رواية عمر وليلي الفصل الخامس 5 بقلم نون لاشين


 رواية عمر وليلي الفصل الخامس 

اتجمد عمر في مكانه أول ما شاف الملف  في إيد ليلى والصور مفرودة قدامها. ملامحه اتبدلت في ثانية لتوتر لأول مرة يظهر عليه.. قفل باب الجناح  ووقف يبص لها من غير ما ينطق ولا كلمة.

ليلى لفت بوشها ليه وإيديها بترتعش وهي ماسكة الصور وقالت بصوت مخنوق: "إيه ده يا عمر؟! صور ليا من تلات سنين؟! إنت كنت تعرفني من زمان؟! يعني كل اللي قولتهولي عن الصدفة وعن أمي وجدك كان كدب؟!"

عمر خد نفس عميق وقرب منها  "مكدبتش عليكي في حاجة يا ليلى.. أنا بس خبيت عنك الجزء الأهم في الحكاية."

ليلى رجعت لورا خطوة وقالت بخوف ودموع: "حكاية إيه؟! إنت مين يا عمر وعايز مني إيه بالظبط؟! ليه كنت بتراقبني كل السنين دي؟!"

عمر وقف قدامها وبص في عيونها : "تفتكري من تلات سنين.. في ليلة .. لما جابوا للمستشفى اللي كنتي بتتدربي فيها شاب مضروب بالنار في كتفه وفاقد الوعي ومينفعش يتسجل اسمه في الدفاتر؟"

ليلى عيونها وسعت بصدمة وبدأت تفتكر.. وقالت : "أيوه.. فاكره.. كان شاب في حالة خطيرة والدكاترة خافوا يقربوله عشان مفيش إثبات شخصية.. وأنا صعبت عليا حالته ودخلت ساعدت في العملية وفضلت سهرانة جنبه طول الليل أدعيله وأقرأ له قرآن لحد ما الخطر عدى.. والصبح ملقتهوش في الأوضة!"

عمر ابتسم وقال: "الشاب ده كان أنا يا ليلى."

حطت ليلى إيدها على بقها بصدمة ومش قادرة تصدق!

كمل عمر كلامه : "وقتها كنت جاي مصر في زيارة من غير ما حد يعرف عشان أخلص صفقة كبيرة.. واتعرضت لمحاولة سرقة بالإكراه وانضربت بالنار.. جابوني أقرب مستشفى ومنعوا تسجيلي عشان الصحافة.. وطول الليل وأنا بين الحياة والموت.. مكنتش سامع غير صوتك وإنتي بتعيطي عشاني وبتدعيلي.. وحاسس بإيدك وهي بتمسح على جبيني.. ولما فوقت الفجر شفتك نايمة على الكرسي جنبي زي الملاك."

ليلى دموعها نزلت على خدها وهي بتسمعه.. وعمر قرب خطوة كمان وقال: "خرجت الصبح قبل ما تصحي عشان مسببلِكش مشاكل.. بس قلبي فضل معاكي في الأوضة دي.. دورت عليكي وعرفت كل حاجة عنك.. وكنت ناوي أتقدملك فوراً.. بس يوم ما جيت تحت بيتك عشان أكلم والدتك.. شفتك نازلة مع كريم ولابسة دبلة الخطوبة في إيدك وبتضحكي."

سكت عمر لحظة وبلع ريقه بمرارة وكمل: "وقتها حسيت إن قلبي اتكسر.. مكنتش أقدر أبني سعادتي على تعاستك وإنتي بتحبي واحد تاني.. 

فسافرت بره مصر تاني.. بس مقدرتش أنساكي.. كلفت راجل  يطمني عليكي من بعيد ويبعتلي صورك  عشان أتأكد إنك بخير ومبسوطة."

ليلى كانت بتعيط بقوة وقالت: "طب ولما ماما جاتلك الشركة؟"

عمر بحنان: "لما والدتك دخلت مكتبي وقالت اسمك.. قلبي كان هيقف من الفرحة والوجع في نفس الوقت.. ولما عرفت إن الندل ده سابك عشان فلوس وإنك بتعاني لوحدك.. حلفت إني مستحيل أسيبك تضيعي من إيدي تاني.. وطلبت إيدك من والدتك في نفس اللحظة."

ليلى قعدت على طرف السرير وهي منهارة من العياط ومش مستوعبة إن في حد في الدنيا حبها بالطريقة دي ومن غير ما تعرف!

عمر مسك إيديها الاتنين وبص في عيونها :
 "أنا محبتكيش من شهر يا ليلى.. أنا بعشقك من تلات سنين.. خبيت عنك عشان كنت خايف تفتكري إني بستغل ظروفك.. كنت عايزك تحبيني لشخصي.. فهمتي دلوقتي إنتي بالنسبة لي إيه؟"

ليلى بصت له و رفعت إيدها  وحطتها على خده وقالت بصوت بيرتعش: "إنت حقيقي يا عمر؟ معقول ربنا يعوضني بيك بعد كل الوجع ده؟"

عمر غمض عيونه وباس كف إيدها بحنان يذوب الحجر : "أنا كلي ملكك يا قلب عمر.. ومن النهاردة مفيش دموع تاني."

