رواية جزيرة غراب الوادي الفصل الرابع
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«إن أشد أنواع القسوة، هي تلك التي ترتدي ثوب البراءة وتتستر برداء السلطة»
(تحت رداء الحماية)
﷽
في صباح اليوم التالي عاد جلال باكراً إلى منزل عائلته. كان والده وإخوته ينتظرونه على أحر من الجمر وعيونهم تطاير منها الشرر والقلق.
دلف جلال بخطوات متزنة وثقيلة إلى المضيفة فبادره والده غنام بصوت جهوري مشحون بالغضب:
غنام: خير يا جلال؟! إيه اللي حصل وكيف الحكومة دخلت الجزيرة من غير ما تدري حرسك فين اللي على أول اليابس والمراكبية؟!
جلس جلال بهدوء وهو يمسح وجهه بإرهاق ثم قال بحزم:
جلال: يا بوي الحكومة المرة دي مدخلتش كيف كل مرة!
تدخل أخوه شاهين بعجب واستنكار:
شاهين: يعني إيه أمّال دخلوا كيف بمراكب تاني؟! طيب ما عملوها قبل كده والحرس اللي هنا لمحوهم قبل ما يوصلوا للشط!
رد جلال بنبرة جافة يكسوها الغيظ:
جلال: له ولا كده كان فيه تجار طالعين بره الجزيرة يجيبوا نواقص وأعلاف للمواشي.. الحكومة راقبتهم وأول ما كانوا معاودين كبسوا عليهم أخدوا لبسهم والبضاعة ودخلوا الجزيرة مكانهم!
غنام: والبهايم دول محدش منهم لحق ينبهنا ولا ينطق ليه؟!
جلال: هيلحقوا كيف يا بوي خدوا كل حاجتهم وتلفوناتهم وكتفوهم هناك!
هنا نطَق أخوه الأصغر وليد بنبرة تهكمية مستفزة:
وليد: ما حرسك المفروض يعرفوا أي وجه غريب يدخل الجزيرة ولا كانوا نايمين على دانهم؟!
التفت إليه جلال بنظرة حادة كالموس وقاطعه بجمود يقطر سخرية:
جلال (بنظرة حادة): مش كل سكان وحرس الجزيرة تافهين وشغلهم السرمحة زيك!
غنام (مريحاً ظهره): حصل خير.. الحمد لله إنك قدرت تلحق نفسك وتتصرّف بس صحصح.. هيلاقوا مية لفة عشان يوصلوا لحاجة طالما رجعوا يركزوا ويتسللوا علينا تاني!
جلال: خير إن شاء الله.
شاهين (بقلق على التجارة): يعني مطلّعتش البضاعة لصحابها؟
جلال: لسه.. هشوفلها صرفة النهاردة.
قاطعه غنام بحزم ورأي شايخ:
غنام: له اصبر يامين لما نشوف.. متضمنش يمكن يفتشوا اللي داخل واللي طالع من الجزيرة!
جلال: اللي تشوفه يا بوي.
تحدث علي (أصغر أبناء غنام) بنبرة دافئة وارتياح:
علي: المهم إنك بخير يا خوي!
تبسم جلال تبسماً خفيفاً لم يغير قساوة ملامحه، وقال:
جلال: الحمد لله.. عن إذنك يا بوي.
غنام: إذنك معاك يا ولد.
**
تركهم جلال ودلف إلى غرفته ليرتاح من عناء ليلة طاحنة وفي تلك اللحظة خرجت خضرة (أمهم) بلهفة وقلق تُطالع زوجها غنام:
خضرة: ها يا عمدة عملت إيه؟! هنروحوا كلمت جلال؟!
غنام (بضيق): ده وقته يا خضرة؟!
خضرة: ليه في حاجة خير؟!
شاهين: مفيش يا ماي.. مفيش حاجة.
خضرة (بإصرار): خلاص.. أُمال مالكم متأخرش بره يا عمدة لازم نروحوا ونخلصوا الجوازة مش كل مرة تبوظ!
غنام (وهو يتحاشى النظر إليها): إن شاء الله.. ربنا يسهل.
ـــــــــ**
تفرق الجميع وغادروا المنزل فأسرعت خضرة وتمسكت بثوب ولدها "علي" تتفحصه بعينيها الحادتين:
خضرة (بشك): قولي يا علي.. في حاجة ليه واقفين كلكم سوا وشكلكم ميريحش؟!
