رواية جزيرة غراب الوادي الفصل السادس
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«قد تَنطقُ بالقولِ مَخرجاً لحمايةِ غيرِك، ولا تدري أنَّ القدرَ يلتقطُ كَلِمَتَك.. ليصنعَ منها حقيقةً تُجمِّلُ بها قادمَ أيّامِك.»
(نُطقُ القَدَر)
﷽
في اليوم التالي تأخرت موج في المغادرة على غير عادتها خلف إخوتها ووالدها فدلفت إليها أمها تستفهم بغرابة:
سعدية: إيه؟! مش طالعة النهاردة ولا إيه ؟
موج (بمحاولة تماسك وتبرير): له يا أماي طالعة.. بس قالوا تيجوا متأخر شوية النهاردة.
سعدية (بشك): ليه متأخر طول عمرك بتطلعي بدري مع البنات!
موج: غيّروا المواعيد شوية.. هلبس أهه وأمشي.
سعدية: ماشي.. وهتتأخري في الرجعة ولا زي العادي؟
موج: مخبراش لسه.. هسأل لما أروح هُناك.
تركتها والدتها لتبدل ثوبها وخرجت بينما وقفت موج تتهيأ وهي تهمس لنفسها بضيق وخشية:
موج: حظي حتى لو اشتغلت عند الخالة زينب هضطر أتأخر.. ربنا يستر وما ينكشفش المستور!
ــــــــــــــــــــــــــــــــــــ**
وفي سرايا العمدة كان "وليد" يهمّ بالخروج حتى أتت إليه أمه "خضرة" مسرعة والبهجة تفيض من وجهها:
خضرة: طالع ولا إيه يا كبد أمك؟
وليد: آه ياما.. عاوزه حاجة؟
خضرة (بابتسامة عريضة): آه.. عندي أخبار زينة هتنوّر وشك!
وليد: قولي طيب وفرحيني!
خضرة: شفتلك عروسة بدر منور وخدت رأي أبوك ووافق خلاص!
وليد (بدهشة وفرحة): وه قوام كِده؟! مصدقتي!
خضرة: أيوه طبعاً قبل ما يرجع في كلامه ويقول جلال الأول!
وليد: جلال صُح.. المهم هنشوفوها مِيتا؟
خضرة: أبوك ها يكلم أبوها الأول ونشوف بكرة أو بعده بالكتير.
وليد (باهتمام وشغف): ماشي.. المهم حلوة شكلاً؟
خضرة: بقولك بدر منور وتقولي حلوة؟!
وليد: بطمن يا أماي.. عاوز بت تنوّر في الظلمة عشان لا جلال ولا أخوه يتجوز زيها!
خضرة (بسخرية ومكر): إيه هتتباهى بمرتك قدامهم مش عيب؟!
وليد: وماله؟ عشان أخليها ستهم كلهم!
خضرة: امممم.. بس مش على أمك!
وليد (وهو يقبل يدها بدهاء): عيب ياما.. كُله ولا انتي طبعاً انتي الكبيرة والآمرة!
خضرة: ماشي.. يالا الله يسهلك يا ولد.
ترك والدته وغادر السرايا والغرور يملؤه بينما وقفت خضرة تتابعه بنظرات الرضا والشماتة وقالت في سرها بنبرة يملؤها الغل:
خضرة: عقبال علي لما أفرح بيه هو كمان.. وولاد نعيمة إن شاء الله ما اتجوزوا ولا شافوا الفرح واصل!
ـــــــــــــــــــــــــــــــــــــــــــ**
وصلت موج إلى محطتها المنشودة أمام دكان الخالة زينب وطرقت الباب الزجاجي عدة طرقات متتالية لكن لم يأتِها أي رد. رفعت رأسها للداخل واستغربت:
موج: وه لسه مجتش ولا إيه.. إيه المر ده الساعة داخلة على 10 بس الباب الحديد منزاح شوية!
