رواية جريمة فديو فاضح الفصل الثالث 3 بقلم ياسر عوده

 

 

رواية جريمة فديو فاضح الفصل الثالث بقلم ياسر عوده



امي اتصدمت من كلامها وقالتلها:
-حمل ايه وجواز ايه يا دكتوره، انتي مستوعبه اللى انتي بتقوليه، هو انا مجنونه اجوز بنتي في السن ده، دي لسه طفله.
وقتها الدكتوره سكتت ثواني، وبعدها قربت مني وقالتلي:
-قوليلي مين اللى عمل فيكي كده.
انا كنت خايفه وقولتلها وانا بعيط:
-انا ماعملتش حاجه.
وبصيت لـ امي وقولتلها:
-الدكتوره دي ماتعرفش حاجه، يلا نروح يا ماما.
امي كانت محتاره بين كلامي وكلام الدكتوره، ووقتها بصت للدكتوره وقالتها:
-انتي متأكده يا دكتوره من الكلام اللى انتي بتقوليه؟
-طبعا متأكده، بنتك حامل.
وقتها امي جت عليا وفضلت تضرب فيا وهي بتقولي:
-مين اللى عمل فيكي كده، انطقي.
وانا بصرخ في ايديها وقولتلها:
-مافيش حد عمل كده.
كنت خايفه وقتها ومش عارفه اعمل ايه، ولولا ان الدكتوره نقذتني من ايديها ماكنتش عارفه امي كانت هتعمل فيا ايه، وفي الاخر الدكتوره قررت انها تبلغ الشرطه علشان تحميني من امي اللى كانت هتموتني من كتر الضرب.
ـــــــــــــــــــــــــــــــــــــــــــــــــــــــــــــــــــــــ
لما صفاء عرفت بالنصيبه اللى ابنها عملها، وقتها هي طلبت واحد من اكبر المحامين اللى موجودين في البلد، ولما حضر المحامي اتكلم مع صفاء وقالها:
-اسمعي يا مدام، ابنك ارتكب جنايه، ولازم يتحاكم على اللى عمله وهيتسجن وهياخد حكم مشدد.
-لا يا استاذ، انا مش عاوزه ابني يتحبس ابدا، شوف انا مستعد ادفع المبلغ اللى انت هتطلبه، بس تطلعه براءه ويخرج معايا.
-اللى انتي بتطلبيه صعب اوي، ويمكن يكون مستحيل.
-مافيش حاجه مستحيله يا استاذ، الفلوس ممكن تعمل أي حاجه، انت اتصرف وحل المشكله دي.
المحامي نفذ اللى طلبته صفاء منه، هو قدر يقنع البواب ان كل اللى بيحصل هيتسببله في فضيحه وهو كل بناته مش بس بنته سما، وبعد قعدات اتفاق كتير حصلت بينه وبين البواب، قدر يوصل معاه لـ اتفاق، والاتفاق دا ان بنته سما هتقول قدام النيابه انها اتعرضه للاغتصاب من شخص ماتعرفهوش لانها ماكنتش في وعيها، واللى حصل انها وهي راجه في وقت متأخر كانت راكبه توكتوك، سواق التوكتوك رش على وشها بخاخ ووقتها ماحستش بحاجه، ولما فاقت لقت نفسها اتعرضت للاغتصاب.
وفعلا سما قالت الكلام دا قدام وكيل النيابه، واللى طبعا سألها:
-طيب ليه قولتي قدام الشرطه ان سامي هو اللى خدرك وعتدي عليكي.
-كنت خايفه اني اقول الحقيقه، خوفت ان ابويا وامي مايصدقونيش.
وقدرت سما تجاوب على كل اسأله النيابه، ودا كله بسبب المحامي اللى صفاء كانت جيباه، كان مفهمها ايه الاسأله اللى ممكن وكيل النيابه يسألها، وكمان معرفها هتجاوبه ازاي، ورغم كل دا كان وكيل النيابه حاسس ان في حاجه غلط، وعلشان كده سألها في الاخر وقالها:
