رواية ديون النبض الفصل الواحد والستون
في اللحظة دي دخلت، ولقيت مجد في حضن دكتورة جيهان. وقفت مكاني وابتسمت، واتبسطت جداً من المنظر ده. حسيت إن مجد بدأ فعلاً يلين ناحية أمه، وإنه من جواه بدأ يسامحها ويتقبل وجودها في حياته من جديد.
كنت مبسوطة لدرجة إن ده خلاني أقرر إننا فعلاً نبدأ نعيش في الفيلا من الليلة دي.
بصيت لهم وقلت بابتسامة:
وعد: ياريتني ما دخلت، أنا شكلي كده قطعت عليكم اللحظة الحلوة دي.
دكتورة جيهان بصت لي وقالت:
د. جيهان: لا يا وعد، ما تقوليش كده. ده أنتِ سبب أي حاجة حلوة دلوقتي موجودة بينا.
ابتسمت لها وقلت:
وعد: طيب، عمر نام. أنا هطلع علشان أنيمه.
وبعدها افتكرت حاجة، فبصيت لها وسألتها:
وعد: صحيح يا ماما، هو أنا هنام فين؟
بصت لي وقالت:
د. جيهان: اطلعي أوضة مجد ونامي فيها.
بصيت لها، وبعدها بصيت لمجد وقلت:
وعد: على فكرة، عمر مش هينام بعيد عني. هينام في حضني.
مجد: عمر ليه أوضة يا وعد، هينام فيها. علي فكره احنا لسه فيها!
بصيت له وقلت بضحك:
وعد: خلاص، خلاص.
دكتورة جيهان بصت لي وضحكت، وبعدها طلعت فعلاً ونيمت عمر في سريره، وفضلت جنبه لحد ما اطمنت إنه نام بهدوء.
بعد شوية مجد طلع هو كمان، ودخل الأوضة بهدوء. بصيت له وطلبت منه يدخل بالراحة علشان عمر ما يصحاش.
قرب مني وقعد على السرير الناحية التانية جنب عمر، وفضل يبص لي وهو مبتسم. وبعدها قرب من عمر، وطبع قبلة على جبينه، ومسك كفوف إيده وطبع قبلة عليها، وفضل يتأمله شوية لحد ما اطمن إنه نام كويس.
بعدها بص لي، ومد إيده ومسك خصري وأخدني في حضنه وقال:
مجد: وعد، أنا بحبك قوي.
بصيت له، وحسيت إن عينه بتلمع وفيها شوق غريب. قربني منه أكتر، وبعدها دخلنا أوضتنا ونمنا مع بعض الليلة دي.
كانت أول ليلة لينا مع بعض في الفيلا، وكنت حاسة براحة بال عمري ما حسيتها قبل كده.
دي كانت أول مرة أحس فيها إن مجد بدأ يصارح نفسه، وإن باله فعلاً بدأ يرتاح عن الأول.
في اللحظة دي حسيت إني مشتاقة لمجد في كل حاجة؛ لقربه مني، ولوجوده جنبي، وحتى لفرحتي بيه وهو بيبدأ يصالح نفسه ويصالح أمه ويقرب من ابنه.
كان نفسي يكمل حياتنا مع دكتورة جيهان هنا، مش علشان المستوى المادي أو الاجتماعي الأكبر، ولا علشان الوضع اللي إحنا فيه، لكن علشان كنت عايزة مجد ما يبعدش عن أمه تاني.
ومن الليلة دي حاجات كتير جداً اتغيرت. حسيت إن مجد بدأ يرجع لدكتورة جيهان، وبدأ يشوفها من جديد على حقيقتها... أمه.
نمت في حضنه الليلة دي وأنا حاسة إني ملكة، وكأن سعادة الدنيا كلها اتجمعت في اللحظة دي.
لكن فجأة صحيت، وفتحت عيني تلقائي، وحسيت إن عمر هيبدأ يصحى ويعيط.
قمت بسرعة واتحركت ناحية أوضته، ولقيته فعلاً بدأ يبكي بهدوء. قربت منه وأخدته في حضني، وفضلت أطبطب عليه وأهديه.
