رواية الدكتوره شمس الفصل الخامس 5 بقلم فاطمه شعبان


 رواية الدكتوره شمس الفصل الخامس 

رجعت شمس من القاهرة بعد يومين قضتهم وسط أهلها، وكانت مبسوطة إنها شافت أمها وأخوها وأختها، لكن في نفس الوقت كانت عارفة إن رجوعها للمستشفى مش هيكون هادي، خصوصًا بعد المكالمة اللي حصلت بينها وبين فارس قبل سفرها.
أول ما وصلت السكن، رتبت حاجتها ونامت شوية عشان تستعد ليوم جديد.
وفي الصباح، لبست بالطوها الأبيض، وخدت ملفاتها واتجهت للمستشفى.
دخلت بابتسامتها المعتادة وقالت: – صباح الخير يا جماعة، وحشتوني ولا كنتوا مرتاحين من غيري؟
مريم ضحكت: – لا والله، المستشفى كانت ناقصها صوتك.
شمس: – طب الحمد لله، أهو رجعنا نزعجكم تاني!
سلمت على زملائها، وبعدها سألت عن الحالات، وبدأت تراجع التقارير مع دكتور أحمد.
شمس: – طمني يا دكتور أحمد، الدنيا كانت ماشية إزاي في غيابي؟
دكتور أحمد: – الحمد لله، كل الحالات مستقرة، ومفيش أي تطورات مقلقة.
شمس: – الحمد لله، تسلم إيدك. طب وأسماء هانم أخبارها إيه؟
دكتور أحمد: – حالتها اتحسنت جدًا، ونتائج المتابعة الأخيرة مطمئنة، وممكن خلال اليومين دول نبدأ نجهز إجراءات خروجها لو فضلت مستقرة.
شمس ابتسمت: – الحمد لله، ربنا يتم شفاها على خير.
مريم قربت منها وقالت بصوت واطي: – على فكرة، فارس بيه مستنيكي في مكتبه.
شمس: – كنت متوقعة.
مريم: – شكلك مش متحمسة للزيارة دي!
شمس: – أنا رايحة أشوف هو عايز إيه، وبعدها عندي مرضى لازم أتابعهم.
اتجهت شمس لمكتب فارس وخبطت على الباب.
فارس: – اتفضلي.
دخلت شمس وقالت: – صباح الخير يا فندم.
فارس رفع عينه من الأوراق: – صباح النور يا دكتورة. اتفضلي.
شمس: – حضرتك طلبتني؟
فارس: – أيوه. كنت عايز أتكلم معاكي في موضوع إجازتك.
شمس: – اتفضل يا فندم.
فارس: – إنتِ شايفة إن طبيعي دكتورة مسؤولة عن قسم مهم تسافر وتسيب شغلها في الوقت ده؟
شمس ردت بهدوء: – أنا مسافرتش من غير ترتيب يا فندم. الإجازة كانت متبلغ بيها الإدارة، وكل الحالات اتسلمت لدكتور أحمد قبل ما أمشي.
فارس: – أنا مش بتكلم عن الإجراءات الإدارية بس، أنا بتكلم عن الالتزام. أنا طلبت وجود كل الدكاترة في الاجتماع، وإنتِ ماكنتيش موجودة.
شمس: – حضرتك الاجتماع كان في يوم إجازتي، وأنا كنت مبلغة من البداية إن ليا يومين إجازة كل عشرة أيام تقريبًا عشان أزور أهلي في القاهرة.
فارس: – يعني لو فيه اجتماع مهم، هتفضلي متمسكة بإجازتك؟
شمس: – لو فيه اجتماع ضروري، ممكن الإدارة تبلغني بميعاده قبلها ونحاول ننسق، لكن مش كل مرة هاخد إجازة معتمدة وألاقي نفسي مطالبة أرجع لمجرد إن فيه اجتماع اتحدد في نفس اليوم.
فارس بص لها بحدة: – إنتِ عارفة إن المستشفى دي مش مستشفى عادية؟ دي مستشفى ليها اسم وسمعة، وبيجيلها حالات من كل مكان، ولازم كل واحد يكون قد المسؤولية.
