رواية خلخال مشوه الفصل الخامس والخمسون 55 بقلم زمرده

كبالچ أرتبك ما گلج شلونچ

و لأن حلوات أضل صافن على عيونچ

سوده بلا گحل يبينن من بعيد

وعلى هذه الجمال نگول خيعونچ .

°نسمات°

أم علاء : يمةةة شبيه ابنييي ،حاجوووني يمةةة علاء

تعت بالباب تريد بس احد يفتحه وهو مبين مقفول من برا ،الچيلات تخطف من فوگانه الرمي الچاي يصير موش هين وشه براسي صارت رديت ضهري

على الحايط كاضه راسي احس الگاع تفتر بي بس رديت بساع عيني على الباب من فتحه رچل

زينة صاح عيونه بگصته وشوفته بهل حال ما خلتي اتوقع خير ابد

_ شكووو المنن طالعاااات

كضته من ايده تسأل وعيونها للشارع

أم علاء : اخوك، شبيه علاء ،حاجيني يمة

رده چان مال واحد بزعانه روحه

_ ياريت بيه شي ولا هل بلوه الطيحها على روسنه

أم علاء : خايب بلوتيش حاجينييي لا تمشي

يصيحون عليه يسد الباب يتلفتت عليهم مخبوص من رد الرمي بالجو، وخر ايد امه ومشى بساع يريد يطلع وهي وراح تصيح ،جمد الدم بعروگي

من سمعت صوت هبدة على الگاع وانداريت وشفتها طايحة ،صحت مفوجعة وما مصدگة الجاي تشوفه عيني

_ زينةةةة

ركضتلها ،ترجف ايدي اريدن بس ارفع رأسها ما اگدر وخرني وجرها لحضنه

_ زينةةة، ابوية أنت ،زينةةة شبيج

نشغت أاشرله

_ چتفها چتفهااا

گلبها يشوف چتفها چان ينزف بشكل مرعب ،شالها وطلع يركض بنص الهوسة ما يشوف بعيونه غير حالها ،گعدت عد باب الشارع واليطب

واليطلع

يعثر بي وچان المفروض بالي عد علاء بس ما أتذكر فكرت بغير انسانة صارتلي بمثابة ام وهي مو أكبر مني بهواي ،زاد الصياح والخبصة بعد الصار بزينة والحگ صارلهم بس على شني بداية السالفة كلها ما نعرف

_ يمةةة زينة ،بنيتييي اخذونييي الهااا ،ولك هاااشم يمةةة

اجاها هاشم يركض من رادت تطلع بنص الوادم دفعها وطب ساد الباب

_ وين يمةةة ،شبيييج شلون هيج تطلعين

أم زينة : بيااا حال انا ،اختك ولك اختتتك تصوبت

جر نفس طويل ودنگ باوعلي من رد يتحرك وطخت رچله بي ،باوعلي بنضره چن شافها

بهاي گعدتي ونضرته فسرتها " شحالج لو خسرتيها"

غورگت عيوني من جديد غطيت وجهي بچفوف ايدي ابجي من كل خاطر خايفة ما عوزي خسارات اكثر ،فوگ النص ساعة على هاي گعدتي گبالي

بت عمي اخت زينة شايلة ابنها وتفتر بيه تسكته وهو خبض الدنيا يريد امه وخاف اكثر من طبوا عمامي والولد ،گمت اخذته من خالته وبساع سكت عدي ضليت اسكت بيه ولساني ما سكت من الدعاء الها

أبو علاء : ياااابة وروح أبوي چبير أل خبير الا اندمهم على سوايتهم هااااي

أبو زينة : كله من ابنك ،لو صاااار شي لزينه الا اكتله وادفنه گبالك

رفع ايده يصيح

أبو علاء : شبيييك

أبو زينة : صوووتك لا احط ضيم الصار كله بيك

أبو علاء : شووو تهددد

أبو زينة : وانفذذذ وتعرفني شنيي

أبو علاء : على روحك

اشتد الحديث اكثر بيناتهم واحد يصيح على الثاني شوي وبعد توصل للطگ ،تدخلوا الولد بيناتهم وعمي ابو زينة وگف يتوعد

أبو زينة : والله ،ابنك اذا رد وشفته احسبني چتاله گبل الوادم الدنس عرضهم

صفنت على اخر كلمتين، شني قصده عمي ،سالفة بيها عرض ، شمسوي علاء هل مره ...! !

أبو علاء : يتبلووون عليه، صدگتهم أنت ،انا ابني ما يسوي هيج

أبو زينة : نبيي ابنك ،نبيييي ،شوووف مشتاق اذا يطلع صدگ مسويها بأيدي اسلمه الهم وتعارف مني هم بيت الشيويچر واليندگ بيهم شيسووله

أبو علاء : فد مندله ،هم زلم واحنه زلم و وين ما توصل وياهم خلها توصل

أبو زينة : وانا اضحي بكوم الزلام هاي علمود ابنك المستهتررر

أبو علاء : خله يجي ونشوف حجيهم صدگ لو چذب

أبو زينة : گالو للحرامي أحلف

ضحك مستهزء

أبو زينة : اصدگ بأبنك تريدني

أبو علاء : شجاااك، ابن اخوك موش غريب شدعواك وياه شادها فرد نوب

أبو زينة : خررره بيه وخره بأبوه الما عرف يربيه

أول مرة اشوفن عمي ابو زينة هيج كل مرة يطمطم لعلاء بس مبين هل

مرة الصار لزينة خلاه يشوف الغلط بعين اوسع من گبل ،صاح على

الولد يتانوه يمشي وياهم للمستشفى وگد ما صوته عالي وصلنه لهناه

أبو علاء : انعل خيررركم ولد الچلاب

طب جوه يعارك الحياطين الصايره بدربه ،درت على تنسيم اخت زينة

_ شصاير شو كلشي ما افتهمنه

باوعت علي بنضره بيها تگلي ،"تغشمين روحج"

تنسيم : رجلج العينتين مسويله سالفه مبينه ذيج هي

بدون ما انتبه على روحي گلتلها مشمئزه من طاريه

_ لا تگولين رچلج

أم علاء : وليششش ما تگول رچلج عييني ،ما عاجبج لو شني

ما ادري شلون سمعتني وهي چانت ملتهيه تنوح على ابنها الي لهسه ما معروف سالفته، ما جاملتها بجاوبي ولا خفت للراح يصير لو حجيت الحقيقة

_ ما عاجبني ولا راح يعجبتي ابنج انفرض فرض علي ولو يضل عمري يوم ما راح اعترف بيه رجال

مثل الچانت متانيه حجاية مني ،نشغت ورفعت اديها تصيح

أم علاء : خاااايبن ماكووو بصلافتهااا، ولكم فوگ ما سترنه عليهااا

انا منا گلبي مورم وهي حجتني بعد، صفنتها من گلت

_ مو انا الينستر علي ،انا الستررر واسألي ابنج ابو الحبوب

أم علاء : يااا ياااا دهر الدهرررج ،اذا ما خليته يادبج ويگص هذا لسانج الطووويل ويشمره للچلاب ما اطلع بت ابوووي

فريت ايدي

_ دخل يأدب روحه بالاول

بلمح البصر ركضتلي جرت ابن زينة من ايدي اطته لتنسيم وعتتني من حجابي تريد تطگني

أم علاء : بت ناااهده الناااهبه انا الج ،اذا ما اطلع حليبها النگس من خشمممج

تطگ بي وتصيح چن أنا الچاي اطگنها مو هي راح تخلص علي بين ايدها ،ولا وحده خلصتني منها ومن بعيد يصيحن حتى انصي حسنه ،دفعتها كل قوتي وجريت

روحي من ايدها اجرن النفس بالگوات واعدل شعري التهلس بين ايدها

رفعت ايدي مصدومه اباوع لكوم الشعر الاجه بيها عيني حطيتها بعينها خازرتها بقوه

أم علاء : عيوونج لا تحطيهن بعيوني لا افگسهن الج

_ فگسيهن منو كاضج

ردي البارد عليها خلاها تصفن ،كملت احلف

_ وحگ الما ضل عدها عقل بسببكم هسة هنا انسه أنت أكبر مني واسوي سوايه لخلي الوادم كلها تحجي بيها

أم علاء : يااا يااا تسمعننن الجاي اسمعه ،خايبااات تريد تطگني بت ناااهده تريد تطگني

جاوبتها اكثر وحده من نسوان عمي مسمومه بس مو بگد سم أم الما رد أن شاء الله

_ جا گلتيها بت ناهده شتترچين منها بعد .

درت عيوني من وحده للثانية بشك اسأل اريدن اوصل لجواب لهذا الكره كله

_ شني مسويته الچن ناهده وهيج تكرهنها ؟

اباوع لعمتي أم علاء بلعت ريگها والثانية الي هي اختها ضلت تمتمت ،بنص تركيزي وياهن وطب اخو زينة الزغير يركض امه كضته تسأل وهو مخبص يريدها بس تهده

أم زينة : بس حاجينيي شبيها اختك مو چنت هناك بالمستشفى ليش رديت

جر روحه بالگوات من ايدها

_ فلوس أبوي خابرني يريد فلوس

صاحتها من مشى

أم زينة : اوگف

مدت ايدها بجيب دشداشتها واطته اكثر مفاتيح اعارفهن شني ،هذن مفاتيح خزنه عمي شيخ أل خبير نفسه أبو زينة

أم زينة : اخذ واقفلها ومو تنسى تردهن الي لان ابوك ما اخلص من لسانه لو ضلت مفتوحه

گاللها

_ خوش

ومشى ،مسحت وجهي اعدل بروحي حتى اخذ ابن زينه الخبص الدنيا بالبجي

فلا چن بأيد خالته ،بس اخذته سكت ،طبيت جوا شايلته وافتر وكل

بالي عد زينة ،بس طبت صحتها

_ تنسيم شبيج خابري على رضا بلكت يرد عليج والله راح اموتن من الخوف

تنسيم : هو طبيت حتى اجيبن موبايلي

_ بساع فدوة

هزت رأسها ب أي ومشت للغرفة شوي وطلعت بايدها الموبايل

تنسيم : ماكو حتى ابوي خابرته مابيهم احد يجاوب

تأفأفت الومن بيهم على هل قلق الجاي يعيشونياه

_ يعني والله مايصير هيج ما يگولن اكو نسوان ضلن بالبيت نحجي وياهن نريح بالهن

گعدت على الدرج ايدها على خدها صافنه وانا گبالها افتر ،فززنه انا وياها صوت الموبايل بساع جاوبت

تنسيم : هاا رضا بشرني زينة شلونها

جرت نفس حاطه ايدها على گلبها وتردد

تنسيم : الحمدلله ،الف الحمدلله ،زين وهسة طلعت خوش فدوة أي شي يصير خابرني

بس سدته گلتلها

_ هااا شلونها ؟

تنسيم : مسويلها عملية وهسة طلعوها

_ يعنيي عدت سلامات

تنسيم : أن شاء الله

مسحت عيوني وتنهدت تنهيده واحد چان عايش بقلق وشعور الخوف محاوطه وفجأه طغى

على كلشي شعور الامان مثل ما جاي احس انا هسه

نزلت يحيى من ايدي حتى يلعب وي الجهال من شفته صار زين توضيت وصعدت اريدن اصلي صلاة الشكر على

طلعتها من العملية بالسلامة ،بس وگفت بمكاني من سمعت صوت ،بلعت ريگي

متذكرتها ومشيت بساع للغرفة بس فتحتها طبيت مفزع من شفتها گاعده ولامه روحها وذيج هي مبين عليها الخوف ...

