رواية جثة في علبة بسكوت الفصل الثالث 3 بقلم ملك ابراهيم

 

رواية جثة في علبة بسكوت الفصل الثالث والأخير بقلم ملك ابراهيم


_فضـلت ماسـك المفتـاح وببـص للـرقـم المحفـور عليـه.. رقـم 8!..

كان واضح إن اللي سـاب المفتـاح قاصـد يوصلنـا لحاجـة معيـنة، والسـؤال كان إيه اللي ممكن يكون ورا الرقـم دا؟!..

بصيت لمُراد وأنا بقـول.. 

_عاوزك تعرفلي المفتاح دا بيفتح إيه.. وراجع كل الأماكن اللي ليها علاقة بالسوبر ماركت، خصوصًا المخازن القديمة..

_حاضر يا باشا..

_وكمان عاوزك تجيبلي بيانات شريف، العامل القديم اللي سامح قال إنه كان معاه نسخة من المفتاح..

مُراد خد المفتاح وخرج، وأنا رجعت بصيت للتليفون اللي لقيناه في المخزن..

كان واضح إن صاحب المكالمات المجهولة قريب مننا، وبيتابع كل خطوة بنعملها.. لكن ليه كل الترتيب دا؟! وليه مصمم يخلينا نشك في هوية نادية؟!..
___________________
وبعـد حـوالي سـاعة، مُـراد رجـع المكـتـب ومعـاه شـوية أوراق..

_لقـيت حاجـة يا باشـا..

_قـول..

_المفـتاح بيفـتح مخـزن خارجـي تابع للسـوبر ماركت، موجـود في عمـارة قريبة من هنا.. ورقم الوحـدة بتاعته «8»..

قومت من مكاني وأنا باخـد حاجتـي وبقـول.. 

_يلا بينا..

_طب وشـريف؟!..

_وصلتله؟!..

_أيوه.. بس الراجل سـاب الشـغل من فترة، وبيقول إنه سلم المفتاح اللي معاه للإدارة، ومش ليـه أي علاقة بالسـوبر مـاركت من وقتها..

_تمام.. خليه تحـت الملاحظـة لحـد ما نتـأكد من كلامـه..

خرجنا وروحـنا للمخـزن.. كان المكان في بدروم عمارة قديمة، والباب عليه رقم 8.. طلعت المفتاح وحطيته في القفل، ولفـيته.. الباب اتفتح.. دخلنا وبدأنا نفـتش المكان..

كان فيه كراتين قديمة ورفوف عليها حاجات متخزنة، لكن في آخر المخزن كان فيه صندوق صغير متغطي بقطـعة قماش.. قربـت منـه وفتحتـه..

لقيت جـواه شنطة حريمي، ومحفظة، وبطاقة شخصية بإسم نادية، وكارت بنك، وصـورة قديمـة لـ نادية مع بنت أصغر منها.. مسـكت الصـورة وقلبـتها..

كـان مكتـوب علىٰ ضهرها:-

«رحمة.. بنتي اللي مخلفتهاش».. بصيت لمُراد..

_واضح إن البنت دي كانت قريبة منها جدًا..

مُراد مسـك الصورة وبص فيها..

_طب ما يمـكن دي أختـها اللي كانت في محافظـة تانـية؟!..

_لأ.. دي مش أختها.. دي حد تاني لازم نعـرفه..

كملت تفتيش الصندوق، ولقيت إيصال تحويل بمبلغ خمسة وعشرين ألف جنيه، ومعاه ورقة مكتوب فيها بخط إيد نادية:- 

«أنا ساعدتك لما كنتي محتاجة، ومطلبتش منك غير الأمانة.. متخلينيش أندم إني وثقت فيكي».

وقفت عند الجملة الأخيرة..

_مُراد.. هاتلي كل المعلومات عن البنت اللي في الصورة..
___________________
رجعـنا القسـم، وبعـد مراجعـة بيانـات العاملـين السابقـين في السـوبر ماركـت، عرفنـا إن البنـت إسمـها رحـمة، وكانت شـغالة في المحـل قبـل الحـادث بحـوالي شهـر..

طلـبت من سامـح ييجـي تانـي، وحطيـت الصـورة قدامـه..

_تعـرف البنـت دي؟!..

بص للصورة وقال..

_أيوه.. دي رحمة، كانت شغالة عنـدنا..

_إيه علاقتها بنادية؟!..

سامح اتردد شوية، وبعدها قال..

_نادية كانت بتساعدها.. كانت بتديها فلـوس، وساعات كانت بتبعتلها طلبات للبيت، ورحـمة كانت بتوصلها بنفسها..

_طب وإيه اللي حصل بينهم؟!..

_من حوالي شهـر، نادية اكتشفت إن فيه خمسة وعشرين ألف جنيه ناقصين من شنطتها بعد ما رحمة راحتلـها البيت توصلها حاجة.. حصلت بينهم مشكلة كبيرة، ونادية واجهتها بالسـرقة.. وبعدها رحمة سابت الشُغـل..

بصيت لمُراد..

_يبقى كدا عنـدنا دافع واضح..

_بس لسه لازم نعرف كانت فين ليلة الحـادثه..

