رواية خلخال مشوه الفصل السابع والخمسون 57 بقلم زمرده

 

 

 


رواية خلخال مشوه الفصل السابع والخمسون بقلم زمرده




منو الگلك من محبتك راح امل
انا احبك باجر وهسة وقبل
ولك شملك انا مهووس بهواك
الك حب بگلبي ما شاله العقل

°كوكبة°

يا حيل العدي يوصلني اله ،طحت من طولي گباله على ركبي ،الطم مرعوبة ما عدي جرئه ارفعنه من الگاع خايفة من فكرة
خسارته ،الوكت هنا تمنيته يوگف من خوفي حطته سكينة بحضنها ،زحف وصلتهم جريته منها حاطته على صدري اصيح بعلو صوتي
_ ابنييي ياااايمةةة ،كراررر يمةةة ،يابعددد روح امك لخاطرررك عايشة امك لا تموووتني ،حاجينييي، گلي ماما

احس عقل ما ضل براسي من نزل سعد يركض واخذه مني وضل يحجي على حسن عمن ما تحرك من مكانه ،وهنا انتبهت على رأسه شلون مفتوح غطيت وجهي
اعيط متسودنه ومنظر راسه طبع بعيوني كضتني سكينة وي دموعي
دموعها تطيح ،طب سعد مخبوص گبل لا يحجي گالتله
سكينة :اخذها سعد وياكم تموت اذا تضل هنا

سعد : هو أجيت عليها ،بساع اللبسي عباتج ،سكينة اصعدي جيبلي فلوس بساع

بلمح البصر طرت للغرفة لبست حجابي وعباتي وطلعت اركض،فتحت باب السيارة مخليها مشتغلة وحطيته بحضني ابوس
بيه واحجي وياه چن يسمعني، الدرب كله انا ما خليت نذر ما نذرته ،گبل لا نوصل بشويه حطيت
ايدي على گلبه، رديت تحسست نبضه اكثر من مرة اچذب روحي ،دنگت
حطيت اذني على صدره وما حسيت بروحي غير لطمت على وجهي وعيطت
_ سعددد خويةةة، ما يدگ گلبه ،خوووية ابنيييي

احضن بيه بقوة وبلساني ماكو غير
_ خويةةة ابنيييي

يريد يهديني بس حاله مو اقل من حالي ،داس بانزين طير السيارة بينه يحاجيني
سعد : مابيه شي خويةة لا تخافين ،هسة نوصل بس اطي صبر

وانا يا صبر بالروح ما ضل ،ما صدگت نوصل تلگونه اخذوه من ايد سعد ،اچذب بأحساسي ،بس عمره احساس الام ما يخيب وياريته هل مره خاب ياريت ما حسيت حتى ولا عشت
العشته بهل لحضه ،بشرنه الدكتور بأبشع شي صار وياي ،تمنيت روحي طرشة ولا سامعته يتأسف گبل كلامه
_ اعتذر منكم على الراح اگوله بس صدگوا سويت كل الطلع بيدي

بلعت ريگي وافترت الدنيا بي ،غمضت عيوني ورديت فتحتهن اباوعله وادعي لا ،هاي المقدمه بالكلام خوفتني
سعد : خير دكتور مو طاح گلبنه احجي

من باوعلي الدكتور هنا گبل لا يحجي عرفت ،غطيت بايدي وعطت بصوت رج المستشفى من گال
_ البقية بحياتكم الطفل مات ما قاوم الضربه براسه

طاحت من راسي العباة فقدت بنفس اللحظة،اللطم على روحي وما احسن، الوجع الصاب گلبي ما مرني گبل
_ يمةةةة ابنييي، لا يمةةة كراررر ،لا يابعددد حيلي جااا بعدني ما شفتك زلمة ،بعدني ما شديت ضهرري بيك ،ليششش تخليني وانا لخاطررك اعيشن

كضني اسماعيل الما حسيت عليه من اجه ،يردني اثبت بين ايده وانا تسودنت اخر ذرة من عقلي فقدتها كل انواع الانهيارات عشتها بوكت قليل

فلتت روحي من ايده وركضت طاحت عباتي من راسي وانا اشوفنهم طلعوه، هذا گدامي ،ضناااااي جثة بلايه روح ،حطيته بحضني حايرة اعاتبنه لو الومون روحي
_ يمةةة كرار يمةة ،يا كسرة ضهرري يايمةةة، ولك شلون تخلي امك بلاياك ما اعيشنن انا ،ريتني ميته ولا درت عيوني عنك ،عمن ريتهن بالعمة الما انتبهلك

احضن بيه اريدن اشبع منه ،شلون ما راح اشوفنه بعد ،شلون ،فارگته چم يوم وانا اعارفنه عد سكينة باحسن حال وگلبي يطگطگ عليه ،شلون بي هسه شلووون ...؟؟؟

بوسته من عيونه ،ودموعي على وجهه الزغير الما راح اشوفنه بعد نزلن ،شهگت ودرتلهم وراي واگفين سعد واسماعيل
يمسحون بعيونهم وحتى الممرضات وياي چانن يبچن ،نار بگلبي ولو موتت روحي من البچي ما تهيد هذا ابني ،هذا فكة عيوني ،هذا التحملت كلشي لخاطره ،بحس يرچف رددت
_ هذا الچنت احلم بزفته ،افرش نزلته البيضه بايدي وارگص بعرسه واگولن انا ام الولد سوولي درب اهوس
شهگت وصحت نار بنص گلبي
_ مات الولد ،مااات ،ما لحگت حتى اشوفنه يلبس هدوم المدرسةةةة، ،ولججج يمةةة

كضني ما يخليني اشگن ثوبي وانا حتى اللطم ما جاي يبرد گلبي ،اخذوه گدامي ،گالو للثلاچة ،وراهم أصيح واتوسل
_ ما يتحمل برررد ،يتمرررض بساع ،اطونياااه ادفيه

حضني يضم وجهي بصدره ويردد بصوت مختنگ
سعد : كافي خوية ،كافي اروحن فدوة لعيونج ،هذا الكاتبه الله

رفعت راسي اشهك حايره شني الاحجي وشاگله وشلون اقنع روحي بالكلام الجاي يگوله ،عدل حجابي وحط عباتي على رأسي وصاح ل اسماعيل من رد چان ماشي وياهم وجبرني اردن للبيت ،الدرب كله گضيته بالبجي ما يروح من بالي شكله ولا فكرة اخير مرة شفته وبعد ما اشوفنه ..

تلگتني من الباب تدوره بين ايدي بعيونها، بلايه ما تسألني گتلها
_ مااات ،راح يدفنوووه، ردوني حتى يدفنووه ،ولج سكينة بعد ماكووو كرار، ماكو اليگلج كينه

شهكت ولطمت على روحها ،چنت بعازة التگابلني و وياي تلطم على مصيبتي ،دم خدودي بين ايدي اجه من خرطتهن بأضافري ،ومن شفتهن طوال صحيت بحرگة گلب
_ لخاطرر لا يتأذه اقرضهننن ،اوول مرة انسااااهن

باوعتلها وعمن محترگ گلبي ما گدرت اسكت مثل كل مرة
_ ابنييي يمةةة مااات ابني ،شلوون واگفه هيييج وما تگابلينيي ،شني من ام أنت ،شوووفي حااالي على ضناييي ليش مو هيج أنت

ما اهتمتلي وما چن احجي ،تمنيت بس مره وحدة مره تلمني بحضنها ،اجت حضنتني سكينة وانا الروح هاي تلوب وما اريدنها بعد ،اليوم عساه لا انحسب من ايام حياتي ،گضه بس گضت بيه
روحي بالليل ردوا تلگيتهم وانا حالي حال التسودنت وما ضل عدها عقل بعد
_ دفنتوووه مووو، ولك خووووية سعد ،شلووون دفنتوووه وخليتوه وحدده، يخاااف وليدي يخاف چان حتى الصوت العالي يخوفه، مو چماله هسة ضال وحده

اجه كض ايدي عيونه فصوص حمر يريد يبچي بس يعارف يزيدها علي ،مختنگ باوع ل اسماعيل ورد باوعلي
سعد : اجه جده علينه گضاها مصايح وتهوس يتهمنه احنه الكاتليه

رفعت ايدي ادعي عليهم واحد واحد بحرگه گلب
_ ربييي مثل ما انحرمت من ابني ،احرمهم راحه البال

نادية : شكووو تدعين

ردت ارد عليها بس سعد گاللها
سعد : واذا حجت ،ما هامج حرگة گلبها ،كل همج ماتدعي

اسماعيل : خليها امك ،خليها ماشية ورة خالاتك نشوف وين تاليها

نادية : شووو اشوفن عضمك قوووة، گلبتك الما تتسمه

اسماعيل : وشدخلها يمة المن بكلشي تحطينها بالنص

نادية : عمن اعرف ما تفر عقول الزلم غير النسوان

استغفر وجبر روحه ما يرد عليها ،هادت الوادم بس گلبي شلون يهيد
الليل كله گضيته گاعده على فراشه ما غفت عيني حتى بالغلط وهو مو بصفي كل
ما اريدن اتمدد ابطل واردن للبچي واباوع الايدي الچانت مخدته

رفعت اباوع للباب من سمعته انفتح ،عيوني مغوشة ما شفتها الا من گعدت گبالي ،تربعت دموعها بعينها بس جاية تهون علي وانا يا حجاية التهون ليلتي هاي

كضت ايدي تحجي وياي وانا بس دموعي تنزل ،ضلت يمي والتعب سيطر عليها وغفت بفراشي المفروش بعده وبصفه فراش كرار
دگ الباب وصاح
سعد : كوكبة

_ ها خوية

فتح الباب باوع علي ورد باوع لفراشي من شافها گال
سعد : وانا اگولن وين اختفت

_ يمي

الحجاية بالگوة تطلع مني ،احجي واحسن حنجرتي مثل المجرحه، حجه وياي شوي وطلع و وصاني انام عمن اليوم تعبت بس ما يعارف
بعيني چافت النوم عگب شوفته ،عده الليل واجه الصبح وانا على نفس الگعده والضهريه وسمعت صوت خالتي بشرى بره
گمت مورم گلبي ايدنها تحجي وياي حجاية حتى احطن ضيم گلبي بيها ،فتحت الباب ومشيت اتبع اصواتهن هي وامي جاية من المطبخ ،بس وصلت ما طبيت ضليت
واگفه عد الباب وهي بس شافتني گامت بكل عين صلفه دايسه البيت
من جديد ولا چن گبل چم يوم مسويتلها مصيبة ما تتسولف بي

