رواية خلخال مشوه الفصل الثاني والستون 62 بقلم زمرده

 

 



رواية خلخال مشوه الفصل الثاني والستون بقلم زمرده



واذا بيناتنه بعيده المسافات
علي النسمات توصلني الوصية
حبيبي ولو ردت وصي الهوى الهاب
اشم بيه ريحتك من يمر بي

°ريحانة°

بنهاية الدرج للطابق الثاني حسيت بروحي راح اطيحن و بس تحركت خطوة زايده دست على ثوبي وعطت
وي عيطتي حسيت بأحد سند ضهري من ورا عدل وگفتي بلعت ريگي من سمعته گال

صخر : لوما متلاحگلج چان صرتي رماد

درت عليه وانا اباوع لعمة الواگفه عد الدرج وجها مخطوف
زهرة : جان تفلشت البت وتدولبنه

عبرني وكمل دربه يصعد وبس طبيت لغرفة نوح حسيت على الباب من انسد وكل ضني وحده من البنات بس جمد الدم بعروگي من گال
صخر : ريحان

نزلت الهدوم ع الجرباية واحس بايدي صارت ترچف انتبهتله
ضال واگف عد الباب أول مرة هيج يتصرف أو يكون بمكان مابيه بس اني

_ شتريد

صخر : سنيني الضاعن

عدلت حجابي وگعدت ع الچرباية تحرك خطوتين بس وبعتب گال
صخر : راح ازفن ازغر اخواني الربيته على ايدي وانا بعدها هاي عيوني ما دورت غيرج وچن بس أنت مرة الله خالقها ليش هيج سويتي

من ما رديت گال
صخر : اكثر من 10 سنين ضاعن عدج وهسة جاي ادورهن

_ بس أنت

خزرني
صخر : لا تكمليها وتگولين مثل اخوي

ضغط على عيونه واحسن بكل كلمة گالها وصلت لگلبي
صخر : أجيت وگلتلج بوية انا عاشگج رفضتيني ريحان وانا حتى اسمج چنت اقدسه خليتيني اكره النسوان بس ما كرهتج

ما چنت مستعده ابد لهذا عتابه دنگت رأسي وگمت اريدن اطلع بس اعترض دربي من گال وخلاني بحالة صدمة
صخر : جدي يريدنه نتزوج

°كوكبة°

گبال عينه اتلاوه من وجع بطني وهو ما هامه صيحت وبجيت اريدنه يفتح الباب وكلش زين اعارف بيه يسعني بس يغلس أو يضن جاي اچذب

بچيت وعصرت بطني بقوة وبنفس اللحظة حسيت شي طگ بيها ورطوبة صارت جواي صيحت بأنهيار خايفة
من الفكرة الجاي تفتر براسي على صوت صياحي طب وبس شغل الضوا بهت يباوعلي وبارتباك سأل

مرتضى : شبيج شنو هالدم

_ما اعرف بطني مرتضى الحگني

شالني بارتباك حط حجاب على راسي وطلع بي يركض يدور تكسي تاخذنه للمستشفى عمن گبل چم يوم صاحبه اخذ سيارته و بعد ما ردها اجر تكسي بعد معاناة وبس وصلت للمستشفى عارفت هذا چان حمل ونزل

وضعي النفسي قبل الچسدي چان تعبان حطولي دم وضليت تحت المراقبه وبعدها سوولي كرداش وثاني يوم طلعوني وانا التعب الي جاي احسنه ما منه تعب هذا من غير الكره السيطر علي على مرتضى وعلى كل اذيه جاي اعيشنها وهو السبب بيها

حطاني على الفراش وطلع فترة وحسيت ب حركته يمي ما فتحت عيوني بس انجبرت احاول اگعد على حيلي من گال
مرتضى : اگعدي اكلي

گعدت وانا بالگوه اسند روحي على ايدي الخاشوكة من ارفعها ما چان الي حيل ابد وكلما اباوع على منظر ايدي تلعب روحي إلى أن تركت الاكل وما گدرت اتقبله ضليت اكثر من شهر تعبانة وصحتي يوميا بالنازل وبليلة مثلها مثل غيرها اجوي جماعته وانا قفلت على روحي الباب وتانيتهم يطلعون لان اعرف وراهم هسة ومن الشرب هو بعد جثة بلاية روح

بحذر كلش حطيت الحجاب على راسي وعباتي المشگگه بايدي وتوني اريد اطلع وتذكرت انا بحاجة كروة توصلني فتحت محفضته چانت عد راسه واخذت 25 وبيها چان الخلخال اخذه مني وطگعه شي بداخلي خلاني اشده شد على رجلي گبل لا اطلع وبيأس عبرت باب البيت وانا وي روحي افكر

مثلها مثل غيرها هم راح يلگفني

بس تسهلت علي شلون ما اتذكر وبذيج المنگطعه لگيت تكسي گلتله ياخذني لكيات اروحن بيها لمحافظتنة وصدگ وصلني اطيته كروته ونزلت وانا اسمع يصيحون بأسمها چن الفرچ اجاني صعدت وضليت حاطة راسي ع الجامة متانية شوكت تقبط وبس حركت حسيت روحي تحررت

ساعات وانا ما نامت عيني بس اريد اوصل اريد احجي لسعد شسسوا بي مرتضى ومن وصلت وفتحلي الباب حسن كش وجهه بوجهي وگال بالحرف الما انساه

حسن : ردي منين ما اجيتيي

نادية : منوو بالباب حسن

حسن : ماكو احد

طبگ الباب بوجهي رديت دگيته فتحه بعصبية وجرني من عباتي طاحت گبالي وشمرني بنص الشارع
حسن : لاتجينه وتراوينه جهرتج ما صدگنه نخلص منج

بجيت اتوسل بيه بس يصيحلي اسماعيل لو سعد بحقارة گال وهو يبلغني
حسن : ثنيناتهم متبرين منج عمنج عار عليهم وما يردوج

شهگت وغطيت وجهي ابجي وما رفله جفن علي سد الباب بوجهي وخلاني بنص الشارع ضليت هواي ابجي الشمس تدگ براسي وبعد ما يأست منه يحن علي گمت نكتت عباتي وحرت شلون البسها شگها صار اكبر من جراه هو لبستها شلون ما چان ومشيت لوين ما اعارف رچليه هي التوجهني وخطواني مليانات خذلان من اقرب الناس

الدنيا صارت العصر وانا امشي والناس تباوعلي باستغراب تثلمت بالشال من جوا العباة ما بعازة نضرة احد بعد يكفيني التعب وما اعرف ليش ومن خوفي اجاني شعور راح يلگاني

صرت أمشي واتلفت خايفه لا يلحگني ساعتها شنو نوع العذاب الراح يعذبيناه

مريت بدرابين قبل ماشيه بيهن أمشي ورجليه مادري وين ماخذتني وين اروح وين أنام

وأرجع اهونها على نفسي وأنا اردد
_ المهم خلصتي منه المهم طلعتي من سجنه

وأنا أمشي لمعت گبالي اضوية السوگ تحسرت وأنا اباوعلهن ومشيت أكمل طريقي طبيت أمشي بنص السوگ الدنيا مغرب والناس جاي تعزل
تلفتت أباوع شفت مره گاعده تلم بالبسطيه مالتها مال خضره رحت بسرعه أمشي يمها مادري ليش گلبي أرتاحلها وحسيتها من أهل الله وراح تساعدني ع الأقل بس الگه مكان أخلص هل ليله بي

خاله ،خاله

باوعتلي المره مستغربه من نبرتي السريعه نشغت بس شافت وجهي عرفت خافت مني من فشلتي وقهري بسرعه تلثمت بالشال احجي وياها

