رواية عروس البحر الفصل الثالث 3 بقلم نون لاشين

آدم كان واقف لابس قميص أبيض وبنطلون كحلي، وشه جامد زي العادة بس عيونه فيها توتر مش عايز يبينه.

زياد كان بيجري من أوضة لأوضة.

زياد بصوت عالي: "يا جماعة الورود فين؟! قلت حطوا ورد في كل حتة! جدته ادم بتحب الورد الجوري!"

آدم بعصبية: "زياد اهدي بقى.. إنت بتعمل في الفيلا زلزال."

زياد بجدية: "يا عم إنت مش عارف جدتك زي ما أنا عارفها.. الست دي لو لمحت حتة غلط هتسأل فيها لحد ما تعرف الحقيقة."

آدم سكت لأنه عارف إن زياد صح.

الباب خبط.

زياد جري وفتح.

ست كبيرة في العمر بس ملامحها قوية، عيونها حادة وشعرها أبيض ، لابسة فستان أنيق وماسكة عصاية 

أمينة دخلت الفيلا وعيونها بتلمع.

أمينة بصوت دافي: "فين حبيبي فين؟ فين آدم؟"

آدم قرب منها بسرعة وحضنها.

آدم بصوت مختلف تماماً عن بروده المعتاد: "يا ستي.. وحشتيني."

أمينة بدموع: "يا ويلي على قوامك! كبرت أوي يا حبيبي..  عشر سنين ماشفتكش.. عشر سنين!"

آدم: "أنا آسف يا ستي.. الشغل كان بيخليني مشغول."

أمينة بصت في عينيه وقالت بجدية: "الشغل مش عذر.. العيلة أهم من أي شغل في الدنيا.. بس الحمد لله إنك أخيراً رجعت."

آدم سكت.

أمينة بصت حواليها فجأة وقالت: "فين العروسة؟ فين ملك؟ أنا شوقانة أشوف البنت اللي خلت حفيدي يفتح قلبه."

آدم تيبس.

آدم: "هي.. في الأوضة بتجهز."

أمينة بعتاب: "بتجهز ليه؟ أنا مش غريبة.. قولها تنزل على طول."

زياد بسرعة: "أنا هناديها يا حاجة أمينة! اتفضلي ."

زياد جري على الأوضة وخبط الباب.

زياد بلهفة: "ملك! ملك افتحي بسرعة! جدته وصلت وهي عايزة تشوفك دلوقتي!"

ملك كانت لسه بتلبس الحجاب قدام المراية.

ملك بقلق: "دلوقتي؟! لسه ما جهزتش!"

زياد: "مفيش وقت يا ملك.. الست دي مش بتستنى.. يلا بسرعة."

ملك خدت نفس عميق وبصت على نفسها في المراية.

فستان بسيط لونه بيج، حجاب أبيض ناعم، وشها من غير مكياج بس عيونها البنية فيها نور.

قالت لنفسها: "متخافيش يا ملك.. ده أسبوع وبس.. أسبوع وبس."

نزلت السلم 

أول ما وصلت الصالة، عيونها قابلت عيون أمينة.

أمينة بصت ليها من فوق لتحت.. وبصت عليها تاني.. وسكتت.

الكل حبس نفسه.

آدم كان واقف وقلبه بيدق من غير ما يعرف ليه.

أمينة فجأة ابتسمت ابتسامة كبيرة وفتحت دراعاتها.

أمينة بفرحة: "تعالى يا حبيبتي تعالى!  ما شاء الله عليكي! دي بت تشبه القمر بالظبط!"

ملك قربت منها بخجل وحضنتها.

ملك بصوت واطي: "أهلاً بيكي يا حاجة أمينة.. نورتي الفيلا."

أمينة مسكت وشها بإيديها الاتنين: "يا ويلي على الجمال ده! يا آدم يا حبيبي إنت عندك ذوق والله! البنت دي ملاك!"

آدم بص على ملك وهي واقفة قدام جدته.. وشها كان أحمر من الخجل.. وفعلاً.. في اللحظة دي.. حس إنها فعلاً حلوة.

