رواية من انت الفصل الثاني 2 بقلم مريم محمود


 رواية من انت الفصل الثاني

اتحركت وتين من مقرها متجهة للواحات وجهتها الجديدة للبحث

والتيم طلبو منها تركب معاهم 
لكنها رفضت وهم احترمو رغبتها وركبو مع بعض وهي ركبت عربيتها

شغلت مزيكا هادية وهي ع الطريق وكانت مستمتعة بالهوا الي بيصتدم بوشها من الشباك

كانت بتدندن مع المزيكا بصوتها الهادي 

قاطعها صوت رن موبايلها
بصت ب استغراب جمبها ع الموبايل الي ع الكرسي وكان مكتوب اسم "نوران" 

مسكت الموبايل ب ايد والايد التانية كانت بتحرك بيها الدركسيون
فتحت وردت

جالها صوت نوران
«وتين» 

«اي ي نور» 

«احنا اتفقنا نعدى ع واحة سيوة الاول
ناخد جولة بسيطة
ونعتبرها تريب لينا قبل م نبدأ ف مشروع بحثنا الجديد» 

بصت وتين قدامها بتفكير وبعدها اتكلمت
«فكرة مش بطالة 
اوكي
نتحرك ع واحة سيوة الاول» 

قفلت معاها بعد م اتطمنو ع بعض ورجعت وتين ل مزيكتها الهادية ورجعت تدندن مع الاغنية بكل انبساط

مر ساعتين 
ووصلت وتين لواحة سيوة الي عرفتها من ريحة الطبيعة الي فيها

سبحان الله
ارض حية ف وسط صحاري تقتل اي كائن حي موجود عليها

ارض من الاراضي الي تعتبر جنة ع الارض من جمالها
نزلت وتين من العربية بعد م ركنتها

ووقفت تستنشق الهوا والنسمة الدافية الي خبطت ف وشها

كانت بتتلفت حواليها وبدأت ترجع ليها الذكرايات
خصوصا باباها الي كان دايما يجيبها المكان دا ويقعد يحكيلها عن التاريخ وقد اي المكان جميل وفيه آثار تاريخية عريقة

افتكرت باباها لما كان يمسك ايديها وياخدها يجبلها درة مشوي وغزل بنات 

وبعدها يلففها الواحة حتة حتة ويعرفها كل ركن فيها
وتين من صغرها وهي بتحب واحة سيوة جدا
عشان كدا معترضتش نهائي لما قالولها فكرة انهم يعدو على واحة سيوة الاول

بدأت تتمشي ف وسط الخضرة الطبيعية الخلابة وهي مبتسمة ابتسامة واسعة جدا
خصوصا لما تفتكر ذكرايات باباها

قطع تفكيرها رنة موبايلها وكانت نوران بردو
ردت عليها بلغتها انهم وصلو قبلها وعرفتها المكان عشان تروحلهم

قفلت معاها وكملت مشي

ولكنها رجعت خطوتين لما سمعت صوت زعيق غير مبرر جاي من طريق معين

وقفت للحظات تفكر ف سبب مصدر للصوت دا

بس مكانش اي حاجة
غير صوت زعيق وواضح جدا 
زي ميكون حد بيترجى حد ينجيه من الموت لكن الطرف التاني ناوي على قتله

رجعت وتين خطوتين ل ورا وهي مش عارفة
تكمل طريقها

ول ترضي فضولها وتتبع الصوت وتعرف مصدره 

لكن فضولها كان اقوى من اي حاجة واتقدمت كام خطوة وهي متجهة نحو الصوت

فضلت تمشي وكل م تقرب الصوت كان بيوضح اكتر لحد م بقى جمبها

وقفت ورا حيطة معينة وبدأت تسمع

«انت عارف ان الموضوع مفهوش رحمة ولا سماح
صح ول لا»

رد الشاب التاني بصوت مليان خوف ورعب
«والله مليش ذنب ي باسم بيه
والله مليش ذنب» 

