رواية عروس البحر الفصل الخامس 5 بقلم نون لاشين

ملك فتحت عينها ولقت نفسها على السرير لوحدها.. بس المرة دي حسّت بشعور مختلف.. حنين.

التفتت ناحية الأريكة.. فاضية.

قامت ولبست روبها وفتحت باب البلكونة.

لقت آدم واقف بيبص على البحر.. لابس قميص أبيض وشعره منعكش، وفي إيده كوباية قهوة.

قربت منه 

آدم حس بيها قبل ما تتكلم.. التفت وابتسم.

آدم بصوت دافي: "صباح الخير."

ملك بخجل: "صباح النور."

آدم: "نمتي كويس؟"

ملك بتوتر: "آه.. ...والله ما أنا عارفة.. لسه مش مصدقة اللي حصل إمبارح."

آدم قرب منها وحط إيده على خدها.

آدم بهمس: "إمبارح حقيقة يا ملك.. مش حلم."

ملك قلبها دق بسرعة.. لمسته كانت دافية .

آدم  "من يومين كنتي بتبصيلي بغيظ.. ودلوقتي بتبصيلي بـ.."

ملك قاطعته باحراج: "بـ إيه؟"

آدم ابتسم: "بحب."

ملك اتكسفت وبصت تحت.

آدم رفع وشها بإيده: "متخبيش عينيك عني يا ملك.. أنا بحب أشوف اللي فيهم."

ملك "أنا خايفة يا آدم."

آدم بقلق: "خايفة من إيه؟"

ملك: "خايفة إن اللي بيحصل ده حلم.. وأصحى منه ألاقي نفسي رجعت لوحدي تاني.. أنا طول عمري متعودة إن أي حد يدخل حياتي بيمشي."

آدم مسك إيدها الاتنين وبص في عينها بعمق.

آدم "ملك.. أنا بوعدك.. أنا مش هسيبك.. مهما حصل.. مهما جه قدامنا.. أنا جنبك."

ملك بصت في عينه الزرقا.. شافت فيهم دفا بدل البرود.

ملك بابتسامة من وسط دموعها: "وعد؟"

آدم: "وعد."

قرّب جبينه من جبينها وفضلوا لحظة من غير كلام.. بس اللحظة دي قالت كل الكلام اللي ما قدروش يقولوه.

أمينة كانت بتجهز شنطتها عشان ترجع أسوان.

زياد كان بيساعدها.

زياد: "يا حاجة أمينة.. ما تقعدي كمان شوية.. آدم فرحان بوجودك."

أمينة بابتسامة: "لأ يا زياد.. أنا فهمت كل حاجة.. آدم محتاج يعيش فرحته لوحده مع ملك.. ولو قعدت هكون ثقيلة عليهم."

زياد بدهشة: "فهمتي إيه؟"

أمينة بصت عليه بعين خبيرة: "أنا فهمت من أول يوم إن الجواز ده بدأ صوري.. بس شوفت ولدي بيحب لأول مرة في حياته.. وشوفت ملك بتحب كمان.. فأنا سيبتهم عشان يكتشفوا ده لوحدهم."

زياد وقع من إيده الفنجان.

زياد بصدمة: "إنتي عرفتي من الأول؟!"

أمينة بضحك: "يا بني.. أنا عشت كتير وشوفت ناس كتير.. مش هيضحك عليا راجل وبنت فاكرين إنهم ممثلين."

زياد بإحراج: "يا حاجة.. أنا آسف.. أنا اللي فكرت في الموضوع ده."

أمينة ربتت على كتفه: "متتأسفش يا زياد.. إنت عملت أحسن حاجة في حياتك.. آدم كان ميت من جوه.. وإنتي رجعتله روحه."

ودخلوا آدم وملك في اللحظة دي.

أمينة ابتسمت.

أمينة: "تعالوا يا حبايبي.. أنا هروح المحطة."

ملك بحزن: "دلوقتي يا حاجة؟ هتوحشينا."

أمينة ضمتها: "وإنتي كمان يا بنتي.. بس أنا مستنياكم في أسوان.. وفاكرة الوعد."

آدم: "أنا هوصلك يا ستي."

أمينة: "لأ يا حبيبي.. السواق هيوصلني.. وإنت ابقى مع ملك."

وبعدين قربت من آدم وهمست في ودانه.