چتفت ايدي اباوعلها من گمت تعيط علي نازله عليها الحنية
بشرى : ريتج ميتةة أنت ولا هوه ،ولج شلووون طاااح وين چنتي عنه وييين

وزادتها علي امي الما توقعتها راح تصف وي اختها حتى بهاي مصيبتي
نادية : شگد اگلها عينج على الولد لا تخلي يصعد وحده تگلي كبر ويعرف وما عليه شي وتالي عنادها خسرته

موسعه عيوني واحس بوجع بگلبي صار ،مو جديده علي امي بس شعور الملامه العيشنياه هسه يكتل وانا ما عايزة وجع اكثر كافيني الليله المضت علي مو چماله يحملني الذنب

ضلن وحده تجيب والثانية تودي وانا واگفه اباوع عليهن بهل لحظه حتى
ما بچيت من صدمتي ،مو انا ام فاگده والمفروض يهونن علي ..؟؟

سكتن ثنيناتهن من اجه صوته من بره ،طب عاگد حاجبه باوعلهن بخزره عيونه تتنقل بيناتهن ،بأستغراب باوع الامي ياشرلها على خالتي

سعد : انا مو گلتلج اختج ما تطب البيت بعد ،شو جاي اشوفنها گبالي ؟

بشرى : يمةةة وعليش ما ترديني اطبن، تراااه بيت اختي مو بيتك

حط ايده بجيب البنطرون بكل استنكار يحجي
سعد : شني نسيتي سوايتج، نسيتي السويتيه بكوكبه ؟

بشرى : ما ماتت، شوفها مثل الصل واگفه كلشي مابيها

رفع حاجبه
سعد : اها وأنت ترديها تموت ؟

بشرى : ما گايلة هيج

سعد : افعالج تحجي خالتي

بحزم خاصم الكلام كله گال
سعد : حسبي حساب اختي ما تضل على ذمة ابنج بعد العرفته عنه واذا ما طلع من السجن بايدي اخذها يطگلها وبعد أي واحد منكم ما اريد اشوفن وجهه

نادية : وشنو بكيفككك أنت تقررر، بيتي هذا وانا الاقرر منو يضل ومنو يمشي

سعد : اختج ما اررريدن شوفتهااا هنا ،لا والله اتصرف تصرف لا يرضي الله ولا عباده

بشرى : شتسوووي ،هااا تطررردني ،خيةةة نادية ابنج ما يحترمني خية وهاي عود انا خالته

هز ايده يستغفر، تمثيليتهن كلها ما تعبر عليه هو اذكى من هيج
سعد : بطلن سوالفچن ما مليتن والله زحمة بحق نفسچن گبل كلشي

درت ضهري ومشيت اردن للغرفة ماعندي قابلية اضلن بيناتهم اكثر بعد ،بس گعدت وره شوي فتحت الباب وطبت شايله صينينة الغده، حطتها گبالي وگعدت بساع حجت
سكينة : امانة الله لا تفشليني من امس لليوم ما اكلتي شي

رفعت عيوني امنع دموعي ينزلن بساع تكومن بيهن
رديت اباوعلها
_ ما اگدر والله ،الماي ما جاي تهواه الروح موش الاكل چماله

تريد تحجي وتقنعني بس تتردد، شالت الصينية وطلعت ،شوي وسمعت صوت عياط بره أول شي
ما ردت اطلع بس من
ركزت وچان صوت سعد يصيح على خالتي بشرى ومن طلعت وشفته جاي يشحتها
ماي بارد ونزل على گلبي ضليت بس واگفه واباوع بعيوني ،من حرگه گلبي هسة لو يطلعها سحل گدامي هم ما ارتاح
سعد : جاااي اگوول اطلعييي ،تسمعييين شجااااي احجي

حطت عباتها على رأسها تتعود بيه وخلت ومشت مسح وجهه يباوع الامي
الانهدت عليه بعد اشكال من غلط ودعاوي ،رفعت ايده وسعد يباوعلها
نادية : روح يااسعد عساك ما شفت خيررر ،تكض الذهب يصير بيدك تراااب وعمررك ما حضيت ببزر يشيل اسمك

اباوع للصدمة على وجهه شلون تقوه ،مسح على لحيته يبلع ريگه مستهضم وخله وصعد فوگ ،وراه مشت سكينة وانا ردت اردن للغرفة اجت جرتني

نادية : بس يطلع غصبا ما على راسج تردين وياه واشوفن مني التعترض الا اشهرها شهيره

جريت ايدي منها وحطيت عيوني بعيونها ما مهتمة لكلشي راح يصير لان صدگ مايهمني شي بعد انا كرار وخسرته وماكو شي يستاهل اعيشن علموده بعد
_ شتسوي سوي ولا عبالج اخافن لا والله ،اتمنى اموتن والحگ ابني ولا ضلتي معلعله بفراگه

ضلت باهته تباوع بوجهي كل ضنها مثل كل مره راح اخاف واتوسل بيها ما تحجي ،درت ضهري ومشيت للغرفة ،ايامي صارت
تمشي بلايه كل طعم ،يوم بعد يوم اكره الساعة البيها اغمض وارد افتح عيوني وانا
بعدني اتنفس وبليلة من ليالي الشتا البارده، طلعت وانا احسب الايام الصارلي بيها مفارگته

اخذتني رچلي بلايه وعي وگعدت مثل كل مره على الچرف اخذت من الماي بچفوف اديه ،غسلت وجهي اجرن بالنفس بالگوه ،شگد
مرات المرن علي بلياه، شگد متمنيه اسمع كلمة الماما من يگولها الي ،ليش مكتوبلي انحرم من كلشي احبه وبس التعب فال روحي

فززني صوته الخلاني اعده من ضمن خساراتي بهل لحظه
_ كواكب
درت راسي چن شايفتلي اهل موش انسان غريب بساع عيوني دمعت من گال
ليث : وين مختفية ،شصاير وياج كواكب ،هيج چم شهر صار ؟

رچف صوتي من گلتله
_ كرار

عگد حواجبه من حالي مستغرب وسأل
ليث : شبيه ؟

_ مات ابني ،مات كرار

وسع عيونه مصدوم ،ضل چامد بمكانه حاير شلون يواسيني من انفچرت ابچي ،صار يلوب حاير شيحجي وياي وانا يا حجاية التمر نسمة على روحي وتطفيها ..؟؟

گعد گبالي ،تردد هواي گبل لا يسألني
ليث : شلون ؟؟؟

نشغت وبالگوه طلعت مني
_ طاح من الدرج

حط ايده على رأسه يردد
ليث : انا لله وانا اليه راجعون
رفع رأسه يباوعلي
ليث : ما اعارف شني الاحجيه ويخفف عليج ،الله يصبرج أبوي أنت

مسحت عيوني اريد عيوني تسكتت
_ شيصبرني، شلون اصبر ليث ،التمت المصايب من كل كتر علي وكلهن ما يوصلن لفگده

ما رد وگام طلع باكيت الچگاير شغل وحده وجر منها نفس وعيونه علي
ليث : ريت الحزن الصابج بگلبي

_ اسم الله

تنهد تنهيده طويله ورد گعد يسأل وانا اجاوبه وختمها ب
ليث : حتى لو هددتج لا تخضعيلها، بس تطلگي حتى شهر ماخليج عدهم

ما رديت عليه كلشي طالع من عيني ،رديت للبيت وانا ما اعارف هاي اخر مره اشوفنه، اخر مره گبل كلشي راح يصير ،يومي عدن هدوئهن غريب حتى امي صوتها بالبيت ما ينسمع ،وبليله چنت انا نايمة وفزيت على أثر شي
ينحط على وجهي، نشغت وبنفس اللحظة حسيت برودة غريبة صابتني من جريت نفس ،ايد قوية ما گدرت اقاومها وشلون غمضت عيوني ما اعرف نمت لو فقدت الوعي بس كل الاعرفه فتحت عيوني وانا مو بمكاني ...

كضيت رأسي بوجع وثگل غريب ما مار علي بعشور أول مرة احسن بيه ،باوعت للباب
وغواش گبال عيوني وچفلت من شفته گبالي ،هذا مرتضى معقولةةة ..؟؟؟

°غاية°

_ ليييث

صحت اسمه وركضتله اسأل وانا عيوني لوجهه الصاير خريطة
_ شبييك ،ليث شصاير وياك حاجينيي ،ليش هيج حالك ؟؟

كض ايدي يهديني يريد وانا عيوني معلگه عد الجروح الصايرة بوجهه
ليث : غاية شني سالفتج لا تكبريها مو جديده علينه هل سوالف هاي

اشرت على جرح قوي صاير جوه عينه
_ بيش طگوك ،وجهك متشوه ليث ،خاااب شني باااوع حالك وتگلي مو جديده

ليث : جا خوما الطم وياج

جفون : شكو ،ياا شبيك ليث

اجت مفزوعه تركض وگفت بصفي، نشغت وهو باوعلنه ثنيناتنه گبل لا تحجي گال
ليث : كملت أي وعلي، احلف الچن اعالچهن وما
بي شي

جفون : شتعالج منهن جا غير وجهك تشوه، يااا يمةةة بعد محد ترضى بيك ليوثي

ليث : خلهن لا يردني انا الترضى بي وأختفت

صفنت وحطت اصبعها على رأسها تگله
جفون : شوف انا فضولي ما اگدر اكضنه والمفروض ما اگلك ياهي

ليث : تعارفيها جفون لا تغشمين روحج

جفون : اگولن انا عليمن طالعة، الحمدلله وارثه الصلافه من اولاد عمامي واحد اصلف من الثاني

باوع عليها فاك حلگه
_ لاتنصدم خوية ماتگدر تكض لسانها

ليث : بالوجه صايرة تطگها

جفون : انعديت من عمة عطاء عمن صارلها دهر عدنه

ليث : اشو ياهي التحاجيها وگالت انعديت من عمة عطاء هيج تأثيرها قوي

جفون : فوگ ما تتخيل وخوب شايف من تكف رداناتها وتحرك ايدها وتغرغش البتوب ،هنا احيرن اركز على حجيها لو على اديها

ليث : نعمة

_ خوية

مسح على رأسي بأيده يعارف بالي عده ولازم يحجيلي شصاير وياه وشني الوصله لهذا الحال
ليث : بس اسبح واگعد احجيلج

هزيت رأسي ب أي ،طب هو جوه وهي كضتني توصي
جفون : عليج الله گليلي من يحجيلج مو تغلسين علي

_ ميخالف احجيلج

جفون : عفية حبابة

طبينه انا وياها وبس شفته صعد فوگ مشيت وراه دگيت الباب وطبيت چان يمشط بشعره بس شافني گال
ليث : كل ما اريدن اگص من طوله تصيرن گبال عيني واتراجع

