رواية عروس البحر الفصل الثاني 2 بقلم نون لاشين

في بيت ملك بعد ما خلص الجواز بساعة.

ملك كانت قاعدة لوحدها في البلكونة، بتبص على الموج وبتحاول تستوعب اللي حصل.

ساعتين بس.. ساعتين كفاية إنها تبقى مرات واحد ما تعرفوش، واحد عايز ياخد بيتها، واحد عيونه زرقا باردة زي البحر في الشتا.

لمست الدبلة الدهب اللي في صباعها وحست إنها تقيلة.. تقيلة أوي.

ست الحسن قربت منها وقعدت جنبها .

ست الحسن بصوت واطي: "ملك.. يا بنتي.. إنتي متأكدة من اللي عملتيه؟"

ملك بصت لها بابتسامة

 "متقلقيش يا ستي.. ده مجرد ورق.. أسبوع وهيعدي."

ست الحسن حطت إيدها على خد حفيدتها: "يا حبيبتي.. أنا عايشة ستين سنة وأعرف إن الورق مش بيبقى مجرد ورق أبداً.. الكلمتين اللي قلتيهم قدام المأذون دول كلمتين كبار يا ملك.. ربنا بيحاسب عليهم."

ملك بتوتر: "يا ستي.. مفيش قدامنا حل تاني.. لو ما وافقتش كنتي هتبقي في الشارع."

ست الحسن بدمعة: "البيت يروح يا بنتي.. البيت يروح وأنا أعيش معاكي في أي حتة.. بس إنتي ما تضحيش بنفسك."

ملك ضمت جدتها وهي بتحاول تخبي دموعها.

ملك بصوت مخنوق: "ما أنا مش بضحي بحاجة يا ستي.. أسبوع وكل حاجة ترجع زي ما كانت."

بس من جواها كانت حاسة إن حاجة جواها اتغيرت.. ومش هترجع زي ما كانت.

.........

في نفس الوقت

آدم كان واقف لوحده بيشرب قهوة سودة، عيونه على البحر بس دماغه مش معاه.

زياد قرب منه 

زياد: "آدم.. إنت كويس؟"

آدم ببرود: "ليه مكنش كويس؟"

زياد: "ما أعرفش.. حاسس إن في حاجة.. وشك مختلف."

آدم بصله بنظرة حادة: "وشي زي ما هو. وبعدين خلص اللي عليك.. جدتي هتوصل الصبح، لازم كل حاجة تكون جاهزة."

زياد: "تمام.. بس في حاجة لازم تتفق عليها مع ملك."

آدم: "إيه؟"

زياد: "لازم تعيش معاكم في الفيلا الأسبوع ده.. مش هينفع جدتك تيجي وتلاقي العروسة في بيتها والعريس في فندق."

آدم سكت.. ما كانش فاكر النقطة دي.

آدم بتوتر مخفي: "تعيش هنا؟ معايا؟"

زياد بابتسامة خبيثة: "طبعاً.. ده إنتم عرسان جداد يا حبيبي.. ولا إيه؟"

آدم بعصبية: "كفاية هزار يا زياد. اتصرف وجهز أوضتين منفصلتين."

زياد: "أوضتين؟! ومين هيصدق؟ شغالين الفيلا والطباخ والسواق.. دول كلهم هيعرفوا في ساعة إن الجواز ده صوري."

آدم: "دول موظفين بياخدوا فلوس وبيسكتوا."

زياد بجدية: "والفلوس مش بتشتري كل حاجة يا آدم.. وجدتك عمرها 75 سنة ومش بيضحك عليها حد.. أول ما تدخل الفيلا هتحس بكل حاجة."

آدم سكت وهو عارف إن زياد صح.

آدم بتنهيدة: "طيب.. أوضة واحدة.. بس هنعرف نترتب جواها."

زياد ابتسم وقال في سره: "ده بالظبط اللي أنا عايزه."

.........

في الليل، في بيت ملك القديم.

ملك كانت بتحط هدومها في شنطة كبيرة ودموعها نازلة بصمت.

سلمى كانت واقفة جنبها وبتبص لها بحزن.