أمينة همساً: "اعتني بيها يا آدم.. البنت دي ملاك.. وربنا مش بيرسل الملائكة لكل الناس."

آدم بص في عين جدته.. وحس إن هي عارفة كل حاجة.

آدم: "متقلقيش يا ستي.. هعتني بيها."

أمينة قربت من ملك وبستها على جبينها.

أمينة: "ملك يا حبيبتي.. ولدي بره قوي بس من جوه ضعيف وخايف.. اصبري عليه.. وحبيه بصبر."

ملك دمعتها نزلت: "وعد يا حاجة."

أمينة مشيت.. وآدم وملك فضلوا واقفين على الباب لحد ما السيارة اختفت.

.........

بعد ساعات.

ملك كانت قاعدة في الصالة بتقرا كتاب.. آدم كان في مكتبته بيشتغل.

رن موبايل ملك.

نفس رقم إمبارح.

ملك ترددت.. وبعدين ردت.

ملك بصوت بارد: "ألو."

الأم بصوت متأثر: "ملك يا حبيبتي.. متقفليش في وشي.. أنا بس عايزة أكلمك."

ملك: " عايزة اية؟"

الأم بتردد: "أنا سمعت إنك اتجوزتي.."

ملك اتخضت.

ملك: "مين قالك؟"

الأم: "الخبر انتشر يا حبيبتي.. وأنا سمعته.. وفرحت ليكي.. بس في نفس الوقت.. حسيت بالوجع.. إني أمك ومكنتش في فرحك."

ملك بغيظ: "إنتي مش أمي.. أمي ماتت لما سبتيني وأنا عندي ست سنين."

الأم بعياط: "ملك يا حبيبتي.. أنا غلطانة.. أنا عارفة.. بس اديني فرصة أعوضك.. أنا هاجي أسكندرية.. عايزة أشوفك."

ملك: "لأ.. مش عايزة أشوفك."

الأم فجأة بصوت مختلف.. فيه حدة: "ملك.. أنا هاجي سواء عايزة أو لأ.. وأنا عارفة إن جوزك الجديد ده راجل غني ومن عيلة كبيرة.. وأنا أمك.. ومن حقي أشوفك وأعرف جوزك ده."

ملك قلبها اتجمد.

ملك بصدمة: "إنتي.. إنتي عايزة فلوس؟"

الأم بتوتر: ".. أنا عايزة حقي كأم."

ملك بغضب: "حقك إيه؟! إنتي مليكيش حق فيا! إنتي سبتيني ومشيتي! جدتي هي اللي ربتني!"

الأم بصوت بارد: "ملك.. أنا جايالك بكرة.. ولو ما قابلتينيش بالذوق.. هعرف أوصل لجوزك بنفسي.. وأنا متأكدة إن راجل زيه مش هيحب فضيحة إن مراته ترفض تشوف أمها."

قفلت الموبايل.

ملك فضلت ماسكة الموبايل وإيدها بتترعش.

دموعها بدأت تنزل بغزارة.

آدم طلع من المكتبة فجأة.. حس إن في حاجة غلط.

آدم بقلق: "ملك.. في إيه؟ ليه بتعيطي؟"

ملك بصت ليه ونطّت في حضنه.

ملك بعياط: "آدم.. أمي.. أمي عايزة تيجي بكرة.. مش عشاني.. عشان فلوسك."

آدم ضمها بقوة وحطّ إيده على شعرها.

آدم بهدوء: "اهدي يا ملك.. اهدي.. أنا جنبك."

ملك: "هي بتهددني يا آدم.. قالت إنى لو ما قابلتهاش هتيجي عندك."

آدم بصوت حاسم: "خليها تيجي.. أنا هستقبلها بنفسي."

ملك رفعت وشها: "لأ يا آدم.. أنا مش عايزاها تدخل حياتنا.. هي ست مش كويسة.. سبتني وأنا طفلة ومشيت مع راجل تاني.. ودلوقتي راجعة عشان فلوسك."

آدم مسح دموعها بإيده.

آدم بحنان: "ملك.. اسمعيني.. مهما يحصل.. مهما تحاول تعمل.. مش هتقدر توصل لنا.. أنا هحميكي."

ملك بصت في عينه بعمق.

ملك بصوت واطي: "ليه بتعاملني بالطريقة دي؟"

آدم ابتسم وقرب وشه من وشها: "لأن.. لأن أنا بحبك يا ملك."