في اللحظة دي مجد فاق، وأخد باله إني مش موجودة جنبه. قام ودخل ورايا أوضة عمر، ولقاني شايلاله بهدوء وبحاول أهديه.
ولما هدي شوية، لاحظت إنه فاق تماماً، فجهزت له الببرونة بتاعته.
الداده قربت مني و قالت لي:
الداده: اديها لي أنا.
بصيت لها، لكني كملت:
الداده: أنا هرضعه.
وفعلاً أخدته منها، وبدأت أرضعه لحد ما شبع. وبعدها طبطبت عليه وأخدته في حضني تاني لحد ما نام.
ما كنتش حاسة إن مجد واقف ومتابعني، لكن في دماغي إنه نايم في أوضتنا.
وبمجرد ما حطيت عمر في سريره وقمت أتحرك، لقيت مجد لسه واقف بيتابعني.
بص لي وابتسم وقال:
مجد: أنا عارف إن إحنا بدأنا.
بصيت له وضحكت، وقربت منه بدلال وقلت:
وعد: على فكرة، حضنك وحشني قوي.
بص لي وضحك وقال:
مجد: أيوه، اضحكي عليا علشان أعدّي لك اللي بتعمليه.
قربت منه وفعلاً دخلت في حضنه، ورجعنا أوضتنا تاني. أخدني في حضنه مرة تانية، وفضلنا مع بعض لحد الصبح.
فتحت عيني الصبح، ولقيت ابتسامة مجد قدامي. كانت ابتسامة مختلفة عن أي ابتسامة شفتها منه قبل كده؛ ابتسامة صافية، مفيهاش وجع زمان ولا الألم اللي كان دايماً باين في عينيه.
بص لي وقال:
مجد: كل ده نوم؟
ضحكت وقلت له:
وعد: أقولك على حاجة؟
مجد: قولي.
وعد: بصراحة، عايزة أفضل في حضنك كده وما أقومش تاني.
بص لي وقال:
مجد: إحنا مش عايزين نتعود على الكسل. إحنا عندنا جامعة، وخلاص هنبدأها خلال عشر أيام.
بصيت له وابتسمت وقلت:
وعد: وإحنا ينفع نأجل السنة دي؟
بص لي ومسك خدي وقال:
مجد: مفيش تأجيل يا دكتورة وعد. أنا مستعجل جداً إنك تخلصي تخصصك. وبعدين عايزك تنظمي وقتك علشان تساعديني في المستشفى. ولا أنتِ خلاص أخدتي على الكسل؟
ضحكت وقلت:
وعد: لا، ما أخدتش على الكسل. حاضر، حاضر، هحاول أنظم وقتي علشان عمر برضه.
بص لي وضحك وقال:
مجد: يا دي عمر، اللي بقى جزء من كلامك في كل حاجة! حتى وإنتِ بتكلميني وبتقولي بحبك، بتجيبي عمر في النص.
بصيت له وقلت:
وعد: هو عمر حتة منك أنت، فأنا بحبه زي ما بحبك.
بص لي وضحك، وبعدها قرب مني تاني.
لكن أنا بصيت له وقلت:
وعد: ممكن بقى أقوم أشوف عمر؟ علشان هو وحشني قوي.
مجد: مفيش خروج من الأوضة دلوقتي.
بصيت له وقلت:
وعد: مجد...
لكنه سبقني بقبلة على شفايفي، وفضلنا مع بعض فترة، لحد ما قمنا تقريباً الساعة اتناشر.
كنت حاسة إني سبت عمر فترة طويلة، لكن صحيت على صوته.
قمت بسرعة، وبصيت لمجد. كان لسه نايم، ولأول مرة أشوفه نايم بالهدوء ده.
في البداية تخيلت إنه بيضحك عليا وعامل نفسه نايم، لكن لما قربت منه اكتشفت إنه فعلاً نايم.
حاولت أصحيه، فطبعت قبلة على جبينه وعلى خدوده، لكنه فضل نايم زي ما هو.
