رواية خلخال مشوه الفصل الرابع والخمسون بقلم زمرده
تمنتيك تجي بگد ما تمنيت
ألمك لمة الخاطر بالعتاب
وانشدك
من عطشتك ليش ماجيت
عريان سيد خلف
كوكبة
مشيت بساع للغرفة حطيت كل هدومـه وملاعيبه ما اعارف شني الخلاني اتصرف هيج بس كل الاعارفـه احسن اله ،طلعت اطيت الجنطه السعد واخذتـه من ايد سكينة ،حضنته حيل ابوس بيه و وصيتها هواي عليه وارتاح گلبي من شفته يريد
سكينـة بس مشوا طبيت جوا وانا احس البيت فارغ عليَّ بس اگولن لا خلي يتونس شني باقي هنا وحده محد وياه
كفيت كـل شغلـي وتمددت على فراشي متجاهلـه كل الصوت الصار برا گبل لا أغفى وكـل ضني هذا مرتضى ،بس انرعبت من انفتح الباب
وصوت اكثر من شخص صار يدوي بالغرفة ،فتحت عيوني ارجف من شفتهم وشفت الوضع الي بيه همَ
گمت على حيلي اصيح بأسم مرتضى ،علـه صوتي اكثر بعيطـه حسيتها من كل گلبي طلعت من تقرب عليَّ واحد منهم
_ مرتضى الحگنيييي
°نسمات°
_ هل سبوع العرس
جم حجاية خلت الزمن بي يوگف ،اكثر من مره حاولت احجي وما گدرت وخانتني دمعتي من نزلت من عيني بخذلان
غفران : شنيي عرسمن خوووية ؟
غافر : علاء ونسمات
غفران : مو چنت ما راضي ،شغير رايك خوية ؟
غافر : ماعدي حل
غطيت وجهي بأيدي ابجي بصوت ،چنت حاسة والله ،حسيت وما خاب احساسي
غافر : لا تبچين بوية ،بس اصبريلي اطلگج منه
اجه يمي جراني لصدره
غفران : شني براسك خوية ؟
غافر : اطيهم على مايهم وبعدين اطلگها منه حتى لا سمعتها تنظر
غفران : عليك الحسن ما تخليها على ذمته ؟
غافر : لا وروح أبوي ،لمصاحتها، لان اعارف اذا طلگتها منه هسة شراح يسوون وچم بلوه يحطون براسها
غفران : جا زين تسوي
بالگوات گدرت اسكت روحي واقنع
بالگاله أبوي ،گام بحزم يحجي
غافر : گتلهم اليوم اردنها ،گومي بوية حضري روحج وامج هم
غفران : وين ماخذ ناهده خوية ؟
غافر : اخذها شني ضلتها هنا بعد
غفران : يمي أامن الها
_ انا عيني عليها عمة
باوعتلي حايرة
غفران : مثل ما تردين بعد عمتج
طبيت حضرت روحي ومشيت للغرفة البيها امي فتحتها على كيف فزت ومن شافتني بس بساع
انرسمت ابتسامه على وجها مستبدله بيها الخوف
سديت الباب ومشيت يمها
_ يمة
ناهدة : هاا
_ تمشين وياي ؟
ناهده : أي
_ جا خوش
فتحت الكنتور طلعت حجابها وعباتها الجاية بيهن لبستها الحجاب وهي حتى ما سألت وين ،گومتها وحطيت العباة على رأسها اتحرك ببرود بروح طافية مو متهمه للمجهول، كضيت ايدها
وطلعنه ودعت عمة وبتها وطلعت ورا أبوي وأمي كاضه
عباتي بخوف ،تخاف من الطلعة الفكرة ترعبها وچن العالم برا كلهم وحوش بعيونها
باوعت من الجامه احجي بداخلي
_ حگها اذا اهل بيتنه بهل غدر الغرب شلون
بس طبينه دربونته نشغت
ناهدة : وين جايبيني وين ،ردونيي يم غفرااان
تصيح بصوت عالي ،كضيت ايدها اتوسل بيها
_ وياج انا وياج والله ما اعوفنج
ناهدة : يموتوني، هنا يموتوني ،لا لا ما اريدن
_ لا ما يموتوج ،ما اخليهم انا
ترجف فاتحه عيونها بقوه وبالف يا علي الا رضت تطب ،شگد چنت محتاجه أم تهون علي مصيبتي ما لگيت روحي غير
الا انا اهون عليها ،طب أبوي گبلنه وانا وهي وراه وبدون ما اسلم ولا اباوعلهم صعدت فوگ اوديها لغرفتها
بس طبينه فززني صوت زينه من طبت ورانه مشيتلها بساع من فتحتلي ايدها، حضنتها وبچيت من كل خاطر ،من كل خاطر مكسور عدي
وخرتني تمسح عيوني
زينة : شلون رضيتي ،شلون رديتي لنفس الظيم
باوعت الامي أاشرلها ما اگدر احجي گدام امي ،بس شفتها استقرت بغرفتها
اخذتها وطلعت ،گبل لا اطبن لاكثر مكان بيه انكسرت ترددت هواي وكلشي گبالي صار ،شجعتني من طبت گبلي
گعدت يمها
_ راح احجيلج بس لا تخلين احد يحس بالاتفاق
_ أبوي اتفق وياي چم شهر ويطلگني من علاء بس حتى اضل محافظة على سمعتي
زينة : والله
_ أي والله ،وحتى حلف ما نضل هنا بس يطلگني
ابتسمت
زينة : جاا خووش
فرحتها چانت چبيره عكسي لا فرحانه ولا زعلانه متجرده من كل شعور، ثاني يوم الصبح نزلني حتى اشتغل وياهن بس شافتني صاحت
زينة : ويين نازلة ما تشوفنها مفصخه
_ زينة
زينة : شني زينة ،وين تگدرين بايد وحده ،امشي اصعدي
الوجوه تگلبت وكلهن هدن على زينه وهي ما چن تسمعهن تصيح علي اصعد ،صعدت بلايه ما اناقشها وبس فكيت ايدي بدوا بتجهيز العرس
اباوعلهم مخبوصين وانا مثل الغريبة ولا چن عرسي هذا كلشي ما تدخلت واذا يردون رأيي بشي اكفل زينة ،گضه الأسبوع ركض ركض
وبيوم حجز الصالون والبدلات طبتلي زينة تقنعني امشي وياها
_ والله ما الي واهس خليهن على ذوقج وانا راضية بكلشي تختاريه
زينة : ولج شبيج مسويتها فد نوب هي لعبة خلينه نتونس بيها
_ احسنها راح تصير صدگ مو بس لعبة
زينة : لا والله لا تصير صدگ ولا هم يحزنون بس حركي روحج أنت
گمت مستسلمه لملحتها ،حضرت روحي بساع بساع ونزلت جانن متانياتني هي وأم علاء بس شافتني هزت ايدها
أم علاء : عشتوا وجه عروس هذا
ما رديت عليها حتى ومشيت يم زينة ،كضيت ايدها وطلعنه من صاح علينه رچلها ،أول محل طبيناله أجرت ما مهتمه اذا كبار او زغار علي وبس حجزنه صالون گتلها
_ خل نرد ما اگدر امشي بعد رچلي هاجت علي
أم علاء : وين نرد بعد عدنه هواي شغل
زينة : انا وياج باجر نكملهن ما تگدر تمشي بعد
استغفرت ما راضية اجرنه تكسي وردينه وگبل الحنه بليله دگت علي باب الغرفه ،فتحتلها الباب مستغربة اباوع على العلبه بأيدها، دفعت الباب وطبت
زينة : احفلج ولا تگولين لا لان اشگج بالنص واسوي جسمج هم
_ شني السالفه
قفلت الباب علي
زينة : فلا اطلع والله وشتسوين سوي
حجاية منها حجاية مني كفختني على راسي وگعدتني تحفلي وانا شايغة روحي وبس كملت حطت المراية بوجهي
زينة : شوفي خلقتج شگد حلوة صارت
باوعت على روحي مصدومه بالتغييرر ،جرت المراية من ايدي
زينة : يله انزعي
صحت
_ ياااا
زينة : وسمااا، ضلي بالاتك يالغبره
_ احجي هيج من بداية شبيج
بس خلصت شحتتني للحمام وگالت هي تعزل الغرفة سبحت وطلعت بوجهي صار
علاء ردت اعبره رد صار بدربي رديت ليوره اخوزر بيه وهو يباوع بوجهي مبتسم
علاء : صايرة حلوة
_ وخر
علاء : واذا ما وخرت شتسوين ؟
استغفرت اكثر من مره اتعوذ الشيطان ولو انا جاي احسن واگف گبالي
علاء : لا تضلين تنافخين
زينة : علاء
اندار عليها واگفه يم باب غرفتي
زينة : شتريد منها ؟
علاء : وشدخلج أنت ؟
زينة : مايصير تحجي وياها گبل العرس فال مو زين
علاء : اهاا
زينة : وداعتك
وخر من ديربي وبس اطاني ضهره بأثنين
اديه
غميته محترگ گلبي ما اريد حتى اشوفه
زينة : طبي نامي واقفلي الباب انا راح انزل لا يگعد ابني
_ شكرا
ابتسمت