ملك قلبها وقف.

أول مرة يقول كلمة بحبك.

ملك بصوت مخنوق: "وأنا كمان.. بحبك يا آدم."

آدم ضمها بقوة.. وفضل حاضنها لفترة طويلة.

ما كانوش عايزين يسيبوا بعض.

.........

رن جرس الفيلا.

زياد فتح.

ست في منتصف الأربعينات واقفة على الباب.. شعرها مصبوغ بلون غريب، ومكياجها كتير، ولبسها مش مناسب لعمرها.

الست بابتسامة مصطنعة: "أهلاً.. أنا سعاد.. أم ملك.. ممكن أدخل؟"

زياد اتخض.

زياد بتوتر: "إنتي.. إنتي أم ملك؟ بس هي قالت إنك جاية بكرة."

سعاد بابتسامة: "فكرت أعمل مفاجأة لبنتي.."

زياد ما كانش عارف يتصرف إزاي.. تركها على الباب وجري على آدم.

زياد بذعر: "آدم! أم ملك واقفة على الباب!"

آدم وملك اتخضوا.

ملك بذعر: "هي قالت بكرة!"

آدم بثبات: "متقلقيش.. أنا هتصرف.. ملك.. اطلعي أوضتك."

ملك: "لأ يا آدم.. أنا هفضل جنبك."

آدم بصلها بإصرار: "اطلعي يا ملك.. أنا لازم أعرف هي عايزة إيه بالظبط.. وده أسهل لو إنتي مش موجودة."

ملك بتردد: "طيب.. بس أنا هسمع من فوق."

ملك طلعت السلم بسرعة.

آدم خد نفس عميق وراح للباب.

.........

سعاد دخلت الصالة وعيونها بتبص على كل حاجة بطمع.

سعاد في سرها: "يا نهار أبيض.. البنت وقعت على كنز.. ده بيت زي القصر!"

آدم دخل بوشه الجامد المعتاد.

آدم بجدية: "أهلاً.. أنا آدم."

سعاد بابتسامة مصطنعة: "آدم يا حبيبي! أنا عرفت إنك جوز بنتي.. مش عارفة أقولك إيه من الفرحة!"

آدم ببرود: "اتفضلي اقعدي."

سعاد قعدت على الكنبة وبصت على كل حاجة بتقييم.

سعاد: "ما شاء الله.. البيت ده جميل أوي.. ملك محظوظة إنها لقت واحد زيك."

آدم ببرود: "انا اللي محظوظ إني  لقيتها."

سعاد اتخضت من ردّه.. ما كانتش متوقعة إنه يكون قوي كده.

سعاد بابتسامة: "طبعاً طبعاً.. المهم.. أنا عايزة أشوف بنتي."

آدم: "ملك مش موجودة دلوقتي."

سعاد بشك: "مش موجودة؟! طب فين؟"

آدم ببرود: "عند صاحبتها.. هترجع متأخر."

سعاد بغيظ مخفي: "طب هستناها."

آدم: "هي ممكن ترجع آخر الليل.. ومينفعش حضرتك تستني كل ده."

سعاد بصت ليه بنظرة حادة.. فهمت إنه بيطفشها.

سعاد بابتسامة سم: "آدم يا حبيبي.. أنا عارفة إن ملك قالتلك عني كلام مش حلو.. بس أنا أمها.. ومن حقي أشوفها."

آدم بجدية: "ومن حقها هي كمان إنها تقرر هي عايزة تشوفك ولا لأ."

سعاد اتخضت.

سعاد: "يعني إنت بتقف ضدي؟"

آدم: "أنا بقف جنب مراتي."

سعاد: "مراتك دي  بنتي قبل ما تبقى مراتك! وأنا ربيتها وتعبت فيها!"

آدم بسخرية: "ربيتيها إزاي يا حاجة سعاد؟ هي كان عندها ست سنين لما سبتيها وجريتي ورا جواز تاني."

سعاد وشها احمرّ من الغيظ.

سعاد بصرخة: "مين قالك ده؟! دي أكاذيب! أنا كنت ظروفي صعبة!"

صوت ملك جه من السلم.

ملك بثبات: "الأكاذيب هي اللي بتقوليها إنتي يا ماما."

سعاد التفتت ولقت ملك واقفة على السلم.