خاله فدوه ساعديني

شبيج يمه

خاله أريدلي مكان اگعد بي فدوه

شني يمه مكانيش

تحاجيني المره وكلش مستغربه
خاله عادي أنام جوه البسيطه مالتج

تنهدت تباوعلي
شلون يمه تنامين بالشوارع وأنت بنية حديثه

ميخالف خاله ماعلي شي

لا يمه مايصير أهلج وين

تنهدت اباوعلها والقهر اكل گلبي شاگلج يا خاله اهلي سدوا بابهم بوجهي بدون ما أحجي شي بعد مشيت عايفتها مادري ليش حسيت ردت أبجي من سألتني عليهم هواي هاضميني هواي كاسريني صاحت وراي ولا التفتت ومشيت أكمله طريقي المجهول

رجعت للشارع العام أمشي احس بعيون الناس كلها عليه حقهم يباوعون هدومي مشگگه ووجهي بس عيوني مبينه منه وبين روحي أحجي
هسه يلگاج ويموتج

رجف جسمي من طبيت بدرابين عبالك مهجوره تلفتت خايفه ما حسيت بنفسي شجايبني هنا شوصلني

ومنا گلبي يريد يوگف وزاد ضيمي من سمعت صوت جلاب بالفرع عبالك صوت أسود مو جلاب طگيتها ركضه بكل ماعدي من حيل من حسيت بصوتهن قريب مني بثانية برمشة عين صرتب نص السوگ يم بسيطة المرة غمضت عيوني بخوف وگعدت بالگاع جوه البسطيه ومادري شلون وعلى نفس الگعده غفيت وما گعدت غير على صوت المرة تندهني

خاله يا يمه اگعدي حبيبه

فزيت اباوعلها وافرك بعيوني وبدون ماحجي جريت اللثام على وجهي وگمت بس وگفني صوت ولد يصيح وراي
يابنيه

نداريت اباوعله وبس عيوني طالعه باوع بعيوني ورديت باوع لشالي حمحمت وسألته
شرايد خويه

رفع أيده بيها خلخالي
هذا الج

"ما فعله ذلك الخلخال لم يكن منسيا "
ولذلك الخلخال نصيب لما سوف يتبقى ل يروى

من ذا الذي اتى ذلك الخلخال بين
يديه ؟؟

─── ⋆⋅☆⋅⋆ ───

°ريحانة°

وگف بي الزمن وحجايته ضلت تتردد ب أذني ردت اچذب روحي وارد اسأله
_ شجاي تحجي أنت ؟؟

گبل لا يجاوبني علگ چگاره چر منها نفس طويل وخله الدنيا تطيح علي من اكد على الگاله
صخر : تعارفين جدي لو قرر لا أنا ولا غيري يگدر يوگف بوجهه

رديت گعدت اباوعله والحجي عدي ضايع ابد ما توقعت هيج قرار من جدي ساكت متاني ردي وانا بس اجت على بالي وتذكرتها برفض انتفضت وگلتله عيوني بعيونه
_ لو اموت ما ارضى گبل أنت رچل بت عمي شلون يصير

اشرلي على الباب
صخر : هذا الحجي اطلعي احجيه لجدج وساعتها وياج أنا بكلشي ترديه

أبتسم مستهزء واختفت ابتسامته بمجرد ما گال يذكرني
صخر : ما فرضت روحي گبل حتى افرضها هسة .

طفه الچگاره بايده ورد حطاها بالباكيت بتنهيده كمل كلامه
صخر : حاجيته ،وشرحتله أنت تشوفيني مثل أخو الج گال هو يحاجيج يعني السالفة ضلت بينج وبين جدج حلوها أنتم عمنه زعلان مني

بس فتح الباب صارت بوجهه نسمات خلاها تطب و مشى ضلت منداره تباوعله بأستغراب وردت باوعتلي عيونها بيهن هواي حجي ،اجت وگفت گبالي
نسمات : ماحب اتدخل بس شكو شحاجاج وهيجي انگلب حالج ؟

نزعت حجابي احس بروحي مختنگه ،نوبات اكو حجي يخليك حتى الهوه تدوره من ثگله عليك وما تلگاه ،اجت گعدت بصفي كضت ايدي من انتبهت لرچفتها
نسمات : شبيج اسم الله الرحمن ؟؟

شهگت ما متقبله الفكره وما جان على بالي غير ميمنة
_ جدي يردنه نتزوج انا وهو .

نسمات : أنت ويامن ؟

_ صخر

فتحت عيونها بصدمه
نسمات : صدگ عود ؟؟

غطيت وجهي وبچيت
اردد
_ أي والله ،قرر بعد جدي وقرر وماكو اليطلع عن شوره

نسمات : شهل قرار هذا ،وين صايرة جا غير هو رچل بت عمج گبل

على گعدتنه وطبت جفون استغربت من شافتني ابچي ومن گالتلها نسمات شهگت
جفون : يااا ياااا ،شبيه جدج اضن كبر وخرف بله هاي هم سالفة

مسحت عيوني وگمت وهن يباوعن علي ،وصيتهن لا يحجن ونزلت وشگد ما حاولت ابين روحي طبيعية ما عبرت على
عمة الضلت عيونها معلگه ومن چنت وحدي بالمطبخ اجت وگفت يمي وصفنتني من گالت

عطاء : عارفتي بقرار جدج ؟

سديت البوري وانا امسح ايدي بهدومي گلتلها بأستغراب
_ منين عارفتي بيه ؟

أبتسمت
عطاء : انا عطاء اعارف بكل چبيرة وزغيرة تصير ولا عبالج مثل هيج سالفة تفوتني

_ اممم

چتفت ايدها وباوعت بعيوني
عطاء : مبين ما راضية

_ شلون ارضى عمة ،تراها صعبة .

عطاء : حگج بس سهليها وهي
تسهل

_ ما مجبورة عدي لسان واگولن لا

عطاء : ماشفت وحده بغبائج

رفعت حاجبي وگبل لا اگلها ليش گالت
عطاء : ضيعتيه مره وتردين تضيعيه مره ثانية، لا تصيرين انانية وتفكرين بس بروحج ومره وحده فتحي عيونج وشوفي شلون يباوعلج ،هذولي كلهم ولدنه ما وصلوا لذره من الحب الشايله الج بگلبه

حجيها صح بس ما غير شي ضليت عد نفس موقفي وما غيرت منه شي
_ ما اگدر اتقبله ،انا لليوم بعدني احب حمزة وما عدي استعداد ابدي حياة وي غيره

هزت ايدها وغمتني گبل لا تگول
عطاء : شلون يعني ندفن روحنه وي المات ،شوفي حياتج تراج تتندمين

_ شوف منو يحجي ،جا ما گلتي الحجي هذا لروحج

عطاء : انا وحد

_ ليش وحد ،انا عشرة عمر وياه دگت الست سنين

عطاء : علمودج أول وتالي ما تضلين عاد اخذيلج زلمة يحبج وصخر ما يعيبه شي ،والله لو تشوفين بنات حمويني شلون ذابحات روراحتهن عليه وچم مرة بمرة من چان يجيني
يچفتن علي حتى يشوفنه بحجة شغلة لو مسيرات وانا چنت اغلس

بلايه اهتام گتلها
_ جا ما تاخذيله وحده منهن عمن حلم ابليس بالجنة انا ارضى بيه عاد ليش يضيع عمره الضال بالمتانه ولا عبالج راح اهتم لان انا بعمري ما شفته غير حاله من حال ضيرم

بس گضيت حجيي جرت ايدي وعضتني عضه خلت روحي تشيط و وياها كفخة على راسي فرت الدنيا بي ،شگد چنت مختنگه اخذتها حجه حتى ابجي و هي لا بعينها ولا بحاجبها تگلي
عطاء : تستاهلين حتى تشغلين عقلج لانه مو بس طافي متحجرر وما يعارف الصح من الغلط واذا ما شغلته انا ما يطلع اسمي عطاء

_ حرام عليج وعلي

عطاء : سلام الله عليك يا أبو الحسنين ،شالج وسطرج كون

وبس شفت صخر جاي گمت اعدل بحجابي عمن نص شعري طالع منوره عمة وكفختها السطرتني بيها وما چن يشوفنه كمل دربه جوه واسمعه يحجي وي عمة زهرة على العشا مال حنة ،فززتني من ندستني بحيله تگلي
عطاء : ها شو تباوعليه ولج ؟

