رواية جزيرة غراب الوادي الفصل الخامس
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«قد يبدو لك الخصم شيطاناً بسلطانه لكن أشد السرائر ظُلمة هي تلك التي تدبر لك الذنب في الخفاء وأنت عنه غافل.»
(شباك الزور)
﷽
عاد جلال إلى المنزل بعد وقت ليس بطويل ليواجه شاهين.
دلف من الباب الخارجي للساحة فوجد شاهين يجلس بكل هدوء وممسك بيده خرطوم أرجيلته وتجلس جواره زوجته الثانية وعد.
دلف جلال إليه مباشرة ونظر أولاً إلى وعد قائلاً بحزم:
جلال: قومي ادخلي .
نظرت له وعد باستغراب ثم التفتت إلى شاهين تنتظر رأيه فكرر جلال قوله بحدة:
جلال: إيه مسمعتيش؟!
شاهين (بضيق وهو ينظر لأخيه): خير داخل شادد عروقك ليه؟ كلم مراتي زين!
لم يجبه جلال بل ثبت نظراته النارية على وعد حتى وقفت وسارت للداخل مسرعة.
التفت جلال لشاهين والشرر يتطاير من عينيه ثم قال بصوت كالجمر:
جلال: البنت اللي كان اسمها هدير راحت فين؟
تلاشت ابتسامة شاهين الساخرة عن وجهه وساد الصمت فعاد جلال يسأل بنبرة أشد صرامة:
جلال: وديت البت فين يا شاهين؟!
شاهين: وبتسألني أنا ليه؟ انت عارف ديتي مسؤوليتك انت.. أنا خصني التجارة والمال!
جلال: عشان مسؤوليتي بقولك البت فين!
شاهين (بلامبالاة): أبوها خدها.. كانت تايهة منهم!
جلال (بقسوة وشك): تعرف إن تأليفك عفش؟ لأن أسهل حاجة أقدر أعرِفها مين دخل وطلع من الجزيرة ومفيش لا أب ولا أم جم للبنت ديتي
هيا قالت بنت ملجاء وأصحابها في المشغل أكدو الكلام يبقي أبوها خدها كيف.
ينفس شاهين دخان أرجيلته من أنفه وفمه ثم قال بتحدٍّ:
شاهين: بتكدبني يعني وتصدق بنات المشغل عيب؟!
استشاط جلال غضباً من هذا البرود المستفز فمال على الأرجيلة وأمسكها ثم هوى بها نحو الحائط لتنكسر وتتناثر شظاياها على الأرض!
وقف شاهين بنفاذ صبر وصاح:
شاهين: خلي بالك.. ليا آخر!
جلال (وهو يقترب منه): وريني آخرك!
شاهين (بصرامة وسلطة): غور من وشي يا جلال أحسنلك شغل التحقيق والعسكر ده هناك على أهل الجزيرة والحرس.. إنما عندي تطأطئ رأسك قدام أخوك الكبير!
جلال (بتهكم يقطر سخرية): أنا اللي أطأطئ ولا انت؟! انت اللي زيك يتلف بشال حريمي!
أنزل شاهين يده بغضب شديد وأمسك جلال من تلابيب جلبابه قائلاً:
شاهين: خلاص.. وصلت للزور بعد عني!
نفض جلال يده بقوة ووقف أمامه مواجهاً مشيراً بإصبعه على رأس شاهين:
جلال: ديتك طلقة طالما قتلت بنت ملهاش ذنب إيه.. مش مكفيك حريمتين في الدار عاوز تاني؟!
وماله بس بالرضا مش غصب وتتطاول على البنات ولما متعجبعمش تقتلهم؟!
شاهين (بخبث ومواجهة صريحة): من أول ما دخلت عرفت إنك جبت ناهية الموضوع.. ليه سألت من الأول؟
ومش هي بس أي حد يتطاول أو يغلط نص غلطة في شاهين جهدان بيتعاقب!