سلمى: "ملك.. أنا مش مرتاحة للموضوع ده خالص."

ملك وهي بتطبق فستان: "ولا أنا يا سلمى.. بس مفيش قدامي حل تاني."

سلمى: "طب الراجل ده شكله إيه؟ طيب؟ وحش؟"

ملك سكتت لحظة.. وصورته جت في بالها.. العيون الزرقا الباردة، والصوت الهادي اللي بيخبي ورا هدوءه نار.

ملك بصوت واطي: "مش عارفة يا سلمى.. مش عارفة أحكم عليه.. بس حاسة إنه راجل مكسور من جوه."

سلمى بدهشة: "مكسور؟! هو ده اللي باين منه؟"

ملك: "مش باين.. بس حاسة.. العين لما بتبقى باردة أوي كده، يبقى وراها حكاية."

سلمى بابتسامة صغيرة: "يا بت إنتي بتحكي عليه كأنك عارفاه من زمان."

ملك اتخضت من كلام سلمى.

ملك بسرعة: "لأ أبداً! أنا بس بوصف اللي شوفته.. مفيش أكتر."

سلمى بصت لها بنظرة فيها شك وبعدين سكتت.

ست الحسن دخلت الأوضة ومعاها حاجة ملفوفة في قماش.

ست الحسن: "ملك.. تعالي يا بنتي."

ملك قربت منها.

ست الحسن فتحت القماش وطلعت منها سلسلة دهب قديمة فيها قلب صغير.

ست الحسن بدموع: "دي سلسلة أمك .. كانت لابساها يوم فرحها. كنت مستنياكي تكبري عشان أديهالك في يوم فرحك.. بس الظاهر إن ربنا كتب إني أديهالك النهاردة."

ملك بعياط: "يا ستي.."

ست الحسن حطت السلسلة في رقبة ملك وبستها على جبينها.

ست الحسن: "روحي يا بنتي.. وربنا معاكي.. وافتكري دايماً إن أي قرار بتاخديه، لازم يكون نابع من قلبك مش من الظروف."

ملك ضمت جدتها وهي بتعيط بحرقة.

ما كانتش عارفة ليه حاسة إن كلام جدتها ده هيبقى سبب في حاجة كبيرة قدام.

.........

في فيلا آدم على البحر.

ملك دخلت وشنطتها في إيدها، البيت كان ضخم وفخم ومفيش فيه أي حس بالدفء.

زياد استقبلها بابتسامة.

زياد: "أهلاً يا ملك.. اتفضلي.. آدم في المكتب. تعالي أوريكي أوضتك."

ملك بتوتر: "شكراً."

مشيت وراه في ممرات طويلة، كأنها بتدخل متحف مش بيت.

وصلوا لأوضة في آخر الممر.

زياد فتح الباب وقال: "دي أوضة النوم الرئيسية."

ملك دخلت والأوضة ضخمة، في نصها سرير كبير وفي زاويتها اريكة كبيرة ومكتب.

ملك باستغراب: "أوضة النوم الرئيسية؟ طب فين أوضة آدم؟"

زياد بإحراج: "آحم.. آدم هينام هنا كمان."

ملك بصدمة: "ايه؟!"

زياد بسرعة: "متقلقيش! هو هينام على الاريكة وإنتي على السرير! بس يا ملك، مش هينفع نقول للشغالين إن أوضتين منفصلة.. جدته هتوصل بكرة الصبح وأي حركة غلط هتفضحنا."

ملك بغيظ: "وأنت ليه ما قلتليش من الأول؟ ده كان شرط لازم أعرفه قبل ما أوافق!"

صوت آدم جه من ورا.

آدم ببرود: "لو مش عاجبك، تقدري تمشي دلوقتي والعقد يتلغي."

ملك اتلفتت ولقته واقف في الباب، لابس قميص أسود وبنطلون جينز، شكله مختلف تماماً عن الصبح.. أهدى.. وأخطر.

ملك بصلابة: "أنا مش هروح.. بس خلينا نتفق على حدود."

آدم دخل الأوضة ببرود: "اتفضلي."

