رواية حكاية حب الفصل الثالث
-عشان هي مش أختي من أب ولا أم، يبقى تخـ.ونـي؟ عادي تخـ.ون أختها اللي اتربت معاها وعاشت معاها تحت سقف واحد؟
-فيه إخوات من أب وأم بيقتلـ.وا بعض، القرابة عمرها ما كانت ضمان للأخلاق. فكّري في إنسانية الإنسان اللي قدامك، في أخلاقه واحترامه وتربيته ودينه، مش في صلة الدم اللي بتجمعكم.
-بس.. بس ليه؟ يغور عمر، وتغور كل حاجة، بس هي تطعنّي كده ليه؟ بتكرهني للدرجة دي ليه؟ ليه عايزة تدمر حياتي؟
أنا اتولدت في الدنيا لقيتها موجودة، يعني هي اللي خدت كل حاجة قبلي؛ الحنان والدلع والحب والاهتمام من أهلي.
شبعت منهم كلهم، وأنا لما جيت كان المفروض نشارك بعض في كل ده، ليه تعاملني كده؟
أنا وعيت على الدنيا لقيتها أختي، مش مجرد بنت عمي. أمي وبابا أخدوها وهي عندها سنة واحدة، بعد ما عمي ومراته ماتوا في حادثة.
أدوها كل حاجة، كل حاجة! عمرهم ما عاملوها على إنها بنت أخوه أو بنت سلفتها، ماما اعتبرتها بنتها الأولى، وأبويا طول عمره بيقول عليها بنتي البِكرية.
فتحوا لها حضنهم وبيتهم، وادوها من الحب والحنان اللي أي بنت تتمناه، عمرهم ما حسسوها إنها غريبة أو إنها أقل مني في حاجة.
إزاي قدرت تخون الإيد اللي اتمدت لها وهي طفلة؟ إزاي قدرت تكسر قلب ناس شالوها من الدنيا وحطوها في عينيهم؟
أنا مش قادرة أستوعب إن الإنسان ممكن يقابل كل الحب ده بالجحود!
- آسية، اهدي كل حاجة هتتحل، المهم إنك عرفتي الحقيقة.
جففت دموعي اللي كانت بتنزل بصمت، وبصيتله بتيهة وذهول:
- فين الدليل؟ عايزة أشوف بعيني!
طلع تلفونه وفتح الواتساب الخاص بعُمر، وده بعد ما أدهم قدر يوصل لمحادثاته، وقال:
- مهما كان اللي حصل، مكنش ينفع أعمل حاجة زي دي، بس كان لازم لأني عارف إنك عمرك ما كنتِ هتصدقي كلامي من غير دليل.
أخدت منه التلفون، وبدأت أتصفح الأرقام والمحادثات، لحد ما أخدت نفس مصدومة من اللي عيني بتشوفه.
وجع غريب مسكني، وجع مُهين، وأنا بشوف المحادثة بين عمر ومريم مسميها «حبيبتي»!
بيكلمها بكلام عمره ما قالهولي، بيقولها صباح الخير كل يوم، ولا مرة افتكر يبدأ يومه برسالة ليا، بيطمن عليها، بيواسيها، بيغازلها، بيحكيلها عن تفاصيل يومه، وعن حاجات عمره ما فكر يشاركني فيها.
كان معاها عمر تاني عُمر اللي طول الوقت كنت مستنياه يظهر معايا.
دموعي نزلت بغزارة، يمكن دي أول مرة أعيط بالشكل ده، بس رغم كده فضلت أقلب في المحادثات، كأني بدور على حاجة تكذب اللي أنا شايفاه، أي حاجة تثبت إن فيه سوء فهم، وإن اللي بيحصل ده مش حقيقي.
لحد ما وصلت لمحادثة وقفت عندها.
إيدي اتجمدت، وقلبي كأن حد قبض عليه فجأة، نبضاته اتلخبطت، ونفسي بقى تقيل وأنا بقرأ رسالة مريم اللي كانت بتسأله فيها عني.
مريم: هي آسية بالنسبالك إيه يا عمر؟ يعني بتحبها بجد؟
فضلت عيني معلقة على السؤال، مستنية أشوف إجابته، يمكن لأول مرة في حياتي كنت خايفة أعرف رأي شخص فيا.
