رواية جثة الترعة الفصل الثاني بقلم محمود الأمين
ياسر كمل كلامه وقال إن الشخص اللي شافه وهو بيخلص على صابرين، والشال وقع من على وشه، كان هو الأستاذ فتحي أبوها، المتهم الحالي في الجريمة.
كلام ياسر كان تأكيد للاتهام، وطبعًا واجهنا الأستاذ فتحي بشهادة الشاهد اللي شافه وهو بيخلص على بنته، ولكن الأستاذ فتحي كان مصدوم من كلام اللي اسمه ياسر ده، وقال إن ده محصلش، وإن بعد ما الفرح خلص هو رجع هو ووالدتها على البيت، وخرج زي كل يوم عشان يصلي الفجر، وبعد ما خلص صلاة رجع تاني على البيت وما خرجش.
وهنا كنا محتاجين إننا نراجع السيناريو من الأول، ولما رجعناه كانت كل حاجة بتقول إن اللي ارتكب الجري.مة هو أبوها الأستاذ فتحي، بس موضوع إنه اعتدى على بنته ده أنا ما كنتش بلعه، مش قادر أصدق إن في أب ممكن يعمل كده في بنته؟!
شخص كان مدرس، واتهم قبل كده بارتكاب فعل خادش ضد بنت في المدرسة، ورغم إن الموضوع كان محل شك، تم رفده من الوزارة. كان بيفرق ما بين بناته التلاتة، وكان بيعامل بنته صابرين، أكبر واحدة فيهم، بطريقة مش كويسة. رفض كم عرسان مش طبيعي وبدون إبداء أي أسباب، لحد ما البنت أصرت على منتصر اللي اتجوزها بعد مشاكل كتير مع أبوها.
وليلة الدخلة، منتصر يكتشف إن البنت مش بنت بنوت، ولما يواجهها بالحقيقة، بتصدمه إن اللي عمل فيها كده واعتدى عليها أكتر من مرة هو أبوها فتحي... كان هيخلص عليها، ولكن هربت.
والشارع كله شافها وهي نازلة بتجري وبتصرخ، وهو نازل وراها بالسكينة، والناس منعته إنه يجري وراها وطلبت منه يهدى.
والموضوع بعد كده يتحول لبلاغ باختفاء البنت، ولكن بعد 24 ساعة، الأهالي بتبلغ إنهم لقوا صابرين مقتولة ومرمية في الترعة اللي على الطريق الزراعي. وباستخراج الجث. ة بنكتشف إنها مطعونة أكتر من طعنة بسكينة في ضهرها.
ومع كلام الزوج منتصر وتحريات المباحث، بيطلع إذن من النيابة بالقبض على فتحي الأب وتفتيش بيته، وساعتها بنلاقي سلاح الجري.مة هناك، ملفوف في شال وعليه آثار دم، ده غير الوصية اللي كانت موجودة واللي بتقول إن فتحي كتب كل حاجة لبناته الاتنين نهى وسماح، وحرم بنته صابرين من كل حاجة!
وأثناء تفتيش تليفون المجني عليها، وجدنا رسالة مبعوتة على واتساب للوالد، وكان فيها لوم من صابرين لوالدها على اللي عمله فيها.
وأخيرًا، الشاهد اللي قال إنه شاف الأستاذ فتحي وهو بيخلص على بنته عند الطريق الزراعي، ورغم كل ده الأستاذ فتحي ما زال بينكر كل حاجة.
وفي الوقت ده وصلتنا معلومة من رجالة البحث الجنائي، والمعلومة دي كانت غريبة ومحتاجة تفسير... فتحي وعفاف كانوا متجوزين وعايشين في بيت أهل فتحي، بيت العيلة، والكل عارف إنه كان عندهم مشكلة كبيرة في الخلفة، وبسبب بعض المشاكل اللي كانت ما بين عفاف وأهل فتحي بسبب الموضوع ده، فتحي بيقرر إنه ياخد مراته ويسافر على المنصورة ويستقروا هناك.
طيب فين المعلومة الغريبة؟!
المعلومة الغريبة إن في طفلة ظهرت معاهم وكان عندها أربع سنين، وقالوا قدام أهل المنصورة إنها بنتهم واسمها صابرين.
المعلومة دي كانت خطيرة، وكنا محتاجين نتأكد منها، وعشان كده اتكلمنا مع الأستاذ فتحي، اللي ظهر عليه التوتر شوية لما سمع السيرة دي، ولكن في النهاية اعترف إن صابرين مش بنته، وقال إن في الفترة دي ربنا ما كرمهمش بالخلفة، وعشان كده اتبنوا طفلة من ملجأ، والطفلة دي هي صابرين، وده كان على حسب رغبة مدام عفاف، زوجته.
وبعد فترة، كانت البنت كبرت وبدأت تفهم الدنيا، عفاف حملت في نهى، بس الموضوع كان فيه صعوبة، والدكتور بلغ الأستاذ فتحي إن الطفلة ممكن تموت بعد الولادة، وحتى بعد ما اتولدت كان الاحتمال الأضعف إنها تعيش، وعشان كده صابرين فضلت عايشة معاهم لحد ما كبرت، وكانوا مش قادرين يواجهوها بالحقيقة، فعاشت معاهم على إنها بنتهم زيها زي نهى وسماح.