سعاد بابتسامة مصطنعة: "ملك يا حبيبتي.. تعالي يا بنتي.. وحشتيني أوي."

ملك نزلت السلم ببطء ووقفت جنب آدم.

ملك بثبات: "عايزة إيه يا ماما؟"

سعاد: "جيت أشوفك يا حبيبتي.. أنا أمك."

ملك بهدوء مخيف: "لأ.. مش جيتي تشوفيني.. جيتي تشوفي البيت والفلوس.. أنا عارفاكي كويس."

سعاد: "ملك! إزاي تكلمي أمك بالطريقة دي؟!"

ملك: "أمي ماتت لما ودعتني وأنا عندي ست سنين.. مش قادرة أفوتها على نفسي تاني يا ماما.. إنتي بتجي كل كام سنة لما بتسمعي إن في حد في العيلة اتجوز أو كبر.. بتجي عشان الفلوس وبس."

سعاد بدموع مزيفة: "ملك.. أنا تعبانة ومحتاجاكي."

ملك بصوت بارد: "تعبانة؟ من إيه؟"

سعاد: "عندي مرض في القلب.. ومحتاجة فلوس للعلاج."

آدم فهم اللعبة فوراً.

آدم بسخرية: "كم من الفلوس تاخديها وتمشي؟"

سعاد التفتت له بصدمة: "إنت بتقول إيه؟!"

آدم: "قولت كم؟ كل اللي بتعمليه ده عشان الفلوس.. يا ريت نخلص الموضوع ده بسرعة.. قولي رقم ومع السلامة."

سعاد وشها احمر من الغيظ والإحراج.

سعاد: "أنا مش جاية عشان الفلوس!"

ملك بثبات: "طب كويس.. يبقى ممكن تمشي بقى."

سعاد بصت لملك بغضب: "إنتي كده يا ملك؟! بعد كل اللي عملته ليكي؟!"

ملك: "اللي عملتيه ليا هو إنك سبتيني يا ماما.. سبتيني أعيش من غير أم.. سبتيني أتفرج على البنات التانية وهما مع أمهاتهم.. سبتيني أعيط لوحدي بالليل.. اللي ربتني هي جدتي.. وأنا مديونة لها بكل حاجة.. مش ليكي."

سعاد سكتت.

وبعدين فجأة بصت لآدم بنظرة باردة.

سعاد: "آدم.. إنت عارف إن مراتك دي كانت مخطوبة قبل كده؟"

ملك اتجمدت.

آدم بصلها بدهشة.

آدم: "إيه؟!"

ملك بسرعة: "ماما!"

سعاد بابتسامة شيطانية: "آه.. من سنة.. كانت مخطوبة لواحد.. وفسخوا الخطوبة في ظروف غريبة.. مش عايزة أقول أكتر."

آدم بص لملك.. وشها كان أصفر.

ملك بتوتر: "آدم.. ده كلام مش حقيقي.."

سعاد: "مش حقيقي؟! طب اسأل صاحبتها سلمى.. ولا جدتها.. كلهم عارفين."

آدم مسك إيد ملك.

آدم بثبات لأم ملك: " اللي كان في حياة ملك قبلي ميهمنيش.... أنا واثق إن مراتي ما تعملش حاجة غلط.. يا سلام.. السواق هيوصلك فين؟"

سعاد اتجمدت.. ما كانتش متوقعة إنه يرد بالشكل ده.

سعاد: "أنا.. أنا مش هامشي من غير ما.."

آدم قاطعها بحسم: "هتمشي.. ولو حاولتي تيجي تاني هنا أو تتواصلي مع ملك.. هعرف أوقفك قانونياً."

سعاد بصت لملك بنظرة فيها سم.

سعاد: "ملك.. إنتي هتندمي على اللي عملتيه النهاردة."

ملك بثبات: "اللي هندم عليه يا ماما هو إني ما حسيتش بيكي كأم.. ومش أنا السبب في ده.. إنتي السبب."

سعاد قامت وقالت بصوت عالي: "تمام.. ماشية.. بس هتسمعوا عني تاني."

ومشيت وهي بتخبط الباب بقوة.

.........

ملك وقعت على الكنبة وبدأت تعيط بحرقة.

آدم قعد جنبها وضمها.

ملك بعياط: "آدم.. أنا آسفة.. ما كنتش عاوزه تيجي بالشكل ده.."

