رواية جثة الترعة الفصل الثالث بقلم محمود الأمين
أول ما دخلنا البيت عند ياسر، لاحظنا إن كل حاجة عنده بتقول إنه كان بيخطط عشان ينتقم من الأستاذ فتحي.. الصور اللي موجودة على الحيطان، أخبار مقصوصة من الجرايد ومتعلقة على الحيطة، وكأن الشخص ده كان حابب يشوف الأخبار دي عشان تطفي ناره من اللي حصل في أخوه زمان.
ولما دخلنا أوضة النوم، ياسر كان نايم على السرير وفي سابع نومه، وبمجرد ما فتح عينيه ولقانا في وشه، اتخض وكان بيتلفت حوالين نفسه زي المجنون. قبضنا عليه واتحركنا بيه على قسم الشرطة.. وهناك بدأت التحقيقات مع ياسر، الشاهد على جري.مة ق.تل صابرين فتحي، واللي قال في أقواله السابقة إنه شاف والدها الأستاذ فتحي وهو بيخلص عليها..
ولكن الرائد عادل من فريق البحث الجنائي قدر يوصل لمعلومة خلال الساعات اللي فاتت، والمعلومة دي كانت من المستوصف اللي في البلد. الدكتور اللي هناك بلغ الرائد عادل إن يوم الجري.مة ياسر كان محجوز في المستشفى بسبب حمى شديدة.
يعني مستحيل يكون شاف الجري.مة.. وده بيتنافى مع شهادة ياسر اللي قال إنه كان بيشتغل في الأرض، وشاف صابرين، ولما حب يقرب منها عشان يتأكد إذا كانت هي صابرين اللي كانت بتتجوز امبارح، ظهر واحد لابس شال على وشه ومغطي ملامحه، وطعنها بالسكينة من ضهرها، وبعدين رمى جث.تها في الترعة. وعلى حسب كلامه، الشخص ده يبقى والدها الأستاذ فتحي.
ولكن التحريات اللي اتعملت عن ياسر بتقول إن في عداوة قديمة ما بينه وما بين الأستاذ فتحي، وده بسبب أخوه عماد، واللي كان عنده متلازمة كده بتخليه يتلعثم في الكلام بجانب التوحد.. ورغم كده، عماد لما شاف صابرين أعجب بيها وطلب من أخوه إنه عاوز يتجوزها، ولكن ساعتها الأستاذ فتحي رفض، وكان في إهانة كبيرة لعماد وأخوه ياسر بسبب الحالة الصحية لعماد.. وفي اليوم ده عماد رجع البيت ونام، بس لما ياسر جه عشان يصحيه الصبح، لقاه اتوفى.
وبدأت كلامي مع ياسر، اللي قولتله:
_ أنت عارف أنت هنا ليه يا ياسر؟
= في الحقيقة لا، بس أتمنى إني أعرف يعني!
_ أنت هنا عشان متهم بالشهادة الزور في جري.مة ق.تل صابرين، وقولت في أقوالك إنك كنت بتشتغل في الأرض وشوفت صابرين يومها وهي ماشية في الطريق الزراعي بالليل متأخر، وكانت بتتلفت حوالين نفسها، وقولت إنك شوفت القاتل وإنه هو أبوها الأستاذ فتحي.. لسه مصمم على أقوالك يا ياسر؟
= أيوه، عشان ده اللي حصل فعلًا.
_ بس تحرياتنا بتقول حاجة تانية.. التحريات بتثبت إنك كنت في المستوصف وتعبان يوم ارتكاب الجري.مة، يعني مستحيل تكون شوفت الجري.مة.. وأكيد أنت اخترت تشهد عليه عشان تنتقم لأخوك عماد اللي كان ضحيته وما قدرش ظروفه.
= الكلام ده مش حقيقي يا باشا، أنا خرجت من المستوصف قبل الفجر، وكان معايا وائل زميلي، وبعد ما خرجني طلبت منه يروح وأنا هروح لوحدي، وفضلت ماشي لحد ما وصلت الأرض، وكنت عامل عشة صغيرة في الأرض بتاعتنا بشرب فيها الشاي، أو ساعات كنت باخد الغدا معايا لو هتأخر هناك، وعلى الساعة 3 حصلت الجري.مة وشوفتها بعينيا.
....
وهنا بان كذب ياسر للمرة التانية، عشان حسب تقرير الطب الشرعي الخاص بجث.ة صابرين.. الجري.مة حصلت الساعة 4 وربع الفجر، مش 3 زي ما قال.
بس اللي فهمناه ساعتها من كلامه يخليه موضع اتهام، خصوصًا لما روحت المستوصف وعرفت تفصيلة مهمة جدًا من ممرضة بتشتغل هناك اسمها صفاء.. الممرضة صفاء قالت:
إنها في اليوم ده كانت بتحكي مع واحدة زميلتها على اللي حصل بره بعد الفرح.. وطبعًا البلد كلها سمعت عن صابرين اللي سرقت وفتحت الباب بتاع الشقة ونزلت تجري، ونزل وراها جوزها منتصر وفي إيده سكينة، والكلام ده سمعه ياسر وهو في المستوصف، وسأل الممرضة صفاء على الحكاية، وساعتها عرف إن صابرين هربت من بيت جوزها، وإنها لحد دلوقتي محدش يعرف هي راحت فين؟!