وهو نايم اتنهد، ومد إيده وأخدني في حضنه مرة تانية.
وبعد حوالي نص ساعة بدأ يفوق، وأنا طول الوقت ده كنت بتأمل ملامحه.
وفي اللحظة دي تمنيت من كل قلبي إن ربنا يرزقني بطفل منه، طفل يكون شبهه زي عمر.
وقتها حسيت فعلاً إني أسعد إنسانة في الكون كله؛ بحب مجد ليا، وبوجود طفل زي عمر في حضني، وبالحياة اللي بدأت أخيراً ترجع تجمعنا من جديد.
/ ديون النبض 🫀
بقلم الكاتبة مروة صياح 🎯✍️
عدت الأيام، وعمر بقى عايش معانا في بيتي، وكنت حاسة فعلاً إني مسؤولة عنه. بقيت مهتمة بيه في كل حاجة؛ لبسه، وتغييره، ورضاعته، وكل تفصيلة صغيرة تخصه.
ما كانش عمر لوحده اللي موجود معانا، الدادة كانت عايشة معانا هي كمان، خصوصاً إني خلاص كنت هبدأ دراستي من جديد، فكان لازم يكون فيه حد يساعدني في الاهتمام بيه وياخد باله منه وقت غيابي.
خصصنا أوضة الأطفال لعمر والدادة، لكن ده ما منعنيش إني أكون معاها في كل تفصيلة تخصه.
كنت بمجرد ما أسمع صوته بيعيط، حتى لو في عز نومي، أقوم أجري عليه وأشيله وأخده في حضني.
الموضوع ده كان بيسعد مجد من ناحية، لكن من ناحية تانية بدأ يحس إن اهتمامي بعمر زاد عن حده، وإنه مع الوقت بقى بيأثر على حياتنا مع بعض. لكنه ما كانش بيتكلم، وكان بيفضل ساكت، يمكن علشان ما يضايقنيش.
وجاء أول يوم ليا في الجامعة بعد رجوعي للدراسة.
كنت فكرت كويس جداً في مستقبلي، وقررت أغير التخصص اللي كنت بحلم بيه من البداية. بدل تخصص القلب والجراحة، اخترت تخصص الأطفال.
ولما مجد عرف، اتصل بيا في أول يوم ليا في الجامعة، وكان واضح من صوته إنه متضايق.
وبعدها رحت له العيادة، ولما دخلت لقيته فعلاً مش على بعضه.
وعد: مالك يا مجد؟ فيك إيه؟
بص لي وقال:
مجد: أنتِ تخصصتي إيه يا وعد؟
وطيت راسي وقلت له:
وعد: أطفال.
بص لي باستغراب وقال:
مجد: بس ده ما كانش هدفك من البداية!
وعد: أنا حبيت الأطفال أكتر، وحسيت إن ده القسم الأنسب ليا.
قرب مني ومسك إيدي وقال:
مجد: لا يا وعد، أنا عارف إنك كنتِ بتقولي كده من فترة، لكن كان جوايا يقين إنك هتتخصصي قلب وهتكوني معايا. إيه اللي خلاكي تغيري رأيك كده؟
وعد: أبداً، أنا حاسة إن القسم ده أفضل ليا دلوقتي. والقلب بصراحة صعب، وأنا مش قادرة أكمل فيه.
بص لي وقال بجدية:
مجد: لأ، علشان عمر. أنا عارف إنك عملتي كده علشان عمر.
بصيت له وسكت، وبعدها قلت:
وعد: إيه المشكلة يا مجد؟ أنا حابة قسم الأطفال دلوقتي، وإيه المشكلة إني أتخصص أطفال حتى لو علشان عمر؟
مجد: دي أول خطوة أنتِ بدأتي تتنازلي عنها يا وعد.
وعد: لا يا مجد، أنا ما اتنازلتش عن حاجة.
مجد: لا، كان حلم من أحلامك إنك تكوني دكتورة قلب، واتنازلتي عنه لمجرد إن عمر بقى في حياتك. لكن أنا مش موافق على القرار اللي أنتِ أخدتيه ده. بعد إذنك، غيري تخصصك.