طرقته مرة أخرى وثالثة بقوة أشد حتى انفرج الباب فجأة وخرجت الخالة زينب تفرك عينيها بضيق:
زينب: إيه هتكسري الباب يا بت بالراحة!
رسمت موج ابتسامة واسعة تحاول بها كسب ودها وقالت:
موج: خالة زينب ازيك؟ والله صباحي زين عشان شفتك فيه النهاردة!
رمقتها زينب بنظرة شك ساخرة:
زينب: انتي يا أم لسانين خير.. جاية بدري كده ليه؟ اوعي يكون حد انطس في نظره واتقدملك وجاية تتعدلي عندي؟!
موج (بضحكة مكسورة): ياريت يا خالة معندكيش عريس طيب؟!
زينب: ولد خالك لساه صغير عليكي.. خشي!
دلفت موج للداخل تتفحص المكان بنظرات سريعة ثم مطت شفتيها باستنكار:
موج: إيه ده..ده كوافير ولا زريبة يا خالة؟!
زينب (وهي ترفع حاجبها): لمي لسانك يا بت لسه بنتصبح وهنضف بس كنت مكسلة وغفلت كام دقيقة قبل ما تاجي جنابك!
موج (وهي تشمر أكمامها): له.. ارتاحي انتي وأنا هخليهولك ينور دلوك!
توقفت زينب ونظرت إليها باهتمام واستغراب:
زينب: خير.. مقولتيش جاية ليه على الصبح؟ مش عندك شغلك في المشغل؟!
تنفسَت موج بحرارة وشيء من التردد ثم قالت:
موج: بصراحة يا خالة سبته.. وجاياكي أسأل لو لسه ليا مكان عندك تشغليني وياكي.
زينب (بتهكم): ياختي بقى حلو دلوك ما كنتي بتتمطعي وتتأمري وتقولي "أنا أشتغل هنا؟!"
ابتسمت موج وهي ترفع حاجبها بلطف ومودّة:
موج: راح المطع خلاص.. عندك شغل ليا ولا له؟!
زينب: عندي.
تنهدت موج بارتياح عارم وكأن جبالاً أُزيحت عن صدرها:
موج: هيييييه طيب قولي من بدري.. الحمد لله!
زينب: ومالك فرحانة كده هو فايز مش هيلاقي يوكلك لو قعدتي في الدار كام يوم؟!
موج (بسرعة وتكتم): له.. ما هو ميعرفش إني سبت شغلي!
زينب (بتحذير ونظرة حادة): يعني إيه أنا معوزاش مشاكل مع أبوكي وأمك وخصوصاً سعدية!
موج: مفيش مشاكل متقلقيش.. كله تمام.
زينب: سبتيه ليه من أصله؟!
موج (بتهرب وحزن متصنع): بعد دميانة كرهت المكان ومقدرتش أكمل فيه.. المهم أبدأ نضاف في إيه دلوك؟!
زينب (بشك وعدم ارتياح): مش مرتاحالك انتي!
موج (بتمثيل البراءة): ليه بس يا خالة ده أنا أغلب من الغلب والله!
ظلتا تتحدثان لوقت وزينب لا تكف عن إلقاء الأسئلة التفتيشية حيرةً من أمرها وفي المقابل كانت موج تتهرب بدكاء وتنسج إجابات غير حقيقية كي لا تفصح عن الطرد والتهديدات التي تلاحق بيتها.
بعد وقت طويل جلست على الكرسي تتنهد بتعب وهي تمسح جبهتها:
موج: يا لهوي يا خالة وزعلتي لما قلت زريبة؟!
زينب (بضحكة): والله جيتي في وقتك.. المكان نور صُح أعمل إيه بس انتي خابرة شغالة لحالي وكل ما أجيب بت هُنه تقعد كام شهر وتتجوز وتسيبني!
موج (بغمزة وسخرية): وه فال وعليه التكال!
