رواية جريمة قتل واغتصاب الفصل الثاني بقلم ياسر عوده
بعد وقت قليل اوي ابتدي ضابط الشرطه يسأل رئيس فريق المعمل الجنائي عن المعلومات والادله الجنائيه اللى لقاها في مسرح الجريمه اللى هي الشقه، ووقتها اتكلم وقال:
-احنا لقينا بصمتين مختلفين عن بصمات الزوج والزوجه، ودا دليل على صدق اقوال الزوجه، ان في اتنين اتهجموا على الشقه وقتلوا الزوج واعتدوا عليها.
-طيب قارنت البصمات دي بالمسجلين عندنا في الوزاره؟
-ايوه يا فندم بعتها للاداره بس للاسف اكدولي ان البصمتين مش من ضمن المسجلين خطر او حتى دخلوا السجن قبل كده.
-تمام، وايه اللى وصلتله تاني؟
-للاسف احنا مالقناش أي كاميرات مراقبه في مدخل العماره او على بوابه العماره، ودا صعب علينا اننا نحدد مين الجناه.
-انا وقفت التحقيق مع الزوجه بشكل مؤقت لغايه لما حالتها النفسيه تهداء وتقدر تتكلم وتحكلنا عن اوصاف الجناه، واكيد وقتها هتساعدنا للوصول ليهم.
-على العموم احنا فحصنا باب الشقه، وانتبهنا انه ماتعرضش لـ أي نوع من انواع الاقتحام غير الكسر اللى سببه امين الشرطه، بس واضح ان الجناه دخلوا بمعرفه المجني عليهم.
-ايوه دا ينطبق مع اقوال الزوجه، هي قالت انها لما فتحت الباب لجوزها كانوا المجرمين وراه وهما مانتبهوش ليهم، واضح ان الجناه كانوا متربصين وعملين حسابهم.
-ايوه يا فندم، واضح انهم عارفين ان المجني عليه معاه فلوس وعلشان كده كانوا محددين اللى هما عاوزينه، بس زي ما حضرتك شايف، الشقه في حاله فوضه شدده، في دم في الصاله زي ما حضرتك شايف، واما بالنسبه لغرفه النوم واضح انها متبهدله تماما.
-عندك حق وعلى حسب اقوال الزوجه تم الاعتداء عليها في اوضه النوم، واكيد كانوا بيستخدموا العنف معاها ودي حاجه طبيعيه في الحالات دي، بس اللى انا مش فاهمه هما ليه قتلوا المجني عليه، كانوا ممكن يربطوه ويسرقوا الفلوس زي ما احنا متعودين في الجرائم الشبيها بالجريمه دي، ليه قتلوه؟
-اعتقد يا فندم انهم قتلوه لانه يعرفهم، او على الاقل يعرف حد فيهم.
-عندك حق، ودا اللى انا فكرت فيه انا كمان.
وبعد ما خلص ضابط الشرطه مع رئيس فريق المعمل الجنائي، كان وقتها دكتور الطب الشرعي خلص كشفه على الزوجه، وطبعا بعد فحصه لـ جثه المجني عليه، وسأله الضابط:
-ايه المعلومات اللى وصلتلها يا دكتور؟
-اولا المجني عليه مات بسبب تعرضه لكتر من طاعنه في اماكن مختلفه، وواضح انه اتعرض للطعنات دي وهو واقع على الارض، لان في اثر لـ ضربه على مؤخره الرأس والضربه دي اعتقد بأداه حاده اتسببت بأحداث جرح في مؤخره رأسه.
-طيب لما فحصت الزوجه لقيت ايه؟
-لقيت اثار عمليه الاغتصاب، هي اتعاملت بعنف شديد، وواضح جدا من الحمض النووي ان الزوجه اتعرضت للاغتصاب من اكتر من شخص، وكمان في اثار كدمات شديده في جسمها وجروح كتير وتقريبا في جميع مناطق جسمها، اللى انا شوفته بيتطابق تماما مع اقوال الزوجه، واضح ان الشخصين اللى هجموا عليهم اعتدوا عليها بوحشيه، وواضح انها كانت شبه مستسلمه بسبب حاله الصدمه والخوف اللى كانت فيها، وكمان ملابسها متقطعه بعنف ودا يأكد اقوالها.
-فعلا اللى اتعرضتله الزوجه حاجه بشعه جدا، واكيد هيفضل فتره مأثر على حالتها النفسيه، بس ربنا يقدرنا ونمسك المجرمين اللى عملوا كده فيها وفي جوزها ونقدمهم للعداله.
وبعد ما خلص هشام باشا مع دكتور الطب الشرعي، لقيته بيتكلم معايا وقالي:
-اسمع يا مطاوع، انا عاوز تحريات كامله عن المجني عليه وعن الزوجه كمان، اكيد الاشخاص اللى ارتكبوا الجريمه دي على صله بالزوج على الاقل، وبالنسبه للزوجه محتاج اعرف لو في بنها وبين أي شخص عداوه ممكن يخليه يعمل الجريمه اللى حصلت دي او لا.
-تمام يا باشا، اعتبر ان اللى طلبه سيادتك حصل.
