رواية خلخال مشوه الفصل الواحد والستون بقلم زمرده
°نسمات°
احس گلبي طاح ورچليه ما يشيلني بعد شلون تحركت ما اعرف بس كل الاعرفه حيل ما ضل عدي وبس طبيت
صارت گبالي واگفه يم السنك ترچف وابوي واگف بمسافة بعيده عنها مبين يخاف يتقرب منها لا تصيح لان حالتها مو طبيعيه بس شافني گال والتوتر من وضعها مبين عليه
غافر : شوفي شبيها جاي احاجيها ما ترد علي
تقربتلها بحذر اسألها وانا احاول اتناسه الهبطة العشتها
_ شكو شبيج حبيبتي
عيونها تحولت مني لابوي اشرتلي عليه چن طفله جاي تشكي لامها مو العكس
ناهدة : كض ايدي ويگلي صايرة حلوة
حرت وين اطي وجهي من هذا الموقف وما گدرت اخفي ابتسامتي أبوي بساع طلع مبين انحرح مني كضيت اديها ثنيناتهن اشرحلها
_ واذا كض ايدج هسة انا مو هم اكضها ونوبات اگلج صايرة تخبلين واتغزل بيج
ناهدة : بس أنت مو مثله
_ شلون مو مثله
ضلت صافنه ومبينه حايره شلون توصلي قصدها حتى أفهمه بس انا كلش مفتهمتها بس اريدنها تحجي من شفت ضياعها كضيت ايدها وطبينه جوه شوي واجه أبوي ورانه ما حاجاها بشي وگعد يباوع اخبار وبس دگ موبايله طبگ حواجبه وهو يشوف اسم المتصل
گام بكل هدوء طلع برا ماگدرت اضلن وما الحگه عمن هل چم يوم ابد وضعه ما عاجبني وبس وصلت قريبة ع المطبخ سمعت صوته يحجي بصوت ناصي بس چان منفعل لدرجة ما حس بي وراه
غافر :اطلع كلب اذا رديتلكم شتسوووي سوي ما تهموني انا غااافر هااا وتعرف غافر منو وشني يگدر يسوي
اندار وبساع سد الموبايل من شافني وانا هل مرة ما گدرت ما اسأل واعديها مثلها مثل غيرها
_ شني الصاير بوية ويامن چنت تحجي
حط الموبايل بجيبه واجه وگف گبالي يريد يغير السالفة
غافر : شني صايرة تتسنطين من شوكت أنت هيج
_ جاي اشوفنك مو طبيعي احجيلي بوية شكو والله ضل بالي
انا احجي بخوف وهو يضحك
غافر : عليش خايفة يابة المفروض منج ما تخافين ابوج موش هين
_ احجيلي شصاير
غافر : سالفة ما تستاهل احجي بيها وصدگ أنت مو ما نايمة ما ترتاحين
ما لحيت اكثر بعد بس گلبي يلعب وابد ما ارتاحيت ويوم عن يوم خوفي يزيد وابوي منتهتله صاير حتى ما يگعد ويانه مثل گبل ولو گعد باله يضل شارد وما يحجي الا بشي قليل وعلى گد السؤال چنت اضن بروحي اتوهم بس حتى امي انتبهت
گاعدين نتغده وندستني ودنت روحها تشاورني
ناهدة : شني شبيه ابوج
_ ما اعرف
تنهدت ورفعت الخاشوگه اكل ومركزة وياه گبل لا يگضي ماعونه گام و وصاني اصبله چاي تانيت امي تگضي اكلها ولميت كلشي بين ما يفور الجاي غسلت المواعين وبس
هدر صبيتله ومشيت دگيت باب غرفته وطبيت چان گاعد گباله اوراق ودام لابس نظاره مبينه السالفة موش هينة عمن خلته يحتاج هلگد يركز
اطيته الگلاص اخذه مني ورد دنگ مركز بوحده من كوم الاوراق گدامه خليت وطلعت حايرة من الملل
رحت نزلت بردات البيت وغسلتهن
ورا چم يوم نزلت النتائج
واضن ما چاس گلبي الفرح هيج من گبل حرت ابچي لو اضحك بنص نوبة التناقض وطبت زينة بهتت بس شافتني ابجي اجتني بساع تركض تلفتت على أبوي وعمة غفران
زينة : شكو ليش تبچي
شهگت وگلتلها بحس يرچف
_ معدلي يجيبلي طبية تحقق حلمي زينة
ضحكت ما مصدگة وحضنتني بساع وبس وخرت طگتني
زينة : هبطتيني والله اجيت اطرح من الخوف وين اكو وحده هيج تبچي وهي جايبة طبية
غفران : هاي دموع الفرح وحگها لو بچت عمن ما مصدگه
امسح بعيوني ويردن يبچن وزينة كلساع تگلي
زينة :كافي ولج
_ مو بيدي والله هن يبچن
مبتسمة وتباوعلي طب رجلها باركلي وضل يمدح بي من سأل على درجاتي هذا الهوه صرت احسن اله طعم مختلف جرة النفس هاي جديدة علي مابيها هم ولا خوف ولا أي شي وهسة كملت فرحتي ودعت سنيني المضن والشفته بيهن من ظلم
اسبوع مشى وانا انامن واگعد مبتسمة ونشاطي ما يگضي اشتغل بالبيت بالنهار وبالليل اگضيها لو ع الموبايل لو اتابع ملسلسلات واجبر امي تباوع وياي وبس بده الشته اخذني أبوي ومشينه للسوگ نجيب فراش جديد وهل مرة طلعنه امي ويانه وشاركت باختيار چم شغلة وحتى لو ما تعجبنه ناخذها حتى بس لا يضل بخاطرها وبس ردينه غسلت البيت وفرشته أبوي ترس الصوبة وحطها
سبحت وطلعت اتأمل هالاجواء الحنينة بيت دافي مابيه مشاكل امي وابوي وحلمي هذا الگضيت عمري احلم بيه
گعدت گبال الصوبة ادفي ايدي هالايام كلش باردة
گعد أبوي گبالي يدفي ايده عمن غسل من النفط والماي مال مغسله البره بارد گمت مشطت شعري وطلعت للمطبخ سويت گهوه وسط مثل اليحبها أبوي ورديت گعدت گباله صبيتله بفنچان واطيته شرب منها يحجي وياي على التقديم اتفقنه باجر نمشي نشوف الوضع بالجامعة
تمددت بتعب اتثاوب وما حسيت بروحي من غفيت الصبح من گعدت لگيت روحي متغطية ومخده جوا راسي گمت متكسرة من التعب مال شغل امس باوعت للساعة چانت توها تريد تصير 7 شغلت التلفزيون على سورة البقرة
درت اباوع لباب غرفة أبوي من انفتح بس شافني گاعدة گال
غافر : صباح الخير
_ صباح النور شوكت نمشي
ابتسم وهو يمشي يريد يطلع
گالي
غافر : متحمسة الدكتورة
_ تريد الصدگ يابوية
اندار علي وهز رأسه بأي گمت وگفت
_ متلهفه اشوفن الجامعة الگضيت عمري احلم اطبلها
غافر : راح يتحقق وما يضل بس حلم
هزيت رأسي وابتسامتي تشرح شگد متلهفه للساعة البيها اعبر من بوابة جامعة احلامي ترگينه وبدلت ومشينا وبس وصلنه جريت نفس اشتم هواها تلفتت اديرن عيوني بالمكان
غافر : يله بوية نسمة
چان ماشي گبلي وانا ما منتبهتله مشيت بساع كض ايدي امشي وياه واعدل بعباتي بايدي الثانية الهوا
قوي وجاي يحركها بس وصلنه وسجلوني واحنه بدربنه للبيت اقترح علي
غافر : شرايج نمشي للبيت نچيب چم حاجة الج
أبتسمت وهزيت رأسي بأي غير دربنه متوجهين للسوگ وبس وصلنه وصاني
غافر : أي شي بنفسج اخذيه ولا تترددين خوش
گلتله خوش وطبينا اخذتلي بناطير بثلاث الوان مختلفة وقمصان وشالات وجنط واحذية و من وصلنه للمكياج استحيت اگله افتهم علي من شافني اباوع المحل
غافر : طبي اخذي التريده بس بالمعقول بعد ابوج
أبتسمت
_ مو مكياج اريدن چم شغلة غيرهن
صدگ چان بنفسي المكياج بس تراجعت بسبب هاي حجاياته طبيت اخذت عطور ومرطبات وسوالف عناية و بس حمرة وحدة اخذتلي وحتى من حاسبناه وشافها أبوي استحيت بس لونها چان كلش بناتي وما يبين الا احد يركز رديت للبيت طايرة بساع طبيت للغرفة اسفط
بيهن بكنتوري وطبت امي اجت گعدت بصفي تسأل شسوينه وانا اراويها شستريت احجيلها عن الجامعة
ناهدة : الله صدگ هيج حلوة
_ تخبل والله ما اعرف انا جاي ابالغ لان حابتها بس صدگ تخبل
تبتسم وتباوعلي وفكرة صارت تسمعلي وتتفاعل وياي بيها الفرحة ما اطيها لاحد انقبلت وبدة الدوام ويوميا اگعد بكامل نشاطي اتحظر أول اسبوع داوم چان عادي ومابيه غير الهدوء وبيومها چان خميس توني نزلت من الخط وطبگت سيارة أبوي جاي من دوامه نزل حجه وي ابو الخط چان رچال چبير من منطقتنه ياخذني انا وبت عمة غفران و ثنين بنات بعد من المنطقة الثانية طبيت انا وابوي ضل واگف وياه يحجون عمن انا أخير وحده يوصلني للبيت هواي ضل أبوي يمه الأ طب وراي وبس شافني اباوعله گال يضيع الاسئله الواضحه بعيوني
غافر : جوعان سويلنه شي ناكله بساع عدي طلعه ولو انج تعبانة
شلت الجنطة والعباة حاطتهن على الميز
_ تدلل بس ابدل هدومي
بدلت هدومي ورديت بساع سويت نواشف وبس تغدينه طلع أبوي وبعد هاي طلعته ما اجه غير بليل بس چان مگلوب گلب حاله سلم ومشى لغرفته وانا وامي وحده ضلت تباوع بوجه الثانية مافتهمين شبيه شكد چان بالي مشتت ضحكتني من گالت
ناهدة : هسة يطلع ابوج متزوج بالسر ومرته حامل
ضحكت وياي من ضحكت ولا مصره وتحلف مسويها
ناهدة : والله هسة يطلع مثل هذا بالمسلسل