جلال: المرادي قتل مش عقاب دا غير أنها معملتش حاجة تخليك تعاقبها وحسابك عندي وأبوي هيعرف!
بتنام وتأكل وتشرب كيف وضميرك ما حسش لثواني له.. لساك بتقاوح!
شاهين (بابتسامة باردة): سبتلك الضمير!
جلال: زين.. أبوي ياجي ونشوف هيقول إيه على عملتك ولو مخدش قرار نحيتك تستاهله انا هاخد
ولعلمك عرفت دفنوها فين.. وممكن بتليفون صغير أوديك ورا الشمس!
ضحك شاهين بسخرية واستهزاء ثم قال:
شاهين: هتفوت عيلتك وتعمل إيه.. تبلغ؟!
جلال: وليه له.. يمكن!
شاهين: بلغ يبقى هتضر نفسك!
جلال: لو على أبوي والدار آخر همي بس الحق يطول صاحبه!
وقف شاهين أمام جلال بمكر وثبات وقال بنبرة ثعبانية:
شاهين: لساك صغير.. بكره تكبر وتتعلم فاكر إني مكنتش خابر إنك هاتفتش وتلف وتسأل؟
انت بتحب شغلك وطالما دخلت رأسك حاجة لازم توصل لها.. عشان كده أمنت نفسي وطلع عندي حق
جلال (بشَكّ ونبرة متوجسة): تقصد إيه؟!
شاهين (بابتسامة خبيثة ثعبانية): يعني الجثة لو طلعت لأي سبب.. هيبقى معاها حاجة تخصك انت وعليها بصماتك انت مش أنا!
تشخص بصر جلال لثوانٍ مصدوماً من كم البشاعة والشر ثم هجم وأمسك ذراع شاهين بقوة وجز على أسنانه:
جلال: يعني إيه تخصني؟!
شاهين: يعني قبل ما تندفن.. خليتهم حطوا معاها في اللفة خاتمك وعليه بصمتك لحالك عشان لو فكرت تعمل اللي بتعمله دلوك!
لم يتحمل جلال أكثر وهوى بضربة قاضية على وجه شاهين ترنح من شدتها للخلف بدأ الاشتباك بعنف شراسة بينهما واللكمات تنهال كالصواعق حتى خرج أهل المنزل جميعاً على صوت الصراع يحاولون الفصل بينهما دون جدوى!
في ذلك الوقت تدخل حرس المنزل وأزاحوهما عن بعضهما بعد محاولات مضنية.
خضرة (بصياح ونشاز غاضب): كده؟ بتتهجم على أخوك الكبير يا جلال؟ صُح العرق دساس.. نفس غل أمك!
التفت إليها جلال بنظرة الكره والاشمئزاز المعتادة وقال بصرامة:
جلال: أمي بنت البهوات.. معاكي حق فيه فرق كبير بينها وبين بنت الغجري!
أتى غنام من الخلف وصاح به بغضب زئيري:
غنام: جلاااال احفظ لسانك!
خضرة (تستغل الموقف بلؤم): أهه.. زين سمعت بنفسك وهو بيقل أدبه قدام الخدم والشغيلة؟!
غنام: انت كيف تكلم مرت أبوك كده؟!
التفت إليه جلال وقال بجمود وقسوة:
جلال: أي حد يجيب سيرة أمي الله يرحمها يتحمل والحمد لله إنها مرت أبوي.. لو حرمة تاني كنت خليت كل نص فيها لحاله!
شاهين (وهو يمسح الدم عن فمه): سكتنالك كتير خلاص قرفنا منك!
اقترب شاهين ليَشتبك معه مرة أخرى فاستوقفه غنام بحزم وجبروت:
غنام: شاهين الزم مطرحك!
التفت غنام للخدم والحرس وأمر بنبرة حادة:
غنام: يالا.. معوزش مخلوق يفضل واقف هنا!
التفت الجميع مسرعين وكلٌّ ذهب لعمله بينما وقف غنام يتوسط أولاده وسأل:
غنام: إيه حصل هنا؟!