علي (وهو يتملص منها بذكاء): مفيش يا ماي حاجة.. طمني بالِك.
تركها وخرج مسرعاً ليحق بإخوته وأبيه فوقفت خضرة بمفردها تمسح على صدرها وتحدث نفسها بصرامة وغيظ:
خضرة: مش مهم بردو.. مش هسيبكم إلا لما نخلصوا من جلال ويجوز عشان عيالي يأخدوا براحهم!
ـــــــــــــــــــــــــــــــــــــــــــ**
في الضهر كانت موج في عملها بالمشغل تشعر بالتعب والأرق من قلة النوم والتفكير فيما رأته ليلة أمس. كانت تعمل غصباً كي تنهي يومها وتعود للمنزل لترتاح من هذا الكابوس.
أتاها هاتف من أختها خلود فتحت موج الاتصال وردت:
موج: أيوه يا خلود.
خلود (بضيق ونبرة ساخطة): شفتي اللي ميتسماش ياريتك متعبتي روحك!
موج (بتقصي وقلق): إيه مش فاهمة.. حصل إيه؟!
خلود: الست مرت العمدة كلمت أمك!
موج: وعاوزة إيه؟!
خلود: هيكون إيه هايجوا المغرب يشوفوا فرح ويتمموا!
أمكسك موج مقدمة رأسها بألم وحسرة:
موج: مش معقول بردو ده إيه البرود ده؟!
خلود: هنعمل إيه طيب؟!
موج: مخبراش.. أنا ضايقة لحالي وفرح تلقيها قربت تعاود لما تعرف خلي بالك منها لما أجي.
خلود: ربنا يستر..
موج: ماشي أنا هقفل رأسي مصدعة ومقدراش أتكلم.
خلود: ماشي.. سلام.
أغلقت موج الهاتف وسندت رأسها على الطاولة بغضب ومرارة:
موج (بحرقة): منك لله يا جلال نشفتوا دمي على الفاضي وبردو هتكمل في الجوازة من عيلة ياريتني سبتك انحبست !
أكملت عملها بضيق وشغف مفقود حتى بعد العصر ثم غادرت المشغل متجهة لمنزلهم والهموم تسبق خطواتها.
ــــــــــــــــــــــــــــــ**
قبل وقت المغرب كان جلال يجلس خارجاً وحده يفكر في بعض الأمور؛ منها الفتاة التي اختفى أثرها وما حدث أمس.. فلولا عودة ابنة فايز النجار لفسدت أشياء كثيرة في الجزيرة!
خرجت إليه نجاة وخلفها خضرة فقالت نجاة وهي تجلس جواره:
نجاة (بابتسامة): سارح يعني يا عريسنا؟
جلال: مفيش يا عمتي.. شغل.
نجاة: ولا في العروسة مش هتجهز حالك مستنيين أخوي ياجي ونمشوا لأهل البنت؟
جلال (بجمود وحسم): له.. مفيش مشي.
خضرة (بفزع وصدمة): مفيش إيه؟! مش فاهمة!
جلال: مين نقى العروسة دي؟
نجاة: خضرة.
خضرة: أيوه أنا.. مالها؟!
جلال: ليه أَبوي قال عنديها ١٨ سنة والبت لساها ١٦؟
خضرة: دول سنتين يفرقوا في إيه بعدين مالها؟!
جلال: أنا مش موافق ومراتي هنقيها بكيفي محدش يتدخل ياريت.
خضرة ( بغضب واحتداد): تقصد إيه؟ دايماً الحريم هي اللي بتنقي حريم عيالها!
جلال: قولتي عيالها.. نقي لوليد وعلي أنا مش ولدك!
خضرة (بغضب مكتوم): عارفة وحافظة إنك مش ولدي متخافش أكيد مش هجيبلك بت عفشة وتاجي تشوفها وتعرف إني مش وحشة زي ما فاكر!
نجاة: ليه يا جلال يا ولدي عاوزين نفرحوا بيك!
جلال (وهو يقف بكل قامته): يا عمتي أنا حر ولو على إخواتي أنا مش ماسك حد اللي عاوز يتجوز هو حر مش هعمل حاجة معوزهاش عشان أرضي غيري!