دنگت گبالها وخرت اديها الحاطتهن على رأسها

_ يمة

رفعت رأسها وبس شافتني حضنتني حسيت برچفتها وخوفها وهي تحجيلي

ناهده : رمي ،طبن للغرفة طبن، من الشباك

_ شنوو

وخرت تأشرلي بأيدها، گمت من انتبهت للگزاز المتشطر بالگاع ،جريت البرده اباوع للشباك ،الچام مال طلاقه

وحده مفطر تفطر، دنگت للگاع من حسيت دست على شي ،رفعتها اباوع بيها "چيله"، لو جايه بأمي چان خسرت خسرت اليوم وما عدت على خير

ناهده : خفت

حطيت الچيله من ايدي على الكومدي الزغير يم الشباك ومشتيلها

_ صيحيني بعد من تخافين

ناهده : صحتج وما اجيتي

_ زينة اتصوبت

نشغت موسعه عيونها وكضت ايدي ومثل ما انا احبن زينه هي هم تحبها

ناهده : ماتت زينة ماتتتت

_ لا لا ما ماتت

ردت ضهرها على الحايط تباوع علي ،گمت وگبل لا امشي گتلها

_ راح اصلي واردن

ما حاوبتني واكتفت بهزة راسها، سديت الباب عليها ومشيت لغرفتي، فرشت مصلايتي ولبست الچادر وهستوني بديت اصلي وانفتح الباب ،كملت صلاتي وما گطعتها وبس شافني رفعت رأسي من أخر ركعه گال

علاء : بالصدگ بالچذب ما سألتي علي كل همج زينة

كبرت وباوعتله

_ اممم

علاء : لشوكت تضلين هيج ؟

_ شمسوي من مصيبة ؟

علاء : كلشي ما مسوي .

_ أي راح اصدگ

گمت نزعت الچادر ولميت المصلاية وفزيت من تقرب حاضني من ضهري ،درت عليه خازرته وهو مبتسم

_ وخر ايدك

علاء : واذا ما وخرتها ؟

_ علااااء

علاء : هااا عيونه

_ عساهن بالفگس

كضني من فچي بقوة ضاغط على سنونه ،غورگت عيوني من الوجه وجهه بوجهي بحده وتحدي يحجي

علاء : اذا ما عدلتي اسلوبج اعدله الج بطريقتي وتعرفين شأستخدم من طريقة انا

هدني ودفعني منه بقوة ،يباوع علي رافع حاجبه وانا افرك وجهي ميته من الوجع ،بوجع گلتله اريدن ابجي بس مو گدامه

_ حرام عليك ،والله حراااام

علاء : ما اعرف بالحلال والحرام، علميني حتى اطبقهن عليج

_ ما تستاهل اتعب روحي وياك

علاء : جا تحضري للجايج ،طراگيع امة محمد اطيحها على راسج

_ ما تهمني شتسوي تسوي

تقدم بساع يريد يكضني حرت وين أشرد و وين اضم روحي من ضلمه

_ علااااء

اندرا على صوت صيحة ابوه من جوة گبل لا يطلع رفع ايده يتحلف

علاء : ارجعلج انعنع ضلوعج ،ضلع ما اخلي بيهن صاحي

ما جاوبته وهو طلع من رد صاحه ابوه ،فليت شعري ورديت لميته راسي راح يطگ ،گمت

لبست شالي على الساكت ضليت واگفه اباوع عليهم

علاء : جااااي اگلك چذابين ،ابنك اناا واگلك چذب صدگني

أبو علاء : يا چذب اذا هم كاضين عليك تصوير

علاء : خلهم يواجهوني بالتصوير ونشوف

بثقته هاي خله مو بس ابوه يصدگه يجوز كل الموجودين ،لا انا اعرف كل دروبه وهذا سبب من كرهي اله

أبو علاء : اطلع من البيت گبل لا يجي عمك ويشوفك متحلف بيك

علاء : وعلى شني يتحلف بي شو اخوك هم ما اعرف شلونه

أبو علاء : جاي اگلك اطلع ولا تعاند ،من يهده الوضع رد

مسح على شواربه يفكر وگال

علاء : راح امشي بس الليله واردن وشيصير خله يصير

أبو علاء : امشي هسة وعود الله كريم

علاء : بس ابدل هدومي

عبر مني وگبل لا يصعد باوعلي بنضره گصني بيها گص ،درت عيوني منه من اجه يحيى يحجي وياي

يحيى : زنزن وين

أبتسمت ودنگت گباله ،يقلد ابوه ويسميها زنزن

_ هسة تجي راحت هي وابوك للدكتور

يحيى : والله

_ أي

رد يلعب وانا رديت من تذكرت گتلها اردلج بس من شفتها نايمة طفيت الضوه وسديت الباب وطلعت وانا انزل درت على صوته وراي

علاء : موش جسم مقسم تقسم بت ناهده

باوعتله لعبانه روحي ولا جاي اتقبل حجيه ،شلون بي وشلون اگضي حياتي وياه طبيعي ،بس استغل سكتوتي وهو يتقرب علي بطريقة خلت جسمي كله يكزبر

علاء : شيصبرني

وخرت ايده الكاضني بيها من صفاحي

_ حلم ابليس بالجنه تطخني مره ثانية

أبتسم

علاء : شو احلفي

_ ما يحتاج احلف

علاء : صايرة تخوفين

يحجي وياي بأستهزاء ،درت مطيته ضهري انزل وهو وراي ،شوي شوي بدوا يردون عمامي والولد واخير واحد عمي ابو زينة و وراه رضا خطيب تنسيم بس شافني اباوعله گال

رضا : لا تخافين مابيها شي وگعدت

_ عليك الله

رضا : والله

_ منو ضل عدها ؟

رضا : زلمتها چا منو

_ شوكت يطلعوها

رضا : باجر

من شفتهم بدوا يتناقشون على الصار ما تدخلت ولا ردت حتى اسمع وخليت ومشيت جبت يحيى حتى اوكله ،چر ثوبي

يحيى : اويد ماما

بايدي ماعون التمن والچمچه اريدن اصبله مرگه فوگاه

_ هسة تجي وتجيبلك سيارة وياها، تسوي عن عن

ضحك فرحان وانا أبتسمت وياه، سديت الجدر وبايد كاضته وايد الثانية كاضه الماعون گعدته گبالي اوكله واگله

_ جت الطيارة، عممم

بس كمل اكله صعدته وياي فوگ حتى انومه وبس هتسوه غفه اندگ الباب گمت فتحته صارت بوجهي

تنسيم : يحيى يمج ؟

_ أي نام

تنسيم : خوما بجه

_ لا حجيتله قصة ونام

تنسيم : عينج عليه

_ ما يحتاج توصايه

باوعتلي بنضره ما عرفت افسرها ومشت تنزل جوه،سديت الباب وتمددت بصفه گضه الليل يتفزفز وبس شفت الصبح

طلع وباوعت للساعة بثمانية اخذته ونزلت وبس شاف ابوه

نزل من حضني يركض اله، فتلحه ايده ويحيى تعلگ برگبته ،باوعلي وهو حاضنه

_ خوما تعبج ؟

_ شوية

_ حباب يحيى البطل

يدغدغه ويحيى يضحك ومن شافه فحط گاله

_ اگعد بوية كافي

گعده بصفه يوكله ويحيى يحجي ابد ما سكت ونص حجيه

مفهوم ونص لا ،مشيت للمطبخ سويتلي لفة ورديت للصالة اكلها واباوع عليهم

مستغربة الهدوء هذا ،معقولة هيج فضت وي بيت الشويچر! !

للظهريه وردت روحي من گالوا راح ترد زينة ،ما عولت اشوفنها، لزگت عد الشباچ اباوع عليها طبت ساندها رچلها

و وراها چم واحد من ولدنه وعمامي من فرحتي وصارت گبالي حضنتها بكل ما عدي من حيل نسيت چتافها وصوابه

زينة : اخخخ

فزيت و وخرت منها

_ نسيت والله نسيت ،اسفه زينة

كضت ايدي بأيدها السليمه

زينة : لا تتأسفين اعارف بيج فرحانه بشوفتي عمن ما تگدرين على فراگي

ضحكت وهي أبتسمت ،طببها رچلها جوا وبس گعدت سألت على يحيى

زينة : وين يحيى شو ما شفته

_ جاي يلعب بضهر البيت هسة اجيبنه الج

زينة : بساع طاگ گلبي عليه

_ صار

بس طلعت من المطبخ صحت اسمه اكثر من مره وما اجاني ،درت لضهر البيت امشي واحجي بصوت عالي مسموع

_ يحيى وينك اجت ماما ،اجت زنزن تريد تشوفك

نشغت من شفته من ساسه لراسه صاير كله طين ومبين طايح ،ركضتله وگفته يبچي

_ شبيك حبيبي ليش تبچي ،هسة اسبحك ويروح الطين

مسحت عيونه وشلته بس طبيت وشافتني صاحت علي

زينة : نسمات شبيه يحيى

درت عليها

_ طايح بالطين، بس اسبحه واجيبنه الج

طبيت للحمام گبل لا اسمع ردها سبحته وصحت على تنسيم جابتلي اله هدوم بدلتله وبس فتحت الباب ركض الامه

يحيى : زنزن

حضنته تردد

زينة : روح زنزن

صعدت بدلت ثوبي ونزلت ما مصدگه عيني جاي تشوفها كل ساع وامشي اسألها

_ خوما متوجعه

زينة : يعني مسوية عملية خوما شالعة رحاتي

اشرتلي ادنگ

زينة : شوفي صوابي شلون خلصج چان اليوم حنتج

ضحكت وگعدت بصفها ومن الجهه الثانية رچلها وبحضنه يحيى

_ تاكلين شي جوعانه

زينة : ما اگدر

حطت رأسها على چتفي ضليت گاعده بصفها منا لمن صاحن علي ،گمت مشيت يمهم للمطبخ اساعدهن بخبصة الغدا ،اشتغل واسمع سوالفهن بدون ما اشارك

وهن يصبن اخذتلي صينيه زغيره بيها عزلت كاسة مرگ وتمن وحطيت بطل لبن وخاشوگه ودرت اريدن اطلع بس صاحت وراي

أم علاء : وين ؟

هي تعرف وين ماشيه بس ما تگدر ما تحاجيني بكل مرة اصعد الاكل بيها ،دست روحي وجاوبتها ما ابين روحي متنرفزه من سؤالها

_ اصعد الاكل الامي واردن لا تخافين ما أنهزم من الشغل

أم علاء : أي خوش لان اليوم المواعين كلهن عليج

طلعت گبل لا تكمل حجيها عيون الگاعدين بالصالة صارت علي من صعدت ،اطيتها الاكل ونزلت

من شافتني بهتت وچن اكو سالفة ببالها وما تمتتها برجعتي...