شاهين (بمكر وترقيع): جلال بيه جاي يرمي تهم على كتفي من غير حق!
غنام: تهم إيه؟!
شاهين: مش عاجبه إني عاوز أتجوز تاني!
كريمة (بصدمة وزعيق): تتجوز؟ انت هتتجوز تاني يا شاهين؟!
شاهين: اه.. خير عندك مانع؟!
اقترب غنام من جلال بعدما شعر بكذب شاهين وألاعيبه وسأل بنبرة هادئة:
غنام: حصل إيه يا جلال؟ اتكلم..
جلال (بسخرية ومرارة): حتى لو اتكلمت يا أبوي هتعمل إيه؟ ولا حاجة زي كل مرة شاهين يعمل المصيبة وتقول حسابه عندي وتسكت.. لما كل مرة يزيد شره!
خضرة: ولدي مبيعملش حاجة انت اللي بتغير من إخواتك وتتبلى عليهم!
غنام (بصوت كالرعد): اكتمي يا خضرة واوعاكي تتدخلي!
اقتربت نجاة من جلال تتفحصه بخوف وحنو عائلي:
نجاة: انت زين يا ولدي؟
جلال: زين يا عمتي متخافيش اللي عاوز يعرف حاجة يسال شاهين بيه.
ثم تركهم وغادر المنزل كالعاصفة دون إضافة كلمة أخرى بينما وقف البقية يتجادلون وغنام يضغط على شاهين ويسأله عن حقيقة الأمر
وشاهين كعادته ينسج الكذب ليجد مخرجاً من الورطة.
ـــــــــــــــــــــــــــــــــــــــــــــ**
كان جلال يعتاد الجلوس ليلاً على حافة المياه يفرّ إليها عندما يضيق العالم من حوله.
اتجه مباشرة إلى هناك وجلس تحت إحدى الأشجار المظلمة يرمق سكون النهر يحاول بكل ما أوتي من قوة أن يسكّن الصراع المشتعل في رأسه.
مرّ وقت والهدوء يخنق المكان حتى أتى من خلفه هاني وجلس جواره نظر إليه جلال بنبرة متعبة وقال:
جلال: لسه مروحتش؟
هاني (بتنهيدة): كنت خابر إنك هتكون هنا.. وعارف إنك عملت مشكلة وجيت تسند رأسك ع المية.
جلال (بعيون تائهة في الظلام): أنا زهقت من العيشة دي.. خلاص جابت آخرها.
هاني: مكتوبة ولازم تنعاش يا صاحبي.. عملت إيه ويا شاهين؟
روى جلال ما حدث بينه وبين شاهين بتفاصيله البشعة فاستقرت الدهشة على وجه هاني وقاطعه بذهول:
هاني: معقول؟ إيه التفكير الشيطاني ده؟!
جلال (بمرارة قاسية): مش دي المصيبة يا هاني.
هاني (بعجب): مش دي؟ أُمَال إيه هو في أوعر من كده؟!
جلال: آه.. يعني شاهين لما اترصد للبنت مكنتش جريمة لحظة غضب ولا هي عملت حاجة في وقتها تسببت إنه يقتلها.. طالما خد خاتمي معاه من البيت قبل ما يجيبها عنده يبقى كان ناويها ومحسوبة!
هاني (بتفكير وشك): صُح.. معاك حق كان ناويها ومجهز لقتلها من بدري!
جلال: ياريتني ما دورت ولا عرفت اللي حصل.. الذنب بقا طوق في رقبتي.
هاني: بالعكس دلوك ضروري نطلع خاتمك.. انت خابر شاهين مينضمنش نفرض هو اللي بلغ وجاب العسكر؟!
جلال (بألم وحرمة): هننبشوا القبر يا هاني؟ دي لسه ميتة.. حرام مقدرش أعمل كِده!
هاني: نصرفوا والرب يسامح.. المهم نطلعوك من ملاعيبه.