بصيت له وقلت:
وعد: لا يا مجد، مش هينفع. تخصص القلب هيخليني أتواجد كتير في المستشفى، وفي الـسيشنز العملي، وأنا مش عايزة كده. أنا ليا بيتي برضه، ومع الوقت هيكون عندي أولاد غير عمر، ومش عايزة أقصر في أي حاجة.
بص لي وقال:
مجد: وأنا قلت لك مش هتقصري، وهكون موجود معاكي في كل حاجة، لكن مش لدرجة إنك تبعدي عن حلمك وطموحاتك.
وعد: ومن قال إني بعدت عن حلمي وعن طموحاتي؟ أنا زي ما أنا، وإن شاء الله هكون دكتورة ناجحة وشاطرة، ومش هسيبك، وهكون موجودة معاك في المستشفى. بس أنا برضه بفكر في الجانب الأساسي في حياتي، اللي هو أنت وبيتي يا مجد.
فضل يبص لي، وحاول يقنعني أكتر من مرة إني أراجع قراري، لكن أنا كنت مصممة على اختياري، وفي النهاية استقريت على تخصص الأطفال.
ومن وقتها بقيت بحاول على قد ما أقدر أخلص كل محاضراتي والـسيشنز العملي، وبعدها أعدي على مجد وأكون موجودة معاه في العيادة، لكن من غير ما أتأخر، علشان أرجع البيت بسرعة وأطمن على عمر.
مجد كان شايف كل ده وساكت. كنت حاسة إنه عايز يكلمني، وإن في كلام كتير جواه، لكنه ما كانش عايز يضايقني أو يحسسني إنه معترض على اهتمامي بعمر.
حسيت من جوايا إن مجد كان متضايق، وإنه من بعد ما لاحظ اهتمامي الكبير بعمر، بدأ يحس إني بقيت أنساه وأهتم بعمر أكتر منه.
لكن الحقيقة إن عمر ما كانش بيسكت غير في حضني أنا. بالرغم من وجود الدادة معاه، وإنها كانت بتشيله وتهتم بيه وتغيّر له هدومه وتديله رضعتُه، كان بمجرد ما بشيله أنا بيهدى ويسكت.
في مرة شيلته ودخلت بيه الأوضة، وقعدت على السرير. بصيت لمجد وأنا بضحك وقلت له:
وعد: مجد، ممكن تخلي عمر ينام معانا في الأوضة؟
بصلي وقال:
مجد: وعد، خليه ينام مع الدادة في أوضته، بعد إذنك.
وعد: مش هيسكت، هو عايزني أنا.
بصلي شوية، وبعدها قال:
مجد: ماشي، بس بشرط ما ينامش في وسطنا. خليه ينام على طرف السرير.
بصيت له وقلت:
وعد: لأ، هيقع.
سكت، فقلت له برجاء:
وعد: علشان خاطري يا مجد، أنا خايفة يقع.
مجد: هنحط مخدة جنبه على آخر السرير، لكن محدش هيبعدك عن حضني.
بصيت له وسكت، وفعلاً عملنا كده.
كنت في حضنه، وبصيت له وقلت:
وعد: أنا مبسوطة أوي بوجود عمر معايا.
مجد ابتسم وقال:
مجد: طيب حظه إن له أم زيك إنتِ يا وعد.
أخدني في حضنه، وبصلي وقال:
مجد: وعد، أنا بحبك أوي.
وما قدرش يقاوم رغبته إنه يضمني أكتر، فقربنا من بعض، وكنت بحس إننا روح واحدة في جسدين.
لكن مجد كان لسه بيقرب مني أكثر لما عمر صحي، فبعدت عنه بسرعة وقربت من عمر، وأخدته في حضني، وفضلت أحاول أهديه وأنيمه بهدوء.
بالرغم من إن عمر كان ساكت، لاحظت إن مجد بصلي بضيق، وبعدها قام من مكانه وسابني وخرج من الأوضة.