صوت باسم على عن الطبيعي 
«اماال مين الي ليه ذنب
عرفني
انت كنت مسئول عن المخزن
صح ول لا
وانت الي كنت عارف المداخل والمخارج
ومفيش غيرك عارف
تقدر تقولي دول دخلو ازاي وكانو هيسرقو الحاجة لولا اني اتحركت ف الوقت المناسب؟؟ 
طب عارف ادهم لو شم خبر عن الي حصل انت هيحصل فيك اي» 

«انا كنت مأمن كل حاجة زي م انت امرتني
حتى كل الكالونات بتاعة الابواب غيرتها زي مطلبت مني
ومسمحتش لحد يدخل والله» 

صوته على لدرجة ان وتين اتنفضت من مكانها

«امااال دخلو ازااااي» 

كان هيكمل كلامه
لكن ل سوء حظ وتين
خيالها كان باين من جمب الحيطة

سكت باسم لما شاف الضل بعد م كان ناوي يثور ع الشاب الي واقف وبيفكر ينهي حياته 

بصله الشاب برعب وكان عارف ان دي نهايته
لو مكانتش على ايد باسم
ف ادهم اخطر بمليون مرة من باسم الي واقف قدامه دا

بص الشاب ع باسم ومستني منه يقتله او ينزل فيه ضرب
بس استغرب ان باسم ركز على مكان وراه

لف الشاب عشان يبص ع المكان الي بيبص عليه باسم

ولقى انه خيال لحد واقف

بصله باسم ورفع ايده بمعني ميطلعش اي صوت
وبدأ يتسحب واحدة واحدة ناحية الحيطة الي واقفة وراها وتين

لحد م ظهرلها فجأة
ودا خلى وتين تصوت بسبب الخضة

وكمان باسم اتصدم انها طلعت بنت
بل كمان الشاب الي كان واقف صدمته كانت لا تقل عن صدمة باسم

الرعب ملك قلب وتين لما شافتهم

بصلها باسم واتكلم بصوت جهوري
«انتي مين
وبتعملي اي هنا» 

الحروف وقفت على لسان وتين ومنعتها من النطق
وكانت بتبادل النظر بين باسم والشاب الي واقفين يبصولها مستنيينها تنطق

زعق باسم بعد م مسكها من كتفها ب عنف
«انطقي مين بعتك لينا عشان تتجسسي علينا» 

بصت وتين ع ايد باسم الي على كتفها وللحظة استعادت قوتها وركزت ع مسكة باسم ليها

فقدت اعصابها وبصتله بعد م بعدت ايده عنها
«انت مالك انا مين
وازاي تمسكني بالطريقة دي» 

زعق باسم قصادها
«انتي بتعلي صوتك عليا» 

ولسة هيرفع ايده عشان يضربها

بس وقفه كلام الشاب الي واقف

«دي واحدة تايهة ي باسم بيه» 

بصله باسم ب استغراب والشاب كمل
«مش هيبعتو حد يتجسس عليك بالطريقة دي خصوصا انهم عارفين اننا حذرين زيادة عن اللزوم
هم مش اغبيا» 

بص باسم للشاب بتفكير
ورجع بص ع هيئة وتين الي لا تمت للتجسس ب اي صلة

حاول باسم يتمالك اعصابه
«لاخر مرة هقلك
انتي مين
وبتعملي اي هنا» 

«كنت ماشية وسمعت صوت زعيق
فكرت ان حد محتاج مساعدتي
عشان كدا جيت هنا» 

ربع باسم ايده
«طب لي متدخلتيش عشان تساعديه
لي فضلتي واقفة جمب الحيط» 

«هو انا لحقت اقف
منت طبيت عليا زي القضا المستعجل قطعتلي الخلف» 

ضحك الشاب الي واقف لكن باسم بصله بتحذير ف هو سكت

رجع بص ل وتين ب تفحص
«هسيبك تمشي
بس دا لا يعني اني تغاضيت عن الموقف دا» 