زينة : ما بيناتنة شكر ،يله گدامي طبي
طبيت وقفلت الباب ومن أمنت علي إلا نزلت ،تمددت على فراشي والصبح نزلت على هوستهم مسوگين للحنه، گعدت على الدرج بس اباوع
بعيوني ،عود صارت صدگ وباجر حنتي من أكثر بشر ما توقعت بيوم من الايام اصيرله
أم علاء : شبيج
_ كلشي ما بي
خليتها وگمت احجي عليها وي روحي
_ على الاساس ما تعرف شبي ،تغشم روحها ام العار
زينة : هاا تخبلتي
وگفت بصفي بايدها لفه تاكل بيها ،اطتني نصها
زينة : اكلي اكلي مبين عليج جوعانه
_ أي والله راح اموتن من الجوع
اكلتها ومشيت سويتلي جاي شربت اباوع عليهم بدون اي تدخل گبالي يگطعن باللحم والزفره تارسه المطبخ
أم علاء : ما تساعديهن ؟
زينة : وين صايرة عروس وتشتغل
_ صح وين صايرة
باوعت لنسوان عمامي الگاعدات
أم علاء : ايدي بالدهن شفتن چنايني
ردت عليها وحده منهن
_ أي خية الج الله من هسة متفقات عليج
هزيت ايدي ما متهمة لحجيهن بس زينة ما تگدر تسكت الا ترد
زينة : أي والله ياعمة ايدج بالدهن وين تلگين مثلنه
امها تخوزر بيها ،وهي ابد ما مهتمة تحجي بلايه ما تفكر لان تعارف رجلها بضهرها وعلى وگفتنه وصار صوت الصياح برا كلنه تطافرنه نركض نشوف شكو
و وي طلعتنه صار صوت الرمي ،گعدنه بمكاناتنه نخاف لا تلوحنه چيله وخبصتهم و وي ما تردد اسم علاء اكثر من مره طفرت امه تركض ما مهتمه
أم علاء : يمةةة شبيه ابنييي ،حاجوووني يمةةة علاء
°بركة°
رأجس : ماكو جذبه والانحجه راح يتنفذ والسبوع الجاي يعقدون
انداريت على حواري الواگفه بصفي وابد ما بين عليها مستغربة من حجي جدي ،موسعة عيوني واسألها وانا شكوك هواي براسي وياخوفي التفسير الجاي افكر بيه هو جوابي
_ ياهم اليعقدون ،شجاي يحجي جدي ؟
حواري : هاا
ارتباكها وحيرتها بالجواب خلت الدنيا بعيني تصير بلون هدوم حزني على خواتي
_ شجاي يحجيي جدييي ،منوهم اليعقدوون احجيي گليلي مو انا المقصووده مو انا ،شبييج ساكتته، احجيي
جرتني توخرني من الباب من صار صوتي عالي ،وانا روحي احسنها ثگلت علي بالسمعته
_ ولج حااجيني حورية، چذبي علي ،گليلي لا مووو انا
حواري : كااافي شبيج تخبلتيي
حطيت ايدي على گلبي وكل بالي يمهم برا ويم حجيهم ،اوامر ،جدي يطي اوامر واحنه مثل الجنود عده لازم نگول تم ،باوعتلها من لمت وجهي بين ايدها
حواري : تردين ابن چسار مو ؟
_ ما اريدن لا هو ولا غيره ،انا الظيم البي كافيني
حواري : شو احسنج چذابة
_ لا تحسين بعد
حواري : اممم ،على گولة نوح الچذاب الله يذبه بالنار
_ أول وحدة أنت ،تتذكرين لو اذكرج
ضحكت تريد تضيع السالفة بس انا ضلت تاكل بگلبي ،وبس طبوا اخواني من وجوتهم عارفت الحجي السمعته انا المقصوده بيه ،وصفنتهم ب وجهي اكدتلي كلشي
شيماء : شكو ،شبيكم ؟
عبد الحق : تعارفين هل مرة بيت غازي هم اجوي
شيماء : أي
عبد الحق : جدي گاللهم ليث يريدها
مثل الضربه على الرأس اجتني من عارفت ليث الانسان الي اعارف بيه يحب وميت على طاري اليحبها
_ بس انا ما اريدن
اندار علي رافع حاجبه مثل الچان متحظر للراح اگوله
_ ليث مثل اخوي ،حاله من حالك
نترت بي
شيماء : خايبة ما تنچبين منين اجه اخوج ،وبعدين شفايتلج واحد مثل ليوثي بس حنيته كافي
امي الما يوم وگفت بوجهي هسة تخوز بي بحكم هي اعرف بمصلحتي وليث منه ماكو تعتبره حاله من حال عبد الحق
عبد الحق : جدي خلانه گدام الامر الواقع ،حتى شور لا الاختي ولا ل ليث ضل
شمياء : يعني شني ،يعقدون ؟
عبد الحق : ما اعارف انا خليتهم واجيت
حواري : بس مو هيج حق ،يعني غير هم تأخذون راي بركة وهم خاف هو ما يرديها
عبد الحق : جدي حجايته مشت على الما تمشي عليه حجاية ،برايج يگدرله ليث
حواري : غير سالفة هاي ،زين خل امشي اشوفن شراح يصير
خزرها وامي هزت ايدها
شيماء : خوب أنت ما تصدگين تحطين عباتج على رأسج
حواري : شسوي ياعمة ،الله وكيلج نوبات جسمي يضل يحكني اذا ما اعارف السالفه
عبد الحق : الحمدلله
حواري : أي طبعا الحمدلله جا وين لاگيلك مثلي
عبد الحق : لا عمي وين الگه
حواري : أبو النسوان
عبد الحق : شلون راح اگوملها
حواري : أنت بس طگني حتى بيت غازي اخليهم يسمعون عياطي
عبد الحق : الصبر منك يا ربي
شيماء : هاي بعدكم متعاركين
عبد الحق : ما متعاركين يمة ،چنتج مطنگره
تخصرت تحجي وي امي
حواري : عمة كلش زين تعارفين منو اليطنگر ما داعي اگولن اسمه
بس گاملها هي ركضت من المحجر مدت رأسها شمرتله بوسه وهو نتر عليها
عبد الحق : ولجج
شيماء : العقل ياربي
°غاية°
درت على صوت عمة عطاء تسأل
عطاء : شكو شهل هوسه هاي ؟
_ اضن بيت غازي
عطاء : ياا يااا هم ردوا ،عمي والله خوش ،شو وخري
وخرتني وهي ضلت تباوع من زرف الباب ،وكلساع صاحت
عطاء : علگت علگت
_ كلساع ومهبتطتني شبييج عمة
اندارت علي
عطاء : وعلي اذا ما تطلع الثانية اليردوها من بنات كاظم اطلع مو بت أبوي
_ جا بتمن ؟
عطاء : عفتي كل الحجي وركزتي على هاي ،خايبة جيره
غمتني وردت تباوع وبس اندفع الباب طحت وهي فوگاي وصخر صار گبالنه ،ضليت ادفع بعمة اريدنها تگوم حتى اشرد بس هي گعدت على رچليه تحجي وي صخر
عطاء : شبلاك، اكو واحد هيج يدفع الباب ما يگول اكو ناس ورا الباب
صخر : وانا اگولن بناتنة عليمن طالعات
عطاء : الهن الشرف يطلعن علي ،خااايبة دهر شگد تحوسين
دفعتها وگمت شوي وابجي من رچلي ،وعود ردت اشرد بس ما لحگت من اجه جراني من ايدي مزغر عيونه
صخر : شعدج ورا الباب
بلعت ريگي ،شلون تتلزگ هاي
_ موو شسمه
صخر : أي
_ عمة شسمها
صخر : عطاء
_ أي عمة عطاء ،عمة چانت ورا الباب وانا اجيت عودن اصيحنها بس أنت اجيت
نشغت عمة وصخر اندارلها
عطاء : وداعة غازي چذاااابة
صخر : ماتچذب غاية
لطمت على صدرها
عطاء : ياا يااا جا انا الاچذب ،خااايب صخر قصدك انا اچذب
صخر : حشاج عمة
عطاء : خليت بيها حشاج أنت ،وعلي تچذب عليك يااا يااا شوفها جاي تضحك
بس اندار گلبت ملامجي
_ حرام عليج عمة
صخر : تيهتني وحگ داحي باب خيبر ،نسوان محيلات ما تنگدرن
بس طب جوا ردت اركض وراه بس طگت رچلي وطحت وكضتني عمة وما اعارف الله منين جاب عزيز ،ضميت روحي يمه
_ الحگلي راح تاكلني والله
هو ما مفتهم شي بس يحميني من عمة ،وبهل وكت طب ليث ،استغربت من باوعلي وكمل دربه ،غريبة ليث شافني يم عزيز وما حجه شي ..! !
عطاء : ولك لييث تعال
اندار على عمة وانا وخرت من ورا عزيز ومشيتله احجي
_ شبيك خوية
باوعلي بعيون غريب البيهن ما عارفته ،چن بشر مختنگ يريد يبچي ،خسران و واصل لمرحله العجز بعد
_ حاجيني
ليث : شحجي ؟
_ شبيك ،حالك مگلوب ،الصبح مابيك شي .
