رواية حكاية لم ينهيها الفراق الفصل الثاني
افتحوا البوابة يا ولاد! شاهين بيه دخل حدود البلد!
الصوت دوّى قدام الدار الكبيرة والرجالة اللي كانوا قاعدين في المضيفة قاموا مرة واحدة واحد عدّل عِمّته والتاني جرى ينادي الحاج جابر والتالت وقف عند البوابة الحديد يتابع العربية السودا اللي كانت جاية من آخر الطريق.
جابر بص من شباك المضيفة ولما لمح العربية وقف فجأة قال بصوت جهوري:
يا مرحب يا مرحب! وسّعوا الطريق يا رجالة ده الغالي رجع لأهله!
واحد من أولاد العيلة: يا حاج ده شاهين بيه بنفسه! والله ما كنت مصدق إنه هينزل البلد بالسرعة دي بعد وفاة عمي الله يرحمه.
جابر بحدة: شاهين ده ولدي قبل ما يكون ولد اخوي واللي يقول غير اكده يبقى ما تفهمش يلا يا ولد افتح البوابة زين!
العربية دخلت الحوش ووقفت قدام السلم العريض ونزل السواق بسرعة عشان يفتح الباب لكن الباب اتفتح من جوه ونزل شاهين بنفسه وكان لابس قميص أسود وبنطلون كلاسيك وكتافوا العريضه وملامحه الوسيمه خلت الكل كانوا متنحين وملامح حادة ما فيهاش ابتسامة سهلة وقف وبص للدار اللي سابها من أكتر 15 سنه وكأن كل حجارة في البيت الكبير بتحكي حكايه كبيرة.
جابر نزل السلم على عجل وفتح دراعاته وهو بيقول: يا ولد أخوي يا اللي توحشتك! يا ولدي يا اللي غبت غيبه طويله ورجوعك نور دارنا !
شاهين دخل في حضنه وطبطب على ضهره بقوة وهو بيقول: حقك عليّ يا عمي والله كل يوم كان بيعدي عليا ما كانش بيستاهل والله بس الظروف جرتني جري ولما رجعت رجعت على خبر وجع القلب.
جابر شدّه بعيد عنه وبص في عينيه وقال: أبوك كان راجل وخلف راجل الله يرحمه ويغفر له. بس اسمعني يا شاهين عمك عبد العليم انا خابر ان هو اللي رباك وهو دلوقت في دار الحق وإحنا كلنا على الطريق! والحزن مش هيروح في يوم وليله يا ولدي لكن ما يصحش نخليه ياكل اللي باقي من عمرنا.
شاهين هز راسه وصوته بقى أخشن وهو بيقول: خابر يا عمي واخر حاجه بيني وبين عمي الله يرحمه لسه بترن في ودني وكل ما أفتكر إني ما لحقتش أشوفه قبل ما يمشي بحس إن في حاجة اتكسرت جوايا ومش خابر أجبرها.
جابر: عمك كان راضي عنك يا ولدي وكان كل ما حد يسأله عنك يقول: شاهين بعيد بجسمه لكن قلبه عمره ما فارقنا ما تحملش حالك ذنب حاجة ربنا كتبها وكمان يا ولد هو بعد عنك وجه مصر سنه واحده علشان كان تعبان وقال يعيش اليومين اللي فاضلين له وسط اهله وناسه وانت كنت قلبه يا شاهين.
شاهين سكت وبعدين باس راس عمه وهو بيقول: ربنا يخليك ليا يا عمي. إنت خابر إنك عندي مش عم وبس.
جابر:خابر إنك ولدي وعشان إنت ولدي لو لقيتك غلطان يوم هوقفك عند حدك ولو لقيت الدنيا كلها واقفة في وشك هقف أنا في ضهرك. دي العشم يا شاهين مش حديت بيتقال والسلام.
شاهين ابتسم ابتسامة صغيرة وهو بيقول: هو ده الحديت اللي وحشني. في أمريكا كانوا بيقولوا لي إن كل مشكلة ليها حل لكن محدش علّمني كيف الواحد يحل مشكلة إنه مشتاق لريحة دار أبوه.
جابر ضحك وطبطب على كتفه وقال: ريحة دار أبوك موجودة يا ولدي والدار دي دارك. ادخل سلّم على أمك دي من يوم ما عرفت إنك نازل وهي مش على بعضها.