مش حلوة عادية.. حلوة بشكل قوي

آدم بصوت منخفض: "شكراً يا ستي."

أمينة قعدت ملك جنبها على الكنبة وبدأت تسألها.

أمينة: "قولي يا حبيبتي.. إنتي من إسكندرية؟"

ملك: "آه يا حاجة.. اتولدت هنا وعشت هنا طول عمري."

أمينة: "وأهلك فين يا حبيبتي؟"

ملك سكتت لحظة.. السؤال ده كان وجيع.

ملك بصوت هادي: "أبويا سافر من زمان.. وأمي.. الله يرحمها."

أمينة وشها اتغير وحست بالوجع في صوت ملك.

أمينة بحنان: "الله يرحمها يارب.. ويعوضك خير يا حبيبتي.. من دلوقتي أنا أمك."

ملك عيونها دمعت من غير ما تحس.

آدم كان واقف بعيد وشايف الموقف.. وحس بحاجة غريبة في صدره.. كأنه عايز يقرب منها بس مش عارف إزاي.

زياد كسر اللحظة.

زياد بضحك: "يا حاجة أمينة الأكل جاهز! تعالي ناكل عشان العرسان جوعانين!"

أمينة بضحك: "يلا بينا.. بس عايزة ملك تقعد جنبي على السفرة."

.........

على سفرة الغدا.

الاكل كان كتير.. سمك مشوي، أرز صيادية، سلطة، طواجن.

أمينة كانت بتاكل وبتتكلم في نفس الوقت.

أمينة: "قولي يا ملك.. إزاي اتعرفتوا إنتي وآدم؟"

ملك اتخضت.. نسيت القصة.

بصت على آدم بسرعة.

آدم كان بيبص في طبقه بس عيونه بتقول لها: "القصة."

ملك بسرعة: "آه.. اتعرفنا في مكتبة البلدية في محطة الرمل."

أمينة بفرحة: "مكتبة؟! يعني إنتي بتقراي؟"

ملك بابتسامة: "آه يا حاجة.. أنا بحب القراءه أوي.. بروح المكتبة كل جمعة."

أمينة: "ما شاء الله.. وبتقراي إيه؟"

ملك: "روايات.. تاريخ.. أي حاجة."

أمينة بصت لآدم وقالت: "يا حبيبي إنت لقيت كنز.. البنت اللي بتقرا بتبقى عندها عقل وقلب."

آدم بص على ملك لحظة.. وفعلاً حس إن جدته صح.

آدم بهدوء: "أنا عارف يا ستي."

ملك اتفاجأت من رد آدم.. كان طبيعي جداً.. كأنه بيقول الحقيقة مش بيمثل.

أمينة: "طب وإمتى حبيتوا بعض؟"

ملك بلعت ريقها: "آه.. بعد ما اتكلمنا كذا مرة في المكتبة.. حسينا إن في تفاهم بينا."

أمينة: "ومن قد إيه وإنتوا مخطوبين؟"

زياد دخل بسرعة: "من شهرين يا حاجة أمينة! شهرين بس وقرروا يتجوزوا على طول عشان ما يقدروش يستنوا!"

أمينة بضحك: "ما شاء الله.. الحب لما بيجي بيجي بسرعة."

وبعدين بصت لآدم بجدية.

أمينة: "بس في حاجة يا حبيبي عايزة أسألك عليها."

آدم بتوتر: "إيه يا ستي؟"

أمينة: "إنت ليه ما جيتش تزورني في أسوان من عشر سنين؟ حتى لما مات أبوك ما جيتش."

آدم وشه اتغير تماماً.. البرود اختفى وظهر مكانه وجع عميق.

آدم بصوت منخفض: "يا ستي.. أنا.."

أمينة بعتاب حزين: "أنا مش بعاتبك يا حبيبي.. أنا حزينة.. أبوك كان ابني الوحيد ولما مات حسيت إن جزء مني مات معاه.. وإنت كنت الباقي من سالم.. بس إنت بعدت."

آدم سكت.. عينه بدأت تلمع.