كفيت رداناتي وبديت اغسل بالجدوره لان فرغن وعلى الواگف اكلت بساع بساع من كملوا اكل ،الچاي على النار حطته تنسيم وهن

يعزلن ويحطلي المواعين على السنك انترس ترس فوگ الساعة اغسل، مو جديد علي هل حال كل مرة هيج يسوون

بي وعناد بيهن تساعدني زينة بس هسة لا كله طحت بيه انا

أم علاء : اغسلي الاستكاين يردون بعد چاي بساع

حطت الصينية على السنك، ضغطت على ايدي انا ما صدگت يفرغ، غسلتهن اصبر بروحي وحميت الچاي وصبيتلهم

هستوني مشيت اريدن اوديه واجت اخذت الصينية مني توديه

استغفرت اكثر من مرة ورديت مسحت الگاع وطلعت ،صاحتني من گعدت يمها گالت

زينة : طاحن براسج المواعين مو ،محد عاونتج ؟

_ استغلنها فرصة

زينة : بعيني انا الهن

_ هسة دطيبي وبعدين تحلفي بيهن

أبتسمت

زينة : تدرين من فتحت عيوني أول ثنين اجو على بالي أنت ويحيى حسيت روحي عدي جهال ثنين مو بس واحد

_ جا مو اگلج أنت امي

زينة : بس انا بتي بطولي

_ قدرة قادر بعد

ادهرها حتى تنسى الوطع وهي وياي تتفاعل مثل عادتها، تثاوبت تفرك عيونها

زينة : امس ولا نمت زين متت من الوجع والمگرود انشتل وياي شوفي يطوطح چن شارب

باوعت على رچلها ورديت باوعتلها

_ وينه وين الشرب ،اخوه مكفي وموفي

زينة : أي والله، نوبات احمد الله واشكره هو وياه ما يتشتابهون

_ البطن الوحده ما تجيب مشتابه

زينة : شلون بطن خايسة

ضحكت وغطيت حلگي ما اريدن احد ينتبه علي بس وين اذا هي رابطه فيشة ويانه

أم علاء : ضحكنه وياچن چنايني ،شجاي تسولفن

زينة : سوالف نسوان حمة

أم علاء : ومن شوكت نسوان الحمة عدهن سوالف

زينة : من زمان ،حتى انا اعارف نسوان حمة تحالفن على عمتهن وكتلنها

عضيت شفتي ودنگت ما اريدن اضحك على ردة فعلها وجحضة عيونها

أم زينة : فلك الصاب شقاج ،بطلي سوالفج زينة

تغمزلها وزينة كملت ما مهتمة

زينة : جا غير سألتني وجاوبتها يا يمةة

أم علاء : عابتلج وعابت لجوابج

الزلم گاعدين كلشي يسمعون بس مابيهم احد تدخل بينه، گمت گبل لا يتأزم

الوضع لان عمتي أم علاء راح لو تگوم تسحلني انا لو زينة، للعصرية واجتنه الگوامه

ومثل ما توقعنه بيت الشويچر ما يعبروها هيج بالهين زلامنه كلها التمت وهم يحلفون مية دين ومية يمين يكتلون علاء وغير شي ما يبرد گلوبهم

دفعتني و وگفت بمكاني تتسنط عليهم ،وتدعي وچن ابنها نبي واتهموه

أم علاء : الله لا يوفقكم ،يستشرفون براسنه بيت الشرررف

چتفت ايدي لصدري عيني على الباب كوم زلم طلعوا ومبين جاي تسوء ما تنحل

_ الله اعلم شني المسويه من دگه بيهم ابنج وهل هيج تخبلوا

عتتني من ردان ثوبي ودارتني عليها

أم علاء : جاي يكثرن عليج ديري بالج ،ولا عبالج تأجل العرس معناها ما ياخذج خل تفض هل سالفة وشوفي شلون ما راح تخلصين منه

هدتني ومشت جوا، هزيت ايدي ولا مهتمه لحرف من الحجته، بس مشوا الوادم طبوا عمامي وابوي وراهم بلبسه مال دوام ،مشيت سلمت عليه امس عده انذار وما نزل

_ شلونك بوية

باسني من راسي و العيون كلها علينه

غافر : الحمدلله بخير ،أنت شلونج

_ بخير

غافر : عساج دوم

دنگ يشاورني

غافر : امج شلونها ؟

_ لهسه خايفة من الصار امس

غافر : تخاف من زمان هي ،ماشي اشوفنها وانزل ابدل واريدن شي اكله

_ صار

هستوه صعد اول بايتين وصاحه عمي ابو زينة

أبو زينة : وين ماشي مو عدي حجاية وياك

غافر : هسة جايك

هز ايده عمي من شاف أبوي كمل دربه

أبو زينة : تخبلت وبعده متخبل عليها

زينة : يحبها بوية مو بيده

خزرها وهي مبتسمة ،تعجبني سوالفها لا تجامل ولا تخاف الما يعجبها تگول ما يعجني ،فر السحبه بيده يباوع على عمي ابو علاء

أبو زينة : ابنك وين ؟

أبو علاء : گلتله يشوفله مكان بين ما يهده الوضع ويرد

أبو زينة : يعني متأكد ما مسويها ؟

أبو علاء : حلفلي

أبو زينة : نشوف ،بس اذا طلعت صدگ السوايها سوايته الا اكسر رچليه واطيه للوادم

ما رد عمي بس ضل يصفن بين الشاك وبين اليريد يصدگ بأبنه والعرفته من حجيهم مطينه

عطوه و وراها ما يردون غير علاء يطيح بأيدهم

سبحت وصعدت المنشف براسي البيت هدوء الكل نايمين ،مشطت شعري

وتمددت وهستوني غافية وحسيت شي

يمشي على رگبتي ،فزيت مرعوبة طفرت من مكاني متخبله

_ يمةةة

وي حطيتي ايد نحطت على حلگي وايد ثانية جرتني رخيت روحي عرفته علاء ،درت عليه وخر ايده من حس علي اريدن احجي

وبس وخرها صحت

_ شبييك ،سوااايه تسويهاا هاااي

علاء : وسم شمسوي

_ نايمةةة وفززتني عبالي شوف شني يمشي علي

علاء : شي مثل شني؟

مسحت وجهي وگعدت متربعة هذا شحجي وياه

علاء : لا تكبريها اجيت نمت بصفج ما سويتلج شي

_ شجابك ؟

علاء : تتمنين ما اردن مو ؟

_ تريد الصدگ ؟

علاء : أي

_ اكرهك وما اتمنالك الخير ابد

ما شفت تأثير الگلته على ملامحه، الغرفة چانت ظلمه وبس

صوت تنهديته سمعتها، ابد ما انكسر خاطري عليه اكثر انسان اتمنى اجرحه لان هوااي اذاني ،تمددت ساكته ضل هواي گاعد گبل لا يمشي وبس حسيت عليه گام يريد يطلع گلتله

_ لا تتوقع بيوم من الايام راح تسمع مني حجاية حلوة

علاء : ما ميت عليج

_ طلگني اذا هيج

ما رد علي بس طلع وطبگ الباب بقوة ،غمضت عيوني احاول انام جسمي يون علي من كل كتر

طر الفچر وانا ما نايمة ،گمت توضيت وصليت ودعيت الله يخلصني من الجاي اعيشه ومثل كل مرة الفچر اقرا زيارة عاشوراء علمتني عليه هيوفة

طبگت مفاتيح الجنان وتمددت على السجاده، وما اعرف شگد مر وكت انا نايمة بس كل الاعرفه حلمت حلم جهلت تفسيره بذاك الوكت

بنفس ايزار الصلاة چنت امشي بدرب كله خضار الدنيا فجر وما اعارف وين ماشية ولشني متعنيه گبالي صارت شجره برتقال محملة هواي وشكلها من بالي ما يروح

،رفعت ايدي حتى اخذ وحده بس نزلتها وانداريت من سمعت صوت احد

يصيح بأسمي من باوعتله چان زلمه ملثم وما شفت من شكله شي غير عيونه الحاده ،گالي بالحرف

"امشي بعد ،كل هذا مو الج ،نصيبج بعده گدامج"

فزيت وگعدت على حيلي اصلي على محمد وببالي هل جمله تتردد ،ما اجاني نوم بعد ،وثاني يوم من نزلت شفته علاء

گاعد يتريگ ،حتى صباح الخير ما گلت لان ما اعتقد هيج انا مهمة، مثل كل مرة اسويلي لفه واكمل يومي المليان شغل...

