رواية عمر وليلي الفصل السادس
فتحت ليلى عيونها وهي حاسة بصداع رهيب.. لقت نفسها لسه في جنينة القصر.. وصوت صراخ عالي مالي المكان!
قامت مفزوعة وهي بتفتكر منظر عمر وهو راكب عربية الشرطة والكلبشات في إيده.. بصت حواليها لقت طارق ساند الحاج راشد اللي كان واقع على الأرض وماسك صدره بإيده الاتنين ووشه أزرق ومش قادر ياخد نفسه!
طارق بصريخ: "جدي! الحقيني يا ليلى جدي بيموت!"
ليلى جريت عليهم قعدت على ركبها جنب الحاج راشد وحطت إيدها على نبضه ولقت ضربات قلبه ضعيفة جداً.. صرخت في الحرس: "اطلبوا الإسعاف فوراً.. دي جلطة في القلب من الصدمة.. لازم يتنقل المستشفى حالاً!"
فريال وبنتها مايا كانوا واقفين بيتفرجوا .. ومايا همست لأمها بخبث: "أحسن.. خلي يموت هو كمان ونخلص منهم هما الاتنين في ليلة واحدة ويصفالنا القصر والفلوس!"
في خلال نص ساعة.. كانت عربية الإسعاف بتنقل الحاج راشد للمستشفى اللي عمر لسه شاريها الصبح.. دخلت ليلى معاه لغرفة العناية المركزة وأشرفت بنفسها مع الدكاترة على حالته لحد ما استقرت وحطوه على أجهزة التنفس.
خرجت ليلى من العناية وهي منهارة من التعب.. لقت طارق واقف بره رايح جاي وندى صاحبتها جت تجري أول ما عرفت الخبر وحضنتها.
ندى بدموع: "إيه اللي بيحصل ده يا ليلى؟! إزاي عمر يتهموه بقتل دكتور حسن؟! وإزاي الكلب ده اتقتل أصلاً؟!"
ليلى مسحت دموعها : "عمر بريء يا ندى.. اللي حصل ده متدبر بليل.. دكتور حسن كان في العناية المركزة بعد ما عمر ضربه.. إزاي حد دخل وقتله ولبس التهمة لعمر بالسرعة دي؟!"
طارق بغضب: "أكيد الكلب اللي اسمه عبد الرحمن هو اللي ورا المصيبة دي.. حب ينتقم من عمر بعد ما فضحه في النيابة الصبح!"
ليلى بصت لطارق بتركيز وقالت: "مش عبد الرحمن لوحده يا طارق.. لما الشرطة جت تقبض على عمر.. أنا شفت مايا بنت عمتك واقفة بتبتسم بشماتة وكأنها كانت عارفة إن الشرطة جاية.. في خيانة حصلت من جوه القصر!"
طارق اتصدم وقال: "مايا وفريال؟! معقولة توصل بيهم الحقارة لكده؟! طب هنعمل إيه دلوقتي؟"
ليلى "الأول نروح لعمر النيابة.. عمر قالي أكون قوية.. وأنا مش هكسر كلمته.. يلا يا طارق!"
الصبح بدري.. في سرايا النيابة.
دخلت ليلى مع طارق والمحامي فريد لمكتب النائب العام اللي سمح لهم يشوفوا عمر خمس دقايق قبل بدء التحقيق.
أول ما الباب اتفتح وشافت ليلى عمر واقف ورا القضبان الحديدية.. ووشه مرهق.. مقدرتش تمسك نفسها وجريت عليه ومسكت في القضبان وهي بتعيط بحرقة: "عمر! حبيبي إنت كويس؟ عملولك حاجة؟!"
عمر أول ما سمع كلمة "حبيبي" من شفايفها.. ابتسم وسط الهم اللي هو فيه.. ومد إيده من بين القضبان مسح دموعها بحنان وقال: "أنا كويس طول ما إنتي بخير يا روح عمر.. طمنيني عليكي وعلى جدي."
ليلى خافت تقوله إن جده في العناية المركزة . بصت لطارق وبعدين بصت لعمر وقالت: "جدك كويس يا عمر.. بس تعبان شوية من الزعل عليك.. أرجوك قولي إيه اللي حصل وإزاي يتهموك كده؟!"
المحامي فريد اتدخل وقال: "الموقف صعب يا مدام ليلى.. القاتل دخل أوضة الدكتور حسن في المستشفى وحقنه بمادة سامة في المحلول وقفت قلبه فوراً.. والمصيبة إن الشرطة لقت في أوضة الدكتور حسن تحت السرير.. ساعة الإيد الألماظ بتاعة عمر باشا! وعليها بصماته!"
ليلى شهقت بصدمة: "ساعة عمر؟! إزاي؟! عمر مراحش المستشفى امبارح بالليل خالص!"
عمر عيونه ضيقت بغضب لما سمع موضوع الساعة وقال: "الساعة دي أنا كنت سايبها في الجناح بتاعي على التسريحة قبل ما أنزل العشا!"