وقتها حسيت إن مجد فعلاً متضايق جدًا، وإنه مش بس زعلان من انشغالي بعمر، لكنه كمان بدأ يغير من اهتمامي بيه.
لكن أنا ما كنتش عارفة أسيطر على حبي واهتمامي بعمر، وخصوصًا إنه لسه صغير، ومحتاج حب واحتواء واهتمام.
كنت بضغط على نفسي علشان أقدر أهتم بيه، وفي نفس الوقت أجتهد في دراستي، وأحاول ما أقصرش في صحتي.
كان الليل بييجي، وأوقات كتير جدًا كنت بسهر مع عمر وأأجل مذاكرتي. وبالنهار كنت بين الجامعة ووقوفي في المطبخ ومسؤولياتي في البيت، لكن كان عمر رقم واحد عندي قبل كل ده؛ لأنه لسه صغير ومحتاجني.
وفي مرة من المرات، لقيت مجد بيقرب مني، وكان واضح على ملامحه إنه زعلان ومتضايق جدًا، وقال لي:
مجد: لو سارة كانت عايشة، ما كانتش هتهتم بيه بالطريقة اللي إنتِ بتهتمي بيه كده.
بصيت له وسكت لحظة، وبعدها قلت:
وعد: لأ يا مجد، كانت هتهتم بيه، ويمكن أكتر مني كمان. دي أمه، ومافيش أم بتقصر في حب ابنها أو في اهتمامها براحته.
مجد بصلي وسكت، وحسيت إني ضغطت على جرح قديم جواه. جرح لسه ما خفش، ويمكن كلامي رجّع له وجع كان بيحاول يتجاوزه.
وطّيت راسي، لكن فضلت أفكر في الموضوع.
حسيت إن وجود عمر واهتمامي الكبير بيه رجّع لمجد أوجاعه القديمة، وإنه وهو شايفني بهتم بعمر بالشكل ده، بيحس بوجع فقد أمه من جديد.
كنت عارفة إن عمر ابنه، وإن مجد نفسه كان محتاج يحس إنه أبوه ويعيش معاه بشكل طبيعي، لكن في الوقت نفسه كنت بحس إنه مقصر معاه جدًا.
ما كنتش عارفة أحدد إذا كان ده بمزاجه، ولا غصب عنه. هل هو رافض يقرب من عمر من جواه؛ لأن وجوده واحتواءه ليه بيفكروه بالوجع اللي عاشه؟ ولا هو فعلًا مشغول عنه بسبب شغله والضغوط اللي عليه؟
مجد فعلًا كان مشغول، ومسؤولياته وضغط شغله كانوا كتير، وكنت مقدّرة ده. لكن في نفس الوقت كان نفسي أشوفه بياخد عمر من إيدي من نفسه، من غير ما أضطر أنا أشيله وأروح أديهوله.
كان نفسي أشوفه قاعد معاه، يضحك له ويهزر ويلعب معاه، زي ما كنت بشوفه بيضحك ويلعب مع حور بنت رغد وحازم.
كنت نفسي أشوفه بيتعامل مع عمر بنفس التلقائية والحنية، وأشوفه مستمتع بوجود ابنه جنبه، مش مجرد أب موجود في البيت، لكن أب بيشارك ابنه تفاصيل يومه وبيفرح بيه.
لأن عمر مش طفل غريب عنه، ده حتة منه.
كنت بحاول على قد ما أقدر أوفّق بين مذاكرتي واهتمامي بعمر، وفي نفس الوقت ما أنساش نفسي. لكن الحقيقة إني ما كنتش بنام كويس ولا باكل كويس، ومجد كان دايمًا زعلان وبلومني على إهمالي لنفسي.
لحد ما في مرة من المرات، كنت في الجامعة وبنتابع الحالات في عنبر الأطفال، وفجأة وقعت من طولي.
زمايلي استدعوا دكتور مجد بسرعة، وأول ما وصل قرب مني، وكان واضح على وشي قد إيه أنا مرهقة وتعبانة. وبعد ما فوقت واطمن عليّا، أخدني ورجعني البيت.