خضرة: له بقا ده فيه إنَّ ما كنت موافق وساكت!
نظر إليها جلال بنظرة ثقيلة ثم التفت لنجاة وقال بحزم:
جلال: أنا طالع.. لما أَبوي ياجي قوليلوا الكلمتين دول يا عمه.
تركهم وغادر تحت نظرات خضرة النارية فبدأت بالحديث بغضب طافح:
خضرة: له.. كده كتير اسمعي يا نجاة أخوكي صمم جلال يتجوز الأول وجلال مش هيقعدنا تحت رحمته يتجوز أو له.. لما تقولي لغنام كلام ولد أخوكي ياريت تقوليلوا وليد ملوش ذنب يقعد قباله.. ولدي حقه يفرح!
ثم تركتها ودلفت للداخل دون انتظار رد بينما جلست نجاة تحدث نفسها بأسى وهي تنتظر عودة أخيها غنام:
نجاة: ربنا يهديك يا جلال يا ولد أخوي..
بعد أذان المغرب في منزل فايز كان الجميع ينتظر قدوم عائلة العمدة بينما كانت موج تجلس وتنظر إلى فرح بحزن شديد على حالها وهي لا تكف عن البكاء:
موج: بكفاية.. ارحمي نفسك!
فرح (بدموع وانهيار): مقدراش هموت هيجرالي حاجة.. طيب أهرب؟! هيرجعوني في نص ساعة!
موج: تهربي فين انتي كمان إن شاء الله ليها حل.
فرح: فين طيب ما انتي قولتي عشيه كده ومعملتيش حاجة!
صمتت موج قليلاً بقلة حيلة ثم قالت:
موج: دلوك اهدى شوية لما ياجو ونشوف هيحصل إيه.. أطلع أشوف الأخبار.
خرجت موج لتستكشف الأمر بينما كان والدها ينتظر بسعادة غريبة قدوم آل جهدان حتى أتاه اتصال هاتفي من العمدة:
فايز (بفرحة وحماس): أهه.. العمدة بيرن أكيد جايين!
وقفت موج في الخلفية تتنفس بضيق وتسخط بينما أجاب فايز:
فايز: ألو.. أيوه يا غنام بيه.
صمت قليلاً بينما تبدلت ملامحه كلياً وخاب أمله ثم قال بكبرياء زائف:
فايز: آه وماله يا عمدة.. ربنا يجعله نصيب أصلح.
انتظر قليلاً ثم أكمل: اتفضل وعليكم السلام.
أغلق الهاتف فاقتربت موج وسعدية منه وسألته سعدية بتقصٍّ وقلق:
سعدية: خير حصل إيه؟!
فايز (بندم وضيق): العمدة قالي جلال هيأخر موضوع جوازه شوي.. وكل حاجة نصيب!
موج (بتسرع وراحة مفاجأة): حلو طلع بيفهم!
التفت إليها والدها بنظرة حادة وشك:
فايز: يعني ايه.
موج (بتوتر): ايه آه له مفيش.. قصدي زي ما قالوا نصيب!
فايز (بغضب): طيب غوري من خلقتي دلوك!
دلفت موج بسعادة وغبطة نحو غرفة فرح لتخبرها بالأخبار السعيدة وتزف إليها النجاة المؤقتة.
ـــــــــــــــــــــــــــــــــــ**
في منزل العمدة:
نجاة: متزعلش نفسك يا خوي سيبه براحته.. يعني في حد ميبقاش عاوز يتجوز؟ هو بس يمكن حاجة شغلاه.
غنام (بغضب مكتوم وشعور بالإهانة): إيه شاغله ده لو شاور على أي بت تاجي تحت رجله في ليلتها أنا زهقت من جلال!
خضرة (مستغلة الفرصة بذكاء وخبث): كلنا ملينا دلوك شوف وليد.. حرام عليك تظلمه مع جلال!
غنام (بضيق ونفاذ صبر): وليد.. وليد.. وليد! انتي مش بتزهقي؟!
خضرة (بإصرار): له مبزهقش ولدي نفسي أفرح بيه وهو رايد الجواز.. يعني اللي عاوز منجوزهوش
واللي معاوزش نقعد كل سنة نحايلوا فيه؟!
