رواية ديون النبض الفصل الواحد والخمسون
مجد كمل كلامه معايا، لكن كنت بحس إنه بيضغط عليّا إني أستمر في حياتي بشكل طبيعي، رغم عجزي.
كان دايمًا عايزني أقاوم اللي أنا فيه، وأكمل دراستي، وأخرج وأعيش حياتي.
لكن أنا كنت شايفة إن الحياة وسط الناس بالشكل ده مش طبيعية بالنسبة لي، ومش متقبلاها، ولا قادرة أستحملها.
خصوصًا إن كليتي عملية، وأنا المفروض أكون داخلة على سنة التخصص، وده معناه إني هحتاج أتعامل مع ناس كتير وأكون موجودة وسطهم بشكل مستمر.
ماجد كان عايزنا نتعامل بشكل طبيعي، ونعيش حياتنا من غير ما نخلي اللي حصل يوقفنا. نخرج، وأكمل دراستي، ونسافر، ونروح ونيجي زي أي اتنين.
لكن أنا كنت متمسكة برأيي، وبرفض كلامه بشدة؛ لأني ببساطة ما كنتش قادرة أتخيل نفسي وسط الناس بالعجز اللي بقيت فيه.
كنت لسه مش قادرة أتقبل صورتي الجديدة عن نفسي، ولا أتخيل إني أقدر أعيش حياتي بالشكل اللي هو شايفه طبيعي.
مجد: لأ يا وعد، أنا عايزك تعيشي معايا وتفرحي، عشان خاطري. إحنا مش هنوقف حياتنا ولا هنأجل أي حاجة علشان اللي أنتِ فيه ده.
سكت شوية، وبعدها قلت له:
وعد: مجد، أنا بقالي كتير ما خرجتش، وصدقني أنا مرتاحة كده. لما أقف على رجلي تاني هبقى أكمل دراستي، وأوعدك إني مش هسيبك لحظة واحدة. هكون معاك في كل حاجة.
سكت وبص لي وقال:
مجد: وعد، أنا ما رضيتش أضغط عليكِ امبارح، لكن أنتِ من حقك تفرحي وتعيشي حياتك.
بصيت له وقلت:
وعد: وأنا فرحتي إني أكون معاك. مش عايزة أكتر من كده.
مجد: لكن أنا شايف إن عليا واجبات كتيرة تجاهك، وفي حاجات كتير لازم أعملها علشانك.
اتردد لحظة، وبعدها قال بصوت اتغير:
مجد: كفاية إني السبب في اللي أنتِ فيه.
مديت إيدي وأخدت راسه في حضني، وقلت له:
وعد: لأ يا مجد، أنا مش عايزاك تتكلم كده، عشان خاطري.
سكت شوية، وبعدها قلت له:
وعد: مجد، ممكن أعرف أنت ناوي على إيه بالضبط؟
بص لي وقال:
مجد: بالنسبة لإيه؟
وعد: بالنسبة لكل حاجة. أنت كنت هترجع خلال أيام ألمانيا تاني.
بص لي وقال بصراحة:
مجد: بصراحة، ما فكرتش في الموضوع. بس أنا مش هسيبك يا وعد. وفي حاجات كتيرة عايز أعيد التفكير فيها من تاني.
بصيت له وقلت بقلق:
وعد: عشان خاطري يا مجد، ما تتسرعش ولا تتهور، وتاخد قرارات تندم عليها بعد كده.
مسكني من خدي وقال:
مجد: القرار الوحيد اللي أنا أخدته صح، إني مش هبعد عنك تاني، ولا هسيبك تبعدي عني. أي حاجة تانية بعد كده مالهاش قيمة بالنسبة لي.
بصيت له وقلت:
وعد: لأ يا مجد، وصدقني أنا ما بعدتش عنك علشان أنت تسيب كل حاجة.
أنت عارف كويس قوي إني مش بتكلم على فلوس ولا مستشفى ولا شركة. أنا بتكلم في حاجة تانية خالص.
يهمني إنك توصل لنجاحك وتميزك، ويهمني إنك تقدر ترسم الأمل لناس كتير جدًا محتاجاه. أنا شايفة إن دي الرسالة الحقيقية اللي لازم تكمل فيها، وأنا معاك.
سكت شوية، وبعدها كملت:
وعد: ولولا إنك خدت قرار جوازك من سارة، ما كنتش هتوصل للي أنت فيه دلوقتي.
بص لي وسكت، وبعدها قال:
مجد: وعد، ممكن أطلب منك حاجة؟
وعد: اتفضل.