ملك كانت بتبص عليه.. ولأول مرة شافت آدم الحقيقي.. مش رجل الأعمال البارد.. لا.. ده ولد صغير فقد أبوه ومش عارف يتعامل مع الوجع.

من غير ما تحس.. حطت إيدها على إيده تحت السفرة.

آدم اتخض من لمستها.. بس ما سحبش إيده.

ملك بصوت واطي جداً: "هو اكيد يا حاجة أمينة.. كان عايز يجيلك بس ما كانش عارف يبدأ إزاي."

أمينة بصت لملك بدهشة.. وبعدين بصت لإيدهم المتشابكة تحت السفرة.. وابتسمت.

أمينة بدموع: "الحمد لله.. الحمد لله إنك لقيت حد يفهمك يا حبيبي."

آدم بص لملك.. وعيونه لأول مرة كانت دافية.

زياد كان بيبص عليهم من بعيد ووشه مبتسم.

زياد في سره: "يارب.. أنا حاسس إن الخطة بتاعتنا مش هتطلع زي ما إحنا متخيلين."

.........

بعد الغدا.

أمينة راحت ترتاح في أوضتها.

ملك كانت في المطبخ بتعمل شاي.

آدم دخل المطبخ فجأة.

ملك اتخضت: "إنت بتعمل إيه هنا؟"

آدم بهدوء: "جاي أشرب شاي."

آدم قعد على الكرسي وبص عليها وهي بتجهز الشاي.

آدم فجأة: "شكراً."

ملك باستغراب: "على إيه؟"

آدم: "على اللي قلتيه لجدتي.. وعلى.. الإيد."

ملك اتكسفت 

ملك بتوتر: "أنا.. ما كنتش أقصد.. بس حسيت إن جدتك حزينة وأنت كنت متأثر.. فـ.."

آدم بص في عينها: "أنا ما اتلمستش من حد من سنين يا ملك.. لما حطيتي إيدك على إيدي.. حسيت بحاجة غريبة."

ملك قلبها وقف لحظة.

ملك بصوت مرتعش: "آدم.. إحنا اتفقنا إن الموضوع ده صوري."

آدم سكت.. وبعدين قام.

آدم ببرود رجع تاني: "معلش.. نسيت نفسي لحظة. مش هتتكرر."

وخرج من المطبخ.

ملك فضلت واقفة مكانها وإيدها لسه حاسة بدفا إيده.

قالت لنفسها: "ملك.. إنتي بتلعبي بالنار.. ركزي.. أسبوع وبس."

.........

في الليل.

أمينة نادت على الجميع في الصالة.

أمينة بفرحة: "تعالوا يا حبايبي عندي مفاجأة."

آدم بقلق: "مفاجأة إيه يا ستي؟"

أمينة: "أنا عارفة إنكم اتجوزتوا بسرعة.. وعارفة إن الفرح كان صغير.. وعشان كده أنا قررت إني أعملكم حفلة صغيرة هنا في الفيلا بكرة بالليل.. هجيب ناس من العيلة اللي هنا في إسكندرية ونحتفل بيكم."

آدم بصدمة: "إيه؟! حفلة إيه يا ستي؟!"

أمينة بعتاب: "ليه؟ مش عاجبك؟ عروستك حلوة ومينفعش تتجوز من غير ما الناس تفرح لها."

زياد بسرعة: "فكرة رائعة يا حاجة أمينة! أنا معاك!"

آدم بص لزياد بنظرة قاتلة.

زياد همس له: "اقبل عشان ما تشكش."

آدم بتنهيدة: "تمام يا ستي.. زي ما تحبي."

أمينة بفرحة: "يا سلام! يا ملك يا حبيبتي هتلبسي فستان حلو ونعمل حفلة صغيرة حلوة."

ملك بابتسامة متوترة: "تمام يا حاجة أمينة."

أمينة قامت وراحت أوضتها.

آدم بص لملك وزياد بعصبية.

آدم: "إنتوا عارفين إن الحفلة دي هتعقد الموضوع أكتر؟"

زياد: "يا عم اهدي.. حفلة صغيرة وبس.. جدتك هتفرح وتمشي."

آدم: "وناس من العيلة هتشوفنا.. هيتكلموا.. هيسألوا.. وإنت عارف إن أي غلطة هتفضحنا."