زينب: تصدقي يا بت والله صُح خلاص هتطلعي عروسة من عندي انتي كمان!
موج (بتنهيدة مريرة): يا مسهل ألاقي بس فارس أحلامي.. والله مش مهم فارس حتة لو كَلاّف موافقة وراضية!
زينب (بدهشة): ده انتي حالتك صعبة قوي!
موج: كلام الناس واعر.. خصوصاً لما ياجي من القريب!
زينب: مين القريب.. أمك؟!
موج: آه.. اخت جوزك عايرتني كيف الغريب!
زينب: أمك صُح دبش وعقلها مفوت بس صدقيني.. هي اكتر وحدة نفسها تفرح بيكي وتشوفك في بيتك عدلك.
موج: مفرقاش.. المهم اوعي حتى خالي يدري بشغلي هنا
زينب: مش هقول بس لو عرفوا ولا أمك دريت ماليش صالح!
موج: له متقلقيش.. شوية وأنا هخبرهم بنفسي.
زينب (وهي تتأمل وجه موج بكتمان): ماشي.. بقولك ياموج؟
موج: إيه؟
زينب: ما تيجي أعدلك بدل ما انتي حواجبك لازقة في بعض كيف أبوكي كِده؟!
موج (بفزع وتراجع): له أنا كِده زينة وزي الفل.. ألحق أروح اتأخرت!
زينب: مش هطول والله!
موج: له مقدرش أبوي يلاحظ وأمي عيب!
زينب: عيب إيه يا عجلة انتي انتي مش صغيرة! أقولك.. مش هبينها من بعيد وريني بس!
جلست موج على كره منها لدقائق وكانت لا تثبت في مجلسها من شدة التوتر حتى نفد صبر زينب:
زينب: خلصت.. فزّي إيه ده قرفتيني والله لو الزباين بتتدلع كِده زيك لأشوح الواحدة منهم بكف!
موج (وهي تمسح وجهها بحذر): حرام عليكي يا خالة.. إيه ده؟ ده سواد!
زينب: سواد طيب شوفي السواد.. والله وشك نَوّر وبقتي صبية كيف القمر!
نظرت موج في المراية فصُعقت من مظهرها بدا التغيير واضحاً وجلياً على ملامحها للأفضل أبراز جمال عينيها ورقة وجهها لكن خجلها ورعبها من والدها كان أكبر بكثير من إعجابها بنفسها!
موج (بصدمة ولطم خفيف): يا مَري إيه ده مش قلتي من بعيد لبعيد كنت حاسة وسألتك وانتي تحلفي!
زينب (بقتطاع وسخرية): بكفايه قومي روحي وبطلي شغل عيال.. يمكن ربنا ينفخ في صورتك وانت مروحة ويقع فيكي ابن حلال!
موج (برعب): أروح كيف كِده وأبوي؟!
زينب: هو أبوكي فاضي يركز فزّي يا بت روحي!
موج (وهي تلملم حاجياتها بكسرة): مش مسمحاكي يا خالة.. يا مَري على دي وقعة!
زينب: هتقعدي للمغرب تقولي مَري ومش مسمحاكي يلا عاد!
سحبت موج حقيبتها وهي تشد طرحتها على وجهها لأسفل بقوة لـ تداري ملامحها أثناء خروجها.
كانت هيئتها طبيعية وجميلة للغاية لكن من داخلها كانت تشعر بأن كل من في الشارع يترصد خطواتها وينظر إليها!
بعد سير مدة قليلة انزوت موج إلى إحدى الطرق الفرعية وهي تشد طرحتها بقوة لتداري وجهها حتى صادفت حصاناً يقطع طريقها وصوت صاحبه يخرج بجشاشة حازمة:
جلال: فتحي وبصي قدامك زين!
