رواية عروس البحر الفصل الرابع 4 بقلم نون لاشين

صباح اليوم التاني 

ملك صحيت من النوم 

التفتت ناحية الأريكة.. لقتها فاضية.

آدم مش موجود.

.. لقت ورقة صغيرة على المخدة جنبها.

"نزلت أشرب قهوة على البحر.. متقلقيش.. هرجع قبل ما جدتي تصحى."

ملك بصت على الورقة.. 

من غير ما تحس.. ابتسمت.

ملك بتكلم نفسها: "إنتي بتبتسمي ليه يا ملك؟ ده ورق.. ورق وبس."

.........

على البحر قدام الفيلا.

آدم كان قاعد على كرسي خشبي بيشرب قهوة وبيسمع صوت الموج.

زياد نزل له 

زياد بتثاؤب: "صباح الخير يا عريس.. نامت كويس؟"

آدم ببرود: "زياد.. لو قلت كلمة عريس تاني هرميك في البحر."

زياد بضحك: "تمام تمام.. بس بصراحة يا آدم.. إمبارح في الحفلة.. إنت كنت مختلف."

آدم بصله: "مختلف إزاي."

زياد بجدية: "كنت بتبص لملك بشكل مختلف.. مش نظرة تمثيل.. نظرة حقيقية."

آدم سكت.

زياد: "آدم.. أنا صاحبك وأعرفك من وإحنا أطفال.. إنت ما بصيتش لبنت في حياتك بالطريقة دي."

آدم بعصبية: "زياد.. إحنا اتفقنا إن الموضوع ده صوري.. أسبوع وينتهي."

زياد بتنهيدة: "آه.. بس المشكلة إن الأسبوع ده مش هيخلص باللي إنت عايزه."

آدم: "يعني إيه."

زياد: "يعني إن نادية وصلّت."

آدم اتجمد.

آدم بصدمة: "ايه؟!"

زياد: "آه.. وصلت بالليل من أسوان.. جدتك هي اللي نادتها."

آدم قام من الكرسي بعصبية: "جدتي نادتها؟! ليه؟!"

زياد: "قالت لها إن الفرح حصل وهي عايزها تيجي تبارك للعروسين."

آدم حط إيده على دماغه: "يا نهار أسود.. نادية هتشوف ملك.. هتفهم إن في حاجة غلط.. هتعمل فضيحة."

زياد: "متقلقش.. أنا هتكلم مع نادية وأشرح لها."

آدم بصله بنظرة حادة: "إنت مش هتتكلم مع حد.. أنا اللي هتكلم معاها."

.........

ملك نزلت السلم ولقت ست شابة قاعدة على الكنبة جنب أمينة.

الست كانت حلوة.. شعرها أسود طويل وعيونها خضرا ولبسها أنيق.

نادية.

أول ما نادية شافت ملك، بصت ليها من فوق لتحت بنظرة باردة.

أمينة بفرحة: "ملك يا حبيبتي تعالى.. دي نادية بنت خالة آدم.. جات من أسوان عشان تباركلكوا."

ملك قربت بابتسامة: "أهلاً بيكي يا نادية.. نورتي."

نادية بصت لها ببرود وقالت بصوت فيه سم: "أهلاً.. إنتي ملك اللي خطفتي آدم ؟"

أمينة بعتاب: "نادية! كلام إيه ده؟!"

نادية بابتسامة مصطنعة: "أنا بهزر يا تيتا.. بس بصراحة كنت مستنية أشوف البنت اللي خلت آدم يتجوز في أسبوع."

ملك حسّت بالوجع في كلامها بس مسكت نفسها.

ملك بهدوء: "الحب مش بيتأخر يا نادية.. لما بيجي بيجي."

نادية بصت لها بنظرة حادة وسكتت.

أمينة حست بالتوتر وغيرت الموضوع.

أمينة: "يلا بينا نفطر.. الطباخ عمل فطير مشلتت."

.........

على سفرة الفطار.

الكل كان قاعد.. أمينة في النص، وملك جنبها، وآدم قدام ملك، ونادية جنب آدم، وزياد في الآخر بياكل بصمت.

نادية بدأت تتكلم مع آدم بشكل مبالغ.

نادية بدلع: "آدم.. فاكر لما كنا صغيرين وكنا بنلعب في الجنينة في أسوان؟ كنت دايماً بتقولي إنك هتتجوزني لما نكبر."