وقبل ما شاهين يخطو ناحية السلم ظهر صوت ست جاية من جوه ودي زينب ام شاهين قالت: شاهين! يا شاهين يا ضنايا!
كانت الحاجة زينب نازلة من على السلم وهي مستعجلة والستات وراها. أول ما شافها شاهين اتحرك ناحيتها ولحقها قبل ما تنزل آخر درجة وهو بيقول: بالراحة يا أمايا! هو أنا راجع من سفر ولا راجع من حرب؟ هتقعّي من طولك قبل ما تحضنيني!
زينب مسكت وشه بين إيديها وفضلت تتأمله والدموع بتنزل من عينيها وهي بتقول:
هملني أبص لك يا ولدي هملني أشوفك زين يا صلاة النبي عليك! إنت كنت عيل لما سافرت رجعت لي راجل يملأ العين.
شاهين: عيل إيه يا مايا ده انا كان عمري 18 سنه وكنت بشتغل وكنت كبير بس انتي من وانا صغير وانتي مصممه تعامليني على اني العيل اللي بيخاف من الضلمه؟!
زينب ضربته بخفة على كتفه وهي بتقول: ما تضحكنيش يا واد أنا قلبي لسه واجعني عليك 15 سنه يا شاهين ! 15 سنه ما شفتش فيها وشك إلا من ورا شاشة ولا قدرت أحط إيدي على راسك وأدعي لك.
شاهين انحنى وباس إيدها وهو بيقول: ادعي لي دلوك يا أمايا وأنا قدامك أهو. ادعي إن ربنا يصلح حالي ويغفر لأبوي ولعمي كمان لانه محتاج دعواتك ويبارك لي في عمري اللي باقي.
زينب: ربنا يرضى عنك يا ضنايا ويجبر خاطرك وما يحرمنيش منك تاني.
قربت منه عماته وبدأت السلامات والأسئلة وكل واحدة عايزة تعرف أخباره لكنه كان بيرد باختصار وعينه كل شوية تروح ناحية باب الدار كأنه مستني حد يدخل.
عمته صفية: مالك يا شاهين؟ إنت واقف تدور على إيه؟ ولا أمريكا خلتك ما تعرفش تقعد مع حريم العيلة خمس دقايق؟
شاهين ابتسم هو بيقول: لا يا عمة أمريكا ما سوتش فيا اكده بالعكس لو كانت اتغيرت كانت خلتني غيرت لهجتي بس انا حاسس اني ناقص حد اهنا ومش هرتاح غير اما اشوفها.
زينب مسحت دموعها وابتسمت وهي بتقول:
يا حبة عيني إنت لسه فاكرها!
شاهين لف لها بسرعة هو بيقول: أمال أنساها كيف؟ هي وين ميساء؟ وين البت اللي اتولدت بعد ما سافرت انا خابر يا مايا ان ابويا توفى وانتي حبله فيها؟! وانا ما لحقتش اشوفها قبل ما اسافر وكانت اما بتحدتني كانت بتتنطط على الكنب وعلى طول بتدور على شبشبها ورا الباب؟! وينها القردة الصغيرة؟
عمته صفية ضحكت بصوت عالٍ وهي بتقول:
يا ساتر يا رب! دي لو سمعتك بتقول عليها بت صغيرة ولا قردو كانت خربشت لك وشك! البت كبرت يا شاهين وما عادتش كيف ما إنت فاكرها.
شاهين: كبرت كيف يعني؟ كبرت وبقت ست البيت؟
زينب: ميساء في المدرسة يا ولدي في تالتة إعدادي والامتحانات قربت عشان اكده ما رضيتش أخليها تغيب النهارده.
شاهين سكت لحظة وبعدين سألها بجدية:
تالتة إعدادي؟ يعني أنا سايبها في بطنك يا مايا جيت وهي جربت على الثانويه ده انا طولت قوي؟!
زينب: العمر ما بيستناش حد يا ولدي.
شاهين بص ناحية البوابة مد إيده للسواق وقال: هات المفتاح يا عم رجب.
جابر عقد حاجبيه وهو بيقول: على ين يا شاهين؟ إنت لسه واصل ما قعدتش حتى تشرب لك شربة مية!
شاهين: رايح أجيب خيتي يا عمي انا عمري ما شفتها هتجنن عليها مش هقدر استنى لحد ما ترجع من المدرسه انا هروح واجيبها بنفسي؟
جابر هز راسه وهو بيضحك وقال: يا ولدي هي مش هتهرب منك روح يا سيدي بس سوق على مهلك مش رايدين البلد كلها تسمع إن شاهين رجع وبدأها بمصيبة.