جلال (بحسم وقسوة): مش هعديها.. حتى لو سبته دلوك خليه يفكر اني خفت وسكت هياجي يوم وياخد جزاءه وعلى يدي أنا.
هاني: شاهين مسخرته كترت مع البنات والجزيرة بقت ع الكف.
جلال: لازم أراقبه.. يعني لو كررها وقرب من أي بت من الجزيرة نلحقوها قبل فوات الأوان.
هاني: وغنام بيه؟ يمكن لو عرف يعمل حاجة حتى يقلل صلاحياته في الجزيرة ويلجمه شوي؟
جلال (بضحكة ساخرة يكسوها الوجع): أبوي كل مرة نقف أنا وشاهين قصاد بعض وديماً شاهين غلطان بياجي معاه بردو حتى لو حايلني بكلمتين ديماً مَيّال لشاهين.. مخابرش ليه!
هاني: بيحافظ على صورة آل جهدان قدام الخلايق.. مش أكتر.
جلال (بتهكم مر): صورة صُح.. أنت شايف دي صورة!
ظلا يتحدثان لوقت متأخر من الليل والهم يشاركهما جلسة الشاطئ في هدوء الليل الدامس.
ــــــــــــــــــــــــــــــــــــ**
في المنزل صعد شاهين إلى غرفة وعد
عندما دلف وجدها تجلس تبكي بحرقة وعويل مكتوم:
شاهين (بنفاذ صبر وضيق): يا بووووي هنبتدي؟!
وعد (بدموع وكسرة): ليه طيب؟ قصرت معاك في إيه عشان عاوز تتجوز عليا يا شاهين وتحرق قلبي؟!
شاهين (ببرود ومحاولة ملاطفة): يا بت شرع ربنا وحلاله انتي خابرة إني بحبك انتي حتى لو اتجوزت عشرة!
وعد: آه حب يااه.. أفرح وأرقص بعد الكلام ده يعني؟!
شاهين: روقي العروسة طارت أصلاً ولسه مخابرش هتجوز ولا له.. اعقلي كيف كريمة!
وعد: مين قال كريمة عاقلة؟ كريمة نافرة فيه فرق!
شاهين (بتحذير حاد): لمي روحك يا وعد!
وعد: مش دي الحقيقة هي خلاص نافرة منك ومعوزاكش يعني اتجوزت أو له مش فارق معاها إنما أنا.. أنا بحبك يا شاهين!
شاهين (وهو يمسك وجنتيها بمكر ويرسم الابتسامة): وأنا كمان بحبك.. أكتر من كريمة ومن روحي المهم سيبك قلتلك الجوازة باظت خلاص إيه.. هتقضيها نكد ولا أنزل أنام تحت؟
وعد (بسرعة وزعل مكسور): له.. تحت ليه؟
شاهين: خلاص.. افردي وش القمر ده!
ابتسمت وعد قليلاً وانطوت الصفحة مؤقتاً بينما مرت الليلة بثقل وتفكير أسود على بعض أفراد عائلة آل جهدان.
ــــــــــــــــــــــــــــــــــــ**
بدأ اليوم التالي بشمس دافئة وركود يسبق العاصفة. كانت موج تسابق أصابعها في المشغل كعادتها تغزل القماش وعقلها يُشرّد في الخفاء. وعند الظهيرة دنت منها رئيسة العمال بخطوات ثقيلة ووجه يكسوه الحزن والأسر وقالت:
الرئيسة: موج.. قومي معايا دقيقة.
موج: حاضر.
وقفت موج وسارت خلفها بخطى هادئة ظناً منها أنها تريد مساعدتها في إنهاء ثوبٍ مستعجل أو تقفيل شغل حتى انزوت بها جانباً في زاوية بعيدة عن الأعين.
مدت الرئيسة يدها ببعض المال وقالت بنبرة خافضة يملؤها الأسف:
الرئيسة: امسكي يا موج.. باقي أجر شغلك للشهر ده.
نظرت موج للمال المنثور في يدها بذهول وارتفعت عيناها تستفهم بغرابة:
موج: باقي الشهر؟ بس لسه الشهر مخلصش!