_ اذا مضوجك گصره بس مو كلش

ليث : لازم لان بعد مابيها مجال كلش ضوجني

گعدت على الجرباية وبس اجه گعد گبالي گلتله
_ احجيلي ضل بالي والله

ليث : سلامة بالج بعد اخوج

_ بعد روحي

أبتسم بس مو مثل كل مرة ابتسامته ما حسيت بيها من گلبه چانت بس رد على حجاياتي ومن علگ چگاره بلايه ما يذكر اسمها عارفت السالقة تخصهه

زفر دخان چگارته وبصوت مبحوح گال
ليث : ردت اختفت

_ كوكبة ؟

هز رأسه ب أي
_ جا مو على الأساس راح تطلگ ؟

رفع ايده البيها الچگار يأشر على رأسه
ليث : عقل ما ضل براسي وحگ گلبي التلوع عليها

_ رچلها طلع من السچن مو ؟

ليث : أي ،طلع الكلب ابن الكلب ،ومتأكد جبروها تردله

_ شلون طلع ،جا مو صعد محكمة ؟

ليث : ما اعارف كلشي صارر بساع بساع ،تحاكم وفجأه الحكم مالته بده يخف إلى أن قل للثلاث اشهرر وبس گضن طلعوه

_ يايمةةة كل السواه وبس ثلاث اشهررر حكمة

گام يفتر بالغرفة متشعوطه روحه
ليث : سالفته بيها أنه ومتأكد اكو جماعة وراه خففوا عليه الحكم

_ اكيد اكو ،جا هو طب للسجن بكومت قضايا لو غيره يخيس بالسجون

ليث : هو هذا السجن ما يتحاسب بيه غير الما عده فلوس وما وراه احد

_ صح والله ،ماتحجيلي شصار وياك اليوم ؟؟

رد گعد گبالي
ليث : تلاگيت انا واخوها السگط حسن گلتله نسيبك الخره وين صار ياخذ ويطي وياي وانا روحي بخشمي طگيته وتلازمنه الكلب شايل ما اعارف شني شخط وجهي بس رديتها اله وخليته مدمه على الدرب

لطمت على خدي
_ يمةةة شسويتله ؟

ليث : بردت گلبي بيه

يجر الحجايات شلون واحد مشفي گلبه من صدگ
_ عليك الله ليث احجي

ليث : اضن عظامه بعد ما يفيدنه عمن كسرتهن اله ولوما متعوذ الشيطان چان حتى رأسه فلشته

_ ياااا شبيك خوية

ليث : نار بگلبي ما جاي تطفه ،ظلمهم الها وهو بالاخص ما اگدر انساه

_ فدوة خوية افتهم مو من نصيبك هي

مشى فتح شباچ الغرفة ،وانا ضليت اباوعله مرت فتره طويله الا گال
ليث : شيقنع الروح وانا كل مرة اشوفنها من جديد اگولن راح تصيرلي بيوم
من الايام وكل المضن انساهن بشوفتها تفتر گبالي

اندار وابتسامه خفيفة زارت ملامحه
ليث : تدرين احلم باليوم البيه اردن تعبان وتتلگاني ب الله يساعدك

صفنت عليه مقهوره وهو گاضيها چگاره وره چگاره
_ وين واصل بأوهامك خوية

ليث : لعد أول طفل اشيلنه وهي امه

انا هنا لو صبرت ما اعارف روحي ،بچيت وهو صافن علي ،اشهگ من كل گلبي ،شگد تعب شگد صبر شوكت يتجازه على صبره، شوكت اشوفنه فرحان وترد ذيج ضحكته القديمة الچان يضحكها من كل خاطر عده ،والف شوكت
براسي وياريت يحلهن الوكت واشوفن ذاك ليث الچان كل همه ينام ويگعد حتى يلحگ على شغل الاراضي...

اجه حضني يصبرني بدال ما أنا اصبره، مسح دموعي يحجي
ليث : لا تخافين الما يطيبهن بنادم الوكت كفيل بيهن

_ شوكت اشوفنك مرتاح

ليث : ما اعارف

_ يحترگ گلبي وتضيگ بي الدنيه من اشوفنك مهموم هيج

ليث : ما ارتاح الا من احجيلج

_ وانا اسمعلك بكل وكت بيه يگدر خلگك ،حتى لو مو يمك تعال لو خابرني اجيك

ليث : شايل هم شلون راح افارگج

_ مو بعيده عليك انا ساعة التحتاجني تلگاني عدك

حضني يعصر بوجهي وانا اضحك ،على صوت ضحكنه طب
صخر : شكووو ؟؟

وخرت اعدل بشعري وليث جاوبه
ليث : نضحك مايصير ؟

صخر : اصواتكم اريد انخدم

ليث : صار ،انخمد خوية

جر النفاضه على الميز قريبة عليه وشمرها على ليث وهم زين وخر روحه واجت بالحايك دار وجهه وطلع
ليث : اقسم عليه بين نارين هسة

_ شلون يعني

ليث : ماعليج

_ شو أنت تحجيلي بس اليعجيك

ضحك وتمدد على الچرباية من الجهه الثانية ،نزلت وخليته وراي يصيح اطفي الضوه وانا عناد بيه حتى الباب ما سديته خله يكتله البرد ،لگيت چفون گاعده عد الدرج متانيتني بس سمعت صوت خطواتي وراها جاي انزل طفرت من مكانها وبس صرت عدها جرتني تگعدني

جفون : احجيلي شبيه ليث؟

حجيتلها الصاير وياه بس بلايه ما اتعمق، وهي گضتها علي
جفون : يايمة سودة علي ،بنوح ولا بيك ،اخخ

طگيتها على رأسها
_ بيش طالبته، تره والله احجيله عليج

جفون : ما تهزون شعره من راسي وديله

گامت عود ما مهتمة وانا ابتسمت من شفته واگف وراها ،أشرلي اسكت وانا بالگوة كضيت ضحكتي
جفون : عبالها تخوفني بأخوها ما تعارفين انا حتى من جدج ما أخاف

ضحكت بصوت ما گدرت اسيطر بعد وهي صاحت
جفون : وسم راح يگعدوون

اشرتلها
_ اخوي وراج

فزت وبساع اندارت وهو يباوعلها ومايل رأسه
جفون : شلونك

نوح : بخير حبيبتي ،بخير

بلعت ريگها
جفون : شوكت أجيت ؟

قدها
نوح : من ما چنتي تخافين مني وديله

ضحكت اكتم صوت ضحكتي بأيدي وگاعدة اباوع عليهم، دارت علي بزعل تحجي
جفون : شگد حقيرة لعد ليش ما گلتيلي عاد ما اضلن امسلت

نوح : انا ما خليتها

جفون : تصبحون على خير نعست

رادت تشرد بس كضاها بساع
نوح : وين وين ؟؟

جفون : انام ،تعبااانه حيلي مهدود

نوح : سودة علي

رمشت بعيونها بهدوء
جفون : اسم الله عليك

فكيت حلگي بصدمة من صوتها الناعم هذا ،ضليت بصدمة وهو مو اقل مني بساع سلمها تراب وجراها يريد يحضنها
_ نوووح يمعووود

وعى على روحه ودنگ متفشل مني ،رد باوعلي مستحي وهي صارت طماطيه حمره من الخجل وشردت للغرفة
نوح : اعذريني تهورت خوية

_ حرام مايصير تكضها اعقدوا حتى كلشي يصير بالحلال

هز رأسه ب أي يأيد كلامي
نوح : راح احجي وي جدي باجر

_ عفية زين تسوي

وصدگ ثاني يوم وي وكت العشا طب هو ،چنت انا واگفه احطن الكرشي بالكاسات،وگف بصفي بصوت ناصي يحجي
نوح : راح احاجي چدج بس ادعي كون ما تفشلني

_ وعلي اچفص بمصارينها غير

جفون : شجاي تبسبسون ؟

اندارينه انا وياه من طبت، گاللها ماكو شي ومشى اجت تسألني
جفون : ياهي التچفصين بمصارينها ؟

_ ياهي ؟

جفون : انا جاي اسألج ،سمعتج تگليله غير اچفص بمصارينها

_ عليج

تخصرت
جفون : ليشش يمةةة

_ يريدكم تعقدون وخايف لا ما ترضين

صفنت بوجهي مصدومة
_ اصبن ماي حار بحلگج اذا گلتي لا

غمتني ومشت ما اخذت منها حجاية بس سكوتها يوحي على موافقتها، أخير واحد هو گعد على السفرة انتبهتله حتى ما اكل وضل يصفن منا لمن گضوا اكل وسويت جاي وهو
اجه اخذ الصينينه مني اطاهم الجاي وگعد گلاصه بيده، انا هنا حتى المواعين
ما گدرت اغسلهن وخليت وگعدت على الدرج لان اعارف بيه راح يحجي

حمحم يخوط گلاص الجاي وباوع لجدي
نوح : جدي عدي سالفة وياك ،وداعتني بيها گبل

يجوز هاي أول مرة نوح يصير بهاي الجدية بالكلام الكل ركز وياه وجدي گاله
رأجس : خير أن شاء الله گول جدي شرايد وبالتريده وياك

نوح : اريدن اعقد

محمد : نوح

باوع الابوي يتوسله
نوح : ما اصبر بعد بوية ،سنين صار رايدها گبالي بالحلال

محمد : خلها تخلص مدرسة

نوح : بس عقد

رأجس : تريد تعقد على جفون ؟

هز رأسه ب أي
نوح : عقد شيخ رايد

رأجس : هاي هي يجرالك

صخر : راضية بيك هي ؟

نوح : اسألوها

وصخر هنا بساع صاح
صخر : جفووون

شوي واجت هي وجهه لون ما ضال بيه تطگطگ اصابعها والكل عيونهم عليها حسيتها راح تطيح بساع گمت وكضيت ايدها
صخر : نوح يريدكم تعقدون ،راضيه بيه ،احجي ولا ببالج نجبرج عليه .