اتنهد وكمل بعد م حط ايديه ف جيوبه
«واتعودي متتدخليش ف حياة حد او فضولك يجرك لحاجات مجهولة
لان دا

ممكن يزعلك جامد يحلوة» 

رجع بص للشاب
«يالا ي بابا» 

ومشيو من قدامها

حطت ايديها ع قلبها ب ارتياح انه معملهاش حاجة زي مكانت مفكرة

رجعت وتين مكانها وبدأت تمشي ناحية م نوران قالتلها

وطول الطريق كانت بتفكر ف الكلام الي سمعته
مخزن اي الي كان هيتسرق
وناس مين الي هتبعت جاسوسين

للحظة طلعت نوت بحثها
وكتبت الموقف ب حذافيره

وفضولها
مسكتش لحد هنا

كتبت اسفل الصفحة
«رحلة بحث جديدة 
ما وراه المجهول» 

ابتسمت بعد م كتبت الجملة دي
وقررت تعرف اي سرهم

واضح انهم ناس مش طبيعية
واستغربت اكتر انه سابها تمشي رغم انهم متأكدين انها سمعت جزء من حديثهم

دخلت النوت وكملت مشي
متعرفش العيون الي كانو مراقبينها.. 

وصلت للتيم واتحركو ناحية البحيرة الي لونها كان تركواز ومالحة جدا

شكلها كان خرافة
خصوصا الاملاح الي كانت باينة منها

شباب التيم
عامر ويوسف واحمد

قررو يقلعو وينزلو البحيرة

اما نوران وياسمين ووتين
قررو يكتفو انهم يتصورو جمبها

كانو مبسوطين جدا ومستمتعين ب شكل الماية والجو كله

الشباب كانو مبسوطين بالماية جدا

وكانو بيرشو ماية على وتين وياسمين ونوران 
وحصل بينهم تشابك بسبب انهم غرقوهم

مر وقت قليل
وطلعو من البحيرة 
لبسو هدومهم وقررو يلفو باقي الاماكن

راحو عين كليوباترا
وكانو مبسوطين بالاجواء

كانو بيتمشو ف نص الطريق وهم بيتصورو ب انبساط كبير جدا

وفجأة
عربية جت 
خبطت نوران

بس لحسن الحظ ان رجلها بس الي اتصابت

العربية كانت فخمة
ومتفيمة 

وقفت العربية بعد م نوران قعدت ع الارض وبدأت تصرخ م الوجع

الكل اتلم ووتين قعدت جمب نوران وهي بتطمنها ان كل حاجة هتبق بخير

نزل الشوفير من العربية وجري ناحية نوران

«انتي بخير ي آنسة
انا
بعتذر جدا والله مشفتكيش من الزحمة» 

وقفت وتين وبصتله بغضب
«اما انت مش بتعرف تسوق
واخد رخصة على اي ها
عشان تأذي ف خلق الله» 

«والله ي آنسة مشفتهاش خالص
كنت مستعجل عشان اوضل الباشا 
ف مشفتهاش
انا آسف
وهدفعلها تعويض» 

«وهي الفلوس هتسكن وجعها
ها» 

بصت ع العربية ورجعت بصتله
« مهو العيب مش عليك
العيب ع الي عينك شوفيره من اساسه» 

واتحركت من قدامه وراحت للعربية
خبطت ع شباك العربية الي ورا ب عنف

ولكن مكانش بيجيلها رد ولا الشباك بيتفتح
خبطت ب عنف اكتر 

ف الشوفير قرب منها
«ي آنسة قلتلك انا اسف وعوضها
انتي لي مصممة تأذيني ف شغلي» 

«منت لو كنت بتشتغل صح مكنتش أذيتك» 

وكملت تخبيط بنفس العنف

فجأة
الشباك اتفتح

ظهر منه شاب
مخبي عيونه بنضارة واضح فخامة ماركتها من شكلها

لابس بدلة مرسومة عليه
وسمارها
بارز ملامحه الرجولية الحادة

بصتله وتين 
«انت ي استاذ
انا مش بخبط؟؟» 