ليلى حطت إيدها على بقها وبصت لطارق وقالت: "شوفت يا طارق؟! قولتلك الخيانة من جوه القصر! مفيش حد يقدر يدخل جناح عمر ويسرق ساعته غير فريال أو مايا!"
عمر قبض على إيده بقوة وقال بوعيد مرعب: "والله العظيم لو طلع ليهم إيد في اللي حصل ده.. لهدم القصر فوق دماغهم.. بس اسمعيني كويس يا ليلى.. النيابة غالباً هتحبسني على ذمة التحقيق لحد ما الطب الشرعي يطلع تقريره."
ليلى بدموع: "لا يا عمر مستحيل أسيبك هنا يوم واحد!"
عمر بصلها وقال: "اسمعي الكلام يا ليلى.. أنا خليت الأستاذ فريد يعملك الصبح (توكيل عام شامل) بإدارة كل أملاكي وشركاتي والقصر.. أنا مضيت عليه خلاص.. دلوقتي إنتي معاكي سلطة مطلقة كأنك عمر الراشد بالظبط.. مش عايزك ترجعي شقتك القديمة.. هترجعي القصر وتقعدي فيه رافعة راسك.. ومايا وفريال لو نطقوا بحرف.. اطرديهم في الشارع!"
ليلى مسكت إيده وبصت في عيونه بدموع : "هرجع القصر يا عمر.. وهجيب حقك.. وهطلعك من هنا بأسرع وقت.. ده وعد مني ."
بعد ساعة.. رجعت ليلى القصر عشان تجيب ورق مهم وتغير هدومها.. أول ما دخلت من باب القصر.. لقت الشنطة بتاعتها وهدومها كلها مرمية على الأرض في نص الصالون الكبير!
وفريال ومايا واقفين على السلم وبيضحكوا بشماتة!
فريال بتعالي وقرف: "كويس إنك جيتي يا شحاتة.. لمي زبالتك دي من على الأرض واطلعي بره القصر يلا.. البيه اللي كان حاميكي بقى خريج سجون وقتال قتيل والعجوز التاني بين الحياة والموت.. يعني مفيش حد يحميكي مننا دلوقتي!"
مايا نزلت على السلم وقربت من ليلى بغرور : "القصر ده بقى بتاعنا إحنا خلاص.. وغوري من هنا قبل ما أخلي الخدم يرموكي في الشارع زي الكلاب!"
ليلى بصت للهدوم اللي على الأرض.. وبعدين رفعت راسها وبصت لمايا وفريال بنظرة مرعبة خلتهم يستغربوا هدوءها!
قربت ليلى من مايا خطوة.. وفجأة.. رفعت إيدها ونزلت على وش مايا بقلم قوي صدم الكل لدرجة إن مايا وقعت على الأرض وهي حاطة إيدها على خدها وبتصرخ!
فريال صرخت بجنون: "إنتي اتجننتي يا بنت الـ.. إنتي بتمدي إيدك على بنتي؟! يا خدم! تعالوا ارموا الزبالة دي بره!"
تجمع الخدم والحرس.. وهنا ليلى طلعت الورقة الموثقة من شنطتها ورفعتها في وشهم وقالت بصوت قوي هز أركان القصر: "اللي هيتحرك خطوة هقطع عيشه! أنا ليلى هانم الراشد.. ومعايا توكيل عام رسمي من عمر باشا بإدارة القصر وكل مليم في العيلة دي!"
فريال اتجمدت في مكانها ووشها اصفر بصدمة: "توكيل عام؟! إزاي؟!"
ليلى قربت من مايا اللي واقفة بتعيط من القلم.. وهمست قدام وشها بابتسامة مرعبة: "الساعة الألماظ اللي سرقتيها من أوضة عمر عشان تلبسيه التهمة.. هعرف إزاي وصلتيها للمستشفى.. ووقتها مش هكتفي بالقلم ده يا مايا.. أنا هدخلك السجن مكان جوزي.. وحياة عمر عندي لأخليكي تتمني الموت ومتطوليهوش!"
مايا جسمها اترعش وبصت لأمها برعب.. وليلى بصت للخدم وقالت بأمر: "الشنطة والهدوم دي تطلع جناحي فوراً وتترتب أحسن من الأول.. والهانم وبنتها ميتقدمش ليهم أكل ولا شرب في القصر ده غير بأمري أنا.. واللي مش عاجبه الباب يفوت جمل!"
طلعت ليلى على السلم بكل كبرياء وشموخ.. وسابت فريال ومايا واقفين بيغلوا من القهر والخوف بعد ما السحر اتقلب على الساحر!
بعد الضهر.. راحت ليلى المستشفى ودخلت مكتبها الجديد كرئيس مجلس إدارة.. وكان معاها طارق وندى.