في نفس الوقت.. تحت في الصالون الجانبي للقصر.

كانت فريال عمة عمر رايحة جاية بغل وبنتها مايا قاعدة بتعيط بجنون وبتكسر في كوباية العصير اللي قدامها.

مايا بصريخ: "يا مامي أنا هنتحر! عمر اللي أنا مستنياه يرجع من السفر سنين عشان يتجوزني.. يطلع الجناح بتاعه بواحدة شحاتة متسواش تمن جزمتي؟! وكمان يهددنا ويطردنا عشانها؟!"

فريال بخبث وشر: "اهدي يا غبية.. الصريخ مش هيعمل حاجة.. عمر عنيد ولو وقفنا في وشه هيطردنا فعلاً وجدك هيدعمه.. إحنا لازم نلعبها بذكاء."

مايا بغل: "إزاي يا مامي؟ أنا عايزة أخلص منها النهاردة قبل بكرة!"

فريال قعدت جنبها ووطت صوتها وقالت: "أنا عرفت من المحامي اللي كان هنا إنهم كانوا في النيابة الصبح مع عبد الرحمن بيه الملياردير وبنته سارة.. وإن في عداوة كبيرة بينهم بسبب الجربوعة دي.. عدو عدوي يبقى صاحبي يا مايا.. أنا هتصل بسارة بنت عبد الرحمن دلوقتي.. وهنحط إيدنا في إيد بعض عشان نطربق القصر ده على دماغ ليلى!"

ابتسمت مايا بشر وقالت: "أيوة كده يا مامي.. أنا عايزة أشوفها مذلولة قدام عيني!"

تاني يوم الضهر.. صحيت ليلى وهي حاسة براحة محستش بيها من سنين.. لقت عمر ساب لها ورقة على المخدة مكتوب فيها: "صباح الورد يا أميرتي.. نزلت أخلص شغل مهم وبعتلك ضيفة هتفرحي بيها أوي.. بحبك."

ابتسمت ليلى بخجل وقلبها دق.. وفجأة الباب خبط.. فتحت لقت "ندى" صاحبتها واقفة قدامها وفاتحة دراعاتها!

ليلى صرخت بفرحة: "ندىىىى!" وحضنوا بعض بقوة.

ندى بانبهار وهي بتتفرج على الجناح: "يا نهار أبيض يا ليلى! إيه القصر ده؟! ده أنا كنت فاكرة نفسي دخلت الجنة بالغلط! والواد طارق ابن عم جوزك ده.. إيه العسل والشربات ده؟ طول الطريق في العربية مبطلش هزار وضحك معايا!"

ليلى ضحكت من قلبها وقالت: "طارق هو اللي جابك؟"

ندى بغمزة: "أيوة يا ستي.. عمر باشا كلفه يجيبني من البيت لحد هنا عشان منسبكيش لوحدك.. بس بجد يا ليلى.. طارق ده خطف قلبي بضحكته.. يخربيت حلاوتهم عيلة تفتح النفس!"

قعدت ليلى وحكت لندى كل حاجة حصلت امبارح وعن سر التلات سنين.. وندى كانت بتسمع وعيونها مدمعة من التأثر وقالت: "يا بختك بيه يا ليلى.. والله أمك دعتلك في ليلة مفترجة.. اوعي تفرطي فيه ده بيحبك حب ميتوصفش."

بالليل.. وقت العشا في القصر.

اجتمعت العيلة كلها على سفرة الأكل الطويلة.. الحاج راشد على راس السفرة.. وعلى يمينه عمر وجنبه ليلى اللي كانت لابسة فستان كحلي شيك جداً اختاره ليها عمر بنفسه خلاها شبه الأميرات.. وجنبها ندى.. وفي الناحية التانية قاعد طارق اللي مشالش عينه من على ندى.. وجنبه فريال ومايا اللي كانوا بيبصوا لليلى بنظرات كلها سم.

مايا حبت تحرج ليلى قدام الكل.. فقالت بسخرية وهي بتقطع الأكل: "إلا قوليلي يا ليلى.. إنتي عارفة طبعاً تاكلي بالشوكة والسكينة بتوع الإتيكيت ولا أطلبلك معلقة عشان متتعبيش؟ أصل الأكل هنا فرنساوي مش فول وطعمية زي اللي اتعودتي عليه."

ندى اتغاظت ولسه هترد.. بس ليلى مسكت إيدها وابتسمت لمايا بهدوء  وقالت: "متقلقيش يا مايا.. أنا دكتورة جراحة وبمسك المشرط بدقة متقدريش إنتي تتخيليها.. فأكيد الشوكة والسكينة مش هيبقوا صعبين عليا.. وبعدين الفول والطعمية دول نعمة ربنا اللي كبرتني وخلتني دكتورة أنقذ حياة الناس.. الدور والباقي على اللي بياكل فرنساوي ومبيعملش حاجة مفيدة في حياته."