مجد: أنا زوجك أنتِ وبس، مش زوج أي حد تاني. وبعد إذنك، مش عايزك تجيبي اسمها على لسانك، ولا تفتكريها، لا هي ولا دكتورة جيهان.
بصيت له وقلت:
وعد: مجد، إحنا مش هنقدر نهرب من الحقيقة. هي موجودة في حياتنا.
مجد: بس الحقيقة دي بالنسبة لي مش عايزها في حياتي، وهتعامل على الأساس ده.
وعد: مجد، أنت تفتكر إني هكون سعيدة بقرارك ده؟
بص لي وقال:
مجد: يا وعد، أنا عايزك تفكري في حياتنا بس، وتفكري في نفسك وبس. مش عايزك تفكري في أي حاجة تانية غير حياتنا مع بعض.
سكت شوية، وبعدها قلت له:
وعد: الكلام ده لو إحنا عايشين لوحدنا، لكن إحنا مش عايشين لوحدنا يا مجد. إحنا عايشين وسط ياسين ورغد وحازم وماما.. لسه هكمل
بص لي وقال:
مجد: وهما دول عيلتي، الناس اللي أنا دايمًا برتاح معاهم، وبحس معاهم بالاحتواء والأمن والأمان... الأسرة اللي أنا افتقدتها. أي حاجة تانية خارجة عن الأسرة دي بتحسسني دايمًا بالحرمان والوجع.
سكت، وبعدها قلت له بهدوء:
وعد: حتى لو كده، ما ينفعش نفضل شايلين الوجع جوانا يا مجد. بقالنا وقت طويل جدًا بنحاول نتجاوز اللي حصل.
وصدقني، ساعات كتير ما بنحسش بقيمة الوجع اللي جوانا غير لما نعدي منه ونوصل للنجاح والمعافاة.
لولا الوجع ما كناش عرفنا قيمة العافية، ولولا الصبر ما كناش وصلنا لهدفنا. ولولا كل اللي حصل ده، ما كنتش عرفت إن أنا بحبك قوي كده، وأنت كمان ما كنتش هتعرف إنك بتحبني قوي كده.
قربت منه وكملت:
وعد: إحنا لازم نشارك بعض حياتنا في كل حاجة، في الوحش قبل الحلو، وفي الوجع قبل الفرح. ما ينفعش نختار نعيش مع بعض اللحظات اللي بتريحنا بس.
بص لي وقال:
مجد: وعد، ممكن نقفل كلامنا في الموضوع ده دلوقتي؟ أنا مش عايز أي حاجة تعكر مزاجي.
عايز نبدأ حياتنا وإحنا مع بعض، من غير ما نفضل نرجع لكل اللي حصل.
ابتسمت وقلت:
وعد: حاضر، بس أنت كمان توعدني ما تاخدش قرارك في أي حاجة دلوقتي. خد وقتك، وأنا متأكدة إنك هتسمعهم. وتسامحهم...
بص لي بصدمة وقال:
مجد: أسامحهم؟
وعد: أيوه يا مجد، هتسامحهم.
حط إيده على قلبي وقال:
مجد: أنا مش عارف قلبك ده أعمل فيه ايه أنا مش هقدر يا وعد أعمل اللي أنتِ بتقولي عليه.
بصيت له وسكت شوية، وبعدها قلت له:
وعد: يبقى أنت مش عايزني سعيدة معاك يا مجد. أنا ساعتها هقف عند النقطة دي.
ديون النبض 🫀
بقلم الكاتبه مروة صياح 🎯 ✍️
مجد: لأ يا وعد، أنا مش هسمح لأي حاجة تخليكي بعيدة عني أو مش سعيدة.
عايزك تحطي الكلام ده في بالك كويس أوي... إن رقم واحد في حياتي هو أنتِ وسعادتك، حتى لو ده هيخليني أضغط على نفسي.
بصيت له وقلت:
وعد: وأنا مش عايزاك تضغط على نفسك. بس صدقني، هتعرف قدام إن كل اللي بطلبه منك ده علشان أنا بحبك، ومش عايزاك تتسرع أو تاخد قرار غلط، ولا تتكلم وإنت غضبان دلوقتي.
بص لي وقال:
مجد: طب ممكن بقى نقفل كلامنا في الموضوع ده؟
بصيت له وقلت:
وعد: ما إحنا برضه لسه ما عرفناش أنت ناوي على إيه.
سكت شوية، وبعدها قال:
مجد: بالنسبة لسفري، هلغيه. اللي أقدر أعمله في ألمانيا هعمله هنا، وبعدين وجودي في مصر هيكون أهم.