-في أي نوع من انواع التهديد او الضغط أي شخص مارسه عليكي، اسمعيني يا سما انتي في عمر بنتي الصغيره، ولو في أي حد هو اللى فهمك تقولي الكلام اللى انتي بتقوليه دا، عاوز اعرفك انه بيضيع حقك، قوليلي الحقيقه وانا هجبلك حقك كله، انتي لسه طفله وحرام يحصل فيكي اللى حصل، اتكلمي وانا هقف جنبك واساعدك.
ورغم الكلام اللى قاله وكيل النيابه ليها، بس هي ماقلتش غير ان الكلام اللى قالته هو الحقيقه كلها، وان مافيش حد قالها على حاجه.
وقتها كان قرار وكيل النيابه حفظ التحقيقات والافراج عن سامي، وقدرت صفاء بالفلوس تنقذ ابنها من مجموعه اتهمات كانت ممكن تخليه يقعد كل حياته في السجن، وكانت مفكره انها بالشكل دا بتنقذه، بس ماكنتش عارفه انها باللى عملته دا اكدت لـ ابنها انه من حقه يعمل اللى هو عاوزه، وهي هتقدر تداوي وتعالج كل حاجه عملها.
وقتها رئيس المباحث سأل طارق وقاله:
-طيب بالنسبه للبواب وبنته راحوا فين؟
-رجعوا بلادهم يا فندم، البواب خد مراته وكل اسرته ورجعوا لـ بلادهم بعد ما خدوا مبلغ كبير كـ تعويض عن اللى حصل.
-انا محتاج منك تعملي تحريات عنهم، تشوفهم راحوا فين وعملوا ايه، احتمال كبير يكون رجع وفكر في الانتقام من سامي.
-تمام يا فندم.
-طيب في أي مصايب سامي عملها تاني بعد المصيبه دي؟
-كتير يا باشا، سامي خدع بنات كتير وعمل مصايب اكتر.
-انا عاوزك تعملي حصر لكل المصايب اللى عملها، عاوز اعرف مين فيهم ممكن ينتقم منه بالشكل ده.
-تمام يا فندم، كل اللى طلبته هيتنفذ.
وبداء طارق ينفذ التعليمات اللى قالهاله رئيس المباحث، واول حاجه عملها انه حاول يعرف اخبار البواب واللى حصل معاه، وعرف انه بعيد عن الشبوهات وانه اتقبل التعويض اللى خده من صفاء، وحتي بنته سما الحمل ماكملش واتجوزت ابن خالتها لما كملت سن ال 18 سنه.
للاسف التحقيقات كانت بطروح لطريق مسدود، وكل مره يمشوا ورا قصه من قصص البنات اللى سامي دمرهم كانوا بيلاقوا نفسهم قدام حيطه سد، لدرجه ان رئيس المباحث حس انه مش قادر يوصل للفاعل، بس في اللحظه دي ظهر دليل، والدليل دا لما الشرطه قدرت تحصل على كشف بسجل مكالمات المجني عليه قبل ما يتقتل بشهر تقريبا، ووقتها كان في رقم معين بيتصل كتير على المجني عليه، ولما تتبعت الشرطه الرقم دا وقتها حصلت الصدمه، لان الرقم دا طلع رقم راندا، واللى هي اخت عارف صاحب مقلب الزباله اللى لقوا فيه جثه سامي، واكيد دي مش مجرد صدفه، ووقتها اتكلم رئيس المباحث وقال لـ طارق:
-انا عاوز تحريات مفصله عن اللى اسمها راندا دي، وايه علاقتها بـ المجني عليه في اسرع وقت.
وبعد يومين كان طارق في مكتب رئيس المباحث، بعد ما جمع معلومات عن راندا، واتكلم طارق وقال:
-انا عملت التحريات اللى حضرتك طلبتها يا فندم، بس الاول انا كنت محتاج اعرفك مين رندا والحياه اللى عاشتها قبل ما تعرف المجني عليه.
-يعني كان في علاقه فعلا بنهم، خلاص قول وانا سمعك.