كان مجد متضايق جدًا، وبصلي وقال بنبرة فيها عتاب:
مجد: أنا تعبت من كتر الكلام معاكي يا وعد. إنتِ بتجهدي نفسك أكتر من اللازم، وقلت لك خدي بالك من نفسك ومن صحتك. لكن إنتِ كل اهتمامك بعمر وبالبيت، وجيتي على نفسك وعلى صحتك.
بصيت له وأنا زعلانة، وقلت له:
وعد: علشان خاطري يا مجد، صدقني أنا كويسة... يمكن بس شوية إرهاق....
وحاولت اعدي الموقف وفعلاً عدي..
كانت الأيام بتعدي، وأنا كل ما أرجع البيت أبقى ملهوفة على عمر. أول ما أدخل أسأل عليه، وأشيله وأطمن إنه كويس، وأتابع كل تفاصيله.
شهر ورا التاني ورا التالت، وعمر بيكبر، وبيخطف قلبي أكتر وأكتر.
بدأ يلاغي، ويحاول يتكلم، وظهرت منه أول كلمات بسيطة؛ دادا، بابا، ماما.
وكل كلمة كان بيقولها كانت بتفرحني كأني حققت إنجاز كبير.
لحد ما وصل عمر لست شهور، وبدأت أديه تطعيم الست شهور.
وفي نفس الوقت كانت عندي امتحانات عملية، لكن عمر بعد التطعيم تعب جداً وسخن، واحتاج اهتمامي طول الوقت.
لقيت نفسي مش قادرة أركز في امتحاناتي، وكل تفكيري بقى معاه. كنت شايلاه ومهتمية بيه وبراقب حرارته وبحاول أريحه، لدرجة إني قصرت فعلاً في امتحاناتي.
واتفاجئت بمجد بيتصل بيا، وكان متضايق جداً وزعلان.
وكانت دي أول مرة يعلي صوته عليا بالشكل ده في التليفون.
ما رديتش عليه، واكتفيت إني أسكت، لكن كنت حاسة قد إيه هو غضبان.
وبمجرد ما رجع البيت، بص لي وقال:
مجد: ده اللي أنا كنت خايف منه يا وعد! أنا قلت لك إنك هتقصري، وما سمعتيش كلامي.
سكت لحظة، وبعدها كمل كلامه بنبرة حاسمة:
مجد: اعملي حسابك، عمر هيرجع لجدته تاني، علشان تركزي في مذاكرتك وتركزي في نفسك.
بصيت له بصدمة وقلت:
وعد: لأ يا مجد! أنت إيه اللي بتتكلم فيه ده؟ إزاي تاخد قرار زي ده؟
مجد: خلاص، بعد إذنك، أنا قراري أخدته. دي درجاتك يا وعد، ودي نتيجة اهتمامك بمذاكرتك. أنتِ بقيتي مهملة في نفسك، ومهملة في صحتك، ومهملة في كل حاجة بسبب عمر.
لما تخلصي دراستك نبقى نفكر في الموضوع تاني، وعمر يرجع لنا أو لأ.
بصيت له وسكت، وما كنتش عارفة أرد عليه.
لأن الحقيقة إن عمر كان واخد كل تفكيري، وكل اهتمامي، لدرجة إني فعلاً قصرت في حاجات كتير.
حتى أوقات كنت بقصر مع مجد نفسه.
كتير جداً كنت ببقى موجودة معاه، ومجرد ما أسمع صوت عمر بيعيط، أسيبه وأجري عليه.
كنت بحس إن مجد بيتضايق، لكن كنت دايماً أقول لنفسي: يتضايق ليه؟ ده ابنه هو، والمفروض يفرح ويسعد إني بهتم بابنه وباخد بالي منه.
ما كنتش متخيلة إن اهتمامي بعمر ممكن يوصل بينا للحالة دي، وإن مجد يزعل بالشكل ده، وياخد نفس القرار مرة تانية...
إن عمر يبعد عني.