ولو هسافر، ممكن أسافر سويسرا علشان علاجك هناك يكون أفضل.
بصيت له وقلت بمشاكسة:
وعد: هو أنا مش هتعالج يا دكتور مجد؟ وبعدين محدش هيعالجني غيرك أنت، خلي بالك من الكلام ده.
بص لي وقال:
مجد: بس أنا جراح قلوب بس وده تخصص، وكل حاجة ليها تخصصها.
قلت له:
وعد: ومين قالك إني عايزة غير كده؟ أنت دواء قلبي أنا، وصدقني أي حاجة تانية هتيجي بعد كده.
ابتسم، وبعدها قال:
مجد: بس ده ما يمنعش إننا نتابع حالتك أكتر، كل دكتور وليه تخصصه.
ضحكت وقلت له:
وعد: تعرف بقى إن الدكتور اللي بيفهم في كل حاجة أحسن من اللي بيتخصص؟
بص لي وضحك وقال:
مجد: أنتِ اللي بتقولي كده؟
وعد: اكتشفت ده؟
ضحك وقال:
مجد: وليه بقى؟ ده على أساس إنك عايزة تتخصصي أطفال؟
ضحكت وقلت له:
وعد: على فكرة، اعمل حسابك، أنا لو دخلت مجالك ده هفوقك.
مجد: وأنا عايزك طبعًا تتفوقي عليا.
سكت شوية، وبعدها قلت له:
وعد: مش عارفة يا مجد، لما ييجي وقته نبقى نشوف. أنا مش عايزة أحرمك من أي حاجة.
وبعدها ضحكت وقلت له بمشاكسة:
وعد: بس أنت كده مع الوقت مش هتزهق مني؟ هكون في البيت، وفي الجامعة، وفي المستشفى!
ضحك وقال:
مجد: هو أكيد هزهق!
ضربته في كتفه وقلت له:
وعد: شفت بقى؟ أنا بوقعك في الكلام، وأنت بتقع!
احتواني بذراعيه وأخدني في حضنه وقال:
مجد: ومين قالك إني هزهق؟ أنا لو عرفت أدخل جوه أحلامك وإنتِ نايمة، وما أبعدش عنك أبدًا، هعمل كده.
ضحكت وقلت له:
وعد: وأنا نفسي في كده يا مجد. نفسي في كل لحظة وتفصيلة في حياتي تكون موجود معايا فيها.
قام من مكانه، وشالني وقال:
مجد: طب يلا بقى علشان أدخلك الحمام.
بصيت له، وفجأة صرخت مرة واحدة.
بص لي باستغراب وقال:
مجد: في إيه؟
غمضت عيني، وبعدها قلت له:
وعد: اتفضل، بعد إذنك، أدخل لوحدك!
ضحك وقال:
مجد: مفيش الكلام ده.
قرب مني وشالني وفضلت مغمضه عيني وهو بيضحك....
وبعد فترة.....
ساعدني ألبس هدومي، وقعدني على كرسي التسريحة، وبدأ يسرح لي شعري.
بصيت له وقلت:
وعد: على فكرة، هما وحشوني أوي.
بص لي وقال:
مجد: أنتِ عايزة نكون لوحدينا ولا معاهم؟
بصيت له بتردد وقلت:
وعد: مجد، هتتضايق لو قلتلك إني عايزة أكون موجودة معاهم؟
مجد: بصراحة، أنا نفسي أكون معاكي لوحدينا، لكن لو وجودك معاهم هيسعدك، فده كمان هيسعدني أنا.
ضحكت وقلت له:
وعد: طب ممكن بقى، بعد إذنك، تشيلني وتوديني عند ماما؟
بص لي وقال:
مجد: لأ، انسي! هم اللي هييجوا لنا. أنتِ مش هتخرجي من هنا، من الشقة دي. أنتِ نسيتي إنك عروسة ولا إيه؟
ضحكت وقلت له:
وعد: ما الشقة قصاد الشقة، وبعدين أنت نسيت إن الدور ده والدور اللي فوق بتاعنا إحنا؟ يعني أنا براحتي، وحاسة إن دي مساحتي اللي بتحرك فيها.
وبعدها بصيت له وقلت:
وعد: وبعدين يا دكتور، شد حيلك شوية علشان تخلص شقتنا.
ابتسم وقال:
مجد: حاضر.
وبعدها شالني وخرجنا للريسبشن. مسكت التليفون وقلت له:
وعد: يلا، رن على ياسين وماما وحازم ورغد
وفعلًا اتصلنا بيهم، وكنت مشتاقة جدًا إني أشوفهم.