الرئيسة: مش عارفة أقولك إيه والله.. بس خلاص مش عاوزينك في المشغل تاني وقالو تروحي دلوك.
وقع الخبر على رأس موج كالصفعة ليتلعثم لسانها بكسرة وذهول:
موج: أنا ليه؟! قصرت في حاجة ولا حصل مني غلط لا سمح الله؟!
الرئيسة: له يا بنتي عيبك مش في شغلك.. أصحاب المشغل هما اللي أمروا بكده ومخبراش السبب أتمنى تسامحيني أنا ماليش حكم هنا زيي زيك.
موج (بحزن شديد وصوت يخنقه البكاء): له.. بس يعني مفيش أي حل؟! أكلمهم طيب أعرف السبب يمكن يرجعوا في كلامهم
أنا بقالي سنين هنا عمري ما خرجت مني عيبة ولا هملت في شغلي!
الرئيسة (بهز رأس قاطعة): الموضوع نهائي يا موج.. ملوش عازة تدوري ولا تعافري.
أومأت موج برأسها بقلة حيلة والدنيا تضيق في عينيها.
أخذت المال بخاطر مكسور وسارت نحو طاولتها بخطوات مرتعشة.. جمعت أغراضها البسيطة في صمت ودون أن تودع أحداً من زميلاتها
فقد ضاق صدرها بحزن لا تسعه الجدران ولم تكن تبتغي في تلك اللحظة سوى الهروب بعيداً.
بعد أن لملمت أغراضها أسرعت بالخروج ورأسها يطن بالأسئلة قبل أن تتجاوز الباب أقتربت منها الرئيسة واحتضنتها بحب لتودعها وفي تلك اللحظة فاضت دموع موج؛ فهي لا تفهم لِمَ قُطع رزقها فجأة
انهمرت دموع الرئيسة هي الأخرى فموج تعمل معها منذ سنوات ومغادرتها ستترك فراغاً كبيراً في المكان.
بعد لحظات دافئة امتزجت بالدموع خرجت موج لتعود إلى منزلها وقبل أن تبتعد عن محيط المشغل اقتربت منها فتاة تعمل معها في المكان لكنها لا تعرفها كثيراً.
الفتاة (بصوت شبه خافت): موج.. ثواني!
التفتت إليها موج ووقفت تنظر إليها باستغراب عما تريد فدنت الفتاة منها وقالت بنبرة حذرة ومغلفة بالتهديد:
الفتاة: البيه بيقولك دي قرصة ودن صغيرة.. تاني مرة مالكيش صالح باللي راح واللي اختفى!
موج (بصدمة وذهول): بتقولي إيه مش فاهمة.. والبيه مين ده؟!
تركتها الفتاة دون أن تنطق بكلمة أخرى وعادت مسرعة إلى داخل المشغل بينما وقفت موج في منتصف الطريق وتنظر في أثرها بغرابة وذهول.
موج (بغل وحيرة): أنا عملت إيه بس؟!
تنهدت بضيق يمتلئ بالحزن واكتفاء الصدر ثم أكملت:
موج: أستغفر الله العظيم يا رب.. إيه اليوم ده!
التفتت مرة أخرى وواصلت طريقها بقلب وجل نحو المنزل.
ــــــــــــــــــــــــــــــــــ**
بعد وقت عندما دلفت إلى الدار استقبلتها والدتها بسؤال مفاجئ:
سعدية: خير جاية بدري ليه؟!
موج (بتهرب ونبرة مجهدة): مفيش.. تعبانة شوية.
سعدية (بشك وحنو أمهات): عندك إيه كنتي زينة الصبح!
موج: مفيش يا أماي هو العيان بيصحى عيان بس؟ ماينفعش يعيا الضهر يعني؟!