باوعت بوجهي عيونها مدمعة شوي وتبچي من الموقف ،رد سألها وبالگوة گالتله
جفون : أي

ابتسامته بهل وكت صعب وصفها ،ابتسامة نصر ابتسامة شخص چان
مأيس هذا الشي يصيرله وگلوله صار الك ،دنگ يشرب من الجاي ورد ضهره على الحايط مستمع للنقاش الصار

رأجس : دامها رضت بعد ما عدك كل حجه يامحمد

محمد : جا شني بوية شگايل انا هم ابني وافرح بيه اريدن ودامها رضت ما عدي كل اعتراض

رأجس : خوش جا خل العقد الشهر الجاي حتى يعدي بعد چم يوم على سنة ميمنة

محمد : هاي هي بوية مثل ما تريد

طگاه على چتفه يضحك
ليث : راح تعرس گبلنه ولك

نوح : اعقد وياي

وجدي لگاها من الله
رأجس : أي جدي ما نعقدلك وي اخيك

حسيت بيه يساير جدي من گال
ليث : لا جدي مو هسة خلها تگضي سادس عمن ما اردينها تتشتت

رأجس : خوش

ما اعارف شعجب الله هداه جدي وما عارض ،وبس عده اسبوع كلها عارفت
نوح وجفون راح يعقدون أبتسمت وطلعت اتلگاها من طبت وگبالها جهالها بوجهم
مشوا فتحوا گن البطوط يمشون بس شافتني گالت وهي تنزع عباتها

حواري : وين جفون الا اهلس رومشها اليوم

_ شعدج وي رموشها ؟؟

حواري : وداعتها بيوم راح ترضى بيه گالت لا وتعاركت وياي وسوتلها زعله وگتلها بس يجي هل يوم الا اهلس رموشج رمش رمش

ضحك
_ يااا

حواري : وينها هي ؟

_ جوه اضن جاي تقره

حواري : معصبة الخامس هاي كلش ليگول شوف شني ،هسة انا لو الرابع هم ارضى وفلا افكن حلگي

_ سجاجه بنيناته مو مثلج

حواري : چنتكم عيني چنتكم

طلعت تباوعلها بطرف عينها
عطاء : شعدج جايتنه

حواري : اهووو بعدج زعلانه ؟

عطاء : جا شني

حواري : اجيبلج سبحة جدي العقيق تبيعيها وترضين ؟

ضحكت ولا چن توها مدلغمه
عطاء : متفقييين

حواري : وين جدي ؟

عطاء : طالع

وحواري ستوها صدگ ،شدت رأسها بشالها وكفت ردناتها، طگتها عمة
عطاء : وين ماشية ولج لحرب

حواري : مو حتى احسن بطعم البوگه الراح ابوگنها واگضي العمر اعيرج بيها

عطاء : جا انجبي ما اريدن

حواري : وانا هم بطلت

ضحكت عليهن مزاجهن شگد متشابه ،بس طبينه مدت رأسها من باب الغرفة ما شافتهن بس شافتني
جفون : اطلع ؟

اشرتلها أي بس طلعت ردت تركض للغرفة من شافت حواري بس ما لحگت تسد الباب عمنها هجمت عليها مشيت وراهن على عياط جفون لگيت حواري گاعده على بطنها وكاضه وجها
حواري : مو گلتلج اهلس رموشج ساعة التگولين اريدنه ،اثبتي خل اهلسهن

وخرت من الباب وطبوا سيف وحوراء گعدوا على جفون وهاي من كد ما اختنگت گامت تعيط ،وخرت منها حواري وشالت حوراء
وهاي اتفل على جفون كل ضنها متعاركات ،گاملتها جفون جرتها من حواري وبس شالتها كضت شعرها خلت جفون تفرفح وما ترضى تهده وهي تضحك ،على صوت خبصتنه اجه نوح من الباب يصيح شكو ،گلتله
_ ماكو شي بس حواري وبتها دارن على جفون راح يموتنها

نوح : ليش هيج خوية على بختج مو صاحبج هي

حواري : انا ما علي هاي بتي ملخت شعرها وما ترضى تهده

يسمع صوتها شلون تتوسل ب حوراء ما گدر
يضل ساكت صاح علي
نوح : غاااية وخريها لا اطبن انا والله شني فرفحت وانتن تباوعن عليها

تگايلنه على حوراء ندغدها وعمنها عرمه بالگوات هدت شعرها ،وبس نزلناها بالگاع وطلعت كضاها
هو
نوح : ليش هيج عمي ،ليش وي شحمتي ،يااابة كووون اعض اصابيعج

عطاء : صارت علني السالفة

تدير بعيونها ما تريد تباوعلهن عمه عطاء وحواري تگابلن عليها خلنها تحط حجابها على راسها وتشرد من الغرفة تحلف تشكي لابوي عليهن

_ ليش هيج عمه ،والله خطية تراها تستحي وجاي تحرجنها

عطاء : خايبة يا مستحه هذا

حواري : اندري يا عمة ينوكل ينشرب هذا

يضحكن ناصبات عليها ،خليتهن وطلعت ادور على جفون ،صوتها اكثر من مره ماكو عارفتها گاعده بره وصدگ بس طلعت لگيتها گاعده يم گن البطوط وسيف وحوراء گبالها يلعبون، صحتها دارت تباوعي

_ ضجتي ؟

هزت رأسها ب لا ،گعدت يمها
_ يداهرنج تعارفين طينتهن

جفون : اعارفهن بس انا جاي اعيشن شعور غريب انتقاليه بحياتي مو بسهوله اتقبلها

_ صح

عدلت گعدتها تواجهني
جفون : تعارفين نوبات هواي اصفن واگولن ،شلون هيج وانا چنت معتبرته اخوي

_ وهسة

جفون : كلشي تغير ،احساس ما اعارف اوصفه

_ حب

صفنت ضايعة بوجهي ،رفعت اچتافها حايره وابتسمت تباوعلهم يتمالخون على
البطة گامت تاخذها من سيف بكبره هي وشايلها وحوراء موتت روحها تريدها

شحتتهم بزعانه
جفون : امشوو مني شني هااااي عمي كل ما تجون تهجمون على حيواناتاتي مايصير هييج

وهم جفون صاحت عليهم بعد گلبوا الدنيا بالعياط وما سكتوا الا حطت بحضن كل واحد بطه تتحسب على حواري
جفون : حسبي الله عليج وعلى جهااالج وعلى الساعة البيها صرت صاحبتج

مدت راسها من باب المطبخ
حواري : شبييج صايرة طباگات كلش

بنص نگرتهن وانفتح باب الشارع طبوا ابوي وجدي وهذولي التوم بس شافوا ابوي ركضوله عمن يموتون عليه ،دنگلهم يضحك باسهم يحجي وياهم

محمد : بعد جدكم اليوم عدنه شعجب

مشت لجدي وجدي وهي الجهال مو صحبه كلش بس هاي اللوتيه اكلت براسه حلاوه بساع خلته يشيلها ويستمع لسوالفها
حوراء : ددو ماما جوون

تأشرله عود تعاركن وجدي ما مفتهمها وحتى انا ما مفتهمتهم چنت الا بعدما ترجمتلنه حواري ،لهناك و اجه حق عليهم ومشوا وردينه التهينه بالدوام وگبل عقدهم بيومين خبصتنه خبصه
كتابها بايدها ومعانده ما تمشي للصالون تحف ولا تحجز شي تلبسه ولهاي ساعتها بعدها بالاسود وما ترضى تنزعه

دنگت شالت شحاطتها ،لابسه عباتها ومتانيه شوكت الله يهديها ،بس شافتها مشتلها شردت ،وگفت عد باب الغرفة وجفون قافلته
عطاء : اطلعي الا اگطعنه على رأسسسج ،الج ربع ساعة اذا ما تحظرتي اطب انعنع ضلووعج، مو عبالج عرووس واحترمج انا هل سوالف ما توكل عدي

جفون : عدددي امتحان ،امتحااان باجر عدددي

عطاء : ياچلوه الج وأمشي مو يبستي ريگييي

فتحت باب الغرفة مادة رأسها
جفون : خوش اذا أجلوه اروحن وياچن

امي گاعدة وعباتها بحضنها
زهرة : والله الصبح اخلي ليث يمشي يأجله الج

جفون : جا تانني بس ابدل بساع

والحمدلله من الله هداها وبس مشن طب نوح گلتله نزل الي البردات مال بيت كلهن اغسلهن، ما راح نعزم احد بس هاي
بعد عادات لازم بكل مناسبة تصير نسوي حملة على البيت من هاي الزينة ،من طبن چنت توني جاي اشر اخر زوج
بردات هديتهن من ايدي ومشيت اصلي على محمد وانا اباوع بوجها

_ تخبلييين ولج شطااالعة

جفون : متت، وجهي راح يموتني

_ صاير احمر كلش

عطاء : غير شهرتنه وخزتنه بس تبجي چنها زعطوطه

جفون : اسكتي عمة اسكتي گلبي مورم منج والله

عطاء : راح اغلس عنج عمن طالعه حلوة

_ باعي اح اطلعلج روبه حطي على وجهج هسة يبرد

جفون : والله

_ أي والله اتذكر انا بس حفيت حطتلي ميمنة روبة على وجهي وحتى حب ما طلع بيه

جفون : جا خوش

تونه طبينه وطبت جده ساندها فقار بس شفتها كلت بزعل
_ شني جدة هل أيام گاضيتها عد هيوفة ترا مايصير هيج البيت وحشه علينه جاي يصير

غضة : بعد ما امشي يوميا ،ها احسن ؟

_ أي احسن

بس انتبهت لجفون صلت على محمد
غضة : عين النبي تحرسج ياحبوبة ويعين گلب نوح على هل حسن هذا ،صدگ صبر ونال

وهي منا الوجه احمر وهيج حجت جدة صارت ما تنشاف فقار مشى وهي ضلت مدنگه كاضه بردان ثوبي
_ مشى ارفعي راسج

باوعتلي وردت تباوع لجده وكلنه نضحك عليها عمن ما متعلمين تستحي گضت
عمرها لسانها أطول منها وبيوم العقد مشيت وياها انا للصالون أبوي گال الا تمكيج حتى لو
العقد بيناتنه ،رادت مكياج خفيف وام الصالون رواتها صور مشتغلتهن وبس اختلات مكجتها واخير شي وبعد التسريحة لبست
فستانها السمائي بكرستال ناعم من الصدر ويجي ردان شيفون طلعت بيه مثل الاميره ،رتبتها وضليت اباوعلها شني الناقصها

_ الذهببب

گلتها وفتحت الجنطة طلعت منها العلبة ولبستها گلادتها وتراجيها ومحبس واخير شي سوار ابوي جابه الها گبل چم يوم من جابولها الحلقة
_ هسة بعد ما تحتاجين شي ،طااالعة تخبلين

افترت گبالي
جفون : عليج الله ،يعني صدگ حلوة ؟

_ والله تخبلين

أبتسمت بين الفرحانه والمتوتره، لبستها البرگع وشديته زين من دگ علي ليث وگال بره متانينه