ملك: "إنت على الاريكة وأنا على السرير. ومحدش يقرب من حدود التاني. ومحدش يكلم التاني غير للضرورة."

آدم بسخرية خفيفة: "والله ده كان بالظبط اللي أنا هقوله."

ملك بصت له بغيظ.

آدم: "في حاجة تانية؟"

ملك: "آه.. البيت.. امتى هيتسجل باسمي؟"

آدم بهدوء: "بكرة.. المحامي بتاعي هيجي هنا الصبح وهنمضي الأوراق قبل ما جدتي توصل."

ملك اتفاجأت من هدوءه وجديته.

ملك: "تمام."

آدم خرج من غير ما يقول حاجة.

زياد ضحك ضحكة خفيفة.

زياد: "يا ملك.. أنا حاسس إن الأسبوع ده هيبقى أطول أسبوع في حياتكم إنتم الاتنين."

ملك بصت له بنظرة حادة.

ملك: "اطلع برا يا زياد."

زياد خرج وهو بيضحك.

في البلكونة.

آدم كان بيدخن سيجارة ويبص على البحر، دماغه مش فاضية.

البنت دي.. ملك.. فيها حاجة مش قادر يفسرها.

كل البنات اللي عرفهم في حياته كانوا بيحاولوا يقربوا منه بشتى الطرق.. يدلعوا، يغنجوا، يتذللوا.

بس دي.. دي واقفة قدامه بكل اللي فيها.. مش خايفة منه ولا منبهرة بيه.. بتعامله زي أي حد عادي.

وده اللي كان بيخليه.. مش عارف ليه بالظبط.. مش عايز يرفع عينه من عليها.

رن موبايله.

ما ردش.

رن تاني.

بص على الاسم.. "جدتي أمينة".

رد.

آدم: "ألو؟ يا ستي.."

أمينة بصوت دافي: "ولدي.. حبيبي.. ؟ أنا على المحطة دلوقتي."

آدم ببرود: "السواق هيكون في انتظارك يا ستي."

أمينة بعتاب: "السواق؟! إنت مش جاي تستقبل جدتك بنفسك؟"

آدم: "عندي اجتماع يا ستي.. متقلقيش، السواق راجل كويس"

أمينة بتنهيدة: "آه يا آدم.. إنت لسه زي ما إنت.. برود مش طبيعي."

آدم سكت.

أمينة: "المهم.. أنا شوقانة أشوفك.. وأشوف العروسة اللي خطفت قلب حفيدي."

آدم تيبس شوية.

آدم: "يا ستي.."

أمينة بسرعة: "أنا عارفة.. زياد قاللي كل حاجة.. بس أنا عايزة أشوفها بنفسي.. وبيني وبينك.. مبسوطة إنك اخترت بنت بلدك مش أجنبية."

آدم: "تمام يا ستي.. هستناكي."

قفل الموبايل وحس بضيق في صدره.

جدته ماكنتش ست عادية.. دي ست ذكية جداً وبتفهم كل حاجة بنص كلمة.

لازم يحذر ملك.

.........

رجع للأوضة، لقى ملك قاعدة على السرير وبتفك شعرها قدام المراية.

وقف لحظة على الباب..

شعرها بني طويل بينزل على كتفها، ووشها من غير مكياج طفولي وبريء.

لأول مرة من زمن طويل.. حس بحاجة في صدره.

عدى بسرعة وراح ناحية الأريكة.

آدم بجدية: "ملك.. محتاج اتكلم معاكى."

ملك اتلفتت واتخضت لما لقته واقف ورا منها.

ملك بتوتر: "في إيه؟"

آدم قعد على كرسي قريب منها.

آدم: "جدتي هتوصل الصبح. وجدتي مش زي أي حد.. ست ذكية وبتفهم كل حاجة. لازم نتفق على كذا حاجة."

ملك: "زي إيه؟"

آدم: "لازم تعرفي قصة حبنا.. امتى اتعرفنا، إزاي، فين."

ملك بسخرية: "قصة حب؟ دي حاجة تحتاج دماغ خيالية.."

آدم بصلها بنظرة بس من غير ما يرد.

