رواية عين مش شايفه وروح دافيه الفصل الخامس 5 بقلم مريم الجنيدي


 رواية عين مش شايفه وروح دافيه الفصل الخامس

_ مريم تتجوزيني 
_ بكام المرة دي ب٤٠٠٠ ولا أي! 
_ لا المرة دي .. بجد مش تمثيل 

إنتفضت من مكاني بذهول وأنا ببص ليه 
_ أنت اتجننت! 

قال بهدوء وهو بيبص اتجاهي
_ أهدي واسمعيني

صرخت فيه وأنا بتحرك بعشوائية
_ ماتقوليش أهدي دي، دا أنت طلعت بصباص وعينك زايغة، ومش مظبوط، وأنا إللي بسعدك بنية شريفة 

رد بذهول وهو بيحرك أيده قدام عينه 
_ بصباص أي أنا مش شايف أصلًا 

_ أنا اتخدعت فيك، والله اتخدعت 

_ ممكن تبطلي كلام وتهدي عشان أتكلم ممكن!!

_ لا أنا راحة اجمع هدومي وأمشي 

قال بصوت عالي صارم 
_ مريم، أنا بتكلم، ولما أتكلم مش بحب حد يقاطعني 

قوت بسخرية وأنا على باب الأوضة 
_ لا مش بقاطعك، أنا سبتك ومشيت 

_ خدي خدي، بقولك تعالي هنتفاهم 

_ نعم عايز أي أتفضل 

قال بإرتباك
_ دا عرض جواز حقيقي، لو عايزة لفترة موافق، و بعدين أي مشكلتك! 

_ مشكلتي! أنت مفكرها لعبه! هو أنا لعبه في أيدك، أي السؤال الغريب دا، هو أنت مفكرني بايرة! 

_ ماتعبتيش من الشغل؟ مش نفسك تستريحي ويكون عندك أسرة وبيت، وتستقري، وتعيشي في هدوء؟! 

ضحكت بسخرية 
_ دي مغريات عال العال، أنت بتستهبل صح! أنت بتتجوزني شفقة! 

_ لا .. اعتبريه جواز بمنافع متبادلة، إستقرار ليكِ، ومساعدة ليا 
قولت بعصبية 
_ هو حد قالك إن عايزة استقر! 

سكت شوية وبعدين قال بهدوء 
_ أنتِ مش هتقبلي تساعدي شاب في ظروفي وتفضلي قاعدة معاه إلا إذا مش عندك إستقرار يا مريم، وبعدين أنتِ رافضة عشان ظروفي!! 

ضحكت بسخرية 
_ لا عشان مستحيل اتجوز حد بدماغه الجذمة دي، م عشان ظروفك خالص، أنا مش ببص من الناحية دي 

_ بصي يا مريم هصارحك وهكون واضح معاكي، أنا متهدد من بابا، عايز يجوزني لواحدة غصب عني عشان مشفق على حالي وعشان رفضت اسيب البيت واعيش معاه 

_ يا نغه وأنت خايف بابا يجوزك ؟! 

مسح على وشه بعصبية 
_ مريم بابا هو الوكيل بتاعي من بعد الحادثة عملت ليه توكيل إدارة بكل شغلي، ودلوقتي بيهددني يوقف كل حاجة ويسيب الإدارة وأنا ماقدرش أثق في حد غريب يدير شغلي، وماقدرش أرمي تعب حياتي في الأرض، فأنا هريحه وهتجوز، بس هتجوز حد أنا عايزة مش هو إللي عايزة ... ها أي رأيك؟! 

_ رأي إن شكلك مجنون دلوقتي هجيلك وقت تاني 

_ مريم ... مريم 

دخلت المطبخ وأنا بتنفس بسرعة مش قادرة استوعب إللي قاله، أي الجنان دا! كنت في حرب جوا دماغي أوافق وأريح نفسي من تعب الشغل و الحياة إللي خايفة تغدر بيا فجأة، ولا أرفض بكرامتي، أصل إللي بيحصل دا نكتة ولا في الأفلام 

 _ لالا أي العبط إللي بفكر فيه دا مستحيل، طبعًا مستحيل 

لفيت عشان أحضر الأكل لكن خبطت فيه جامد وكان واقف ورايا، صرخت بخوف 
_ يخربيتك واقف كدا لي ولا ملك المو.ت!

قال بهدوء 
_جهزي نفسك عشان هنروح بيت بابا 
قولت بصدمة 
_ قررت هتعيش معاه! 