_يا مسلسل
عدلت گعدتها تحجيلي عن المسلسل بكل حماس وبالاخير گالت
ناهدة : الزلم ما يتامنون تزوج وهو چان يمووت عليها
_ يعني قصدج أبوي متزوج عليج وعلى هاي ضايجة
اشرت على روحها
ناهدة : انا اضوچن لا شني
غطيت حلگي اضحك وهي تطگ بي متنرفزه من ضحكتي ومن هذا اليوم بديت اشوف عيون امي تلاحگ أبوي بكل مكان ومن گلتله گال
غافر : جا تضنين ما منتبه ،بس ما اريدن احسسها بشي لو احرجها خليها ترد على طبيعتها براحتها
وگبل امتحانات نص السنة بأيام مشنيا لدكتورها ومن حجه وياها واستجابات لكل الگاله بشرنه أن ما ضلت غير المرحلة الاخيرة من علاجها وهي اختلاطها بالناس
هناه انا وابوي حرنه وين ناخذها رديت للبيت وانا مقهوره
وحاولت اعوضها عن الكل بس ما فاد وچان لازم تطلع
وبيوم أبوي اقترح نمشي لبيت واحد من صحباته عده بنات بعمري و مرته وامه وگال امي راح تسفاد لو اختلطت بيهن
وبس طبينا عدهم بالبداية چانت مو بس هي مستحية حتى انا بس بعدين بديت اتأقلم وياهم
تلگونه ورحبوا بينه اجوائهم حلوة وامي اخذها الواهس وي الحجية ومرة صاحب أبوي ،وانا ضليت وي البنات
وبنص الگعدة گامت وحدة منهن جابت البوم الصور والحجية تشرحلنه عن كل صورة بيه كنا لمن ابوي اجه علينه ودعناهم وطلعنه وانا نفسيتي استعدلت اضعاف امي الضلت الدرب كله
تسولف بيهم وطلبت من أبوي يجيبها كل مرة الهم وما گال لا
صرنه كل اسبوع هيج نمرلهم وچانوا الهم الايد الاكبر برجوع عقل امي لوضعه الصح صرت اشوفن نهاية تعبي وتعب
أبوي وصبري عليها بانسانة تدرك كلشي تسويه ومو مثل گبل
ما تحب تختلط لا صارت تسولف ويانه وتحب تتعلم تطبخ وتساعدني بهواي من سوالف البيت وبس الي تگدر عليه وبعد ما گضيت امتحاناتي ثاني يوم لميت فراش البيت نويت اغسله توني شغلت الماطور واندگ الباب بهمجية
حرت اطبن البس حجابي لو امشي افتحه امي طلعت تسأل منو گلتها تطب جوه وما تطلع وما اعارف شلون تذكرت وصية أبوي ما اطلع بلايه سلاح وياي طبيت ركض چبت السلاح وبس وصلت عد الباب سحبت اقسام والباب ضال يندگ بنفس الطريقة صحت منو اكثر من مره وما اجاني الرد ومن اندفر عطت بصوت عالي
وي عيطتي اجاني صوت عمي ابو علاء
_افتحييي الباب بت الكلب اذا ما گصيت لسااانج على هل عياااط
_ ما افتحه وشتررريد تسوي سوووي
وخرت على جهه وفزيت مرعوبة من طگ قفل الباب وطبوا كلهم اولاد عمي ابو علاء وباقي عمامي رفعت المسدس عليهم صاحوا بي انزله
_ اطلعوااا يله لا والله ارميييكم اطلعواا
من ما شفت استجابه منهم لكلامي ضغطت ع الزناد وثارت منه أول چيلة چان مكانها الگاع كلهم ترجعوا يصيحون علي صوت الجوارين بره الوادم كلها التمت ومن بيناتهم طبت عمة غفران تركض وگفت بوجهم وخلتني وراها
وتصيح عليهم
غفران : شرايدين منها
أبو علاء : وخررري من وجهي لا تاليها اخرب حتى وياج
غفران : ليش ما مسويها أنت ما تستحي على روحك متهجم على بيت اخوك هيج
أبو علاء : لانه ما اجه بالعيني واغاتي ولا بالمسايس وما ضل گدامنه تصرف ثاني
غفران : امشي اخذهم ورد منين ما اجيت لا تصير موزينة وتعارفه لو طب هسة وشافكم شيسوي وروح أبوي يحط چيله براس كل واحد بيكم وما يهمه
خزرها وجراها من گدامي بساع رديت وجهت السلاح عليه
أحلف اذا تدنه علي ارميه بس چان يضن جاي اهدد بس وبأستهزاء جراني وما اعارف شلون
ضغطت على الزناد وبنفس الوكت طاح ع الگاع يتلوه من الوجع
رديت ارچف اباوع للدم الترس الگاع عطت ورديت اللمن الضل من شجاعتي احمي بيها نفسي من نص التهوا
بيه ونص هجموا علي صاحت بيهم عمة غفران الا تراچعوا
مبينين مسيرين بسوايتهم وعمي هو الدافعهم شالوه للمستشفى
وعمة گدامهم جرتني تطلعني والوادم كلها تباوع علينه ضنوها مشكله بين اهل بس ما يعرفون عمامي الاعداء مو مثلهم
امي كاضه بي ترچف هناه صار كل همي هي احجيها وياها وما اريدنها تنتكس وتونه طبيته لبيت عمتي واجه أبوي من صياحه عرفته واصل لمرحله لو يشرب من دمهم ما راح يرتاح عمة تلگته وهو يسأل علينه وشوي وطب يتلفت من استقرت عيونه علينه گال
غافر : فدوة لايدج الرمته
بخوف گلتله
_ راح انسچن مو
غافر : افااا تنسچنين وانا اشم الهوه هم الراح ينسجنون وشوفة عينج اذا ما خيستهم بالسچون ما اتسمى
من حجه وياي هيج شوي ارتاحيت بس رد الخوف اضعاف من گال ثاني يوم
غافر : لازم اخذج للمركز بس حتى يدونون اقوالج
الدرب گضيته ارچف وبس طبينه گالوا منتظرينه كضيت قميص أبوي حيل من طلع واحد من الغرفة و رحب بيه
هنا من شفت اريحيتهم بالكلام شوي گدرت اخفف من
خوفي بس رد واضعاف من گال أبوي راح اطب بس هو مو وياي وگفت برفض اتوسل بيه
_ لا يابة شني وين امشي وحدي الله عليك طب وياي
بس ما فاد وهذا القانون والماشي طبيت بعد محاولات اقناع أبوي بس شني احسن بروحي من التوتر عرگت وعيوني ثگلت گعدت ع الكرسي وگعد گبالي الچانت رتبته مثل رتبة أبوي فكلي بطل الماي وقدملياه شربت منه وبس وخليته گدامي بأبتسامة گال
_ جري نفس كلهن چم سؤال اسألچياهن وتمشين
بلعت ريگي وهو جاب ورقة وقلم وكل سؤال سألنياه جاوبته بدون لا ازيد ولا انقص وبس سد الدفتر صاح على واحد من الجنود گله خل أبوي يطب رد گعد بمكانه وابوي گبالني
گاله
_ حسب اقوالها قضيتها تعتبر دفاع عن النفس تاخذها وتمشي بس اذا احتاجينه شي تجيبها
گام أبوي سلم عليه يتشكر منه
غافر : ما تقصر وممنون على وگفتك ويانه
_ ولو مثلها مثل بناتي
ابتسم وباوعلي وجهه بشوش
_ عينج على روحج بنيتي
هزيت رأسي بأي وطلعنه الا كدرت اجرن نفس وبس درينه تلگتنه عمة وامي وياها عمن امس ما ضلينه ببيتنه سولفلهن أبوي عن الصار وگال بالحرف
غافر : ناوي اهدن المحافظة كلها ضله الي هنا ماكو بس خل تگضي هل سالفة
غفران : يااا وين تمشي خويه
غافر : اشوفن بلكت ديرة الغرب أامن على بتي وامها
ما ناقشته عمه لان تعارف الخذلان العاشه من اقرب اوادمه عدن يومين وكل ضني بعد ماكو شي والوضع استقر بس چنت غلطانه وما ببالي جاي يحظرون مصيبة تگلب حياتي گلب مر ع الحادثة 4 ايام وابوي مشى الدوامه عگب ما چان ماخذ اجازة گبل لا يطلع هواي وصه عمتي علي وعلى امي گلبي وجعني وسألته
_ صاير شي بوية
ومثل كل مرة يگلي لا بس هل مرة ما سكتت وضليت الح لحد ما گال
غافر : طالعتلي سالفة بالدوام واضنها موش سهلة
غفران : سالفتيش خوية
غافر : تنحل أن شاء الله يله ماشي انا غفران ماوصيج
غفران : والله بديت تخوفني
ما حجه ودار وجهه وطلع هسة وبهل وكت حسيت بگلبي انعصر حتى مشيته چانت مهمومه وابد ما تبشر بالخير ما گضيت يوگي نفسي انسدت بس ضليت احاول اتفائل وما اخلي التشائم يسيطر على عقلي ،بس انتهى كلشي بنيته وحاولتله من گضه اليوم وطر المغرب وابوي ماكو ومو بس انا چان حالي مخربط حتى عمة عينها ع الباب كلساع وتباوع
_ وين صار أبوي عمة
صوتي يرچف وانا اسألها تنهدت تريد تقويني وبنفس الوكت محتاجة احد يقويها
غفران : اضن طلعتله سالفة وهل تأخر عليش هيج خايفة ولج
_ شلون ما اخافن عمة وهو گبل لا يمشي حاله مگلوب گلب
غفران : امشي صلي آذن ودعي يرد سالم عمن اخواني حتى المن دمهم يغدروه
حجاية عمتي ضنتها بسيطة وحجتها بسهو بس انا ضليت افكر بيها وافسر گاعدة على المصلاية وطب رچل عمتي
چان يريد يحجي من شافني سكت وأشرلها گامتله ومشوا للمطبخ وما اعرف شلون وليش گمت وراهم بس چنت متأكده الحجي الراح يحجيه يخص أبوي
بس وگفت عد الباب سمعته يگللها
_ سووها صدگ غفران شني ذوله مو اخوهم من لحمهم ودمهم
سألته بحس تارسه الخوف
غفران : شكو شصاير يا ستار ياربي
ضل ساكت اكثر من دقيقة والگاله بعدها خله الزمن بي يوگف طحت عد الباب اعيدن الگاله براسي