شمس: – وأنا عارفة ده كويس، وعشان كده بعمل شغلي بكل ضمير. لكن المسؤولية مش معناها إن المستشفى تعتمد على شخص واحد. فيه فريق طبي كامل، وكل واحد ليه دور ومسؤولية.
فارس: – طب ووالدتي؟ إزاي تسافري وأمي لسه في المستشفى؟
شمس: – حضرتك والدتك كانت مستقرة، وأنا تابعت حالتها قبل ما أسافر، وكتبت كل التعليمات في الملف، وسلمت المتابعة لدكتور أحمد. وهي مريضة زَيّها زي أي مريض موجود عندنا، وليها فريق مسؤول عنها.
فارس: – بس دي أمي يا دكتورة شمس!
شمس بصت له بثبات: – وأنا مقدرة قلق حضرتك عليها، لكن لو كل دكتور ساب إجازته وارتباطاته عشان حالة مريض واحد، يبقى إحنا مش بنشتغل بنظام. أنا ماقصرتش في حق والدتك ولا في حق أي مريض.
فارس سكت لحظة، وبعدها قال: – إنتِ دايمًا عندك رد جاهز لكل حاجة؟
شمس: – مش ردود جاهزة يا فندم، دي حقوق وواجبات، وأنا بحترم الاتنين.
فارس: – طيب، اعتبري إن الموضوع انتهى، بس أتمنى بعد كده يبقى فيه تنسيق أفضل.
شمس: – مفيش مشكلة، وأنا تحت أمر الشغل في حدود النظام المتفق عليه.
قامت شمس وقالت: – عن إذن حضرتك، عندي حالات لازم أتابعها.
فارس: – اتفضلي.
خرجت شمس من المكتب، ومريم كانت مستنياها بره.
مريم: – ها؟ الدنيا ولعت؟
شمس ضحكت: – لا يا ستي، اتكلمنا وكل واحد قال وجهة نظره.
مريم: – إنتِ عارفة إن محدش بيقدر يرد على فارس بالطريقة دي؟
شمس: – أنا مش داخلة أتحدى حد يا مريم، أنا بس مش هقبل إن حد يعتبر حقي في الإجازة تقصير في شغلي.
مريم: – عندك حق، ربنا يقويكي.
شمس: – يلا بقى، ورانا شغل كتير.
وبالفعل بدأت شمس جولتها، واطمنت على المرضى واحد واحد، وراجعت التقارير، وتابعت الحالات اللي كانت تحت إشرافها.
وبعد شوية، دخلت غرفة أسماء هانم.
كانت أسماء قاعدة على السرير، ووشها بقى أحسن بكتير.
شمس دخلت بابتسامة: – صباح الخير يا ست الكل، إيه القمر بتاعنا عامل إيه النهارده؟
أسماء ضحكت: – والله إنتِ اللي قمر يا بنتي، تعالي جنبي.
شمس قربت منها: – طب قوليلي بقى، حاسة بإيه النهارده؟ فيه تعب أو دوخة؟
أسماء: – الحمد لله، أحسن بكتير، وبقيت حاسة إني عايزة أقوم وأروح بيتي.
شمس: – ده خبر يفرح، بس هنمشي واحدة واحدة.
أسماء: – إنتِ غبتي يومين، كنت فين؟
شمس: – كنت في القاهرة عند ماما، وحشتني جدًا.
أسماء: – ربنا يخليهالك يا بنتي، ويباركلك فيها. الأم مهما كبرنا بنفضل محتاجين وجودها.
شمس ابتسمت: – ربنا يخليكي لفارس، هو كمان قلقان عليكي جدًا.
أسماء: – ده ابني وحبيبي، بس ساعات بيقلق زيادة عن اللزوم.
شمس: – واضح فعلًا.
أسماء ضحكت: – إنتِ شكلك عرفتي عصبيته بسرعة!
شمس: – شوية مواقف كده، بس ربنا يهديه.
أسماء: – هو طيب، بس متعود إن كل حاجة تمشي زي ما هو عايز.
شمس: – المهم دلوقتي إن حضرتك بقيتي كويسة.