عمر: آسية مش فتاة أحلامي يا مريم، ولا البنت اللي كنت أتمنى أعيش معاها قصة حب أنا وافقت عليها عشان بابا، مش أكتر.
مريم: يعني إنت مش بتحبها؟
عمر: أنا عمري ما شوفتها بالشكل ده، هي مجرد اختيار بابا، لكن إنتِ.. إنتِ البنت اللي أنا مستعد أكمل معاها حياتي، واللي نفسي أصحى كل يوم ألاقيها جنبي.
حسيت إن الشاشة بتتهز قدام عيني، أو يمكن أنا اللي مبقتش قادرة أثبت مكاني.
رجعت قريت الرسالة مرة واتنين وتلاتة، يمكن أكون فهمت غلط، يمكن فيه كلمة فاتتني، يمكن عقلي من الصدمة مش قادر يستوعب.
بس لأ..
كان واضح أوي.
عُمر، الراجل اللي كنت فاكرة إني هكمل معاه عمري، كان شايفني مجرد رغبة لوالده، وفي نفس الوقت كان بيحلم بعمره كله مع أختي.
رفعت عيني عن الشاشة وبصيت لأدهم، حاولت أتكلم، لكن صوتي خرج مبحوح ومكسور:
- أنا.. أنا عايزة أمشي من هنا، حاسة إن قلبي هيقف من الوجع.
قام بسرعة وقرب مني، مسك إيدي برفق وخرجني من المكان.
أول ما خرجت، أخدت نفس طويل، وكأني كنت محبوسة جوا المكان ده ومش قادرة أتنفس. كان نفسي الحياة تقف للحظة، الزمن يتجمد، وكل حاجة حواليا تسكت.
مش عايزة أفكر، مش عايزة أسمع، ولا عايزة أي حاجة تحصل.
مش عايزة أواجه حد، ولا حتى نفسي كل اللي عايزاه إني أهرب، أهرب وبس.
- آسية، تعالي نركب العربية.
هزيت رأسي بصمت، ومشيت بخطوات تقيلة وبطيئة، لحد ما قرب وفتحلي الباب ودخلت.
- عايزة أفضل لوحدي.
هز رأسه بتفهم، وقال بهدوء:
- تمام.
وقفل الباب.
بقيت لوحدي، مفيش حد حواليا، ولا فيه حاجة ممكن تمنعني من الانهيار.
وهِنا بكيت.
بكيت بوجع أكبر، بوجع كنت بحاول أتماسك قدامه من أول ما عرفت الحقيقة. شهقاتي بدأت تعلى، ودموعي بتنزل من غير ما أقدر أسيطر عليها، وأنا بفتكر كل الذكريات اللي فجأة اتحولت من حاجات كنت بحبها لحاجات بتوجعني.
كل كلمة قالهالي، كل موقف، كل مرة استنيته يهتم بيا، وكل مرة بررتله غيابه وانشغاله.
كان صوته بيتردد في دماغي، بنفس قسوته:
«آسية مش فتاة أحلامي».
فضلت أكرر الجملة جوايا، وكأن عقلي رافض يستوعبها.
هو أنا فعلًا مش فتاة أحلامه؟!
طب ليه؟ عشان إيه؟
إيه اللي ناقصني؟ إيه اللي كان لازم أكونه ومكنتش؟
هو أنا وحشة للدرجة اللي تخلّي حد ميختارنيش؟ ولا أنا مش كفاية؟
بصيت لنفسي من خلال انعكاسي في إزاز العربية، ومسحت دموعي بإيدي، لكن دموع تانية نزلت مكانها.
ليه كل حاجة بحبها وبقرب منها بتبعد عني؟
ليه دايمًا بحس إني الاختيار اللي محدش بيتمناه، والإنسانة اللي لازم ترضى باللي يتقدملها حتى لو قلبها كان عايز أكتر؟
أنا آسية.. البنت العادية، اللي جمالها مش واو، ولا ملامحها مُبهرة تخطف العين من أول نظرة.