_ انسچن بأكثر من تهمة راح يضيع اخوج غفران
صرت اچرن النفس بصعوبة اشهگ اريدن هو يطب ريتي ماكو على صوتي المختنگ طلعوا يركضون وما سألوا
شبيه لان السبب كلش چان واضح عمتي ضلت تفرك بصدري نوبة ونوبة تدگ على ضهري حايرة تريدني بس اتنفس جابلي الماي رچلها شربت
منه وكضيت ايدها ارچف واحجي حجايات بالگوه ارتبن حروفهن
_ عمة ابوي شبيه
غفران : يطلع والله لا تخافين خايبة والله موش غافر اليطحيوه هل طيحة
حطيت اديه على الگاع سانده روحي عليهن وبچيت من كل خاطري وبشني احجي ما چنت افكر غير بس أي شي يجي على بالي اگولنه
_ ابوووي ياعمة اخذوااا الساندني چبت عمري احلم اعيش هيج استكثروا علي الراحة استكثرواا اعيشين بلاية ظلمهم
حضنتني تهديني بس انا شلون اهده وهاي هي صرت صيده سهله الهم اخذوا السندني وطلع عن شورهم
_ عمة تعبت
حطيت ثگلي عليها ابچي بكل خاطر عدي صار الچنت اخافنه يصير وعلى صوتي گعدت امي وحتى لا تخاف وتنتكس مسحت عيوني اجبر روحي امثل ماكو شي ومن سألت ليش جاي ابچي گلتها
_ طحت ورچليه توجعني
مفزوعة اجت گبالي سألتني يأهي منهن الجاي توجعني بشكل عشوائي اشرتلها على رچلي اليمنة ضلت تفرك بيها وانا دموعي ردن اخذن مچراهن وكل ضنها ابجي لان توجعني
ناهدة : سودة علي غفران خل ناخذها خطية توجعها يجوز مكسورة
بت عمة غفران الزغيرة تباوعلي بقهر مايلة رأسها گالت
_ لا ما مكسورة بس اضن انفصخت
ساعدتني حتى اگوم وانا گضيتها بس بجي وكل ما گالت خل ياخذوني للمستشفى اگلها لا وما اريدن ولهناك وانتبهت للوكت وسألت على أبوي ليش تأخر لهسه
غفران : خابرنه گال باجر يجي عده واجب الليلة
عبرت عليها ومضت الليلة عادي عدها بس انا بكل ساعة
تگضي اموتن الف موته وي صلاة الصبح طلعت من الغرفة صبر ما ضل عدي بعد صليت وتمددت ع السجادة وما اعرف شلون اخذتني نومة وفزيت من انفتح باب غرفة عمة وطلعت گبلها رچلها بس شافوني واحد باوع بوجه الثاني واجت عمة علي گبل لا تحجي گتلها وللصبر ما ضل عدي شعره بعد فلاچنها ليلة وحدها چن عمر
_ابوي عمة شني وضعه وشراح يصيرله
غفران : راح يمشيله عمج ورچل زينة وياه وهناك صحبانه ما يخلوه يطلع لا تخافين
تأملت خير بحجيها بس ما چان اكو خير ابد للضهرية واندگ الباب وبس فتحته عمة سمعت صوتها تعيط وتوني گمت وطبوا ثنين من عمامي يتهاددون اذا ما اقتنعت بالزواج ما اشوفن أبوي بعد وما عدي غير خيار وگبل لا يمشون ردوا الكلام علي ونيتهم كلش واضحة لو طلعت من شورهم
بس طلعوا طحت ع الگاع ابجي وحتى لطم على روحي لطمت ومن طب رچل عمتي وشاف حالنه بساع خابر رچل زينة يحجيله اقل النص ساعة واجه وحسب الگاله أبوي موصيهم ما اضلن بالمحافظة رفضت وحلفت ما اطلع بس من شفت حالهم والتعب والقلق مبين عليهم استسلمت واخذتني عمة للبيت لميت الاگدر عليه من هدومنه وطلعنه وانا خاله ابوي وراي الما معلوم شني مصيره ولا اعرف بسالفته شني
°جفون°
باوعت لهيوفة اچذب السمعته شني گال امها لو انا اتوهم
هيوفة : شبيج
_ خالتج من شوكت عاشت
غمتني
هيوفة : ما ميته حتى تعيش
_ شني كامرة خفية
رديت ركزت وياهم وجدة تسودنت من سولفها فقار على سوايتهم
غضة : بعلي من يومي اعارفهم شني بس اگولن لا خلني لا اظلمهم طلعوا هم الظالمين
گعدت بصف عمة اسأل بيها وهي بالگوة يطلع منها الجواب
_ شني السالفة عمة احجيليي مو اختج ميتة شلون طلعت عايشة
نوح : قدرة قادر حبيبتي
خزرته وهو ضحك عرف قصدي ويتعمد يگلي حبيبتي ويحرچني كل مرة وسؤال هذا ما چان يفتر براسي بس انا كلها مثلي وبعد اللحاح منه حجت
زهرة : ورا ما ناهدة تزوجت غافر بچم سنة بده وضعها يتغير ردنه بس نعارف البيها ماكو حتى انا نوبات هواي مشيت وياها لساده من امشي لاهلي چنت وما فاد وكلما يمر يوم صرنه نحسها جاي تفقد عقلها
بركة : زين عمة ليش گلتوا ماتت
زهرة : ما اعارف زلمتها راد هيج بس نص الوادم ما صدگوا عمن لا صارتلها فاتحة ولا شي
_ وأنت شلون چنتي تترحميلها ونوبات هواي تذكريها وتبچين
زهرة : الرحمة للعدل والميت ومن ابجي لذكرها انا چنت ابچي على مرضها الماله علاج
تنهدت وعيونها متروسة بالدموع وكملت كلامها ب قهر
زهرة : والتالي ما طيبها وتحملها غير بتها الچنت كل ما اشوفنها ادعي الله يرد بأمها العقل لخاطرها عايشة وحدها بين وادم چنت اعارف بيهم لو طلبتهم فريسة ما تطلع مثل ما صار بأختي
جدة ملتزمة الصمت وچن بسكوتها تعارف بصحية حجي عمة مشينا للبيت گبل لا يجن وتونه طبينه و لاگنه ليث يريد يطلع صاحت عليه عمة
زهرة : وين يمة
ليث : للراضي رايده شي
زهرة : لا سلامتك دير بالك على روحك بعد روحي
ابتسم
ليث : أن شاء الله
نزعت عباتي ومشيت لگن الدجاج من شفته مفتوح دگيت رچلي بالگاع هاي ماكو غير عون وسيف جايين فاكينه لانهم باليني بلوه وشكي چان صدگ وثنيناتهم
اجوي من ورا الببيت سيف يركض ورا الديج وعون شايل دجاچتين بس شافني طاحن من ايده وكض ايد سيف يگله
عون : اجت السعلوه
ركضت عليهم أشر على روحي
_ انا السعلوه بعيني انا الكم اذا ما اعضن ايدناتكم شوفوا
يركضون وانا اركض وراهم وچي گبل چم يوم ماطره ضال ورا البيت كله طين ما حسيت
روحي غير تمزلگت وطحت على ضهري من راسي لرچلي صرت كلي طين وبدل ما اگومن ضليت ممدده ابچي وذولي يضحكون عليه وبس سمعوا صوت نوح يقترب منه ركضوا واسمعهم يگلوله "طاحت"
ثواني ولگيته صار گبالي گومني يسأل ليش طحت وانا اشكيله
_عون وسيف مطلعين دجاجتي وركضت وراهم و طحت
مسح دموعي مبتسم يحجي عليهم طگيته على صدره
_اضحك لا تضمها
ضحك بصوت عالي وحضني اما وطيانتي وبس وخرت باوع لوجهي
نوح : حتى وأنت مطينه تخبلين اروحن فدوة لهل شكولات
_ اها صرت شكولات
نوح : جاي اگولن اروحلج فدوة
أبتسمت ورفعت روحي وهو بساع قدملي وجهه تدنيت عليه ومن تقربت منه كلش بلع ريگه يباوع بعيوني وتوني اريد افلت وكضني ضحكت وبساع سيطر على حركتي
نوح :تضحكين علي تردين لج
اتحرك اريد اوخر ايده بس چان اقوى مني وهنا عارفت بروحي تورطت
_ نوووح حباب هدني
قرب وجهه مني يهمس
نوح : گولي حبيبي
رفعتله حاجبي ورديت راسي ليوره
_ لا والله
نوح : تگوليها لو ابوسنج
حطيت ايدي گبال وجهي
_مايصير هيج هدني لا اشكيك لعمو
نوح : امم وشتگليله
بهتت حايرة
_ هاا
نوح : تگليله خطيبي يريد يبوسني وما ارضى
خزرته
_ نوح
نوح : ها يا سفينته
_ هدني
نوح : مايصير هيج اهدج وانا كلشي ما محصل
درتله خدي أاشرله
_ بوس
نوح : ما تعجبني هاي
رديت خازرته وهو بالكوة كاض ضحكته
_ هدني لا اعيط
شهگت من حط رأسه برگبتي دفرته برچلي بس ما تحرك رفع عيونه يگابل عيوني
نوح : ترديني لا تمنعيني وتمنعين روحج ما غاضبين الله بالحلال وحگي هذا
عضيت شفتي وهو عيونه يحجن اكثر من افعاله تدنه بحذر باس طرف شفتي ومن شافني تقبلت حركته تجرئ اكثر ما اعارف شلون فكيت روحي منه وشردت للبيت وتوني طلعت من جوا الاشجار وطبت عمة عطاء وبس شافتني نشغت
عطاء : يا هاي شبيج ولج ليش هيج مطيينه
عيونها صارت وراي بلايه ما اندار عارفت بيها شافته وبعد جيب اليطيحني من لسانها
عطاء : هااا
وگف وراي يعارف بقصدها شني بس يسوي روحه ما مفهمها
نوح : شهاااه
عطاء : سلامتك بس مبين متهور زايد بعد عمتك من الطيانه التارسة هدومك حتى أنت
باوع لهدوه ورد باوعلها
نوح : گضيتي عمرج تسئين الضن بي
تخصرت
عطاء : جا اطيني تفسير ثاني يقنعني
نوح : اذا يقنعج هاي صعبة كلش لان أنت ما تقتنعين
عطاء : اختصرلي
نوح : چانت تركض ورا المزعطة عون وسيف فاكين الگن مال قفص الدجاجات وطاحت وحتى اسأليهم اذا ما تصدگين
عطاء : اممم
خلاني وياها ومشى من شاف علي طب وبس شاف حالي ضحك وهو يباوعلي من بعيد صاح