شاهين فتح باب العربية والتفت لأمه وقال: خمس دقايق وأكون جايبها لك يا أمايا حضريلي كل الحاجات اللي بحبها يا غاليه.
زينب: ربنا يحفظك يا ولدي وخلي بالك من حالك وانا مجهزهلك كل حاجه من عشيه والله .
شاهين ركب العربية وانطلق وساب وراه الدار فرحانه برجوع وراح المدرسه من غير ما يعرف ان المشوار اللي يريح له هيبقى بدايه حكايه جديدة هو مش عامل حسابها.
قدام المدرسة الإعدادية البنات كانوا واقفين في مجموعات صغيرة وكل واحدة بتحاول تخلص كلامها قبل ما ترجع بيتها
ميساء كانت واقفة مع صاحباتها بتقلب في كشكولها لما سلمى لمحت العربية السودا وهي بتقرب قالت : يا بنات! بصوا على العربية دي! دي داخلة المدرسة ولا داخلة تاخد المديرة وياها في حته تانيه يا لهوي عربيه جامده قوي؟
هند: يا بت اسكتي يمكن ولي أمر واحدة من البنات.
سلمى: ولي أمر مين بس؟ ده لو ولي أمري جه بالعربية دي أنا هطلب منه يفضل واقف قدام المدرسة طول السنة!
شروق بصتلها ورفعت حواجبها وقالت: يا سلمى إنتِ لو ذاكرتي نص ما بتتحدتي كان زمانك خلصتي المنهج كله.
سلمى: يا شيخة اتلهي! هو أنا ناقصاك انتي كمان ؟ أهو يومنا خلص هملينا نفرح شويه يا ست الشيخه؟!
شروق: افرحي يا ستي بس ما تنسيش إن عندنا امتحان بكرة والمدرسة مش هتديكي درجة على جمال أحلامك.
ميساء ضحكت لكن ضحكتها وقفت أول ما باب العربية اتفتح وشاهين نزل ووقف قدام البوابة وعينه بتدور على الوجوه الصغيرة وبيدور ما بين البنات وبيقول: ميساااء!
ميساء رفعت راسها وأول ما شافته الكشكول وقع من إيدها وهي بتقول: شاهين؟!🤔
ميساء كانت تعرف شكل شاهين لانها كانت بتشوف صورة وكمان كانت بتكلمني فيديو شاهين فتح دراعاته وقال: أيوه يا بت! هو إنتِ هتفضلي واقفة تبصي لي من بعيد؟ تعالي اهنا!
ميساء جريت ناحيته وهي بتعيط ورمت نفسها في حضنه وهي بتقول:
إنت جيت يا شاهين! والله إنت جيت بجد!🥹
شاهين ضمها بقوة وصوته اتغير وهو بيحاول يداري تأثره وقال: أيوه يا قلب أخوكي جيت. تعالي أشوفك زين. يا نهار أبيض! هو إنتِ كنتِ مخبية الطول ده وين؟ ده أنا كنت فاكر انك في رفع يدي بس ما شاء الله بقيتي عروسه صور ظلمتك يا بت ابوي؟
ميساء ضربته على صدره وهي بتعيط وتضحك في نفس الوقت وبتقول :
بطل تضحك عليّ! إنت خابر أنا كنت مستنياك قد إيه؟ كل مامايا تقول لي إنك ممكن تنزل كنت أفضل أبص على البوابة كل يوم.
شاهين ملامحه هدأت وهو بيقول: حقك عليّ يا ميساء. أنا خابر إن الغياب طال بس والله إنتِ ما غبتيش عن بالي. كنت كل ما أشوف حاجة تفرح الأطفال أقول يا ترى ميساء بتحبها؟ ولما أشوف بت صغيرة ماشية مع أخوها أقول يا ترى خيتي كبرت وبقت بتمشي ولا بتجري ولا بتتنطط ولا بتسوي إيه وكنت بقول يا بخته احمد لان وياكي على طول ؟
ميساء رفعت وشها وقالت: كنت نفسي تكون موجود يوم حفلة المدرسة ويوم نجحت ويوم تعبت ويوم كنت بعيط من غير سبب. كنت نفسي يبقى عندي أخ قريب مني احكي له اسراري انت خابر ان احمد جد كنت بخاف احكيله حاجه عشان اكده كنت باجي اكلمك فيديو واحكيلك كل اللي بيحصل وياي.