_ ما مباوعه

عطاء : مو على الاساس الچذب حرام ؟

_ ما مچذبة ،خليني بحالي اروحلج فدوة ما عوزي ضغط اكثر وانا البي كافيني

مشيت طلعتلي جدوره زغار افرغ بيهن الاكل الضال من الغده وتوني اجلف بيهن وطبت عمة
زهرة : يم ريحانة جا وين الاكل الضل للولد ؟

اشرتلها على الثلاجة
_ بالثلاجة

طلعتهن وعلگت النار بين يا يحمن ضلت تسولف وياي وتاخذ شوري بچم حاجة وشوي وطب صخر يسأل
صخر : ها يمة وين صار الاكل ؟

زهرة : اوكفلي بس اصبن واخذه

صبتله بساع واطته الصينية اخذها ومشى للصالة وراها وراها مسحت الطباخ وطلعت جبت وصلة المسح للگاع عمن تبللت وتوني دنگت وفززني صوته وراي
صخر : احممم

بساع وگفت متفشله اديرن بعيوني ،شافني وانا مدنگة وچماله كافه ثوبي وكل ضني يطول الا يطلع عمن ياكل ،مشى للثلاچة طلع دولكة الماي واجة وگف گبالي
صخر : سدي البيبان واگضي شغلج

بلعت ريگي وبس هزيت رأسي ب أي ومن مشى ركض ركض مسحت وطلعت اشرن الوصلة وطبوا يدردمون عارفت بيهم متعاركين وبس شافوني واحد صاح

عون : عمة
والثاني
سيف : خاوه

رديت عليهم ب ابتسامه
_ ها عيون عمتكم وخالتكم

اجوي يركضون وگفوا گبالي ومن دنگلتهم اسأل شبيهم تعاركوا منو يحجي أول
عون : انا الچبير واحجي حاجيه عمة

سيف : مو چبيو

عون : أنجب

خزرته
_ ولك ليش تغلط

چتف ايده لا بعينه ولا بحاجبه
عون : گليله منو الچبير

سيف : بابا يدول انا الچبيو

عدلت وگفتي وكضيتهم كل واحد من ايد ومشيت اطبن جوه واني احجي وياهم
_ ماكو فرق بيناتكم هواي كلهن چم شهر

سيف : يعني منو اكبو

_ عون

وبس گلت هيج ضحك بأنتصار
عون : انا مو گلتلك وحتى راح اسجل بالمدرسة وأنت لا

جر ايده مني مدلغم
سيف : يغووني (يغروني)

بالكوات قنعته وراه بسنة يسجل وكل ما تجي عينه على عون يعيط وردوا يتناگرون وعلى صوتهم اجه صخر للمطبخ باوع علي مگابلتهم سأل شكو حجيتله باوعلهم وهو يگول
صخر : هذولي مثلنه انا وبرهان وما فكوا من الا حطوني وياه مستمع ،لا لا خرب عمك لك عووون

جراه من طگ سيف خزره
صخر : شو صلف أنت ؟

عون : يولي

كمت لسيف شلته اسكت بيه عمن صوت عياطه يجيب التايه
_ كافي حبيبي ،كافي مو اول مرة لازم تتعلم

صاح بيه من راد يشرد
صخر : تعال لك راضي ابن خالك

عون : ما

مشى شاله واجه وگف گبالي
صخر : يله بوسه

حط ايده على حلگه
عون : ايييع

سيف : الخايس

من خزرهم الا جروا عدل و واحد بس الثاني ،نزلناهم ومشوا واحد حاضن الثاني ابتسمت مصدومة جا مو هستوهن ما يردون يتصالحون ،طلع وراهم من اندگ الباب وانا رديت يم البنات للغرفة ،غاية بحضنها بتها وجفون متمدده وناثرة شعرها طايره بلونه ونسمات ترتب بالنضده وبس طبيت گالتلي

غاية : ها نصعد نسفط الهدوم ما ضل وكت

_ ماعدي شي

گامت تودي كواكب لعمة واحنه صعدنه گبلها وشوي وطبوا نوح وغاية غطت شعرها بايدها وهو يضحك عليها وعاند الا يشوفه يجر بايدها وهي تدفر بيه منا لمن دغدغها ونزلت ايدها ضحك منتصر يتغزل بيها بلايه مستحى
نوح : بوية شني هذا اللون اليخبل، كضوني ماتحمل كل هذا الجمال

ندسته غاية وهو ولا چنه وما طلع الا انشحت، سدت الباب وقفلته
غاية : شكد ماعدك مستحى

وهو من ورا الباب يگلها
_ خليت المستحى للمحامي

ضلوا يتداهرون وهو يتوسل بيها تفتح الباب ويگعد حباب جفون تأشرلها لا گالتله
غاية : شحمتك ما ترضى افتح الباب ،انزل يله لا اخابر صخر عليك

نوح : اشتعلوا واحترگوا بنفط

ضحكت من دفر الباب واختفى صوته ،ضلينه اكثر من ساعتين حتى الغرفة فرشناها وهي گاعده تبرد بأظافرها
جفون : ماكو هيج عروس يا صاعده يا نازلة لغرفتها

نسمات : جا مو نگلج تگولين مابيها شي

جفون : اگلجن شو ما اريدن اعرس بطلت

غاية : خوب يوميا هزي چذعج يا نخلة

فتحت جنطة المكياج صعدناهن بترتيب نخاف لا يتسكرن وانا احطن بيهن على الميز گلتلها
_ اضن خايفة

غاية : انا هم اگولن هيج

جفون : لا شني عليش اخاف قابل راح ياكلني

نسمات : سباعية

التحجي چان عكس التحس بيه ،ما لحينه وياها وبس كفينه الغرفة وكلشي بيها نزلنه، لبست عباتي وكلت لعمة توصلني
غاية : اجي وياج تانيني

اطتني كواكب وطبت جابت عباتها وبس طلعت اخذتنه عمة زهرة للبيت ،وگبل الحنة بيوم ودت علي عمة زهرة وبس مشتيلهم گالتلي
زهرة : دامج فارغة عمة تمشين وي جفون للصالون؟

_ امشي ماعدي شي

زهرة : جا خوش ،وسيوف هم راح تمشي وي غمد عام ثنين وحدتچن تساعد الثانية

_ صار

زهرة : بعد روحي تعبناج

أبتسمت
_ تعبكم راحة

طلعت من الغرفة توصيني
نسمات : اخذي هدومج وياج احسن كلشي يصير وخاف ما تلحگين تحظرين روحج من تجين

_ حايرة اللبس فستاني الماروني لو البنفسجي .

نسمات : البنفسجي احلى عليج مو شفته ،الماروني خليه للعرس مستور

جفون : صحيح حجي نسمه

_ هاي هي راح اللبس البنفسجي

انداريت على صوت صخر ،سلم وصعد بوجهه فوگ ضلت عمة تباوعله حايرة
زهرة : هذا شبيه صاير فرد نوبة لا بحجاية ولا ب بسالفة وكل وكته طالع

جفون : وشني الجديد يمة هذا صخر هيج من يوم يومه

زهرة : انا احسن اكو شي مضوجه واحساس الأم عمره ما يخيب

جفون : لا تضلين تفكرين ،اكيد ضايج لان جدي ما يحجي وياه

زهرة : هم جدج عناد الله يسلمه

غضة : جا شتريدن زهرة يبوسه من رأسه ويگله عاشت ايدك عمن ضميت علينه

زهرة : مو هيج ياعمة اليزعل يوم يومين مو صار چم شهر

غضة : زعلهم بيناتهم لا نتدخل احنه

چنت اريدن امشي بس من عارفت راح يغسلن البيت نسمات وجفون ضليت وياهن كفيت ثوبي بعدما تأكدت الولد مو هناه وبس صخر فوگ وكالت جفون نايم
زهرة : شو وجهج انطعن احمر