ليث : جدي كسر مچذاف روحي
_ اسم الله على روحك ،غير تحجي هسة
ليث : انتهى كلشي وضاعت سنين بيهن ناطرت بيهن
عزيز : ابجي بعد
خزره
ليث : مو احجيلهاا
عزيز : سوده عليه كل الحگ الك ،اذا تريد تبچي محد يلومك
ليث : اشتعلوا اهلك وجدك وياهم
انهد عليه بالمسبه وخله وطب جوا وكل هذا وانا ضاله بس فاكه حلگي ،شني الخلاه يفقد اعصابه هيج
عطاء : هذا شبيه ؟
عزيز : جدي يريده يعقد على كوكبة الأسبوع الجاي
نشغت
عزيز : عليك الله
عزيز : والله وهذا ما راضي ،هم متعافي
_ بس مايصير
عزيز : ليش مايصير ،قابل راضعين سوا
_ لا مو هيج ،بس ليث يعتبرها اخته
عزيز : ماكو هيج حجي ،انا هم چنت اعتبرج اختي
عطاء : شو تقدمت خيرر
ضحك ورجع ليوره
عزيز : گلبتي علي لان ما تارس چزدانج
عطاء : مو گضه دوري وحطيت اديك بماي بارده
عزيز : تطلبيني هديه
عطاء : أكبر چذاب
عزيز : خلف الله عليج
عطاء : جحفي
هم يتداهرون وانا كل بالي يم ليث ،اخوي شلون بيه لو انجبر ينفذ كلام جدي وهو هواه اليتنفسه يشهد عليه عاشگ و واصل مرحله صعب توصفها السوالف
عزيز : شبيج ؟
فزيت مندارتله حاط ايده ورا ضهري
_ مابي شي
عزيز : صافنه چنت
_ بالي يم ليث
عزيز : هنياله
ابتسمت ما عولت مشى حتى اصعد اشوفنه،بس فتحت الباب فزيت من شفته يلم بهدومه بجنطه
_ ليث
اندار علي ،نزل الهدوم من ايده على الچرباية ،وگف گبالي ساكت
_ وين تريد تمشي ؟
سألته والغصه على حاله ذابحتني
ليث : اهجن
_ وين ليث وين
ليث : چم يوم
_ احجي لجدي ،گله ما اريدن ،أنت مو تگول انا غير وما انجبر ،احجيي
ليث : مايفيد بعد ،چدج حطني گدام الامر الواقع
_ جا تطلع لييث ،تهدد ديرتك
ليث : "ديرتي الما لمتني بمحبوبتي ما اريدنها"
_ مو بكيفك ،ما تطلع والله
ليث : لا تزيديها علي غاية ،تعبت انا والله
هل مره چانت مختلفه، يحلف لايبه روحه منهاره كل اعصابه، حضنته اريدن ابچي بس لخاطره لازم اقوي روحي
ليث : بكل ديره دورتها ،بكل يوم اتأمل الگاها تطلگ واعيشن انا وياها، اعوضها وانسيها العاشته واجازي روحي على صبر السنين ،تالي جدي يقرر مصيري ويگلب السنين على راسي
ما حجيت خليته يفرغ الي بگلبه ،فزيت من حسيت بثگله علي
_ ضغطك لييث
وخرته وهو يادوب باقي فاتح عيونه ،بچيت وسندته اوديه للجرباية مدد مغمض عيونه نفسه سريع
_ وين وين الدووه
ادور على الدوه گدامي چان ومن خبصتي ما اشوفنه، اطيته دواه وضليت گاعده عد رچله
_ ليش هيج ،ليش تسوي بروحك هيج والله ساعة الساعة يوگف گلبي من الخوف عليك
ليث : ريته واگف گلبي
يحجها بشوغة خلاني اتخبل ،ومنا لمن صار زين نزلت و وي نزلتي صاروا گدامي كلهم طبوا من برا
باقر : شلون يعقدون بوية اذا ميمنة بعدها ما طالعه سنتها
اندار عليه جدي
رأجس : بس عقد نسكت بيه غازي وحفيده
يوسف : حتى لو ما عقد عليها ليث انا بتي ما اطيها
رأجس : يعقد حتى نكف فد نوب ونعرسلهم وي عزيز
صخر : شكو عليش هل استعجال جدي
رأجس : ما اريدنهم يعتبون القرية بعد من ذاتهم
جعفر : ما اطي اختي ل ليث انا
فر سبحته جدي مركز بوجه جعفر الخالي من التعابير
رأجس : المفروض اكثر واحد يفرح بقراري أنت عمن ليث صاحب عمرك الما تفارگه
جعفر : مو كلشي بالصحبه جدي ،واختي ما تنجبر على زلمه ما تريده لو تضل طول العمر عدنه
رأجس : جا ترديني اطيها الابن الچسار
عطاء : وشبيه ابن الچسار بوية
كل العيون صارت عليها وهي منتظره جواب مثل اليغشم روحه، خزرها جدي أبوي صاح عليها تطب للغرفة وگبل لا تمشي ما گدرت ما تحجي وتخليهم يصفنون
عطاء : والله يا الله اليدگ الباب لو الشباچ ما يردوه وادم متعافية
جدي شمر عليها السبحه اخذتها وركضت تصيح
عطاء : رايح ابيعنها واجيبن بتوت
طبت للغرفة وسدت الباب وصوت ضحكتها لهنا أبتسمت من شفت أبوي مبتسم ،باوعله جدي ونتر
رأجس : وتاليها وي اختك
محمد : موش جديدة عليك بوية ،هي هاي عطاء وهاي سوالفها
يوسف : تزعطط بروحها
ما رضى أبوي على حجيه بس سكت ما جاوبه ،كلهم گعدوا الا جعفر ضل يحوس
جعفر : غاية وين ليث ؟
اشرتله
_ فوگ
وخرت من دربه وصعدله ،ضلوا يحجون وانا وامي وجده مخليها على الساكت وعلى جهه گاعده جفون بحضنها
بطه زغيره، انتبهتله يحوس يريد بس يحجيها وهي ضاله بس مركزه بحجيهم ،گمت امشي متعنيه للمطبخ، بس وصلت عده دنگت
_ عيونك ،صخر راح يگوم يفلش وجهك
نوح : هاا
_ انتبه لروحك گدام الوادم
خليته وكملت سويت جاي وصحت علي اجه يدردم
علي : علي تعال الى ورح علي جيب تحاليل
_ لازم امك هم وديتك على تحاليل
علي : وهم ماكو شي ،تدرين شني اتمنى
_ شني ؟
علي : الله يحقق امنية امي وصدگ تحبل عاد تلتهي
_ يعني مو حتى يصير عدك اخ ؟
علي : انا عدي ،خير من الله خوان يعدلوها لو رادت تميل بي ،بس امي تفكيرها غير كل ضنها لوما حبلت أبوي يتزوج عليها
_ حگها تخاف
علي : تگلي جدك يزوج ابوك
_ جا صدگ يسويها جدي
علي : هي صوجها لو مخليه الگلوب عليها طيبه ما چان خافت
_ بعد الصار صار
علي : مرات انقهر عليها ومرات الومنها
_ شوف سالفة انا ابد ما حاقده عليها بس انقهر عليها گبل كلشي من اتذكر الطلايب السوتهن بس حتى تطلع منا
بلع ريگه وجر نفس طويل
علي : يعني مشاكل عادية مو ؟
توترت بالجواب وانا اگولن
_ هاا
علي : تعارفين شي ؟
_ لا
علي : سنين صار بس اريدن احد يحجيلي ،اذا تعارفين شي گولي
_ لا تعارف احسن
علي : اهاا يعني ما تردين تحجيلي ؟
_ ليش تدور بالدفاتر العتگ
علي : من حقي اعارف ليش من دون نسوان عمي امي الوحيده بيهن منبوذه
_ يووه علي شني سالفتك، دهاك الجاي اخذه
باوع علي يعارف جاي اغير الموضوع ،اخذ الچاي ومشى ،تنهدت حايرة ،شجايه هسة يدور بالدفاتر الضلن مسدودات من سنين
جفون : غااية
باوعتلها طبت من الحوش
_ هاي شوكت طلعتي مو هستوج برا
جفون : وديت البطه ورديت وأنت وعلي واگفين تحجون ما انتبهتولي
_ هاا
جفون : عزيز برا يريدج
_ شيريد ؟
جفون : ما اعارف بس گالي صيحي غاية تجي بساع
_ ماشية بس ضلي هنا خاف يردون شي
جفون : اهوو
_ مو اختج انا
جفون : ديله يله امشي
گبل لا امشي بستها وطلعت ،بس شافني وگف على حيله اعارف مكانه دوم ورا البيت من الجهه الثانية ضليت واگفه من اجه يمشيلي هو
عزيز : قضيتي
ضحكت من شالني يرفعني من الگاع
عزيز : أحبج
_ وانا هم
عزيز : گوليها
_ أحبك
عزيز : يااابوية
صاح بصوت خلاني افز
_ صوووتك عزيز
عزيز : روحه عزيز ،غايته
_ ناوي اليوم علينه أنت
عزيز : ناوي عليج
_ هاا
نزلني يضحك وكض ايدي ومشى ،گعد وگعدني
على رچله ،جر شالي
عزيز : ما ضل شي لدورة السنة وتصيرين يمي
_ ياسنة ؟
عزيز : روا سنة ميمنة نتزوج
_ وحفله وهاي
عزيز : ما تردين ؟
_ لا مو هيج
نزلت من رجليه وگعدت بصفه ،اندار علي مركز بكل حجاية احجيها
_ حتى لو دارت السنة ما اريدن لا حفله ولا شي
حسيت بدموعي نزلن وانا اكمل
_ ما احس راح اگدر افرح وهي ماكو
عزيز : المطلوب ما نسوي حفله ؟
هزيت رأسي ب أي
_ ما نسوي بس عرس وعشا وهاي هي
عزيز : مثل ما تردين ،وبفلوس الحنه نسافر
_ وين
عزيز : أي دولة ترديها أنت
ابتسمت وهو مد ايده يمسح عيوني
عزيز : كلشي ولا تبچين
_ ليث هم مثلك ما يرضى ابجي
عزيز : ماكو مثل گلبه ليث ،بس متعوب احسنه
_ هواي
عزيز : اممم
_ اروحن ما تريد شي بعد ؟
عزيز : اريدن
لم وجهي بين ايده باسني بوسه طويله من خدي
عزيز : بوسه طيبة
_ شلون طيبه
عزيز : طعم الحلال طيب
_ امم
عزيز : ما تدنيت ولا راح اتدنه لغيرج ،بس أنت مرة بعيني
_ وحجي ليث
عزيز : يداهرني، تصدگين بي أنت ؟
_ اكيد
عزيز : جا أمني لان ماكو غيرج ساطرني سطر وما مخليني اندل دربي
غطيت حلگي بأيدي وهو ضحك و وخرها
عزيز : خليني اشوف ابتسامتج احبنها
_ ما توقعتك هيج
عزيز : شلون يعني
_ توقعتك صعب وما تتعاشر
عزيز : يتعاشر الصعب وي اليحبها هاي ماشية
_ عزوز
عزيز : گلبت الموجه، اوگفي خل اكضن گلبي
ضحك من حط ايده على گلبه
عزيز : احجي
_ ليش هيج تسوي ؟
عزيز : گلبي ما يتحمل من تگولين عزوز
_ عزوز
عزيز : اخخ بوية
ضحك وهو يضحك ناسين الدنيا منا لمن فززنه صوت عمة تحجي وتخرخش بايدها البتوت
عطاء : وانا اگولن شبيه الزلمه مسلمها تراب طلعتي تلعبين عليه
عزيز : بلايه ما تلعب انا مسلمها تراب
عطاء : فلك الصابكم، هاي شبيها الوادم صايرة ما تستحتي
گام مشالها مزغر عيونه
عزيز : ما تدايني واحد منهن مبينات غاليات
حركتهن گدامه
عطاء : خاب هاي شبيها الوادم حاطه عينها على بتوتي
عزيز : واحد بداعة أبو چسار
دنگت للگاع شالت حجارة
عطاء : احطنها براسك وعلي لا تچيبلي طاري ابو چسار
عزيز : مو تحبي
عطاء : حبتك سليمه اذا انا احبنه ،يله طبوا للبيت لا افتن عليكم
عزيز : انا ماشي عدي شغل، اخذي مريتي وطبن
ابتسمت من گال "مريتي" وهي بس شافتني مبتسمة هفتني بالحجارة زين ومن طاحت بصفي مو براسي
عزيز : شني السالفة عمةة
عطاء : اطلع الخفه من راسها شبيك ،يله انگلع خل نطب
عزيز : والله خايف عليها منج
عطاء : هسة اگطعها واشمرلها للدجاج، خايب ماعدنه چلاب
عزيز : وصي جدي يجبلج
عطاء : حتى اصيرن انا اول وجبه الهن بالقرية
عزيز : تعارف بالوادم بزعانه منها
عطاء : امشي امشي
دفعتها حتى يطلع وهو يضحك لبست حجابي وركضت جوا گبلها وبوجهي صار نوح بس شافني گال