اول شي وديت الجنطة وبس شافني وحدي گال
ليث : جا وين عروستنه ؟

أبتسمت
_ هسة اجيبنها

اخذ مني الجنطة وانا رديت طلعتها ،فتحلها الباب الوره وصعدت وانا گعدت بالصدر وگبل لا نوصل خابرهم يسوولنه درب للسياره ،وهاي چانت أكبر غدره من جدي طلع عازم من أمس ومحظر كلشي حتى متفق وي الطباخ وما عرفوا الولد غير الصبح من مشينه للصالون

_ عوود صدگ عااازم ؟

ليث : أي والله القرية صارت كض اخوك لا يطيح

_ ياا يااا جا مو حزنانين بعدنه

ليث : يگول بس غده للوادم حتى يعارفونها صارت اله

_ والله تفكير عليه

ليث : تفكير شيوخ على گولتهم

_ هم زين نضفت الديوان

ضحك
ليث : هاي وين تفكرين أنت

أبتسمت ومن وصلنه كلش قريبين على القرية گال
ليث : ابد لا ترفعن رأسچن

السياره كلش گبال الباب خلاها بحيث خطوتين وصرنه بالبيت وبس طبينه تلگنه بالچگليت بلايه هلاهل عمن ذممناهن
گبل لا نمشي ،گعدتها ومشيت للغرفة بدلت ركض ركض ورديت يمها لگيت حورية گاعدة بصفها بس شافتني گالت

جفون : عليج الله تعاي وخريها مني ترا هسة اگومن اكتلها وافضحكم گدام الوادم

باوعت لحوريه
_ شبيج وياها ؟

حواري : كلشي مابي بس جاي ادهرها وهي ما تتحمل عيني

جفون : ما تداهر مثل البشررر لو تسمعيها شتحجي وياي چان هسة ببدالي أنت تطگينها

عضت شفتها تضهم ضحكتها من سألتها
_ شتحجي وياها ؟

حواري : سوالف متزوجات ماعليج

_ اها هيج صارت
جريتها
_ امشي يله شوفي ميمنة وين

حواري : عد عمتها وين قابل

_ صدگ اجتي بركة ؟

حواري : أي مشنيه انا وعمة عطاء جبناها سحل هي وامها

_ صخام الصخمج ولج من تحجين احجي مثل البشر هاي شبيه لسانج

حواري : يمعووووده

مشت ما مهتمه ،وانا گعدت اسألها رايده شي وهي گضتها علي
جفون : مختنگه ،راح اموتن ،يمةةة صارت صدگ

_ يااا كافي خايبة

ضلت لازگه بي والبنات كلساع وحده جاية تعيل بيها حتى هيوفة دارت عليها وختمها
ريحانة : تفهمين شني اخوووي ،ما ارضى بيه وتشوفين

جفون : اهووووو

يضحكن عليها وهي منا متوتره وزاد توترها من گالوا نطببها للغرفة حتى يعقدون ،سترها وطببتها
لغرفة جدة وضليت واگفه قريبة على الباب اباوع عليها تعصر بأيدها ،بساع رفعت راسي اباوعله من طب والابتسامه تارسه وجهه، لابس قاط رسمي بلون نيلي
حواري : اقلام جاف طالعين

گرصتها واگفه بصفي ما تگدر ما تنصنف، وره ابوي يمشي وگبلهم جدي والسيد
هنا حسيت شلت همها اكثر من اخوي وتمنيت اطبن اكض ايدها اعارفها ترچف هسة

°جفون°

جريت نفس من حسيت بأيد انحطت على اچتافي ومرتين حركها بمعنى انا يمج ،أبتسمت من سمعت صوته وراي
محمد : انا ولي امرها سيد

السيد : مو ابو الولد أنت ؟

محمد : هذا جده يمك، وانا هاي بتي

غورگن عيوني وما تحملت ما ابجي ،حضن راسي انا والبرگع يهمس
محمد : مكياجج يخرب وتصيرين مو حلوة لا تبچين

جريت نفس بالگوه على روحي تمنيت بهل لحظة احضنه واگله شكد انا احبه وشگد دوم احمد الله واشكره عمن هو عمي
السيد : على بركة الله نبداء

كل ما يحجي كلمة انا اعصر ايدي اكثر وتردد ذيج الايام العشت بيهن هنا وما اعارف روحي انا يتيمة الاب والام وهذولي
بيت عمي ،أيام چنت اعتبرهم كلهم اخواني ،ولو سألوني شگد عدج اخوان اگولن
صخر ،وليث ،ونوح ،وهيوفة ،وغاية وانا الزغيرة
إلى أن بيوم من الايام تحجبت وبده كلشي يتغير وصاروا يعلموني على الحلال والحرام ومن اسأل ليش ما يصير انزع حجابي
گدامهم مثل غاية انا موهم اختهم ،كثرت اسألتي وسولفلولي السالفة الگضيت اكثر من اسبوع انا ما مستوعبتها ،أمي جابتني للدنيا وماتت وأبوي استشهد وانا توني اخطي أول خطواتي ومن يومها
تكفل بي عمي محمد ومثل
ما يگول عده اعز من بناته الي من صلبه ،ركزت وي السيد من صاح اسمي وبده يحجي
السيد : بتي جفون منير رأجس هل تقبلين الزواج من نوح محمد رأجس على المهر المعلوم مقدمه**مليون دينار عراقي ومؤخره** مليون دينار عراقي ،فأذا قبلتي قولس نعم أنت وكيلي

عصرت فستاني حايره شون انطقها ،رد سألني وجاوبته بصوت خافت
_ نعم أنت وكيلي

السيد : نوح محمد رأجس ،هل تقبل الزواج من موكلتي جفون منير رأجس على المهر المعلوم ب مقدم** مليون دينار عراقي ومؤخر**مليون دينار عراقي فأذا قبلت قل نعم قبلت التزويج

نوح : نعم قبلت التزويج

السيد : الحمدلله الذي بنعمته تتم الصالحات ،مبارك لكم والله بجعله زواج مبني على الموده والرحمة

اسمعهم يردون عليه ب
_ الله يبارك بيك سيد

ويس مشى السيد وجدي وياه اعتلت الهلاهل وعمي من راسي وخر البرگع وضل مخليه على اچتافي مبتسم يحجي وياي ونوح وراه واگف عيونه تلمع كل ما باوعتلهن
محمد : تمنيت ما تطلعين من بيتي واضلن محافظ على أمانه منير ليوم الدين وصار التمنيته وكبرتي وعروسه لوليدي صرتي ياعمي

حضنته بهل لحظة اشوفن بيه ديره موش بس اهل باسني من راسي واندار على نوح
محمد : اخذها واطلعوا بوية لبسها حلقتها ومن هل يوم انا ابوها گبل لا تضن ابوك

رد حضني وطلع وطبن هيوفة وغاية ،غاية بصفي اجت وهيوفة يم نوح ،طلعنه وبس گعد بصفي تدنه يهمسلي
نوح : شطالعة ،السمائي ياكل ويشرب عليج ،گلبي طاح من شفت حسنج

ما رديت عليه وحتى سويت روحي ما سمعته ،ومن گالوله لبسها الحلقة رد حاجاني
نوح : الصغتها انا لو الجابها أبوي ؟

باوعتله عيني بعينه منتظر جوابي
_ الصغتها عجبتني

أبتسم وطلعها بساع مو جيبه ومن راد يلبسنياها صاحت عليه
ريحانة : يااا نووح جا هاي شني العدي بالعلبه ؟

نوح : ضميها
رفع الحلقة الصار هواي متاني اللبسها
نوح : هاي ضامها من زمان وجه وكتها

لبسني حلقتي ورفع ايدي باسها بلايه مستحه خلاني اجمد من حركته الما توقعتها، اطتني ريحانة حلقته الفضه لبستها اله، رفع ايده يأشر الامه
نوح : ولبست حلقتها يمة الگلتيلي ما تصيرلك وجاي اتعب روحك

زهرة : يابعد روحي يمة سبع سعادات

گام وگف على طوله وانا هم وگفت من اجت جده تتباركلنه، جرتله يدنگلها باسته تگله
غضة : عينك عليها نوح لا تضوجها حتى لو هي نوبات ما تنحمل بس تحملها عمنك موتت روحك عليها

ضحك يگلها
نوح : بعيوني احطنها جدة

اجت باستني هم توصيني وردت ونوح طلع من صاحوه الا گدرت اجرن نفس ومن التعب حتى ما گدرت اضلن
بالفستان شگد لحن علي بس ما گدرت ومن طشت الوادم ومثل
كل بت عدنه بيوم خطوبتها صاحوني ملتمين حتى يباركولي
_ غاية والله استحي

غاية : جا شلون متانينج

_ گليلهم نمت

غاية : يمعوده وين اكو وحدة تنام بهاي الهوسة

_ جا شلوون

غاية : اطلعي والله كريم المستحى وحده يطير

كضيت ايدها
_ لا تهديني

طلعت وياها اول شي صاحني جدي وچانت اضن اول مره يحب راسي ويحجي وياي بنبرة صوت لطيفة
رأجس : بالمبارك جدي

رديت عليه مدنگه رأسي
_ الله يبارك بيك

واحد واحد عمامي باركولي والولد من بعيد حجوا وياي ومن وصلت عد صخر باسني من رأسي يوصي نوح
صخر : اذا ضوجتها اكسر ضهرك لا عبالك اوگف وياك

وهو واگف على جهه مبتسم
نوح : گدامك اذا ضوجتها حتى رگبتي اكسرها عمي

صخر : عود عبالك اخليك براحتك من عقدت ،أنت بمكان وهي بمكان منا لمن تزوجون

هز ايده يباوع لعمي محمد
نوح : شني بوية سالمييين

محمد : اخوها وبكيفه

عيوني بيها الدموع تفتر ،مبتسم يباوعلي من صارت عيني بعينه
ليث : عليش تبچين ياحلوة

_ أحبكم انا

ليث : جا حتى احنه نحبج

شهگت ابجي وكلها تضحك علي اجت غاية حضنتني وليث بصفها يگلها
ليث : اشبكيها حيل بالنيابة عني

تضحك وتجعصني بحضنها اكثر ،وبالليل البنات ضلن كلهن عدنه ومنهن سيوف وغمد ،ندست ريحانة أاشر الها على سيوف الصافنه
ريحانة : سيوووف الووو