تلمست وجهي
_اضن تحسست من القاصر

زهرة : امشي غسلي بساعج انگلبتي گلب خايبة

اطيت المكناسة ل نسمات ومشيت للمطبخ فكيت حجابي وغسلت وجهي وفتحت الباب مال مطبخ عمن جفون قافلته، ضليت گاعده اجرن نفس الهوه بارد يرد الروح ،ضليت شوي بين ما استعدل وضعي وگمت
توني اريد اطبن وانطگيت بيه ما اعرف منين طلع بوجهي ،نزل الموبايل يسأل
صخر : خوما تأذيتي ،اعذريني بس مخبوص وما شفتج گدامي

بساع رفعت حجابي وهو عيونه تحركت وي ايدي دنگ ومشى عضيت اصبعي مقهورة شكو موقف خايس جاي يصيرلي الا وياه وگملت علي من عمة گلتله يوديني عمن الوكت كلش تأخر وتخاف علي

_ لا عمة امشي وحدي

رفع حاجبه واعارف بهاي حركته جاي يستهزء تنهدت مستسلمه بعد ما گال
صخر : وحدج ،امشي گدامي

مشيت گدامه وشوي ولگيته صاير بصفي بس طلعنه من بيت جدي ،ما حجه ابد وتوه فتح الباب وصار ب وجهنه عزيز يريد يطلع بس شافه گاله
عزيز : الله جابك توني اريد اجيك .

صخر : خير أن شاء الله

اشرلي عزيز اطبن، شوي مشيت وضليت واگفه اسمع شجاي يحجون
عزيز : عارفت الحايك السالفة ل غافر كلها وما ضل شي نوصل للبكرة

صخر : يعني صار عدك طرف خيط ؟

ضحك يگله
عزيز : بس اريدك وياي

صخر : بلايه ما تگول

هيوفة : ريحانة

صاحتني ماده رأسها من شباج المطبخ ،اشرتلي تعاي وبعدني ما نازعة عباتي حطت آدم بحضني
هيوفة : اخذي هدية مني الج واذا تردين اكو بعد واحد ثاني

غمزتلها
_ شعدج اليوم ؟

هيوفة : عيد ميلاد اخوج وصار چم سنة ما مسويتله

_ جا شوكت حظرتي ؟

هيوفة : العصر من أنت مو هناه وديت علي جابلي كيكة وچم حاجة بعد وياها

_ياعيونييي ،جا اصعدي ولا تشيلين هم جهالج عدي

باستني وصعدت تركض ،طبيت لغرفتي وابتسمت من لگيته نايم ويمه سيف وعلى جهه آدريس و دره حطيت آدم بالگاع
نزعت عباتي وشلته بساع من بچه وطلعت برا حتى لا يگعد الباقين، ضليت افتر وانا شايلته وابوس ب خدوده
_ فدوة لهل خديدات شتاكلن أنت وهيج حلووو ،يا يمةةة شلون آدم ينوكل

احجي وياه افتر بالحوش ومن رفعت رأسي شفتهم واگفين عزيز وصخر يسولفون عد الباب لهناك و انتبه الي ،شمر چکارته وگالي
صخر : تعاي اطينياه .

اندار عزيز يشوف ويامن جاي يحجي ،تقدمت عليهم بخطوات ثگيله مرتبكة من نضرات عزيز الغريبة اطيته آدم ،ومن ما عارف هذا منو بيهم بسب الشبه بيناتهم
_ هذا آدم عيونه صفر آدريس عيونه جوزي

باوع ل آدم
صخر : هاه ،واذا مغمضين شلون ؟

_ اليشوفهم هواي يتعلم عليهم ،هسة انا ابد ما اشبه بيناتهم

باس آدم ورد اطانياه
عزيز : طبي جوة

سويت مثل ما گال وانا احسن بيه شي غريب ،هذا مو عزيز طبيعته مو هيج ابد احنه متعلمين نختلط وي اولاد عمنه بس باحترام
وهسة ما صار غير انا رديت على گد السؤال، نومت آدم وتمددت وبعد حرب عشتها وي عقلي بالگوات گدرت انام ...

°هيوفة°

علگت أخر شمعه وطفيت الاضوية وگعدت اتانيه شوكت يجي ،باوعت للساعة تريد تصير بالوحدة گمت شلت موبايلي من الشحن وخابرته رن شوي و جابوني
ضيرم : ها ريشتي

_ وين صرت ضيرم متانيتك

بحيله گال
ضيرم : شعدج متانيتني ،مشتاگه مو ؟؟

عضيت شفتي متوتره من سوالفه القليل يطلعن
ضيرم : ها شو سكتت الريشة

_ تعال بساع متانيتك

ضيرم : بالدرب جاي

بس سداه گمت بساع اشوفن روحي وارش عطر گبل لا يجي وشوي وانفتح الباب ومن برا الضوه للغرفة طب ،ضحك وسد الباب وانا تقدمت عليه من فتحلي ايده، حضني رأسه برگبتي يحجي

ضيرم : بوية ما ناسية ؟

وخرت منه مبتسمة اباوعله هزيت رأسي ب لا
_ شلون انسى بهذا اليوم اجه للدنيا أبو جهالي

ابتسم ومشى گعد ع الجرباية يباوع للاجواء المسويتها گعدت على رجله وخر خصله من شعري ورا اذني
ضيرم : ماتوقعت تسوين شي وگلت نست عمن باجر الحنه وملتهيات

_ ما انسى شي يخصك

فرحت وانا احس بفرحته ناويه اعوضه عمن من جبت لهسه ملتهيه عنه، الصبح گعدت على صوت حركته بالغرفة من فتحت عيني شفته جاي يمشط أبتسم واندار بعد ما شافني بالمرايه

ضيرم : گعدتج مو ؟

_ ارد انام لا تشيل هم

ليس منظاره واجه باسني من راسي وتوه گالي
ضيرم : احبج
واندگ الباب من مشى فتحه چانت دره طبت تدردم
در : لوح بابا ماحبت بعد (روح بابا ماحبك بعد)

دنگ شالها وضحك من ما خلته يبوسها
ضيرم : ليش زعلانه يابة ؟

در : ايش نمت يم عمة ؟

باوعلي ورد باوعلها هل شيطانة هواي تددل
ضيرم : جنه نايمن يمج انا وأمج بس هسة صعدنه حتى ابدل وأمشي لدوامي

زغرت عيونها ما مقتنعه
در : ما تتذب علي ؟( ما تچذب علي)

باسها وهي شوي خفت طنگورتها من گاللها
ضيرم : بابا ما يچذب

در : خوذ (خوش)

ضيرم : عفية بالحبابة

نزلها يمي و وصاني انومها لان كلنه نعارف بدر اذا ماشبعت
نوم تگضي اليوم كله مطنگره توها غفت و عاط صگر ،طفرت اعدل بثوبي الطافر من اصله وشلته ومن
نام بعد انا ما گدرت النوم جافه عيني بدلت ونزلت توهم عمي وعمة گاعدين
صبحت عليهم وعمي مشى يجيب ريوگ ،حطيت قوري الجاي على
النار وطلعت شغلت الماطور ارشن الاشجار عمني اكثر شي صايرة احب
اسويه أول ما اگعد ،بس طب عمي طفيت الماطور ومشيت وراه ،سويت ريوگ وگعدنه نتريك وطلعوا عون يسحل بسيف وهذا مطفي بعده،صاح بيه عمي

باقر : لك عون هدد الولد

عون : غير يگعد وياي

باقر : يعني اذا أنت تگعد لازم هو هم يگعد

عون : أي

اخذاه للحمام يجرجر بيه وشوي وطلعوا ثنيناتهم منگعين اثاري العينتين منگعه حتى يصحيح يطبق سوالف نوح وافقار عمن هذاك اليوم شاف نوح هيج گعد ابوه ،صاحهم عمي يگعدون ويانه وسيف كلساع وغام عون