ثم تركت والدتها ودلفت فوراً إلى غرفتها ألقت حقيبتها على الفراش وجلست على طرف السرير تفكر بتوتر عارم وهي تهز قدمها بسرعة ونظراتها تائهة في الفراغ:
موج (بهمس مذعور): يعني إيه مالكيش صالح باللي غاب واللي اختفى؟ تقصد إيه البت دي.. ومين البيه اللي شيعها؟!
ــــــــــــــــــــــــــــــــــــــــــــــ**
في سرايا العمدة كانت كريمة تجلس بهدوء تطعم ابنتها الصغيرة تتصنع البرود والجمود لمداراة ما بداخلها.
اقتربت منها وعد بخطوات حثيثة وجلست قبالتها ثم قالت بنبرة ملؤها الغيظ:
وعد: خير؟ عرفتي يعني إن شاهين عاوز يتجوز ولا هامك؟!
كريمة (بدون أن ترفع عينها): وبعدين؟
وعد (باستنكار): وبعدين إيه يعني موافقة؟!
كريمة: ولو رفضت.. هيسمع؟
وعد: بردو نتفق عليه ونمنعوه!
كريمة: امممم..
وعد (بضيق ونفاذ صبر): كريمة! ردي زين وكلميني زي ما بكلمك!
توقفت كريمة عن إطعام ابنتها ونظرت إليها بجمود يخفي خلفه مرارة سنين وقالت:
كريمة: اسمعي.. يجوز ميجوزش ميفرقش عندي لو فارق عندك اتصرفي انتي بعدين ما كل يوم سهر مع النسوان وانتي وأنا خابرين إيه حارقك الجواز قوي كده؟!
وعد: آه حارقني تاجي الجديدة تلهفه مني ومنك ونقعدوا نتفرجوا؟!
سخرت كريمة بابتسامة باهتة وقالت بكسرة متخفية:
كريمة: ما انتي لهفتيه مني وما اتفرجتش يعني! سبتهولك تشبعي بيه وياريتك مليتي عينه!
وعد (بشرار ينطق من عينيها): آه.. قصدك تشمتي يعني أجرّب اللي جربتيه؟!
كريمة: أنا لا يهمني شاهين ولا عفريت.. يهموني عيالي وبس يعمل ما بداله آخر همي!
وقفت وعد باشمئزاز وغضب عارم:
وعد: أوَعي تفكري هبقى زيك ولا حتى لو اجوز هاسيبو ليها ده أنا أطلعها بليلها!
كريمة (بنبرة تهكمية سريعة): شاطرة لولا المعلقة في يدي كنت سقفتلك!
تركتها وعد ودلفت للداخل تتآكل بغيظها بينما تجمد بصر كريمة للحظات في الفراغ.. خنقها القهر فترقرت الدموع في عينيها لكنها مسحتها بسرعة وجفاء قبل أن يراها أحد
وعادت تطعم ابنتها وكأن شيئاً لم يكن.
ــــــــــــــــــــــــــــــــــــ**
قبل العصر كانت موج ما زالت حبيسة غرفتها والغضب يأكل رأسها حتى سمعت صياح والدتها من الخارج فهرعت إليها مسرعة:
سعدية: في إيه مالكم النهاردة.. إيه حصلك انتي كمان؟!
نظرت موج نحو أختها خلود التي وصلت لتوّها من المدرسة؛ وجهها تشوهه الكدمات وثيابها يملؤها الوسخ والأتربة!
موج (بلهفة وخوف): خلود مالك فيكي إيه؟!
خلود (بتأتأة وتصنّع البساطة): مفيش حاجة.. بعد ما نزلت من المعدية خبطني موتوسيكل والحمد لله ربنا لطف!
سعدية (وهي تتفحص وجهها برعب): خبطك كيف وشك مبهدل فيكي حاجة تاني؟!
خلود: دراعي خدلان وبس.. أنا زينة!
موج (بغضب عارم): مين الحمار ده ليه ماشكتيش فيه أكيد كان مسرع !
خلود (بنفاذ صبر): مكنش يقصد أنا اللي جيت في طريقه.. سيبوني بقى أغير زهقتوني!