علي : هاي شبيج
نوح : طاحت امشي عدي سالفة وياك
اخذه وطلعوا وبالگوه خلصت من عمة وطبيت سبحت ووصيت عمة زهرة جابتلي هدومي لبستهن وطلعت ارچف لگيتها مشغلتلي الصوبة گعدت يمها ادفه واحجي وياها
_عون وسيف ساعة الساعة يخلوني احطنهم بگن الدجاج واسده عليهم راح يخبلوني ياعمة ما ضلت دجاجة ما كرهوها بعيشتها
ومثل كل مرة عمة تدافعلهم
زهرة : جهال يمة ويحبون الحيوانات شتسويلهم
_بس مو هيج يعني كلما اطلع اجي الگه چريمة صايرة بيهن
أبتسمت
زهرة : احاجيهم انا
گمت اريدن امشي للغرفة وگتلها
_ لا ع الاساس راح يسمعون كلامج والله فلا ينگدرون
وبس رديت بأيدي المشط گلتلها
_مشطيلي شعري مو بس شعر غاية تمشطيه
اخذته من ايدي تضحك مشطتلي وضفرته الي لان تعارف هل فترة صايرة روحي بخشمي ويوميا كلما ضچت منه واگلها گصيه وعود هو مو طويل كلش
گمت چبت كتبي وگعدت اقرأ السادس حتى عطلة وراحة ماعدهم وانا هل أيام مستغلتها المن شكو شي متراكم علي شوي واجت اطتني الجواريب تحجي لان ما لابستهن
زهرة : دفي روحج زين حتى لا تتمرضني وتخليني احيرن بزماني شلون تطيبين
لبست واحد وانا البس الثاني ادهر بيها
_ متعاجزة من مرضي يمة جا راح ازعل
زهرة : لا وروح أبوي بس علمودج أنت هسة لازم تدارين صحتج عمن مستقبلج واگف عليها
_امم صح
زهرة : راح اسويلج حليب تشربيه حتى تدفين
گلتلها خوش وبس مشت بديت اقرأ شوي وسمعت صوت يمها
ومن ركزت چان صخر جاي يحجيلها على سالفة اخو جدة الشال چان بصفي حطيته على راسي وهو من طب وشافني گال
صخر : هدومي مغسولات
_ ياهن منهن
صخر : مال دوام
_ ضنيت مال خشب
أبتسمت اضيع الچفصة الچفصتها ما لگيت غير صخر أشاقيه بساع طگني بخزره
_ غاسلتهن وكلهن بالكنتور
ما حاجاني وخله وصعد ،ضليت ادردم وي روحي وعمة متمدده من ملت من مني كفتني بالمخده ترزل بي
عطاء : أبوي ما دردم بگدج من عارف بيه ضابط
_ عمة شلووون هيج يگدر يضم
من شافت سؤالي جدي گعدت على حيلها حطت ايدها على خدها ولا چنها توها تحجي علي بساع غيرت
عطاء : خايبة واصل لرتبة الرائد واحنه يا غافلين الكم الله
_ انا ضالة تحوس بگلبي هدومه وين يحطهن چان
عطاء : جا عبالج ما سألت ،طلع يحطهن عد برهان
_ يا يلم بيهم جدي مايحجي وياهم
صفگت ايدها متحمسة وبنفس الوكت متشمته
عطاء : هذاك اليوم اجه يراضيه وشحته جدج ويگله حتى بت كاظم ما اخليه الك على سوايتك هاي
_ يااا
عطاء : ما يسويها بس مبين صاير بخاطره كلش من سوايتهم
_ حگه وچماله عارف من غازي
عطاء : جا هو هذا المخليه ما يريد يباوع بخلقتهم
ردت عمة بايدها گلاص الحليب وبس شافتني گضيته گالت
زهرة : گومي أقري بالغرفة هنا تضلين بس تسولفين
وانا شفت كلامها صحيح خليت شلت كتبي ومشيت للغرفة وبس گضيت أول صفحة من الادب سمعت اصوات بالصالة
عارفت بيهن اجن رديت لبست حجابي طلعت سلمت عليهن متفاچئة من كمية الشبه بين نسمات وامها عمة ملگاها لاختها چان غير احسنها ما مصدگة شايفتها ودموعها ماكدرت تكضهن من سألتها انا مني وردت عليها
ناهدة : زهرة اختي الچبيرة امي الثانية
حضنتها تبچي بحسرة وصوت عالي مبتسمة
اباوعلهن ودرت عيوني على نسمات الواگفه وتمسح بعيونها
بس چان التعب مبين عليها ركضت جبتلهن ماي ورديت
لگيتهن گاعدات گعدت يمهن مركزة بسوالفهن راگعه السادس
بالحايط هو وكتبه السوالف ذني ما يتفوتن طول الوكت
نسمات چانت متوتره وبس گامت امها تريد تمشي للتواليت
مشت وياها بس شوي وردت حجت بساع توصينه
نسمات : امي ما تعرف شني عن سچن أبوي وما اريدنها تعرف لان اخافن لا تنتكس وانا حيل ما ضال عدي اعينن روحي
گامت حضنتها عمة مسحت على راسها وهي بساع بچت لمت وجها بين ايدها
زهرة : انا اسندج وافديج بحيلي بعد خالتج لا تهمين كلشي ينحل
نسمات : ما صار هواي من استقريت تعبت وما ضل عدي طاقة اتحمل شي
زهرة : انا هنا ساعة التتعبين حطي رأسج على اچتافي
بكلام عمة شوي گدرت روحها تهدء مسحت عيونها واندارت
من طبت امها وثاني يوم العصرية عمة رادت تمشي لبيت عمي باقر گلتلها امشي وياها وبالگوات گدرت اقنع نسمات وناخذها ويانه وتونه طلعنه ورا عمة وصاروا گدامنه ليث
وجعفر وخروا من دربنه من انتبهوا عليها ويانه ليث دنگ بس جعفر عيونها ضلت تلاحگنه والله لا يچذبني حجي حواري صدگ ما گالت يحب حماي
توني طبيت وراهن وصار گبالي عون يريد يطلع بس شافني صاح
عون : خالةةة
كضيته بساع ما لحگ يشرد ضحك بوجهي وعيونه طبن بنگره گرصته وامي تصيح بي اهده وانا أحلف الا اعضنه
عون : امداج
وخاف الي نية اتنازل من غماني عضيته خليته يطب جوة يبچي
زهرة : الحمدلله وانا اگولن بتي كبرت وعقلت طلعت ابد ما تعقل
عدلت عباتي وتحظرت للرزاله من طلعت ريحانة وهو وراها خاتل
ريحانة : ليش هيج جفون شبيج مجلوبة وتعضين
_ امس منوراه هو وسيف طحت بالطين وهسة فوگاها غماني
منوراها يصيح
عون : جذابه خاالة
جرته تباوعله بشك وهو يضحك يضيع على روحه يخليها تنسى انداريت على صوت ليث دگ الباب يحجي
ليث :اريد اطبن اشوف بت اختي
گالتله ريحانة يطب فتح الباب سلم عليها وطب ويانة عمة نجوى چانت گاعدة ويمها فقار طبينا سوا سلمنه
ليث : غاية گاعدة
نجوى : شوفيها ريحانة
مشت للغرفة ريحانة تشوفها شوي وفتحت الباب گالتلنه نطب وهو أول واحد مشالها وراه انا دنگ باس راسها وباوع لكليكوت كوكبة
ليث : شوكت اجي والگاها گاعدة
زهرة : بعدها بزر نفاس الا ورا الأربعين يستقر وضعها
دنگ باسها من رأسها ورد يحجي وي غاية وكاض ايدها
ليث : خوما العملية توجعج
غاية : امس الليل كله ما نمت
ليث : يابوية عمت عيني
أبتسمت
غاية : اسم الله على عيونك الحلوات
ليث : بعد حيلي
باسها من رأسها و وصاها على روحها وطلع أبتسمت وگالت لنسمات تجي يمها گامت گعدت بصفها وشگد ما هي تعبانة بس حاولت تسولف وياها وتطلعها من جوها عمن كلنه نعارف نسمات تميل الها اكثر شي بحكم اعمارهن متقاربات بس بچت كوكبة طفرت اشوفنها بلكت فتحت عيونها بس چانت مغمضمة وتتنعوص
_شني هاي بتج ترا مايصير نريد نشوف عيونها
اجت شالتها ريحانة اطتها لغاية حتى ترضعها و گالت
ريحانة : فتحت الصبح وشفنه عيونها على عنادج
_ شني هاي عود تغوريني
زهرة : خايبة ريحانة هسة تصدگ وتتخبل علينه
رفعت حواجبي ما عاجبني الوضع وهي ضحكت وباوعت لنسمات
ريحانة : متغيرة صايرة احلى من گبل
أبتسمت بخجل وجاوبتها
نسمات : عيونج الحلوات
ريحانة : لا تضوجين يطلع ابوج سمعت اليوم من أبوي حتى عمي سمير تدخل بسالفته ووصه بيه معارفه
نسمات : اتمنى ما يضل اكثر بعد لان والله گلبي نار عليه
ريحانة : سلامة گلبج
شوي وطبت يمنه عمه نجوى ووراها طبوا درة وهيوفة شايلة صگر بساع بس شافني شمر روحه علي اطتنياه وگعدت
هيوفة : والله يحبج لان تلعبي
_ اصلا انا الجهال كلها تحبني
ضحكت ودارت تحجي وي عمة تسألها على بطنها
هيوفة : باجر امشي للدكتورة عمن هل أيام جاي احس بخمول حتى صگر من يگعد وانا نايمة ما افزله وخطية ضيرم يگعد وياه
زهرة : نساوتج هل مرة احسنها ثگيله حتى أنت سمنتي اكثر
نجوى : صح وحتى انا گلتلها
ضلينه ساعة هيج وردينا وهم زين چانت ام نسمات بعدها نايمة عمن وكتها العصرية لازم تاخذلها غفوة
°هيوفة°
طلعت من الدكتورة مصدومة وريحانة وياي تضحك على صدمتي ضيرم متانينه برا من شافنه ضلت عيونه تنتقل بيني وبين ريحانة انا ضايجة وريحانة تضحك بس وصلنه عده گال
ضيرم : شكو ريحانة ليش تضحكين
رفعت ايدها تأشرله وهو بصدمه سأل
ضيرم : ثنين
تهز رأسها بأي وحطت ايدها على حلگها الآن تعارف لو ضحكت تلم الوادم علينه باوعلي حاير يفرح لو يضوج