جراه من شعره
عون : كافي تغم

وسيف صاح على عمي فكهم وگعدهم كل واحد بجهه ،بس گضينه ريوگ غسلت المواعين ومشيت حتى اشوفن اهلي وبس طبيت امي سألتني
زهرة : جا وين ريحانة ؟

_ نايمة

زهرة : امشي گعديها يمة ما ضل وكت لازم يمشن للصالون

باوعت للساعة بالمطبخ چانت تريد تصير بالعشرة رديت گعدتها وجبت آدم وياي ووصيت عمة على آدريس وشوي وطبت متحظرة
ريحانة : صباح الخير

ردينا عليها الصباح وفرت عيونها تدور على جفون
ريحانة : جا وينها ؟

زهرة : اضنها جاي تسبح

طبيت حطيت آدم يم جدة وصعدت اشوفن غرفة نوح
عمني ما شايفتها، أبتسمت على جمال الترتيب و تنسيق الاوان ،من النزله البيضة للبرده الي بلون احمر طافي وياها تور ابيض بالنص ،الفرشة زغيره فرو ابيض والاخشاب بيهن ميول للتركي اكثر من ما مبينات شغلها عراقي

نزلت بساع من سمعت صوت امي تصيحني تريدني اشوف جنطة الصالون مال جفون خاف ناسية شي وتوني فتحتها وطبت للغرفة أبتسمت وانا اگلها

_ صباح الخير ياعروس

جفون : لا تذكريني فدوة

_ ليش ولج

جابت مشط وگعدت تمشط بشعرها
جفون : متوتره كلش ما متوقعة هيج راح يصير وياي

گمت گعدت گبالها
_ كل عروس هيج تتوتر بس لا تخلين التوتر يسيطر عليج ويخرب فرحتج

بلعت ريگها تهز رأسها ب أي ،اخذت منها المشط امشط بشعرها واحجي وياها
_ انا هم مثلج خفت وتوترت بس بعدين تندمت لان خربت احلى يوم بحياتي

ومن حسيت بيها مركزة بالاگوله حاولت شگد ما اگدر اطمنها وبس مشت للصالون نضفت البيت رديت للبيت اشوفن جهالي، لگيتهم كلهم گاعدين وعمة خطية حايرة بيهم

طبت تصيح
در : ماما

مديت رأسي من فوگ جاي احظر بهدوم ضيرم خاف يجي والتهي عنه
_ ها حبيبتي شتريدن

رافعه رأسها تحجي وياي
در : ويش بدله نونه حموه واني لا ( ليش بدلة ميمنة حمره واني لا )

_ بدلتج وردية مال اميرات

در : والله

أبتسمت
_ أي والله

هزت رأسها ومشت وما چنت ادري راح تصيرلنه سالفة بسبب حجايتي عمنها بتي هم ما تنگدر ماشيه تگول لميمنة ماما تگول بدلتج مو حلوة وبدلتي مال اميرات ومخليه ميمنة تبچي ،چنت اعزل بالغرفة وسمعت صوت حواري جوه، وبس نزلت گالتلي وهي بحضنها ميمنة دموعها على خدها

حواري : ولج هيوفة ليش تگولين على بتي بدلتها مو حلوه

اشرت على روحي
_ يا انا ،لا والله

ومن سولفتلي خلتني اگضيها صفنات من چذبة بتي المرتبة وبس طبت وشافتنه ملتمين وميمنة تبچي بكل ثقة گالتها
در : لا تبجين هسة ابوج يجيبلج مثل ماتي هم ووديه

گمت متحلفة بيها وبيها بخت طب ضيرم وختلت وراه ضماها وراه يسأل شمسوية ومن حجيناله ضحك مصدوم
ضيرم : عود صدگ ؟

حواري : أي والله بتك تسوي فلك

اندار شالها يحجي وياها وهي بس ترمش بعيونها علمود تكسر خاطره
ضيرم : ليش هيج تحجين بابا ،امج ما گايله هيج

در : مو هي غووتني

ضيرم : جا خوما تچذبين ،گولي اتوبه

در : توبه

حضنته وباسته وبس نزلها ركضت لمينة تراضيها وهاي الفطيرة بساع رضت، اشرت عليها ما مصدگه هاي بتي
_ هاي عليمن طالعة هيج

نجوى : جنها سوالف جفون

حواري : الحمدلله ما گلتوا
على عمتها

صعد ضيرم وحواري مشت تحظر روحها وجهالها عمن ما ضل شي لجيتهن من الصالون ،بدلت هدومي بگلبيه جديده واخذت كلشي احتاجه انا وجهالي ومشيت الاهلي

°سيوف°

ندست ريحانة الگاعدة بصفي وتصبغ اظافرها، رفعت الفرچة مال صبغ بوجهي
ريحانة : لا تلحين راح ادمرج والله

خزرتها وگمت متنرفزه لبست صايتي
ريحانة : استعدي للرزاله عمن صارله ساعة مشتول جوه

بايدي الشال شمرته عليها
_ ومكياجييي شلون انزل

ريحانة : ماگدر انا اعذريني مشغولة

اعرف بيها جاي تخبث وياي ومتقصده وي جيته تگعد تبصغ، غطيت نص وجهي بالشال ونزلت احجي عليها دروته
بعيوني ومن شفته واگف بصفحة الصالون مشيتله وبس وصلت نتر متنرفز
برهان : زين وتذكرتن اكو بشر واگف جوة ،هاج

حط علاگة الغده بيدي وطبگ حواجبه يسأل
برهان : ليش هيج مغطية وجهج ،شملطخته ؟

رديت ليوره حاطه ايدي الثانية فوگ الشال
_ اسمه مكياج مو تلطيخ

برهان : جا الحايط يلونونه و وجهج ملون هسة

حرك حواجبه
برهان : صار عدي فضول اشوف

خزرته
_ ما تستحي

برهان : لا

وتوني درت وجهي اريدن امشي وعمن ما حاطه دمبوس انفك اللثام عن نص وجهي وهو بساع جراه يغطيني وبساع انگلب گلب يرزل
برهان : بت الاوادم ليشش نزلتي أنت

دفعته مني وهو رد ليوره يمسح وجهه واشرلي
برهان : اشتعلت صفحتج حتى عيونج غطيهن واصعدي

خزرته ورفعت حاجبي ما چان قصدي استفزه بس هو ما يتحمل
برهان : نزلي حاجبج

طگ تاير السيارة برچله
عطت
_ شبيييك

برهان : امشي امشي ،اكسررر رچليج لو نزلتي وخل اجي واشوف وجهج مبيين

چان طابگ بدربونه هدوء بس على صوت صياحه واحد من البيبان انفتح وطلعت مره تسأل شصاير
گلتلها
_ هذا الزلمة تحاغش بي

خليته يحلفلها چذابة ومن گال
برهان : خطيبتي

رديت بساع وگفت يم المره
_ جذاب خالة لا خطيبته ولا شي

خزرني يتحلف بي وانا متشمته ومرتاح گلبي طلعت حيف صياحه علي گبل شوي ، ترخصت من المره وصعدت بساع للصالون وبس شافتني ريحانة طفرت اخذت الاكل من ايدي چانن لفات مال گص ،طگتلها قوطية ببسي وطلعت لفة تاكل بيها وتگلي بخباثة مقصوده
ريحانة : شافج برهان لو لا

نزعت الصاية والشال وگعدت بصفها
_ كلتلج لا تحطيلي حمغه هيج لون ضل يصيح وخله الناس تطلع على صوته