آدم ببرود: "كنا أطفال يا نادية."

نادية بابتسامة: "أطفال بس الوعد وعد."

ملك حست بحاجة في صدرها.. حاجة مش عارفة تسميها.. غيرة؟ زعل؟ مش عارفة.

أمينة حست بالموقف وقالت بسرعة: "نادية يا حبيبتي.. إنتي عارفة إن آدم اختار ملك.. وخلص الكلام."

نادية سكتت بس عيونها كانت بتقول كلام تاني.

بعد الفطار، نادية قامت وراحت على آدم وهو واقف في البلكونة.

نادية بصوت واطي: "آدم.. أنا عارفة إن الجواز ده صوري."

آدم اتخض.

آدم بصلابة: "إنتي بتقولي إيه؟"

نادية بابتسامة خبيثة: "أنا مش غبية يا آدم.. شوفتكم إمبارح في صور الحفلة.. إنت بتبص لها بس مش بتلمسها.. مش بتقرب منها.. الجواز ده تمثيلية وجدتك مش هتصدق لو عرفت."

آدم بعصبية: "نادية.. لو قولتي كلمة لجدتي هتندمي."

نادية بتهديد هادي: "أنا مش عايزة أأذي حد يا آدم.. أنا بس عايزة حقي.. إنت كنت بتاعي قبل ما البنت دي تظهر."

آدم بصلها بنظرة باردة: "أنا ما كنتش بتاع حد يا نادية.. ولا هكون. وإنتي لو عايزة تفضلي هنا، هتفضلي كضيفة محترمة. لو لأ.. السواق جاهز يوصلك المحطة."

نادية وشها اتغير.. ما كانتش متوقعة إنه يكون حاد كده.

نادية بدموع مزيفة: "آدم.. أنا بحبك من وأنا صغيرة."

آدم بصوت هادي : "وأنا مش بحبك يا نادية.. ومحببتش حد غير.. "

وقف فجأة.. ما كملش الجملة.

نادية بصت له بدهشة: "غير مين؟"

آدم سكت ودار وراح جوه.

نادية فضلت واقفة في البلكونة ودموعها حقيقية المرة دي.

.........

في المكتبة بتاعة الفيلا.

ملك كانت قاعدة لوحدها بتدور على كتاب تقرأه.

الأوضة دي كانت مليانة كتب قديمة وصور على الحيطة.

ملك بصت على صورة قديمة.. صورة جد آدم وهو شاب واقف جنب راجل تاني.

الراجل التاني كان شبه جد ملك.

ملك اتخضت.. قربت من الصورة وبصت كويس.

الراجل التاني كان جدّها بالظبط.

قلبت الصورة من ورا ولقت كتابة قديمة بالخط الإيد.

"أنا وسالم شركاء في كل حاجة.. البيت والبحر والتجارة.. اللي بينا مش ورق.. اللي بينا دم."

ملك قلبها بدأ يدق بسرعة.

فتحت الدرج بتاع المكتب ولقت ظرف 

فتحت الظرف ولقت جوه ورقة .. عقد شراكة بين جدّها وجد آدم.

العقد كان بيقول إن البيت ملك للاتنين.. مش لجد آدم لوحده.

ملك إيدها بدأت ترتعش.

الورق اللي آدم جاي بيه.. الورق اللي بيقول إن جدّها باع البيت.. الورق ده مش كامل.

البيت مش لآدم لوحده.. البيت من حقها هي كمان.

الباب اتفتح فجأة.

آدم دخل ولقاها ماسكة الورقة وإيدها بترتعش.

آدم بقلق: "ملك.. في إيه؟"

ملك بصت له بعيون مليانة دموع وغيظ.

ملك بصوت مرتعش: "إنت عارف الورقة دي؟"

آدم بص على الورقة ووشه اتغير.

آدم: "دي.. دي إيه؟"

ملك بصرخة مكتومة: "دي عقد شراكة بين جدّي وجدّك! البيت مش بتاع جدّك لوحده يا آدم! البيت من حق جدّي كمان! وإنت جاي تقولني إن جدّي باع حصته؟!"

آدم بص على الورقة بصدمة.. هو كمان ما كانش شافها قبل كده.

آدم: "ملك.. أنا.. أنا ما كنتش عارف."

ملك بدموع: "ما كنتش عارف؟! إنت جاي تاخد بيتي وبتقول ما كنتش عارف؟!"