**
تركتهم ودلفت للغرفة فدخلت موج خلفها فوراً وحميتها تتأكل:
موج: آه لو أنا معاكي.. كنت سففته تراب السكك!
سارت خلود نحو الباب وأغلقته بحذر كي لا تسمع والدتها ثم اقتربت من موج وقالت بنبرة مرتعشة يكسوها الخوف:
خلود: موج.. دي مش حادثة دي مقصودة.. واللي خبطني من الحرس!
موج (برعب وذهول): يعني إيه مقصودة وليه؟!
خلود: وأنا في الأرض مال يعمل روحه بيقومني وقالي: قولي لأختك الكبيرة خافي على إخواتك.. البيه بيقولك لو حد تاني سأل أوَعاكي تجيبي سيرة البنت.. بنت ميتم ولا ليها أهل!
موج (بصدمة): يعني إيه.. إيه الألغاز دي؟!
خلود (بشك وتخمين): مش يمكن يقصد جلال ده طالما قال البيه!
موج: جلال ليه.. مش فاهمة؟!
خلود: يمكن لما رحتيلو عشان ميجوزش فرح!
طافت في رأس موج فجأة حواراتها السابقة مع جلال عن تلك الفتاة "هدير" وكيف أخبرته وقتها أنها مقطوعة وليس لها أهل!
موج (بصدمة وإدراك): صُح افتكرت يعني هو؟! طيب ليه.. ده أنا كنت بجاوب على سؤاله معملتش حاجة!
خلود: سؤال إيه؟
موج (بغل واشمئزاز): إيه له.. إيه الجبروت ده هو مجنون ولا صايبه مرض؟! حسبي الله ونعم الوكيل!
عادت تتفحص خلود بخوف وألم أمومة:
موج: المهم انتي زينة وريني دراعك!
خلود: متخافيش.. زينة والله لو في حاجة شديدة كنت هقول!
احتضنتها موج بحب جارف وحماية وعقلها يسابق الزمان بالتفكير فيما حدث في المشغل صباحاً وما حدث مع خلود الآن.. كل الخيوط تجمعت في رأسها لترسم وجهاً واحداً: جلال!
ــــــــــــــــــــــــــــــــــ**
بعد العصر اتجه جلال إلى المحبس الخفي الذي يحتجز فيه الحارسين اللذين دفنا هدير.
دلف إليهما بجمود يسبق العاصفة وقال بصرامة:
جلال: مين فيكم اللي حط الخاتم بتاعي مع جثتها؟!
نظر الحارسان بتوتر فقال أحدهما بلسان متلعثم:
الحارس: أنا يا جلال بيه..
جلال (بقسوة وهو يقترب منه): ليه عملت كده.. كنت فاكر إني مش هعرف؟!
الحارس: مكنتش أقدر أقول لشاهين بيه له!
جلال (بسخرية مريرة): بس تقدر تخفي جثة قتيلة! وتقدر تلبسها لرئيسك واللي بتاكل من وراه عيش انت وعيلتك كلها؟!
لم يجب الحارس وساد صمت مخيف فالتفت جلال لمنعم وقال بأمر قاطع:
جلال: شوفلي مصيبة حلوة كده تليق بمقامهم بعيد عن موضوع البنت ديتي.. ولفقها لهم وارميهم في أي مكان ميشوفوش الشمس!
صاح الحارس الآخر بلهفة ورعب:
الحارس: ليه يا بيه إحنا عملنا المطلوب!
جلال (بصوت كالصاعقة): ابلع لسانك لولا عرفت إنكم متجوزين وعندكم عيال كنت دفنتكم جارها قول الحمد لله.
ثم التفت لمنعم وأكمل بلهجة تحذيرية حادة:
جلال: منعم.. أي حد يدخل ليهم من غير إذني هحاسبك انت ورجالك حتى شاهين أخوي.
منعم: ماشي يا جلال بيه.. نودوهم مكان محدش يعرف هو فين في الجزيرة.