نجاة: مقصديش أعدل عليك يا خوي بس إيه المشكلة لو جوزت وليد الأول لعيب ولا حرام؟
وجلال أنا هكلمه تاني مرة وتنين ولو وافق هشوفله عروسة بنفسي.. متنساش كمان يونس كبر ويجوز بردو.
غنام (بتفكير وهدوء): ربنا يسهل..
خضرة (بسعادة وسرعة): يعني إيه.. أنقيله عروسة؟!
غنام (موقفا إياها بنظرة حادة): هنشوف يا خضرة.. وبعدين تنقي ليه واللي جبتيها لجلال؟
خضرة (بارتباك وتلعثم): له.. ااا مش قصدي بس وليد تفكيره مختلف.. يعني مهيرضاش يجوز بنت النجار!
غنام (بشبه ابتسامة ساخرة): آه.. متأكدة إن وليد اللي مهيرضاش؟
خضرة: أكيد أُمال يعني أنا؟!
نظرت خضرة بعيداً لتتجنب نظرات غنام الكاشفة لأفعالها.
ـــــــــــــــــــــــــــــــــــــ**
في اليوم التالي ظهراً كانت موج في عملها كالمعتاد تفكر في تجارة آل غنام المشبوهة وعقلها يدور عما إن كان أهل الجزيرة يعملون في أشياء أخرى مثل هذه.
تحدث موج نفسها:
موج: آه ياني.. طلع كلام الناس صُح وعمايلهم سودة! يا ترى جوز دميانة ليه في الشغل ده ولا له؟
أكيد مش شغال عند المسخوط ده وصاحبه.. يا عيني عليكي يا دميانة!
كانت طوال الوقت تحاول طرد الأفكار من رأسها إلا أن حركة غريبة بدأت في المشغل وخرجت رئيسة عملهم للخارج مسرعة.
بعد وقت دلفت إلى موج قائلة:
الرئيسة: موج.. قومي معاي.
موج (باستغراب): ليه في حاجة؟
الرئيسة: آه قومي.
وقفت موج وسارت معها إلى خارج المشغل لتجد جلال يجلس بكل برود على أحد الكراسي واضعاً قدماً فوق أخرى ومعه رجلان آخران فاستغربت كثيراً من وجوده.
الرئيسة: هي ديتي يا جلال بيه.
التفت إليها جلال وتبسّم بتهكم ثم قال بنبرة تهكمية: وبعدين؟ مستحيل يكون اللي بيحصل ده حظ وصدفة.
صمت للحظه ثم قال:
جلال: تمام.. شوفي شغلك انتي.
التفتت موج خلف الرئيسة لتري لماذا تغادر فتحدث جلال قائلاً:
جلال: خير.. بقالك ٢٢ سنة ع الجزيرة واليومين دول بتظهري قدامي كتير ليه لتكوني قاصدة تشوفيني مثلاً؟
موج: إيه؟ يعني إيه قاصدة بعدين انت اللي عاوزني مش أنا..نعم في إيه؟
أشار جلال بيده للحارسين ليغادرا بعيداً ثم نظر لموج وقال:
جلال: اسمها حضرتك أو يا جلال بيه.. "انت" دي تقوليها للخضري اللي في السوق وأنتِ بتجيبي طماطم!
موج (برفع حاجب): اممم.. وحضرتك يا جلال بيه عاوز إيه مني؟
جلال: سمعت إنك كنتي تعرفي البنت اللي جت الجزيرة من فترة واشتغلت هنا أسبوع وبعدين اختفت.
موج: هدير؟
جلال: الله ينور.. نبيهة آه هي.
موج: معرفهاش كتير هي قضت أسبوع وخلاص.. كانت بتشتغل وياي أنا وصاحبتي وبعدين مجتش تاني.
جلال: راحت فين تعرفي؟
موج: أنا ليه مش متعينة في الحرس؟
جلال (بتحذير): معوزش عوجة لسان.. ردي بأدب والا فايز نسي يعلمهولك!
موج: له.. معرفش هيا فين.
جلال: قبل ما تختفي قالت إنها مش هاجي الشغل تاني ؟
موج: له.. المفروض كانت تاجي تاني يوم عادي بعدين يوم وتنين وتلاتة مرجعتش.. خدنا رقمها من الريسة ورنينا عليها تليفونها كان مقفول.