بصلها بنضارته حتى مقلعهاش
ولا رد عليها

ف دا عصب وتين ورفعت صوتها وقالت
«هو انا مش بكلمك
ولا انت اصم مش بتسمع» 

قرب منها الشوفير
«انا اسف ي ادهم باشا
بس والله اعتذرت
وقلتلها هدفع تعويض
بس هي رفضت وعمال تزعق» 

بصله واخيرا قلع نضارته 
وعينه العسلية برزت ملامحه اكتر

ورجع بص ع وتين الي واقفة بتبصله ب غضب
«اي طلباتك» 

«انك تغير الشوفير دا
ثم ان طلما حضرتك مش بتعرف تسوق ومعين شوفير
بتشتري عربية لي
ولا هو أذية ف الناس وخلاص» 

رفع ادهم حاجب من حواجبه بسبب جرأتها
ودا خلى وسامته تبان اكتر

قرب عامر
«خلاص ي وتين
حصل خير الراجل اعتذر
نوران ركبت تاكسي مع الباقي وراحو بيها المستشفى
حصل خير» 

زعقت
«لا محصلش
قدر نوران خسرت رجلها ف خبطة زي دي
ممكن تقولي هيعوضو رجلها ازاي
بالفلوس؟» 

شاورت ع السواق وكملت
«لازم يتحاسب عشان يكون عبرة ل غيره» 

ورجعت شاورت ع ادهم وكملت
«ودا بردو يتحاسب عشان يعرف بعد كدا يختار ناس كويسة تسوقلو
او يتعلم السواقة ويريحنا» 

«يبنتي حصل خير
الناس ملمومة الوضع خد اكبر من حجمه» 

رجع بص ع ادهم الي واقف مصدوم من بجاحة وتين
«بعتذر جدا منك
وشكرا انك قدرت موقفنا» 

قالت وتين
«انت بتعتذر لي المفروض هو الي يعتذر» 

اتكلم ادهم ل عامر بعد م طلع كارت وتجاهل وتين الي واقفة غضبها بيشع 

«دا الكارت بتاعي
ياريت لما توصل المستشفى
كلمني ونا هتكفل بكل مصاريف علاجها» 

«حصل خير 
احنا هنقدر نتكفل بكل حاجة متقلقش» 

«اعتبره اعتذار مني للبنت الي خبطتها» 

عامر مد ايده خد الكارت وشكر ادهم

وبعدها شباك العربية اتقفل والسواق ركب ومشي ولا كأن حاجة حصلت

بصت وتين ل عامر ب غضب
«ممكن افهم اي الي هببته دا
مسبتنيش اخد حقي من المتخلف الي فاكر نفسه هاري بوتر دا لي ها» 

ابتسم عامر
«يست حصل خير والراجل طلع ذوق اهو
لي نكبر الموضوع كلما ب ايدينا نلمه» 

بصت وتين ع طيف العربية وهي كارهة ادهم وبتتمنى تشوفو تاني عشان تمسكو تكسر عضمو

عامر خد وتين وراحو ورا نوران المستشفى

عقبال م وصلو كانت نوران بتجبس رجلها
وقفوا معاها لحد م خلصت

وعامر كلم ادهم واتكفل بكل العلاج الي يخص نوران لحد م رجلها تخف تماما

كانو قاعدين جمب نوران الي قاعدة ع السرير عشان الجبس

قال عامر
«بس الراجل طلع ذوق اوي ي وتين
مش عارف كنتي متعصبة منه لي» 

«دا ذوق دا
دا لا شاف ذوق ولا رباية
مفكرش حتى ينزل يشوف نوران اتقتلت ولا اي دنيتها
وتقولي ذوق» 

قالت نوران
«بس دا طلع عسول موت
هو لسة فيه ناس بالحلاوة دي» 