_ لا معزومين هناك النهاردة أصر عليا 

_ وأنت عايزني لي! 

_ أنتِ ناسية إنك المساعدة بتاعتي! يلا اجهزي السواق مستنينا 

كنت ساكتة طول الطريق بفكر، وهو كمان ساكت، مش فاهمة هو كان بيهزر ولا أي! وهل غير رأيه عن الموضوع؟! 

وصلنا البيت وكان مش بيت كان فيلا كبيرة جدًا، بصيت ليه بذهول 
_اعتقد أبوك اخد فلوسك وجاب قصر لنفسه، نصب عليك في كام كدا! 

هز رأسه وقال بنفاذ صبر 
_ انزلي يا مريم 

مسكت دراعه وأنا بقول 
_ قدامنا سلمه، وبعد أربع خطوات ست سلالم تانين ... أي دا نوح أبوك عنده حمام سباحة أنتم بتصيفوا هنا! 

_ قولت أسكتي يا مريم بلاش تفضحينا، وياريت تفضلي ساكته ماتفتحيش بوقك طول القاعدة تمام! 

ماردتش عليه، وهو قال بإصرار 
_ تمام!!! 

_ تمام يا عم تمام 

_عم! 

الباب اتفتح وكانت ست في الخمسين هي إللي استقبلتنا، وكانت نظراتها مش مريحة نهائي في نوع من أنواع الشماتة! 

_ أهلًا يا نوح، البيت نور 
_ شكرًا يا طنط 

بصت ليا بقرف وماعبرتنيش 

باباه جه، وبص ليا بنفس القرف، أي يا ٠ماعة ريحتي واحشة؟ 
_ اهلًا يا نوح أخيرًا أقتنعت إنك ترجع بيتك 

_ أنا مارجعتش، أنا احترمت عزومتك على الغدا بس 

أتدخلت وقولت بإبتسامة سخيفة 
_ ازيك يا حاج عامل أي، والله وما ليك عليا حلفان، حاولت أعرف السبب إللي مش مخليه يجي يعيش هنا، بس هو كتوم زيادة، وتقريبًا أنتم مكرهينه في عيشته 

_ مريم!! 

مرات باباه قالت بنزق 
_ يعني تعتمد على حد غريب يا نوح ومش عايز تعتمد علينا! 

رد ببرود 
_ أنا مش بعتمد على حد؟! 

لكنها أصرت وقالت بإستخفاف 
_ أنا متفهمة في حالتك دي محتاج مساعدة، بس لي تثق في حد غريب وتقعد لواحدك وفي خطر أنت مش هتعرف تتصرف و ..

_ خطر وأنا موجودة يا حاجة! بتشتمني! 

أتسعت أعينها وقالت بعدم تصديق 
_ حاجة!! 

لكن كملت كلامي وأنا بدافع عن نوح إللي واقف ساكت كأنه ابني وخبطت على صدره 
_ وبعدين نوح اسم الله عليه خمسه في عينك ذكي وفطن ومش محتاج أي مساعدة من أي حد 

ضغط نوح على أيدي إللي ماسكه دراعه بتحذير، وكانوا هما بيبصوا ليا بذهول 

أبوه قال بهدوء عشان يقطع الصمت 
_ تعالوا اتفضلوا أخواتك على وصول 

_ أي دا لي أخوات غير زينب! 

محدش رد عليا، لكن أنا قربت وهمست ليه 
_ ماقولتش إن عندك اخوات غير زينب 

_ أنا ماقولتش ليكِ حاجة أصلًا يا مريم 

_ عشانك قليل الذوق، لا ومستغرب مش عايزة اتجوزك لي 

_ هشش وطي صوتك 

_ أنت أبوك ساكن في القصر الرئاسي يا نوح ماشاء الله! 

_ هو دا إللي قولتك اسكتي! 

تجاهلته وأنا بسأل 
_ مرات أبوك دي صح؟ 

_ امممم 
_ عاملة في نفسها كدا لي! 

_ يابنتي أسكتي بقا أسكتي 

_ شايف إللي أنا شيفاه بالله هسكت ازاي، اه سوري تحب أقولك شايفه أي!! 