اتجه جلال للباب ليغادر فاستوقفه الحارس الأول بصوت متوسل فالتفت إليه جلال بنظرة تهكمية:
جلال: إيه فاكر ليك أمنية أخيرة ولا طلب ده مش إعدام!
الحارس: له.. كنت عاوز أقولك حاجة!
جلال: اتكلم!
نظر الحارس لرفيقه بتردد ثم صمت فهمس جلال بصرامة:
جلال: تعال وراي.
خرج جلال وخلفه الحارس ووقفا خارج الغرفة بعيداً عن الأعين ليسمع ما عنده:
الحارس: الخاتم لساه معاي.
عقد جلال حاجبيه باستغراب وارتياب:
جلال: يعني إيه؟!
الحارس: يعني لما كنا بندفنوها عملت حالي بحطه وخفيته وقت الردم!
جلال (بشك وسخرية): يعني مدفنتش الخاتم معاها اممم.. أصدق يعني وأطلقك؟! مهيحصلش!
الحارس: له.. مش بقول كده عشان تسامحني أنا خبيته في داري خفت شاهين بيه يبلغ عن الجثة وتتاخد ظلم وتدفع التمن وتعتبرني خنتك وأشيل الذنب!
سخر جلال بضحكة باهتة:
جلال: حنين؟! اتأثرت أنا يعني كدة مش خاين انت دفنت قتيلة.. خابر يعني إيه؟!
الحارس: هددنا بأهلنا يا بيه وحريمنا لما حاولت أبعد عن الموضوع عشان كده عملناها غصب عنا.. بس منكرش خيرك عليا من زمان مقدرتش أخون فضلك وأسبب في أذاك!
جلال: ماشي.. عاوزه!
الحارس: أنا بس اللي اعرف مطرحه.
جلال: وماله.. تروح مع منعم ترجعه ومتفكرش هتقدر تفلت من منعم خلي بالك!
الحارس: ماشي يا بيه.
جلال (بنبرة أهدأ تحمل معنى الحماية): الأفضل تقعدوا مطرح ما هشيعلكم.. آه الحبس عقاب بس حماية كمان.. شاهين سهل يتخلص من الشاهدين الوحيدين على جريمته أتمنى تفهم!
الحارس: فاهم يا بيه.. بس عندي طلب لو تسمح دارنا؟
جلال: متخافش.. هنحرسهم من بعيد ومحدش هيقرب لهم.
الحارس (برجاء وشكر): كتر خيرك يا جلال بيه!
تركه جلال وغادر المكان بعدما أرسله مع منعم لإحضار الخاتم ليتنفس الصعداء بعد إفساد لعبة شاهين الخبيثة.
ـــــــــــــــــــــــــــــــــــــ**
وفي نفس الوقت في دار موج كانت قد روت لخلود أمر طردها من المشغل دون الإفصاح عن السبب الحقيقي أو الذعر الذي ينتابها:
خلود: يعني كل عمايله دي عشان قلتيله متتجوزش أختي؟!
موج (بغل ومحاولة تماسك): آه.. مش مهم عشان إيه المهم إنه بني آدم مفتري وميعرفش ربنا!
خلود: طيب والشغل هتقولي لأبوي وأمي؟!
موج: له هيسألوا ويدوروا وأخاف يعرفوا إني قابلت الزفت ده وتكبر المشكلة!
خلود: أمال إيه؟!
موج: الخالة زينب كانت كذا مرة قالتلي أشتغل وياها وكنت برفض عشان بحب المشغل وأكون مع دميانه.. دلوك خلاص بكرة أروحلها ويا رب ألاقي شغل عندها!
خلود: لو أبوي عرف من بعيد.. هيسود أيامك!
موج (بتنهيدة ثقيلة): لو عرف ساعتها ربنا يعدلها من عنده!
صمتت موج والهم يأكل قلبها تتوسل في سرها أن تجد عملاً سريعاً عند الخالة زينب لتخرج يومياً في كي لا يلاحظ والدها تركها للمشغل وتنكشف الأمور.
