رواية دوار العوض الفصل الثاني 2 بقلم هاجر سلامه

الصبح طلع والشمس دخلت من الشباك بنورها القوي لكن نورها مكنش فيه أي دفى بالنسبة لهيام اللي كانت لسه صاحية من على الأرض ورا الباب جسمها كله كان مكسر وعينيها منفوخة ومبرقشة من كتر عياط طول الليل قامت ببطء وهي حاسة إن رجليها مش شايلالها وخرجت الصالة لقت الهدوء مغرق المكان لكنه هدوء يخوف زي هدوء المقابر

 ابراهيم مكنش في الصالة بس صوت حركته جوة الأوضة التانية كان باين إنه بيجهز علشان ينزل يخلص ورق الجواز والترتيبات اللي أمه استعجلته فيها

هيام مشيت بخطوات تقيلة ووقفت على باب الأوضة ولقت ابراهيم واقف قدام المراية بيلبس قميصه وإيديه كانت بترتعش وهو بيقفل الزراير مكنش قاد حتى يبص لشكله في المراية من كتر الخزي والكسرة اللي حاسس بيها أول ما حس بوجودها لف ليها بسرعة وشه كان باهت وتحت عينيه أسود من قلة النوم بص لها بنظرة كلها أسف وخوف لكن الأسف مكنش كفاية يداوي الجرح الكبير اللي في قلبها

هيام دخلت الأوضة ودموعها بدأت تنزل تاني من غير صوت وقفت قريبة منه وبصت في عينيه بكل وجع وقالت بصوت متقطع ومخنوق :

بلاش تكسر بيا يا ابراهيم بلاش تعمل فيا كده دي هتبقي اخر محاولة مني ليك أنا بقالي تلات سنين ماليش في الدنيا دي غيرك وإنت عارف إني ملهاش حد الجوازة دي لو تمت هتكون النهاية اللي بينا بلاش تبيعني علشان خاطر ترضي حد حتى لو كانت أمك إحنا ياما حلمنا سوا وياما قولنا إننا هنكمل مهما حصل ليه بتهد كل ده في لحظة

ابراهيم اتوتر جداً وكلامها هز كيانه من الجوة ايديه اتجمدت على زراير القميص ونظرة الخوف ظهرت في عينيه بوضوح مكنش متوقع إن هيام الهادية الضعيفة اللي ملهاش ضهر ممكن تتكلم بالقوة دي أو تلمح إنها ممكن تضيع منه قرب منها وحاول يمسك كتفها وصوته كان مرعوب

ابراهيم :

يعني إيه اخر محاولة يا هيام يعني إيه الكلام ده إنتي ناوية على إيه إنتي هتسيبني وتامشي إنتي عايزة تتخلي عني وتضيعي حبي ليكي علشان خاطر نزوة أو ظروف غصب عني أنا بحبك وإنتي عارفة كده كويس ومقدرش اتخيل حياتي من غيرك ثانية واحدة إنتي مش هتمشي وتسبيني صح

هيام بصت لإيديه اللي على كتفها وضحكت بمرارة وكسرة :

أنا اللي بتخلى عنك برضه يا ابراهيم ولا إنت اللي سبت إيدي في أول مطب وقررت تجيب عليا واحدة تانية وتقعدها في شقتي وتنزلي تحت أبقى خدامة أنا عمري ما فكرت أسيبك لكن إنت اللي بتجبرني أشوف نهايتي معاك

ابراهيم مسح على وشه بتوتر وخوف شديد وحاول يهدئها ويطمن نفسه بكلام هو نفسه مكنش مصدقه وقرب منها أكتر وقال بصوت واطي ومليان رجاء :

يا هيام افهميني أرجوكي هي جوازة والسلام أنا وافقت بس علشان أسكت أمي وأخلص من زنها اللي مابينتهيش إنتي عارفة إنها تعبانة ومش هتبطلي كلام غير لما تشوف ليا عيل أنا هروح اتجوز بنت اختها دي وأخلف منها العيل الصغير ده وأول ما الطفل يتولد هطلقها على طول علام طلاقها مش هياخد في إيدي ثانية واحدة وبعدها نعيش إحنا الاتنين في سلام وأمان ومحدش هيقدر يفتح بقه معانا تاني الشقة هترجع ليكي وكل حاجة هتبقى تمام وافقي بس عدي الأيام دي علشان نخلص

هيام بصت له بنظرة كلها خيبة أمل وبقت شايفاه غريب عنها مكنتش مصدقة إن ده الراجل اللي حاربت الدنيا علشانه وقالت له بكل حسم وجفاء :

إنت اللي اختارت يا ابراهيم وإنت اللي حددت طريقنا من النهاردة وطالما وافقت على اللعبة دي يبقى اتقدم واشرب مرارها لوحدك ومتبقاش تستنى مني حاجة تانية خلاص