ضيرم : نعمة من رب العالمين اصعدن نرد هسة دره الله أعلم شسوت بخالتها
صعدت بالسيارة والدرب كله گضيته افكر شلون راح اگدرلهم وانا بس در ووكاحتها كافي علي نزلت عد اهلي حتى اجيبنها وتلگتني تسأل
جفون : ها ولد لو بت
شلت دره ودمعن عيوني بساع اگللها
_ توم
نشغت وصاحت لامي طلعت من غرفتها بساع تسأل شكو
جفون : بيها توووم
زهرة : يايمة صلاوات على محمد وليش ضايجة وتردين تبچين يمة
وانا هنا المفروض اهون على روحي بس صار العكس وبچيت وهن يضحكن علي
نسمات ساكته تباوعلي بأبتسامه بلايه ما تشارك وخالتي ناهده تباوعلي بنفس ابتسامه بتها
_شلون اربيهم يمة وجهالي بعدهم زغار دره توها 3 سنين
زهرة : وياج احنه اذا تردين اطيني واحد منهم انا اربيه
غطيت وجهي ما اعارف شلون اهون على روحي وانا اعارف هذا عطاء ونعمة من رب العالمين ضليت گاعدة يمهم شوي وگبل لا امشي وصتني امي لا ابين ضوجتي گدام ضيرم
زهرة : الزلمة لو تسطريهم اله عشر جهال يفرح تلگيه هسة طاير من فرحته لا تكسريها بعد امج
هزيت رأسي بأي وطلعت چان هو واگف برا يم الولد بس شافته دره ركضتله كلهم تباركولي انا احس بخوت
من الستحى وصلني للبيت وسألني شلون صرت ومن شافني زينة ردلهم عمة تلگتني والضحكة تارسة وجها صگر بايدها شايلته گالت
نجوى : لا تشيلين هم وياج كلنه اذا تردين اطينياهم ثنينهم
أبتسمت
_ راح اتعبكم وياي هواي
نجوى : شحلاه التعب لو هيج ما تعارفين شلون هسة فرحتي ما اطيها لاحد
بستها من راسها واخذت منها صگر وصعدت ارتاح بس نومته چان منعس بدلت وتمددت انا هم ضهري بساع يوجعني چنت اضنه وجع عادي بس هسة گالت الدكتورة بسبب الثگل وهم السره چان طويل وعود قدمت الحوامل وما فاد غفيت وفزيت على صوت الباب من انفتح شوي وحسين بيه من اجه بصفي رفع الغطا تغطه وياي
مد ايده جوا راسي شوي وحسيت بشفايقه على عيوني يبوسهن وحده ورا الثانية مثل كل مره
دفنت رأسي بصدره اجرن نفس من عطره الصرت مدمنه عليه هل ايام وچن نساويتي كلها عليه حس علي گاعدة بصوت ناصي گال
ضيرم : خوما بعدج ضايجة
رفعت روحي بنعاس باوعتله وهزيت رأسي بلا
_ چنت اتمنى النظره من عيونك الاحبهن هساع اتبطر على بزر منك
علت شواربه مبتسم وباسني من خدي ورد بأس الثاني
ضيرم : اروحن فدوة لليتمنى نظرة يابة انا وعيوني فدوة نروح لعيونج
_اسم الله عليك حبيبي
ضيرم : ريشة گلبي
حضنته مبتسمة وانا اگله
_ أبو جهالي الاربعة
شدد على حضنتي بس بنفس الوكت مخليني اتحرك براحتي وچم يوم وگالولنه الولد لازم نرد نداوم و العطلة تقلصت هنا حسيت التعب علي تضاعف ما صار چم يوم من گضه الدوام غاية اخذولها إجازة وانا على اعصابي اروحن وارد وبوجهي للمخدة حتى جهالي حايرة بيهم ريحانة لو امي نوبات اودي عدها صگر واحسب يوم يوم شوكت تگضي هالسنة وهي الأخيرة الي بس صارت من أطول السنين علينه
°بركة°
طلعت من القاعة روحي بخشمي محاظرة طولها اكثر من ساعتين مشيت للكافتريا جبتلي ماي ووخرت الكمامه اشرب وبهل أثناء حسيت على احد وگف بصفي ما حطيت ببالي هو الا بعد ما أندريت وشفته انصدمت والزمن بي وگف صار هواي ما شايفته
بللت طرف شفتي وهو يحجي وي النادل حتى يسويله الگهوه اخذها من ايده وتحاسب وياه وبكل اريحيه أشرلي امشي گدامه حاولت ارفض بس رچليه وراه اخذتني وگف بمكان بعيد عن الطلاب وگبل لا يحاجيني شرب من گهوته وباوع علي بابتسامه زحزحت روحي وخر الكمامه من رديت رفعتها ومن بعد فتره طويله سمعت صوته من گال
رهيب : خليني اباوع عن قرب ملت عيوني وهي تناطرج من بعيد
درت عيوني منه واحس بطولي يرچف ما اگدر اضلن واگفه بعد گعدت على مسطبة چانت قريبة علي اجه گعد بصفي بس بيناتنة مسافة تنهد ورد ضهره سأند روحه على تچوتها الخليفة شوي وباوعلي بلايه ما يتحرگ
رهيب : تعبت الروح من المناطر ما ناوين يحنون گبل لا اخذج واشرد واخليهم يصخمون روسهم
وسعت عيوني
_ شتحجي
عدل گعدته
رهيب : مليت گضن سنين وانا اگولن يجيهم يوم يقتنعون بس ماكو كلما اجي اردن مرفوض
_ شبيدي انا
رهيب : جا ما اعرف مابيدج شي عليهم
لاف بگعدته علي دنگت ومن ارتباكي منه ما رفعت عيني الا بعد مال گال
رهيب : اجبر روحي ابتعد لان القرب يخليني اتسودن
_ ها
مسح على شورابه
رهيب : عگب الساعة ذيج البيها لمحت عيونج مكحله بعد ما شافت عيوني غير عيونج شسويتي بي وبايد منو حطيتيني
ابتسم
رهيب : بيد أل غضب وأدم تمون على اسمي واسم أبوي
_ احمم
رهيب : چذبت مو
رفعت ايدي
_ شوي
رهيب : بوياااي كون افچرهم
_ يااا
رهيب : وداعة الحسن ما تعارفين بسواديني المتنازل عنهن لخاطرح
_ رهيب
رهيب : شو گولي اسمي بعد مره حتى يصيرلي واهس احارب لجل اسمعه منج كل يوم
درت عيوني مرتبكة وهو الوضع عده عادي لا مستحي ولا مرتبك مثلي رديت باوعتله من گال اسمي بس وياها ياء التملك
_ ها
رهيب : اريد اسمع اسمي مرة ثانية اذا ترضين
ابتسم نهاية كلامه شجعت روحي وگلتله بصوت خافت
_ رهيب
مال رأسه
رهيب : ها يابعد اليهلوس بطاريج
گمت اريدن امشي وهو وگف بساع يعترض دربي ما يخليني
رهيب : وين ما شبعت عيوني منج
_ لا صار لازم امشي هسة متانيني
وخر مجرد ما گلتله هيج وبس وصلت للمكان المتعلمين نتلاگه بيه شفتها گاعدة بس صحت باسمها اندارت
غمد : وين صرتي يمعودة صدگ تحجين مو حتى محاظرتكم خلصانه
گعدت يمها انتبهت على حالي المگلوب وبشك سألت
غمد : رهيب حاجي وياج
جريت نفس وگلتلها
_ صار هواي ما شايفته وما طالع بدربي اليوم گلب حالي گلب من گابلني
غمد : تحبي
تنهدت ودرت عيوني منها وبحركتي هاي جوابي وصللها اجانه برهان ردنه وبدربنه گال موصيه سياف يجيب سيوف صعدت روحها بخشمها بس سلمت گضت الدرب كله ساكته نزلناهن گبال بيت عمي وحرك لبيتنه بس طبگ السيارة ونزلت تلگاني سيف يريد حلويات وكل ضنه انا بعدني بالمدرسة اطيته ربع قشمرته بيه وبس طبيت وسألت على حواري گالت أمي
شيماء : عدها امتحان باجر وگالت ابد ما قاريه شي منه
_ امتحانيش
شيماء : ما گالت
_ شو حوراء وميمنة ماكو
شيماء : خبصن روحهن يردن يشوفن كواكب عاد وديتهن بأيد جعفر
_ زين
شيماء : تتغدين
_ أي كلش جوعانة
شيماء : جا بدلي واصعدي صيحي مرة اخوج بين ما اصبلچن
_خوش
گامت للمطبخ وانا بدلت هدومي وصعدت فتحت الباب مأمنه حق مو هنا وهزيت ايدي من شفتها متمدده رفعت رأسها باوعت علي
_ جا ع الاساس جاي تقرين
گعدت تلم بشعرها
حواري : توني تمددت ضهري يوجعني
_ گومي تغدي وناميلج شوي ترا ما تفتهمين شي اذا تقرين وأنت منعسة
گامت حطت الحجاب على راسها وگالت
حواري : لازم انام لان راسي انتهى
_ اكلي واخذيلج بندول
هزيت رأسها ونزلنه سوه وبس طبينه للمطبخ لگينه امي جاي تصب گالتلي اطلع طرشي وحواري گعدت تتثاوب سطرتني
خلتني حتى انا انعس وياها وبهل أثناء طب جعفر سلم وگعد ويانه من امي حطت السفره چنه نسولف عن نسمات ووضع عمماها وامي شگد مقهوره عليها
رفع رأسه چان ياكل
جعفر : اليوم عمامها مخابرين على عمي محمد متعاركين وياه ويردون يجون ياخذوها
شيماء : ياا شو هذولي فلا يستحون شني سالفتهم گدرتهم على بت
گام غسل وگبل لا يطلع گال
جعفر : سالفتهم بيها أنة ماشي انا ليث متانيني واضن نبطي
شيماء : وين
جعفر : نلم اجار المحلات وبدربنه نمر ع الچوبة نشوف الغنم
شيماء : خوش الله وياكم بس بعد امك البس كمامه
جعفر : شكو يمة
شيماء : جا والفايروس
جعفر : كله چذب بچذب
طلع يركض من دگ موبايله وصوت هورن ببانه بس كفينه اكل گلت لحواري تصعد تنام وانا كفيت المواعين ومن اجه حق امي گالت تمشي لبيت عمي باقر تلگنه ريحانة وهيوفة چانن گاعدات بالحوش و الجهال
يمهن يلعبون امي طبت جوا وانا گعدت يمهن وشوي وطبت سيوف بس شافتني گالت