وبمجرد ما الجرس رن، مجد قام وفتح الباب. كانت ماما وياسين في البداية.
أول ما شافوه، ياسين بص لمجد وقال:
ياسين: مبروك يا مجد، صباحية مباركة.
مجد بص له وضحك وقال:
مجد: وإنت يا بابا كمان صباحية مباركة.
وبعدها قرب من ماما وقال:
مجد: صباحية مباركة يا ماما.... وغمز لها.
ماما وطّت راسها وقالت له:
ماما: وبعدين معاك يا مجد؟ أنا ما بحبش الكلام في الحاجات دي.
بص لها وضحك وبعدها سألته:
ماما: فين وعد؟
مجد: جوه.
دخلوا عندي، وأول ما ماما شافتني جريت عليا وأخدتني في حضنها وقالت:
ماما: وعد حبيبتي، صباحية مباركة.
بصيت لها وابتسمت، فقالت:
ماما: الله أكبر عليكي، وشك منور. كان نفسي من زمان أشوف وشك والسعادة باينة عليكِ كده.
بصيت لمجد وقلت لها:
وعد: خلاص يا ماما، طول ما مجد معايا هتلاقي وشي كده دايمًا، وصوتي سعيد.
بصيت لياسين، وبعدها قرب مني وأخدني في حضنه وقال:
ياسين: مبروك يا وعد.
ضحكت وقلت له:
وعد: وإنت يا ياسين مبروك.
بص لي وضحك وقال:
ياسين: قولي بقى، ماما عاملة معاكي إيه؟ زهقتك، أنا عارفها! مبطلاش كلام صح...
بص لي وضحكت وقال:
وعد: دي أحلى هدية من ربنا في عمري ده.
بصيت أنا ومجد لبعض وضحكنا، وقلت له:
وعد: يا سيدي يا سيدي، من قدك يا ياسين!
ماما بصت لي وضحكت وقالت:
ماما: الحمد لله إن ربنا جمعكم على خير. أنا كده مطمنة عليكي يا وعد.
بصيت لها وقلت:
وعد: وأنا كمان يا ماما، مطمنة عليكي وعلى ياسين. كل واحد فيكم بعد كده مش هيكون عايش لوحده. بس سامحونا مع الوقت لو انشغلنا عنكم.
قربوا مننا ومسكوا إيدينا وقالوا:
ماما وياسين: ربنا ما يفرقكم عن بعض تاني.
بصيت لهم وقلت:
وعد: على فكرة بقى، أنا جعانة أوي! فين حازم ورغد؟
وبعد شوية، الجرس رن تاني. وكان حازم ورغد.
أول ما شافونا، جريوا علينا وسلموا علينا وباركوا لنا.
وبعدها بصيت لرغد وقلت لها بهمس:
وعد: هو إنتوا كمان كنتوا عاملين عرسان ولا إيه؟ إنتوا اتأخرتوا كده ليه؟ أنا جعانة أوي!
بصت لي وضحكت وقالت:
رغد: آه يا وعد، عاملين عرسان! ربنا يرزقك ببنوتة زي حور، وتفضلي سهرانة بيها كده، وفي الآخر مجد يسيبك وينام!
بصيت لها وضحكت وقلت:
وعد: يعني عايزة تقوليلي إن حازم ما أخدش منك حور شوية؟
ضحكت وقالت:
رغد: لأ، وعلشان ما أكذبش عليكي، هو فضل شايلها فترة طويلة لحد الساعة تلاتة، ولما فصل بعد كده دخل نام.
بصيت لها بعيون واسعة وقلت:
وعد: هو أنتِ دايمًا كده بتنكرِي!
وقبل ما ترد، حازم قال بحماس:
حازم: هو المفروض هفضل سهران بيها طول الليل، ما أنتِ بتعملي إيه؟
بصيت أنا ورغد لبعض وضحكنا، ومجد وحازم بصوا لنا وإحنا بنتهمس، وقالوا في نفس الوقت:
مجد وحازم: هو أنتوا بتتكلموا في إيه؟
ضحكنا وقلنا:
وعد ورغد: أبدًا!
أخدت حور من رغد، وبعدها بصيت لها وقلت:
وعد: يلا يا ست رغد، قومي بقى، أنا هموت من الجوع!
بصت لي وقالت:
رغد: هو مش المفروض إنكم عرسان وتفطروا لوحدكم؟ لازم نفطر كلنا مع بعض؟
بصيت لها وقلت:
وعد: أيوه طبعًا! أنا فرحتي إني أكون وسطكم أنا ومجد، دي أحسن من أي فرحة تانية.