زينب أخته جت وسلمت علينا، وحضنت نوح بقوة 
_ وحشتني اوي اوي بجد، أسفه أن مشغولة في الشغل بعيد عنك 

قالت مرات أبوه ببرود 
_ مش فاهمة مش راضين ترجعوا البيت لي! مهو بيتكم زي ما هو بيتي وبيت إخواتكم 

ردت زينب بنفس البرود 
_ إحنا مرتاحين كدا 

_ مرتاحين أي أنتِ مضيعة وقتك وبتفني نفسك مع اخوكي، وعشان تريحي ضميرك جبتي لي مساعدة 

كان لسه نوح هيرد، لكن أنا أتدخلت 
_ معلش يا حاجة أنتِ مالك في علاقة الاخوات ببعض، تفني حياتها، ولا لا، دي حاجة خاصة بيهم 

ردت مرات أبوه بعصبية 
_ أنتِ بتدخلي في كلامنا على أي أساس أصلًا، أنتِ هنا خدامة ماتنسيش نفسك 

رد نوح عليها 
_ طنط أنا ماسمحش حد بكلم مريم كدا 

لكن أنا ماستكفتش بكلامه وقومت قايلة بإغاظة 
_ خدامة مين! أنا ماكنتش عايزة أحرق المفاجأة إللي نوح جاي يقولها النهاردة، بس مش قادرة، بس أنا دلوقتي خطيبة نوح، نوح عرض عليا الجواز وأنا وافقت! 

كاس العصير إللي كان في أيدها وقع منها، وصوت باباه من على الباب كان مصدوم 
_ أي الكلام إللي بسمعه دا!! 

نوح وجه رأسه ناحيتي وحسيت إنه مش مصدق إللي قولته، وأنا من جوايا حسيت بخوف جامد، لكن ماينفعش أتراجع

لما كله سكت أبوه قرب وقال بعصبيه 
_ أي إللي بسمعه دا عايز تتجوز خدامة! 

_ مريم مش خدامة، وأنا حر في اختياراتي 

_ حر دي لما تكون واعي أنت بتعمل أي، مش لما تكون في نفس ظروفك 

_ مالها ظروفي هو أنا مجنون! 

أبوه سكت، لكن أنا ماسكتش وأنا بقف قدامه 
_ لا رد عليه مالها ظروفه إللي أنت في الرايحة والجاية تقول عليها، هو مجنون ولا فاقد للأهلية، عمال تضغط عليه وتعجزه لي، ما تقول إن ظروفه أنه اتعمى، خايف تقولها لي ومش تقبلين الوضع وكأنه عار يعني، آه نوح اتعمى، بس اي المشكلة في كان مليون حد كفيف وحياتهم زي الفل، وشغالين وعايشين لواحدهم ومكونين أسر، طه حسين كان اعمى، وشوف عمل أي، لي بتحاول تكبت فيه وتفشه، هو ناجح غصب عن عين الكل، وعمل شركة وشغل شباب مش عارفين يعملوه، وهيرجع شغله وهيديره من تاني لأن هو مش محتاج يسيب كل حاجة لحد يستغل وضعه عشان يغصبه على حاجة مش حاببها 

كلهم سكتوا وأنا كنت بتنفس بعنف وحتى نوح نفسه كان مصدوم من الكلام إللي قولته، كأن مش مصدق إن أنا دافعت عنه بالشكل دا وواجهتهم كلهم بالحقيقة إللي مش عايزين يقولوها 

بصيت ليهم كله وحطيت ايدي على وسطي وانا بقول بسخرية 
_ فين الغدا إللي أنتم عازمينا عليه، ولا جايين تطفحونا عواقب افعالكم؟؟! 

زينب سحبتني على جنب وهي بتبص ليا بذهول 
_ أنتِ إزاي كدا! 

بصيت حواليا ورجعت بصيت ليها تاني 
_ إزاي كدا أي مالي! 

_ أنتِ واااو، بجد أي الجمدان دا، قولتي كلام جوايا كان نفسي أقوله من زمان وماكنتش عارفة 

_ وأنا مش هعرف لي، ماعنديش إللي أخاف عليه، ومش بخاف غير من ربنا 

_ هو بحد نوح عرض عليكي الجواز؟! 

قولت بثقة 
_ آه بس قولت له هفكر 

مسكت أيدي وهي بتقول بسعادة 
_ صدقيني بعد إللي عملتيه دلوقتي أنا موافقة جدًا على الجوازة دي وراضية عنها ومش هطمن على نوح غير معاكي

_ طب وأنا مين يطمن عليا طيب ها! اخوكي دا مفتري ومغرور، أنا ماطمنش على نفسي معاه 

_ نوح! دا طيب خالص 

_ يا أستاذة زينب بطلي كذب، أنا مش ناقصة وقع دماغ عيلتك المجنونة دي أنا عايزة أعيش في سلام 

كنا لسه هنكمل كلام، بس صوت نوح وهو بينادي قاطعنا 

قعدنا على السفرة وبصيت حواليا وقولت 
_ عاملين لحمة! مفيش فراخ!! 

