رواية المتبرجة الفصل الثالث 3 بقلم محمود الأمين

 



رواية المتبرجة الفصل الثالث بقلم محمود الأمين




المفاجأة إن البطاقة كانت باسم خالد جمعة.. وأول ما قريت الاسم، كنت مصدوم وبسأل نفسي: هو أنا إزاي ما أخدتش بالي من الاسم في التحريات؟

خالد يبقى ابن الأستاذ جمعة ومدام سارة، واللي المفروض ماتوا في الحريق من 10 سنين.. لما لقينا عيلة مكونة من أب وأم وطفل صغير عنده 8 سنين، متوفيين إثر حريق قوي حصل في البيت، ومات في الحريق ده الأستاذ جمعة ومدام سارة وابنهم خالد.

ولكن بعد مرور 10 سنين، بنكتشف إن مدام سارة لسه عايشة، وبتشتغل رقاصة مع فرقة بتقدم شو شرقي في مختلف الفنادق، وإنها غيرت اسمها من سارة راضي لسوزي أبو الدهب.

ولكن إحنا بنعرف المعلومة دي بسبب إن سوزي أبو الدهب بتكون اتق.تلت، والطعنات اللي كانت موجودة في جسمها، بجانب الحريق اللي حصل في البيت وقتها، هما اللي خلوني أشك وأربط الحادثة اللي حصلت زمان بالحادثة دي.

واللغز اللي كان محيرنا وواقف معانا كان عامل دليفري اسمه خالد، وهو المفروض اللي بيرتكب الجرايم، وكل القرائن كانت بتقول كده. ودلوقتي أنا واقف وقدامي جث.ة متفحمة، المفروض إنها لخالد جمعة، عامل الدليفري اللي إحنا بندور عليه، وفي بطاقة جنبه على الأرض بتأكد الهوية.

ولكن هل دي جث.ة خالد فعلًا ولا حد تاني؟!

من خلال أقوال بواب العمارة، عرفنا إن خالد ساكن في الشقة دي لوحده ومش معاه أي حد، وكان مبلغ بواب العمارة إنه هيسيب الشقة الصبح. ولما سألنا بواب العمارة: هل في حد كان بيتردد على خالد؟ وكانت إجابته: لا. وقال إن خالد كان كلامه قليل وفي حاله، وكل اللي يعرفه عنه إنه شغال تبع شركة طلبات للتوصيل، وكان بيشتغل دليفري.

رجالة الطب الشرعي والمعمل الجنائي وصلوا للمكان، وبدأ فحص الجث.ة المبدئي والشقة. ومن حسن حظنا إن نسبة الحروق اللي كانت في الجث.ة ممكن تكون هي السبب في الوفاة، ولكن دكتور الطب الشرعي رجّح إنها موصلتش للأنسجة، يعني هيقدر ياخد من الجث.ة عينة DNA.

والسؤال اللي كان بيدور في دماغي وقتها: مين الشخص اللي بيعمل كل ده؟!

أنا اتأكدت دلوقتي إن اللي حصل من 10 سنين كان بفعل فاعل، بس بما إن خالد كان عايش ووالدته سارة كانت عايشة، هل ده معناه إن الأستاذ جمعة هو عايش كمان ولا لأ؟

دماغي كانت هتنفجر من كتر التفكير، عشان الموضوع فيه لغز ولازم نوصله.

ولو هنفترض إن خالد هو اللي ق.تل والدته مدام سارة، فإحنا لازم نحط في اعتبارنا إن الطب الشرعي قال إن مدام سارة اتعرضت للاعتداء، وأظن يعني إن مش ابنها هو اللي عمل كده.

ولكن أنا مشيت مع الافتراضية إن خالد هو اللي ق.تل والدته، والدليل على ده قربه من صفاء وسؤاله الدائم عنها، واللي واضح إنه أخد صفاء طريق عشان يوصل بيه لوالدته.