وبس خلصت شغلي مشيت اشوفنها لان اليوم ما طلعت من الغرفة ،دگيت الباب شوي وفتحه رجلها

طلع هو وانا طبيت

_ صباح الخير زنزن

زينة : صباح النور ،الله جابج اريدن اسبح

_ شتسبحين ولج

زينة : عفنت والله

_ اغسلج شعرج ؟

زينة : اخذيني للحمام اول شي اغسل شعري بعدين جسمي وما نخلي الماي يلوح چتفي

_ شلون

زينة : هسة امشي وندبرها

گامت على كيفها تمشي لهسه بعدها دايخه بسبب الدم الفاقدته ،حضرتلها هدومها ومشيت وياها سبحت وطلعتها ،گعدت على الچرباية

زينة : جيبي الدهن والمشط ومشطيلي ولو اتعبج

فتحت الجرار اطلعهن وارد عليها

_ لو اطيج عيوني ما اجازيج

من انداريت عليها چانت مبتسمة وعلى ابتسامتها أبتسمت ،وخرت المنشف من راسها ودهنت شعرها وبديت امشطلها

واحجي وياها وطبت تنسيم بس شافتنه باوعتلها بعتب

تنسيم : مو انا اختج شيصير لو صايحتني ليش هيج ما ترديني

من ورا خشمها ردت

زينة : شني نسيتي سواياتج بي ،نسمات ستر وغطا الي اكثر منج

صفنت على زينة وعيونها غورگن

تنسيم : والله متندمه انا

زينة : بعديش ،اطلعي تنسيم وخليني حبابة وياج لا اردن مخبله مثل گبل

ما سمعتلها سدت الباب وگعدت گبال زينة على الجرباية

تنسيم : والله ما چنت اعرف كبر الاسويه، هن حطنه براسي

دفعتها من كضت ايدها

زينة : لا تطخيني، تلعب روحي منج

تنسيم : لا تحجين هيج زينة ،عليج الله كااافي اختج انا

أبتسمت تگلها بأستهزا،

زينة : اختي ،اختي التتحارش برچلي ومتفقه وي أمه علي ،لج وخررري مني وخليني ساتره عليج لان هسة هذا المتخبل على طاريج اخليه يطلگج والله واحجيله قذارتج

كضت ايدها تتوسل وزينة تصيح عليها، توسلت بيهن يكستن ومثل كل مره بس تشوف رضا تسكت وتباوع ل تنسيم بنضرات الملامه

رضا : شكوو زينة شبيج وياها، تنسيم عليش البجي

حضن راسها لصدره وهي شهگت تبجي بصوت عالي وزينة مدنگه لا هي ولا تنسيم حجن الصاير وانا گتلهم ما اعرف، يوميا ضلت تحاول تصالحها وزينة قافله عيلها ...

الايام تگضي وباجر اخر يوم من أيام العطوه وكلها تدخلت حتى تحلها وبيوم الصارت وگضت الگعده طبوا مثل المضروبين على روسهم ماكو احد يحجي الصار وشني الحل الوصلوله

أم علاء : هسة غيررر يحجووون ،أبو علاء حاجيني

نزع عگاله وگبل لا يرد عليها صدمنه عمي أبو زينة من گال بصياح

أبو زينة : حطوووا التصوير بنص عيوووني ،هانوني وابنك السببب ،گلتلك چذاااب گلتلييي لا

أبو علاء : وشني خوووية نهده وچن ماعده احددد

أبو زينة : وينه هووو ،ويننه

أبو علاء : من أمس مختفي

أبو زينة : دگلي عليه خله يجي

وگفت بصفي

زينة : ادعي الله يخلصج منه

_ يااارب

يدگون عليه ما يجاوب احد ،عمامي تخبلوا أبوي طب روحه بخشمه وگف بالنص يصيح

غافر : گلتلكم چذاااب ،دروبه كلهن اعرررفهن بس تگلولي حاقد عليه، هسة زيين من هيج دنگنه روسننه بنص الاوااادم

أبو علاء : لا تزيدهااا غافر شبييك

غافر : شبيك ترچف منه ،كاض عليك كضه وهيج مخوفك

خزره

أبو علاء : شو ما تعررف تحجي ،اخاااف من شنييي

غافر : جا دلني مكانه هسة امشي اجيبنه محمل

أبو علاء : ما اندله

غافر : واذا لگيته انا ؟

أبو علاء : الگاه منو كاضك

غافر : جا خوش

گعد أبوي گبال عمي ونضرات التحدي بيناتهم ،كل ما مر يوم بيت الشويچر يتحلفون بعلاء اكثر

وهو مثل فص الملح وذاب، وبيوم مثل أي يوم چنت اغسل الحوش والدنيا عصريه واندگ باب الشارع بس ما چانت دگه عاديه تفلش تفلش وصوت زلمه يصيح

_ الحگوااا ابنكم الحگوووه

°بركة°

گبالي ركضوا لبيت عمي باقر وما خلوني اركز يا سيارة هاي من سيارة ولدنه ،لحگتهم اصيح عليهم لا يعثرون

_ ولكممم ،سيف انا الك

كضيت حوراء وسيف زرگ جوا ،وبس طبيت شفتها طلعت وعون وسيف گبالها يمشون ،مبتسمة اجت سلمت علي تسأل

ريحانة : اليوم الگمر منين طالع ؟

_ جبت حلويات لعون ونسيت اطيهياه

ريحانة : الله جابج ضايجة وحدي

_ جا هيوفة وين ؟

ريحانة : نايمة سودة علي بطنها اليوم توجعها

_ ياا ليش

ريحانة : هواي تصعد وتنزل حتى امي منعتها من الفوگ بعد واطتها غرفتنه

_ وأنت وعون شلون ؟

ريحانة : بالديوانيه انام، تعاي طبي شني تضلين واگفه هنا

كضتني من ايدي وطبينه ،عون گعد ياكل بالحلويات وگابلته حوراء ما حاجاها بس من سيف راد منه عاط عليه

ريحانة : ياا عون ليش ولك

عون : يولي

ريحانة : ليش يولي مو صاحبك هو

غم سيف وگعد يم حوراء ،ضحكت ريحانة تهز ايدها

ريحانة : جهال اخر وكت

تنهدت اسألها

_ خوما جاي يتعبج ؟

ريحانة : حباب بس عده چم سالفة صاير يشلع الگلب بيهن

_ عنودي مو ؟

ريحانة : نوبات يعاندني يخلي شعر رأسي يوگف من عناده ونوبات لا حباب

ضليت فوگ النص ساعة احجي وياها ومن گمت اريدن امشي تذكرت، حطيت عباتي على راسي احجيلها

_ من اجيتكم هسة شفت سيارة طلعت من القرية من سرعتها ما عارفتها المن

صفنت علي

ريحانة : وهسة تذكرتي

_ راح من بالي والله

ريحانة : هيج وكت محد من الولد طالع

_ اندري

ريحانة : شو امشي

جرتني وياها لوين ما اعارف بس صرنه عد باب الشارع گالت

ريحانة : امشي تأكدي من سيارات الولد ورديلي

_ يااا واذا طلع احد وشافني

ريحانة : هسة عود من يطلعون الله كريم ،دمشي

طلعت وهي ضلت تباوعلي، من تأكدت من السيارات ردتيلها

_ كلهن موجودات

ريحانة : خاب ما شفتج باوعتيلهن زين چن دازتج تبوگين بوگه

طبيت نزعت عباتي وطيتها الها

_ امشي شوفيهن أنت وفضينه

حطت العباة على راسها تتحلف

ريحانة : خل اردن اذا ما اگرصج گرصه اخلي مكانهاها اسبوع مورم

بلعت ريگي هاي صدگ تسويها بزغري شابعتني تگرص ،ضليت اباوعلها بس ردت غمتني خلت يصير عدي ارتاجج بالمداغ

ريحانة : سيارة ليث الطالعة يالغبره

كضيت راسي خازرتها

ريحانة : عابت لهل عيون المكحلات

_ راسي حرام عليك ،نسيت ليث اشتره سياره

ريحانة : لازم ما تنسين شي بيه ليث ،راح يصير زلمتج

غمزتلي بالاخير ،جريت العباة من راسها لبستها وصحت على سيف وحوراء

ريحانة : خاب ثول شحجيت وياج ،يااا طنگوره عداج جعفر

تصيح وراي وانا طلعت ،لنص الدرب وما حسيت غير بحجاره اجت براسي درت عليها واگفه بايدها حجاره ثانية رافعتها

ريحانة : الخبله أم الطناگير ،المتعافيه

_ مو الچبيره أنت وعود العاقلة ،اجيج والله

ريحانة : تعاي تعاي حتى اوديج لعمة مدمايه ،اضن ما تعارفيني زين

_ شو صايرة وكحه

ريحانة : خوما اضلن فاهيه والوادم تدگ على راسي

_ نزلي حجارتج يله

ريحانة : خل احطنها براسج

صحت عليها من رفعت ايدها

_ يااا صدگ تحجين

حطيت ايدي على راسي من شمرتها طاحت بصفي وسيف وحوراء

وعون يضحكةن ودنگوا يشيلون حجار ويشمرون علي ،ركضت وراهم وهم يركضون وريحانة تضحك

_ تعالووو اذا ما مووتكم ،خرررب عمتتك عووون

ريحانة : ولجججج يا عمتةةة تقصدين

تضحك وكاضه الباب وهم ركضولها طببتهم وسدت الباب وخلتني واگفه ادگن بيه

ريحانة : امشي للبيت يله ما اطيهم الج ،يله گاولها روحي

حوراء : لوحي

سيف : وحي

عضيت اصبعي اتحلف بيهم

_ انا الكم بعتوني علمود نعناع، حلويات بعد ما اجيبلكم

ريحانة : لا ،ولكم انا اجيبلكم

يجرون الباب يردون تفتحه ،درت اردن للبيت مبتسمة على فرحتها بيهم ،احب حنيتها عليهم تحسهم جهالها ،بس طبيت صارت گبالي امي

شيماء : يا جا ويين جهال اخوج

_ ضلوا عد ريحانة

شيماء : جا دنيا ليل يمة شلون تخليهم

_ تولوني بالحجار هم وخالتهم

نزعت عباتي وطبيت للبيت وامي وراي تسأل

شيماء : ليش شسويتلهم

_ ما سويتلهم شي بس شافوا ريحانة طگتني وقلدوها

شيماء : يااا

_ راح اطبن انام وأنت امشي جيبيهم لان هسة عون گاعد عاد يلعبون وياه

شيماء : خوش

طبيت للغرفة حضرت جدولي وشگد حاولت انام من بالي عيونه ابد ما راحت ،حتى وگفته طبعت براسي

شمرت الغطا متململه اصفن بالسگف ،اخافن من تفكيري بيه لان اعارف النهاية شني

_ اووف منج بركة جبتيها لروحج أنت وتورطتي

گمت اللمن بشعري ،هوسة براسي ،منين ما التفت ماكو حل ،والراعبني لا تمشي من صدگ كلمة جدي ساعتها انتهي انا