هو عشان كده؟
عشان مش جميلة كفاية؟
عشان مش شبه البنات اللي ممكن حد يتباهى بيهم قدام الناس؟
أنا مش فاهمة.. هو أنا لازم أكون إيه عشان حد يحبني من قلبه؟ عشان حد يشوفني ويقول إن دي البنت اللي أنا عايزها، مش البنت اللي حد اختارهالي؟
ليه كل مرة بحب فيها حد، برجع في الآخر أفتش في نفسي عن العيب اللي خلّاه متمسكش بيا؟!
في الأول أدهم.. وبعدين عمر!
وفي النص كانت مريم.
مريم، البنت الجميلة اللي ملامحها وجمالها بارزين، اللي الكل بيلاحظها، والكل بيقع في حبها وغرامها من أول نظرة.
مريم اللي مجرد وجودها كفاية يخلي العيون تلتفت ناحيتها، واللي يمكن عمر شاف فيها كل الحاجات اللي أنا عمري ما امتلكتها.
بس هو الشكل لوحده كفاية؟
هو الجمال مقياس لكل حاجة في الدنيا؟ هو عشان نعيش ونحب ونتحب لازم نكون جميلين بالشكل اللي يعجب الناس؟
طب والروح؟ والحنية؟ والاهتمام؟ والقلوب اللي بتدي من غير ما تستنى مقابل؟
هو كل ده ملوش قيمة؟
ليه بحس إني مهما حاولت أكون كويسة، ومهما اديت من قلبي، هيفضل فيه حاجة ناقصاني؟
هو إحنا بقينا بنتحب على قد جمالنا؟ ولا أنا اللي عمري ما كنت كفاية في عين الناس اللي اخترت أحبهم؟
سِكت، ومسحت دموعي بإيدي، وحاولت أظبط أنفاسي وألم شتات نفسي، قبل ما ألتفت لأدهم وأقول بصوت مبحوح:
- أدهم ممكن نمشي؟
بصلي، وهز رأسه بهدوء من غير ما يسألني أي حاجة، وبعدها شغّل العربية وتحركنا.
طول الطريق كنت باصة من الشباك، عيني بتتابع الشوارع من غير ما أشوف حاجة فعلًا، وعقلي مشغول بآلاف الأسئلة اللي ملهاش إجابة.
أما أدهم فكان ساكت، كل شوية يبصلي من المراية، وكأنه عايز يتكلم، لكنه متردد.
لحد ما وصلنا.
نزلت من العربية بخطوات بطيئة، وأدهم نزل ورايا، وقبل ما أدخل وقفني بصوته:
- آسية.
لفيتله.
- مش لازم تاخدي أي قرار دلوقتي، ولا لازم تواجهي حد وإنتِ بالحالة دي خدي وقتك، وأنا موجود.
هزيت رأسي من غير كلام، ودخلنا البيت.
لكن أول ما وصلت للصالة، خطواتي اتثبتت في الأرض.
كان بابا وماما قاعدين، ومعاهم والدة عمر ووالده وعمر!
كان قاعد وسطهم بيتكلم عادي، وبيضحك أحيانًا، وكأن مفيش حاجة حصلت.
أول ما شافني، ابتسم وقام من مكانه.
- حبيبتي، إنتِ جيتي؟ كنت مستنيكي.
وبص لأدهم بضيق وقال:
- مش كنتِ في الجامعة؟ اتقابلتي إنتِ وهو ولا إيه؟
بصيتله للحظات، ومقدرتش أرد.
إزاي؟!
إزاي قادر يبصلي بالبرود ده؟ إزاي قادر يمثل إنه بيحبني، وهو من شوية كان بيقول لواحدة تانية إنه مستعد يعيش عمره معاها؟
رد بابا بابتسامة:
- ادخل يا أدهم، إنت وآسية، يلا.
- آسية، مالك يا بنتي؟ وشك مخطوف كده ليه؟
كان صوت ماما اللي خلاني أفوق من شرودي.
ابتسمت ابتسامة باهتة وقلت:
- مفيش يا ماما، بس تعبانة شوية.
قربت مني وحطت إيدها على كتفي:
- طب تعالي اقعدي يا حبيبتي، إحنا كنا بنتكلم في موضوع مهم.
قعدت جنبها، وأدهم قعد في الكرسي المقابل ليا، بينما عمر رجع لمكانه، لكنه فضل مركز معايا.
بدأ والد عمر يتكلم:
- كنا بنتكلم إن شاء الله نحدد معاد الفرح، كفاية تأجيل، إحنا نفسنا نفرح بيكم ونشوفكم في بيتكم.