بصوا لي وابتسموا، ومن اللحظة دي حسيت فعلًا بطعم السعادة....
فرحتنا أنا ومجد كانت مختلفة شوية عن أي فرحة ممكن تتخيلوها.
ما كانتش فرحة كبيرة مليانة ضيوف ومعازيم، ولا قاعة متزينة، ولا زفة وصخب واحتفالات. الفرحة بالنسبة لي كانت أبسط من كل ده بكتير... كانت إن أنا ومجد اتجمعنا أخيرًا، وإن كتب كتابنا تم، وبقينا لبعض بالحلال.
يمكن شقتنا ما كانتش جاهزة، ويمكن ما عملناش فرح، ولا عزمنا معازيم، لكن كان عندنا حاجة أهم من كل ده؛ كان عندنا بعض، وكان حوالينا القلوب اللي بتحتوينا وإحنا كمان بنحتويها.
وده كان بإصرار مني.
مجد كان نفسه يعمل لي كل حاجة، وكان عايزني أفرح بكل التفاصيل اللي أي عروسة بتتمناها، لكن في نفس الوقت كان مراعي جدًا إني مش قادرة أتقبل وجودي وسط الناس بحالتي دي.
ومع ذلك، كان شايف إن دي كلها حقوقي، وإن من حقي أعيش فرحتي كاملة، حتى لو أنا مش شايفة إن أي حاجة من دي تفرق معايا.
لكن الحقيقة إن اللي كان فارق معايا فعلًا حصل.
في اليوم التاني من جوازنا، لو حد بص علينا أنا ومجد وسط أسرتنا، مش هيشوف عريس وعروسة مستنيين اللحظة اللي ينفردوا فيها ببعض، ولا اتنين كل اللي شاغلهم يقضوا وقت رومانسي بعيد عن الناس.
هيشوف عيلة كاملة مجتمعة، بتضحك وتهزر، وبتشارك بعضها أبسط تفاصيل اليوم.
كانت فرحتنا كلنا إننا موجودين مع بعض.
أنا كنت بحس إن سعادتي الحقيقية في اللمة دي، في إني ما بقاش لوحدي، وإن أنا ومجد وسط أهلنا، نضحك ونتكلم ونشاركهم كل لحظة.
الويك إند بتاعنا رجع تاني، بس المرة دي ما بقاش يوم واحد في الأسبوع.
المرة دي بقى كل يوم، وكل وقت.
بقينا نتجمع على الفطار، وعلى الغدا، ونقعد مع بعض بالساعات. نضحك ونهزر، ونتكلم في كل حاجة، وأوقات نلعب ونقلب البيت كله دوشة وضحك.
تفاصيل بسيطة، لكنها كانت بالنسبة لي بالدنيا كلها.
ويمكن أكتر حاجة كانت مفرحاني إني بقيت أصحى كل يوم وأنا عارفة إن حواليا ناس بتحبني، وإن في آخر اليوم هتكون لينا لمة تانية تجمعنا.
وده طبعًا ما كانش يمنع إن يبقى ليا أنا ومجد وقتنا الخاص، خصوصًا إننا كنا بنقضي وقتنا مع بعض في شقه ياسين لحد ما شقتنا تجهز.
كان لينا لحظاتنا اللي بتجمع بين الحب والاحتواء، واللي كنا بنعوض فيها بعض عن كل الوقت اللي فات.
ولما كنا بنبقى لوحدنا، كنت بحس فعلًا إني أجمل عروسة في عيون مجد، وإنه شايف فيا كل حاجة حلوة ممكن يتمناها.
كان بيخليني أحس إن جوازنا مش مجرد خطوة اتأخرت لحد ما الظروف تسمح، لكنه بداية حياة جديدة، فيها حب وونس وأمان.
يمكن فرحتنا ما كانتش بالشكل اللي الناس متعودة تشوفه، لكن كانت بالشكل اللي إحنا محتاجينه فعلًا.
أنا ما كنتش محتاجة قاعة كبيرة ولا مئات المعازيم عشان أحس إني عروسة.
كان يكفيني أبص حواليا، ألاقي مجد جنبي، وأهلنا حوالينا، والضحكة راجعة لبيتنا من تاني.
**كنت أخيرًا حاسة إن ليا بيت... مش مجرد مكان أعيش فيه، لكن ناس أنتمي ليهم، وقلوب أرجع لها كل يوم.**
ولما كنت ببقى مع مجد لوحدنا، كنت بحس فعلًا إني أجمل عروسة في عينيه.