خبطتها وتين ب غضب
«يعني سيباني بخانق عشانك وكنت هكلع زمارة رقبة الراجل ف ايدي وقاعدة تتغزلي ف الشاب المستفز دا» 

عامر قال ب ابتسامة
«اسمه ادهم» 

بصتله وتين
«هتجننوني» 

وخرجت م الاوضة عشان تهدى شوية من العصبية

ضحكو كلهم وعامر خرجلها

كانت قاعدة ع احد الكراسي بتهز رجلها ب عصبية

قعد جمبها وقال بمرح
«طب عايز اعرف اي الي معصبك
اما هو اعتذر واتكفل بكل المصاريف لحد م نوران تبق كويسة وترجع تمشي ع رجلها كويس
اي معصبك» 

فكرت وتين بعقل
وملقتش اي حاجة تعصب
مكانتش عارفة اي سبب عصبيتها منه
بس الي تعرفه
انه عايزة تتعصب بالذات على الي اسمه ادهم دا

بصتله وتين
«انسان مغرور
شايف نفسه مين
فاكر عشان معاه عربية ب كام مليون
هيدوس ع الناس؟..» 

ضحك عامر
«لا يست مش هيدوس ع الناس
دا قضاء وقدر 
وكبري دماغك بق
انتي مكنتيش عصبية كدا اي الي حصلك» 

اتنهدت بتعب
«ولا حاجة
بس انفعلت لما شوفت نوران موجوعة
عشان كدا انفعلت زيادة عن اللزوم» 

قال عامر بتفهم
«فاهمك
وحقك تخافي عليها وتدافعي عنها
عموما حصل خير» 

وكمل بمرح
«يالا ادخليلهم بقا عشان بيتريقو عليكي» 

دخلتلهم وقعدو يهزرو وهي هديت من عصبيتها شوية 

قالت وتين
«طيب
انا هرزح اجيب عربيتي عشان ركنتها بعيد اوي
واجي اخدك ونشوف هنروح ول هنقعد ف اوتيل ول هنعمل اي» 

قالت ياسمين
«من رأيي نفضل ف الواحة الليلة
لاني مبحبش سفر الليل دا خالص» 

كلهم ايدوها
عامر قال
«خلاص هاجي معاكي 
الليل بدأ يليل ومينفعش اسيبك لوحدك» 

هزت وتين راسها وسابوهم واتحركو يجيبو عربية وتين

ركبو تاكسي لحد المكان ونزلو
كانت عربية وتين لسة مركونة

قربت منها فتحتها واطمنت عليها وبعدها ركبت

اعتذر منها عامر وقالها تستنى عشان معاه مكالمة مهمة

بعد عنها حبة صغيرين وكان مديها ضهره

اما هي ف دورت العربية
ولسة هتلفها

بصت ع المكان الي كانت فيه الصبح لما سمعت صوت الزعيق
لقت في كشافات بتتحرك
وواضح ان في حد بيتسحب

مشافتش الشخص
بس شافت ضوء الكشافات

فضولها خلاها تبطل العربية ونزلت م العربية من غير تفكير
وعامر مكانش واخد باله منها

اتحركت ناحية المكان وبدأت تتسحب ل تاني مرة
رغم تحذيرات باسم
الا انها مسمعتلهوش

فضلت متتبعة ضوء الكشافات وقررت بينها وبين نفسها تعرف لي اي وترجع علطول
المهم يبق معاها اي خيط يخليها تعرف تجمع معلومات عن الي بيحصل

سمعت همهمة 
ف حاولت تتخبى كويس عشان تسمع

مكان غرضها تجسس
كل كان غرضها

انها تجمع معلومات 
دماغها كان ف الكشافة والبحوث

متعرفش ان الي بتعمله دا بيغرقها ف محيط
هي مش هتقدر عليه

حاولت تسمع اكتر الهمهمة دي اي

بحد م سمعت صوت نفضها من مكانها
«انتي بتعملي اي هنا» 

بصت ع مصدر الصوت
واتصدمت


تعليقات