عند سماع صوته رفعت موج بصرها لتجده هو أمامها على ظهر حصانه نظرت إليه بضيق يطفح كُرهاً وقالت بحدة:
موج: إيه أنا اللي مش مفتحة ولا عاوز تخبطني كيف ما عملتوا في أختي أبعد حصانك ده عني ياسعادة البيه.. أنا متأخرة في شغلي خلقة!
جلال (بعقد حاجبيه واستغراب): خير المشغل بيقفل بدري.. متأخرة ليه؟!
استوقفت موج كلمة "المشغل" فاشتعل الغل في قلبها وقالت بسخرية مريرة:
موج: مشغل.. بتتريق حضرتك؟!
جلال (بصرامة وجفاف): اتكلمي بأدب مين انتي عشان أتريق عليكي؟!
موج (بحرقة): محدش.. بعد عني!
تنحى جلال بحصانه لتمر في طريقها وقبل أن تبتعد خطوات استوقفته هي بنبرة يملؤها العتاب والوجع:
موج: أنت.. سألتني عن هدير وأنا جاوبتك باللي أعرفه يعني مغلطتش في حاجة!
التفت إليها جلال نصف التفاتة وسألها ببرود مستنكر:
جلال: بتكلميني أنا؟!
موج: مفيش حد في الشارع غيرنا!
نزل جلال من على ظهر حصانه بخطوات هادئة واقترب منها بقامته:
جلال: وإيه جاب سيرة سؤالي وجوابك دلوك مش فاهم ولا بتجري كلام معاي؟!
موج (بصوت يخنقه القهر): معنديش مشكلة تطردني من شغلي ولا حتى لو الحادثة حصلت معاي أنا.. لكن أختي ملهاش ذنب ليه تخلي الحارس يخبطها ويبهدلها قدام الخلق في الشارع؟!
جلال (بتجهم وصرامة شديدة): وضحي كلامك زين!
موج: مش مهم يا جلال بيه.. المهم رسالتك وصلت أي حد يسأل عن هدير معرفش هي ليها أهل ولا له ومليش صالح بحاجة تاني.. المهم أبعد عن إخواتي اعتبره رجاء!
التفتت لتغادر مسرعة فصاح بها جلال بنبرة آمرة قاطعة:
جلال: مقلتش تمشي!
موج (بنفاذ صبر): نعم؟!
جلال: انتي اتقطعتِ من شغلك مِيتا؟
موج (بسخرية وكسرة): عشية وأختي حادثتها كانت عشية بردو!
صمت جلال ثواني وجز على أضراسه بغضب مكتوم وشرار يتطاير من عينيه ثم سألها بصوت كالرعد:
جلال: الرسالة كانت إيه بالظبط؟!
صمتت موج وتطلعت بعيداً فقال بغل:
جلال: انطقي يا بت انتي.. إيه الرسالة؟!
موج: عاوز توصل يعني إنك متعرِفش؟!
جلال: اتكلمي بأدب بدل ما أدبك!
موج: الرسالة كانت: أي حد يسأل عن هدير قولي معرفش هي ليها أهل ولا له.. ومليش صالح"!
ساد الصمت لثوانٍ ودارت الدوائر في رأس جلال حتى استوعب الملعوب بالكامل.. (شاهين!).
موج (بضيق): حاجة تاني ولا أروح؟!
نظر إليها جلال وكان ضوء الشمس الخافت ينسكب على وجهها.
شعر بأنه لأول مرة يتفحص ملامحها جيداً عن قرب؛ لاحظ رقة وجهها والتغيير البسيط الذي زادها جمالاً وبراءة وسط غضبها مرت لحظات وهو ينظر في عينيها دون أن يرد.
تنحنحت موج بخجل وارتباك وشَدّت طرحتها على وجهها لتداري خجلها ونظراته الشاخصة وقالت بصوت خافت:
موج: عاوزة أروح.
جلال (بنبرة هادئة غير معتادة): روحي.