كان بيغمرني باحتواء قوي، وحنان كبير، ولمساته الرقيقة اللي كانت بتخليني أحس قد إيه أنا غالية عنده.
وكان دايمًا بيشيلني، كأني ما عنديش رجلين أتحرك بيهم. من مكان لمكان، ومن أوضة لأوضة، وكأن أسهل حاجة عنده إنه يشيلني بين إيديه.
كنت ببصله وأبتسم، وعيني بتلمع من فرحتي. فرحة مش قادرة أوصفها، لأني أخيرًا بقيت مع مجد من تاني، وربنا جمعني بيه بعد كل اللي عدي علينا.
كنت بحاوط رقبته بدراعاتي، وأقرب منه وأقوله كل مرة:
أنا: "إنت كده هتتعب يا مجد، كل شوية تشيلني!"
كان يضحك ويبصلي بحب، ويرد بكل بساطة:
مجد: "أنا مبسوط كده، أنا ليكي يا وعد... إيديا ورجليا وكل حاجة فيا ملكك."
كنت بحط راسي على صدره وأغمض عيني، وأحس إن الدنيا كلها اختصرت في اللحظة دي. ما كنتش عايزة حاجة تانية، ولا كنت محتاجة أكتر من إني أفضل في حضنه بالشكل ده.
لدرجة إن كان نفسي فعلًا أقف على رجلي وأتحرك، مش علشان نفسي قد ما كان علشان مجد.
كان نفسي أقدر أقف جنبه، وأسنده، وأشاركه كل حاجة، وأقوم بدوري كزوجة في كل تفاصيل حياتنا. ما كنتش عايزة أقصر معاه في أي واجب من واجباتي، ولا أحس في يوم إني عاجزة عن تقديم حق من حقوقه.
كنت عايزة أكون ليه زي ما هو كان ليا.
علاقتي بمجد كانت بالنسبة لي علاقة مقدسة. ما كانتش مجرد علاقة زوج وزوجته، ولا مجرد اتنين بيحبوا بعض. أنا كنت بحترمه وبقدره بشكل كبير، وبحبه حب أكبر من أي كلام ممكن يوصفه.
وهو كمان كان شايفني كل حاجة في حياته.
وفي أوقات كتير، لما كان بيحضني وينام ورأسه على صدري، كنت بحس إنه طفلي الصغير. كنت بضمه ليا وأمسح على شعره، وأحس إنه بيهدى واحدة واحدة، وإنه أخيرًا لقى المكان اللي يقدر يرتاح فيه من غير ما يضطر يكون قوي أو يداري وجعه.
كنت أوقات كتير بحس إنه شايفني أمه في حنانها واحتوائها وعطفها عليه، مش بس زوجته وحبيبته.
كنت بحس إنه جواه طفل محتاج حضن يطمنه، ويقوله إن مفيش حاجة تخوفه، وإنه مش مضطر يواجه كل حاجة لوحده.
وكان أكتر إحساس بيتكرر جوايا وأنا حاضناه، إن مجد رغم قوته، ورغم كل اللي حققه في حياته، كان لسه جواه جزء موجوع، جزء عايش في حرب محدش شايفها، وهو نفسه مش بيتكلم عنها.
كنت بحس أوقات إنه بيهرب من الكلام، وإن فيه حاجات كتير جواه مش بيعرف يطلعها، أو يمكن اتعود يخبيها لدرجة إنه بقى مش عارف يحكيها أصلًا.
وجود الأم بيفرق كتير جدًا في حياة ابنها، مهما كبر ومهما بقى قوي وناجح. فيه حنان معين مفيش حد يقدر يعوضه، وفيه احتياج بيفضل موجود جوا الإنسان مهما عدى عليه العمر.
ومجد كان أكتر جرح وجعه هو جرح أمه.
الغريب إنه رغم كل الوجع ده، ما كانش بيتكلم عنها كتير، ولا بيحكيلي كل اللي جواه ناحيتها.
لكن أنا كنت بحس.
كنت بحس إن فيه كلام كتير محبوس ورا سكوته، وإنه مهما حاول يقنع نفسه إنه اتجاوز، فيه جزء منه لسه مستني منها حضن، وكلمة، وإحساس إنه ابنها اللي بتحبه ومش ممكن تتخلى عنه.
ويمكن علشان كده كنت كل ما أضمه ليا أحس إني مش بس بحضن جوزي... أنا كمان بحاول أطبطب على طفل صغير جواه، طفل اتأخر عليه الحنان، ولسه مستنيه.