ولكن الأستاذ فتحي كان بيفضل بناته على البنت بتاعة الملجأ، وقال في التحقيقات: هو ده السبب إني حرمتها من الميراث وكتبت كل حاجة باسم عيالي. كفاية إني ربيتها وجوزتها كمان، تاخد من الميراث؟! وبعدين هي ما سمعتش كلامي واتجوزت اللي اسمه منتصر، اللي أنا شايف إنه عيل صايع ومش بتاع جواز، واتفاجئت والله إنه جاي عشان يتقدملها.
طيب، لو هنفترض إن كل الكلام ده مظبوط...
سلاح الجري.مة كان بيعمل إيه في بيت فتحي؟.. والسؤال الأهم: القاتل، واللي هنعتبر إنه فتحي، مسح البصمات اللي كانت على السكينة ليه ما مسحش الدم؟
كل حاجة كانت بتقول إن فتحي هو اللي ارتكب الجري.مة، وأنا كنت مستبعد موضوع الاعتداء عشان هو أبوها، ولكن بعد ما طلع مش أبوها ومجرد شخص رباها، ومع السبقة اللي كانت معاه في موضوع البنت بتاعة المدرسة اللي قالت إنه حاول يتقرب منها، بدأت أفكر إن الموضوع فعلًا ممكن يكون حصل.
...
رغم إنكار الأستاذ فتحي لجميع التهم، إلا إن معانا جري.مة مكتملة الأركان: الجث. ة موجودة، وسلاح الجري.مة موجود، والمعمل الجنائي أثبت إن الدم اللي على السكينة هو دم صابرين فعلًا، وإحنا لقينا سلاح الجري.مة في بيت القاتل، ده غير الاشتباه في واقعة اعتداء اعترفت بيها المجني عليها لجوزها ليلة الدخلة، وشاهد الإثبات اللي قال إنه شاف الأستاذ فتحي وهو بيق. تل بنته، ورسالة الواتساب بتاعة البنت اللي بتثبت إن واقعة الاعتداء حدثت بالفعل.
وعشان كده اتحول الأستاذ فتحي للنيابة اللي أمرت بحبسه أربع أيام على ذمة التحقيق، وبعد ما كل حاجة اكتملت، اتحددت جلسة محاكمة لفتحي عشان يتحكم عليه.
وأنا كنت مستني الجلسة دي بفارغ الصبر، ومع توافر كل الأدلة وشهادة الشهود، حكمت المحكمة على فتحي بإحالة أوراقه إلى فضيلة المفتي.
في اللحظة دي حسيت إن حق صابرين رجع، البنت اللي اتربت في الملجأ واستحلها فتحي لنفسه وحاول يقرب منها ونجح في ده، غير المعاملة السيئة اللي كان بيعاملها للبنت من غير ما تعرف الحقيقة وإنها مش بنته.
بس السؤال اللي عندي رغم كل ده: هو إيه الدافع اللي عند الأستاذ فتحي عشان يقتلها؟
الإجابة اللي كانت عندي بسيطة، إنه أكيد خاف البنت تفضحه، خصوصًا إن جوزها عرف في ليلة الدخلة إنها مش بنت بنوت، وده الدافع الوحيد اللي ممكن أقول إنه قتلها عشانه.
وبعد الحكم رجعت بيتي ونمت، بس مش عارف ليه كنت مش مرتاح في النوم، وكل ما كنت أغمض عيني كنت أسمع صوت فتحي وهو بيصرخ وبيقول: مظلوم!
...
مرت ست شهور، وخلاص فاضل على تنفيذ حكم الإعدام ساعات قليلة، وفي الوقت ده بيتصل بيا الرائد عادل من البحث الجنائي، وبلغني بمعلومة مش عارف إزاي ما حدش عرفها وقت التحقيق.
والمعلومة دي بتخص ياسر، الشاهد الوحيد في القضية، واللي قال إنه شاف الأستاذ فتحي وهو بيخلص على بنته.
ياسر ده عنده أخ اسمه عماد، والكل عارف إن عماد شخص عنده متلازمة غريبة كده ومريض توحد، بس زيه زي أي بني آدم، لما شاف صابرين حس إن البنت دي هي اللي هيكمل معاها حياته، فطلب من أخوه ياسر يروح معاه ويتقدموا للبنت.
وحرفيًا اتمسح بيهم الأرض من الأستاذ فتحي، والولد اتضرر نفسيًا بشكل كبير، وبعد ما رجعوا البيت، عماد دخل ونام، والصبح أخوه ياسر راح يصحيه لقيه متوفي.
وده معناه إن ممكن يكون ياسر شهد الشهادة دي ضد الأستاذ فتحي عشان ينتقم منه، خصوصًا إن دكتور المستوصف اللي في البلد عندهم قال للرائد عادل إن ياسر في نفس اليوم ده كان محجوز في المستوصف، وكان جسمه سخن وبيخترف، يعني مستحيل يكون شاف الجري.مة.
وساعتها اتحركنا بسرعة بإذن من النيابة على بيت ياسر. كان لازم نعرف منه الحقيقة عشان نوقف حكم الإعدام.
وأول ما وصلنا بيته ودخلنا، كانت في انتظارنا صدمة غير متوقعة، عشان لقينا...
شكرا لزيارتكم عالم روايات سكيرهوم
