رواية عين مش شايفه وروح دافيه الفصل الرابع
_ مريم خطيبتي .. دينا كانت صديقتي
_ صديقتك بس! أنا كنت خطيبته قبل الحادثة
هو أنا لو مسكت علبة البيض إللي جنبي ولبستها في دماغهم هيحصل حاجة! والله ماهيحصل حاجة صح
_ أنت خطبت! طب مش تقول لينا أو تعزمنا
كان لسه هيرد بس أنا أتدخلت وقولت بإبتسامة سخيفة
_ معلش والله أصل قولت لنوح يعزم ولاد الأصول القريبين منه بس، تلاقيكي وقعتي منه ، معلش بقا مضطرين نمشي عشان مش فاضيين .
شديت نوح بقوة ومشيت، كنت عصبيه ويتحرك بخطوات سريعة هو بيحاول يواكبها
_ مريم أنا حقيقي ...
_ حقيقي أي ها!! أنت عايز توقف حالي يا جدع أنت، بتلبسني مصيبة! دلوقتي بقيت خطيبتك!!
قال بإرتباك
_ كنت مضطر أقول كدا
_ آه بتغيظها بيا، عشان هي الحب القديم، أنا مالي أنا بقصة عودة الندلة دي
قال بهدوء وهو بيحاول يراضيني
_ هزودلك في المرتب الشهر دا عشان الموقف الجدع بتاعك
_ أنت فاكر هتشتريني بفلوسك، مين وصلك الفكرة دي أصلًا لا يا مستر نوح فوق .. .. هتزود كام يعني!!
قال بسرعة
_ ألفين جنية
وقفت بذهول وأنا مش مصدقة
_ بجد!! تحب نرجع نقول ليها قصة حبنا بدأت إزاي!! .
أبتسم بهدوء
_ لا شكرًا هي كفاية عليها كدا
_ هي سابيتك عشان الحادثة وأنك اتعميت وكدا!!
_ يعني حاجة زي كدا
_قليلة الأصل بصحيح
قال ببرود
_ لا حقها يعني هي ماخترتش من الأول حد كفيف
قولت بجدية وأنا بختار أنواع الفراخ إللي عايزاها
_ ولا أنت أخترت تكون أعمى، ماحدش بيختار شكله ولا حياته ولا ابتلاءاته، و الحب إللي بجد هو إللي بيبان في الإبتلاء لو كانت بتحبك كانت فضلت معاك وحار.بت سواد الدنيا بوجودها
رد بسخرية واضحة
_ دا كلام أفلام وروايات الحياة مش كدا، وأنا .. مش زعلان عادي أنا شايف أنه حقها
شوحا بأيدي وأنا بقول
_ أنت بتشوف أصلًا
_ كلك ذوق
_ أقصد البصيرة، والله وحتى البصر أنت ماكنتش شايف النفخ إللي هي نفخاه!!
_ خلاص يا مريم بقا لوسمحتي أنتِ لسه كنتي بتقولي عليها مزة
_ من بعيد آه لما قربت اكتشفت التزير
اتنهد بنفاذ صبر
_ خلصي يلا الحاجات إللي جايين عشانها
قولت فجأة بعفوية وأنا بمسك مانع اصطدامات
_ وااو بس البتاع دي جامدة أوي أي رأيك
_ جامدة فعلًا أي دي بقا!؟
_ آه دي حاجات زي السفنج كدا بتتركب في الباب و الكتب والتارابيزات عشان لما تخبط فيها ما تتوجعش
_ والله أنتِ لو ماحركتيش الحاجة من مكانها مش هتوجع
_ هجيبها برضو الإحتياط واجب
وقفت وأنا ببص على العربية
_ نوح نسيت أسألك حاجة مهمة
_ لو على بابا ودينا ماتسأليش
_ بابا ودينا أي سؤالي مهم، أنت بتحب الصدور ولا الأوراك!!
مسح على وشه بعصبية وهو ببتنهد
_ لو تعبتي نفسك دقيقة هتلاقي مكتوب في الورقة صدور
_ فل كنت بتأكد أنا كمان بحب الصدور
_ مسألتكيش
_ أنا بكلم نفسي أنت مالك .. وعلى فكرة قرأت الورقة ممكن أفهم مش بتاكل غير فراخ لي! أنت فجيتريان!!
_ وهما الفيجيتريان بياكلوا فراخ بالله عليكي!؟
_ الله أعلم مايمكن بياكلوا في السخوبس أصل مين يقاوم الفراخ!!