ريحانة : غير تخبل عليج

_ اگلج

اللگمة بحلكها واشرتلي احجي
_ سويت بيه سالفة يجوز لو اطيح بايده يموتني

شربت من الببسي تضحك
ريحانة : لا ما يموتج تموتين على گلبه

طگيتها وهي تضحك ،وخبلتني كلساع سألتني
ريحانة : خوما حمرتي خربت

_ لا والله كلشي مابيها

ريحانة : خوش بس راح اگوم اعدلها

گامت غسلت واجت بايدها القلم وگفت گبال المراية رتبتها واندرتلي
ريحانة : هيج ؟

هزيت رأسي مكياجها جان مختلف ،الوانه ترابيات و كلش لاگيلها مكيجت روحها ومكيجتني من مكياج الصالون ودفعتلهن نص الفلوس لان ما چانت راضيه احد يستلم وجها تگول محد يعرف لملامحها ومن شفت مكياجها خليتها تمكيجني وانا كلساع و اگللها

_افتحي صالون

تضحك وتكلي اسكت لا يخرب ،شوي وطلعت جفون مشتلها تشوف مكياجها، كمت اباوعلها بابتسامه
_طالعة تخبلين والله

جفون : صدگ ؟

هزيت رأسي ب أي واخذتها ريحانة تلبسها البدلة وانا ضليت متانيه غمد ،جانت عكس جفون المكياجها احمر ،غمد ترابيات وي بدلتها الزيتونيه، بس لبسن بدالتهن وبين ما يسسولهن التسريحات بدلنه انا و ريحانة
_ سديلي السحاب ولج

بس سدتلي السحاب مشيت اشوفن روحي گبال المراية
الطويلة، فستاني بيجي كلش نازك بس مكشوف شوي
تصميمه صاير مثل الحورية من گدام زين طوله ومن
ورا يسحل، لبست الكعب وعدلت شعري ،اجت ريحانة
وگفت بصفي تباوع لفستاها الي لونه جان كلش لايگلها ،من گضن وكفينه كلشي انا خابرت على سياف
و ريحانة گالت صخر يجيهن لهناك و دگ موبايلي استغربت من شفته رقم
غريب فتحت خط واجاني صوته من ورا خشمه چان يحجي
برهان : اطلعن متانيچن

ما لحگت اجاوبه وسداه بساع
ريحانة : ها منو ؟

_ ابن عمج الغثه

ريحانة : سبحان الله صرت اعرف هاي التسميه ل برهان

دگيت رچلي بالگاع وهي ما مهتمة صارت تلم ب الغراض وجفون وغمد يتصورن ،طلعت مجبوره بس شافني بساع نزل من سيارته اخذ الجنطة

برهان : وجهج غطيه

رديت للصالون بلايه ما ادير بال، ساعدت غمد تطلع وگبلنه جفون و ريحانة صعدن بسيارة صخر واحنه وي برهان كل ما ارفع راسي اشوفنه يخزر بي ندستني
غمد : حمرتج قوية غطي وجهج ترا راح ينفچر

_ خلي ينفچغ شدخلني بيه أنا

گبل لا نوصل بشوية شمر علي كمامه طاحت بحضني رفعتها مستغربة وهو عينه للطريق گال
برهان : اللبسيها

باوعتلها چانت جديده لبستها ورديت عدلت شالي وشوي وطبينا للقرية گبلنه نزلت جفون ونوبه احنه ما چان اكو احد غريب چان تخزيت من دست على ذيل الفستان واجيت اطيحن لوما كضيت الباب و الله سترني ،بنص هدومي صرت طبيت متفشله لا مركزة بالهوسات ولا الهلاهل ،الحنة مال نسوان صارت ب بيت جدي جوا طبيتنه صارت العصر البيت يغط ويبلع، شمرت الكمامه واخذت بطل الماي من هيوفة اشرب واحجيلها على ابن عمها وهي بس مبتسمة
_ شبيج ؟

هيوفة : والله تعارفين حگه حمرتج تجيب التايه

_ حظي خلاه يشوفها

هيوفة : لا حظه هذا

غمزتلي تريد تحجيني
_ مو صوجج صوجي

خليتها ومشيت گعدت بصف غمد ،و ورا المغرب بدت حفله الولد بره والنسوان جوه و گبلنه عشوا الزلم حتى يتلهون ويطبون العرسان،أول واحد گالوا راح يطب نوح ،طببنه غمد جوه وتلگيناه بالهوسات وبلايه
مستحى صار يدبچ وي هيوفة وغاية، طبت وياهم عمة زهرة وجفون تباوعله وتضحك وبس يمها ولان چنت قريبة سمعته يگللها

نوح : "الاحمر ما يلوگ غير لشحمتي"

أبتسمت وگمت خجلانه وخرت وضليت بس اباوعلهم حناها وطلع وبس طب علي تلگيناه كلنه عكس نوح چانن بس خواته، يضحك ويباوع ل غمد ومشى گعد يمها تدنه يشاورها وهي تهز رأسها
ب أي وبس حنها بدت
خبصه عشانه احنه وكشختنه نتراكض، وبس طشت النسوان گالوا راح يرگصون چوبي ،البنات ركضن يشوفن من غرفة ليث ونص شباج المطبخ صاحتني من نهاية الدرج
ريحانة : ما تجين ولج تفوتح اجوائهم والله ،وردة أنت هم تعاي

صعدنه انا وياها وراهن وبس طبينه تدنت هيوفة تسويلي مكان يمها
غاية : فدوووة لحبيب اخته

أبتسمت اباوع وياها چانت تباوع ل ليث الصاير بنص الولد ،بدايتهم عمي سمير وصخر وضيرم وراه ليث وعزيز وبعد چم واحد ما عارفتهم وبالاخير سياف و برهان ،والعرسان وحدهم بالنص كل واحد بيهم شايل سبحة ويفر بيها

تدنت تشاورني
بركة : عليج الله باعي الاخوي شگد حلو وهيبة والله يفوتج

گرصتها وبس عاطت گتلهن
_ انا وياها ماعليچن

ما اهتمن عمن كل وحدة چانت عيونها على اخوانها و وزلمتها
حواري : جا حقوق شو ماكو

اشرتلها ريحانة
ريحانة : هذاك يم عمي محمد

شوي وطبوا بالنص يگمزون عون وسيف ،وخرنه بساع من رفع راسه صخر وخله مطافره يصير بفلس

بس نزلنه كل وحدة بدلت فستانها ومنهن العرايس وثاني يوم هم مشينا انا وريحانة وياهن وحده احلى من الثانية طلعن ومن نزلنه وشفت صخر وسياف جايين الا جريت نفس ...

°غمد°

نزلوني ببيت اهلي حتى زفتي من عدهم تطلع بس جفون طببوها لبيت جدي ،اباوع الامي تفتر گبالي واحس بخنگه اريد ابجي ،شوي وطب أبوي من بعيد گالي
كاظم : بوية كبرت بزر الگعدة وصارت عروس وراح تصير مرة الابن عمها

يحجي وعيونه حمر ،بساع بچيت وگمت من اجه علي ،حضني يگلي
كاظم : عليش تبچين اشو هناه بصفي أنت كل ما تضوجين بس افتح الباب وتعاي

وخرني يباوع لعيوني وعلمود اسكت گالي بابتسامه
كاظم : مكياجج خرب

ركضت سيوف جابت كلنكس تعدله الي ،گبل المغرب اجوي اخذوني من بيت أبوي لبيت جدي ،أول وحدة انا زفوني وبس طلعن مني ضليت گاعدة ارچف حتى السور الحافضتهن نسيتهن ومن سمعت صوت الباب مال مشتمل انفتح گمت وگفت على حيل ،شو صرت اشوفن علاوي بغير عين وهاي عود انا الما اخافن منه بس سد باب الغرفة گلتله

_ أنت بمكان وانا بمكان

نزع سترته يضحك ما عاجبه كلامي
علي : مكان واحد ماعدنه غيره، بيتنا هذا حبيبتي .