حسيت بحاجة بتعصر قلبي.
الفرح؟!
بيت واحد يجمعني بعمر؟ وأنا اللي لسه عارفة إنه عمره ما تمنّى يكون معايا؟
والدتي ابتسمت وقالت:
- ربنا يتمملهم على خير، إحنا كل اللي يهمنا نشوف آسية مبسوطة.
بصيت لماما، وكنت على وشك أعيط، لكن ضغطت على إيدي بقوة وحاولت أتماسك.
عمر اتكلم أخيرًا:
- وأنا كمان نفسي نخلص، أنا مستني اليوم ده من زمان.
رفعت عيني وبصيتله.
كان بيتكلم بثقة، وملامحه هادية، لدرجة إني للحظة حسيت إني قدام شخص غريب، مش الشخص اللي كنت فاكرة إني عارفاه.
والد عمر ضحك وقال:
- أهو ده الكلام!
الكل ضحك، إلا أنا وأدهم.
وفجأة عمر مد إيده ومسَك إيدي اللي كانت فوق رجلي، وقال قدامهم:
- مالك يا حبيبتي؟ إنتِ من ساعة ما دخلتي وإنتِ ساكتة.
بصيت لإيده اللي ماسكة إيدي، وبعدها بصيت لأدهم. كان ساكت، لكن عينه كان فيها ضيق واضح، وكان متحفز، إلا إني طمنته بنظرة مني.
وبعدها رفعت عيني لعيني عمر.
كنت عايزة أسحب إيدي وأصرخ فيه إوعى تلمسني!
لكن بدل كل ده، اكتفيت إني أبصله بصمت.
أدهم كان متابع كل حركة، ولما لاحظ نظراتي، اعتدل في قعدته وقال:
- هو إحنا هنحدد الفرح قبل ما نتأكد إن كل حاجة واضحة بين الطرفين؟
والد عمر استغرب:
- تقصد إيه يا أدهم؟
أدهم بص لعمر، وبعدها رجع بنظره لوالده:
- أقصد إن الجواز مش مجرد معاد وفرح وشقة، فيه حاجات أهم لازم تكون موجودة.
عمر سحب إيده من إيدي وبص لأدهم بضيق:
- إنت بتتكلم عن إيه؟
أدهم ابتسم ابتسامة خفيفة وقال:
- بتكلم عن الصراحة يا عمر، مش أكتر.
حاول عمر يخفي ارتباكه وقال:
- طبعًا، وإحنا عندنا حاجة نخبيها؟
في اللحظة دي، مقدرتش أستحمل.
ضحكت ضحكة قصيرة، لكنها كانت مليانة وجع، ولفيت وشي ناحيته.
- لأ يا عمر، إنت عندك حق مفيش حاجة تتخبى.
الكل بصلي باستغراب، وماما قربت مني وسألت:
- آسية، إنتِ بتقولي إيه يا حبيبتي؟
بصيتلها، وحسيت إن قلبي بيتقطع وأنا بفكر إني هكون السبب في إنها تعرف إن البنت اللي اعتبرتها بنتها الأولى طعنتني في ضهري.
رجعت بصيت لعمر وقلت بهدوء:
- بس قبل ما نحدد معاد الفرح، أنا عندي سؤال صغير عايزة أسأله لعمر.
عمر عقد حاجبيه:
- سؤال إيه؟
- أنا فعلًا فتاة أحلامك يا عمر؟
اتغيرت ملامحه للحظة، لكنه حاول يتدارك الموقف وضحك:
- إيه الأسئلة الغريبة دي دلوقتي؟
- سؤال عادي، جاوبني بس.
بص لوالده، وبعدها رجع بصلي وقال:
- طبعًا يا آسية، إنتِ عارفة مكانتك عندي.
هزيت رأسي ببطء، وابتسمت ابتسامة موجوعة.
- غريبة أصل أنا شوفت منك كلام تاني خالص.
الصمت سيطر على المكان.
والد عمر بصله باستغراب:
- فيه إيه يا عمر؟
عمر اتوتر وقال بسرعة:
- مفيش يا بابا، آسية شكلها تعبانة ومش مركزة.