آدم: "الورق اللي المحامي جابو كان بيقول إن جدّي اشترى حصة جدّك.. أنا صدقت."

ملك بغيظ: "صدقت إيه؟! الورق اللي معاك ناقص! العقد ده بيثبت إن الشراكة كانت بالأرض والبيت مع بعض! جدّك ما اشتراش حاجة من جدّي لأنهم كانوا شركاء بالأصل!"

آدم قعد على الكرسي وحط إيده على دماغه.

آدم بصوت مكسور: ".. أنا كنت هطلع ست كبيرة في السن من بيتها بورق مزور."

ملك بدموع: "مش مزور.. بس ناقص.. والمحامي بتاعك إما ما عرفش أو خبى الحقيقة."

آدم قام بسرعة: "المحامي بتاعي.. كريم.. هو اللي جهز كل الأوراق."

ملك: "طب اسأله."

آدم مسك موبايله وكلم المحامي على طول.

بعد خمس دقايق من الكلام، آدم قفل الموبايل ووشه أصفر.

آدم بصوت منخفض: "كريم كان عارف.. كان عارف إن الورق ناقص وخبى العقد ده عشان ياخد عمولة كبيرة من الصفقة."

ملك سكتت.

آدم بص لها بعيون مليانة وجع: "ملك.. أنا آسف.. أنا بجد ما كنتش عارف.. لو كنت عارف ما كنتش هعمل اللي عملته."

ملك دمعتها نزلت: "أنا عارفة إنك مش إنسان وحش يا آدم.. بس اللي حصل حصل.. وأنا اتجوزتك عشان أخلي بيتي.. والآن عرفت إن البيت من حقي بالأصل."

آدم بهدوء: "البيت بتاعك يا ملك.. من النهاردة.. أنا هسجله باسمك وباسم جدتك.. كامل مش نص."

آدم: ".. ده حقك .

ملك بصوت واطي: "شكراً يا آدم."

آدم: "متشكرينيش.. أنا اللي المفروض أشكرك.. 

نادية كانت قاعدة مع أمينة وبتحاول تسمم ودّنها.

نادية ببراءة مصطنعة: "تيتا.. أنا بس خايفة على آدم.. البنت دي ملك.. أنا مش مرتاحة لها.. حاسة إنها بتستغله عشان فلوسه."

أمينة بصتلها بنظرة حادة: "نادية.. ملك بنت أصيلة وأنا حاسة بيها.. بلاش الكلام ده."

نادية بدموع: "بس يا تيتا.. أنا بحب آدم من وأنا صغيرة.. وإنتي كنتي وعدتيني.."

أمينة بتنهيدة: "أنا وعدتك قبل ما أعرف إن آدم قلبه مال لغيرك.. والوعد ده مش في إيدي يا حبيبتي.. القسمة والنصيب."

نادية سكتت بس من جواها كانت بتخطط خطة.

.........

رن موبايل ملك.

ملك: "ألو؟"

صوت ست من الناحية التانية.. صوت مألوف 

الست بصوت مرتعش: "ملك.. يا حبيبتي.. أنا ماما."

ملك اتجمدت.

ملك بصدمة: "إيه؟!"

الست بعياط: "أنا أمك يا حبيبتي.. أنا عارفة إنك مش عايزة تسمعيني.. بس أنا عرفت إن جدتك تعبانة وإن في مشاكل في البيت.. وأنا مش قادرة أسكت "

ملك دمعتها نزلت بغزارة: "إنتي.. إنتي سابتيني من وأنا عندي ست سنين.. ومشيتي مع راجل تاني.. وسابتيني لجدتي.. إزاي دلوقتي تتصلي بيا؟!"

الأم بعياط: "أنا غلطت يا حبيبتي.. أنا عارفة إني غلطت.. بس أنا كنت صغيرة ومش عارفة أتصرف.. ودلوقتي أنا وحيدة ومريضة.. ومحتاج أشوفك."

ملك بصوت مكسور: "أنا مش قادرة يا ماما.. مش قادرة.. إنتي مشيتي وسبتيني.. وجدتي هي اللي ربتني.. هي اللي سهرت معايا.. هي اللي كانت جنبي لما كنت بعيط بالليل."

الأم: "أنا عارفة يا حبيبتي.. وأنا مش عايزة أرجع مكانها.. أنا بس عايزة أشوفك.. ولو مرة واحدة."

ملك قفلت الموبايل وهي بتعيط بحرقة.