حواري : بركة

فززتني من لگيتها واگفه گبالي

_ هاي شوكت اجيتي

حواري : هستوني طبيت ،اخذي بتج موتتني ولا چن انا امها

_ شبيها

حواري : بس تلعي ليگول نايمة يم عدوتها مو أمها

اخذتها منها چانت تبچي بس شلتها سكتت

حواري : ديله ،راح يخبلوني منين تلگاها منهم من ابوهم

_ شبيج ولج

حواري : ضايجة من اخوج أبو المهندسات

هزيت ايدي وغميتها

_ عود صدگ هيج تغارين عليه ،مال الثول حتى ثول مو تعارفين بيه ما يباوع لغيرج

حواري : شمدريني طالعة وياه انا شو محبوسة هنا حتى لو يباوع ما اعارف

_ ابصملج بالعشرة ما يباوع غير أنت عاميته عمي عن النسوان

حواري : مثل ما أنت راح تعمين حاصودة الخير على گولة جدة

_ شبيجن أنت واختج اليوم ؟

حواري : خاب ارضي شبيج والله احسن واحد بولد عمي محمد ليث

_ يحب

حواري : حبتج سليمه منين يحب

زعرت عيوني

_ لا تغشمين روحج واصعدي جيبلي غراضها وراضي حق لا اطلع بيج ضيم گلبي

كفت رداناتها

حواري : اذا اكضج اهلسج مثل الدجاجه

_ امشي امشي

دفعتها اطلعها من الغرفه وحطيت ميمنة الزغيره على الفراش، شوي وردت اطتني غراضها وردت تريد تطلع صحت وراها

_ اذا ما راضيتي حق اصعد اشمرج من فوگ

حواري : خاب دروحي

°حواري°

طلعت اركض من رادت تجيني وبس طبيت للغرفة رديت لملامحي الجامده ابيعن ثگل عليه ،بوجهي مشيت للچرباية وخرت اللحاف

وتمددت اباوع عليه من جوه ليجوه ولا چن وياه انا بالغرفة مركز كل نضراته يم الارواق مندمج بيهن

_ ما خلصت اريدن انام

رفع رأسي من حجيت ،نزل ملف من ايده ولمهن بساع وگبل لا يطفي الضوه سألني

عبد الحق : الجهال وين ؟

_ يم اهلي عمة گالت شوي وتجيبهم

تحجي وياه وانا صاده عيوني منه ،ما حجه شي طفه الضوه وبنص الهدوء صار صوت طگة قفل الباب ،بلعت ريگي اقوي روحي وما اتنازل بسهوله من صار بصفي، تنديت منه من حسيت بقربه بس برمشة عين صرت بحضنه ،كضيت خشمي وصحت

_ شبييك حق

عبد الحق : انطيگيتي

رفع رأسي يباوع يتفحصني ،جر موبايله شغل

فلاش وحطاه بوجهي

عبد الحق : كله من عنادج وخشمج اليابس لو مسكور احسن

_ اناااا خشمي يااابس

سد حلگي بايده الثانيه

عبد الحق : صوووتج

وخرت ايده وجريت روحي اريدن انزل من الچرباية بس ما خلاني

عبد الحق : خلينه نتفاهم

_ ما اتفاهم وياك

عبد الحق : حووورية

درت عليه رافعه حاجبي

_ ما اخافن لا تصيح

استغفر گبل لا يگلي

عبد الحق : وحگ ذاك هو ابو فاضل ما شايف بصلافتج لج شني أنت

رمشت بعيوني اضوجه متقصده

_ حورية

عبد الحق : انقرضن اذا تنحسبين عليهن

_ اهاا

عبد الحق : هيدي اريد احجي وياج مثل البشر

اشرت على روحي

_ ليش انا مو بشر ؟؟؟

عبد الحق : لا اله الا الله

_ مو اگلك صاير ما تحبني

عبد الحق : تاخذين حب مانع أنت ؟

صفنت على سؤاله

_ ليش ؟

عبد الحق : مزاجج مرگوع بكرك من چنتي حامل بسيف وحوراء هيج سويتي بي

_ هاااا

بس شافني صفنت طفر

عبد الحق : حااامل

_ لا لا الله لا يگولهااا ،حققق والله اذبحك

عبد الحق : شدخلني انا

گمت افتر بالغرفة وهو شغل الضوه وصافن عليه وانا كلساع اردن عليه

_ اذبحك واشمرك بالشط ،اتفنن بكتلك

عبد الحق : راح اشمرج من الشباچ اذا ما گعدتي

جراني مگعدني على رچله وانا الدمعة ذيج هي بطرف عيني

_ شمااات وراي حق ،كلها تتشمتت بي ،گاللي

هل سنة هم تحبلييين

لطمت على خدي

_ گاللي حتى ما راح تداومين وتطلعين حامل وتگعدين

عبد الحق : هسة أنت ضايجة لان حامل لو

لان وراج شمات فهميني

_ علي

عبد الحق : شبيه ؟

_ يسميني البزووون

طگيتها بچيه وهو يضحك علي، حضني يهدي بي

عبد الحق : باجر نمشي للدكتوة ونتأكد

وخرت رأسي من صدره

_ واذا حامل شلون ؟

عبد الحق : بعد هذا رزق الله

_ ونعم بالله بس حق والله ما اريدن

عبد الحق : اذا طلعتي مو حامل گولي للدكتورة تسويلج حل منا لمن تخلصين دراستج

_ اذا مو حامل

عبد الحق : حرام اگلج أن شاء الله

ضحك من دفعته ،رديت تمددت وهو ضل گاعد يباوع علي ،گعدت على حيلي من اندگ الباب ،گام حق فتحه وطبوا ثنيناتهم

سيف : ماما

حوراء : بابا

اجاني سيف وحوراء الادبسزز مشت الابوها تحضن وتبوس بيه ،شگد محيله هل بت

عبد الحق : وين چانت حبيبة ابوها

يعدل بشعرها ويحجي وياها وهي مو سألها خرطت الأول والتالي

حواء : خاوه ويحنه عمعم، عوا اييع

رفعت فالينتها تشوفه الطين بهدومها

عبد الحق : عون دمرج ؟

هزت راسها تدردم عليه، أبتسمت اباوع لمنضرهم شگد حلو ،يتفهم عليها نوبات حتى اكثر مني لان هواي تحجي براسه وابد ما يمل منها ،صاح لسيف گعده على رجله الثانية ويحجي وياهم بس شفتهم نعسوا گلتله

_ اطينياهم ابدللهم حتى ينامون

نزلهم بالگاع وانا طلعتلهم هدوم بدلت الهم وفرشت فراشهم صاروا كبار والكواريك ما تفيدهم، تمددت يمهم وما حسيت

بروحي من غفيت الصبح من گعدت چان المنبه يدگ ،تحركت متملمه لازم

اگوم وراي دوام ،درت روحي اباوعله حاضني من ورا ونايم احب شكله من ينام

عبد الحق : هاا ما خلصتي صفنات

فزيت من فتح عيونه ،ردت اگومن جرني مثل كل صبح يگلي

عبد الحق : صباح گلبي الميت عليج

_ أي أي ميت عليه ،هدني حقوق أبو النسوان

بس ضحك سديت حلگه بايدي

_ الجهااال

وخر ايدي وگام اخذ خاولي ومشى للحمام وانا مثل الحرامية لبست هدوم المدرسة بساع ،شوي وطب لاف المنشفه على بطنه ،طلع هدوم بدل ومشى گبال المراية يمشط شعره

عبد الحق : اوصلچن لو يجي عليچن الخط ؟

_ بكيفك ،انا اكيف أنت توصلنه عاد احافظ على المعلومات البراسي ولا تطيرهن فرة الخط

عبد الحق : جا انزلي شوفي بركة وگليلها حتى امشي اشوفن بت عمي منير

لبست حجابي ونزلت بس فتحت باب الغرفة شفتها گاعدة والشيطانه الطايحه براسها هم گاعدة

_ صباح الخير ست بركة

بركة : صباح النور ،امي گعدت ؟

_ اضن گاعدة لان سمعت صوت طگطگه بالمطبخ

بركة : اخذي ميمنة وانا ابدل والحگج

دنگت شلتها مستغربة هاي شبيها ،وضعها ابد ما عجبني بسوما سألتها وخليتها ومشيت بس بايدي شايله ميمنة صبحت على عمة

_ صباح الخير عمة

ا ندارت علي واگفه يم الطباخ

شيماء : صباح النور بعد عمتج

أبتسمت ومشيت اغسل وجه ميمنة واسألها

_ جا شو عمي ماكو ؟

شيماء : اجه عليه عمج محمد ومشوا ل أل خبير

_ ياا بسلا علمود نفس الطلابه

شيماء : أي والله راح يصيرلها سنة اندري شوكت تنحل

_ جا اذا هذا هيج فد واحد سگط شلون رضى أبو نسمات يطيها اله

شيماء : اندري

تنهدت تباوع للباب وردت تحجيلي

شيماء : شگد چانت بنفسي اخطبها لجعفر عمنها خوش بت معدله وبس لسانها كافي

_ مو نصيبه ،بس هي مبين ما مرتاحه وياه مو شفتها

شيماء : شلون ترتاح وياه اذا هو ما مخلي عوجه ما مسويها

_ هم حظها هذا

شيماء : هو احجي بالحظ ،لو عدل كلشي يعدل

برهان : صباح الخير

اندارينه انا وعمة على صوته

_ صباح النور

شيماء : صباح العافية يابعد امك

أبتسم واجه باسها من رأسها واندار علي اخذ ميمنة من ايدي

برهان : اروحن فدوة لشكلج يابعد عمج

كل ما يشيلها هيج يگللها ،كل اليشوفها چن يشوف ميمنة ،تريگنه بساع وطلعنه ،بركة الدرب كله تصفن وانا وجفون گضيناها سوالف ابد ما سكتنة

عبد الحق : بس گللي بالعات مسجل من الصبح

جفون : اعذرني خوية بس اكثر واحد مايصير يحجي أنت

عدلت گعدتي چنت دايره روحي عليها هي وبركة گاعدات ورا ،باوعلها بالمراية مستغرب

عبد الحق : ليش ولج

جفون : اخذتها مني ،شايف گبل انا وياها شلون چنه

بركة : مثل زوج النعل

طگتها تدردم

جفون : ام القنبابل اسكتي

عبد الحق : وهسة المطلوب شني اردنها الج ؟

جفون : لا ما تفيد بعد صارت عدها زعاطيط

ضحك ولاف السيارة بس طبگها گبال المدرسة گال

عبد الحق : ردن وي الخط خابرت عليه وبلغته

گناله

_ خوش

ونزلنه ،وبس شافنه طبينه الا مشى ،درس يجر درس ومن لاگيتها بالفرصه نشغت اباوع لحالها! !