آدم بحنان: "متتأسفيش يا ملك.. إنتي مليكيش ذنب في اللي بتعمله."

ملك: "والموضوع التاني.. اللي قالته.. موضوع الخطوبة.."

آدم رفع وشها وبص في عينها.

آدم بهدوء: "ملك.. أنا مش هسألك.. لأن اللي حصل قبلي مش مشكلتي.. اللي يهمني إني أنا دلوقتي معاكي.. وإنتي معايا."

ملك: "بس أنا عايزة أقولك.. أنا كنت مخطوبة لواحد اسمه كريم.. ابن جار جدتي.. اتفقوا من غير ما حد يسألنى .. وأنا ما كنتش موافقة بس سكت عشان جدتي.. 

و مرة لما اتأخرت في الكلية.. اتخانق معايا وضربني على وشي.. جدتي شافت الأثر وفسخت الخطوبة بنفسها."

آدم وشه اتغير.. بغضب.. 

آدم  "راجل ضربك؟"

ملك بدموع: "آه.. ومن ساعتها وأنا كنت خايفة من فكرة الجواز.. لحد ما جيت إنت.."

آدم ضمها بقوة.

آدم بصوت فيه حدة: "مين الراجل ده؟ إيه اسمه بالكامل؟"

ملك: "آدم.. سيبك منه.. اللي راح راح."

آدم: "لأ ملك.. مش هسيبه.. راجل يرفع إيده على بنت.. لازم يتحاسب."

ملك بصت ليه وابتسمت 

ملك: "آدم.. أنا مش محتاجة حد يحاسبه عشاني.. أنا محتاجاك إنت بس."

آدم بص في عينها.. وقرب منها.. وبسها على جبينها.

آدم بصوت واطي: "ملك.. أنا بحبك.. والله بحبك."

ملك: "وأنا بحبك يا آدم.. أنت  قلبي معاكي."

.........

في الليل.

آدم كان قاعد في المكتبة بيفكر.

زياد دخل.

زياد: "آدم.. أنا عايز أسألك سؤال."

آدم: "اتفضل."

زياد: "إنت نايوي تعمل إيه؟ يعني إنت وملك هتفضلوا هنا في إسكندرية؟ ولا ترجعوا أثينا؟"

آدم سكت لحظة.

آدم بتفكير: "أنا هفتح فرع للشركة في إسكندرية.. وهفضل هنا."

زياد بدهشة: "ايه؟! إنت عشت فى أثينا طول عمرك!"

آدم: "ملك عندها جدتها هنا.. وأنا مش هاخدها من بلدها.. ولا من ناسها."

زياد ابتسم.

زياد: "ما شاء الله.. إنت فعلاً اتغيرت يا آدم."

آدم بابتسامة: "ملك هي اللي غيّرتني."

.........

في الأوضة.

ملك كانت واقفة في البلكونة بتبص على البحر.

آدم دخل بهدوء ووقف وراها.

ضمها من ورا بهدوء.

ملك اتخضت .

آدم همس في ودانها: "بتفكري في إيه؟"

ملك: "في أمي.. في الظروف.. في البيت.. في كل حاجة اتغيرت في أيام قليلة."

آدم: "ومبسوطة؟"

ملك ابتسمت وبصت ليه.

ملك: "لأول مرة من زمان.. مبسوطة."

آدم قرب وشه من وشها.

آدم : "ملك.. أنا عايز نعيد الجواز ده.. بس المرة دي بشكل حقيقي.. فرح حقيقي.. مش تمثيل.. وألبسك خاتم  بإيدي أنا.. مش مع زياد."

ملك : "آدم.."

آدم: "موافقة؟"

ملك ابتسمت: "موافقة."

آدم قرّب وشه أكتر وبسها على خدها.. بوسة طويلة فيها كل الحب.

ملك فضلت في حضنه.. وريحة البحر تملا المكان.

لأول مرة في حياة الاتنين.. حسوا إن البيت ده مش مجرد حيطان.. ده بيت فيه حب.. فيه دفا.. فيه حياة.

.........

رن موبايل آدم فجأة.

رقم  من اليونان.

آدم رد: "ألو."

صوت ست باللغة اليونانية.

ملك بصت ليه باستغراب.

وش آدم اتغير فجأة.

آدم بصدمة: "ماما؟! ماما إنتي؟! بتكلميني بعد كل السنين دي؟"

.........

الفصل السادس من هنا