شاهين مسح دموعها وقال: من النهارده احكي يا ستي انا قاعد وياكي مش ههملك واصل بس بشرط.
ميساء: إيه هو الشرط يا اخويا؟
شاهين: ما تعيطيش على حاجة فاتت لاني بقيت موجود ومش هملك يا جميل.
ميساء ضحكت و مسكت إيده وقالت: طب تعالى سلم على صاحباتي انا حكيت لهم عنك كثير!
شاهين بص للبنات اللي كانوا واقفين وكل واحدة فيهم بتحاول تتظاهر إنها مش مركزة معاه ميساء قالت: دي سلمى ودي هند، ودي شروق إحنا كلنا في فصل واحد وهنمتحن آخر السنة سوا.
شاهين أومأ برأسه بأدب وقال: أهلًا وسهلًا يا بنات. ربنا يوفقكن في الامتحانات ويكتب لكن النجاح.
سلمى بسرعة: الله يسلم حضرتك يا أستاذ شاهين.
هند: ميساء ما قالتلناش إن عندها أخ غير احمد هو احمد الكبير ولا هو!
ميساء: يا بنتي أنا قلتلكن عندي أخ مسافر هو انا لازم أوصفه لكُنّ يعني؟
سلمى: أيوه طبعًا! كان لازم تقوليلنا إن أخوكي طويل وعريض اكده!
شاهين ضحك وبعدين قال: يعني لو كنت قصير ما كنتوش هتسلموا عليّ؟
هند اتكسفت،والبنات ضحكوا لكن شروق فضلت ساكتة وقفت على جنب وكانت بتراقب ميساء وهي سعيدة.
شاهين لاحظ إن واحدة من البنات مش بتشارك في الزحمة لكنه ما علّقش.
شاهين: طيب يا ميساء يلا بينا أمك مستنياكي والدار كلها مستنياكي.
ميساء: حاضر بس البنات هيروحوا من اهنا لوحدهم وأنا لازم أطمن إن كل واحدة فيهم وصلت لأهلها.
شاهين: كل واحدة اكيد حد هيجي ياخدها.
سلمى همست لهند:
يا خسارة! كنت رايده أشوف العربية من جوه.
هند: يا بت،اسكتي قبل ما يسمعك!
لكن ميساء سمعتهم فالتفتت ليه هم قالت: اللي رايده تشوف العربية،تشوفها من بره. محدش هيركب مع أخويا وكل واحدة فيكم تعاود كيف ما جت يلا يا بنات؟!
شاهين بص لأخته بإعجاب واضح وقال: هو ده الحديت يا بت ابوي اللي على الاصول اهلنا وعددنا وتقاليدنا؟!
ميساء ابتسمت بفخر ولفتت ناحية شروق وقالت: شروق إنتِ أمك جاية تاخدك ولا هتسوي إيه يا خيتي؟
شروق: أيوه قالت لي هتستناني عند أول الشارع. أنا همشي لها.
ميساء: طب استني شوية يمكن تتأخر مش رايداكي توقفي لوحدك.
شروق: لا يا حبيبتي ما ينفعش اهملها تستناني يمكن هي تكون جت وحمد لله على سلامة أخوكي.
شاهين رد باحترام:
الله يسلمك وربنا يوفقك في امتحاناتك.
شروق: آمين وإياكم.
اخذت شنطتها وبعد عن البوابه من غير ما تلتفت وراءها سلمى كانت لسه بتبص ناحية العربية وقالت: يا ميساء هو أخوكي ده هيفضل في البلد؟
ميساء: أيوه إن شاء الله.
هند: طب هو متجوز؟
ميساء فتحت عينيها وهي بتقول: يا بنات! هو انتم هتسووا تحقيق وياه ولا إيه؟ ده أنا لسه ما لحقتش أفرح برجوعه!
شاهين ضحك وفتح لها باب العربية وهو بيقول: اركبي يا ستي قبل ما صاحباتك يخلصوا التحقيق ويطلعوا لي شهادة ميلاد !
ميساء ركبت وهو لف للناحية التانية ركب مكانه،وانطلق بالعربية ناحية الدار.
في الطريق ميساء كانت بتتكلم من غير ما تسكت بتحكي عن المدرسة وصاحباتها والمدرسين وشاهين بيسمعها باهتمام.