التفتت لتغادر بخطوات حثيثة بينما وقف هو يتابع أثرها بعينيه حتى اختفت بين الأزقة التفت مرة أخرى إلى حصانه ومسك مقوده ثم قال بحدّة ووعيد:
جلال: شاهين.. أيه هانلعب ورا بعض حتى دي مسلمتش منك.. بس وصل لها كيف؟!
تذكر للحظة أنه ذكر سابقاً لشاهين أن رفيقتها في المشغل أكدت أنها يتيمة فتبسم سخرية ومرارة وهو يهز رأسه:
جلال: مبتضيعش وقت يا شاهين أذيت واحدة.. مش هسيبلك الثانية!
ثم امتطى حصانه وانطلق به كالعاصفة.
ـــــــــــــــــــــــــــــــــــــــ**
عادت موج إلى المنزل ودلفت إلى غرفتها مباشرةً لتبدل ثيابها قبل أن يراها أحد وكانت خلود تجلس داخل الغرفة:
خلود: يا مرحب اتأخرتي يعني؟!
موج (وهي تحط حقيبتها): انتي عارفة المواعيد دي غير المشغل.
بدأت بخلع حجابها فابتسمت خلود وقالت بمشاكسة:
خلود: من أول يوم قوام كده بس والله عسل!
موج (بتنهيدة وحسرة): عسل إيه الله يسامح مرت خالي!
خلود: ليه يعني؟ فين المشكلة؟
موج: أبوي يا خلود.. عيب!
خلود: اتنيلي أبوكي لولا عيب يتكلم كان قالك روحي انضفي!
موج (وهي تضربها بأسفل يدها خفيفاً): لمي روحك يا بت ليه.. كنت جربانة؟!
خلود: مش القصد.. بس كنتي فظيعة!
جلست موج بضيق وطفش على طرف الفراش وقالت تتهرب من سيرتها:
موج: أمّال فرح وليلى فين؟
خلود: طلعوا الدكان..
موج: وانتي عاملة إيه دلوك؟
خلود: يعني الحمد لله زينة.. مالك فيكي حاجة؟!
موج (بحرقة مكتومة): له.. بس مش عارفة ليه مخنوقة كنت بحب شغل المشغل والبنات والجو اللي متعودة عليه.
خلود: اصبري يمكن تتعودي هناك أو ترجعي المشغل تاني!
موج: أرجع فين خلاص.. ده أمر من اللي ميتسماش كهربهم ومشوني في وقتها ويقول.
ثم صمتت فجأة ودسّت باقي الكلام في صدرها بعد أن افتكرت حديثها الساخن مع جلال منذ قليل.
استغربت خلود من انقطاع جملتها وسألت بفضول:
خلود: يقول إيه؟!
موج (بسرعة وتشتيت): مفيش أمك عاملة أكل إيه النهاردة؟
خلود: طابخة أرانب!
موج (بصدمة واشمئزاز): يا ساتر حرام عليكم والله.. هترسى معايا على بطاطس محمرة!
خلود (بضحكة): حد يسيب الملوخية بالأرانب وياكل بطاطس؟!
موج: أنا يا اختي مش أحسن من القطط اللي بتاكلوها دي الله يسامحك يا أماي!
ـــــــــــــــــــــــــــــــــــــ**
عاد جلال إلى المنزل مساءً بعد وقت العشاء وجلس خارجاً تحت ضوء القمر وحيداً لبعض الوقت يقلّب الأفكار في رأسه وبعد قليل خرج إليه أخوه "يونس" وجلس بجواره يتفحص وجهه المتجهم قبل أن يسأل:
يونس: يعني مطلعتش الليلة؟
جلال (بتنهيدة هادئة): عادي.. طول اليوم بره ومنعم هياخد لفة مكاني النهاردة.
يونس: عملت إيه؟
جلال: في إيه؟
يونس: موضوع البنت دي.. عرفت توصل لحاجة؟
جلال (بجمود وقرار قاطع): آه وصلت.. أبوها خدها صُح.
