتخضت وقالت: خضتني، فكرتك ماما الحاجة، لو شافت اللاب توب كانت عرفت السر.
حمزة قال: إيه سر يا بنت الأصول؟ سري ولا سرك؟
مريم: حمزة، أنا قولتلك متتكلمش في الموضوع ده تاني.
حمزة قال: أنا مش عارف أقولك إيه، أنا لو لفيت عمري كله مش هلاقي زيك واحدة في جمالك ونسبك وفلوسك وشهاداتك، تستحمل تعيش مع واحد مريض، عمره ما هيكون زوج حقيقي ولا أب في يوم من الأيام، وتحفظ بيته وسره، حتى أقرب الناس ليه، لا أمي ولا أبويا يعرفوا، دي لازم تتشال على الراس.
مريم قالت: حمزة، ليه كل شوية تتكلم في الموضوع ده؟ ده نصيب، وممكن كنت فضلت طول حياتي من غير جواز، في ناس كده كتير. كفاية عليا حنيتك وحبك ليا، ده عندي بالدنيا.
حمزة قال: وحقق كزوجة وأم هعمل فيه إيه؟ لينا خمس سنين وعمرك ما اشتكيتي، أعمل بس فيكي إيه؟
مريم قالت: خليني أكمل دراسة، هي كل حياتي.
حمزة قال: لسه دراسة تاني يا بنتي؟ فيه إيه تاني أكتر من ماجستير ولغتين؟ إيه هتبقي وزيرة؟
مريم قالت: ما دي كل حياتي دلوقتي، ممكن أتعلم لغة جديدة.
حمزة قالها: حاضر، اللي تؤمري بيه يا قلب حمزة.