فزت حاطه ايدها على گلبها
سيوف : شبيچ ؟

ريحانة : وين صافن الحلو ابو عيون حلوة ؟

باوعتلنه وحده وحده ومن نضرتها چانت مبين متردده تحجي
هيوفة : شكو شبيج ؟

سيوف : احس اكو شي غغيب ،ما اعغف يجوز اوسوس جاي

بركة : شو هاي سألت وجاوبت روحها ،شبيج ؟؟

تنهدت ضايعه
سيوف : بغهان ابن عمو يوسف

بركة : أخوي

سيوف : أي

بركة : شبيه ؟

سيوف : اليوم ما غضى لان انا لابسه صايه من أجيت وگالي حجاية ضلت بغاسي

حواري : يا الله ،اللهم صل على محمد وآل محمد خايبات انفكت الچبسه

ندستها
_ ولج

تباوعلنه مستغربة گالتلها ريحانة
ريحانة :حجايتيش ؟

سيوف : گالي تستغي لخاطغ الناطغج سنين

حواري : يمةةةة

عاطت وعيطتها خلت در تفز وميمنة تگعد تبچي غمتها ريحانة وهي ولا مهتمة شالت ميمنة وگعدت بصف سيوف
حواري : أي وبعد

سيوف : ماكو بس هيج گال

حواري : خايبات طلع يعارف يحجي وانا گلت اودي حق يعلمه

غاية : ازغرهم ياكل بعقلنه حلوه بس مسوين روحهم ثگال

غمزتلها
ريحانة : مثل عزيز مو

أبتسمت وما ردت عليها ،وعلى گعدتنة واندگ الباب ما لحگت اسمع السالفة كاملة وتمددت اريدن اسوي روحي نايمة من سمعت
صوته بس الحقيرات فضحني سويت روحي ميته من سألهن
نوح : جفون گاعدة ؟

جرت البطانيه من راسي هم زين مطيه ضهري للباب
حواري : حتى لو ميته اگعدها الك

نوح : اسم الله عليها من الموت يابه

گرصتني ودنگت تشاورني
حواري : گومي لا اعضج والله وتنفضحين

بس طلع گالتلي
حواري : مشى اگعدي

گعدت على حيلي اضم گذلتي ورا اذني وهن يگللي گومي وانا لازگه بمكاني، گامت جرتني من أيست مني اگوم گالتلهن بحزم
حواري : گومن نطلع ونصيحه يجي هنا يشوفها

خزرتها
_ شبييج؟

حواري : امشيله واحترمي روحج

كاضه النعال چنها عمة عطاء ،گمت اتحلف بيها بس طلعت لاگاني يريد
يصعد ملامحه بساع تغيرت ورد نزل ،وگف گبالي كاض ايديناتني ثنيناتهن
نوح : گلت ما راح تجين

هد ايدي بس ضل كاضني من وحده مشى وانا وراه طلع بره وگعدنه على
دجات الديوان الخارجي ،أبتسمت من تذكرت حواري سولفتلي على هذا المكان وشگد تغيرت حياتها بهاي الگعده
نوح : شحمة

چنت مدنگه اباوع الايده الشابك اصابعها على اصابعي ويحرك ابهامه على الحلقة ،رفعت رأسي ورديت ب
_ ليش شحمة مو جفون ؟

أبتسم
نوح : عمن بياضج يشبه بياض الشحمايه

_ اممم

رفع ايدي يباوع للحلقة
نوح : أيست تنحط بأيدج وهواي نوبات ردت اشمرها

_ وما شمرتها

نوح : ما اطاني گلبي

رمشت مبتسمة ،عيوني بعيونه وهو يتأمل وجهي وشوي شوي نضراته تتجرئ اكثر ،دنگت وهميت اريدن اگوم بس ما خلاني وكض ايدي بقوة يسأل

نوح : وين ؟

_ هناك

نوح : وين هناك ؟

اشرتله على البيت ،دار وجهي عليه وتقرب مني اكثر
نوح : مستحيه مني ؟

بلعت ريگي
_ ما متعوده هيج ،الوضع هذا جديد علي

نوح : اممم حگج

_ امشي

هز رأسه ب أي ،گمت طبيت شبه منهزمه، شلون اتعود على التغيير الصار بالحال، چانت بالمطبخ موبايلها بايدها وتحجي بصوت ناصي من عبرت منها سمعته گالتله
غاية : شلون ما أحبك ،والله اموتن عليك

درت اباوعلها حاطه ايدها على خدها وتحجي فلا چن بس صوته جاي تسمعه عبالك گاعد گبالها وهيج مستحيه، ما حاجيتها ومشيت للغرفة الصايره ملحمه بس طبيت جرتني
حواري گعدتني بنصهن حسيت روحي مجرمه وجاي يحققن وياي

_ خايبات هدددني تحقيق لو شني

هيوفة : رد لسانها يانعمة الله

_ شلون ما يرد اذا انتن حتى الاخرس تحجنه

تمددت وغطيت راسي وما اعارف بروحي شوكت غفيت ومن گعدت لگيت المكياج والهوسة كلها طابعة بالمخده
غاية : بسم الله الرحمن الرحيم

_ شبيج ؟

غاية : وجهج گومي شوفيه

گمت اباوع على روحي مصدومة ،اشرت على وجهه
_ هاي شني هاي

غاية : شلون تنامين بالمكياج ؟

_ نسيته

غاية : نعمة ،امشي اسبحي وانا طالعة اسوي ريوگ هذا صوت أبوي

اشرتلها على سيوف وغمد
_ جا وين الباقيات

غاية : مشن كلهن وبس ريحانة ضلت لخاطر سيوف

انتبهتلها نايمة بسد الحايط وبصفها عون ،مشيت طلعتلي هدوم ومن طلعت من الحمام صار
بوجهي حرت شلون اطلع وهو فاتح اديه ثنيناتهن ساد الدرب
_ نووح

نوح : رموشه

أبتسمت على حجايته واشرتله
_ وخر

فتحلي ايده
نوح : اريد احضنج ،احس بلذه
العقد

خزرته وهو ولا چنه جرني لحظة مربط علي، بايده صرت ارجع وخرني ايده على خدي
نوح : شبيج ،كله حضن ما سويتلج شي ،جفون يابه

_ بس خل اروحن

وخر من دربي ومن طبيت للغرفة چانت گاعدة على الفراش بعدها تتثاوب، اخذت المشط وگعدت گبالها
_ مشطيلي

غمد : شني ماعدج ادينات ؟

_ عدي بس مخشب شعري من السبري

اخذت المشط مني وبس كملت گتلها
_ شكرا

غمد : العفو

گامت باوعت لروحها بالمرايه من صفنتها حسيت اكو شي ،ندستها
_ شبيج صافنه ؟

غمد : اگلج ومو تگولين

_ لا ماگول وعد

غمد : اكو هيج شي غريب يصير بگلبي من اشوفنه

_ علي ؟

هزت رأسها
_ خاف تحبي ولج ؟

غمد : لا مو حب

_ جا شني ؟

غمد : من اعارف اگلج

ما لحيت عليها، طلعت گبلي وانا وراها ومن طبينه للمطبخ جان نوح يم غاية يسولفون على اثر صوتنه من گلنه
_ صباح الخير

ثنيناتهم انداروا، عيونه علي
نوح : احلى صباح بحياتي هذا

ندسته غاية وهو أبتسم وطلع من المطبخ ،بين ما كملنه كلهم
گعدوا واخير وحده ريحانة مشيت گعدتها غسلت وبعدما صبحت على الگاعديم اجت گعدت بصفي ،گبالها صخر ابد ما رفع رأسه ما اعارف ليش حسيته ضايج
من گعدتها گباله ،هي ابد ما انتبهتله وگضتها توكل بعون وبس شبع وگام الا اكلت هي

صبيتلها چاي جديد وحطيته گبالها
ريحانة : شكرا

_ بالعافية

رأجس : جدي صخر

رفع رأسه
صخر : ها جدي أامر

رأجس : گبل لا تمشي سويلك فره على المحلات ولم أجارهن

صخر : صار

رأجس : وأنت ليث محلات الگصابه مرلهن عمن هل سبوع ماكو المشالهن

ليث : اليوم ماعدي شي راح امشيلهن

رأجس : بعد جدك

نزل گلاص الجاي من ايده وفجر القمبله الخلت جدي يطفر من مكانه
محمد : امس شيخ واحد بلغني اليوم راح يمرولنه هو وغازي

°هيوفة°

طلعت من بيت اهلي شايله دره بس شافني اخذها مني يبوس بيها
ضيرم : بويةةة اشتاگيتلج

بزعل گلتله
_ حتى ما باوعتلي، شني هيج اخذت مكاني بتك

ضحك وكض ايدي نمشي للبيت ويحجيلي
ضيرم : محبة الجهال عد الابو من محبة أمهم وانا احبنها چي منج وتشبهج

_ اممم، ضل اكل بعقلي حلاوة

بس طبينه للبيت دار علي مبتسم ،رفع مناظره مزغر عيونه
ضيرم : منين متعلمتها هاي ؟

_ من غاية ،تگول عليكم تاكلون بعقلنه حلاوه

ضحك يعدل شعره
ضيرم : لازم أخوي ماكل بعقلها حلاوه وهيج تحجي

_ اضن هيج

ضيرم : تعاي نطب

طب گبلي للغرفة حط در على الچرباية وگعد يناغيلها توها بدت تناغي وهو طاير عقله بيها
ضيرم : يابعد ابوووج ،بابا ،دره ،عزيزه گلب ابوها

كل حجاية يحجيها يدنگ يبوسها ويرد يحجي وياها اخذت هدوم ومشيت
للحمام سبحت ورديت لگيته حاطها على صدره وغافي هو وياها ،أبتسمت ومشيت شلتها حطيتها بكاروكها،مشطت شعري وطفيت
الضوه وتمددت بصفه ،حس علي وغطاني وياه حطيت رأسي على ايده اباوع عليه مغمض عيونه مبين عليه التعب عمن
اليوم گضوها ركض بركض مخبوصين بالخطوبة والعزيمة المسويها جدي وما عارفوا بيها غير بأخر وكت ،غفيت بساع من التعب وما
فززني غير صوت دره تبچي ،گمت سويتلها ممه ورديت نومتها وبعد ما اجاني
نوم ،بكل صفنة اصفنها واگعد وحديغير صاحبة عمري ما تجي بيها ،هواي فگدتها اليوم وتمنيت گاعده بيناتنه
ضيرم : ريشتي

درت على صوته عيوني مدمعه ،فتحلي ايده حضنته وبچيت وهو ساكت بس بأيده يمسح على راسي ،رفعت رأسي احجيله الي بگلبي
_بكل وكت اتمناها، ما جاي اتعلم على فراگها والله

ضيرم : الحياة تمشي وماكو بشر نسى ،تناسي مثل كل واحد فاگد عزيز

_ مو بيدي ،مضت اكثر من سنة وانا يوم واحد ما مر وهي ما مرت ببالي

مثل كل مرة يصفن علي حاير ،تنهد تنهيده طويلة وجر الموبايل من دگ رد وعارفته صخر من گال
ضيرم : هاا صخر ،هاا جدي گال ،خوش اتريگ واجيك