يونس (بدهشة واستغراب): يعني إيه مين قالك كده؟!
جلال: قلتلك عرفت يا يونس وأتأكدت الموضوع ده تقفل عليه خلاص.. الجزيرة مليانة خلق ياما هنقعدوا نسيبوا ده كله ونركزوا على نفر واحد؟!
يونس (بشك حذر): مقصديش.. أنا بس بسأل ليكون شاهين وصلك نفس الكلام!
جلال: له.. عرفت من بعيد عن شاهين.
يونس: ماشي..
جلال (وهو يلمح التردد في عيني أخيه): كمل.. عاوز تقول إيه؟
يونس: عاوزك تشوفلي أي شغل بعيد عن وليد.
جلال (بعقد حاجبيه): ليه ماله؟!
يونس (بمرارة وضيق): مبيعجبنيش شغله بيعامل الناس كأنهم عبيد عنده ولو كلمته بيرد بقلة عقل وجبروت قدام الخلق.. كرهني في الشغل كله!
جلال: مقلتش ليه لأبوك؟
يونس: أبوي التكَبُّر والتعالي وراثة منه آه أبويا مش ديماً كده بس لو كلمته انت خابر بيطنش.. لا بيحل ولا بيربط خصوصاً لما ياجي الموضوع عند عيال خضرة!
صمت جلال قليلاً وعيناه تزدادان قسوة وهو يتذكر تحكمات وليد وأفعال شاهين ثم قال:
جلال: مش قلتلك متسكتلوش؟!
يونس: مش سكوت.. بس مش عاوز ندخلوا في حرب ونرجعوا زي زمان البيت يقيد نار ويقولوا إننا بنغيروا عشان مش شقايق وأمنا ميتة!
جلال (بحرقة وصرامة): ماشي.. سيبهولي هو كتر أساساً حتى معاي أنا!
وقف يونس ليغادر فسأله جلال بنظرة تفحصية:
جلال: رايح فين؟
يونس: طالع أشم هوا..
جلال (بتحذير ونبرة أخوية حازمة): أوَعاك تكون بتتسرمح كيف شاهين.. أدبحك!
يونس (بضحكة خفيفة): ياريت بس فين دا أنا مسكين يا خوي!
جلال: ماشي.. هسأل وراك بردو!
يونس: له.. اسأل براحتك أطير أنا بقى.
تركه يونس وغادر محيط السرايا بينما ظل جلال يترقب العتمة.. الأعداء يزيدون داخل البيت وخارجه ومقصلة الحقاد تقترب من الجميع!
بعد أن غادر يونس ألقى جلال رأسه للخلف ينظر لصفاء السماء في عتمة الليل.
كانت كل مشاهد يومه تتوارى لتفسح المجال لمقابلته مع موج وحديثها المشتعل وعيناها الجريئتان والتغيير الرقيق الذي لمح وجهها. بدأ يضيق صدره قليلاً عندما شعر بأنه يفكر بها أكثر مما ينبغي!
خرجت إليه عمته "نجاة" تتهادى بخطواتها المعتادة وقالت بمداعبة حنونة:
نجاة: أيوه أيوه سرحان السماء ده ديماً بيكون وراه وحدة!
نظر إليها جلال بابتسامة باهتة ومحاولة للتملص:
جلال: مين قال ليه ميكونش وراه مصيبة وهم يا عمتي؟
نجاة: ربنا يبعد عنك الهموم يا قلب عمتك..
جلال: أمين.
نجاة (بغمزة فاحصة): بس بذمة مش بتفكر في وحدة؟
جلال (بسخرية ورزانة): فكرك لو في وحدة شغلاني هقعد أفكر ولا كان زمانها هنا دلوك؟!
نجاة: يمكن.. بس لو مش صُح نصححوه!