نوح : عزيز ماكو وأنت چنتي برا ،يعني شني المعنى
عطاء : وهرش شدخلك أنت
نوح : عمةة
عطاء : وسمة ،هم مرته وهم يتدخلون
سكتته بعد ما حجه وخله ومشى ،ضليت صافنه عمة تحير الما يتحير ،خلتني بصفنتي وطبت جوا گامت وگفت گبالي
جفون : هي هيج تتأخرين وتخيلي مثل البومه هنا
_ جا شسوي
جفون : نوبة راح تعرسين ما اگدر اطلعهن من عينج من انخطب
_ هسة دنخطبي حتى انا ما تحتاجيني
جفون : هاا
_ بعدج أنت ونوح ما تتحاجون ؟
جفون : هو مطنگر وانا خليته براحته
_ ثنيناتكم بيكم طنگوره
جفون : لا والله اخوج البيه طنگوره
_ والله حتى أنت ،وشرط طنگورتج تضل سنين
جفون : اهاا، هاي انا ؟
_ جا انا ،ما شايفته شلون مشلوع گلبه عليج وأنت ما دايرتله بال حتى
جفون : خااب دروحي ،هو غير داير بال بس لحبيبته
_ ياحبيبه هاي ؟
جفون : اليحجي وياها يوميا
_ والله انا احسن سالفة حبيبته كلها چذب بچذب
جفون : وانا احسنها صدگ ويجي يوم تتأكدين
_ نشوف
صخر : شبيچن
عدلت وگفتي
_ مابينه شي جاي نسولف
صخر : يا سوالف ،چن جاي تتعاركن
جفون : تحجي علي لا ما منضفه گن الدجاج
صخر : اهاا
وانا وياها بنفس الوكت گلنه
_ أي
جفون : أي
ما حاجانه بعد وطلع ،شوي وطشوا الولد وعمامي وضلت سالفة ليث وبركة ما معروف تاليها شني ،ليث صرت اشوفنه قليل كل وكته باليگعان
جفون : غااااية
شمرت عليها المخده
_ شبيييج تصيحين
جفون : اطلعي شوفي اخوج شلون يتمضحك وي روحه ،اطلعي، من احجيلج ما تصدگين
عطاء : وسم حتى سم وعلى هاي هاجمه علينه ،جا مو گلتي خله يشوف حياته
جفون : بس مو گبل لا اشوف حياتي انا
عطاء : خايبه غاية شو گومي جيبلي نعالي اگطعه عليها
جفون : وعلي اطلع اگله فك النهوه واذا ما فكها اتخبل عليكم اليوم
عطاء : اطلعي منج اله شدخلنه بيج احنه
كضتني من ردت اطلع وراها ،بالگوه توسلت بيها الا رضت تهدني
عطاء : حشريه
طلعت بساع بلايه ما اردن عليها وبس صاروا گبالي وگفت بمكاني ،هو گاعد وهي واگفه گباله ،تحجي وتحجي وهو ساكت
جفون : ما تفك النهوه مو ما ترديني وما احجي وياي وكارهني ،ومبين شفت حياتك ،فك النهوه حتى انا هم اعيش حياتي لو حلال عليك وحرام علي
يباوعلها ساكت ،ودنگ اخذ الجهاز من اجاه اشعار وبحركته هاي خلاها تتسودن
جفون : نووووح مو واگفه گدامك ،هدد الموبايل
رفع عينه بكل برود يرد عليها
نوح : شتردين أنت ،شني علتج ؟
جفون : أنت
نوح : شمسويلج انا ؟
جفون : اكرهك
گالتها بدون سابق انذار خلته يجمد
جفون : اكرهك لان فرضت روحك علي وأنت چنت بعيني اخوي
شهگت حابسه صوتي وهو طفر من مكانه ،الموبايل منه طاح ومن رچفه صوته مبين شگد چان متمني هل يوم
نوح : يعنيي شنيي
دنگت تبچي ،تردد هواي گبل لا يسألها
نوح : يعني هسة مو اخوج انا
رفعت عيونها اكثر من مره مسح وجهه ،كضها من متونها منتهي صبره ولا چنه هذاك الچان ياكابر حتى على روحه
نوح : حاجيني ،ريحي گلبي شحمه ،گليلي شني نوح هسة
جفون : ابن عمي
نوح : مو اخوج
هزت رأسها ب لا ضحك ضحكه صداها بالبيت صار وهي على اثر ضحكته مبتسمه ،ابد ما چنت متوقعه الراح يصير ،لهناك وتذكرت على شني هي جاية هاده عليه
جفون : جا اذا تحبني ليش تحجي وي نسوان ،وين اكو واحد يحب يسوي عملتك
دنگ شال موبايله يباوع بيه
نوح : انفطرت الشاشة ،بس فدوه الج
جفون : لو اطحنه ما يرتاح گلبي
مدلها الموبايل
نوح : گدامج
اخذته من ايده
جفون : افتحه
°جفون°
فتح الرمز وردلياه ،ضليت افتر بيه فارغ وگبل لا اطبن للماسنجر اجته رساله، طبيت بساع وانصدمت من قريت اسمه "علي سمير"
كاتبله : شني مليوص الوضع اوادمك ما يحسون مو مليت
موسعه عيوني واقره ،رفعتله الموبايل
_ شني هاي ؟
نوح : علي ابن عمي
_ اعارف علي ابن عمي بش طلعتوا متفقين علي
ضحك وجر الموبايل من ردت اشمره ،حطاه بجيبه
نوح : ما جان اكو غير حل
_ حرگتوااا گلبي
نوح : جان لازم يحترگ حتى يتشغل عدل
_ نوووح
نوح : هاا يالمغرگه سفينته
_ غرگت أنت وسفينتك أن شاء الله
نوح : وأنت وياي
درت اريدن امشي وكضني يوگفني
نوح : هيج تمشين
_ شني
نوح : تعاي
باوع لغاية
نوح : اخوج جاي يعيش احلى لحظات عمره
غاية : تتهنه ياروحي واخيرا راح اشوفن واحد منكم مرتاح
أبتسم وانا عيني بعين غاية ما گدرت احطها ،وين اشرد بروحي ،كض ايدي ومشى لغرفه عمي ،خلاني اگعد على الجرباية وهو ضل واگف يحوس
باوعلي بنضرات وترني
نوح : تحجيلي
_ شحجلك
نوح : حجي يبدل خشب السفينه
گعد گبالي على ركبه واديه حاطهن على رچلي
نوح : اريد اعيش احلى ايام بعمري ،ترضين تصيرين السبب بيهن
_ هاا
نوح : اريدج مرتي ،صار هواي متانيج
_ جا انا جفون استاهل اتانيني
نوح : تستاهلين فوگ العمر عمرين
دنگت ارچف ،ارزل بروحي اريد اجمعلي حجايتين براسهن خير ما اگدر وهو كل ما تحركن اديناته على رچلي احس بقشعريره تصيب جسمي
نوح : ارفعي راسج شو خل احجيها
رفعت رأسي اديرن بعيوني ،بس ركزت وياه من گال
نوح : احجيها و وراها انتظر ردج المگطوع گلبي عليه
_ شتحجي
لا رچفتي ولا دگات گلبي السريعه گدرت اسيطر عليهن من تقرب وجهه بوجهي همس يهمس خله كل عنادي يتشتت
نوح : أحبج من ساعة العارفت بيها أنت مو اختي وحلال علي
ضلت عيونه مركزه بي ،يفرهن على ملامحي، ذاك لساني الطويل ما گدرت بيه احجي حجايه وحده
وهو شعور الانتصار كله ينشاف بوجهه من حالي الظايع هسة
نوح : ما تحجين
_ شحجي
نوح : لسانج وين ؟
_ اضحك اضحك فرحان أنت هسة
ضحك بصوت عالي
نوح : أي والله طاير مو بس فرحان ،لوما الحلال والحرام چان هسة شبكتج شبكه اكسر ضلوعج
_ لا تحجي هيج نوح
نوح : جا شلون احجي
_ استحي
نوح : أنت ؟
_ جا وحد
يضحك بشكل أول مره اشوفنه، فرحته بي جاي اشوفنها، رد گبالني الا تحجين
_ خليها لوكتها احجيها من استعد
نوح : هم اتاني ؟
_ اممم
وگف على حيله يمسح على لحيته الصايرة كاملة ومغيرة من شكله هواي
نوح : صار يابه صار ،نتاني تدللين
گمت وگفت اطگطگ اصابعي، صرت چني غاية أول مرة اجرب التوتر واسوي حركتها الدوم تسويها ،جر ايديناتي يفكهن وحده من الثانية من شابكتهن بقوه
نوح : ما چان ببالي يجي يوم تستحين مني
_ تريد اگلك ابو ريحه
ضحك
نوح : هاي جفون الاعارفها گبل كلشي حبيت لسانها
_ اطلبك هديه مال نجاحي
نوح : جايبها وضامها من زمان
_ جا ليش ما اطيتنياها ؟
نوح : غير چنه واحد لابس الثاني
_ امم
نوح : ترديها ؟
_ أي
نوح : بس هديتي مختلفه انا .
_ راح اتانيك جيبها ورد
نوح : خوش ،بس مو تشردين
_ لا ما اشرد
رديت گعدت على الجرباية وهو طلع برمشة عين رد ،اجه گعد بصفي ،وبس فتحها لمعت گبالي
شهگت ما متوقعتها
_ حلقه ؟؟
نوح : صغتها صياغة
شالها وگلبها يخليني اباوع ببطنها محفوره جوه
"نوحجفون"
نوح : گلت يجي يوم ترضين والبسها الج .
اخذتها من ايده اباوع بيها
_ بس شلون عارف قياس اصبعي
نوح : اخذت محبسج الذهب من امي وعليه سويتها
_ عمة تعارف ؟
نوح : وابوي هم ومن شافها ضل يرزل بي ويگلي لا تتأمل ما اجبرها عليك
_ حبيبي
نوح : انا ؟؟
_ لا عمو
نوح : هم يجي يوم تصير الي
_ الطمع مو حلو
أبتسم واخذ الحلقة مني
نوح : ترضين اللبسها الج بعد چم شهر ؟
_ ها
نوح : نخطب وبوكت ما يعجبج نتزوج
گمت حايره شني اجاوبه
_ الله كريم
نوح : والنعم بالله ،امشي نطلع عمة سألتني عليج
_ يبوو شراح يخلصني طحت بلسانهن
عدم المسافه بيناتنه وگف گبالي
نوح : عادي لا تستحين منهن ،أول وتالي الكل راح يعارف
هزيت رأسي ب أي وطلعت گبله ،احس شوي ويغمه علي وبعدني ما فاتحه باب غرفتنه وجرني ثنيناتهن
_ بسم الله الرحمن الرحيم، دخيلج يا ام البنين
كضني كل وحده من ايد ،وحده تجيني منا والثانية تسحلني منا وعمة الف سؤال سألت
عطاء : طلعتيي تحبييه مو ولجججج ، أي أي طلعتي تحبييه ،شعدكم خنستوا بالغرفةةة هااا
احجي وشعده صعد يركض ونزل يركض وانا هنا مثل الططوه متانينج
غاية : گتيله أحبك مووو ،گالج أحبج اعترفلججج
_ يبووو على الساعة السوووده
عطاء : ما تخلصييين اذا ما تحجين ،احجيي لا احطج بحلگ صخر
_ دخيلج عمة شني السالفة
عطاء : جا احجيي ،وكلشي هم
_ خصوصيات مايصير
غاية : هلوو هلوو، جا شو انا من اگلج خصوصيات تكليلي اعفطلج أنت والخصوصيات
_ احمم
دگت على ضهري
عطاء : تحجين يعني تحجين ما تخلصين من عدنه اليوم
_ اهووو، هدني حرام عليچن اطني مجال استوعب
هدتني تسأل ورافعه ايديناتها تحسب
عطاء : شوكت تستوعبين، بعد دقيقة ،بعد ساعة ،بعد يوم
_ يومين
عطاء : ما متوفر هذا الخيار اعذرينه اطول شي لباجر
_ اهوو
عطاء : اهوو بنص خشمج اليابس الشلع گلبنه
زغرت عيوني وتخصرت وهي بس حست بالراح احجي رادت تطفر كضيتها
_ الج ايد مووو ؟
عطاء : ايد ،أي الي ثنين مو وحده وهاج بيهن بتوت
تخرخش ببتوتها گبالي ،أبتسمت
_ لا عمة ،احجيلي الخطة چانت خطتج مو ؟
عطاء : خطة شني ؟
_ تغشمين روحج ؟
عطاء : جا وشني خايفة منج ،أي انا گلت لنوح هيج يسوي وعلاوي اطيته خمسه وعشرين من دزداني حتى يساعدنه
_ اهاا يعني متفقين علي
عطاء : وفادت الاتفاقيه ،وطيحناج
تضحك شلون الشمتانه خلتني اموتن قهر ،طنگرت وحلفت الحگ عمه وجده لبيت عمي باقر وبعدني هتسوني لبست عباتي وفتحت باب الشارع وشفتهن وراي ثنيناتهن ...