سندت ضهري للكرسي، وبصيتله مباشرة:
- لأ يا عمر، أنا مركزة كويس أوي ويمكن دي أول مرة أشوف فيها كل حاجة بوضوح.
بصيت لأدهم، اللي فهم نظرتي وشجعني بنظراته إني أتكلم فأخدت نفس عميق وبدأت أتكلم، وعيني بتتنقل بين الموجودين:
- لما عمر اتقدملي، أنا مكنتش أعرفه، ولا كان بيني وبينه أي مشاعر أو حتى معرفة تسمحلي أحكم عليه. لكن لما بابا كلمني عنه، كنت شايفة الحماس في عينيه، وشايفة قد إيه هو فرحان إن ابن صاحبه اللي بيعزه وبيحترمه جاي يتقدم لبنته.
سكت لحظة، وبصيت لبابا اللي كان مركز معايا باستغراب، وكملت:
- عمر كان باين عليه شاب جاد، مجتهد في شغله، ومسؤول، وكل اللي حواليا كانوا شايفينه شاب كويس ومناسب ليا. وأنا وافقت.. وافقت عشان عيون بابا، وعشان كنت واثقة في اختياره، وواثقة إن عُمر هيكون قد الثقة دي.
والدة عمر ابتسمت ابتسامة بسيطة، لكن ملامحها بدأت تتغير لما لاحظت نبرة صوتي.
كملت وأنا بحاول أحافظ على هدوئي:
- من يوم قراية الفاتحة، وتعامل عمر معايا كان في حدود الرسمية. آه، قدامكم كان بيقول كلام حلو، وبيسأل عليا، وحبيبتي ووحشتيني وفينك، وكل الكلام اللي المفروض يتقال بين اتنين .
ضحكت ضحكة صغيرة خالية من أي فرحة، وكملت:
- بس الحقيقة إن من ورانا كنا بُعاد..بُعاد أوي مكنش فيه بينا الكلام اللي يخلي اتنين مقبلين على حياة واحدة يعرفوا بعض، ولا المشاعر اللي كنت مستنياها.
رفعت عيني لعمر، اللي كان بيتابعني بملامح متحفزة.
- بس أنا كنت بحاول ألاقي له أعذار. كنت بقول لنفسي مش شرط كل الرجالة شبه بعض، فيه اللي بيعرف يبين مشاعره، وفيه اللي مش بيعرف، فيه اللي حبه بيكون ظاهر في كلامه وتصرفاته، وفيه اللي حبه بيكون خفي ومش بيعرف يعبر عنه.
أخدت نفس متقطع، وكملت:
- بس مهما اختلفت طريقة التعبير عن الحب، فيه حاجات المفروض تكون مشتركة بين أي اتنين الود، والاحترام، والأمان، والثقة.
بصيت لإيدي اللي كانت بتترعش فوق رجلي، وضغطت عليها قبل ما أكمل:
- وأنا كنت واثقة فيه، مكنتش واخدة أي خوانة، ولا عمري فكرت أشك فيه. أصل ده ابن صاحب بابا، واحد المفروض عارف الأصول كويس، وعارف معنى إنه يدخل بيت ناس ويطلب بنتهم، وعارف إن الثقة اللي اتحطت فيه مش حاجة بسيطة.
سكت للحظات، وحسيت إن الكلام اللي جوايا أكبر من إني أقدر أقوله لكن كان لازم أكمل.
رفعت عيني لعمر، والدموع بدأت تتجمع فيها من جديد:
- بس في النهاية إيه اللي عمله؟
صوتي بدأ يهتز، وأنا بقول:
- خـ.انـي!
نزلت دمعة على خدي، ومسحتها بسرعة، لكن مقدرتش أمنع صوتي من الانكسار.
- أنا اتخنـ.ت يا جماعة. اتخنـ.ت من الشخص اللي كنت بحاول أقنع نفسي إنه بيحبني بس مش بيعرف يعبر عن حبه ،من الشخص اللي كنت بدافع عنه حتى وأنا حاسة إنه بعيد عني، من الشخص اللي كنت مستعدة أبدأ معاه حياة كاملة وأنا مطمنة إنه هيصوني ويحافظ عليا
لكن في النهاية كان نصيبي منه إيـه؟
الـخـيـ.انـة.