ملك بهدوء: "آدم.. جدتك فرحانة.. متحرمهاش الفرحة دي.. إحنا هنمثل كويس ومتقلقش."

آدم بص عليها.. هي بتكلمه بهدوء وعيونها صادقة.

آدم سكت وراح أوضته من غير ما يقول حاجة.

.........

في الأوضة بالليل.

ملك كانت قاعدة على السرير بتفكر.

آدم كان على الأريكة بيبص في السقف.

الصمت 

ملك فجأة: "آدم."

آدم: "إيه."

ملك: "أنا عايزة أسألك سؤال."

آدم: "اتفضلي."

ملك: "أبوك.. مات إمتى؟"

آدم سكت فترة طويلة.

آدم بصوت واطي: "من عشر سنين.. وأنا عندي عشرين سنة."

ملك: "وإنت كنت هنا؟"

آدم: "لأ.. كنت في أثينا.. ماما كانت أخدتني هناك من وأنا صغير بعد ما انفصلت عن أبويا.. ولما مات.. ما لحقتش أشوفه."

ملك حسّت بوجع في قلبها.

ملك: "لهذا السبب إنت مش بتيجي مصر؟"

آدم سكت.. وبعدين قال بصوت مكسور: "كل ما أحط رجلي في البلد دي.. بحس إني بتخنق.. برجع لذكرى إني ما ودعتش أبويا.. إني ما قولتش له إني بحبه.. إني ما كنتش جنبه."

ملك دمعتها نزلت.

ملك بصوت مخنوق: "أنا آسفة يا آدم.. ما كانش لازم أسأل."

آدم بص عليها.. وشاف دمعتها.. وحس لأول مرة من سنين إن حد حاسس بيه.

آدم بصوت دافي: "لا.. أنا مبسوط إنك سألتي.. محدش سألني قبل كده."

وقعت لحظة صمت طويلة.. بس الصمت ده كان مختلف.. كان دافي.

ملك: "آدم."

آدم: "إيه."

ملك: "بكرة في الحفلة.. أنا هكون جنبك.. مش عشان التمثيلية.. عشان جدتك.. وعشانك."

آدم بص عليها وعيونه لمعت.

آدم بصوت واطي: "شكراً يا ملك."

ملك: "تصبح على خير."

آدم: "تصبحي على خير."

كل واحد فيهم قفل عينه.. بس الاتنين ما ناموش طول الليل.

.........

صباح يوم الحفلة.

الفيلا بقت شكل تاني.. ورد في كل حتة، أنوار، كراسي في الجنينة على البحر.

زياد كان بيجري زي المجنون.

زياد: "يا جماعة الورد ده مش كفاية! جيبوا ورد أكتر! والموسيقى فين؟!"

آدم كان لابس بدلة سوداء أنيقة وشكله مختلف.

ملك نزلت السلم بفستان أبيض طويل بسيط، حجابها أبيض ناعم، وعيونها ميكب بشكل بسيط.

آدم بص عليها.. ووقف مكانه.

زياد بص عليها وكمان وقف.

زياد بدهشة: "يا نهار أبيض.. إنتي فعلاً عروسة بجد."

ملك بتوتر: "إيه؟ في حاجة غلط؟"

آدم بصوت منخفض: "لأ.. إنتي.. حلوة."

ملك اتخضت.. 

ملك بصوت بترعش: "شكراً."

آدم قرب منها ومد إيده.

آدم بهدوء: "يلا.. جدتي مستنينا."

ملك حطت إيدها في إيده.. وإيدها كانت بتترعش.. وإيده هو كمان.

.........

الحفلة بدأت بالليل.

ناس من العيلة وصلوا.. ستات كبار، بنات صغيرين، رجالة.

أمينة كانت فرحانة أوي وبتقدم ملك لكل الناس.

أمينة: "دي ملك عروسة حفيدي.. ما شاء الله عليها.. بنت بلد وأصيلة."

الستات كانوا بيبصوا لملك بانبهار.

ست كبيرة: "ما شاء الله.. آدم اختار كويس.. البنت دي وشها طيب."