طارق مقدرش يمسك نفسه وانفجر من الضحك وقال: "أوووووه! في الجبهة يا مايا! والله العظيم مراتك دي معلمة يا عمر!"

مايا وشها احمر من الكسوف والغيظ.. وفريال قالت بغضب: "إنتي بتغلطي في بنتي يا قليلة الأصل؟!"

هنا عمر خبط إيده على السفرة خبطة خلت الكوبايات تتهز.. وبص لفريال ومايا بنظرة مرعبة وقال: "صوتكم ميعلاش على مراتي! وبمناسبة الشغل والحياة المفيدة.. أنا حابب أبلغكم خبر سعيد."

الكل بص لعمر بتركيز.. وعمر مسك إيد ليلى وباسها قدام الكل وقال: "النهاردة الصبح أنا اشتريت المستشفى اللي ليلى كانت بتشتغل فيها بالكامل.. وكتبت 50% من أسهم المستشفى باسم الدكتورة ليلى حسن.. وعينتها رئيس مجلس الإدارة.. يعني من بكرة ليلى هي صاحبة المستشفى ومديرة كل اللي فيها!"

ليلى شهقت بصدمة وقالت: "عمر! إنت بتتكلم بجد؟!"

الحاج راشد ابتسم  وقال: "مبروك يا بنتي.. تستاهلي كل خير."

أما فريال ومايا فكانوا هيموتوا بحسرتهم.. مايا قامت من على السفرة وهي بتترعش من الغل وطلعت تجري على أوضتها.

بعد العشا.. طارق خد ندى عشان يوصلها بيتها.. والحاج راشد دخل ينام.. وعمر خد ليلى وطلعوا يتمشوا في جنينة القصر الكبيرة .

ليلى كانت ماشية جنب عمر وهي حاضنة دراعه وقالت بامتنان: "يا عمر اللي عملته ده كتير أوي عليا.. أنا مكنتش عايزة مستشفى ولا فلوس.. أنا كفاية عليا وجودك."

عمر وقف ولف ليها وحاوط وشها بإيديه : "إنتي تستاهلي الدنيا كلها تحت رجليكي يا ليلى.. اللي شفتيه في حياتك مكنش قليل.. وجه الوقت اللي تعيشي فيه ملكة متوجة في قلبي وفي قصر الراشد."

وقرب منها عشان يضمها لقلبه في لحظة رومانسية هادية..

وفجأة!!

اتفتحت بوابات القصر الحديدية الكبيرة .. ودخلت تلات عربيات شرطة بسارينات عالية نورت الجنينة كلها !

ليلى صرخت بخوف ومسكت في جاكيت عمر.. وخرج الحاج راشد وفريال ومايا من القصر على صوت السارينات.

نزل ظابط شرطة برتبة كبيرة ومعاه قوة مسلحة.. وقرب من عمر وقال : "عمر باشا الراشد؟"

عمر وقف قدام ليلى "أيوه أنا.. خير يا حضرة الظابط؟ إيه سبب الاقتحام ده؟"

الظابط طلع ورقة من جيبه وقال: "معانا أمر من النيابة العامة بالقبض عليك فوراً!"

ليلى صرخت بجنون: "القبض عليه ليه؟! 

الظابط بص لعمر وقال: "متهم بقتل الدكتور حسن رئيس قسم الطوارئ.. الدكتور حسن اتوجد مقتول في أوضته في العناية المركزة من ساعة.. وكل الشهود أكدوا إنك ضربته امبارح وهددته بالقتل قدام المستشفى كلها!"

الخبر نزل على الكل زي الصاعقة!

ليلى حطت إيدها على راسها وصرخت: "مستحيل! عمر كان معايا طول اليوم في القصر! دي مؤامرة والله العظيم مؤامرة!"

عمر اتصدم بس حاول يحافظ على هدوءه عشان ميخوفش ليلى.. وبص لمايا وفريال اللي كانوا واقفين على سلم القصر.. ولمح على وش مايا ابتسامة خبيثة وانتصار مرعب!

في اللحظة دي فهم عمر إن الضربة جتله من جوه بيته بالتعاون مع أعداءه اللي بره!

العساكر قربوا وحطوا الكلبشات في إيد عمر.. وليلى جريت عليه ومسكت فيه وهي بتعيط بهستيريا وبتصرخ: "لااااا يا عمر!  أرجوك! متخدوهوش هو معملش حاجة!"

عمر بص لها بعيون كلها حب وهو متكلبش : "خليكي قوية يا ليلى! متخافيش.. أنا هرجعلك.. اوعي تصدقي أي حاجة وماتثقيش في حد في القصر غير جدي وطارق!"

ومشيت عربيات الشرطة وخدت عمر.. ووقعت ليلى على الأرض في نص الجنينة مغمى عليها وسط صراخ الحاج راشد.. وضحكات مايا الخبيثة من بعيد!


تعليقات