صحت عليهن
_ جاااا مو انا هاجه منچن المن موليات وراي
اجت كفختني على راسي
عطاء : صايرة ما تحترمين كلش
خليتها ومشيت وهن وراي ،شعور غريب جاي احسن بيه لا احجي ولا اعارك بس افكر بالسويته صح لو غلط لو خاف استعجلت ..؟؟؟
حواري : هاي مني هاي ،ولكم خاله رموشه
ركضوا علي گبلها ،ضحكت ودنگتلهم شلت حوراء وسيف ضل متعلگ برچليه وهي وراهم اجت
حواري : ولج شيلي سيف هم تراه يحبج لا تفرقين
_ ما مفرقه بس ما اگدرلهم ثنيناتهم، شعجب هنا اليوم
حواري : أجيت اشوفن هيوفه چي اليوم مشت للدكتوره
_ انا هم اجيت اشوفنها
حواري : جا شعجب ما اجيتي وي عمه وجدة عاد چان شفتج لان بعد شوي راح امشي
طبت بيناتنه
عطاء : عساس نجي من گبل شوي بس اكو وادم عجبها اليوم تعترف
حواري : يا ودام هذول
عطاء : وادم عدها سفن
غاية : سفن ،بطل سفن ،اريدن سفن عدكم
جرت حواري وطبن وانا ضليت احلف بعمه ما تحجي وتحطني بلسان حواري وهي متحلفه بي
عطاء : اسكت بس بشرط
_ شتردين بالخدمه
عطاء : يوميا تفرشيلي وتلمين فراشي وتغسلين هدومي
_ لا والله
عطاء : اذا ما يعجبج بعد احسن احجي انا وخليج حايرة وين تضمين وجهج
_ صعبةةة
عطاء : جا هو فراش بالغبره
_ اوووف
عطاء : متفقين
_ متفقين امري ل الله
طبطبت على چتفي خلتني احسنه تفلش ،طبت گبلي وانا وراها وبس شافتني هيوفة أبتسمت
هيوفة : هاي حتى أنت اجيتي
عطاء : وانا هم اجيت
هيوفة : كل الهلا بيچن
سلمت عليهن وگعدت ،ندستني
غاية : خلصتج
_ احسبي جم مرة مخلصتج
غاية : خايبة الله استجاب دعائي ،والله اخاصكم كل مرة تدللون
غطيت حلگي مبتسمة وركزت بحجيهن شوي واجت حواري حطت ميمنة الزغيرة بحضني
من ردت ابوسها گالت
حواري : البوسه بالالف والعضه بخمسة واكو تخفضيات اذا تردين
_ اكو دين
حواري : أي اكو اليوم هنا كله اشتغلنه بالدين ضلت عليج
ضحكت ورفعتها ابوسنها صايرة تخبل بسمنها تطي شبه لحوراء من چانت زغيرة
حوراء : شوش شوووي، بااع شووش
تطگ على رجلي تريد احاجيها ومبين غارت من ميمنة
_ هاا يا روح شوش
حواري حطت بلسانها رموش وهي للأسهل الها تگلي شوش ،گامت گعدت بحضني اطيت ميمنة لهيوفة والتهيت وي حوراء
_ هاا شبيج ،تغارين مو ؟
حوراء : ولي دادي
_ لا ليش تولي مو خطية
حوراء : اييع
_ ياا ياا شبيها ايع غير تخبل
احاجيها وهي ما مقتنعه ولطشت بحضني ما تتحرك
درت على هيوفة اسألها
_ شوكت تعارفين شبيج ؟
هيوفة : الدكتورة گالت بعد مو هسة
_ كون بنيه
هيوفة : حتى ضيرم يريد بنيه بس بعد رزق الله ما نعارف شني
_ صح
على گعدتنه وطب فقار وعون يمشي گبله بس شاف سيف ركضله ،كضاه فقار من راد يطگه
فقار : شبيك بوية ايدك والطگ ،بالعباس صاير مستهر فرد نوب
ريحانة : شبيك وياه فقار لا تعيط عليه هسة يزعل وجيب اليراضيه
حواري : تخافين لا يزعل ما تنقهرين على ابني شابع طگ منه
ريحانة : وين طاگه أصلا راد يشبكه
حواري : يعني نصدگج ونچذب عيونه
ضحكت ريحانة ودنگت شالت عون الضال يدردم
غضة : خايبات هذا شكثر يحجي صاير
نجوى : لسان چن فقار من چان بعمره
فقار : يعني انا چنت هيج
زهرة : وأكثر منه وهم يوميا جايني نوح يشكيلي منك
أبتسم وباوع ل ريحانة
فقار : بعد اخوج سويلي شي اكله
ريحانة : صار ،چنك على اكل
مشت للمطبخ وهو مشى للديوانية شوي وشفتها لحگته شايله الصينيه
غضة : خايبة حويريه ما چبتي بركة وياج ما ملت حابسه روحها
حواري : وين اجيبنها اشو هي خلگها صاير هلگدوته
غضة : يا ليش ؟
حواري : من يوم الجدي گال يعقد عليها ليث وهي حابسه روحها بالغرفة
غضة : ياا عليشش ،ما تريده ؟
حواي : أي ،تحلف تگول اعتبره أخوي وما اگدر اشوفنه غير حاله من حال اخواني
غضة : واحنه نضل ياهي النحاجيها وگالت ما اريددنه اخووي
ضحكت تباوع علي
حواري : بسمارج يدگ بالعظم جدة
غضة : والله احجي طگ بطگ بزعت اروحانه من عدچن
ريحانة : اليوم جده شادتها علينه
غضة : شمتانيه ما اشدنها اذا المتعافيه طايح بين ايدها ليوثي وما تريده شتريد بعد
عطاء : اضن تريد ابن الچسار
رفعت عوجبتها وعمة طفرت من مكانها تضحك
غضة : خايبة تعاي تعاي ،اذا ما كسرت العوجيه عليج ما اطلع بت أبوي
عطاء : شبي مخبله واجيج ،ما رايده روحي
غضة : جا لا تحجين حجي أكبر من راسج
عطاء : جاي احجي الصدگ انا
غضة : شو بطلي سوالفج ،الصدگ تحجي هي
ولان عمة دوم حجيها بالشقة محد ركز بالگالته للغروب وردينه للبيت گبل لا يردون جدي وعمي و وي ما طبيت صار بوجهنه ،دنگت وهو عبرني يريد يطلع
نوح : اروحن فدوه للمستحي
بس طلع حطيت ايدي على گلبي وغاية بصفي تضحك
غاية : فرحااانه انا ،وداعة امي فرحانه اكثر منه
_ اذا يضل هيج يحجي اموتن انا
غاية : خليه يحجي خوما تردين تسويها عليه حصار
_ لا بس والله صعبة
غاية : تستحين ؟
هزيت رأسي ب أي
غاية : بمرور الوكت تتعلمين وتصيرين صلفه وياه لا تخافين
_ يعني أنت صرتي صلفه وي عزيز ؟
غاية : نص ونص بعدني استحي بس أنتم وضعكم مختلف يعني رابين سوه وعدكم ميانه گبل
_ اممم
غاية : تعاي خلي نطب لا يحسن علينه
بس طبينه صارت بوجهنه عمة
عطاء : شحجه وياج نوح ؟
_ عمةةة، وعلي استحي احجيلج
عطاء : احسبيني غاية ،خايبة انا اموتن على سوالف الحب
_ اعارفج
عطاء : جا تحجيلي ؟
_ أي احجيلج
عطاء : شوكت ؟
_ بالليل
وبس شافتني فرشت حتى انامن اجت جرت مخدتي
عطاء : جا احنه مو اتفقنه تفرشيلي يوميا ؟
_ اختاري لو احجيلج لو افرشلج
صفنت بوجهي وانا گعدت على حيلي من گالت
عطاء : احجيلي
اجت غاية گعدت يمي ،جريت نفس حايرة منين ابدي وحجتلهن بس بالمختصر مو كلشي
عطاء : احمددك ربي ما راحت الخمسة وعشرررين
غاية : شعجب صرفتي عمة ؟
عطاء : انا بهاي السوالف اصرف
غاية : تصرفين وتقطين هم
عطاء : اكثر واحد قطيته عزيز
غاية : سولفلي
عطاء : بس بذات من ترهه بعد
نساني
غاية : جا خطية ماعده
عطاء : والله ماكو غيرج خطية ،ولج عزيز كل قضية ياخذها بذيج الحسبة
غاية : حاطه عينج على فلوس زلمتي عمة
عطاء : عابتلج أنت وياه وفلوسه ،أبو چسار مليان
_ بس ما مالي عينج
عطاء : والله ما حجيتي غير الصدگ
زهرة : غااية
غاية : هاا يمة
زهرة : تعاي بعد امج
گامت تشوف عمة شتريد ،تمددت على فراشي صافنة عيني ما تاخذ نوم ،فوگ الساعة الا ردت غاية ومبين عليها ضايجة من سألتها شبيج گالت
غاية : ليث شالع گلبي ،لشوكت يضل هيج متعوب
_ مقهوره عليه أنا ،جاي احسنه صاير انسان ثاني
غاية : هو صدگ متبدل ،احجي وياه صار ساعة ساكت ولا چن هذاك أخوي الاعرفه
_ حگه لا تلومي ،محد يعارف الجاي يحس بيه شني
تنهدت بتعب وقلة حيله
غاية : اتمنى ما يعقدون لان ساعتها احيرن بين أخوي وصاحبتي
_ انا اشوفن بركة ما راح ترضى
غاية : ما راضيه هي بس ماكو حجايه تتعده حجاية جدي
_ تلوميني من اگلج متسلط
تمددت وهستوها تريد تغفه ودگ موبايلها، اطيتهياه
_ هذااا عزوز
اخذته من ايدي وانا احجي
_ لو ضال الموبايل عطلان احسن هواي
غاية : ليش ولج ؟
_ لازم اسد اذاناتي واضلن كاتلني الفضول بس ما يصير اسمع حجيكم