ومن بعد ما بيعرف المعلومة دي، بيقرر إنه يخرج من المستوصف في نفس الوقت.. ولما راجعت الدفتر بتاع الخروج الخاص بالحالات، اكتشفت إنه خرج حوالي الساعة 3 ونص، يعني قبل الجري.مة ما تحصل. وعلى حسب أقواله، إنه كان معاه واحد صاحبه اسمه وائل، اللي سابه بعد ما خرج وياسر راح على الأرض.
وعرفنا من أهل البلد إن أي حد معاه أرض عامل عشة زي دي بيكون معاه بعض الأدوات، زي كنكة الشاي وكوبايات وشاي وسكر وسكينة وكذا حاجة تخص القعدة.
وده اللي لفت نظري في كلام الناس.. جايز يكون ياسر هو اللي ارتكب الجري.مة، يقتل البنت اللي معاها مشاكل مع جوزها، واللي عرف من خلال الممرضات إن جوزها أصلًا كان نازل يجري وراها بسكينة، ويشهد إن اللي خلص عليها هو أبوها، خصوصًا بعد ما أكيد الكلام اللي في المباحث كان وصل البلد والكل عرف الكلام اللي قاله منتصر في التحقيقات، إن الأستاذ فتحي هو اللي اعتدى على بنته، وأكيد هو اللي ق.تلها.
وهنا هنيجي للنقطة اللي هيكون عليها علامات استفهام.. السكينة وصلت إزاي لبيت الأستاذ فتحي؟
حسب شهادة الشهود، الكل قال إنهم شافوا ياسر راجع بيته أثناء صلاة الفجر، وفي معلومة أهل البلد كلهم يعرفوها عن الأستاذ فتحي.. إنه بيسيب باب شقته موارب عشان في مشكلة عنده في كالون الباب، ومش عاوز يصحي مراته بدري أوي كده، فكان بيسيب الباب موارب وينزل يصلي الفجر ويرجع يقفل الباب ويكمل نومه..
وأكيد ياسر على علم بالمعلومة دي، فطلع للأستاذ فتحي بعد ما مسح بصماته من على السكينة، وساب السكينة في أوضة نومه وسط هدومه، وخرج بسرعة من غير ما حد يشوفه..
ولما منتصر اتهم الأستاذ فتحي إنه هو اللي ق.تل بنته، ومن قبلها اعتدى عليها.. ياسر راح وأكد على كلام منتصر عشان يلبّس فتحي الجري.مة.. ده السيناريو والاستنتاج اللي عندي.
واللي خلاني أستنتج السيناريو ده، الحاجات اللي لقيناها في بيت ياسر لما رحنا نقبض عليه، اهتمامه بالقضية والأخبار، وده كان باين من الصور ومقصوصات الجرايد اللي كانت متعلقة في كل حتة.
بس ياسر كان بينكر كل ده.. وقال إنه ما ق.تلش حد، وإنه شهد باللي شافه.
....
كان خلاص فاضل وقت قليل على تنفيذ حكم الإعدام في الأستاذ فتحي، اللي كنت حاسس إنه بريء، وظهور التفاصيل دي في الوقت ده كنت حاسس إنها إشارة من ربنا عشان نلحق واحد مظلوم قبل ما حبل المشنقة يتلف حوالين رقبته.. فضلنا نضغط على ياسر عشان يتكلم ويقول الحقيقة.
وبدأنا نواجهه بكل حاجة هو حكاها، بالأدلة والبراهين اللي عندنا اللي بتثبت إنه كذاب بنسبة 100%.
وبعد حوالي ساعة من المحاولات، أخيرًا ياسر قرر يتكلم ويعترف باللي حصل يوم الجري.مة.. بس الكلام اللي قاله ياسر في التحقيقات كان صدمة بكل ما تحمله الكلمة من معنى.. حكاية هترجعنا لنقطة الصفر وهتخلينا نعيد حساباتنا من الأول..
وكل اللي أقدر أقوله من الكلام اللي سمعته إننا قدام تفكير شيطان خطط عشان يرتكب جري.مة زي دي، ولكن تفصيلة واحدة غيرت المجني عليه من شخص لشخص.. ولكن الحاجة اللي تأكدنا منها إن الشهادة اللي شهدها ياسر كانت شهادة زور.. وإن الأستاذ فتحي بريء، وده خلانا نتحرك بسرعة عشان نوقف حكم الإعدام.
في اللحظة دي كان نفسي أوقف الزمن. بطبيعة شغلي كنت عارف إني هتحط في موقف زي ده، إني أجري بأقصى سرعة عشان أوقف حكم إعدام لشخص مظلوم.
كنا بنتصل بالمأمور اللي هينفذ الحكم، ولكن كان مش بيرد، وده اللي خلانا نتحرك على المكان اللي هيتم فيه الإعدام.. وفعلاً وصلنا، وكنا سامعين الشيخ وهو بيقول: وأشهد أن لا إله إلا الله، وأن سيدنا محمد رسول الله (عليه أفضل الصلاة والسلام).
كان بينطق فتحي الشهادة، وفي اللحظة دي دخلنا الأوضة، لكن...
شكرا لزيارتكم عالم روايات سكيرهوم