_ يارب صبرني يا رب، أنت العالم بحالي
سألت بإصرار
_ ماقولتش يعني بتاكل فراخ بس لي!!
_ اللحمة ساعات بيبقى فيها سمينه وحاجات بيضة أنا مش بحبها ولو دخلت بوقي ممكن أرجع، ودلوقتي مش بعرف اشيلها كويس، فأختصرت الطريق وباكل صدور فراخ ناشفة
وقفت مذهولة وأنا ببص ليه وحسيت قلبي واجعني
_ طب ممكن مجيب لحمه، وثق فيا أن مش هتاكل غير الحتت الحمرا بس، وعد هشيل لك كل السمين
_ لا يا مريم مش عايز حد يتعب معايا في الحوارات دي
_ يعني أنت تاعبنا في كل حاجة جت على دي؟!
وقفت قدام تلاجات اللحمة وسحب جزء معين وأنا بقول بحماس
_ ثق فيا شوية
_ أنا مش بثق في نفسي حتى يا مريم، آخر مرة وثقت في نفسي وفي قدراتي عملت حادثة فقدت عيني
رديت بمنطقية
_ عشان فكرت أن قدراتك أعلى من تدبير ربنا سبحانه وتعالى أستغفر الله العظيم
_ أستغفر الله العظيم ماقولتش كدا
_ لا أنت وثقت في نفسك لدرجة الغرور، هي الحادثة عبارة عن أي!
وشه قفل وقال بجمود مقتضب
_ مش عايز أتكلم في الموضوع دا، لو خلصتي يلا نمشي
_ معاك فلوس تحاسب ولا هنطلع نجري
_ يلا
حاسب وخرجنا وأنا كنت شايلة كل الأكياس وتاني بعناد كان هيمشي في اتجاه غلط، فقولت بغيظ
_ استنى رايح فين، أنت لو مشيت ورا كبرياءك كتير هجيبلك من على حدود السلوم
_ إحنا جينا من الشمال على فكرة
_ إحنا خرجنا من باب تاني يا عبقري زمانك، وبعدين هو أنا هشيل الاكياس كلها! هو أنا المرأة الحديدية!
_ وأنا هشيل إزاي! أنا عمري ما شيلت أكياس التسوق اصلًا، قولتلك نطلب دليفري
_ أفتح إيدك كدا مش عايزة مجادلة هاا
فتح أيده وأنا علقت نص الأكياس فيها
_ وأنا همشي بالعصاية إزاي!
_ عصاية وأنا موجودة!!
مسكت دراعه وأنا بحركه
_في رصيف بعد خطوتين، في قطة قدامنا لونها مشمشي، في ظلطه جنبك.. هننزل الرصيف بعد أربع خطوات كدا، و .. أي دا!
وقفت وبصيت حواليا وهو سأل
_ في أي!
_ مش دا الطريق إللي جينا منه، وتقريبًا توهنا، لا شايفة نافورة ولا شايفة برجولة
_ نعم ياختي! توهنا إزاي يعني!!
_ توهنا زي ما الناس بتوه، استنى إحنا نرجع السوبر ماركت ونعيد من الأول
_ ما لو كنتي مركزة مع الطريق مش مع القطة و الظلطة ماكناش توهنا
_ مش كنت بقولك عشان ماتتخبطش ولا تتعتر فيهم!
_ مش عايز مجادلة، أنا مش عايز مجادلة
استغفرت وقولت بتبرير
_ أستغفر الله العظيم يارب، البيوت إللي شبه بعض بجد
زعق بدون داعي وكان صوته عالي
_ لا عشان أنتِ غبية ومش بتفهمي، إزاي تتوهينا
_ أحترم نفسك ما تخلنيش أسيبك في الشارع وامشي
_ أنتِ فاكرة بتهدديني! في ستيـ.ن داهية، هو أنا عيل صغير!
بصيت ليه بغيظ وحسيت بإهانة جامدة، وقولت بعند
_ بقا كدا طب سلام .