ابتسمت
غاية : على هاي ،چيره ،جا واذا ما سمعتي حجينه عادي
_ لا عيني ما اريدن برائتي تخرب
ردت دگت عليه تحجي علي
غاية : لهيتيني، هسة عباله نايمة
_ جا مو صدگ رتي تنامين وراج
غاية : اسكتي
حطت الموبايل على اذنها
غاية : على جفون يمي جاي تحجي
درت مطيتها ضهري وكل ما اريد اغفه تفززني من تگله
غاية : ياا عزيزز
گعدت على حيلي وشلت المخده كفختها بيها
غاية : يااا شبيج
_ وجع بي ،اطلعي برا اريدن انام
غاية : والله ما تستحين
_ هستوج عارفتي ،يله برا يله
احجي ما مهتمه يسمعني لو لا ،ردت تحاجيه
غاية : هاي جفون الخبله تريد تنام ،خوش تصبح على خير
سدته وغمتني
غاية : مو خوش اخت أنت
اشرتلها على الساعة
_ راح يصيرلكم ساعتين تحجون ،ساعتين چان بيهن شبعت نووم
ردت شمرت مخدتي علي
غاية : انخمدي
_ خمد الخمد عدووي
تمددت وانا ضليت گاعده اباوعلها تتبسم وي روحها
_ الحمدلله
باوعتلي وغطت راسها ما مهتمتلي، بالگوه گدرت اغفه واحنه گاعدين على الريوگ گالت جدة ل نوح
غضة : بس تشوف برهان گله جدة عدها حجاية وياك
نوح : ما دام برهان يعني السالفة بيها بنات عمي كاظم
غضة : كمل اكلك وصيحلياه
نوح : صار عيني ،صار ،جفون صبيلي چاي
صبيتله چاي وحطيته گباله وابد ما رفعت راسي لان اعارف هسة كل الگاعدين مستغربين شلون رد يتقبل مني شي
غضة : محمد يمة اضن نايمين ورچلينه بالشمس احنه
محمد : غلسي يمة
بالگوة اكلت شوي وگمت ،بس طبيت للمطبخ جريت نفس ،غسلت وجهي وفزيت على صوته وراي وبس درت صار بوجهي
نوح : شبيج راح تتبخرين
_ استحيت من عمو مبين عارف
نوح : خليه يعارف
خله ايده بجيوب البجامه يحجي
بأنتصار
نوح : خلي يشوف شلون ابنه من يريد شي يحصله يعني يحصله
_ انا شي ؟
نوح : واحلى شي ،تعارفين
_ شني
نوح : يوميا اتوسل بيه يقنعج ،يگلي بيك خير أنت قنعها وانا ما اتوسلطك ،ذلني ذله خررب
ابتسمت
_ يمون عمو
نوح : اكيد
على وگفتنه وطب ليث جاي من الگيعان مبين من هدومه ،بلايه ما يحجي عبرنه
نوح : هذا متبدل كلش ،احلف عليه ناويله نيه .
_ هذاك اليوم حجتلي غاية لاگيته لام هدومه يريد يهج من الديرة
نوح : صعبه ما يلام ،ماشي اصيحن برهان
هستوه تحرك يريد يطلع ورد علي باوعتله مستغربه بس تلاشه أستغرابي من مد ايده يعدل
حجابي
نوح : انتبهي عليه بعد ،دوم گذلتج طالعة
_ بعد گلي انا اضمها
أبتسم وهز رأسه ب أي
نوح : صار
بس مشى الا گدرت اتنفس ،شوي ورد وياه برهان نشفت ايدي من الماي چنت اغسل المواعين وغاية تنضف مقسمات التنضيف بيناتنة، سلم على جدة و گعد
برهان : موديه علي جده
غضة : اريدنك تمشي تجيب بنات عمك كاظم مشتأكتلهن
برهان : صار ،شوكت ؟
غضة : هسة
برهان : تدللين
تدنت عليه تشاوره وهو أبتسم ،احس عيوني حكني من الفضول ، چان قريب عليهم وبس مشى برهان اجه وگف بصفي
نوح : گالتله جيبهن حتى تكحل عيونك بالحبيبة اعارف گلبك هسة متمني شوفتها
_ ياا فلك
نوح : صرت فتان علمودج
_ فتان حباب
نوح : حباب
_ أي
غضة : شجاي تبسبسون ؟
نوح : ماكو شي غضة سلامتج
غضة : چن درب السفن متعدل
نوح : چن هيج
غضة : اصلف منك ياحبوبة ماكو
نوح : جا خوما اتانيج تحنين علي مثل غيري ،انا بروحي اعدل الدرب
خليتهم يحجون ومشيت للمطبخ ادردم وي روحي
_ شهل احراجات هاي ،ما يرتاحون الا يخلوني اطفر
عطاء : بعد وبعد ششايفه أنت
باوعتلها طبت من برا
_ بس أنت كافي علي
عطاء : خاب جيره بگصتج فوگ ما خططت وتعبت راسي علمودج ودفعت من فلوسي بس أنت ما تستاهلين
_ بس اتوضف اطيج الخمسه وعشرين وشوفي
عطاء : واضل اتانيج منا لمن تتوضفين
_ جا امشي اخذيها من ابن اخوج احسن
عطاء : لا عيني هذا ابن محمد مايصير اخذ منه
_ حظوظ، صدگ لو گالوها
زهرة : يمة جفون
انداريت عليها
_ ها يمة
زهرة : كفي شغلج بساع خاف يجن بنات عمج
_ صار
هميت ايدي بالشغل وطلعت كنست اوراق شجرة النبگ الراح تهريها غمد
°سيوف°
جريت الشال من ايدها
_ اطينيااااه غمد
غمد : مااا، اريد اللبسه انا
_ ابطل ما اغوح والله
غمد : بطلي
_ اطلع اشكيج الامي تغه
من شفتها ما مهتمة صحت
_ يمةةة
طبت امي تخوز بينه
حنان : شبيچن ما تستحن خزيتنه ومنا ولد عمچن
_ حاجي بتج ما تطيني شالي
حنان : اطيها شالهة غمد ،مو عدج شال جديد
غمد : ماا، هذا يلوگلي خلي هي تلبس شالي
باوعتلي
حنان : اللبسي شالها بعد امج اطيها على گد عقلها
تأفأفت مستسلمه ضال بس الشال لبسته وتعطرت وطلعت جنطتي بأيدي چانوا گاعدين بالصاله لان عدنه ترميم بالديوانيه
_ السلام عليكم
انتبهوا علي ،أبتسمت من شفت علي هم جاي وي برهان
_ شعجب جاينه
علي : مشتاگ لعمي وگلت اجي اشوفه
كاظم : كل الهلا بيك عمي
برهان : كملتن ؟
_ أي بس تجي غمد
برهان : جا ماشي اشغل السيارة
بس طلع رديت صحتها
_ يله فضيها عاد زحمة أخغناهم
غمد : عمن حاطه عينج على الشال ما جاي يصير حلو
_ حطي شلون ما چان وأمشي
سوته بساع وشالت جنطتها وطلعنه ،صعدنه انا وياها ليوره دگ هورن لعلي حتى يصعد وبس صعد رفع ايده يودع أبوي
برهان : مع السلامه عمي
كاظم : الله وياكم
الدرب كله علي وغمد يحجون ،بالي يمهم بس ضاله اباوع من الجامه، درت اريد احجي وياهم واجت عيني على المرايه ،عيني صارت بعينه بساع دنگ يباوع للدرب ،عضيت شفتي افكر هاي مو اول مرة انتبهله يباوعلي
علي : سيووف حاجي اختج اشتغل عدها انه تگلي بس توصل حوشلي نبگ
_ أنت وغطت غوحك اكلها
علي : على عناد سيوف الا اجيبلج شتلات نزرعهن يم الشجره باجر
غمد : هم زامطت ذيج المره وما جبتلي، ما اصدگ بيك بعد
علي : جا مو اندعم نوح والتهينه
غمد : قصدك تفلش
ضحك وهي أبتسمت تباوع للدرب ،هدوء صار بس سكتوا وبس وصلنه تلگتنه غاية
غاية : بذاتات ما تجن اذا مو جدة تودي عليچن
غمد : انا بعد فلا تشوفوني هاي أخير مرة ،اريدن اجيب معدل عالي هل سنة
غاية : لو طالعة العام مو احسن
غمد : رچليج بماي بارد عمن معدلج عالي
غاية : حطت عينها علي
ضحكن يتداهرن وانا طبيت گبلهن من صاحتني عمة زهرة ،سلمت عليها
_ جا وين عمة عطاء هل مغه ما تلگتنه
زهرة : بالحمام ،طبي جدتج متانينچن
_ بعد غوحي مشتاگتلها
زهرة : وهي هم مشتاگتلچن
بس شافتني رحبت بي مثل كل مرة
غضة : يمة هلا ،هلا بالجايات لديرتهن
ابتسمت ومشيت بوستها
_ شلونج جدة
غضة : بخير يابعد حبوبتج
_ عساج دوم أن شاء الله
غضة : اغديله فدوة اللسان الينگط عسل
_ اسم الله عليج
غضة : جا وين اخيتج
_ بغه يم غاية
طبن ثنيناتهن ،سلمت على جدة وضلت تتلفت
غمد : جا وين جفون ؟
غاية : فوگ تنضف تسبح لان عمة عمة بهذا الحمام
شوي ونزلت الخاولي على رأسها ، سلمت علينه وضلت تتداهر وي سيوف ومن اندگ باب المطبخ طبت تركض
علي : وينكم يا اهل الدااار
غضة : تعال حبوبة
طب بايده سله نبگ زغيره حطاها گبال غمد وعدل وگفته مبتسم وهي تتشكر منه
غمد : والله خوش ابن عم أنت
علي : اعارف
كامت غسلت النبگ وردت گعدت بصفي گتلها اطيني طگتني على ايدي
غمد : ما اطي هذيج الشجره وأمشي جيبي منها .