أبوه بص ليا بإستنكار وقرف كأن بتأمر، لكن أنا لفيت لنوح 
_ معلش مفيش غير لحمه هزبطهالك أنا 

_ هاكل سلطة 

_ لي هو أنت أرنب!! 

فجأة دخل علينا شابة كانت باين عليها إنها في كلية أو أصغر وشاب أكبر منها بس باين أصغر من نوح 
_ هاي يا جماعة، هاي نوح، لسه فاكر تيجي تسأل علينا! 

رد بسخرية 
_ وأنتِ مش تتسألي لي، هو لازم أنا بس إللي بسأل!! 

والشاب قال ببرود
_ اهلًا نوح ماكنتش أعرف أنكم جايين النهاردة عندنا 

ماحدش عنده إجابات أسرع مني لما قولت
_ عندكم فين! دا بيتهم 

_ مين دي؟! 
قالوها الإتنين في نفس واحد 

رد أبوه 
_ مساعدة نوح 

لكن أنا قولت بعند 
_ خطيبته 

_ مساعدته 
_ خطيبته 

_ وأنا قولت مساعدته إللي هتطرد كمان 

_ هه اضرب كلامك في اجمد حيطة، أنا خطيبته 

نوح ضرب على السفرة وقال بعصبيه 
_ خلاص كفاية، مص عايز صوت عالي، أسكتي يا مريم 

سكت وحطيت الأكل في طبقة وفصلت اللحم عن الدهن وحطيته في طبقه وقطعته قطع صغيره 
وقربت منه قولت بهمس بأسماء الحاجة في الطبق 

تحت نظراتهم، لكن ما اهتمتش، اهتميت بنوح بس إللي فضل يلعب في أكله وفهمت أنه مش عايز ياكل قدام حد لنفس السبب إللي قاله قبل كدا، لكن أنا ماسكتش مليت الشوكة بتاعته، وسلمتها في أيده وأنا بقول بخفوت
_ كل ماتخفش 

والعجيب إنه استجاب وبدأ ياكل 

بعد الأكل خرجنا الحديقة وأنا قولت لنوح 
_ أي عيلتك الغريبة دي 

_ الإنسان مش بيختار عيلته بقا نعمل أي 

_ والله بجد الحمد لله إنك أعمى وماشوفتش المناظر إللي شوفتها، دول يصدوا النفس 

_ نفسي تبطلي تقولي الكلمة في وشي 

_ مش قصدي بس .. لازم ماتاخدش الموضوع بحساسية وتتقبله ... بقولك أي الحديقة دي كبيرة أوي ماشاء الله، لي مش بتربوا فيها فراخ؟! 

قال بصدمة
_ فراخ!! 

_ آه تستغلوا المساعة، والله الفراخ البلدي تجري وترعرع في الخضراء هنا وتبقى فله، وأهي تجيب ليكم بيض 

_ نفسي أفهم بتجيبي الأفكار دي منين بجد؟؟ 

_ ما أنا كنت قسم إقتصاد منزلي 

_ صحيح أنتِ معاكي كلية أصلًا! 

_ أومال جهلة! دا أنا إللي ترجمت لك الفيلم 

_ مش قصدي بس .. استغربت إنك عارفة طه حسين 

ضحكت بسخرية 
_ أنت مفكرني جهلة بجد؟ ما أنا اخدته في قصة الأيام في تالتة ثانوي، دا أكل دماغي أنه أعمى، كويس إنك أعمى بس ساكت مش رغاي زيه 

ضحك وهو بيحرك راسه 
_ حقيقي أنتِ مش معقولة 

_ الله يخليك 

_ مريم 
_ نعم؟ أجيب لك الشاي! 

_ لا .. شكرًا إنك دافعتي عني 

اتحرجت وماتوقعتش لكن قولت 
_ مش محتاجة شكر، والله رغم أنك عايز كسر دماغك العنيدة المتكبرة دي، بس أنا عرفت مش عايز تيجي تعيش لي هنا أخيرًا

_ ياا عرفتي أخيرًا 

_ فهمتها وهي طايرة أول ما دخلت البيت 

_ بجد وفهمتي أي بقا! 