طلبـت من عمـاد يجيـب رقم رحمة، ويحدد آخر مكان ظهر فيه تليفونها ليلة الجريـمة..

وبعد مراجـعة البيانات، ظهر إن تليفونها كان قريب جدًا من السوبر مـاركت في نفس الليـلة..

مُراد بصلي وقال..

_شكلنـا قربنـا يا باشـا..

_لسـه.. عاوز تسجيـلات الكاميـرات الـلي فـي الشـارع المقابـل للمحـل، مـش كاميـرات السـوبر ماركـت بـس..
___________________
بعد مراجعة التسجيلات، ظهرت رحمة وهي داخلة من الباب الجانبي للسوبر ماركت الساعة عشرة واثنين وأربعين دقيـقة مساءً..

وبعد ساعـات، ظـهرت نفس البنت وهي خارجـة الساعـة أربعة وأربعة وخمسيـن دقيقة صباحًـا..

لكـن المـرة دي كانـت لابـسة جاكيـت أسود وبلوزة بيضا وبنطلـون أسود.. نفس الطقم اللي كانت نادية لابساه في الصور.. كبرت الصورة، وبدأنا نقارن ملامحها بصورة رحمة.. مُراد قرب من الشاشة وقال..

_دي هي يا باشا..

هزيت راسي..

_أيوه.. دي رحمة..

_يعني الست اللي ظهرت في الكاميرات مش نادية؟!..

_بالظبط.. رحمة لبست هدوم نادية، وأخدت ساعتها، وخرجت قدام الكاميرا علشان تخلينا نصدق إن ناديـة كانت لسه عايشة..

مُراد رجع بص للتسجيل..

_طب والمكالمة اللي قالت فيها إنها صاحبة الجثـة الأولى؟!..

_هي كمان رحمة.. كانت بتتكلم من التليفون اللي خبتـه في المخزن، وبتحاول تخلينا نشك في هوية الجثـة..

_وجملة إن الجريـمة الحقيقيـة لسه محصلتش؟!..

_كانت مجرد محاولة تخويـف وتشتيـت.. عايزانـا نفضل مستنيـين جريمـة تانية بدل ما نركز في اللي حصل فعلًا..

سكت لحظة، وبعدها كملت..

_هات رحمة..
___________________
دخلت رحمـة غرفة التحقيق، وكانت بتحـاول تبان هاديـة، لكن أول ما حطيـت صورة الكاميرا قدامها، ملامحـها اتغيرت..

_تعرفي الست دي؟!..

بصت للصورة وسكتت..

_دي إنتي يا رحمة.. مش نادية..

رفعت عيني وقالت..

_أنا مش فاهمة حضرتك بتقول إيه..

حطيت قدامها صورة الإيصـال والملابس..

_الطقم اللي اشتريتيه، واللي ظهر في الكاميرات، مطابق لطقم نادية.. والساعة اللي كانت في إيدك هي نفسها ساعة نادية اللي اختفت بعد الجريمة..

بدأت تتوتر..

_إنتي دخلتي السـوبر مـاركت الساعة عشرة واثنين وأربعين دقيقة، وخرجتي الساعة أربعة وأربعة وخمسين دقيقة.. وفضلتي طول الوقت بتحاولي تخلـقي دليل إن نادية كانت لسـه عايشة..

مُراد حط قدامها صورة المخزن..

_والمفتاح رقم «8» وصلنا لحاجات ناديـة، والصورة اللي بينكم، وإيصـال الخمسـة وعشـرين ألف جنيه..

بصت للصـورة، وبعدها نزلت راسهـا..

_أنا كنت بحب نادية..

_اللي بيحب حد مش بيسـرقه، ولا بيقتـله..

بدأت عينيها تدمع..

_أنا مكنتش ناوية أقتلـها..

_أمال إيه اللي حصل؟!..

سكتت شوية، وبعدها بدأت تحكي..

_نادية اكتشفت إني أخدت الفلوس، وطلبت مني أرجعها.. حاولت أشرحلها إني كنت محتاجاها، وإن كنت هرجعهالهـا، لكنها رفضـت تسمعني.. وقالت إنها هتبلـغ الشرطة..

_وبعدين؟!..

_اتخانقـنا.. وهي زقتني، وأنا وقعت.. وبعدها مسكـتها من إيدي، وحصل بينا شد وجذب.. وقعت واتخبطت في الرف، ولما حاولت تقوم مسكت رقبتها علشان أسكـتها.. بس هي فضلت تقـاومني لحد ما مـاتت..

_وبعد ما ماتت؟!..

_خفت.. مكنتش عارفة أعمل إيه.. وبعدها افتكرت الكاميرات.. لبسـت هدومـها، وأخدت ساعتـها، وخرجت قدام الكاميـرا علشان أي حد يشـوف التسجيـل يفتـكر إنها ناديـة..

_والتليفون؟!..

_أنا اللي حطيته في المخزن.. كنت بتصل بيك منه، وبقولك إني صاحبة الجثـة الأولىٰ، علشان أخليـك تشك في إن الجـثة مش نادية..

_والرسالة اللي اتبعتت لمُراد؟!..