بس سده سألته
_ وين ؟

ضيرم : يگول جدي گايله نمشي نلم أيجار المحلات

_ جا راح انزل اسويلك ريوگ

أبتسمت من باسني من راسي ،بدلت هدومي ونزلت وره شوي لحگني تريگنه انا وياه ومشى ،ماعدي شي وعلى نومة دره نضفت البيت وتوني مكمله وصعدت اركض على صوت بجيها، شلتها اسكتها
_ كافي ماما ،كافي ياروحي ،اشش اشش

بس سكتت بدلتلها ونزلت عمتي بس شافتني شايلتها فتحتلي ايدها اطيتياه
نجوى : يمة هلا ،يمة فدوة لهل صباح هذا ،يابعد روحي البنيات

خليتها عد عمة ومشيت سويت ريوگ الي والها تريگنه بس انا وياها عمن الولد بعدهم نايمين وعمي طالع ،للعصر وطلعت مستغربة على صوت الهوسة الصارت بره، اجت وگفت بصفي گبل شوي ردت من بيت جدي
ريحانة : اضن صدگ اجه غازي

درتلها مستغربة
_ شعده جاي ؟

ريحانة : اكيد علمود بركة

_ ياا ياااا

مشت من زرف الباب تباوع وبساع اندارت علي فازه
_ شبيج ؟

ريحانة : صخر لجحني

_ ياااايمة

وجهه اصفر وخايفة بس ردت تباوع بعدما غيرت مكانها، مشيت بصفها
_ اگلج هذا ياهو الواگف وره غازي ؟

ريحانة : اضن هذا رهيب ،راح افتح الباب واگله تعال اخطب انا بت عمها وراضيه حرامات ما يتفوت

_ استقرري
ضحكت وردت تباوع ،انا اباوع وكلشي ما مفتهمه عمن ما اعارفهم

°ليث°

غازي : انا ما اللحن على شي اذا ما متأكد منه وانا كلي ثقه سالفة ابن عمها رايدها هاي خطة منك حتى بعد لا نوصل حدكم

رأجس : وين عايشين احنه، ويا خطة هاي التحجي عنها

باوعلي من بين الكل ورفع ايده
غازي : عليك داحي باب خيبر گلي البت أنت رايدها حتى من هل ساعة ما تشوفنه بعد

نتر جدي ما راضي
رأجس : شهل سوال هذااا

غازي : اخذ منه كلمة وانا اعارفه ما راح يحجي غير الصدگ

الولد كلهم يباوعولي، حرت مابين اچذب وانقذ الوضع ومابين احجي الصدگ والوصنها على روحي باوعت لجدي والحجيته بمثابة جواب لغازي چان

_ جدي اذا الك نيه تطي، توكل واطيهم ما عليك بي

الحجيته مثل ضربه على رأسهم ،جدي موسع عيونه ويباوعلي وعمامي والولد مصدومين
وغازي مبتسم فر سبحته بنفس الحركه مشتركين هو وجدي
غازي : بعد ما عدك كل عذر

نتر بغضب
رأجس : انا ما رايد اطي ،ما زايده خبزتها علينه واشمرها بيناتكم

رهيب : بيتي وحدي اذا على هاي أنت ف انا ما راح اگعدها وي احد

بأستنكار سأله
رأجس : شني المخليك تجي على وحده من بنات عدوكم ؟

ما رد عليه بس اكتفى بأبتسامه ،وجده رد ببداله
غازي : موش اعداء احنه ،بيوم چنه مثال للصحبه لو نسيت ؟

رأجس : أي نسيت

غازي : انا اللازم انكر صحبتك عمنك لوعت گلب ولد من ولدي وخليتني من لعوته ادفنه وطيحتها الك لخاطر ابنه ما اريدن يعيش العاشه ابوه، وما راح املن هل مره و وعد
كض شاربه
غازي : غير من بناتكم ما راح اعرسلهم ثنيناتهم وغريب راح اخذله بت من بنات حنان

ضحك جدي مستهزء بكلامه ،باوع ل برهان ورد عيونه لغازي
رأجس : الچبيرة لبرهان

غازي : والزغيره ؟؟

علي : الي

باوعتله مصدوم هذا منين طلع وشوكت اجه وگف بصفي ،العيون كلها صارت عليه كمل حجيه چن عمي سمير واگف موش ابنه
علي : بت عمي وانا رايدها

ابتسم جدي
رأجس : الك مثل ما تريد

غازي : دام من صدگ اولاد عمهن رايديهن خلهن واطوني بس وحده

شيخ واحد ابد ما تدخل ضال بس يباوع متأمل تنحل بس مثل كل مره طلع
غازي من القرية ما محصل كلمة من جدي ،وبس مشى دار علي يحجي
رأجس : شلووون هيج تحجيييي ،عقل براااسك أنت لوووشني

يوسف : خله بوية أول وتالي ما اطيهياه، شني زايده علي واجبرنه عليها

رأجس : مو بكيفه ،ياخذهااا ورجله فوگ راسه

وانا سالفة الاجبا هاي ابد ما مقتنع بيها ولا راح اقتنع
_ اجبرني جدي وشوف ،ساعة وحدة وحگ الحسين بالديرة ما اضلن

چان يريد يطب من سمع الگلته ردلي بكل غضب فر وجهي براچدي گدامهم كلهم ،صيحوا ما راضين وهو يگللهم
رأجس : من تالي ليث يكسررر حجايتييي، هاااي تاليهااا

محمد : شلون تطگه بوووية

رأجس : ما عليك أنت لا تدخل

°هيوفة°

متت من القهر عليه من شفت جدي طگه وبنفس الساعة مشى لسيارته شغلها
ورگع الباب حيل وطار وضلت بس الترابه وراه، الولد يباوعون عاجزين
شني اليسووه، وبين زعلهم وضوجه برهان وحق من الحجاه گاللهم بلايه اهتمام

جعفر : عاشت ايده وزين سووه

برهان : على شني عاشت ايده، فشلنه گدام الوادم

جعفر : جا خوما تريده ينجبر ،خله بعد احسن لا يريدها وهي هم ما تريده

على وگفتهم وشفتها اجت تركض ،من وره الباب اباوع لهبطتها بس شافوها الولد كلهم صاحوا
_ شكو

حواري : بركةةة طاحت ،ما جاي تگعد حق الحگلهااا

ركض حق گبلهم كلهم وانا طبيت لبست عباتي وريحانة وراي مشينة لبيت عمي وأول
ما طبينه گبالنه صار حق شايلها ،گباله طلع برهان يركض شغل السيارة
وطلعوا و وراهم عمة ضلت تبجي ما لحگت تمشي وياهم ،ضلينه نصبر بعمه بس شيصبرها اذا هي كلشي يصير وياها تربطه بميمنة وبصائر وما تطيح من لسانها
شيماء : ربي بس هل وحده ضلت عدي اخذ من عافيتي وشافيها

ريحانة : اسم الله عمة لا تحجين هيج ،والله هسة ترد وكلشي مابيها

شيماء : الله يسمع منج ،ياااارب

اجوي گعدوا گبال بيبتهم، يسألوها
سيف : ليش بجي

حوارء : اواااه ششه (جده)

فتحتلهم ايدها گاموا مشولها ،شوي وطبت غاية بايدها موبايلها
غاية : خابر صخر وگالي اجي اكلكم صحت وبس يگضي المغذي يردوها

شيماء : يا الله ،اروحلج فدوة ياعمة على هل بشارة

أبتسمت وضلت شوي وگالت
غاية : راح امشي ومن تجي اجيكم

شيماء : هلا بيج عمة

گمت
_ اوگفي اجي وياج ،ريحانة تجين ؟

ريحانة : لا راح اضلن

_ خوش

مشيت انا وغاية واول ما طبيت سألتني عمة شلونها گتلها صارت زينة واخذت دره من ايدها، وبس سمعت بيها ردت مشينه
انا وعمة نشوفها، چانت طول الوكت الملتمين بيه احنه هي ساكته وابد ما
حجت ،من رديت لگيته توه يريد يطب للبيت ،بس سمع صوتي اندار وابتسم
من شافني ،عمة طبت جوه وانا ضليت واگفه گباله بنفس المكان الوگفت بيه گبل چم سنه بس مخطوبين چنه واجانه صخرا خذ در من ايدي وايد الثانية حطها على خدي
ضيرم : عيونج ،روحج ،خجلج، والاهم حبج الي الضل يوم عن يوم يزيد كلهن احبنهن

_ اممم

دنگ باسني من خدي يضحك
ضيرم : حللتي ؟

دلغمت
_ لا

ضيرم : امشي اجيبلج انا ؟

_ ضيرم وين اطي وجهي اذا حامل صدگ ،والله دره بعدها زغيره وانا ما گاضيه جامعتي

ضيرم : تجيبين ببداية الدوام لا تضوجين

مبتسم يحجي وياي
_ شو چنك فرحان

ضيرم : طاير غير

_ وانا راح اموتن من القهر

جرني يشبكني
ضيرم : اسم الله عليج يابة ،كلهن تسع اشهر وتجيبين

_ والنساوه ضيرم

ضيرم : اتنسى ببدالج

ضحك من طگيته على زنده واطاني دره ومشى يجيبلي تحليل ،حللت وطلعت بساع وهو عد الباب متانيني
ضيرم : هاا

_ شوي اوگف

رديت جبت التحليل وصار التوقعته
_ حامل

صلى على محمد وشبكني يضحك فرحان وانا من هل لحظة شلت هم ،وخرني يعدل بشال الطاح من راسي
ضيرم : لا تضوجين نربيهم انا وياج

_ انقهر على دره اخافن لا اقصر وياها

ضيرم : حتى لو تقصرين انا موجود اعوضها

ابتسمت ما اريدن اخرب فرحته ثاني يوم مشيت للدكتوره وياي حورية ،طبينه ثنيناتنه سوه أول ما شافتها الدكتوره گالتلها
_ حواري لا تگليلي حامل

ضحكت
حواري : لا اسم الله

جرت نفس الدكتوره وعدلت گعدتها
الدكتوره : كله حرص على صحتج وهم بعدج زغيره

حواري : دكتوره اريد حل كون ما اخلف بعد منا لحد ما يكبرون جهالي

الدكتوره : تدللين

باوعتلي
الدكتوره : شلونج ماما أن شاء بخير

_ الحمدلله بخير ،دكتوره امس حللت وطلع خطين بالتحليل

الدكتوره : هاا يعني اكو حمل

_ أي واجيت اتأكد

الدكتوره : گومي نتأكد

گمت تمددت على السدية ،شوي وابتسمت وهي عينها على الجهاز
الدكتوره : فعلا اكو حمل بس بعد ما صاير بيه نبض