وبعد ما خلصنا معاينه في الشقه، جه وقت التحريات، ودي اصعب مرحله في القضيه كلها، لان التحريات دي هي اللى بتقدر توصلنا للجاني خصوصا لو الجاني بينه وبين المجني عليه علاقه او معرفه باي شكل من الاشكال.
وفعلا احنا اول لما ابتدينا ابتدين من مكان شغل المجني عليه، الشركه اللى كان شغال فيها، وقدرنا نعرف من تحرياتنا ان المجني عليه ماكنش مكتفي بس بشغله في الشركه، وانه كان شغال شغلانه تانيه، واللى قالنا الكلام دا واحد من الشغالين في الشركه معاه في الحراسه واسمه سعيد، لما قالنا:
-ايمن الله يرحمه كان شخص جدع جدا، وكانت كل حاجه ماشيه معاه كويس اوي، بس ابتدت احواله تتغير من حوالي سنتين لما ابتدي يبقى ليه نشاط تاني جنب شغله.
وقتها انا رديت عليه وقولتله:
-نشاط ايه، تقصد حاجه غير قانونيه؟
-لا يا باشا لا سمح الله، ايمن طول عمره انسان محترم، انا اقصد انه ابتدي يشتغل في موضوع العربيات المستعمله، يعني لما يلاقي حد عاوز يبيع عربيته المستعمله هو يشتريها منه، وبعد ما يشتريها يشدها، واقصد بكلامي ده انه يعملها عامره كامله من كل النواحي، ويرجعها شبه الجديده، وبعدها يبتدي يدورلها على بيعه ويكسب منها مبلغ كويس اوي.
-والشغلانه دي كانت ماشيه معاه كويس؟
-اوي اوي يا باشا، ايمن كان بيكسب من الشغلانه دي مكاسب حلوه اوي، ممكن يكسب في العربيه الوحده من 20 الف لغايه 50 الف.
-واضح انك تعرف حاجات كتير عن ايمن؟
-هو كان بيقعد يحكيلي ساعات، واوقات تانيه كنت بسمع مكالماته في التليفون وعرفت المعلومات دي من المكالمات اللى بيتكلمها قدامي.
انا في الوقت دا ابتديت افكر ان سعيد دا نفسه ممكن يكون من ضمن المشتبه فيهم، لانه واضح اوي انه عينه كانت على ايمن، وعارف عنه حاجات كتير وعارف ان معاه فلوس، ومش بس كده واضح كمان انه كان غيران منه، وحبيت اعرف دا وعلشان كده سألته:
-وانت ليه ماشتغلتش معاه؟
-طلبت منه اكتر من مره اني اشتغل معاه، بس هو ماكنش بيرضا، وكان بيقولي:
-الشغلانه دي مش ساهله زي ما انت متخيل يا سعيد، دي شغلانه كلها مشاكل وقرف، وانا نفسي ابطلها بسبب المشاكل الكتير اللى بتبقي فيها.
-مشاكل ايه يا ايمن، انت عاوز تمنع العين عليك وخلاص، انت بتعمل ايه غير انك بتاخد العربيه وتصلحها وبعدها بتبعها وبتكسب فيها فلوس كتير.
-دا اللى انت شايفه، بس الحقيقه مشاكل الشغلانه دي اكبر من كده بكتير، انا لو اشتريت عربيه من غير ما انتبه على عيوبها، ساعتها تصلحها وتمنها مش هقدر اعوضهم لما ابيعها، يعني لو فيها عيب ماينفعش يتصلح زي لو الماتور بتاعها خلاص جاب اخره، لازم وقتها تجبلها ماتور جديد، او لاقدر الله العربيه عامله حادثه كبيره واتصلحت ومغيره نص مثلا، وقتها عمري ما هقدر ابيعها بسعر كويس ابدا.
-دي حاجه بسيطه، ممكن أي فني او ميكانيكي شاطر لو الواحد استعان بيه يحل المشاكل دي كلها قبل ما تشتري العربيه.
-انا معاك ان ممكن الواحد يحاول يتجنب المشاكل دي، بس ايه رأيك بقى لو اشتريت عربيه وصلحتها وشديتها وكل حاجه بقت تمام، ودفعت فيها فلوس كتير ولما روحت تبيعها والمشتري راح يكشف عليها في المرور ويلاقيها مسروقه، وقتها العربيه هتتاخد وانت هتدخل في سين وجيم كمان، ومش بعيد تاخد حكم بالحبس كمان، وحتى لو قدرت تثبت انك مالكش ذنب، وقتها هتبقى خسرت تمن العربيه والتصليح ويبقى ربنا يعوض عليك.
-ودا ممكن يحصل اصلا؟
-ايوه بيحصل، وحصل معايا شخصيا ولولا ستر ربنا كنت زماني اتحبست فيها كمان.
-ازاي ده؟
-انا اشتريت عربيه، ومن شخص انا اعرفه معرفه شخصيه، وهنروح بعيد ليه انا اقصد بكلامي اسماعيل اللى شغال سواق على عربيه من عربيات التسويق.
-انت تقصد اسماعيل الدسوقي؟
-ايوه هو اسماعيل الدسوقي، جالي في يوم وقالي:
-انا جايبلك هديه يا ايمن انما ايه عروسه.