كضيت ايدها

_ شبيج ،بركة حاجيني

تجر النفس بالگوه عيونها مصبوغات دم

_ ضغططج

هزت رأسها ب أي

_ ولج ليشش، شماااكله وصعد

بركة : ما ماكلة

گعدتها اهفيلها ومن شفت وضعها زاد سوء مشيت للأداره حجيتلهم وبعد ما شافتها المعاونه وبلغت المديرة گالت

_ راح نخابر على اهلكم

_ أي أي فدوة ست

اجت تركض طبيت من بين الطالبات الملتمات علينه

جفون : شكوو شبيها بركة

_ لگيتها هنا بالساحه بالگوه تجر النفس ضغطها صاعد وما شاربه دواها

جفون : يااا ولج ليش ما شاربته

تحاجيها وبركة ما تگدر حتى ترد تغمض وتفتح عيونها چن تريد تفقد ،نص ساعة وردتلي الماعونه

_ اجوي أهلكم

_ ست نطلع وياها ؟

_ اذا ماعدكم شي اطلعوا

_ ماعدي شي

جفون : انا عدي امتحان

_ ضلي هم اخذ منك الدروس

هزت رأسها حايره تباوعلي ،لبست بركة عباتها وانا لبست عباتي وطلعت ساندتها واشايله الجنط بس شافنه اجه يركض اخذ مني الجنط وسندها يسأل

عبد الحق : شكوو شبيهاا ؟

_ ما اعارف حتى ما گدرت افتهم منها

صعدها بالسيارة وانا صعدت يمها، بس حرك گال

عبد الحق : نمشي للمستشفى لا يصير بيها شي .

_ أي احسن

الدرب كله هي شبه مو ويانه ،بس وصلنه نزلنه هو ساندها وانا وراه طببناها للطوارئ ومن قاسولها الضغط وعلى

حجي الدكتور گال كلش صاعد ومو من صالحها اذا ما نزل ،حطولها مغذي واطوها حبابة ما اعارف مال شني وضلينه گاعدين يمها بين ما يگضي المغذي ..

حاط كرسي وگاعد عد رأسها وانا على السديه عد رجليها، يسمح على راسها وهي

مغمضة مبينه صاحيه بس ما بيها حيل تفتح عيونها لو تحجي

عبد الحق : ليش هيج صار وياج ،الصبح مو چان ما بيج شي

فتحت عيونها بثگل

بركة : نسيت اشرب دوه

عبد الحق : وشلون تنسين، هديتي حيلي خوية والله ما عارفت شلون اوصل، چم مره بمره اجيت اسويلي حادث

تنهدت تنهديه طويله وهو أبتسم

عبد الحق : بس يله اهم شي هسة أنت بخير ،بعد لا تنسين دواج خوش

هزت رأسها ب أي وعلى گعدتنه ودگ موبايل حق طلع يجاوب وشوية وردلنه هستوه گعد وسمعنه صوته برا يصيح على حق

ليث : أبو سيف

گام حق يشوفه وبركة وسعت عيونها مستغربه تسألني

بركة : شعده جاي

_ شمدريني

گمت عدلت عباتي ومديت راسي من البرده الحاطيها بس شافني گال

ليث : هاا ام سيف وياهم جايه

_ أي جا شلون

عبد الحق : منو خابرك

ليث : المعاونه لگيتها داگه علي ومن رديت خابرتها حجتلي

عبد الحق : انسطرت بعلي من گالتلي

ليث : وهسه شلونها

عبد الحق : لا احسن الحمدلله

ليث : الحمدلله

خليتهم يسولفون وطبيت يمها بس گضه المغذي طلعناها احنه بسيارة حق وليث ورانه بس طبگت السيارة گبال البيت

فتحت الباب عمة شيماء

ومبين القلق عليها ومن شافتني فتحت باب السيارة وكضيت ايد بركة حتى تنزل نشغت تسأل

شيماء : يمةةة حق شبيها اخيتك

مشالها يرد عليها

عبد الحق : ضغطها صاعد وخابروني اخذتها للمستشفى وهاي ردتنه

لطمت على خدها عيونها على بركة ،كاضتها انا وتمشي

شيماء : والله لعب گلبي من بطن وخفت لا صاير

شي وما خاب ضني

عبد الحق : الحمدلله عدت على خير

بس وصلنه عدها كضت ايدها الثانية

شيماء : شبيج يمة ،ليش صعد ضغطج

بلتت شفتها وبتعب جاوبت

بركة : ناسية اخذ دواي

شيماء : ياا ياا شعجب ناسيته

بركة : ما اعارف

شيماء : جيبي عدي بعد انا اطيج

بركة : خوش

اباوعلها كلساع تغمض وترد تفتح عيونها مبين عليها بعدها دايخه، طبينه احنه والولد ضلوا بره لان اجه يمهم عزيز ،بس سمعوا صوتنه طلعوا يتراكضون وحوراء تريد توصل گبل سيف وهذا چنه زيبگ بساع وصل عدنه وتعلگ بعباتي وهي طنگرت وگعدت ماده رجليها تعيط

شيماء : ياا ولج حوراء جده

مشتلها عمة تسكتها وعلى صوت عياطها طب حق والولد يم الباب يسألون شبيها ،بس شافت ابوها أشرت على سيف تشكيلها

حوراء : داديي بابا داييي

دار حق على سيف خازره وهذا ولا چنه ضل واگف بمكانه، اجه دنگ گباله

عبد الحق : شبيك وي اختك ولك

رفع رأسه يباوعلي من گلت

_ تبچي لان ركض گبلها

باوع لسيف خازره

عبد الحق : وأنت ليش تركض گبلها

شيماء : يااا ولك صوتك

گام وگف يحجي وي عمة

عبد الحق : كل مرة اگله لا تخبث وياها يزيد

شيماء : بعده زغير شمفهمه

عبد الحق : جا هي هم بعدها زغيرة

أبتسمت من انتبهتله يعيبلها وهاي ام صوت النايص عاطت دنگت شلت سيف وباوعت لبركة

_ امشي نطب ونخليه يفضها هو وبته العياره

ورانه طبوا الولد يراضون بيها وهي اعارفها ما ترتاح اذا ما تطگ سيف لو تشوف حق يحجي عليه ،نزلته واخذت العباة من بركة

_ تردين شي ،جوعانه ؟

بركة : لا

شيماء : شني لا ،تاكلين حتى تصيرين زينة

بركة : ما اريدن والله

شيماء : لخاطري

تنهدت ساكته ،عمة مشت بساع صبتلها وردت توكلها خليتهن وصعدت حتى ابدل هدومي ،هستوني طبگت الباب ومشيت للكنتور اطلعي شي اللبسه ودرت على الباب من انفتح ضليت واگفه بمكاني

من شفته طبگ الباب واجه ناحيتي ،رديت ليوره من صار كلش قريب علي

كض ايدي من ردت ادفعه

عبد الحق : شبيج ،متغيره حوريه

_ أنت متغير مو أنا

عبد الحق : لا والله ما متغير

_ ماتحبني صاير

عبد الحق : منيلج هل حجي

جريت ايدي منه احجي بغصه

_ انا منتبهه

زغر عيونه يريد يبتسم بس يخاف لا انفعل وانا مبينه عليه علي الضوجه

عبد الحق : لا تشكين بمحبتج بگلبي بيوم ،انا الاسمج گلبي يرچف

دنگت بزعل احجي

_ هاي گبل مو هسة

رفعت رأسي عليه من حضني ،باوع بعيوني مبتسم

عبد الحق : گبل وهسة وكل يوم انا محبتج بگلبي تزيد

حطيت ايدي على رگبته

_ تقشمرني جاي مو ؟

غمضت عيوني من دنگ طبع بوسه على رگبتي ومن حجه انفاسه حسيت بيهن

عبد الحق : لا ،جاي احجي البگلبي

_ اممم

عيونه بعيوني يجر أول حجاية

عبد الحق : مشتاگ تردين مثل گبل

_ اردن بس بشرط

عبد الحق : ما احب الشروط

_ طلب

عبد الحق : تأمرين

شبگت ايديه ثنيناتهن على رگبته

_ماتحجي وي أي مهندسه وياك .

عبد الحق : وامسح ارقامهن ،بعد

_ هاي هي

ضحكت من رفعني يحضني، وي كل حجاية يحجيها يبوسني

عبد الحق : اعشگج ،يابة سباح گلبي أنت ،حوريتي أم جهالي

نزلني على الجرباية،وبس طفرت رد كضني ،يضحك

عبد الحق : وين وين

_ حق نتخارب ترااا

عبد الحق : حارمتني من حقوقي مايصير هيج

يحجي ويعدل بشواربه ،وگفت يم الباب بسدريتي

_ دخل ابدل اسبح شي شياتين

عبد الحق : اممم

_ اريد هدوم

عبد الحق : اخذي منو كاضج

باوعتله بشك من گعد على الچرباية ،مشيت للكنتور عينيعليه ،طلعتلي هدوم وركض شردت للحمام سبحت وطلعت ومن رديت لگيت الجهال بالغرفة

گعدت امشط بشعري واحجي وياه

_ شنو تراضوا توم وجيري ؟

عبد الحق : راضاهم ليث

_ وبعد شوي يردون يتعاركون

عبد الحق : لا حبابين

باوعلهم

عبد الحق : ما تتعاركون بعد مو ؟

گالوله أي ،بس نعارفهم چذابين بعد شوي يصيرون امالخ، لبست حجابي ونزلت اساعد عمة بالغدا ،وانا اغسل الخضره طبوا الولد وعمو ،التميمنه على السفره، سيف بحضني وحوراء بحضن ابوها وميمنة بحضن عمتي اطعمها مرگه

يوسف : جدكم يگول افتحوا الحسينية عمن السنه الوادم ماشية من وكت

حط لگمه بحلگ حوراء ورد على عمي

عبد الحق : نفتحها شعدنه

برهان : راح تصادف الزيارة وي التحاقي

يوسف : سألني عليك جدك گلتله اضن بالدوام

برهان : احاول اخذلي إجازة حتى لو ادفع فلوس

يوسف : أي احسن

حطيت ايدي على رچليها طول الوكت چانت ساكته ابد ما حجت ،حتى من سألتها شبيج اكتفت ب

بركة : دايخة شوي

_ ما شفتج اكلتي ابد

بركة : مو صبتلي امي بس گعدت هيج وياكم على الواهس

_ نسيت خايبة

بس كفينه الغدا اجن جده وجفون وغاية و وراهن بشوي لحگنهن عمة عطاء وعمة زهرة، گعدت بصف