سبته واقف على الرصيف وملامحه مصدومة أن سبته بجد، وعديت الطريق قعدت قصاده على كرسي عام، كان لازم يحس بالمسؤولية شوية، وأن مش هسكت زي ما كل الناس بتكست عشان أقدر حالته، وأن إصابته مش هتخلي الناس تتغافل عن إهانتهم، لازم يحترم الناس عشان إللي قدامه يحترمه
فضل واقف زي الطفل التايهه، الحقيقة قلبي وجعني عليه وهو بيحرك راسه يمين وشمال، وحسس على جيبه عشان يخرج موبايله بس لقى نفسه نسيه، همس بحاجة متأكدة أنها شتيمة، وقفت وكنت هتحرك لكن لقيته قعد على الرصيف وحط الأكياس جنبه، وحط دماغه بين أيديه، ماقدرتش استحمل إحساسه بالعجز وقومت بسرعة قربت منه، ولما سمع خطوات على الأرض قام وقف بكبرياء وملامح شامخة
_ ماقدرتش أسيبك وامشي
رد ببرود
_ لا عادي أمشي مش فارق معايا
اتنهدت من عناده وقربت منه أسحبه من دراعه وأنا بقول بلطف
_ بلا يا نوح، أنا مامشيتش أصلًا، أكيد مش هسيبك في الطريق وامشي أنا مش قاسية كدا، بس كلامك وحش
قال بعد دقيقة وكأنه بيق.طع حته منه
_ أنا آسف على إللي قولته، أنتِ مش غبية
_ الله يكرمك ما أنا عارفة إن مش غبية مش مستنية تبريرك
رجعنا البيت أخيرًا وهو قعد على الكنبه بيستريح وأنا دخلت الحاجة المطبخ
_ مستر نوح ممكن أقول حاجة
_ لا
_ طيب أنا بصراحة اشتريت مع الحاجات بيضة كاندر إللي فيها لعبة دي كان نفسي فيها من وأنا صغيرة أوي، ممكن تبقى تخصمها من الراتب بتاعي عادي، أنا قولت أعرفك عشان ما تقولش إن بستغفلك لقدر الله
_ بس ... بس كفاية دوشة ورغي، ياستي خدي البيضة هدية مني واسكتي
_ طيب هروح أعملك اللحمة إللي قولتلك عليها
_ قولت مش عايز لحمة
_ قولتلك هعملهالك حلو اسمع الكلام مش عايزة مجادلة
صاح بصوت عالي كأني لقدر الله بعصبيه
_ ماتسر..قيش كلمتي
_ أهو سرقت منك حاجة على رأي أبوك، ألا صحيح مش هتقولي مش عايز تعيش معاه لي!
مسح على وشه بيأس وشاور ليا
_ روحي اعملي اللحمة
بعد ساعتين خرجت وانا بقول
_ أفتح بوقك كدة أفتح
_ في أي!
_ أفتح بس
من الصدمة فتح وحطيت له حتت لحمه
_ أي أي رأيك
_ مريم هي قوة الذاكرة بتاعتك أي، محتاجة تاخدي اوميجا 3
_ لي!
_ عشان نسيتي قائمة الممنوعات
_ آه لا سيبتها على الرف في السوبر ماركت مع كلامك هتلاقي الإتنين هناك على رف الچيلي
لأول، أو تاني مرة يضحك بصوت عالي وهو بيهز راسه
_ أنتِ مش معقولة بجد
بعد أيام قالت مريم وهي قاعدة على الأرض أمام شاشة التلفزيون، ونوح قاعد ورا على الكنبة
_ أبعد عني يابن الكلـ.ب
_ الممثلة قالت كدا! قالت له يابن الكل.ب !!
_ قالت له أيها الو.غد بس الإتنين واحد
ضحك وبقا سبحان الله بيضحك كتير
_ أنتِ بتترجمي لي أصلًا!
_ عشان تفهم وكدا
_ أنا فاهم منغير ما تترجمي الترجمة الغريبة دي!
قولت بإستغراب
_ هتفهم إزاي!
_ بفهم أنجلش
_ بتفهم كلامهم السريع!
_ آه عادي
_ طب بتقول أي دلوقتي
_ البطل قال لا تتركيني اميليا ارجوكِ، وهي ردت لا أريدك بعد الآن في حياتي
_ بسم الله ماشاء الله بسم الله ماشاء الله، أخد كورس أي!
_ كورس أي!
_ عشان تبقى لبلب كدا في الانجليزي
_ دا من الدراسة عادي ماخدتش كورسات
_ يبقى أكيد كنت لغات
تليفونه رن ونطق بإسم أبوه أخد التليفون ودخل الأوضة وكان صوته عالي وبيزعق وبعد شوية خرج وكان وشه باين عليه العصبية وجه قعد تاني
_ أنت كويس
_ آه ... مريم
_ اممم عايز أكملك الترجمة!
_ مريم تتجوزيني