-زي ما عرفت قبل كده يا فندم راندا تبقى اخت عارف، صاحب مقلب الزباله، بس هما مش من سكان المنطقه من الاساس، وحكايتهم بداءت لما كان عارف واخته وابوه وامه لسه عايشين في القريه بتاعتهم واللى كانت تابعه للصعيد، وهناك حصلت حاجه خلت ابوهم يسيب القريه كلها بعد ما باع البيت اللى حلته.
-وعرفت ايه السبب اللى خلاهم يسيبوا قريتهم؟
-ايوه طبعا يا فندم، والحقيقه السبب ان ام عارف اتعرف عنها كلام مش كويس.
-وضح يا طارق، يعني ايه؟
-اللى حصل ان في واحد من سكان القريه، نشر بين الناس انه شاف ام عارف وهي مع واحد في وضع مخل، وقتها الموضوع اتنشر في القريه كلها، ورغم ان جوزها انكر لكلام دا وحاول يدافع عن مراته ويبراءها، بس الناس فضلت تتكلم عن الكلام اللى اتنشر في القريه كلها، وقتها اتكلم كام شخص من سكان القاريه مع ابو عارف وقالوله انه لازم يسيب القريه ويمشي هو ومراته وعياله، وفعلا دا اللى عمله.
-طيب قدرت تحدد ان كانت ام عارف دي فعلا سلوكها سيئ ولا لا؟
-للاسف ماقدرناش يا فندم، الموضوع دا مر عليه فتره طويله، بس الحقيقه ان كل اللى يعرفوا ام عارف قالوا انها كانت ست محترمه ومافيش حد فيهم صدق اللى سمعه، وديما بيشككوا في اخلاق الشخص اللى طلع عليها الاشعات دي، وقالوا ان سمعته سيئه جدا وكمان في اللى قال انه ليه علاقات نسائيه كتير.
-يعني على الاغلب هي كانت ست محترمه وهو اللى كانت بيتجني عليها.
-اظن كده يا فندم.
-تمام، كمل ايه اللى حصل معاهم بعد ما وصلوا القاهره؟
-حاول ابو عارف انه يشتغل في اكتر من مجال، بس ماتوفقش، لغايه لما وصل بيه الحال انه يشتغل في جمع اللزباله، وماكنش عارف ان الموضوع داه يبقى فتحه خير على ابنه بعد كده، لان عارف اشتغل مع ابوه، ورغم ان الشغل كان مرهق على عارف بس مع الوقت كان قادر يجمع فلوس، وشال كل المسئوليه لما مات ابوه وامه كمان، وبقى هو المسئول الوحيد عن اخته، وعلشان اتحرمت من ابوها وامها وهي صغيره، عارف عاش حياته كلها انه يراعيها ويهتم بتعلمها، لغايه لما دخلها كليه الطب، واتخطبت للمهندس احمد، ودا مهندس بترول شغال في السويس وبينزل اجازه كل شهرين تقريبا.
-يعني راندا مخطوبه وفي نفس الوقت كنت على علاقه مع المجني عليه؟
-ايوه يا فندم، دي كانت من ضمن الحاجات الغريبه واللى حاولت اعمل عليها تحريات، بس للاسف ماقدرتش اجمع معلومات كتير عنها، بس احنا قدرنا نتوصل لمعلومه مهمه.
-معلومه ايه؟
-اكتر من شاهد اكدوا ان سامي راح لـ راندا الكليه بتاعتها، ومش بس كده هي عرفت اصدقاءها في الكليه انه خطيبها، بس اللى كان مفاجأه انها عرفتهم عليه على اساس ان اسمه احمد.
-راندا دي شكلها وراها حكايه ولازم نعرفها.
-ايه تعليماتك يا فندم؟
-الاول قولي، في أي معلومات تانيه جمعتوها؟
-لا يا فندم، للاسف دا كل اللى وصلناله لغايه دلوقتي.


شكرا لزيارتكم عالم روايات سكيرهوم

تعليقات