صمت جلال بتفكير ثم قال:
جلال: الأسبوع ده متكلمتش في حاجة؟ إنها عيانة.. تاهت من أهلها.. أي حاجة؟
موج: له.. كانت زينة هيا تقريباً ملهاش أهل هي أصلاً كانت في دار أيتام .
جلال: يعني إيه؟ متأكدة؟
موج: معرفش.. هي قالت كده.
جلال: ماشي.. تعرفي حاجة تاني عنها؟
موج: له.
جلال: طيب روحي لشغلك يا صباح.
نظرت موج بضيق وقبل أن تدخل كأن شيئاً ركض في ذهنها فجأة ثم التفتت إليه قائلة:
موج: اه صوح... شكراً.
قطر الحيرة في ملامحه وقال بنبرة مقتضبة:
جلال: على إيه؟
موج: إنك صرفت نظر عن الجواز من اختي.
اتسعت ابتسامة ساخرة على شفتيه ورامقها بعينين حادتين قبل أن يجيب بتهكم:
جلال: تقدري تقولي عملت إكده عشان لما أقابلك تاني الليل أعرف أخلص عليكي من غير ما يكون فيه رابط يكتفني... والأهم إن أكيد اختك شبهك في الشكل وطولة اللسان والتنين ما عجبونيش!
جمدت موج مكانها وتجلّت الصدمة في اتساع عينيها وندمت أشد الندم على شكرها له سحبت جانب شفتيها بازدراء وقرف، فبادَرها هو بتهديد هادئ وأشار لها بقسوة:
جلال: ششششش... يالا ادخلي إيه هاتصوريني.
التفتت لتغادر بينما وقف جلال من مجلسه يفكر في أمر الفتاة؛ هل حقاً ليس لها أهل كما قالت له ولموج أم أن كلام شاهين حقيقي وكانت مريضة وأتى والدها لأخذها؟
وأثناء ما كان يمتطي حصانه ليغادر خرجت موج مرة أخرى إليه غصباً :
موج: احم.. ااا افتكرت حاجة.
التفت إليها جلال وأشار بعينيه كي تكمل.
موج: هي فعلاً ملهاش أهل.
جلال: وعرفتي منين؟
موج: مرة ورتنا صور ليها مع إخواتها من الملجأ وحاجات كده يعني.. حتى كان منهم بيكلمها وواضح من كلامهم إنها كانت صادقة.
أومأ جلال برأسه ثم قال:
جلال: زين.
موج: هي حصلها حاجة يعني بتسأل؟ وانت ريس الحرس هتروح فين من غير ما تعرف؟
جلال (بنبرة حادة وقطعية): شوفي شغلك أحسن!
ثم تركها وغادر بركوب حصانه بينما وقفت هي تبصق في أثره بضيق وقالت:
موج: كسفني مرتين أبن البهيم ده أخ ياموج أخ.
أبو تقل دمك سال ميت سؤال وعند كلامي يعمل فيها العمدة الغامض!
دلفت للداخل مرة أخرى لتكمل عملها بينما كان جلال قد تيقن تماماً أن هناك خيطاً مفقوداً خلف اختفاء تلك الفتاة ولن يترك الأمر حتى يقلب الجزيرة رأساً على عقب ويعرف نهايته.
ـــــــــــــــــــــــــــــــــــــــــــــــــــــــــ**
مر اليوم وفي المساء كانت موج تجلس أمام المرآة تمشط شعرها بكسل تحدث نفسها:
موج: قال أختك عِفشة زيك.. بالله أهل الجزيرة دول ما عندهم نظر... دا أنا كُلي جمال ودلال بس منتظرين قرة عيني وصاحب النصيب!
حتى أتاها اتصال من دميانة.
ردت موج: أيوه يا أختي.
دميانة (بمزاح وسخرية): إيه أختي دي خير.. قمصانة ولا إيه؟
موج: آه طبعاً قمصانة مش سائلة ولا حاسة بغيرك!
دميانة: أنا لحقت بعدين عروسة.. افهمي وخلي عندك شوية إحساس!
موج: كمان بجحتي أخص.. عامله إيه ؟
دميانة: زينة.. وانتي؟
موج: زينتين.. أخبارك ويا المحروس؟
دميانة (بتنهيدة رضا): زي العسل!