_ شگد نحسه
ولا جنها تسمعني ضلت تاكل وتباوع على علي وجدة يحجون
_ عيونج الخفيفة
تدنت علي
غمد : احس راح احبه
خزرتها
_ طاح حظ احساسج
غمد : ينحب ابن الدولة
_ اذا ما احجي الامي اخليها تطيح حظج
غمد : لا تصيرين گراشه
_ شوفي شوفي انا الج غمد
اخذت سله النبگ ومشت للغرفة يم جفون ،ضليت شوي ولحگتهن بس شافني طبيت سكتن
_ شجاي تحجن ؟
جفون : هيج
غمد : مانحجي
_ چذابات
طبت عمة تنشف بشعرها بس شافتنه أبتسمت
عطاء : هسة صار دورج
_ شنو ؟
عطاء : اقصد شلونج
_ الحمدلله بخيغ
عطاء : وأنت غميده ما تگومين تسلمين على عمتج
غمد : جاي اكل عمة عود من اكمل
عطاء : جيره أم بطن
اخذت المشط من جفون تمشط وتحجي
عطاء : امچن شلونها
غمد : زينة وصتني اسلم عليج
عطاء : الله يسلمها
نزعت صايتي علگتها بالتعلاگه
عطاء : فلك الصاب الخصر يشگ شگ
ابتسمت
_ علي
عطاء : جا على منو ،چن محبس وعلي
غمد : وانا عمة هم عدي خصر
عطاء : بس خصر سيوف اقوى
ضليت ساكته حايره شأحجي ،وهي من انتبهت علي ضحكت
عطاء : هم صارن خديداتها حمرر
غمد : تخجل عشتوااا
عطاء : ولجن شو انتن فرق من السما للگاع
غمد : والله ياعمة انا احبن لساني
عطاء : اطول منج
ضلن يتداهرن والحلو عمة ابد ما تتحسس شگد ما يشتاقن وياها واذا داسن ايدها والكفخه ،طلعت من صاحتني جدة
_ هاا جدة صحتيني
غضة : تعاي بعد چدتج اگعدي يمي
شميت گعدت بصفها
غضة : ابوج شلونه
_ الحمدلله زين
غضة : واخيج
_ ملتهي بشغلة
غضة : جا حتى لو ما يعارف يفرغ روحه ساعة زمان يمر على جدته
_ ما اعغف
غضة : تعارفين، احجي ليش ما يجي اخوج
_ زعلان لان جدي ما استقبل أبوي بديغته ويگول ما ادوسن القغيه گبل أبوي
غضة : الحل عدي ،اذا ما حطيت جدج گبال الامر الواقع شوفي
_ شتسوين جده ؟
غضة : الج الصافي
ما لحيت عليها لان لو تريد چان حجت ورا ما تغدينه گالت عمة
عطاء : اريدن امشي لبيت يوسف تجن وياي ما دام يوسف طالع
غمد : من گد الحب ما تردين تشوفيه
عطاء : مو ما احبه انا بس هو ما ينجرع ،تجين ويانه غاية ؟
غاية : بس اشوف امي ترضى و لا
مشت شألت عمة ما گالت شي تحظرنه ومشينا انا وعمة والبنات وبس طبينه گبالنه صاروا جهال عبد الحق يلعبون وي
الدجاج ،ركضتلهم جفون وهم من شافوها لزگوا بيها الا تشيلهم حارت وياهم أخير شي كضت كل واحد من ايد وطبت ويانه
عطاء : وينكم يا اهل الدااار
طلعت بركة من غرفتها وبس شافتنه أبتسمت واجت تسلم علينه ،وحورية نزلت من فوگ تركض
حواري : ياهلا ياهلا بالجاينه
سلمت علينه وجرتها عمة ترزل بيها شلون مخليه الجهال وحدهم
حواري : چنت اباوعلهم من الشباج حتى صحت عليچن وما شفتني
عطاء : لا تعيديها بعد
حواري : والله لوما عمتي
رفعت ايدها تريد تطگ حواري
عطاء : شتسويلي ولج
حواري : ما اخافن عمة لا تحاولين
طگتها على راسها وطبت ،ضلينه عدهم للغروب
_ عمة ما نغد
عطاء : هسة ،اگلج بركة اخوانج وين ؟
بركة : طالعين جعفر وي ليث وبرهان ما يگول وين من يمشي
عطاء : على طاري ليث ،شني شعجب تأجلت خطبتكم ؟
بركة : يا خطبه هاي عمة ،انا ما راضية سادس ويني وين العرس
عطاء : هم برهان گال بس جدج گاله تعرسون ورا السادس
بركة : الله كريم
_ يعني صدگ ليث يغيدج ؟
بركة : لا بس جدي قرر
_ جا حتى الزواج قرار هنا ؟
بركة : شعبالج
عطاء : شو انگلبت البت
بركة : شمتانيه ما انگلب عمة اذا ياهو احجي وياه يطيني اذن الطرشة ويگلي جدج قرر
عطاء : احسن، عمنج ما تعارفين بصلحتج وين
بركة : غلطانه انا اكثر وحده اعارف مصلحتي واعارف لو رضيت شگد راح اتأذه
°بركة°
سكتت من اشرتلي حواري ما ترديني احجي گدام البنات واعارف قصدها خاف يحجن گدام امهن ،بالگوه على روحي سكتت وانا احس راسي يريد ينفجر مجرد ما افكر بالموضوع
ضلن شوي بعد وردن ،وبس مشن طبيت للغرفة حالفه لا اطلع منها ولا حتى اداوم، يمي ميمنة اللعب بيها طبت حواري
رفعت راسي اباوعلها وگفت عد الباي
حواري : شني تگولين گدام البنات ما راح تداومين ؟
_ ما اريدن
سدت الباب واجت گعدت يمي
حواري : شايفة اذا ما داومتي صدگ يخلوكم تعقدون هسة
_ خرب هل عيشة ،كلشي ما بايدنه مايصير هيج
حواري : بعد هاي هي شنسوي
_ رچلج وين ؟
حواري : فوگ
_ اريدن احاجيه
حواري : شني ؟
شلت ميمنة وگمت
_ امشي وتعارفين
طلعت گبلها بس خليتها تطب لغرفتهم گبلي گالتله بركة تريد تحاجيك وبس صاح باسمي طبيت ،وگف على حيله
عبد الحق : شكو ؟
_ احجي وياك اريدن واعتبره طلب
عبد الحق : عيوني الاثنين الج ،گولي
اطيت ميمنة لحواري ومن حجيت صفن علي حاير بين ينفذ طلبي وبين يكسر كلام جدي
_ العقد ما اريدنه هسة ،خلوه ورا دورة سنة اختي
عبد الحق : وجدي ؟
_ حاجوه ،انا ما اعقد واختي سنتها بعدها ما طالعة
بين التردد وتلبيه طلبي گال
عبد الحق : هاي هي يجرالج
ابتسمت بوجهه وتشكرت منه وطلعت ،رغم السويته بس ما احسن روحي ارتاحيت ،لايبه ما اعارف شبي و وي روحي صفنتلها احسب الوكت بعد وبقلة حيله
رددت
"اول وتالي طاح الفاس بالرأس وحتى التأجيل بعد ما يفيد "
طلعت بالحوش شارده حتى من البيت ،كل مكان يخنگني اكثر من الثاني ،صدت عيني على السياج المره طفر منه وشافتنه ميمنة ،بدون ما احس زارتني طفيف ابتسامه حسيت بتذكاره حرك شي بداخلي
جعفر : بركة
وگفت على حيلي
_ هاا
جعفر : شعدج گاعده هنا ؟
_ ضايجة
وگف گبالي
جعفر : باجر ليث يمشي يسجل البنات بخط اسجلج وياهن ؟
بهل لحظه مثل الصده صار بأذني يگلي
"ارضي حتى تشوفيه"
هزيت رأسي ب أي
جعفر : جا خوش راح اگله يسجلج وياهن
بس طلع طبيت انا ما اعارف بروحي شتريد
فتر بالبيت مثل الضايع
مشيت للغرفة وگعدت وي روحي احجي
_ جا مو حلفت ما اداوم ،ومو گلت حتى من الغرفة بعد ما اطلع ،شجايني انا
يومين وداومنه ،بس ردت اشوفن بت عمه ماكو ما چانت موجوده
جفون : شبيج تتلفتين ؟
_ انا ؟
جفون : جا انا ،عيونج طاحن شتدورين ؟
_ اگلج بس اخافن لا تفكرين غير تفكير
جفون : تدورين على هند مو ؟
_ أي
جفون : شني نسيتي هي العام سادس وياج داومت وأنت گعدتي
بهتت وبلعت ريگي مثل شخص خسر اخر خيوط الامل
_ يعني ؟
جفون : تدرين
_ شني ؟
جفون : مبين عليج تحبين ابن الچسار حتى بلايه ما تحجين
هزيت راسي ب لا انفي الجاي تگوله
_ لا ماكو هيج حجي
جفون : شلون ماكو ،واضحه وضوح الشمس، اخوي وأنت أكبر غلط تنجمعون
_ جا حاجي جدج وگليله بركة ما تريد ليث
جفون : انا احاجيه ،ولج الكبار ما وگفوا بوجهه اجي انا اوگف بوجهه لا عيني شني ما رايده روحي وهو منا شلون يحبني
_ جا احجي وي اخوج
جفون : مثلج ضايع وما بيده شي ،حتى غاية حايرة وياه
_ جا شلون ؟
جفون : اخوانج ما راح يجبروج
ابتسمت
_ ياهو الاحجيله يگلي جدج قرر ومثل ليث ما تلگين الوحيد جعفر وياي وكلهم ضده
سكتت حايرة ومشينه كلمن لصفها من دگ الچرس ثاني يوم داومت حواري ،مر اسبوع وانا واهسي بده يطفه
اسبوع ما شفته ولا شفت احد يخصه ،وبيوم چنت بس انا وجفون مداومات حواري الصبح گلبت وگالت ما تمشي
نزلت من الخط مأيسه حتى رأسي ما رفعته ،گبالي تمشي جفون ما اعارف شلون رفعت رأسي حتى اصيحنها واجت
عيني بعينه ،بهل لحظة حسيت راح اطيحن من طولي ،سندت روحي على الحايط اباوعله ساند ضهره على سيارته ويباوعلي ،لا أنا الگدرت اديرن عيوني ولا هو ،طبيت بساع خطواتي اشبه بالركض من شفته جايني
هفيت على وجهي من اجت علي
جفون : وين صرتي ادور عليج
_ هوسة مو شفتي بالگوه گدرت اطبن
جفون : يله جا بساع دگ الچرس
عدلت جنطتي ومشيت لصفي، اريدن اركز بشرح المعلمه ما گدرت وما صدگت اردن للبيت واختلي بروحي