آدم كان واقف على الباب.. سمع كل حاجة.

قرب منها من غير ما يتكلم.. وقعد جنبها على الكنبة.

ملك كانت بتعيط ووشها في إيدها.

آدم من غير ما يفكر.. حط إيده على كتفها.

آدم بصوت دافي: "متعيطيش يا ملك."

ملك بصت له بعيون حمرا: "إنت سمعت؟"

آدم: "آه."

ملك بانهيار: "أمي سابتني من وأنا صغيرة يا آدم.. سابتني لجدتي ومشيت.. وأنا لحد النهاردة مش عارفة أسامحها."

آدم بص في عينها وقال أهدى : "أنا فاهمك.. لأن أنا كمان عندي أم سابتني.. وراحت أثينا واتجوزت راجل تاني.. وسابتني و أبويا اللي كان بيموت."

ملك بصدمة: "إنت كمان؟"

آدم بابتسامة حزينة: "آه.. إحنا الاتنين اتربينا من غير أم.. وإحنا الاتنين عندنا وجع واحد."

ملك حسّت لأول مرة إن آدم مش غريب عنها.. إنه أقرب حد ليها في الدنيا.

من غير ما تحس.. حطت راسها على كتفه.

آدم اتجمد لحظة.. وبعدين حط إيده على شعرها .

ما حدش فيهم اتكلم.. بس الصمت ده كان أحلى من أي كلام.

.........

في الأوضة بالليل.

نادية دخلت أوضة آدم من غير ما تستأذن.

آدم كان بيقرا على المكتب.

آدم بعصبية: "نادية.. إنتي بتعملي إيه في أوضتي؟"

نادية بابتسامة خبيثة: "جيت أقولك إن بكرة الصبح أنا هرجع أسوان."

آدم بدهشة: "بجد؟"

نادية: "آه.. بس قبل ما أمشي.. عايزة أقولك حاجة."

آدم: "إيه."

نادية: "أنا عارفة إن الجواز ده بقى حقيقي مش صوري."

آدم تيبس.

نادية بابتسامة: "شوفتك إمبارح في الحفلة.. وشوفتك النهاردة وأنت بتبص لملك.. الراجل لما بيبقى بيحب بيبان عليه يا آدم.. وإنت بجد بتحبها."

آدم سكت.. ما اتكلمش وما اعترفش.

نادية بدموع حقيقية: "أنا كنت بحبك بجد يا آدم.. بس أنا عارفة إن القلب مش بنتحكم فيه.. ربنا يسعدك معاها."

وخرجت من الأوضة.

آدم فضل قاعد مكانه.. وكلمة نادية بتتردد في ودانه.

"إنت بجد بتحبها."

.........

في نفس الوقت.

ملك كانت  بتكلم جدتها في التليفون.

ملك بعياط: "يا ستي.. أنا عايزة أرجع.. وحشتيني."

ست الحسن بصوت ضعيف: "متقلقيش يا حبيبتي.. أنا كويسة.. و وحشتيني أنا كمان."

ملك: "أنا هرجعلك قريب يا ستي.. وعد."

ست الحسن: "يا حبيبتي.. أنا حاسة إن في حاجة اتغيرت فيكي.. صوتك مختلف."

ملك بتوتر: "مختلف إزاي يا ستي؟"

ست الحسن بابتسامة: "صوتك فيه دفا ما كانش فيه قبل كده.. كأن في حد دخل حياتك وغيّر فيكي."

ملك سكتت.. وقلبها بدأ يدق.

ملك بصوت واطي: "يا ستي.. لو.. لو حصل إن في حد دخل حياتي بجد.. هتكوني زعلانة مني؟"

ست الحسن بحنان: "يا حبيبتي.. أنا عايزة أشوفك سعيدة.. ولو السعادة دي جاتلك من راجل طيب.. أنا هكون أسعد واحدة في الدنيا."

ملك دمعتها نزلت.

ملك: "بحبك يا ستي."

ست الحسن: "وأنا بحبك يا عمري.. تصبحي على خير."

ملك قفلت الموبايل وبصت على الدبلة الدهب اللي في صباعها.

لأول مرة.. حسّت إنها مش تقيلة.. حسّت إنها خفيفة.. ودافية.

.........

الباب خبط.

آدم دخل وهو لابس تيشيرت أبيض وبنطلون بيجامة.