سيوف : ما تحاجين اخوج يكف عني
رفعت اچتافي
_ أنت وياه انا شدخلني
غمتني تدردم حواري بس گعدت اجت ورانه وبس ردينا بوجهي
للغرفة وتوني تمددت وتذكرت عباتي لازم اغسلها گمت اجرن روحي جر غسلتها وطلعت اشرها ضليت حايرة شلون اخليها تثبت ع الحبل
عمن الهوا عالي فزيت وحطيت ايدي على گلبي من طفت الكهرباء وتوني تحركت اريدن اطب للبيت و حسيت على ايد كضتني عطت وبساع انكتم صوتي و ضوه مال موبايل صار بوجهي غمضت عيوني من قوته وضليت ارافس اريد افلت روحي بس ما گدرت
رهيب : اششش هذا انا
هدء شعور الخوف الي بداخلي وبس وخر ايده گلتله
_ شجابك أنت شلون طبيت لبيتنه ما تخاف تصيرلنه طلابة
رهيب : لابت الروح على شوفتح وما گدرت احكمه
تلفتت ارچف وبس اشتغلت الكهرباء جرني لمكان بعيد عن العين جريت ايدي منه انتر ما راضيه على سوايته
_ والله لو شافونه
رهيب : تأكدت من الوضع الا أجيت
_ شمدريك راح اطلع
رهيب : گلبي حسني
رفعت حاجبي وهو أبتسم مركز بعيوني وبهمس گال
رهيب : بلايه كحل ومكحلات وين أبوي يشوف حال ابنه
خزرته عدل وگفته يبلغني
رهيب : باجر جاي للمره اكثر من 15 اذا ما اطوج الي صدگ راح اطلع من طوري
_ شتسوي
غمزلي
رهيب : گلتلج
عارفت بقصده شني بالگوه قنعته يمشي وطبيت اركض بوجهي صارت حواري بس شافتني گالت بمداهر
حواري : شكد انا صلفه بس مو مثلج شلون توگفين وياه
مشيت للسنگ اغسل وجهي احسن بروحي مختنگه رديت عليها
_ هو اجه انا طلعت اشر عباتي وصار گدامي
حواري : شني هل صلافه الشايلها لج أجيت اموتن گلت هسة يجي جعفر ويشوفكم
_ نسيت بيه عبالي نايم
حواري : لا خايبة وين گبل شوي طلع
غسلت وجهي ومشيت للغرفة وهي من شافت حالي مگلوب بعد ما حاجتني وسواها صدگ واجه ثاني يوم
ورغم كلشي صار ووگفتهم ويانه بالايام المضن هذا الشي ما خله جدي يرضى بيهم صار العكس وواجهوا رفض اقوى من كل مرة
اجت گعدت يمي من شافتني گاعدة بالحوش حطت ايدها على اچتافي وبيها چانت أول مرة تسألني
شيماء : ضايجة لان جدج رفض ابن چسار
باوعتلها حايرة شلون اجاوبها أبتسمت بوجهي مبين عليها شكد رافضه الجاي تحجي بس عدها فضول تريد تعارف
شيماء : انا كل مرة اگولن لا ما ببالها وهو اليحبها بس اضنه شاد ضهره بيج ويعارف تحبيه أنت هم
گلتلها
_ ما احبنه
وانا گلبي يگلي كافيج چذب
شيماء : حجي لسان هذا يمة ماكو وحدة ما تحب رچال هلگد حارب لچلها
تنهدت وملت رأسي
_ والعداوه
شيماء : والله انا خايفة عليج منهم وما اريدنج تطبين
بيناتهم عمن ما نعارف گلوبهم شني شايله من حقد بس المخليني حايرة هو مشتريج
ضلت تسولف وياي مناه لمن گتلها نعست وگمت انامن
بعصوبة گدرت اغفه واقل الساعتين وفزيت على صوت امي
تگعدني حتى امشي الدوامي گتلها گعدت وگمت غسلت
ورديت بدلت وبساع تريگ على الواگف اخذنه ليث انا وغاية وغمد وبس وصلنه وبسبب
الازدحامات لگيت الدكتور جاي والمحاظرة باديه وبالگوه اقتنع يطببني وبس گضت طلعت وانا امشي بالمرر شفته واگف يحجي وي دكتور بقسمنه من انتبه علي سكت
دنگت راسي وعبرته ومشيت لقسم غمد من هل موقف بعد ما لاگيته غير بمره چنت گاعدة واجه وگف گبالي رفعت راسي اباوعله جنطته بايده ولابس لبس رسمي بلون رصاصي والقميص جواه چان بلون جوزي
رهيب : اگعد يمج
_ لا
رهيب : شكرا
فكيت عيوني مصدومة انا مو گلتله لا اشو هذا گعد فتح دگمة الستره مبتسم
رهيب : لا تستغربين عمن اعارف گلتي لا بس بداخلج أي
ما رديت عليه فتح الجنطة يدور بيها وشوي ورفع منها مثل الشيشة ذهبية حجمها چان زين مدها الي گبل لا اخذها سألته
_ شني
رهيب : كحله
_بس شسوي بيها
رهيب : ضميها حتى من نتزوج كحلي بيها عيونج الحلوات
اخذتها منه اباوعلها واحس بأحساس غريب شني المخليه هلگد يتأكد كلامه راح يصير حقيقة وبيوم تنجح وحدة من محاولاته باوع بعيوني وعلت شواربه بابتسامه
رهيب : كلمن شافني سألني عليج عدنه اسمج صار ينذكر وي اسمي وأنت بعدج عد اهلج شوفي شكبر محبتج الدرت بيها كل ديرتي
ما اعارف ليش ابتسمت على كلامه وبنفس الوكت فززتي صوت غمد تدور علي من شافته يمي بهتت گام بساع سلم عليها وگبل لا يمشي گاللها
رهيب : لا توصل للأهل اتمنى
غمد : لا أمن من ناحيتي ابن الخال سرك ببير يوسف
ضحك بثگل واخذ جنطتة ومشى وبس شافته ابتعد اجت گعدت بصفي
غمد : ولج ولج شني هاي يمة شلون تخليه يگعد يمج بله شافج ليث
_ شسويله هو اجه وگعد وحتى من گلتله لا ما سمعلي
غمد : طاح گلبي من شفته يمج
ندستني تضحك
غمد : بس والله لايگلج أنت نملة يمه تموتين ضحك
_ هو ضخم الصوج مو بي انا
غمد : أي صح
بس اجت غاية گالت متانينه برهان بره مخابرها ليث
_جا ليش ما خابرني برهان
غاية : كاتلج الموبايل بس تردينه يدگ
_ صرت احسنه طابوگه وعلي حتى الرصيد ضال هو هو
بنفس الوكت دگ موبايلي چان برهان گبل لا ارد گلتلهن
_يا رحمة الله انفكت الچبسة
ضحكن وانا بس حاجيته گال اطلعن بساع ازدحام صاير ويريد يحرك طلعناله اشبه بالركض وتونه صعدنه گال
برهان : غمد خابري سيوف شوفيها تطلع
غمد : صار
°سيوف°
توني اريد اخابر على سياف حتى يجيني ودگ موبايلي چانت غمد ومن جاوبتها گالت اذا بعدني يمرون علي
_ منو غاح يجيبچن
غمد : برهان
_ اهووو غاح اخابغ سياف
غمد : راح نجيج
گالت هيج واسمعها تگله گضه دوامها خلتني اشيلن روحي وارگعها وبس ردت دگت علي طلعت وانا اتأفأف سلمت وصعدت بركة گدام وهي وغاية ورا گاعدات ندستني
غاية : شبيج راح تنفچرين
_ مابي شي
غاية : الچذب حرام
ما حاجيتها وضليت ساكتة منا لمن وصلنه انا اول وحدة نزلت سلمت على امي چانت تغسل مواعين وبدلت هدومي وطلعت يمها وغمد تسولف وياها على واحد من الدكاترة تتخبل منه تغدينه وغمد صعدت تنام وانا لهيت روحي بالتنظيف عمن باجر عطلة وماعدي شي وانا اغسل بالحوش اندگ الباب صحت
_ منو
برهان : انا
_ سياف مو هنا
برهان : جدة تريد تشوفج مشتاگتلج
من ورا الباب گلتله
_گلها بالليل تجي
اختفه صوته ما سمعت منه راد عرفت بيه مشى كملت شغلي وبدلت وگلت الامي راح امشي وبس طب سياف گلتله يوصلني ومثل كل مرة لو تأخرت وما مشيتلها تضل تعتب وبس اقتنعت گمت اسأل ع البنات گالت عمة بالغرفة جفون ونسمات دگيت الباب وطبيت چانن گاعدات وبس شفت حال نسمات بهتت اسأل شبيها
جفون : عمامها اليوم تعاركوا وي أبوي وجدي ويردون يجون ياخذوها
_ ياا وتغوح
جفون : مدخلين شيوخ وفارضين السالفة عدهم وخلوا أبوي وجدي يحيرون بزمانهم
_ شبيهم هذولي صدگ يحجوون
جفون : السجنوا اخوهم ما يخافون من الله شتترچين منهم
_ أي والله صح
گعدت يمها اواسيها بس هي جان الخوف مسيطر عليها
وكلامي ابد ما غير شي ،ولليل وصارت صدگ اجوي هم و وادم شيوخ وياهم وگبت بيناتهم وبين عمامي والولد ومصايحهم واصلنه من الديوان للمطبخ جرتني جفون نطلع نسمع لان الصوت منا ما جان واضح
محمد : يا اهل الخير ابوها حاطها عدنه امانه واليريد يمشي يسأله
صاح واحد منهم والعرفته هذا ابو علاء من گالوا اسمه
أبو علاء : مو بكيفه احنه وادم دمنه حار على عرضنه وما نرضاها گاعدة بنص ديرة مليانه زلم
بحجايته خله صخر ينفعل ومبين هد عليه من كلها صارت تصيلحه يگعد
صخر : شووو ماتعارف تحجييي حالها حال خواتنه وحمايتها واجبنه ثمن حجيك لا تخليني انزل لمستوى اهينك بيه
كبرت اكثر بيناتهم وانا مثل الاطرض بالزفه يا اسم ينذكر اسأل جفون هذا منو أخير شي لگفنه علي وگال طبن وبس طبينا صارت گدامنه واگفه تاكل بأظافرها من التوتر
نسمات : هااا شصار
_ ماناوين على خيغ عمامج
غمت روحها
نسمات : امداني على هيج
عمام