ست تانية: "بس سمعت إنه كان في بنت خالته نادية اللي كانت محجوزة له.."

أمينة بجدية: "نادية بنت حلوة بس آدم قلبه مال لملك.. والقلب مش بنتحكم فيه."

الستات سكتوا.

ملك كانت بتسمع الكلام ده وقلبها بيوجعها.. حست بالذنب لأول مرة.. هي بتاخد مكان بنت تانية.

آدم حس بتوترها وقرب منها.

آدم همس في ودانها: "إنتي كويسة؟"

ملك بصوت واطي: "آدم.. أنا حاسة إني بأعمل حاجة غلط.. نادية دي بنت خالتك وأنا.."

آدم بجدية: "ملك.. اسمعيني.. نادية مش ليا وأنا مش ليها.. جدتي هي اللي كانت عايزة الموضوع ده مش أنا.. إنتي ما أخدتيش مكان حد."

ملك بصت في عينه.. وحست إنه صادق.

ملك: "تمام."

آدم مسك إيدها قدام الكل.

آدم بصوت عالي: "يا جماعة.. أنا عايز أقول حاجة."

الكل سكت.

آدم: "أنا عارف إني بعدت عنكم سنين طويلة.. وعارف إني قصرت في حق عيلتي وبلدي.. بس النهاردة أنا رجعت.. ورجعت معايا أحلى حاجة حصلتلي في حياتي.. ملك."

الكل زغرّد.

ملك دمعتها نزلت.. مش دموع تمثيل.. دموع حقيقية.

أمينة كانت بتعيط من الفرحة.

زياد كان في الناحية التانية بيمسح عينه وهو بيكلم نفسه.

زياد في سره: "يا عم أنا اللي عملت الجواز الصوري ده.. إزاي بقى حقيقي كده؟!"

.........

في آخر الحفلة.

الناس بدأت تمشي.

أمينة قربت من ملك وقالت لها بصوت واطي.

أمينة: "ملك يا حبيبتي.. أنا عايزة أقولك حاجة."

ملك: "اتفضلي يا حاجة."

أمينة بصت في عينها بعمق: "أنا ست عشت كتير وشوفت ناس كتير.. وعارفة الفرق بين اللي بيمثل واللي بيبقى حقيقي."

ملك قلبها وقف.

ملك بتوتر: "يا حاجة.. أنا.."

أمينة بابتسامة: "متقلقيش يا حبيبتي.. أنا مش بعاتبك.. أنا بس عايزة أقولك.. إن آدم من جواه مكسور.. وأنتي أول حد من سنين قدر يلملم شوية من كسره.. فمهما اللي بينكم بدأ إزاي.. خلّيه يكمل بصدق."

ملك دمعتها نزلت.

ملك: "يا حاجة.."

أمينة بستها على جبينها: "ربنا يباركلكوا يا حبيبتي.. تصبحي على خير."

وأمينة مشيت لأوضتها.

ملك فضلت واقفة مكانها وقلبها بيتقلب.

آدم قرب منها.

آدم: "جدتي قالتلك إيه؟"

ملك بصت فيه بعيون مليانة دموع.

ملك: "آدم.. إحنا لازم نتكلم."

آدم: "في إيه؟"

ملك: "مش هنا.. بكرة الصبح."

آدم حس إن في حاجة كبيرة هتحصل.

آدم: "تمام."

.........

في أوضتهم بالليل.

ملك كانت قاعدة على السرير مش قادرة تنام.

آدم كان على الأريكة بيبص عليها 

آدم فجأة: "ملك."

ملك: "إيه."

آدم: "الحفلة دي.. النهاردة.. حسيت لأول مرة من عشر سنين إني في بيت.. مش في فندق.. في بيت."

ملك بصت ليه.

آدم بصوت مكسور: "وإنتي السبب."

ملك دمعتها نزلت.

ملك بصوت مخنوق: "آدم.. أنا.. أنا مش عارفة إحنا بنمثل ولا لأ."

آدم سكت.. وبعدين قال  

آدم: "أنا كمان."

.........

الفصل الرابع من هنا