بركة وانا من الجهه الثانية بالي ما چان عدهن بس من سمعتها گالت

عطاء : مرضج العشگ ياعمة

گبالي غاية وجفون اسولف وياهن بس اذاني عد عمة وبركة

عطاء : الا انا ما اصدگ الصار وياج اليوم لان بس ما شربتي الدوة

من صوتها حسيت تريد تتهرب من عمة ،بس المشكلة عمة عطاء صعب واحد يتهرب منها ولازم يحجي الاول والتالي

بركة : جا قابل شكو عمة

عطاء : شفتي ابن الچسار مو ؟

بركة : هاا

عطاء : مبين شايفته ،احجيلي

بركة : شحجي عمة ،اذا انا أجيت اموت بگاعي من نزلت من سيارة حق وشفته واگف ،گلت راح يشوفه حق وتصير طلابة ينلاص بيها الأول والتالي

عطاء : بالعشگ چن ابوه صلف ولا يهاب احد

بركة : ديله انا وين وأنت وين

عطاء : نذر علي لو صرتيله الا اطيج بت من بتوتي

غطيت حلگي اريدن اضحك بس اخافن لا تكشفني جاي اتسمع عليهن

بركة : ما راح توفين نذرج عمة لان سالفتنه انتهت گبل لا تبدي وجدي قرر انا ل ليث وليث الي وما بينه احد يگدر يحجي

عطاء : شما اشوفن ليث ما راح تمشي عليه حجاية جدج

بركة : مشت على الكل ،ما تمشي على ليث

عطاء : ليث لولاي ذراعهم بالمال ومن توصل للصدگ وگولي عمتي ما گالت يهد الاكو والماكو

ويمشي وساعتها بأيده جدج يرده عمن ما يمشي ذرة من الشغل بلياه

تنهدت بركة وحيرتها مبينه بجرة نفسها، بس درت عليهن گالت

عطاء : اذاناتج گاعدات بنصنه

حركتلها حواجبي وگمت اودي ميمنة لكاروكها نامت بحضني، بس حطيتها فزت، تانيتها ردت نامت الا نزلت و وي نزلتي طب جعفر من برا يرعد ،عمي وراه يصيح عليه شكوو ،وگفت بصف عمة عطاء اباوعله من الأعصاب يرجف

يوسف : هسةةة غير يحجييي يفهمنة شكوو ماخذنه بصوته العالي

مسح وجهه يجر نفس واحد روحه صايرة بخشمه كلنه متانينه شوكت ينطق

يوسف : احجيييي راح افلش وجهك

جعفر : من الاخير بركة ما اطيها ل ليث لو مو جدي يحجي

يوسف : وشجاب هاي السالفة بالنص

طب برهان من برا وگف بصفي جعفر

برهان : ابنك بوية ماشي لجدي يگله ما اطي بركة

ل ليث

باوع عليه عمي بخزره ما راضي على تصرفه ،صاح

يوسف : بكيفك تحجييي أنت ،منووو گالك تمشي لجدددك

عيونه على بركة الواگفه وراي بس تباوع بعيونها

جعفر : ما اريدنها تنظلم وياه

جراه يواجه وجه بوجه ،يريد جواب منه

يوسف : هذا ليث صاحبك وأنت اكثر واحد تعارفه شلون هيج تحجي عنه

جعفر : لان صاحبي كلكم ما تعارفوه بگدي

صفن عليه عمي حاير بين يمشي ورا جعفر وبين ما يگدر يكسر حجايات جدي ،وگف گبالها هي مدنگه سألها

برهان : ترضين بليث ؟

منه صاح معترض ما راضي حتى على سؤال برهان

جعفر : حتى لو رادته ما راح اطيها اله ،ادفنها هنا وما اخليها تاخذه

صحت خايفة من مشاله بساع وجراه من ياخه البدي مالته يصيح

برهان : تحجييي وفضهااا، شني المخليك هيج ما راديه الاختك

جعفر : عمن اعارفنه شني

برهان : شتعارف ،ليث دفتر مفتوح گدامنه كلنه

رفع ايده على ايد برهان يوخرها بس ما گدر من قبضته القوية ،حط عيونه بعيون برهان وثنيناتهم صايرين اعصاب

جعفر : وخر ايدك

برهان : ما اوخرهاا اذا ما حجيت

جعفر : لا اله الا الله ،وخرهااا جاي اگول

بس هداه برهان طلع بساع ،باوع لعمي

برهان : ماكو غير اسأل ليث

يوسف : ما يحجيلك ،هذولي ثنيناتهم واحد اضرب من الثاني

برهان : اذا ما حجه الي غير تصرف وياهم يصير

°كوكبة°

ضليت اباوعله بكل تركيز من گال

صخر : جاي اگلك لا تجي ،ليييث شجاي احجي انا

مركزة وياه وهو يصيح

صخر : مخببل أنت ،جاي اگلك راح اوديها الاهلهااا، أي خوووش ،تعال تعال حتى احطن ظيم الدوام بيك

سداه وشمر الموبايل يمسح بوجه ومن انتبهلي خزرني بلعت ريگي ودرت للجامه ادردم وي روحي

_ الله يساعد التاخذك امها داعيه عليها

صخر : جاي تحجين علي مو ؟

احس رگبتي وگفت ما گدرت اديرنها حتى وضليت بلايه ما اندار جاوبته

_ لا لا

صخر : گولي أي حتى اشمرج من الجامه

_ شبي ما رايده روحي

ما حجه بعد وانا ضليت ساكته ،هستوني غفيت وفزيت على صوته مره ثانيه ،بس هل مره يگلي

صخر : انزلي

باوعت اتلفت بالمكان ومن انتبهت واگفين گبال باب بيت اهلي انقبضت روحي حسيت

نزل گبلي فتحت باب السيارة ونزلت اسحل بعباتي

دگ الباب وانا وراه ،ومن رد دگه اجانه صوت اسماعيل يصيح

اسماعيل : جاي جاي

بس فتح الباب وشافني وره صخر بهت ،غورگت عيوني وانا اباوعله

اسماعيل : شصاير ؟

صخر : أنتم مو زلم وعدكم غيرة المفروض على عرضكم

اسماعيل : ليشش هيج تحجييي

صفگ ايد بأيد مستهزء يحجي

صخر : حطلك گرون وتعال علي صوتك علي

كضيت اسماعيل من راد يهد عليه ،وهذا بمكانه واگف الا يكمل كلامه

صخر : نسيبكم مشتغل گواد على اختك ،استر عرضك واذا ما تعارف انا اعلمك

دار مطينه ضهره و وراه اسماعيل يصيح وكل ما تحرك احسن بروحي راح اطيح ،ما صدگت

يحرك السيارة گبل لا تصير دمايه بيناتهم، دار علي يصيح

اسماعيل : شكووو ،احجيلييي ليش هيج يحجي

_مرتضى

اسماعيل : شبيه صخاام

_ هم رد يجيب جماعته للبيت، وهل مره

دنگت اريد اكمل بس تهضمني الحجاية ،صاح بدون صبر

اسماعيل : احجييي شني هل مررره

وانا مدنگه شبكت ايدي وحده بالثانية اقوي روحي وجاوبته بصوت يرجف چن هسة رديت اعيشن الموقف من جديد

_ صحبانه ،طبوا علي للغرفة

شهگت من رفع راسي بقوة

اسماعيل : شسوولج

بجيت اشكيله

_ رادوا يعتدون علي لوما الله سترني وگدرت اشرد

اسماعيل : وشجااابج على حفيد أل غضب

_ من طلعت من البيت شفته ،وحتى رد وياي للبيت اخذوا مرتضى وصحبانه ما اعارف وين

بملامه گال

اسماعيل : جا مو گلتلج لا تردين بس ما سمعتي حجايتي ،هسة احسلج

بجيت بهشگه حايره شني الاحجي اله ،شاگول ،اگله امك واخوك هددوني

باوع علي حاير شني اليگوله

اسماعيل : طبي جوه

طبيت بوجهي للغرفة ،البيت هدوء كلهم نايمين ،نزعت عباتي وگعدت صافنه وي

روحي

شنو الي چان صار لوما شردت ،ولوما لاگيت صخر وين چان اطيت وجهي ؟؟؟

تمددت بمكاني ،صافنه بالسگف والف حسبه ببالي واولهن شنو الراح يصير لمرتضى ،غفيت وما فزيت غير على صوت كرار يلعب يمي ،گعدت على حيلي مفرفح گلبي على شوفته ،حضنته اشم بيه واحجي وي سكينة

_ خوما تعبج

سكينة : لا والله حباب

لميت وجهه بين ايدي وهو يضحك وسكينة واگفه تباوع علينه مبتسمه ،عدلت شعري وگمت كاضه ايد كرار

سكينة : شما تحجي وياج امج لا تردين ترا من عارفت بيج هنا تسودنت

_ صدگ اسماعيل گاللكم ؟

سكينة : أي ،وحجة لعمي بفعلة مرتضى

_ وشگال أبوي

أبتسمت فرحانه

سكينة : يطلگج منه بس تفض هل سالفة

كضيت ايدها ما مصدگه السمعته

_ عليج الله

سكينة : والله

ضحكت من كل خاطر ما مصدگه راح اخلص من جحيمي

سكينة : اضحكي اضحكي ،تروحلج فدوه خالتج أم السحورة

ابتسامتي ما گدرت اخفيها حتى من طلعت ،وبس شافتني امي تسودنت

نادية : تضحكيين ،على صخاام وجهج بالمصخمه ولج طينيي راسج زلمتج بالسچن

_ عليش اطين راسي ،يستاهل انسب مكان اله السجن

گامت على حيلها خازرتني ولوما أبوي گاعد چان كتلتني ودفنتني بنفس

الساعه عمن امي عدها خواتها وخلفتهن اهم مني

كضت ايدي سكينة واخذتني وياها للمطبخ ،گعدت وهي تسوي الريوگ ثنيناتنه ساكتات ،حطت الصينية گبالي وگعدت

سكينة : اكلي ما تسوى تضوجين

بحسرة گلتلها

_ شوكت اسمع كلمه ال يمة منها ،دگ عمري العشرين وانا بحسرتها

سكينة : عشرين سنة لازم تتعلمين

_ شلون اتعلم ما تگليلي

سكينة : اعتبريها ميته واسفه على حجايتي

_ صعب هيج اعتبرها وهي گبالي چن عدوتها انا موش بتها

طبطبت على چتفي وگامت

سكينة : ماشية اجيبن كرار ياكل لان خبصني جوعان

هزيت رأسي ب أي وهي طلعت للحوش صاحته ردوا ثنيناتهم گاعده گبالي توكله اباوعلهم مبتسمة ،ابني ما عده خالة من نفس دم امه، بس سكينة مكفية وموفية