على وگفتنه وطب نوح يريد ماي ويحجي عليهم متنرفز منهم حطلته الماي جفون واخذه وبس مشوا طبوا عمامي وجدي والولد حايرين ويحجون على سوايتهم الوحده أكبر من الثانية جدة چانت گاعدة وتباوع لحيرتهم ومبين اكو فد سالفة ببالها وتأكدت من گالت
غضة : اعارف بيهم اولاد امي وابوي ينكرون حتى الزاد والملح ووياكم يخربون
بحيرة عمي محمد گاللها
محمد : شني الحل يمة
وبكل جدية گالت
غضة : واحد من الولد يعقد عليها وبعد مالهم شي عدنه
مثل الكفخه ع الراس اطت لكل واحد بينه اباوع لنسمات بهتت ما مصدگة الجاي تسمعه زادت على حجيها
غضة : ماكو غير هالحل
وبساع جدي أيد كلامها
رأجس : خوش حل وبس يطلع ابوها نفك العقد
بتردد سألها
محمد : شتگولين بوية
باوعتله بعيوني مليانه دموع وهزت رأسها بلا بنبرة صوت حنينة گاللها
محمد : ما نجبرج على شي بس فكري ياعمي ماكو غير حل
ما ضغطوا عليها وبس فرغ البيت صاحتها جدة تحجيها
غضة : شوفي عمة انا ما الحن عليج بس ما ضل غير هالحل حتى نحميج من اخواني
نسمات : ويني وين الزواج عمة انا ما صدگت اتحرر
غضة : تضلين هنا عدنه بس اسمه عقد وبس يطلع ابوج كلشي يرد لاصله
عمة زهرة هم حاجتها وانا وجفون حاولنه نأثر عليها وكل هذا وامها بس ساكته وتباوعلها بقهر وبعد محاولات گالت
نمسات : ارضى بس بشرط باليوم اليطلع بيه أبوي اتطلگ
غضة : واحنه هذا الگلنالج بيه
كضت ايدها تحاول تخفف من ثكل الجاي تعيشه وتخليها تستقبل الموضوع من جانب ايجابي اكثر من ماهو سلبي
غضة : يطلع ابوج كلهن چم يوم ماضل شي وتنحل سالفته
نسمات : الله يسمع منج واردن لحياتي وهو بيها
°غاية°
طبيت البيت اهلي شايلة كواكب تلگتني جفون اخذتها مني وانا اسألها
السمعته من عزيزصدگ وراح واحد من الولد يعقد على نسمات
جفون : جدة اقترحت وتعارفين احسن شي حتى لا تروح عدهم
_ وهي رضت
جفون : أي
_ بس ياهو يعقد عليها
جفون : ما اعارف ما گالوا بس العارفته راح يعقدولها اليوم
_ خير أن شاء الله وينها هي
جفون : بالغرفة اليوم كله ما طلعت
مشيت اشوفنها وبس فتحت الباب تقدمت گعدت گبالها باوعتلي وهي ساكته بس عيونها چانن يحجن هواي حجي ما گدرت تحجي هي
حصنتها
_ لا تضوجين كلشي ينحل
نسمات : أن شاء الله
ورا ساعة صاحني صخر حتى اگللها تتحظر الشيخ اجه چانت گاعده وبصفها خالتي ومن گلتلها بهتت استعجلتها حتى تگوم بوكتها حسيت بيها لو گامت وحدها راح تطيح مديتلها ايدي اساعدها وبس لبست حجابها مشت للديواينة مثل ما گال صخر راح يعقدون بيها
°نسمات°
گعدت على وحده من الكرويتات وانا احس بروحي ارچف
شبكت ايدي وحدة بالثانية اقنع روحي كلشي مده ويزول وهذا عقد لحمايتي وبس ما راح يتم لا زواج ولا شي
شوي وحسيت بأحد گعد بصفي راسي ما رفعته سمعت صوت عمي ابو صخر وجدهم وبالاخير طب صخر يحجي وما مستوعبه ولا اتذكر شيگول كل بالي يم السيد
_ نسمات غافر خبير هل تقبلين بأن أكون موكلك بالزواج من جعفر يوسف راجس بمقدم ** ومؤخر ** فاذا قبلتي قولي نعم أنت وكيلي
بلايه روح جاوبته وانا اتحسب بگلبي على عمامي الجردوا حياتي من الامان الصرت ادوره عد غيرها
_ نعم أنت وكيلي
رد سأله
_ جعفر يوسف راجس هل تقبل الزواج من موكلتي نسمات غافر خبير فاذا قبلت قل نعم قبلت التزويج
_نعم قبلت الزواج
_مبارك لكم شريكين والحمدلله الذي بنعمته تتم الصالحات
كلهم طلعوا وبس انا ضليت حتى هو مشى وياهم ما گدرت اگومن من مكاني وبس طبت غاية وگالت اسمي طاحن دموعي اجت مفزوعة تسألني ليش ابجي
_ شني الما يخليني ابجي اذا انا جاي ادور الحماية من ودام المفروض هم يحموني
حضنتني ما تعرف شتحجي وتهون علي وعمامي من عرفوا بالسالفة تسودنوا وحتى بعد كلش مالهم حكم علي گال عزيز لازم نعقد
محكمة وما چان گدامي حل غير ارضى واجاريهم بالاخير انا هم جاي اسببلهم اذيه
گعدتني خالة زهرة الصبح حظرت روحي وبس طلعت من الغرفة گالت
زهرة : ليش ما تلبسين عباة
_ ما اعرف امشي بيها
صفنت علي ومبين بحلگها حجي طب ليث توه جاي من الگيعان صبح علينه وگال بأبتسامه
ليث : صاحبي راح يعرس وانا بعدني شهل ظلم هذا
زهرة : ولك ياعرس هذا شني مو تعارف بسالفتهم أنت
ليث : انا اكثر واحد اعارف يمة
زهرة : أي جا عليش تحجي
ليث : هيج جوعان اريدن ريوگ من ايدج
زهرة : جا مو تمشي وياهم
ليث : يتانوني اتريگ الا امشي
وهم يسولفون اندگ الباب طلع يشوف منو وشوي وطب
جعفر : شني سالفتك مو گلتلك عزيز متانينه هناك
ليث : نص ساعة اطيني اتريگ
جعفر : على بختك هجم الموبايل هجم علي
ليث : جا نبطل ما نمشي
استغفر ومسح وجهه وخله وگعد ع الدرج طبيت انا للغرفة ومن صاحوني طلعت ليث يسوق وبصفه جعفر وانا گاعدة ورا الدرب كله يحجون عن الزرع والوضع
هل أيام ما عاجبهم والافتهمته هل سنة الحنطة كلش قليلة وبس نزلنه عد باب المحكمة تلگانه عزيز عيونه صايرات بگصته
عزيز : انا مو كلت بساع
جعفر : ليث الاخرنه تريگ وسبح
عزيز : امشوا
طب گبلنه مخبوص وماكو اقل الربع ساعة وصاحوا اسمنه طلعت من القاضي بضياع ما معروف شني نهايته اشرلي
جعفر : مناه
يحجي بطرف خشمه وحاجبه تزيد طبگته كل ما باوعلي وبس صاروا ليث وعزيز گدامنه گال وهو ياشر على طولي
جعفر : ليش ما لبستي عباة
جاوبته بأختصار
_ أنا ما اللبسها
اشرلي امشي وبعد ما حجه عزيز صعد بسيارته وردينا للقرية
الايام عدي تمشي بلايه معنى بعد ما ضنيتها استقرت تعلمت على العيشه هنا أو بديت اتأقلم
وي الوضع وبكل صلاة وكل ليلة ادعي اردن لعيشتي الحلت بعيني وي امي وابويه
جفون : هاي مو وضعيه ترا مايصير هيج يوميا مأجلين الامتحانات
مگابلة كتبها وتلطم عمن السنة الامتحانات ضلت يوميا بموعد طب نوح من شافها أشرلي شبيها يخاف يسألها
_ شخطت
طفرت من هفتني بالملزمة
جفون : تعاي الا اطلع ظيم السادس بيج
نوح : شبيج حبيبتي
مشى گعد کبالها وهي بساع دلغمت تشكيله من تأخير الامتحانات وشلون بس تريد السادس يگضي
نوح : والله حتى انا اريدنه يگضي عمن صبر ما ضل عدي بس شنسوي ياشحمتي نصبر
غطيت حلگي مبتسمة من رفعت القلم
جفون : لا تحجي هيج لا ادجگ بالقلم
نوح : ها هيج صارت
جفون : أي
زهرة : وخر منها يمة تراها تسويها
ضحك وگام وماكو يومين وگالوا يبدون يحظرون لعرس نوح وجفون گضتها لطم ما ترضى
جفون : شني ترا العروس غاطة بنص الكتب ما يصير عرس بدونها
محمد : نحظر كلشي بوية وبس تگضين نزفكم عمن راح تگضي السنة
علي : عمي
اندار عليه
محمد : گول بعد عمك
علي : انا ماعدي شي غير بس اغير غرفة النوم وحاجيت غمد حتى نسوي عرسنه وي نوح ما اعترضت
محمد : جا خوش
وصدگ بده التجهيز لعرسهم والتعب تضاعف على عمة تركض لنوح وتركض لعلي وبحكم انا ما عدي شي ايدي بايدها
_ نووح
صحته اخذ مني الجاي وسألته شوكت يگضون شد غرفة علي
نوح : ما ضل شي اقل الساعة
_خوش
طبيت اغسل مواعين العشا واجت خالة يمي تحجي شني تريد تجيب فراش ونواعم لبيت علي
زهرة : ببالي افرشنه كاربت دام راح يجي الشتا شتگولين
_ لا خالة الجو بعده
زهرة : ها
_ أي والله
ناهدة : نسمات
انداريت عليها
_ ها يمة
ناهدة : راسي يوجعني
_ هاي لان ما نمتي العصرية
كاضه راسها بوجع وواگفه سديت البوري وكضيت ايدها مشينا للصالة خليتها تحط راسها على رچلي و صرت ادلكه الها بحركه خفيفة شوي شوي بدت تصير زينة ومن طب نوح وگال
نوح : مشوا
خليت وگمت حتى انضف وراهم وشوي واجت وياي غاية جابها نوح تگابلنه على البيت انا وياها الغرفة تخبل جانت وبس گضينه من المشتمل طلعنه نغسل بالحوش عمن دمروه
هي كاضه الصونده ترشلي وانا اكنس وتونه وصلنه قريب على الباب وانفتح نزلت ثوبي بساع وطبوا ليث وراه جعفر دنگت رأسي من شفت عيونه علي
ليث : گضوا الغرفة
غاية : أي طب شوفها
مشى يشوفها وجعفر لحگة