شمرت مسكة الورد عليه گبل لا ينطگ بيها كضاها حطها على الميز واجه يمي
علي : شبيج ترا ما راح اجبرج على شي

غورگن عيوني وهو مال رأسه ما مصدگ ،بأستغراب يباوعلي
علي : مبديلج لو شني ؟

_ علاوووي

علي : يابوووية هو أنا مني سحلتني غير علاوي و ياء التملك

عضيت شفتي وهو بساع حط اصبعه عليها حتى اوخرها من سنوني
علي : اذا تردين غيري هدومج ولاتفكرين نبگايتي

مشى للكنتور اخذ هدوم وطلع للحمام وانا بساع نزعت البدلة ولبست گلبيه بيضة نص ردان صح چانت فضيحة بس هذا اللگيته گبالي ،بين ما طلع هو انا فكيت التسريحة بس طب اجه باسني من راسي وتمدد، اخذت ملابسي وكلشي ومشيت للحمام اوصي روحي ما اخرب هل ليلة بالخوف الما اعارف شوكت اجاني ..! !

توني طلعت واندگ الباب طلع هو من الغرفة فتحة وضل شوي وطب شايل صينية العشا مشيت وياه من صاحني
حتى نتعشه ،چنت اگولن متعوده عليه بس من انفردنه وحدنه شفت روحي حتى ما اگدر اكل و لوما هو وكلني
جان ضليت كاتلني الجوع ،هو شال الصينية يوديها للمطبخ وانا
غسلت ورديت ،رشيت عطر وگعدت على الچرباية بس طب باوع علي وسند روحه على الچرچوبه مال باب
علي : گومي توضي حتى نصلي

علي گولة هيوفة بس يگلج نصلي اعرفي ما ضل عدج مهرب بعد وناوي عليج الليله، بلعت ريگي و عود اثولها گلتله
_ شعدنه مصلين!

أبتسم واجه وگف گبالي
علي : توضي وتعاي اگلج

بس توضيت ورديت لكيته يدور على المصلايات طلعتهن و فرشهن هو ،گالي النيه وتوجه قبلي و انا على مصلايتي وراه
علي : الله اكبر الله اكبر

°جفون°

ضامه دمعتي اگولن زحمة ابجي ويضحكن علي بحكم انا بنفس البيت وما طلعت ولا غيرت ناسي بس من زفوا غمد واجه دوري كضيت ايد عمة

_ بطلت نزعوني البدله وكلولهم خربت كلشي

انا ارچف وهن يضحكن علي والبتواسيل ومحاولات الاقناع صعدوني عد الباب وگلتلهن
_ ما اطبن شني ما رايده روحي ،شبيج يمة مو انا بتج

زهرة : جا نوح هم ابني

_ هااا تبيعيني ،عارفت والله

كعدت على الجرباية وهي گعدت بصفي توصي بي وانا گضيتها بس ساكته ولهناك وسمعت الهوسات من زفوا علي ،تنفست احاول اخفف من ارتباكي وشوي وصار صوت فوگ ،گمت وگفت من انفتح الباب وطب يضحك
بس شافني سكت واكتفى بابتسامه ،فتح ايده وانا ضليت جامده ما اعارف اتحرك لو اضل بس هو كسر حاجز تفكيري واجه حضني

وبس وخر عيونه بعيوني بأنتصار گالي
نوح : وچان نهاية الشحمة تصير بغرفتي ،مرتي وحلالي الهجت من الديره ساعة الردتها

ساكته اباوعله وهو ضل لو يتنغزل لو يذكرني مناه لمن جاوبلنه العشه، حط الصينية بالگاع يداهرني

نوح : جابولي اكل وانا عشاي موجود بالغرفة چماله شحم دسممم

خزرته
_اريد ابدل

نوح : تعاي اكلي حتى اصيحلج وحده من البنات

گعدت يمه على الساكت اكل لگمه يطينياها بايدي و لگمه ثانية هو يوكلها الي
_ شبعت كافي

نوح : بس هاي

اخذت اللگمه من ايده اكلتها وضليت گاعدة اشرب ببسي واباوع بين ما گضه ونزل وشوي وطبتلي هيوفة : ها شو بعدج بالبدله ؟

_ اريدن اسبح فدوة افتحيها

اجت تفتحلي قياطين البدله وتسولف وياي طلعتلي هدومي
واخذتني للحمام وبس سبحت وطلعت لگيتها واگفه عد الباب وبس نزلت صعد هو اخذله هدوم ومشى سبح ،شگد چنت خايفة بس كلشي صار بهدوء بعدما صلينه

نايمة وفزيت مخترعة من حسيت بروحي انجريت ومن فتحت عيوني تنهدت وانا اشوفنه گاعد ،أبتسم
نوح : شبيج خفتي ؟

صعدت الغطا وتقربت عليه من جرني اكثر
_ نسيت

نوح : نسيتي انا يمج

_ أي

نوح : جا بعد لا تنسين تعودي يوميا تصبحين بوجهي

_ اممم ،بيش الساعة ؟

نوح : توها بالسته

_بعد وكت هسة بعدهم نايمين

نوح : من نمتي انا نزلت بهدعش وياكلون كيك من مال حنة

_ حرامات جا لو مگعدني

ضحك ومسح وجهه يشرحلي
نوح : مايصير تنزلين الا اليوم

_ ليش عود

نوح : زحمة شوي

_ هاا

نوح : اروحن فدوة للهاه، يابة مو مرة حلقومه

غطيت وجهي بالغطا خجلانه منه، رديت نمت تعب هل ايام بين علي وهو هم ما حسيت بحركته بعد ثنيناتنه گعدنه على صوت دگة الباب ،فتح عيونه ب ثگل
نوح : منووو

غاية : انا اگعدوا تريگوا

نوح : هسة خوية

غاية : لا تتأخرون

نوح : لا

جريت روحي منه اعدل بهدومي وهو گام سبح ورد لبس الدشداشة بالغرفة ومشط شعره يحجي وياي و انا گاعدة على الجرباية
نوح : تردين وحدة من البنات ؟

دنگت راسي اطگطگ ب اصابعي
وگلتله
_ أي

وتوه نزل وطبت هيوفة أبتسمت من شافتني ودارت عيونها بالغرفة
هيوفة : هاي شني صاير هجوم ؟

_ اكلج اطلعي برا

ضحكت تغمني
هيوفة : امداج مو عرستي عيب هل سوالف احترمي

_ جا لا تزيديها علي وانا اريدن اموتن حايرة شلون راح انزل

مشت چم خطوة
هيوفة : هيج

شمرت عليها المخده كضتها تضحك وطلعتلي هدوم
هيوفة : هاي الگلبية الوردية حلوة وياها الشال الابيض اسبحي وتعاي بساع

اخذت الگلبية واحتايجاتي وبس سبحت ورديت مشطتلي شعري وشسورته وحطتلي مكياج خفيف و طلعت ذهبي تلبسيناه وتحجي
هيوفة : من تنزلين بس گولي صباح الخير وهاي هي كلنه مرينه بهذا اليوم بعدين تتعلمين

استمعلها بلايه ما احجي ،اطتني الشال لبسته ورشيت عطر ونزلنه وياها والخجل الحسيت بيه خلاني اشكن بورحي بس الحمدلله غمد هم چانت مثلي وحسيت بالانتماء ،واحنه گاعدين نتريگ عمة
زهرة گالت ل ليث يمر للسوگ جيب چم شغلة

ليث : تدللين بس خليني اكف شغلي بالاراضي وأمشي

زهرة : خوما تتأخر ؟

ليث : لا كلها ساعة لو اقل الساعة ،لا تحطين بالج كلشي يوصلج بالوكت

زهرة : عفية بعد امك

تندت علي
غمد : اكلج شو احس بروحي اريدن اختفي

همستلها
_ والله حتى انا

حطت رأسها بيناتنة
عطاء : حل، جا شعالبچن الزلم تاكل لسناتچن

غمد : جا شو أبو چسار ما اكل لسانج وفكنه

عدلت گعدتها تخوزر بينا وانا وغمد بالگوات ضامين ضحكتنه ،جدي وعمي محمد طلعوا بشغلة وعلي و نوح هم طلعوا من اجاهم فقار، هناه يله گدرنه نجر نفس ،بس اكو غيرنه اختنگت وطفرت من مكانها و جدة كضتها
غضة : وين ماشية