راجعت شمس حالتها، واطمنت على نتائج الفحوصات، وبعدها خرجت من الغرفة وهي مطمئنة.
في آخر اليوم، اجتمع الفريق الطبي لمراجعة حالة أسماء هانم، وبعد الاطلاع على نتائج المتابعة والفحص، اتأكدوا إن حالتها مستقرة وإنها تقدر تخرج مع الالتزام بالعلاج والمتابعة في البيت.
شمس دخلت عليها تاني يوم الصبح وهي ماسكة ملفها.
شمس: – صباح الخير يا أسماء هانم، عندي ليكي خبر حلو.
أسماء: – خير يا بنتي؟
شمس: – الحمد لله، حالتك بقت مستقرة، والدكاترة وافقوا على خروجك النهارده.
أسماء فرحت: – بجد؟ يعني هرجع بيتي؟
شمس: – أيوه يا ستي، بس عندي شوية تعليمات لازم تسمعيها كويس.
أسماء: – قولي يا دكتورة، أنا سامعاكي.
شمس: – تلتزمي بالعلاج في مواعيده، والراحة مهمة جدًا، وممنوع أي مجهود زيادة، ولازم تتابعي في المواعيد المحددة. وأي تعب أو أعراض جديدة لازم تبلغي الطبيب فورًا.
أسماء: – حاضر يا حبيبتي، هو أنا هقدر أهرب من تعليماتك؟
شمس ضحكت: – أنا عارفة إنك ست مطيعة!
أسماء: – طب وفارس؟ ده لازم يسمع الكلام هو كمان.
شمس: – دي بقى مسؤوليتك إنتِ، أنا ماليش دعوة!
ضحكوا هما الاتنين، وبعدها بدأت شمس تجهز ورق الخروج، وكتبت التعليمات الطبية والأدوية ومواعيد المتابعة.
وبعد ما خلصت الإجراءات، دخل فارس الغرفة.
فارس: – صباح الخير يا أمي، سمعت إنك هتسيبينا النهارده؟
أسماء: – أيوه يا حبيبي، الحمد لله بقيت كويسة، والدكتورة شمس كتبتلي على الخروج.
فارس بص لشمس: – يعني حضرتك متأكدة إن حالتها تسمح بالخروج؟
شمس: – أيوه يا فندم، الحالة مستقرة ونتائج المتابعة مطمئنة، وكل التعليمات مكتوبة في ورق الخروج.
فارس: – تمام، أنا هخلي كل حاجة متوفرة ليها في البيت.
أسماء بصت لشمس وقالت: – ربنا يكرمك يا بنتي، تعبتي معايا، ومش عارفة أشكرك إزاي.
شمس: – متقوليش كده، ده واجبي، وأنا مبسوطة إنك بقيتي كويسة.
أسماء: – لا، إنتِ ليكي فضل كبير عليا، وعمري ما هنسى اهتمامك بيا.
شمس سلمت عليها: – ألف سلامة عليكي يا ست الكل، وخلي بالك من نفسك، هستناكي في المتابعة الجاية.
أسماء: – هستناكي يا حبيبتي، ومتغيبيش عني.
شمس: – من عيني.
فارس شكر شمس، وبعد ما خلصت إجراءات الخروج، ساعد والدته وخرج معاها من المستشفى.
لكن قبل ما يركبوا العربية، أسماء بصت للمبنى وقالت: – ربنا يجازي كل اللي اهتموا بيا خير.
فارس: – المهم إنك بقيتي كويسة يا أمي.
ركبوا العربية، وفارس كان ساكت شوية، لحد ما أسماء بدأت تتكلم.
أسماء: – على فكرة يا فارس، أنا عايزة أقولك حاجة.
فارس: – قولي يا أمي.
أسماء: – إنت بقالك فترة طويلة في المستشفى أكتر من المعتاد.
فارس: – طبيعي يا أمي، إنتِ كنتِ تعبانة، وكان لازم أتابع كل حاجة بنفسي.
أسماء: – وأنا مقدرة ده يا حبيبي، بس إنت رجل أعمال وعندك شغل ومشروعات واجتماعات، ومش معقول تفضل متابع المستشفى طول الوقت.