موج (بشهقة وضحكة مكتومة): وماله بقولك إيه صوح..
دميانة: قولي.
موج: هو هاني ده شغال في الحرس وبس.. ولا ليه في حاجة تانية؟
دميانة (باستغراب): يعني إيه حاجة تانية؟!
موج: يعني جلال ده مش مريح وعنيه متطمنش.. قلت ليكونوا شغالين في حاجة كده ولا كده!
دميانة: له.. هو في الحرس وبس بعدين انتي تعرفي جلال منين عشان تقولي مش مريح وكمان ركزتي ف عنيه يا واكله ناسك أكيد علي ألسمع.
موج: له.. شفتُه النهاردة يا أختي بني آدم حجر منسيّ من أيام الفراعنة!
دميانة (بضحكة عالية): وه بتهزري احكيلي شفتيه فين وكيف؟!
روت لها موج ما حدث والتفاصيل الخاصة بتلك الفتاة "هدير" فقالت دميانة باهتمام واندهاش:
دميانة: غريب حتى هاني جاله تليفون وسمعته بيجيب سيرتها وطلع على ملا وشه!
موج (باندهاش): وه سابك قوام كده؟!
دميانة: قالي شغل ضروري ومش هأخر.. بس ليه مشغولين بيها قوي كده؟!
موج: بتسأليني أنا اسألي جوزك أكيد فيه حاجة!
دميانة (بخبث): معقول تكون عجبت جلال والحب واخد وعاطي بيناتهم؟!
موج: صُح والله.. يمكن يالا المهم تكون البت بخير يمكن ضايقوها ولا طينوا عيشتها وهربت من الجزيرة!
دميانة: هو في حد بيعرف يهرب من هنا بسهولة؟!
موج: بقول يمكن.. زي ما دخلت طلعت!
أكملا حديثهما لوقت طويل بينما كان جلال في الجانب الآخر قد وصل إلى آخر حارسين رأيا الفتاة
وفق التحريات التي تتبعها طوال اليوم..وقف بملامح حادة لا تبشر بالخير
كان معه منعم واثنان آخران وقف جلال بصلابة أثرت الرعب في قلوب الحارسين ثم سأل ببرود حاد يسبق العاصفة:
جلال: البنت اللي اسمها هدير.. كانت في الدار اللي قعدت فيها على الجزيرة وانتوا اللي رحتوا سحبتوها من دارها.. وديتوها فين؟
ارتبك الحارسان ونظرا لبعضهما بتوتر ناطق ثم قال أحدهما بلسان متلعثم:
الحارس: مفيش يا جلال بيه.. شاهين بيه شيعنا ناخدوها لأبوها!
جلال (وهو يقترب خطوة بتهديد صامت): ماشي.. يمكن مسمعتوش زين أعلى صوتي؟
رفع جلال صوته قليلاً والنبرة صارمة تقطع الشك:
جلال: البنت اللي اسمها هدير كانت في الدار اللي قعدت فيها في الجزيرة وانتوا سحبتوها منها.. خدتوها فين؟!
صمت الاثنين برعب وعجزا عن النطق وفي تلك اللحظة دخل هاني إليهم يلهث مسرعاً:
هاني (بتساؤل واستغراب): خير يا جلال جايبني على ملا وشي ليه؟
التفت إليه جلال بعيون صقيمة تشع غضباً:
جلال: مخبي إيه عني يا هاني البت دي راحت فين؟
هاني: أبوها خدها كيف ما قلتلك ليه الموضوع شاغلك قوي كده؟ بنت وراحت لحالها!
جلال (بنبرة حاسمة يكسوها التهديد): اتكلم يا هاني ومليكش صالح بشاهين صدقني هعرف ولو عرفت بعيد عنك هنسى إنك صاحبي!
صمت هاني قليلاً ثم هز رأسه بقلة حيلة واعترف:
هاني: أنا معرفش حاجة.. سألت زيك وقالوا أبوها خدها مصدقتش ورُحت لشاهين بيه
قالي البت مشت وخشمك تقفله ولو جلال سألك قولوا أبوها خدها!
جلال: وليه سألت شاهين من الأول شفت إيه؟ شكيت في إيه؟
هاني: عشان اللي عرفته من الحرس إنها مطلعتش من الجزيرة خالص محدش طلع ليلتها بره الشط. بعدين قلت يمكن.. وسكت.