جلال: هو إيه؟
نجاة: يعني نجيبوا وحدة تملى الدار.. مالك؟ هتقضيها شغل ودوار ومشاكل دي عيشة بردو؟!
جلال: هو أنا لقيت وقلت له؟!
نجاة: آه بتقول له اللي قدك عيالهم في المدرسة.. شاهين بينك وبينه يا دوب سنتين وربنا يخلي ولده الكبير في المدرسة ومعاه حرمتين وعاوز الثالثة وانت قاعد !
جلال (بتنهيدة مريرة ونبرة صادقة): عاوز عروسة زي أمي الله يرحمها.. لو عندك أنا موافق من دلوك!
ترقرت الحصى في عين نجاة وقالت بحنو:
نجاة: الله يرحمها ويغفر لها.. أمك مكنش ليها زي بس أدورلك؟
جلال: ماشي بعدين.. البيت ده مش عاوز بت هادية ده عاوز تنين مُقنع عشان يليق بمرت أبوي.
ضحكت نجاة بصوت مرتفع ثم مالت عليه بضحكة مكتومة وقالت:
نجاة: والله لو اتجوزت عفريتة ما تاكل ويا العقربة اللي جوه دي!
جلال (بابتسامة جافة): عشان كده خايف أتجوز أظلم بنت الناس معاي.
نجاة: له اجوز وعمتك موجودة تقف في وش الكل!
جلال: إن شاء الله.. دعواتك ليا بس يا عمتي.
ــــــــــــــــــــــــــــــــــ**
جلسوا يتحدثون سوياً بينما في منزل موج كانت ترصع شالاً رفيعاً وتربط به مقدمة رأسها تداري به مقدمة رأسها فنظر إليها والدها فايز باستغراب:
فايز: مالك يا بتي النهاردة رابطالنا رأسك كيف اللي طالعة من عزا كِده؟!
موج (بتوتر محاول الخفاء): له.. أصل رأسي مصدعة شوية.
فايز: ما أخدتيش برشامة ليه؟
موج: هآخد.. وبعدين أنام وإن شاء الله أبقى زينة.
وأثناء حديثهم رن هاتف والدها فجأة.. نظر فايز في الشاشة ثم تلفت حوله بحذر ووقف يبتعد خطوات ليجيب بالخفاء.
تحدث لدقائق بصوت خافت ثم عاد إليهم وقال:
فايز: أنا ورايا مصلحة دلوك.. لو اتأخرت اقفلوا الباب وناموا.
موج (بعقد حاجبين وشك): شغل دلوك ليه؟!
فايز (بصرامة قاطعة): قلت مصلحة !
دلف إلى الداخل ليبدل ثيابه مسرعاً ليغادر فالتفتت موج لوالدتها بغمزة وتحريض:
موج: خلي بالك.. كل ما مدى طلوعه بيكتر في الليل وانتي ولا هنا!
سعدية (بحرقة وضيق): تقصدي إيه يا محراك الشر انتي؟!
موج: شامة ريحة ضرة يا أماي!
سعدية (بغل وهي تلوّح بيدها): قومي انخمدي أحسن لك!
وقفت سعدية فوراً ودلفت خلف فايز الذي بدا عليه الاستعجال الشديد وهو يربط عمامته وسألته باستجواب حاد:
سعدية: خير مصلحة إيه دي اللي دلوك؟!
فايز (بدون أن ينظر إليها): مش لازم تعرفي!
سعدية: له.. لازم بتطلع فين كل شوية في نص الليل؟!
فايز (بتهكم): خير هتشتغلي مخبر ولا من الحرس؟!
سعدية (بتهديد ووعيد): فايز والله لو طلوعك ده وراه حرمة زي أم فرح الله يرحمها.. ليتَّموا بناتك!
ضحك فايز بصوت عالٍ وقال بدهاء:
فايز: والله وقلبك جمد يا سعدية!