ملك اتكسفت وقالت: "خلاص.. قولي."

آدم: "اتعرفنا من شهرين في فعالية خيرية بالمينا.. إنتي كنتي متطوعة وأنا كنت ممول.. اتكلمنا كتير وحبيت فيكي حاجات كتير.. وعرضت عليكي الجواز."

ملك بتعجب: "فعالية خيرية؟ أنا عمري ما حضرت حاجة زي كده."

آدم: "جدتي مش هتعرف. المهم إنك تحفظي القصة."

ملك: "طب وليه ما قولتش إننا اتعرفنا في مكان بسيط؟ زي.. ما أعرفش.. مكتبة؟ أو كافيه؟"

آدم بص لها لحظة.

آدم: "ليه مكتبة؟"

ملك بابتسامة خفيفة: "لأن أنا بحب القراءه.. ولو جدتك سألتني هاقدر أكلمها عن القصة بطبيعية أكتر."

آدم سكت.. ما كانش متوقع إنها تفكر بالطريقة دي.

آدم بهدوء: "تمام.. مكتبة."

ملك: "مكتبة البلدية في محطة الرمل.. أنا بروحها كل جمعة."

آدم: "تمام.. اتعرفنا هناك."

وقعت لحظة صمت.. الاتنين كانوا بيبصوا على بعض من غير ما يحسوا.

ملك قطعت الصمت: "في حاجة تانية؟"

آدم: "آه.. لما نكون قدام جدتي، لازم تنادي عليا باسمي من غير أستاذ.. وأنا هنادي عليكي يا ملك.. وأحياناً هضطر إني.. أمسك إيدك.. أو أقرب منك."

ملك اتخضت من الفكرة.

ملك بتوتر: "تمسك إيدي؟"

آدم: "جدتي عايشة في عالم تاني.. لو ما شافتش علامات حب بين العروسين، هتشك."

ملك سكتت لحظة وبعدين قالت: "تمام.. بس بأقل قدر ممكن."

آدم بصلها نظرة طويلة.

آدم بصوت واطي: "متقلقيش.. مش هعدي الحدود."

ملك بصت له.. وفي اللحظة دي حست إن قلبها بينبض بشكل غريب.

قامت بسرعة.

ملك: "أنا هنام.. تصبح على خير."

راحت ناحية السرير بسرعة ودخلت تحت اللحاف.

آدم فضل قاعد مكانه، بيبص عليها من بعيد.

هي قافلة عينها وبتحاول تنام.. وهو بيبص عليها ومش قادر يرفع عينه.

قال لنفسه: "آدم.. انتبه. البنت دي خطر عليك. أسبوع ويعدي."

بس من جوه كان حاسس إن الأسبوع ده مش هيعدي بسلام.

.........

صباح اليوم التاني.

ملك صحيت من النوم على صوت الموج.

فتحت عينها وفي اللحظة دي افتكرت إنها مش في بيتها.

التفتت ناحية الأريكة.. لقت آدم نايم عليها ولسه لابس هدوم أمبارح.

بصت عليه وهو نايم.. وشه كان مختلف تماماً.. مفيش عليه برود ولا حدة.. كان طفل صغير.

لمحت على جبينه ندبة صغيرة ما كانتش واضحة من قبل.

وفي اللحظة دي.. آدم فتح عينه.

عيونهم اتقابلوا.

ملك بسرعة التفتت وقعدت على السرير.

آدم قام هو كمان، شعره كان منكوش وعيونه نص نايمين.

آدم بصوت أجش من النوم: "صباح الخير."

ملك ما قدرتش تبص علية.

ملك بتوتر: "صباح النور."

وقعت لحظة صمت غريبة.

الباب خبط.

زياد بفرحة من بره: "يا عرسان! جدت آدم في الطريق! هتوصل خلال نص ساعة!"

آدم وملك بصوا لبعض.

التمثيلية كانت على وشك تبدأ.

وما كانوش عارفين إن التمثيلية دي.. هتتحول لحقيقة أكبر من اللي يتخيلوها.

.........

الفصل الثالث من هنا