ليلى قعدت على المكتب وقالت بتركيز: "عمر لما اشترى المستشفى امبارح الصبح.. قالي إنه عمل تعديلات أمنية فوراً.. يا طارق هو عمر ركب كاميرات جديدة غير بتاعة المستشفى اللي القاتل عطلها؟"
طارق خبط على جبهته وقال بذهول: "يا نهار أبيض! أيوه صح! شركة الأمن الخاصة بتاعة عمر ركبت امبارح الضهر كاميرات تجسس صغيرة جداً ومخفية في الطرقات والكاميرات دي متوصلة بسيرفر خاص على لابتوب عمر مش بغرفة أمن المستشفى!"
ليلى قفزت من مكانها بفرحة وقالت: "يعني القاتل عطل كاميرات المستشفى العادية وميعرفش إن في كاميرات مخفية! اللابتوب بتاع عمر فين يا طارق؟!"
طارق: "في عربيتي تحت! هنزل أجيبه فوراً!"
بعد عشر دقايق.. كان اللابتوب مفتوح قدام ليلى وطارق وندى.. دخلوا الباسورد وفتحوا تسجيلات امبارح بالليل لطرقات العناية المركزة وقت الجريمة!
قدموا الفيديو لحد الساعة 11 بالليل.. شافوا دكتور تخدير داخل الأوضة.. وبعده الممرضة خرجت.. وفي الساعة 11 ونص بالظبط.. الكاميرات العادية اتطفت.. بس الكاميرا المخفية فضلت شغالة!
ظهر في الفيديو شخص لابس بالطو أبيض وكمامة وكاب مدارى وشه.. داخل يتسحب لأوضة الدكتور حسن!
ندى بتوتر: "مين ده؟ مش باين وشه خالص!"
ليلى بتركيز: "استنوا.. شوفوا لما يخرج من الأوضة!"
بعد تلت دقايق.. خرج الشخص ده من الأوضة وهو بيجري.. ومن توتره وهو بيبص حواليه.. خلع الكمامة عشان ياخد نفسه.. وهنا الكاميرا المخفية جابت وشه بوضوح تام!
ليلى وطارق وندى صرخوا في صوت واحد: "كريييييييم؟!!"
ليلى عيونها وسعت بجنون: "كريم خطيبي القديم؟! إزاي ده محبوس في النيابة؟!"
طارق بغضب: "أكيد عبد الرحمن بيه دفعله كفالة كبيرة وخرجه امبارح بالليل بشرط إنه ينفذ الجريمة دي عشان ينتقموا منك ومن عمر!"
ليلى بصت للفيديو تاني وقالت: "استنوا! كريم مخرجش لوحده.. بصوا مين مستنيه في آخر الطرقة عند السلم الخلفي واداله الفلوس وخد منه البالطو!"
قربوا الشاشة وعملوا زووم.. وكانت الصدمة التانية!
اللي واقفين في آخر الطرقة كانوا اتنين ستات لابسين عبايات سودة.. لما رفعوا النقاب عشان يكلموا كريم.. طلعوا "سارة" بنت عبد الرحمن.. وجنبها "مايا" بنت عمة عمر وهي بتسلم كريم ساعة عمر الألماظ قبل ما يدخل الأوضة!
ندى لطمت على وشها وقالت: "يا ولاد الكلب! مايا وسارة وكريم اتفقوا مع بعض وقتلوا الراجل عشان يسجنوا عمر!"
ليلى سحبت فلاشة وحطت عليها الفيديو بسرعة وإيديها بتترعش من الفرحة: "الحمد لله يارب! براءة عمر في إيدي أهي! يلا يا طارق نطلع على النيابة فوراً!"
طارق قالها: "أنا هنزل مع ندى نجيب العربية من الجراج ونقربها من الباب الخلفي للمستشفى عشان محدش يحس بينا.. حصلينا على السلم الخلفي يا ليلى في ثواني!"
نزل طارق وندى جري.. وليلى حطت الفلاشة في جيبها ولسه بتقفل اللابتوب وبتلف عشان تخرج من المكتب..
وفجأة!!
باب المكتب اتفتح ودخل راجلين ضخام جداً شكلهم بلطجية.. وقفلوا الباب وراهم.. ودخل بعدهم "عبد الرحمن بيه" وهو بيبتسم ابتسامة شيطانية مرعبة ومعاه في إيده مسدس !
ليلى اتراجعت لورا برعب ومسكت في الفلاشة اللي في جيبها وقالت: "عبد الرحمن بيه؟! إنت بتعمل إيه هنا وعايز إيه؟!"
عبد الرحمن قعد على الكرسي وحط رجل على رجل ووجه المسدس ناحية صدر ليلى وقال "مايا كلمتني وقالتلي إنك شكيتي في موضوع الساعة.. فقولت أجي بنفسي أتصرف معاكي قبل ما تفتشي في المستشفى.. بس واضح إني جيت في الوقت المناسب.. الفلاشة اللي في جيبك دي تطلع هنا على المكتب بالذوق.. يا إما رصاصة واحدة من المسدس ده هتنهي حياتك ومحدش هيسمعلك صوت!"
ليلى بصت للمسدس بعيون كلها رعب.. طارق وندى نزلوا الجراج خلاص.. وهي واقفة لوحدها قدام قاتل مسلح ميرحمش!