فارس: – الشغل ماكانش أهم من صحتك يا أمي.
أسماء: – عارفة يا حبيبي، وربنا يخليك ليا. بس دلوقتي أنا بقيت كويسة وهرجع البيت، وإنت لازم ترجع تتابع شغلك.
فارس: – حاضر يا أمي، متقلقيش.
أسماء: – المستشفى فيها إدارة ودكاترة ورؤساء أقسام، مش لازم إنت بنفسك تتابع كل صغيرة وكبيرة. إنت كنت مضطر تتابع الفترة دي علشان أنا تعبانة، لكن دلوقتي خلاص، شوف شغلك الباقي.
فارس هز راسه: – عندك حق.
لكن أسماء لاحظت إنه مش بيتكلم بحماس، وكأنه مش عايز يرجع لحياته القديمة.
أسماء: – طب قولي يا فارس، هترجع لنظامك القديم؟ تيجي المستشفى كل أسبوع أو عشرة أيام مرة، تتابع شغلك وترجع لمكتبك؟
فارس سكت لحظة قبل ما يرد: – هنشوف يا أمي، حسب ظروف الشغل.
أسماء بصتله بابتسامة: – حسب ظروف الشغل بس؟
فارس: – أيوه، ليه؟
أسماء: – لا، بس بسأل. أصل أنا مش عايزاك تضيّع وقتك هنا، وإنت عندك مسؤوليات كتير.
فارس: – متقلقيش، أنا عارف أنا بعمل إيه.
أسماء اكتفت بالابتسامة، لكنها كانت ملاحظة حاجة.
هي عارفة ابنها كويس، وعارفة إنه طول عمره مشغول بشغله ومشروعاته، وكان بييجي المستشفى كل أسبوع أو عشرة أيام مرة، يتابع الحسابات والإدارة ويطمن على سير العمل، وبعدها يرجع لمكتبه وشركاته.
لكن الفترة الأخيرة بقى وجوده في المستشفى أطول، وكل يوم عنده سبب يخليه يروح القسم أو يسأل عن حاجة.
ولما قالتله إنه يرجع لشغله، لاحظت إنه مش متحمس زي ما كانت متوقعة.
ابتسمت بين نفسها وقالت: – يا ترى إيه اللي اتغير فيك يا فارس؟
وصلوا البيت، وسعاد كانت مستنياهم على الباب.
سعاد: – حمد الله على السلامة يا أسماء هانم، البيت نور برجوعك.
أسماء: – الله يسلمك يا سعاد، وحشتيني.
سعاد: – البيت كان ناقصك يا هانم.
فارس ساعد أمه تدخل، وطلب من سعاد تجهز لها كل اللي محتاجاه.
بعد ما أسماء ارتاحت في أوضتها، فارس وقف عند الباب.
فارس: – محتاجة أي حاجة يا أمي؟
أسماء: – لا يا حبيبي، روح شوف شغلك، أنا بقيت كويسة.
فارس: – طيب هعدي عليكي بالليل أطمن عليكي.
أسماء: – ربنا يخليك ليا.
خرج فارس من الأوضة، لكنه بدل ما يتجه لمكتبه، وقف شوية قدام الشباك وبص ناحية الطريق.
كان بيفكر في المستشفى، وفي الشغل اللي متراكم عليه، وفي كلام شمس لما قالتله إنها مش هتخلف وعدها لأمها.
افتكر طريقتها وهي بتتكلم معاه، وثباتها قدامه، واهتمامها بأمه، وحتى ضحكتها وهي بتهزر معاها.
ابتسم من غير ما ياخد باله، وبعدها رجع لنفسه وقال: – إيه يا فارس؟ إنت سرحت في إيه؟
أما أسماء، فكانت قاعدة في أوضتها وبتبتسم وهي بتفتكر ملامح ابنها لما قالتله إنه يرجع لشغله.
قالت لنفسها: – يا ترى يا فارس، إنت عينيك على المستشفى فعلًا، ولا على الدكتورة شمس؟
لكنها قررت ماتتكلمش دلوقتي، وتسيب الأيام تجاوبها.

تعليقات