غاية : شبيج اجيتي تموتين
مبتسمة وتسألني حمحمت مرتبكة احسن عيونه نضرتهن ابد مو طبيعية
غاية : يا هاي صوت كواكب تبچي
طبت تركض تشوف شبيها وانا ضليت وحدي اغسل وبالاصل ماضل غير شي قليل
جعفر : نسمه
انداريت من حسيت بيه وراي عدلت وگفتي اسأله رايد شي هز رأسه بلا
جعفر : لا تتقيدين مني احسبيني مثل اولاد خالتج
بغباء گلتله
_ أخوي يعني
صفن بوجهي وبعدين ادرك مقصدي ضحك يسمح على لحيته وهز رأسه بلا
جعفر : ماكو اخوج عاقد عليج انا لو نسيتي ياحلوة
_ لا ما ناسية
جعفر : جا زين
ليث : لك سرسررري
اندار عليه يتعوذ
جعفر : شجابك أنت شبيك تغار من الوادم لو شني
اجه طگاه على رگبته
ليث : مثل حظك ماكو تقدملك على طبق من ذهب خوما مثلي
جعفر : فگس بعينك
ليث : مو صفر ما يحسدن لا تخاف
ضلوا يتداهرون انا خليت ومشيت جوا وبس طبيت شفتها شايلة كواكب وتفتر بيها وترزل بجفون
غاية : چم مرة گلتلج لا تعضيها بس فلا توبين
العارفته كواكب چانت عد خالة وطالعة جفون عاضتها ومخليتها تنصرع طب ليث يسأل ليش جاي تبچي
غاية : هاي جفون عضتها
اخذها منها يحجي على جفون ما راضي وهاي فلا مهتمة تگللهم
جفون : يعني شبيدي اذا هي تخبل وتضحكلي انا وين اگدر اكض روحي
ليث : بعد خالج بس تكبرين اطيج طابوگة اخليج تفشخيها
تضحك ابد ما مهتمة وخلت وطبت ركض للغرفة تصيح
جفون : طار وكتي يمة راح المعدل
كلنه ضلينه نضحك على ركضتها طبگت الباب وقفلته ومن جوا شمرت المفتاح بصوت عالي توصينا
جفون : بعد ساعتين الا تفتحولي الباب خوووش
گالتلها خالة خوش ومن مشت غاية ضليت انا وامي گاعدات بالصالة يم خالة وعمة غضة وكلما تقربت الامتحانات
جفون ما صرنه نشوفها وبيوم چنه گاعدين وطبت ريحانة گالت هيوفة سوولها دخول للعملية هسة لان حالة واحد من الجهال تعبانة
°غاية°
نزلت جنط المستشفى الها وللجهال اطيتهن لعزيز اوصيه
_ عليك الله خابرني مو تنسى بالي راح يضل عليها
عزيز : چم مرة وصيتيني والله اخابرج
طبت امي وگدامها ريحانة تسأل شكو فهمتها واحد منهم نبضه ضعيف وصارت دخولتيها مفجأه وموعدها بعد 3 أيام الوكت كله ضلينه گاعدين على نار انا وريحانة والجهال يفترون على راسنه و در كلساع سألتني
در : اين ماما
گعدتها بحضني افهمها
_ راحت تجيب دادي وتجي
صگر بحضن ريحانة ومگابله عون يسولف وياه عود هو جيبر وراح يفتهمه
عون : راح يصيو عدي أخو
طفرت من سمعت صوت كواكب تبچي صعدت جبتها ورديت نزلت وانا ماكو أيه بالقرآن قصيرة ما قريتها الوكت ما يمشي بايدي موبايلي كلساع اباوعله وبس دگ بساع فتحت خط
_ هااا عزيز بشر
_ الحمدلله جابت وهسة هم بالخدج
حطيت ايدي على گلبي
_ الحمدلله
ريحانة : گليله شلونهم
هزيت رأسي
_ والجهال شلونهم
_ بعده وضعهم ما معلوم وهم طلعونه برا هسة
وعلمود دره ضيرم رجع لان تگلب الدنيا اذا تشوف لا هو ولا هيوفة أبوي وفقار وعزيز اجوي گبله وهو رد كلش متأخر تلگيناه انا وريحانة نسأل عن وضع هيوفة والجهال دنگ شال دره يحجلنه و واحد منهم العارفناه وضعه تعبان ومن طلعت ثاني يوم حتى ما طلعوه وياها ضل بالخدج
ذبحلهم عمي فچران دم لسلامتهم وعزم عمامي على العشا و ورا أسبوع الا طلعوا آدم من الخدج سماهم ضيرم واحد آدم والثاني آدريس
بيوم الطلع انخبصنه خبص عمن فقدنه الامل بيه كلش لان نسبة ابو صفار چانت بيه كلش عالية وگالوا احتمال كلش چبير يبدولن دمه بس الحمدلله ما بدلوه
كلنه وياها نهتم بيهم عمنهم چانوا كلش زغار واحدهم كيلوين تقريبا وزنه سويت ممه لآدم وگعدت اطيهياه ما ياخذها
_ عمة آدم ما ياخذ الممه هواي
نجوى : شو اطينياه
اطيتياه وضلت تحاول منا لمن اخذها صاحتني اساعدها حتى تمدد
هيوفة : ظهرري يايمة موتني
_ لا تگعدين هواي احنه مو هنا بس يبچون صيحي على وحده بينه تجيج
اكثر وكتي صار جوا وهواي نوبات عزيز يلتهي وي كواكب صعدت من گضه اليوم وبس فتحت الباب ابتسمت من شفته متمدد وحاطها على بطنه چان بايده الموبايل يگلب بالفيس طفاه باوعلي مبتسم
سديت الباب اضحك سألته
_ ها شكو
عزيز : مشتاگ يابة ماخذيج جهال ضيرم مني
مشيت للكنتور طلعتلي هدوم واحجي وياه
_ كلها فتره وتعدي
طبيت سبحت وطلعت لگيته غافي شلت كواكب حطيتها بكاروكها حس علي ومن رديت للچرباية فتحلي ايده وصار يعبر عن اشتياقه بطريقته الخاصة
الايام تمشي وروتين مابين تغيير الجهال بس طلعت اربعينهم بدوا ينشنشون وصار يطلع صوتهم هيوفة ضلت جوه وحتى ضيرم وياها اخذوا غرفة ريحانة لان ابد ما تگدر وحدها اذا صعدت فوگ جفون بس امتحنت بدينه نجهز لزواجهم انقسمنه نصين نص وي غمد ونص وي جفون ونوبات لا نطلع كلنه سوا وبيوم ايچار البدلات غمد اجرت وجفون طنگرت علينه ما يعجبها شي
زهرة : شني سالفتج يمة شوفي شحلاهن
چتفت ايدها
جفون : ما بطلت وحتى ما اريدن اتزوج
زهرة : ياا فلك ليش هو بكيفج
جفون : يمة مو نتخارب انا وياج
حنان : خليها على راحتها نشوفلها غير محل
ضلينه نتفر اكثر من محلين وبس طبينه للثالث وبده يطلع البدلات وشافتهن گالت بحماس
جفون : أي هذني حلوات
اختارت للحنة بدلة حمرة مثل ما راد نوح وللعرس بدله نازكة بردان شفاف وشغل ليلو بسيط على الصدر ثاني يوم ردينه نكمل الباقي ومراكضنه ضل ما يگضي
نوح : شعرها لا تلعبن بيه
درت عليه چنه رايدين نمشي للصالون حتى تحف
_ افتهمنا والله
نوح : أي عفية
طلعنه انا وياها وشفتهم واگفين يسولفون عد الباب وكلساع هي مبتسمة صحت عليها
_ يله غمد
باوعولي ثنيناتهم
غمد : هسة بس تجي امي
نوح : تعال لك
اشرله يجي بس وصل عده گال
علي : شرايد
نوح : ليش قافل المشتمل مالتك
علي : حتى يضل نظيف
نوح : ايا قذر شقصدك
ضحك يشرحله ما يقصد شي اخذنه سياف وگال بس نگضي نخابر عليه غمد ميشت وجفون ضلت تحوس تريد تصبغ
_ مو سمعتي ما رضى
جفون : خابريه عليج الله اريدن اصبغ عسلي غامق ضال بنفسي
استسلمت وخابرته وبعد محاولات الا اقتنع وبساع صارت تشتغل بشعرها ام الصالون وبس غسلته وشسورته طلع يخبل وكلش لايگ وي بياضها حتى حواجبها سوتهن الها بنفس اللون انا هم حفيت و ويانه سيوف رتبت حواجبها وردينا وبس وصلنه دلغمت
_ ياستار شبيج
تقربت شاورتني
سيوف : هذا ابن عمج
_ جا ما اعارفه ابن عمي شبيج تتكرهبين من شوفته
سيوف : ينغفزني
_ گالتها ريحانة هذا هم حظه
بس نزلنه گاللنه سياف ندنگ عمن ابن عمة عطاء هنا
طبيت وياهن للبيت وبين ما راح الا مشيت لعيالي ومن طبيت وشافتني گالت
هيوفة : تعاي اخذي آدريس راح يخبلني والله
نزعت عباتي واخذه منها اسأل
_ جا عمة وريحانة وين
هيوفة : امي ودت على عمة وهم ريحانة رادتها علمود تنضف
_ يا خطية
هيوفة : انقهر عليها صايرة تركض هنا وهنا
ضليت اسكت بآدريس واسولفلها على غمد وجفون شكد طلعن حلوات
ثاني يوم اخذني عزيز اشتريت هدوم الي ولكواكب
وراها طلعت هيوفة وانا وريحانة ضلينه عينه ع الجهال
°جفون°
گاعدة اكل چبس واباوع لغاية وريحانة يلمن بغراضي يصعدنهن فوگ
_ هسة شني الفرق ليش ما تخلنهن هنا
ريحانة : وين صايرة هاي
_ علمودچن
غاية : مشكورة
طبت نسمات فحطانه
نسمات : الديج خبلني مايصير هيج كلما اطلع يركض وراي
ريحانة : المفروض جعفر يركض وراج مو الديج
اشرت على ريحانة
نسمات : اكلچن هاي صايرة ما تعجبني احسها متغيرة
مشت كفختها وطلعت تركض شايلة فساتيني الجدد صحت وراها
_لا يطيحن واخنگج ريحااان
°ريحانة°
بنهاية الدرج للطابق الثاني حسيت بروحي راح اطيحن و بس تحركت خطوة زايده دست على ثوبي وعطت
وي عيطتي حسيت بأحد سند ضهري من ورا عدل وگفتي بلعت ريگي من سمعته گال
صخر : لوما متلاحگلج چان صرتي رماد
درت عليه وانا اباوع لعمة الواگفه عد الدرج وجها مخطوف ..