عدّت أيام من بعد جوازي أنا ومجد، ومجد ما كانش بيفارقني لحظة واحدة. حرفيًا كان سايب كل حاجة علشاني، حتى شغله ما بقاش بيتابعه ولا مهتم بأي حاجة تانية.
كنت متضايقة من النقطة دي، لكن قلت أدي له فرصته. كام يوم بس يستعيد فيهم نشاطه، ويرجع يهتم بحياته وشغله من تاني.
وبعد أسبوع، قررت أتكلم معاه.
وعد: مجد، أنا طبعًا مبسوطة جدًا إنك موجود معايا في كل تفصيلة من حياتي، وإننا بنعيش كل اللحظات دي سوا. لكن أكيد أنت مش هتكمل وتفضل جنبي كده على طول.
بص لي وهو بيضحك وقال:
مجد: على فكرة، أنا كل اللي أخدته أسبوع أجازة واحد بس! أنتِ مستكتراه عليا يا وعد؟
ضحكت وقلت:
وعد: لأ، أنا مش بقول كده، بس أنت عارف برضه إنك طبيب، والطبيب وقته مش ملكه.
بص لي وضحك وقال:
مجد: وده ما يمنعش إني أخد بالي شوية من حياتي ومنك.
وعد: خلاص، من بكرة تبدأ. تشرف على المستشفى تاني وترجع لشغلك.
بص لي وقال:
مجد: أنا هرجع للجامعة بس، وشغلي في المستشفى الجامعي، وهتابع حلمنا... الصرح الطبي اللي إحنا بدأناه. لكن أي حاجة تانية لأ.
بصيت له وسكت شوية، وبعدها قلت:
وعد: مجد، أنا ما أقدرش أضغط عليك في حاجة زي دي، لكن الحاجة الوحيدة اللي مش هسمح بيها إنك تهد مستقبلك. لازم تكمل مشوارك زي ما أنت.
قال لي:
مجد: أنا متمسك بالصرح الطبي لسبب، لأنه عملته بمجهودي أنا وبفلوسي أنا، وما فيش جنيه واحد من فلوس دكتورة جيهان.
ابتسمت وقلت:
وعد: أنا متأكدة من كل ده جدًا. بس يا مجد، عدى وقت، وعايزاك تفكر هتعمل إيه بالنسبة لدكتورة جيهان وسارة.
بص لي وقال بحسم:
مجد: وعد، أنا أخدت قرار خلاص. أنا قلت لك إني هبعد عنهم، ومش محتاج منهم أي حاجة. وبالنسبة لسارة، من هنا ورايح مفيش أي علاقة هتربطني بيها، ولا حتى طفلي.
بصيت له بذهول وقلت:
وعد: لأ يا مجد، أنا مش هقدر أشوفك وأنت بتاخد القرار ده وأسكت.
بص لي وقال:
مجد: وعد، بالله عليكِ ما تضغطيش عليا. خلاص، ده قراري النهائي. أنا من جوايا مرتاح كده.
وعد: لكن أنت كده، مهما كان اللي حصل من دكتورة جيهان، مش بتضرها هي بس... أنت كمان بتاخد قرار يخص حياتك وعلاقتك بأمك.
بص لي وقال:
مجد: أبرها؟ إذا كانت هي ما برتنيش وأنا طفل!
بصيت له وقلت بهدوء:
وعد: وده مش سبب علشان تبعد عنها يا مجد.
كملت كلامي مع مجد وقلت له:
وعد: في الأول والآخر يا مجد، هي ما أمرتكش إنك تعصي ربنا.
أنت كان ليك وجهة نظر، وهي كمان كان ليها وجهة نظر، وكل واحد فيكم كان شايف الأمور من زاويته، وهي فكرت من وجهة نظرها.....كأم وانها وصيه علي بنت أخوها.... اللي ملهاش حد غيركم ياخد باله منها ..
*مجد* قال وهو بيهرب بعينه مني، وكأنه مش قادر حتى يواجه الكلام اللي بيقوله:
"أنا وصلت لدرجة إني بهرب من اسمها.
وعد... إنتِ نسيتي؟ إنتِ من قبل ما تعرفي إنها أمي، كنتِ دايمًا بتحكيلي عنها، وعن معاملتها العنيفة والقاسية مع الطلاب.
هي فعلًا زي ما إنتِ قلتي... دكتورة قلب، بس ما تفهمش أي حاجة عن القلب."
بصيتله بحزن، وحاولت أهدّي من غضبه وقلتله:
"مجد، عشان خاطري ما تبقاش قاسي عليها بالشكل ده.