ملك اتخضت: "إيه؟ في إيه؟"

آدم بهدوء: "نادية هتمشي بكرة الصبح."

ملك بدهشة: "بجد؟"

آدم: "آه.. هترجع أسوان."

ملك حسّت بارتياح غريب.

آدم قعد على طرف السرير.. 

آدم: "ملك.. أنا عايز أقولك حاجة."

ملك قلبها بدأ يدق بسرعة.

ملك: "قول."

آدم بص في عينها : "الجواز ده.. بدأ صوري.. بس أنا.. أنا مش عارف أكمل ولا أمثل."

ملك بصت له بعيون واسعة.

ملك بصوت مرتعش: "يعني إيه."

آدم : "يعني إن كل لحظة بقعد فيها جنبك.. بحس إنها حقيقية.. وإن كل ما ببص في عيونك.. بحس إني عايز أفضل جنبك مش أسبوع.. عايز أفضل جنبك طول عمري."

ملك دمعتها نزلت.

ملك: "آدم.. إحنا اتفقنا.."

آدم: "أنا عارف.. بس الاتفاق ده كان قبل ما أعرفك.. قبل ما أشوفك وأنتي بتدافعي عن بيتك بشجاعة.. قبل ما أحس بإيدك على إيدي قدام جدتي.. قبل ما أشوفك وأنتي بتعيط على أمك."

ملك: "آدم.."

آدم مسك إيدها: "أنا مش بقولك ده عشان أضغط عليك.. أنا بقولك عشان أنا مش قادر أخبي أكتر.. إنتي أول بنت في حياتي حسستني إن في حاجة ناقصة جوايا وكمّلتها."

ملك بكت.. بس المرة دي كانت دموع فرحة.

ملك بصوت مخنوق: "وأنا.. أنا كمان يا آدم.. من أول يوم.. من أول ما شوفتك في المكتب وأنت بتبص لي بعيون باردة.. حسيت إن ورا البرود ده قلب طيب.. وحسيت إني عايزة أكتشفه."

آدم بص فيها وعيونه لمعت.

آدم بصوت واطي: "يبقى.. إحنا مش هنطلق."

ملك بابتسامة من وسط دموعها: "لأ.. مش هنطلق."

آدم قرب منها وحضنها لأول مرة.. حضن حقيقي مش تمثيل.

ملك حست بدفا ما حسّتش بيه من سنين.

آدم همس في ودانها: "البيت بتاعك يا ملك.. وأنا كمان بتاعك.. لو عايزاني."

ملك بصت له وابتسمت.

ملك: "عايزاك."

.........

 بره الأوضة.

زياد كان واقف عند الباب بيسمع كل حاجة.

زياد بدموع فرحة بيكلم نفسه: "الحمد لله يارب.. أنا عملت أحلى مصيبة في حياتي.. الجواز الصوري بقى حقيقي.. يارب ما حدش يعرف إني أنا السبب في كل ده.. وإلا آدم هيقتلني."

ومشى على صوابعه وهو بيضحك.

.........

صباح اليوم التاني.

نادية مشيت من الفيلا وهي بتبكي.

أمينة ودعتها بحزن.

أمينة: "نادية يا حبيبتي.. أنا آسفة."

نادية بدموع: "متتأسفيش يا تيتا.. القسمة والنصيب.. بس خليك فاكرة إن أنا كنت بحبه بجد."

أمينة ضمتها: "أنا عارفة يا حبيبتي.. وربنا يعوضك خير."

السيارة مشيت.

أمينة رجعت جوه الفيلا ولقت آدم وملك قاعدين مع بعض في البلكونة بيشربوا شاي.

آدم كان ماسك إيد ملك.

أمينة ابتسمت ابتسامة كبيرة.

أمينة في سرها: "أنا عارفة من الأول إن الجواز ده مش صوري.. بس سبتهم يكتشفوا ده لوحدهم."

قربت منهم وقالت بصوت عالي.

أمينة: "صباح الخير يا عرسان!"

آدم وملك بصوا لبعض وابتسموا.

آدم: "صباح النور يا ستي."

أمينة: "أنا هرجع أسوان بكرة.. بس عايزة منكم وعد."

ملك: "إيه يا حاجة؟"

أمينة: "تيجوا تزوروني في أسوان.. إنتوا الاتنين.. وتبقوا مع بعض.. على طول."

آدم بص لملك.

آدم بابتسامة: "وعد يا ستي."

.........