وبعد ما دورها خلص.. خلص منها هي ومدحت، اللي اتفاجئ بيه يومها وهو عندها في الشقة. ولكن من سوء حظه إن مدحت لسه عايش، وأكيد هنعرف منه مين اللي عمل كده.

لحد دلوقتي السيناريو ماشي تمام.. لكن مع ظهور الجث.ة دي، اللي بنسبة 90% هي جث.ة خالد، كده الحسبة اتلخبطت، وده معناه إن في شخص مجهول هو اللي بيحرك اللعبة دي.

ولما خرجنا بره العمارة بعد ما الرجالة خلصت شغلها، اكتشفنا إن المنطقة ما فيهاش أي كاميرات تعرفنا إذا كان في حد غريب طلع الشقة عند خالد ولا لأ؟!

والمعمل الجنائي قال إن الحريقة حصلت بسبب انفجار أنبوبة غاز.

يعني وارد تكون حادثة قضاء وقدر، مش لازم تكون جريمة ق.تل، رغم إني شايف إنها صدفة صعب إنها تحصل.

المهم إن الجث.ة اتنقلت للطب الشرعي، وعشان نتأكد إذا كانت الجث.ة دي ترجع لخالد ولا لأ، أخدنا منها بصمة عشان نقارنها بالبصمة المدممة اللي كانت موجودة في بيت مدام سارة اللي اتق.تلت فيه.

وطبعًا لو البصمة دي طلعت مطابقة، يبقى اتأكدنا إن الجث.ة دي تبقى جث.ة خالد.. ولو طلعت مش مطابقة، يبقى دي جث.ة شخص تاني.

بس في الحقيقة، إحنا ما انتظرناش كتير، عشان بعد ساعات في واحدة راحت وعملت محضر تغيب في القسم، والست دي اسمها نعمة، وكانت بتقول إن جوزها اللي بيشتغل في شركة طلبات مختفي، وما فيش حد يعرف عنه حاجة.

وجوزها ده اسمه سمير أبو الفضل.

ومن خلال التحريات السريعة اللي عملناها، والتحقيقات اللي عملناها مع الناس اللي شغالة في الشركة، عرفنا إن سمير أبو الفضل كان قريب جدًا من خالد.

وطبعًا ساعتها بنكون شاكين إن الجث.ة اللي كانت في البيت دي هي جث.ة سمير، رغم إن البواب ما شافش حد طالع عند خالد.

وعشان كده طلبنا منها لو والده لسه عايش تكلمه وييجي على القسم، عشان هيتحول على المعمل الجنائي وهيتم أخد عينة DNA منه.

والست ساعتها فهمت إننا لقينا جث.ة وشاكين إنها جث.ة جوزها.

وقتها الست على طول طلعت تليفونها واتصلت بحماها، وطلبت منه ييجي على القسم. وفعلاً تم أخد العينة منه، وكان الطب الشرعي استخرج عينة من الجث.ة، والعينتين اتبعتوا للمعمل عشان يشوفوا في تطابق ولا لأ؟

ومن حسن حظنا إن نتيجة العينة والبصمات ظهروا في وقت واحد، والاتنين اتفقوا على حاجة واحدة: إن الجث.ة دي بترجع لسمير أبو الفضل.

تقارير البصمات قالت إن البصمة لا تتطابق مع بصمة الجث.ة، وتحليل العينة طلع إيجابي إن الشخص ده اللي لقينا جث.ته يبقى ابن الأستاذ أبو الفضل.

وطبعًا الست نعمة وقتها انهارت من العياط ووقعت من طولها، واتنقلت على المستشفى.. نفس المستشفى اللي كان فيها مدحت.

وأول ما وصلت هناك، لقيت الدكتور بيبلغني إنه كان لسه هيتصل بيا عشان الأستاذ مدحت فاق وقادر يتكلم، يعني نقدر نحقق معاه دلوقتي ونعرف الحقيقة.

وأول ما دخلت الأوضة عنده وبدأت أتكلم معاه، فضل يحلف إنه أول ما دخل الشقة لقاها مقت.ولة، وإنه فعلاً مسك السكينة بإيده، لأن السكينة كانت لسه في جسمها.