_ شگد يعني دكتوره ؟

الدكتوره : ثلاث اسابيع ويومين بعدج بالبداية كلش

حواري : بالعافية مرة اخوي

أبتسمت وگمت اعدل بهدومي
_ الله يعافيج ،اخافن اگلج يوم الالج

حواري : ديري بالج

بين ما كتبتلي دوه وبين ما اتفقن على الاجراء الي راح تسويه لحواري طلعنه عمه متانيتنه بره بس وصلت عدها گلت
_ حامل ثلاث اسابيع

نجوى : يايمة صلاوات على محمد ،تگومين بالسلامة ان شاء الله

_ الله يسلمج عمة

چان بره منتظرنه طلعلته گبلهن بس شافني امشي سريع صاح
ضيرم : على كيفج

خففت مشيتي ومن وصلت عده گلتله بأبتسامه
_ افرح حبيبي اكدتلي الحمل

علت شواربه بأبتسامه ملحوظه ،يريد يعبر عن فرحته بس مستحي لان بالشارع وبس وصلنه للبيت صعدت گبله ،لحگني وبس فتح الباب اجه شبكني بقوه
ضيرم : اروحن فدوة للراح تمليلي البيت بالجهال

_ گول يا الله بس هذا الواحد

ضيرم : وهم نسوي بعد واحد بالغلط

يحجي بضحك وانا لضحكته مبتسمة ،بعد ما شاف درة وتعلق بيها صار يموت على الجهال يوميا يگلي اريدن بعد اخو
لو اخت وياها ،توني نزعت عباتي وسمعنه صوت صيحة علي الرچت القرية رچ بعلوها نزل يركض ضيرم وانا وراه ناسيه روحي ،توه ضيرم فتح الباب وصارت بوجهنه

_ اميي ماتتتتت اميييي

°نسمات°

_ الحگوااا ابنكم الحگوووه

طلعوا عمامي يتراكضون والولد هم الا اني بهل لحظة دعيت عليه من كل گلبي ،وگفت بصفي
زينة : كون ميت ،نذر الا اوزع چكليت ثلاث ايام

انخبصوا خبص ،مصايح ومراكض بفلس وانا ما تحركت گد شعره امه تلطم وتباوع عليه وشوي وطببوه شايلينه، هنا من باوعتله بلايه قهر على حاله عرفت بروحي ليا مرحله من الاذيه واصله

لطمت على وجهه تباوع عليه
أم علاء : يمةةة ابنييي، ولك يمةةة علاء ريت ايدهم بالكسررر، انكسرررت أن شاء الله الايد الانمدت عليك يمةةة

طببوه جوه واحنه وراهم وهي مگابلته وگاعدة وانا واگفه بس اباوع بعيوني وبگلبي اگولن
_ جانهم زلم ما موتوك صدگ وفوكني منك ومن جهرتك

أبو علاء : والله إلا اگاومهم والله اذا ما لويت شواربهم شوووف

أبو زينة : الحگ وياهم شما افتعلوا بطل همبله واگعد

أبو علاء : خوما تررريد تسكتتت، شوفه ضااال
بس نفسسس

أبو زينة : غمان ما گطعوه وفكونه

اشتد الحديث بيناتهم و وصل لمرحلة البيها عمي ابو زينة يطرد أبو علاء من البيت ،صاح عليهم رجل زينة
_ بعديين تعاركوااا خل نشوفله حل راح يموت وانتم تتطالبون

أبو زينة : عساااه
دار ضهره ومشى لغرفته ما مهتم

طب رضا رجل تنسيم مبين مخابرين عليه مخبوص گعد گبال علاء من شاف وضعه گال
رضا : المن مخليه، گوموا ناخذه للمستشفى بساعكم

گام يخابر ومن كلمة دكتور عارفنه راح يبلغ على حالته لان هو يدوام بالمستشفى على قسم الكسور
رضا : بساع

اشرلهم يشيلوه وانا ادعي ما يرد غير بتابوت، بس صل كلشي مابيه چم كسر وچم خياط براسه ورد من سمعت صوته صعدت للغرفة قفلتها علي وضليت گاعدة انا وهوسة افكاري ،هستوني غافية واندگ الباب علي گمت فتحهه بس صار گبالي هو گلتله مصدومه
_ وبيك حيل صعدت الدرج ،مو مكسوره رچليك ؟

علاء : حتى لو مسكوره فداج

جريت نفس طويل
_ شرايد ؟

علاء : شوفتج

_ اريد انام

علاء : هاا

_ أي والله

علاء : جا انحمي

جر الباب طبگه حيل اسمعه يغلط ويسب، تمددت فلا مهتمتله ،ضلت
اسبوع السالفة يوم تكبر يوم تصغر وبيوم طبوا واحد يصفن بوج الثاني

گعد مهموم وكلساع مستغفر ،رفع رأسه بغضب ل عمي ابو علاء موجه الكلام
أبو زينة : ابنك يستاهل هيج فصل، كسروا ضهررنه وما گدرنه نحجي

أبو علاء : ابيع ثنين من الگيعان العدي واطيهن للفصل وفضت راحت

أبو زينة : ضل طمطم ضل ،زينة صبيلي غده لهسه ما ماكل

گام بدل هدومه ورد گعد گبال الصينينة الجابتها زينة، ياكل ويحجي
وي رضا على دوام تنسيم وياه بالمستشفى ،وبغرابه عده چم يوم والسالفة كلها انحلت

زينة : صدگ لو گالوا الفلوس تغير النفوس، الوادم الما توقعت الفلوس تسكتهم سكتوا وعدوا السالفة

_ الله يعلم عمج شني السواه بعد

زينة : أي والله

گاعدة تخيط وجوه المخاد وانا مگابتلها وثاني يوم ردت تجهيزات عرسي الكل ضني خرب وبعد ما يتم عدت الحنه والعرس ولوكت الزفة انا ما مصدگة كل الصار
زينة : نسمات

باوعتلها الدموع بعيني بعد ما اگدر امثل اكثر اجت عدلت الطرحه
زينة : كلها فترة وكلمن بيكم يمشي بدرب، لا تبچين وتخليه يشوفج ضعيفه

رفعت عيوني ليفوگ استمع لكلامها وامنع دموعي ينزلن
زينة : عفيةةة هيج خليج قوية مثل ما تعلمنه عليج

هزيت رأسي ب أي وحطيت ايدي على گلبي من علت صوت الهلاهل، وصتني على روحي ونزلت تركض ،شوي
وصعد ،گمت اباوعله طب نزع ستره القاط واجه گبالي فرحته ما فرحت بيها
ولا لهفته گدرت اتقبلها، عشت وياه ليله جثة بلايه روح بس حتى ما احسسه بنيتي بعد هذا اليوم

نزلت الصبح ادور زينة بعيوني بس اريدن اشوفنه ومن صاحتني يمها للمطبخ حضنتها وبجيت من كل خاطري
زينة : عليش البچي ولج ،يا نسمات شو باوعيلي

وخرتني تمسح دموعي ،اسغغفرت تكض روحها ما تحجي من طبت وشافتني
أم علاء : عليش تبچين شهل عياره، اليشوفج يگول ماشيه من بيت لبيت ثاني

غسلت وجهي على السنك وعبرتها، الايام تمشي ايدي صرت احسنها مو طبيعية ومن مشيت للدكتور گال لازمها عملية وبس گضينه الفحوصات وكلشي حدد الموعد باجر، وساعة
الطبيت هواي تمنيت ما تفتح عيوني بعد واخلص بس صحيت على وجع مو طبيعي بيها ،زينة چانت جاية وياي وابوي وعلاء من بيناتهم صحت اسمها اشكيلها وجعي

_ ايدي زينة ،ايدي موتتني

زينة : سودة عليه ،عمو خل يطوها ابرة مسكن فرفحت من الوجع

علاء : انا راح امشيلهم

مشى صاح ممرضة اطتني الابره الا شوي خف علي الوجع ،ضليت اعاني وياها ايام وليالي گضيتها على المسكنات
ومرن اكثر من ثلاث اشهر الا گدرت احركها طبيعي

حطيت ايدي على خدي اباوع لكل ركن بالغرفة ،صار شگد عايشة بيها بس فلا تقبلتها عمنها هي وصاحبها انفرضت علي فرض ،بس اندگ الباب طفرت بساع فتحته ،طبت وسدته تدعي وياي وحطت العلاگه بأيدي
زينة : حللي وان شاء الله مو حامل

_ الله يسمع منج

طبيت للحمام اتراچف من الخوف ،وبس شفت ماكو خط ثاني طاحن دموعي من الفرح وهي بره تصيح

زينة : هااا بشرري

طلعتلها
_ ماكووو

حطت ايدها على صدرها
زينة : يمةةة الحمدلله ،يعني صايره عدج خربطة باجر اخذج للدكتوره
هزيت رأسي ب أي ادعي ابد ما يصير عدي جاهل منه يربطني بيه طول العمر

*الحاظر*

رفعت رأسي من سمعت صوته بالغرفة، وگف گبالي بطفولة يگلي
يحيى : ماما دول تعاي اتلي

_ گلها ما تريد

يحيى : ليش ؟

_ شبعانه

بس نزل صعدتلي تسأل ليش ما نزلت وبس انتبهت على وجهي نشغت تسأل
زينة : يمةةة شبيه خشمج ولج ؟

حطيت ايدي عليه متوجعه
_ طگني ابن عمج قابل شبيه

زينة : كسررر بيده كوون

بحرگة گلب دعيت عليه
_ مو كسررر، گولي مووت اليلفيه ويفكني منه طول العمر لان الكسر يطيب ويرد كلشي مابيه وهم يضل على رأسي

زينة : احس الدعاوي ما صارت تفيد بهذا الانسان

بس چانت هل مرة مختلفه وابواب السما مفتوحه و وصل دعائي بساع وما عده الليل وطب عمي ابو علاء يدگ على رأسها
أبو علاء : الحگنييي خويةةة، علاء مكتوو ،كتلووه ..

─── ⋆⋅☆⋅⋆ ───

علاء ‍

معقولة راح ينتهي دوره وتتخلص منه
نسمات إلى الابد ؟

ما اتخطى حال كوكبة بهذا البارت

كاسرة گلبي والله

الجانب الجميل من البارت
نوح وشحمته
كانت شديدة الرفض ،بينما كان شديد الاصرار
وبالنهاية نالها حتى تغيرت اقوالها إلى
_نعم أنت وكيلي
هكذا وصفنت ما كتبت اليوم بحقهم ،اما
أنت عزيزي الذي تقراء ماذا ستكتب ؟؟


تعليقات