تلگوني من الباب سيف وحوراء تعلموا اشتريلهم وياي ،دنگت فتحت جنطتي اطيتهم حلوياتهم وطبيت ايدي بأيدهم ،لليل وتذكرت انا هم جايبة حلويات وياي العون ،مشيت گلت الأمي اوديهن
اله
شگد چانت ما ترضى اطلع اذا مو هي وياي بس من گتلها هيج ما عارضت
شيماء : خوش امشي بس مو تتخارين حتى تنامين وراج دوام
_ صار
اخذت سيف وحوراء وياي وطلعت كل واحد من ايد كاضتهم وسيف بأيده الثانية كاض حلويات عون و وي طلعتي درت على صوت شخطه سياره تطلع من القرية وراها ضلت بس الترابه
°كوكبة°
اردد بأسم مرتضى بصوت مفجوع، بجسم يرچف اريدن بس اضلن واگفه وسانده روحي ،ما گدرت من واحد منهم بنبرة تلعب الروح من دنائتها گال وهو يتقرب علي
_ لك لك شووف شلون حاضيله بوحده چن دنگه
طحت من طولي اعيط بهستريا من عارفتهم هذولي منو
_ مرتضى الحگليييي ،مرتضى وينك ،يمةةةةة
دنگ كاض فچي بقوه يردني ما اصيح ،وجهه بوجهي وريحه انفاسه تلعب الروح
_ لا تصيحيه ولا تحاولين ،نايم ما يگعد ،يعني
ضحك ورا ما گال كلمة ال"يعني" جرت دموعي بضعف وقلة حيله
_ شتردون مني ؟
_ يعني شنريد ،احزري أنت
تقدم الوراه، اصوات بشعه يصدرن بسبب حركات يسويهن بحلگه ،وگف ورا هذا المندگ گبالي
_ نلعب وياج دعابل ،والخسران يسهر للصبح على الچرباية
ضحكوا ثنيناتهم وانا ما مفتهمه من حجيهم شي الموت تمنيته من كضني من خاصرتي ومن عزت نفسي تفلت بوجهه وطفرت من مكاني ادولي شي احمي بيه روحي وما صار گبالي غير ترمز ماي كرار
شلته احمي روحي بيه وهم مثل الثيران هاجوا علي يتمنوني بس اطيحن بأيدهم
_ والله والله اليتقرربلي امووووته
_ انعل الجابببج، اذا ما بچيتج دم خررب اهلي
اتلفت بس اريدن افلت منهم بس برمشه عين كضني واحد ،صيحت اريدن اخلص روحي من ايده، بس ما گدرت انا مو بذيج القوه
_ اذا ما اندمج على التفله التفلتيها بوجهي شووفي
_ شترريد، شتردون مني ،ماعدكم عررض ،ما تخافون الله
احجي وابجي وهم يردون علي بأستهزاء
_ ما عدي خوات
_ وانا عرضي مسيبه بالشارع
غمضت عيوني ورديت فتحتهن ،ورفعت الترمز حطيته براس هذا الكاضني وركضت اشرد بروحي و وراي الثاني يركض ،بس طلعت من المطبخ جريت الباب اقفله بس منعني ،بقوة ما اعرف منين اجتني جريت الباب بكل حيلي وسرگيته من برا وخليتهم جوا ،بچيت بتعب ما مصدگه
راح افلت بروحي ،چنت شاره هدوم لگيتلي شال
من
بيناتهن سحبتن وطلعت وبرچلي شحاطه مرتضى حايرة وين امشي ويا مكان اروحله يحميني من المصايب الأنا بيها ...؟؟
رچليه ماخذتني ليا درب ما اعرف ،بس كل الاعرفه الشارع أامن الي من بيت فاقده بيه الامان ،اكثر من نص ساعة امشي ،ترددت اكمل دربي من صارت گبالي دورية و وراها اضوية السيطرة صارت بعيني
ضليت حايرة بين اكمل وبين لا ،مشيت وانا احاول افكرلي بچذبة تخلصني منهم، وبس انتبه علي واحد منهم خله جماعته الواگفين يسولفون وجاني
بلعت ريگي اكثر من مره ماريد ابين
ارتباكي گدامهم ،وبين اريد احجي وبين لا ركزت وياه حايره من سألني
_ شعدج خوية طالعة بهل ليل ؟
_ هااا
_ جاي اسألج ،شعدج طالعة بهل ليل ؟
من شافني ضليت صافنه اندار يصيح على واحد چان يباوعلنه من بعيد قم
_ سيدي تعال شوف هاي البت
شمر الچگارة وباوع لواحد بصفه
_ امشي أبو درع شوف شكو
أبو درع : ما تمشي أنت لو كلشي ابو درع
_ نمو عليك
أبو درع : خرا على هيج ميانه
_ ما تحترم صاير كلش ،صوجي انا مطيك على مايك
أبو درع : اليسمعك يصدگ ،خاااب دمشي الا انعل سلف سلفاهم اذا خلوني وياك ...
بعده يحجي ودفره مني حسيت ضلوعي تفلشن
أبو درع : احترگ جدددك
يحجي بحرگان گلب وهذاك خلاه واجه ومن صار قريب علي حسيت الزمن وگف عدي نسيت حتى شلون ارمش ضليت فاكه عيوني وحلگي بصدمه
بأستغراب من حالي گال
_ هاي شبيها ؟
رد عليه الچندي الچان يحجي وياي
_ والله ما ادري سيدي
تقدم وگف گبالي واول سؤال سألنياه
_ شسمج
_ اسمي
_ جا اسمي ،بيج شي أنت ؟
_ مابي شي بس خلوني اردن
_ بس مو گبل لا نعارف سالفتج شني
_ ماعدي سالفة
_ مشيها على أبو درع موش علي
أبو درع : هم حط ابو نعال بالنص
اندار عليه
_ دوگفلي حسابك بعدين أنت وهذاك العاشگ
أبو درع : چا أنت ما عاشگ
اليتسمه أبو درع يحاجيه بشقه وهذا الواگف گبالي روحه بخشمه شمر عليه العصه البيده
_ خليني محترمك گدام الوادم لا اسويك عبره اليوم
أبو درع : دشوف شغلك عيني
خزره واندار علي وگبل لا يحجي سألته وخليت علامات الاستغراب كلهن ينرسمن على ملامحه الجامده الخاليه من التعابير بكل مره اتذكر شفته
بيها
_ أنت مو صخر ،حفيد أل غضب ؟
عاگد حاجبه ضل يباوع بوجهي وصاحبه بس سمعني هيج حجيت اجه وگف وراه
أبو درع : شمعرفج بيه أنت ؟
_ اعرفه ،اعرف عائلته كلهم انا .
أبو درع : هااا
صخر : شسمج أنت ؟
ترددت هواي گبل لا اگله
_ كوكبه
ومجرد ما نطقت اسمي فز
أبو درع : لك لك هي هااااي
اندار عليه
صخر : شبيك ؟
أبو درع : كوكبه اليحبها أخوك
جحض عيونه ورد يسألني
صخر : أنت ،بت ضاري ؟
هزيت رأسي ب أي ،تهضمني كلمه بت ضاري ،الانسان الابد ما صارلي سند
صخر : رجلج وياج ؟
وبلايه ما اعرف شني عواقب جوابي ،گلتله وانا اجهل الراح يصير
_ أي
اندار على صاحبه بحزم يحجي وهو يلبس بيريته
صخر : صار وكت يتحاسب
أبو درع : اجي وياك
صخر : لا ضل هنا ،ملازم اول كريم
اجه واحد اخذله تحيه
_ نعم سيدي
صخر : أنت ويونس وياي تجون
_ صار سيدي
ما افتهمت شي من خبصتهم ولا عرفت وين ماشين الا بعدما گال
صخر : وياي تجين
_ وين
صخر : ناخذ حگج وحگنه من زلمتج
_ هاا
ما اطاني مجال استوعب ،كلشي احس تراكم على راسي ،شوي وطبگ سيارته واشرلي اصعد ،بلايه ما اناقشه
صعدت وعلى وصفي صرنه گبال جحيم حياتي البيت الاسود، بس نزلت طب هو وانا وراه والباقين ورانه ،بلعت ريگي من شفت الباب مقفول بعده يعني ما طالعين وبعدهم هنا ،دنگ فتح السرگي
صخر : طبي
طبيت وهو وراي ،ما خايفة غير بس من نضرتهم الي من راح يشونهم هنا ،اخافن لا يضلموني بضنهم ،وگفت بمكاني ومن عبروني صحت بأسمه متوتره شلون راح احجيله
_ صخر
صحت وختلت وراه من شفتهم چفتوا علينه للمطبخ و واحد منهم صاح بنبره صوت مستفزه
_ شوووف لك شوووف جايبتلنه الرتب وجاية
صخر : شعددكم هنااا ولد الكلب
_ جايين علمود هاي الحلوة وراك ،يوميا يسيرون عليها ثنين يتونسون وياها وأليوم دورنه
نشغت وصحت من هجم عليه صخر
_ چذاب والله، والله چذاب ،شررردت منهم انا والله
رديت ضهري على الحايط ارچف ولهناك وطب مرتضى وصخر گبل لا يمشيله تفل بوجه ذولي الثنين الصاروا بأيده دمايه
صخر : عارااات
كف درانات بدلته العسكريه ،ومرتضى بس شافه مثل الصنم صار بمكانه
صخر : العار شارد وچماله مشتغل گو** ،وحاط گرون ستيل
ما خلاه يستوعب گبل لا يهجم عليه ،ما رف گلبي على مرتضى ولو ذره، واحس كل هذا الضرب ما راح يشفي غليلي بيه
صخر : انعل سااااس الچابك النگس يا ابن النگس
طگاه كله خله مرتضى يطيح من طوله ،اندار علي
صخر : والتانه سنين هاي چزاته ؟
هزيت رأسي ب لا دموعي تطيح اريدن ابرر اله بس ما اطاني مجال
صخر : شيلووه
حطوا الكلبچات بأيد مرتضى وگوموه رغم مقاومته بس ما گدرلهم چانوا متگابلين عليه ثنين أشرلي امشي وياه
ما حاجيته ومشيت للغرفة كل ضنه اردين اشرد بس بالحقيقة انا أجيت حتى اللبس عباتي خوما امشي هيج ، وي ما طلعت من الغرفة لاگاني انتبه علي لابسه عباة ،ما حجه وانا مشيت وراه من اطاني ضهره ،الدرب طويل وهو گاضيها بس چگاير احس روحي اختنگت وهستوني غمضت عيوني وفززني صوته من گال
صخر : حصلت مكان مرتضى وحرمته وياي هسة ...
شكرا لزيارتكم عالم روايات سكيرهوم