سابته واقف في مكانه زي الصنم وخرجت برة الأوضة بكل كبرياء مكسور بدأت تلم حاجاتها البسيطة في شنطة صغيرة مخدتش معاها غير لبسها الأساسي وبعض الحاجات اللي تخصها وملمستش أي حاجة من عفش الشقة أو جهازها اللي تعبوا فيه سحبت الشنطة وفتحت باب الشقة وبصت وراها بصه أخيرة كلها وجع ودموع ونزلت السلم بخطوات تقيلة وكل خطوة كانت بتدوس على قلبها لحد ما وصلت لدور الأرضي ووقفت قدام شقة حماتها الحما صباح

ابراهيم جوة الأوضة سمع صوت قفل الباب ورزعته قلبها دق بعنف وخوف حقيقي جرى وراها لحد الصالة ولقاها مشيت نزل وراها بسرعة وبص من منور السلم لقاها بتخبط على باب أمه اتنفس الصعداء وحس براحة غريبة بدأت تتسلل لقلبه الخوف اللي كان جواه بدأ يختفي وحل محله شعور بالاطمئنان الأناني فضل واقف مكانه فوق وقال لنفسه وهو بيطمن روحه :

الحمد لله هيام ملهاش حد برضه ومش هتقدر تبعد عني أكيد راحت شقة أمي علشان تقعد هناك هي ملهاش مأوى تاني ولا سند في الدنيا دي وهيام بتحبني ومستحيل تستغني عني بكره الأمور تهدى وهي هتقبل بالوضع وتعرف إني بعمل كل ده علشان مصلحتنا سوا وعلشان نعيش في سلام بعد كده

في نفس الوقت تحت الباب اتفتح والحما صباح وقفت وبصت لهيام وبصت للشنطة اللي في إيديها وابتسمت ابتسامة نصر وسخرية وقالت لها :

أهو كده تعجبي العقل زينة برضه يا بت الناس وعارفة مصلحتك كويس ادخلي ادخلي برجلك اليمين زمانك عرفتي إن مفيش ليكي مكان غير هنا وإن كلامي هو اللي هيمشي في الآخر

هيام دخلت الشقة من غير ما تنطق ولا كلمة حطت الشنطة في الصالة وقعدت على الكنب القديم وهي حاسة إن روحها بتتسحب منها حماتها سابتها ودخلت المطبخ تعمل شاي وهي عمالة تغني وتدندن بفرحة واضحة بسبب النصر اللي حققته وكسرة نفس البنت اليتيمة اللي ملهاش ضهر

ابراهيم فوق لبس هدومه ونزل وهو حاسس بنوع من الرضا المزيف دخل عند أمه وبص لهيام اللي كانت قاعدة باصة للأرض ومش مدياله أي اهتمام ولا حتى رفعت عينها فيه أمه أول ما شافته قالت له بضحكة عالية :

تعال يا عريس تعال اشرب الشاي معايا علشان ننزل نشتري الشبكة لبنت خالتك ونخلص كل حاجة النهاردة العروسة مستنياك بفارغ الصبر وابوها موافق على كل الشروط الشقة فوق جاهزة وزي الفل

ابراهيم بص لهيام بنظرة خاطفة مكنش قادر يطول فيها وقال لأمه بصوت هادي :

ماشي يا أمي يلا بينا علشان نخلص كل حاجة بسرعة ومناخرش الناس معانا

نزل ابراهيم مع أمه وسابوا هيام لوحدها في الشقة الضلمة دي الكآبة كانت مالية المكان وهيام كانت حاسة إنها بتموت بالبطيء تفتكر الأيام الحلوة اللي عاشتها مع ابراهيم وازاي كان بيخاف على زعلها ودلوقتي سابها ورايح يشتري شبكة لواحدة تانية والكل فرحان على حساب دموعها وقهرتها قعدت تضم نفسها وتبكي في صمت وهي بتدعي ربنا يخرجها من المحنة دي على خير لأنها مبقتش قادرة تتحمل كل الوجع ده لوحدها

الأيام كانت بتمر على هيام جوة شقة حماتها صباح زي الجحيم مفيش ليلة بتعدي عليها من غير ما دموعها تبِل مخدتها الحزن مكنش بيارقها ثانية واحدة وهيام شايفة كل ترتيبات الفرح بتحصل قدام عينيها الحما صباح مكنتش بترحمنا كانت كل يوم تطلب منها تنضف وتعمل أكل وتجهز مع الماشيين وال جايين علشان فرح ابراهيم الوحيد وابراهيم كان بيجي الشقة ويخرج وعينه مابتجيش في عين هيام خالص من كتر الكسرة والخوف اللي جواه لكنه كان دايما يطمن نفسه إنها طالما قاعدة في البيت ومستحملة يبقى خلاص رضيت بالأمر الواقع وهيام كانت ساكتة خالص ومابتتكلمش بس السكوت ده مكنش رضا ده كان الهدوء اللي بيسبق العاصفة

لحد ما جه يوم الفرح والشقة فوق اتفرشت على ذوق العروسة الجديدة نانسي اللي كانت فرحانة ومبسوطة إنها أخدت كل حاجة على الجاهز الفرح اتعمل وهيام قاعدة تحت في ضلمة الأوضة وسامعة صوت الأغاني والزغاريط اللي كانت بتدبح في قلبها وكل زغروتة بتترمي كانت بتنزل على كرامتها زي السكينة فضلت تدعي ربنا يربط على قلبها لحد ما الفرح خلص والناس مشيت وابراهيم طلع شقته الجديدة مع نانسي وفضلت هيام لوحدها مع دموعها وذكرياتها اللي ماتت في ليلة وضحاها