سعدية: آه وقسي بردو انقرصت منك قبل كِده ولا ناسي؟!
فايز: ريحي بالك.. والله مصلحة بعيدة عن الحريم يلا سلام عشان مستعجل.
تركها وغادر المنزل بخطوات حثيثة بينما وقفت سعدية تتابعه بنظرات يملؤها الشك والغيظ وتحدث نفسها:
سعدية: ربنا يستر منك يا واكل ناسك!
ــــــــــــــــــــــــــــــــــــــ**
مرّ الليل بهدوء حذر حتى منتصفه أثناء عودة شاهين للمنزل كان جلال ينتظره لوقت طويل في العتمة حتى أحسّ بوقع خطواته بالخارج فخرج من غرفته متوجهاً إليه واستوقفه قبل صعوده لسلّم الطابق الثاني:
جلال: شاهين!
وقف شاهين على أول الدرج والتفت إليه بغرابة شديدة من انتظاره الواضح له في هذا الوقت المتبخر من الليل:
شاهين (بتهكم): جلال بيه مش معقول.. مستنيني لغاية دلوك والبيت كله نام؟!
اقترب منه جلال بجمود وعينين كالجمر ودون مقدمات أو كلام زائد قال:
جلال: مَشّيت البت من المشغل وأذيت أختها ليه؟!
شاهين (بتصنّع الجهل): بت مين وضح كلامك!
جلال: كلامي واضح خفت ليه تعيد كلامها لما انت واثق من نفسك ودفنت خاتمي علشان لو اتكلمت وقالت لحد إن البنت كانت يتيمة؟!
شاهين (مبتسماً بتمطيط ودهاء): آه.. والله تقدر تقول زي ما أَمّنت نفسي بخاتمك من ناحيتك حبيت أزود الأمان.. بس لحقت تعرف قوام كِده غريبة! مين قالك والحادثة كمان وإني قلتلها متتكلمش إن البنت يتيمة؟!
ابتسم بخبث أفعى ثم أكمل بنبرة تفتيشية:
شاهين: بس له.. مش معقول حارس مراقب يوصل للكلام ده كله لأنه كان من تحت لتحت.. انت تعرفها شخصياً ولا إيه؟!
جلال (بجمود حاد وهو يقترب منه أكثر حتى كاد يلامسه): ناصح في حاجات معينة عموماً.. آه أعرفها!
همس في أذنه بوعيد يزلزل الأبدان:
جلال: اسمع يا شاهين.. سكوتي مش معناه إني خايف ومتأمنليش قوي كده لأن دراعي يابس ومبيتلويش بسهولة.. وبالنسبة للبت دي أبعد عنها وعن عيلتها ولو حابب تطمن.. آه أعرفها وتخصني
ولو لمست شعرة منها مش بس هنسى إنك أخوي وأأذيك.. له ده أنا هقضي على كل آمالك في الدنيا!
ضحك شاهين بسخرية وبرود استفزازي:
شاهين: تصدق بالله فرحتلك ممكن متقتنعش بس أخيراً طلعتلك وحدة بتخاف عليها غير يونس!
جلال (بقسوة ثابته): فكر زي ما تحب المهم فهمت قصدي.. ومش هي بس أي بت في الجزيرة هتضايقها وتقرب لها بطريقة عفشة هحاسبك لأن دي مسؤوليتي.. فلت مني مرة مش هسيبك تكررها!
تركه جلال ودلف إلى غرفته مرة أخرى يغلق الباب خلفه بقوة بينما وقف شاهين على الدرج ينظر في أثره بشرود واستغراب من شدة حديثه ثم قال لفرده بسخرية:
شاهين: يا ترى حلوة ولا له بس صبر كتير أكيد حلوة! عقبالي..
التفت مرة أخرى وصعد الدرج بكل برود لتنتهي ليلتهم بسلام ظاهري وتحت رماد السرايا نيران تتأهب للانفجار.