أنا وارد أكون شايفة جانب واحد بس، ومش عارفة كل اللي حصل بينكم، بس صدقني أنا شايفة إنها أم. وكانت بتحاول على قد ما تقدر تحافظ على مستقبلك.
أي أم في مكانها هتفكر إزاي تحافظ على مستقبل ابنها وتضمن له حياة كويسة.
وبعدين هي كمان كانت مجبرة... جدك الله يرحمه هو اللي أمرها بكده، هو اللي اتحكم في قلبها وفي حياتها. هو السبب من البداية، هو اللي فرّقكم كأسرة، وحط كل واحد فيكم في طريق بعيد عن التاني."
مجد فضل ساكت، وملامحه اتغيرت، قبل ما يقول بصوت هادي لكنه محمّل بوجع كبير:
"وعد... ممكن بعد إذنك نقفل الموضوع ده؟"
هزيت راسي برفض، وقلت بإصرار:
"مش هينفع يا مجد. مش هينفع.
أنا مش هقبل إنك تفضل بعيد عن أمك بالشكل ده. لازم علاقتك بيها تتحسن، ومينفعش تفضل طول عمرك تناديها دكتورة جيهان.
جرب مرة واحدة بس... ناديها يا أمي."
رفع عينه وبصلي، وكانت الدموع بدأت تتجمع فيها. فضلت باصة له، وقلبي بيتوجع عليه، وقلت بصوت هادي:
"مجد... أنا مش هقدر أشوفك كده."
رد عليا بصوت مكسور، وكأن كل كلمة بيقولها بتخرج من مكان موجوع جواه:
"أمي؟
وعد... أنا لما شوفتك، شوفت فيكي أمي وحبيبتي وزوجتي... شوفت فيكي كل حاجة.
كنت بحس معاكي بالاحتواء والحنان، كنت بحس معاكي بكل حاجة اتحرمت منها.
مش هي يا وعد... أمي؟
أنا مش حاسس بالكلمة دي ناحيتها. مش قادر أحسها، ولا قادر أنطقها."
وفي اللحظة دي مقدرش يكمل.
انهار في العياط، ودموعه نزلت بغزارة، كأنه أخيرًا سمح لنفسه يطلع كل الوجع اللي كان بيحبسه جواه من سنين.
قربت منه وخدته في حضني، وفضلت أمسح على راسه وأحاول أهديه. ما اتكلمناش بعدها، فضلنا ساكتين فترة، وأنا حاسة بوجعه، وعارفة إن الكلام مهما كان مش هيقدر يمسح سنين من الحرمان.
بعد شوية، رفعت إيدي على شعره وقلتله:
"مجد، صدقني... لو هي مش فارقة معاك، ما كنتش عيطت بالطريقة دي.
بالعكس، أنا عارفة إنك بتحبها قوي، ونفسك ترتمي في حضنها، ونفسك تحس بحبها وحنانها، ونفسك تبقى بالنسبالها ابنها اللي بتخاف عليه وبتحتويه.
بس إنت بتكابر يا مجد... كأنك عايز تنتقم منها، وعايزها تحس بنفس الوجع اللي إنت عيشته."
سكت لحظة، وخدت نفس عميق قبل ما أكمل:
"مجد... أنا عايزة أقولك على حاجة.
الطفل اللي جاي مالوش أي ذنب في كل اللي حصل.
المرة دي هيبقى فيه مجد تاني... بس الفرق إن مجد زمان كان بيتعذب من ناحيتهم، إنما المرة دي مجد الصغير ممكن يتعذب من ناحيتك إنت.
إيه ذنبه؟
إيه ذنبه إنك تبعد عنهم دلوقتي؟ إيه ذنبه إنك تحرمهم منك، وتحرم نفسك منهم، وتكرر نفس الحكاية من جديد؟
إنت عارف كويس يعني إيه طفل يكبر وهو محروم من أبوه وأمه، وعارف الوجع اللي بيفضل جواه حتى وهو كبير.
فليه تخلي ابنك يعيش نفس الإحساس؟"
فضلت باصة له وأنا مستنية رده، لكن مجد كان ساكت، وعينيه لسه مليانة دموع.
كنت عارفة إن اللي بقوله مش سهل عليه، وإن المصالحة مش مجرد كلمة يقولها أو حضن ينهي سنين من الخلاف، لكن كنت مؤمنة إن فيه حاجات تستحق إننا نحاول عشانها، حتى لو المحاولة دي صعبة.
وأنا مش عايزة مجد يفضل طول عمره أسير لطفل اتوجع زمان، وينسى إنه دلوقتي راجل وأب، وقدامه فرصة يغيّر الحكاية بدل ما يعيدها من جديد.