تاني يوم الصبح والشمس لسه بتطلع ابراهيم صحي من النوم وبص لنانسي اللي كانت لسه نايمة حس بغربة شديدة جوة شقته اللي اتغيرت ملامحها ومبقاش فيها ريحة هيام اللي بيحبها الشوق والخوف من إنه يكون خسر هيام بجد ملوا قلبه ومقدرش يستنى ثانية واحدة قام بسرعة من غير ما يعمل صوت ولبس هدومه ونزل السلم يجري ودخل شقة أمه بالمفتاح بتاعه وراح علطول على الأوضة اللي قاعدة فيها هيام فتح الباب وبص عليها لقاها قاعدة على السرير وصاحية وعينيها دبلانة أول ما شافها جرى عليها وقعد تحت رجليها ومسك إيديها وبدأ يعيط زي العيل الصغير

ابراهيم :

والله العظيم ما قادر أعيش من غيرك يا هيام أنا مانمتش طول الليل وكل تفكيري كان معاكي أنتي هنا تحت وأنا فوق مش طايق نفسي ولا طايق الشقة الجديدة ولا نانسي أنتي مراتي وحبيبتي والوحيدة اللي في قلبي أنا نزلت ليكي علطول في الصباحية علشان أقولك إنك دنيتي كلها ومستحيل وحدة تانية تأخد مكانك في قلبي وافقي بس نعدي الفترة دي وأنا هعملك كل اللي أنتي عايزاه

هيام بصت له ببرود ونفضت إيدها من إيديه بكل قسوة وجفاء وقالت بصوت هادي وميت :

إبراهيم إنت خلاص مبقاش ليك مكان في حياتي ونزولك ليا النهاردة في يوم زي ده بيثبت إنك مابتفكرش غير في نفسك وبس اطلع لعروسك يا إبراهيم ومتورينيش وشك تاني

إبراهيم اتصدم من برودها وحس إن الأرض بتلف بيه ولسه هيتكلم سمعوا صوت برة في الصالة كانت نانسي العروسة الجديدة صحيت وملقتش جوزها جنبها في السرير ونزلت تدوّر عليه وسمعت صوته وهو في أوضة هيام نانسي دخلت الأوضة وعينيها كانت مليانة غيرة وغل لما شافت إبراهيم وهو قاعد على الأرض قدام مراته الأولى وبيرجوا فيها بالمنظر ده نانسي زعقت وصوتها طلع

نانسي :

جرى إيه يا إبراهيم إحنا في صباحيتنا وسايبني فوق لوحدي ونازل تقعد تحت رجل الهانم اللي مابتخلفش دي هي دي الأصول برضه اللي أمك قالت لي عليها

ابراهيم قام بسرعة ووشه جاب مية لون وبقى متوتر جداً وزق نانسي لبرة الأوضة وقال بصوت حاد :

اطلعي فوق يا نانسي حسابنا فوق مش هنا ومتقليش أدبك على هيام فاهمة ولا مش فاهمة

نانسي اتغاظت جداً لما لقت إبراهيم بيدافع عن هيام بقوة ولسه متمسك بيها وبحبها ورفضت تطلع وفضلت واقفة في الصالة وبصت لهيام اللي خرجت وراهم بكل ثبات وبرود نانسي ضحكت بسخرية وقالت لهيام بكل غل :

أنتي فاكرة إبراهيم لما اتجوزك زمان كان علشان بيحبك وميت في دباديبك تبقي عبيطة والله العظيم أنتي متعرفيش حاجة خالص عن حقيقة جوزك ده ومخدوعة فيه من أول يوم ولسه هتقول وتكشف المستور

 الباب اتفتح بسرعة ودخلت الحما صباح

الحما صباح وشها اصفر واتوترت جداً أول ما سمعت كلام نانسي وجريت عليها وقطعت كلامها وزقتها بكل قوتها وقالت بصوت عالي ومرعوب :

اسكتي يا بت أنتي واخرسي خالص واطلعي فوق شقتك يلا إيه الكلام الفارغ اللي بتقوليه ده إنتي لسه عروسة جديدة وماتعرفيش حاجة اطلعي فوق مع جوزك ومسمعش صوتك تاني خالص

هيام بصت لصباح واستغربت من توترها وخوفها الشديد اللي ظهر فجأة وإبراهيم نفسه وقف مرعوب وعينه جت في عين أمه ونظرات الخوف المتبادلة بينهم كانت واضحة جداً كأن 

نانسي كانت هتقول السر الكبير اللي محدش يعرفه غير الحما صباح وابنها إبراهيم والسر ده لو انكشف هيهد الدنيا فوق دماغهم وهيام وقفت في مكانها تبص عليهم بشك وريبة وبدأت تسأل نفسها إيه هو السر اللي إبراهيم وأمه مخبينه عنها طول السنين دي وازاي نانسي تعرفه