_ اكيد عشان الناموس، أنا اتقزقزت يا نوح 

سكت بصدمة ولف ليا 
_ ناموس؟ 

_ أنت مش بتحس بيه! أصل جسمي حساس 

_ هو دا إللي فهمتيه! 

_ لا وعيلتك إللي شبه الناموس يا نوح، بتمص في دمك، محتاجين صاعق يصعقهم

_ مش عارف دي صراحة ولا وقاحة حقيقي، بس ماشي 

سكت شوية وأنا بصيت حواليا بملل 
_ مريم 
_ نعم أجيب لك الشاي! 

_ يا مريم ورحمة أمي مابشرب شاي أصلًا، كنت هقول حاجة تانية 

_ قول ها فكرت في مشروع الفراخ 

_ مريم أنتِ وافقتي تنجوزيني؟ 

_ لا مش للدرجة دي، أنا قولت كناية فيهم ... لكن أنا مش عارفة لا 

_ أي سبب رفضك 

قولت بإرتباك 
_ أنت أي سبب تفكيرك فيا أصلًا

_ أنتِ الشخص الوحيد إللي بيتعامل معايا عادي، مش بحساسية مش خايف على غضبي لما بتقولي أعمى، بتواجهيني بكل حاجة بدون خوف ... أنتِ الشخص إللي دخل حياتي وضر.بني بكل حاجة بهرب منها 

_ يعني اخترتني عشان ضربتك! بس أنا عمري ما مديت أيدي عليك على فكرة، بلاش افترى 

_ مريم .. 

_ نعم أجيب ليك عصر 

_ قومي نروح يا مريم عشان مادش أيدي عليكي أنتِ

 بعد يومين، كنت بحط الأكل على الترابيزة 
_ مريم فكرتي في إللي موضوع الجواز 

_ أنت مصر بجد؟! بس أنت أصلًا مش بتطيقني 

 سكت شوية وأنا شاورت له وأنا بحط الأكل في طبقه 
_ أهو شوفت، المهم سيبك من الموضوع دا عايزاك في موضوع أهم 

_ أهم من الجواز! 

_ آه .. هو ينفع في الحديقة الخلفية الصغيرة دي نربي فرختين؟ 

مسح على وشه بيأس وسكت وبدأ ياكل منغير ما يرد 
_ هااا قولت أي!

_ قولت أسكتي، مش عايز أسمع صوتك 

_ يوه دلوقتي اسكتي مش كنت هتبوس أيدي عشان أوافق اتجوزك؟؟ وماشي هنا تقول دي خطيبتي، وهنا تقول دي مراتي، وكانك جايبني من سوق عكاظ اشتريتني أنت ولا أي! 

_ أسكتي، بطلي دوشة مش بحب دوشة على الأكل 

_ أنت الخسران، هتاكل محشاية الفلفل دي ولا أكلها! 

_ خديها و أسكتي 

_ طب و البتنجان! أصل أنا عاملة أربعة بس أنت أكلت ٣ ماعتش غير واحدة، كنت عايزة أدوق 

_ أنتِ بتبصي في أكلي!! ياستي خديها ياستي خديها واسكتي، وبعدين بالله عليكي هل المحشي كان في قائمة الأكل عشان تعمليه!! 

_ وأنت جاي تقول كدا بعد ما اللهم صلي على النبي أكلت نص الحلة! ولا هو اعتراض من باب الإعتراض! أنا زهقت من أكلك المايع دا، كل إللي بتحط واحمد ربنا إن لقيت لقمة تاكلها دا بدل ما تقول شكرًا!! 

_ أنتِ لي لازم تردي بقصيدة وبصوت عالي! وداني يا مريم، هيبقى عيني ووداني؟! 

آخر النهار نوح دخل قعد في البلاكونة، وأنا كنت بعمل كيكة ودخلت قولت بسعادة 
_ عملت كيكة موز تحفة أجيب لك منها! 

_ لا شكرًا 

_ لا هجيبلك منها استنى 

لكن جرس الباب رن ولما فتحت اتصدمت من عدد الشباب والبنات اللي واقفين قدام الباب، وكانت في وشهم دينا خطيبة نوح السابقة!! 

_ نعم! 

_ هو أي إللي نعم ماتعرفش أصول الضيافة! فين نوح

زقتني ودخلت و الناس إللي معاها دخلوا وأنا روحت بسرعة على نوح بقول بصوت مرتبك 

_ نوح .. ألحق بسرعة الحربوقة دينا إللي كانت خطيبتك برا ومعاها شوية ناس بايظة وشكلهم صايع برا ... 


تعليقات