_أنا اللي بعتها..

بصيتلها شوية، وبعدها طلعت صورة عماد وحطيتها قدامها..

_طيب.. وعماد؟!..

أول ما شافت الصورة، وشها اتغير..

_هو كمان كان لازم يمـوت؟!..

بدأت تعيط، وقالت..

_عماد شافني وأنا خارجة من المحل.. كان راجع ياخد حاجة نسيها، ولما شافني بالهدوم دي استغرب.. وبعدها دخل وشاف نادية على الأرض..

_يعني عرف إنك قتلتيـها؟!..

_أيوه.. هددنـي إنه هيبلغ الشـرطة، وحاول يمنعـني أمشي.. حصل بينا خنـاق، وأنا ضربتـه بحاجة كانت موجودة في المخزن.. وقع ومـات..

_والرسالة اللي كانت جنب جثـته؟!..

_أنا اللي كتبتها.. كنت عايزة أخليكم تشكوا في إن نادية هي اللي ظهرت في الكاميرا، وإن فيه حد تاني ورا الموضوع..

_والمفتاح رقم «8»؟!..

_كان مفتـاح المخـزن اللي خبيـت فيه حاجات نادية.. كنت عايزاكم تلاقـوه وتروحوا هناك..

مُراد قرب منها وقال..

_يعني كل دا كان مخطط ليه؟!..

رحمة مسحت دموعها وردت بصوت ضعيف..

_أنا كنت بحـاول أهرب من اللي عملته..

_كل مرة حاولتي تهربي، كنتي بتضيفي جريمة جديدة فوق اللي قبلها.. ناديـة ماتـت بسببك، وعماد مـات علشان شاف الحقيقة، وإنتي فضلتي تلعبي بينا لحد ما الأدلة كلها رجعت ليكي..

سكتت، ومقدرتش ترد..
___________________
بعد اعتراف رحمة، طلبت مراجعة تقرير الطب الشرعي، ومطابقة الأدلة مع أقوالها..

التقرير أكد إن نادية مـاتت نتيجة الخنق، وإن إصـابة الرأس كانت نتيجة الاشتباك اللي حصل قبل الوفـاة..

أما عماد، فالإصابـات اللي اتعرض ليها كانت متوافقة مع اعتراف رحمة بالاعتـداء عليه جـوا السـوبر مـاركت..

كمان مراجعة تسجيلات الكاميرات أثبتت دخول رحمة وخروجها في التوقيت اللي حددته، وتم ربط التليفون اللي لقيناه بالمكالمات المجهولة اللي وصلتني..

وبالنسبة لسامح، فثبت إنه كان مخبي موضوع المفتاح القديم خوفًا من المساءلة، لكنه مكنش مشارك في الجريمة.. وسمير أكد إن عماد كان شاكك في رحمة بسبب سرقـة الفلوس، أما شريف فثبت إنه سلم نسخته من المفتاح بعد ما ساب الشغل، ومفيش دليل يربطه بالحـادث.. كدا بقت كل تفصيلة ليها تفسير..

الساعة اللي اختفت من إيد نادية، والطقم اللي ظهرت بيه رحمة في الكاميرات، والمكالمات المجهولة، والرسالة اللي اتبعتت لمُراد، والمفتاح رقم «8»، وحتى الورقة اللي اتلاقت جنب جثـة عماد..

كلها كانت جزء من محاولة واحدة علشان تبعد الشبهة عنها..
___________________
خرجت من غرفة التحقيق، ومُراد كان مستنيني برا..

_خلصت يا باشـا؟!..

_أيوه.. اعترفـت بكل حاجة..

_يعني الست اللي كانت بتكلم حضرتك طول الوقت هي رحمة؟! واللي خرجت من السـوبر مـاركت؟!..

_رحمة..

_واللي قتلت نادية وعماد؟!..

_رحمة برضه..

هز راسه وقال..

_طب الحمد لله.. أخيرًا بقينا عارفين مين عايش ومين ميـت ومين بيكلمنا من التليفون..

ابتسمت بسخرية..

_إنت لسه فاكر المكالمة؟!..

_يا باشا دي كانت أول مرة في حياتي حد يكلمني ويقولي إنه ميـت ولسه عايش في نفس الوقت..

ضحكت، وقفلت ملف القضية.. كنت فاكر إن أصعب جزء في الجريمـة هو إننا نعرف القاتـل، لكن قضيـة الزمالك أثبتتلي إن ساعات أصعب حاجة هي إنك تفرق بين الحقيقة والصورة اللي حد عايزك تصدقها..

نادية كانت ميـتة من البداية، ورحـمة هي اللي خرجت قدام الكاميرات بملابسها وساعتها، وعماد دفع حيـاته تمن إنه شاف الحقيقة..

أما كل الألغاز اللي اتعملت حوالين القضية، فكانت مجرد ستارة علشان تخبي جريمتين ورا بعض..

وفي النهاية.. الجاني ديما بيغلط، ومهما حاول يضللنا، بييجي دليل صغير يكشف كل اللي عمله.


انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم



شكرا لزيارتكم عالم روايات سكيرهوم

تعليقات