سكينة : شو تباوعلينه ؟

_ هنيالي بيج والله

أبتسمت ودنت روحها علي ،باستني من خدي وكرار گام باسني من خدي الثاني

سكينة : شعدي غيرج انا

_ لا انا عدي غيرج

كرار : حبج ماما

يحجيها مكسر يخليني اگزگز عليه ،جريته لحضني أبوس بخدوده واردد

_ عسل أنت ، لا مررربه

يضحك بصوت عالي يخليني اروي كل اشتياقي اله ،اخذته من حضني

سكينة : اكلوا الاكل صار ثلج

بس كفينه الريوگ طبت خالتي بشرى ،دنگت لكرار شلته وضليت بمكاني اباوعلها من مشيتها مبين عليها هاده ومن انتبهت علي ما لحگت اشرد هجمت تطگني وحتى ما فكرت كرار بأيدي

عطت من جرت شعري ،روحي صارت تطلع بس اريدن اسيطر على كرار لا يطيح من ايدي بس من طگتني على راسي ما سيطرت بعد وطاح، ساعة العاط نسيت روحي

نسيت شلون ادنگ اشيله ،سكينة گبلي شالته تعيط

وترجف

سكينة : حرااام عليج ،شني من بشررر أنت ،ما شفتي الولد بيدهااا

ذبت عباتها ما مهتمة وانا وسكينة انخبنصه ب كرار الما رضى يسكت، باوعنالها بحقد وكره الدنيا كله بهل لحظه من گالت

بشرى : بدال ما حايرتلي بهذا بيج خير خلفيلج ولد يشيل اسم ابوه يا عاجر

من حرگة گلبي وشوفه كسرة سكينة بالگالته ،لوما اخافن لا تكبر الطلابة الا اخليها

تطلع اليوم بدمها وانسى هي أكبر مني ،عطت عليها بحرگة گلب

_ عاجررر ولا جايبة خلفة عاق مثلج

كفت رداناتها

بشرى : اكمل عليج تردين ؟

باوعت الها من طبت علينه للمطبخ

نادية : عوفيهن خية دواهن عدي

اخذتها وطبن ثنيناتهن ،باوعت لسكينة محترگ گلبي مشيت حضنتها

_ يرحن الج فدوة حتى امي وياهن ،ابد لا تاخذين بحجيهن

بلعت ريگها تهز رأسها ب أي ،كضيت اديها وصعدنه فوگ ابد ما نزلنه منا لمن مشت ،وبالليل بس اجه سعد وافتهم بالسالفة الصارت حجاها اسماعيل گال

سعد : ما ترد لو يحب الگاع

حسن : وشني بكيفك أنت تقرر ؟

سعد : حسن اتعوذ الشيطان ولا تحجي وياي احسلك

حسن : متعوذ الشيطان وناعله هم ،بس اسألوها خاف تريد زلمتها

يباوعلي بنضره بيها چن يگلي فنج تأيدين قرارهم

اسماعيل : حتى لو تريد ترجعله ما اخليها

گام وگف على حيله ما متهم، صعد فوگ بس گبلها أبتسم ابتسامه وراها اعارف ماكو شي خير يصير!

بس كلمن مشى الغرفته انا اخذت كرار وطبيت للغرفة ،تمددت وحطيته بحضني

ما تروح من بالي شلون طاح ،لو صايرة طيحته على راسه چان شحالي هسة ..؟؟

عدلت شعره بأيدي اباوعله من نايم ،شگد يشبهني حتى عيونه عيوني ،عدلته على الفراش وغطيته ما گدرت انامن وما اعارف شلون طلعت وببالي فكرة راح الگاه يم الشط

الحجاب على راسي ،عباتي الچنت اطلع بيها بعدها بمكانها، طلعت من الباب

الخارجي حطيتها على رأسي ومشيت ،هدوء، وبس صوت دوسة رچلي على الحنطة مسموع

وگفت بنص الاراضي اجرن النفس ،وبس حسيت ريتي ارتوت من هذا الهوا الطيب كملت دربي ،بدون ما التفت وراي حتى

گبالي صار الشط عاكس الگمر بمايه ،حمحمت بصوت خفيف بس بذاك الهدوء مسموع، طفر

من مكانه و وي ما طفر عثر ،صحت فازه خايفة اباوعله

_ الله الله

ما اهتم لرجله الي التوت وبرمشة عين صار گبالي گبل لا يحجي جر نفس طويل وتلفت شلون الما مصدگ

ليث : هلا بالماحضيت بيها ،كواكب محور حياة ليث

وجهي حسيته صخن ،المسافة البيناتة چانت اكثر من نص متر ،ما فكر يتقدم اكثر بس اكتفه يباوعلي ومن رفع ايده يعدل شعره انتبهت على رچفتها ،أبتسم من شافني عيني عليها، نزلها يراويني

ليث : ترجف الروح الملگاج

_ اممم الكتر

ليث : شبيه ؟

_ بعدك لابسه

ليث : ما مفكر اشيله

دنگت مقهوره على هذا الحب الما حضيت بيه

ليث : اگعدي

مشيت گعدت على الچرف ،رفعت راسي من حسيت بيه گعد ،باوعت على الگمر ،صار شگد محرومه هل گعده

ليث : تحجيلي شصاير ؟

باوعتله وهزيت رأسي ب أي ،بديت احجيله بدون ما اچذب لو بحرف واحد وهو طول الوكت

چان يسمعلي بدون ما يقاطعني ،وبس ختمتها بالصار اليوم وجية خالتي گال

ليث : يعني تطلگين منه ؟

_ ما اعرف ،كل مرة يگلولي نطلگج ويغدرون بي

ليث : مو الا يطلع من السجن ،انا اخلي صخر وعزيز يرتبوها بس امشي للسجن يرمي عليج اليمين

_ ما اعتقد يرضون اطبن للسچن

ليث : ولا انا ارضى بس ما اريدن نفوت هل فرصة

سكتت حايرة وهو سكت، ضلينه گاعدين هواي وما بينه احد حجه، گمت حتى اردن وهو وگف ،رفع شعره ،انتبهت عليه كلساع نازل على عيونه كلش طويل

ليث : ديري بالج على روحج ولا تنسين أنت اهم انسانة عدي

أبتسمت وهزيت رأسي ب أي ،بس طبيت للبيت هو رد لقريتهم ،على كيفي امشي عباتي ذبيتها بره ،هستوني اريد افتح باب الغرفة وفززني صوتها وراي

°جفون°

اغسل بالمواعين وهو رايح راد يشمر حجاية، رفعت السفجنه متروسه تايت

_ ادمرررك والله ،وخر مني

نوح : شگد نحسه

_ اصيح عمو محمد عليك والله

فزيت من وگف وراي ،درت اباوعله عيونه صارت بعيوني

نوح : ومن تصيحيه شتگليله ؟

_ اگله ابنك يتحارش بي

نوح : عفيةةة حتى يعرسلنه بساع

طگيته على صدره ودرت اكمل وهو وراي يضحك ابتسم وارد اخفي ابتسامتي ،لهناك وطبت عمة بس شافته صاحت

عطاء : هااا أبو السفينه

نوح : هلا بأم رأجس

عطاء : انجب لك أم چسار

نوح : اروحلج فدوة ياعمة شگد احبنج ،هيج گاعدة گعود بنص گلبي

عطاء : عمن مهدتلك الطريق

نوح : أي والله

هم يحجون وانا اغسل بالمواعين ركض ركض عمن ما ضل وكت لازم انضف البيت الليله عدنه مجلس

زهرة : هاا يمة جفون خلصتي

اجت وگفت يمي وانا احجيلها

_ راح اكمل ضل بس اطلع انضف گن الدجاجات

زهرة : عفيةة بعد امج ،وأنت نوح شعدك هنا ما تمشي للموكب

نوح : حارة يمة روحي بس يكسر الجو امشي

زهرة : جا الولد مو هناك

نوح : انا ما اتحمل حر اعذريني

عطاء : ممرض چيس حب

نوح : لا تعيلين بي عمة عمن تخسرين

عطاء : خاااب دطيرر

طلعت وخليتهم، فتحت قفص الدجاجات طلعتهن يلعبن ومديت الصونده اغسل الگنن مالتهن، هستوني خلصت وفززني من طلعلي من بين الاشجار ،حطيت ايدي على گلبي

_ عود صدگ تحجي نوووح

نوح : خرررب اهل نووح، ارريد احضن ابوووس عايش بتصحر مايصير هيج

فكيت عيوني

_ ياا شبيك

نوح : ليش هيج صايرة حلوة

غمضت عيوني ورديت فتحتهن بغرور

_ من يوم يومي هيج حلوة شني أول مرة تشوفني

نوح : جا بحلاتج سحلتيني انا والسفينة بس كل ما جاي تكبرين تحلين اكثر وانا گلبي رهيف ما يتحمل

_ اممم

رفعت الصونده ساده الماي بس اهدده

_ اذا تتقرب ارشنك والله

نوح : اذا اكضج

يغمزلي ويحجي وانا اسلوب السرسرية هذا اول مرة اشوفنه بيه، صحت

_ اهوووو

ضحك ومشى يطلع، لميت الصونده وطبيت ركض يم غاية للغرفة بس شافتني گالت

غاية : وينج صار شكد اصيحن عليج

_ بره طلعت اغسل گن الدجاج لان بعد راح نلتهي

غاية : خوش عاشت ايدج

_ وايدج

غاية : طبي اسبحي بساع حتى نحظر الضيافة

هزيت رأسي ب أي وطلعتلي هدوم سبحت ورديت مطشت شعري ولبست حجابي وعلى اصواتهم طالعت بس شافوني ركضولي ثنيناتهم ويسابقون ياهو اليوصلي اول

دنگتلهم حضنتهم ثنيناتهم ،وحوراء وسوالفها اموتن عليهن بالاخص من تبوسني وتگول

حوراء : احح جون حوه

سيف : حبج

_ اني هم أحبكم ياروحي

حواري : خبصوني خبص والله جفون ما جفون

_ فدوة اروحلهم

كضيت كل واحد من ايد وطلعتهم يم الدجاجات يحبون يلعبون وياهن ،گعدت اباوعلهم بس طبيت اركض من صاحتني عمة تسأل على الاستكاين غاسلتهن ،طلعتهن وطلعت الشكر ومشيت اريدن اطلع وفزينه على عيطة حوراء الخلتنه كلنه نتراكض ...