التفت جلال للحارسين كالأسر المحاصر وقال بصرامة:
جلال: ها.. هتتكلموا ولا منعم يشوف شغله معاكم؟!
نطق أحدهما برعب وجسده يرتجف:
الحارس: جلال بيه إحنا ملناش صالح لو اتكلمنا شاهين بيه يقتلنا!
رد جلال بنبرة مرعبة وابتسامة ساخرة:
جلال: ولو متكلمتوش.. أنا اللي هقتلكوا دلوك!
وكمان اللي ليه أب هحبسه واللي ليه أخ هسيبه شغله.. يعني هتخربوا الدار كلها!
صمتا قليلاً والرعب ينهر أجسادهما ثم تشجع أحدهما وقال بصوت يرتجف:
الحارس: خدناها لشاهين بيه ليلتها!
جلال: يعني إيه خدتوها؟!
الحارس: كان ااا.. يعني كان عاوزها يا جلال بيه!
اقترب منه جلال كالبرق ومسكه من تلابيب ثوبه ثم ضغط بيده وجز على أسنانه بغضب مكتوم:
جلال: يعني إيه اتكلم زين!
الحارس (بفزع): شاهين بيه شافها مرة مروحة وعجبته.. مرة على مرة اتخفى ورحلها دارها الليل البنت عملت مشكلة وقالتله هتشتكيك.. قالها خلاص أتجوزك ما وافقتش!
جلال (بعيون تتشعل ناراً): وبعدين.. كمل!
الحارس: بعتنا الليلة دي خدناها ليه قلنالها العمدة عاوزك عشان ترضى تطلع ويانا من غير شوشرة.. وبعدين طلعنا و.. و..
جلال (بصرخة صاعقة): كمل!
الحارس: تقريباً شاهين بيه اتهجم عليها وهي ضربته وما قدرش يتحكم في نفسه.. بعد شوية نده علينا لما دخلنا كانت البنت سايحة في دمها وميتة!
اتسعت عينا جلال من الدهشة والبشاعة ونظر خلفه لهاني الذي كان واقفاً لا يصدق حجم الكارثة التفت جلال إليهما مرة أخرى والحنق يملأ صدره:
جلال: قتلها.. عادي كده؟!
نظر إليهما برهة ثم سأل بصوت كالجمر:
جلال: وبعدين حصل إيه؟!
الحارس: قالنا لفوها وادفنوها في أي مكان على طرف الجزيرة ولموا خلقاتها وحاجتها من الدار وادفنوها معاها علشان تبان إنها مشت.. واللي يسأل نقول إنها تعبانة في دماغها وأبوها جه خدها!
جلال (بغضب عارم): يا شياطين يا ولاد الكلب!
انقض جلال على رقبة أحدهما وخنقه بقوة حتى كادت روحه تفيض في يده لولا تدخل هاني ومنعم اللذان أزاحاه عنه بصعوبة!
هاني (وهو يمسكه): جلال اهدي يا جلال!
جلال (بصراخ وسخط): بنقول عليكم حرس يعني تحرسوا وتحموا مش تشتغلوا قتالين قتلة وتداروا الجثث؟!
منعم (بتهدئة): معلهش يا جلال بيه.. هما مهما كان نفذوا الأوامر انت خابر شاهين بيه!
جلال: أوامر.. صُح.. يعني شاهين اللي تقوله له يقتلها اسمع يا منعم.. الكلبين دول ينحبسوا لما أشوفلهم صرفة وشاهين حسابه عندي أنا!
همَّ جلال بالخروج كالبركان الثائر فأمسك به هاني بحزم:
هاني: جلال هدي حالك شوي.. أوعاك تعمل حاجة تندم عليها!
جلال (بنبرة قاسية ملؤها المرارة): أنا صُح ندمان.. ندمان إني لاخيت وسبت شاهين يمرح براحته!
أفلت جلال يده بقوة وخرج مغادراً ليعود إلى منزل عائلته والشرر يتطاير من عينيه.. كان يتمنى أن يجده وحده قبل أن يراه أبوه غنام ليغسل عار ما فعله بيديه ويتشهم منه على هذه الجريمة البشعة التي تلطخت بها أيديهم.