شاهين: طب قولي لي مين في صاحباتك دي أقرب واحدة ليكِ؟
ميساء: كلهم بس شروق بالذات. دي صاحبتي من سنين وبنروح لبعض وأمها بتحبني كيف بنتها.
شاهين: هي البت اللي مشيت لوحدها؟
ميساء: أيوه شروق. ليه؟
شاهين: ولا حاجة بس لاحظت إنها ما كانتش رايده تزاحم البنات وكانت هادية وسط الدوشة كلها.
ميساء: شروق اكده فعلًا. مش بتحب تلفت النظر ولا تحب حد يتحدت عنها ولو البنات قعدوا يتحدتوا عن فلوس أو لبس أو عربيا، تلاقيها بتغيّر الموضوع وتسألهم عن المذاكرة.
شاهين: وده شيء زين الواحد مش لازم يجري ورا كل حاجة تلفت العين.
ميساء بصت له بمكر وهي بتقول: أيوه يا سيدي بس إنت كنت بتبص عليها ليه؟
شاهين لف لها بسرعة وقال:
يا بنتي أنا كنت واقف قدام المدرسة وببص على اللي حواليا. هو بقى ممنوع أبص؟
ميساء: لا بس البنات كلهم كانوا رايدين يتحدتوا وياك وهي الوحيدة اللي ما اهتمتش وانت حددتها.
شاهين: وده اللي خلاكي تفتحي الموضوع؟
ميساء: أيوه! هي بتحترم الناس كلها بس ما بتجريش ورا حد عشان غني ولا مشهور ولا عنده عربية غالية هي مش كيف باقي البنات .
شاهين سكت شوية و قال:
ربنا يبارك فيها وفي أهلها البنت اللي تعرف قدر نفسها وتحترم حدودها تستحق الاحترام إنما كل واحد له طريقه والواحد ما يحكمش على حد من موقف واحد.
ميساء: أهو ده اللي كنت رايدة أسمعه منك أصل البنات كانوا هيتجننوا عشان يركبوا وياك وشروق انا خابره ان هي اصلا مش هتوافق؟!
شاهين: و ده الصح يا خيتي إنتِ كمان لو كنتِ مش خيتي ما كنتش هطلب منك تركبي وياي من غير ما أهلك يكونوا خابرين الأصول ما تتغيرش عشان الواحد مسافر ولا راجع من أمريكا انا اه سويت حاجات غلط كتير في حياتي وفي حاجات سيئه بس ربنا يتوب عليا انا ما نسيتش الاصول بردك.
ميساء ابتسمت وقالت : عشان اكده أنا بحبك يا شاهين.
شاهين: وإنتِ لسه شوفتي مني إيه؟ استني بس لما نقعد مع بعض كم يوم!
ميساء: يا نهار أبيض انا متحمسه قوي!
شاهين انفجر في الضحك وقال: دي حكاية تاريخية ولازم تتحكي للأجيال!
ميساء: ربنا يصبرني عليك يا رب!
ضحكوا واستمر الطريق حتى ظهرت بوابة الدار الكبيرة من بعيد كن قبل ما يوصلوا لمح شاهين راجلًا كبيرًا واقفًا جنب الطريق وعربية نقل صغيرة معطلة قدامه وثلاثة شباب واقفين بيتجادلوا معاه.
شاهين هدّى السرعة و وقف.
ميساء: مالك يا شاهين؟
شاهين: استني !هنا.
نزل من العربية واتجه ناحية الرجال وواحد من الشباب كان بيتكلم بعصبية:
يا عم إحنا قلنا لك العربية مش هتتحرك من اهنا إلا لما تدفع اللي عليك. إنت فاكر إنك هتوقفنا في نص الطريق وتمشي؟
الراجل الكبير: يا ولدي والله ما وياي غير اللي يكفي وكل لعيالي و العربية عطلت وأنا ما طلبتش منكم تصلحوها ببلاش بس إنتوا طلبتوا مبلغ ما أقدرش عليه.
شاهين وقف بينهم وقال: في إيه يا رجالة؟
الشاب بص له من فوق لتحت وقال : وإنت مالك يا بيه؟ دي حكاية بيننا وبين الراجل.
شاهين رد بهدوء بارد:
لو كانت حكاية بينكم وبينه كنتوا اتحدتت وياه باحترام إنما ترفع صوتك على راجل كبير في السن دي حكاية تخص أي حد عنده نخوة.
الشاب اتنرفز وقال : إنت جاي تعلمنا الأصول في بلدنا؟