ولكن فجأة حس بضرب على دماغه، حاول يتماسك ويطلب طوله، وساعتها شاف عامل الدليفري ده واقف قدامه وزقه، وساعتها وقع على الركن، وبعدها الدنيا ضلمت ومش فاكر أي حاجة تاني.

السيناريو اللي بيحكيه كان منطقي، ولكن إحنا لسه عاوزين نفهم: إزاي خالد ده عايش؟

خالد عايش ووالدته كانت عايشة، وأكيد الأستاذ جمعة هو كمان عايش، وده بيخلينا نسأل سؤال واحد: لما الناس دي عايشة.. أومال الجثث اللي اتفحمت في البيت من 10 سنين تبقى جثث مين؟

كنت قاعد في مكتبي وعقلي هينفجر من التفكير، ولكن في الوقت ده العسكري بلغني إن في واحدة عاوزة تقابلني ضروري.

طلبت منه يخليها تدخل، وساعتها دخلت واحدة في الأربعينات من عمرها، شكلها هانم، وعرفتني بنفسها إن اسمها مدام شريهان.

وعرفت منها إنها كانت عايشة في الكويت، والكلام اللي قالته كان في منتهى الغرابة.

قالت إن في واحدة صاحبتها معاها في الكويت اسمها ماجدة، وكانت متجوزة واحد اسمه كمال، وعندهم طفل اسمه أسامة.

وكل اللي كانت تعرفه عن ماجدة إن ليها أخت ساكنة في مصر اسمها سارة.

وماجدة كانت متعودة تنزل إجازة سنوية هي وجوزها وابنها، وفي الإجازة دي بالذات، ماجدة قالت لشريهان إنها بدأت تشطب الشقة اللي في مصر عشان هيستقروا هناك، وإن الإجازة دي هتقضيها في بيت أختها سارة، بس هترجع الكويت مرة كمان عشان تلم كل حاجتها وتنهي التعاملات اللي معاها هناك.

وفعلاً ماجدة وعيلتها نزلوا مصر، ولكن ما رجعوش، وأخبارهم اتقطعت من ساعتها.

ولكن بعد فترة عرفت إن البيت بتاع أختها سارة ده حصل فيه حريقة، وسارة وجوزها وابنها ماتوا. وبسبب الالتزامات اللي معاها في الكويت، ما قدرتش تنزل، لأنها كانت مستقرة هناك وما لهاش مكان في مصر.

ومن فترة صغيرة حصلت معاها شوية مشاكل واترحلت على مصر، وأول حاجة عملتها أول ما نزلت إنها بدأت تدور على ماجدة وعيلتها، وعشان كده هي جاية تفهم إيه اللي حصلهم!

...

طبعًا السيناريو اللي حكيته مدام شريهان كان بيحل اللغز اللي فضل مستخبي 10 سنين.

واضح إن اللي ماتوا في البيت وجثثهم اتفحمت يبقوا الأستاذ كمال ومدام ماجدة وابنهم أسامة.

بس المعمل الجنائي أكد وقتها إن الحادثة بفعل فاعل، وإن في شبهة جنائية في الموضوع.. هل ممكن تكون مدام سارة هي اللي ارتكبت الجريمة؟!

وفي الوقت اللي كنت بتكلم فيه مع مدام شريهان، وصلتنا إخبارية بمكان خالد جمعة.

واحد من المخبرين شافه في منطقة، وكان داخل بيت قديم، وعرف من أهل المنطقة اللي هناك إن خالد ساكن في البيت ده من يومين.

وعلى طول اتحركت ومعايا قوة من القسم على البيت ده عشان نقبض على خالد ونفهم الموضوع.

ولكن لما وصلنا البيت ودخلنا، كان في انتظارنا صدمة غير متوقعة، وهتقلب موازين القضية..

والصدمة دي هي..


شكرا لزيارتكم عالم روايات سكيرهوم

تعليقات