وصاحت ل برهان يطب ،سلم ومشى گعد يم جدة هو من جهه وسيوف من جهه ثانية
غضة : ها يابعد روحي راح تمشي ؟

برهان : أي واجيت اسلم عليج

غضة : يابعد روحي تجي درب السلامة أن شاء الله

برهان : فدوة اروحلج

اباوع على سيوف ما صدگت تهدها جدة وتركض يم البنات للمطبخ
_ اكلج ما نگوم شعدنه گاعدين

غمد : عايشات دور العرايس

_ يا عرايس خايبة دگومي

بس گمت هي اجت وراي وتونه طبينه وطبت ريحانة وياها عون ودر تفرك بعيونها وشايلة وياها واحد من جهال هيوفة الزغار
ريحانة : صباح الخير ،هيوفة جهالج لعبوا بحالي

أبتسمت ونشقت ايدها ومشت اخذت الزغيرون من ايدها ودره لزگت بثوب امها متنحسة
ريحانة : هاي شني العرايس هناه

غمد : أي

رمشت بعيوني من گالت
ريحانة : يگلك امس صايرة موش حرب حربين

غمد : اهووو

نسمات : بدت استعدن

ريحانة : صدگ كضيتج

مشت يمها والحمدلله التهت بنسمات
ريحانة : شبيج امس ماتطين وجه الابن عمي ،هاااه ؟؟

نسمات : ترا اتفاق مو زواج صدگي

ريحانة : وعلي صدگي

نسمات : اعرف بس يطلگني من يطلع أبوي

هزت ايدها
ريحانة : أي خوش

تحجي ومنفعله وسكتت بس سمعت صوت صخر ،ندست غمد
_ طفت وما طفاها غير ابو الخشب

غمد : انا منتبهه بس مغلسه

_ جا شو هي ما تغلس ،انا الج ريحانة

أبتسمت بخباثة
_ هو شو سكتتي ؟؟

ريحانة : شنو ؟

_ كملي سوالفج

بارتباك گالت
ريحانة : اريدن ريوگ ما اكلت شي

نزعت عباها ومشت للطباخ تحمي الجاي وبنفس الوكت طبخ اجه صخر يريد يطلع ،صبح علينه و طلع
_ وداعة السفينة شفت عيونه عليها ومبين ضاج لان ضلت مطيته گفاها

غمد : شفت شفت ،خايبة مصدومة انا ،من شوكت يحبها

رفعت اچتافي وانا اگللها
_ كلنه چنه نضن هو يضوج منها ودوم يصيح بيها من تضحك بس اثاريها سالفته مليوصه

ضلينه انا وياها نحلل بالسالفة ،صاحتنة جدة مشينه يمها ،وتونه گاعدين سمعنا صوت ليث وشوي وطب بس ملامحه مگلوبة گلب ...

°كوكبة°

مديت ايدي حتى اخذ الخلخال منه وداعي ما يعرفني ولا بهاي الطريقة وياه اتلاگه وانا حالي يرثا له ،بس ما عبر عليه وسحب ايده
يسألني
_ منيلج هذا ؟

بلعت ريگي واحس الدنيا بعيني بدت تصير سودة مو سهل وحتى حجاية الخوية ما عبرت عليه
_ حاجيني ،منين جبتيه

على صوت صياحه الوادم كلها صارت تتلفت علينه والمره أم البسطية تهدي بيه
_على كيفك خالة استهدي بالرحمن خرعت البت

باوع بعيوني وباله ابد ما چان يمها، نزلت رأسي مستسلمه من گالي
_ وخري اللثام كواكب

طاحن دموعي من عيني للگاع جراني بساع من ايدي وطلع من السوگ وبس صرنه بعيدين عن العين بأيده وخر طرف شالي المتلثمه بيه وبساع عگد حاجبه وما سألته لان اعرف انصدم من وجهي الما شايفته بعيني ابد ...؟؟

رفعت ايدي اتملس بيها اكبر اثر اضن بيه قريب من حجابي ،بوكتها ذاك الانسان الچنت دوم اشوفنه گبالي دوم مسيطر على معالم وجهه لو شما صار بس هل مرة عيونه بيهن لمعت الدموع دار وجهه يضغط على عيونه وكل هل وكت مابينه احد حجه، النفس هذا وبهاي الوگفه من اجره احسن بيه يكسرني اكثر من كسرته بشوفتي هسة ،وبعد ما استقر سألني ب غصة
ليث : مرتضى هيج سوه وياج ؟؟

هزيت رأسي ب أي ،بركان وصرت احسه يمشي مو انسان من رد حاجاني علمود اهلي وگلتله أخوي سد الباب بوجهي
ليث : احترگت لشةةة العارية الينعدوون بس بالاسم زلممم

اباوعله يفور لو طاح بايده مرتضى هسة ما يخلي بيه عظم صاحي، وصلت مرحلة ما اريدن شي بعد من الدنيا وتوني مشيت مخليته وراي صاح بصوت عالي مصدوم
ليث : ويين وييين

ردت اباوعله متفاچئ من تصرفي
_ ما اعرف

ليث : "تعاي وياي وياي وافتحلج ابواب ديرتي كلها"

من ردت اردن عليه الرچفة البصوتي ما خلتني اشرلي على السيارة ولان ما عدي مكان والشارع واهلي شي اصعب من شي خليت ومشيت وياه الدرب كله هو
ساكت وانا هم گضيتها اباوع للشارع واتذكر من چنت انهزم بس حتى احظر المجلس ومن وصلنه ونزل ترددت هواي أنا كلش زين اعارف هذولي الوادم شني وراح يحتووني احسن من اهلي بس تضل الفشله مستوطنه روحي

نزلت من گالي انزل ،اشرلي حتى نطب ،دمعت عيوني مستحية، جر نفس طويل من الچگاره الابد ما نزلت من ايده وگالي بصوت بيه الهم حسيت بيه

ليث : كواكب لا تشلعين گلبي طبي ،انا وياج ما اهدج

شجعت روحي مو مره ،مرات الا گدرت امشي وراه أول ما
طبينا وصاح على امه ومن ما اجت گالي امشي وراه چان مغطي بطوله علي محد انتيه علي بالاول سألوه شكو و وخر من گدامي كلها ضلت تباوعلي بأستغراب

سألته وهي تأشر علي
غضة : مني هاي خايب ؟؟

اندار باوعلي ورد جاوبهم
ليث : كوكبة بت ضاري تعارفوها أنتم

نشغت وطفرت من مكانها
غاية : هاي شصاير بيج

ليث : مو وكتها غاية

اجت يمي كضت ايدي ساكته ومركزة بكلامه بلايه ما يحجيلهم الصايرلي الاثگل عليه مني بس وصاهم علي وطلع مستعجل ،حضنتني غاية حضن محتاجتها چنت ،ذبيت ثگلي عليها وبچيت وكل العيون چانت علينه تانوني اهده الا گالتلي
غضة : تعاي بحداي واحجيلي شني الصاير وياج

كعدت مدنگه رأسي وبعديت احجي الصار مابيه لا حرف زايد ولا ناقص و وي كل حجاية چنت اگولها يتحسبن على مرتضى نوبة وعلى اهلي واهله مناه لمن گالتلي
غضة : تضلين هنا معززه حالج من حال بنياتنة .

طول الوكت چانت غاية بصفي تمسد على ايدي تحاول تخليني احس بالامان المبين بوجهي شگد اما فاقدته
غاية : گومي اطيج هدوم بدلي

گمت وياها وشعور الغرابة والمستحى ما ينوصف وانطبق علي ببيت غرب بديرة اهلي
بس طبينا للغرفة فتحت كنتورها تدور ،طلعت ثوب ازرگ اطتنياه
غاية : هذا ثوبي هناه ضال، تردين تسبحين ؟؟

هزيت رأسي ب أي ،اخذتني للحمام وگالت اتانيني بره خاف اريدن
شي وتوني طبيت جوه الماي ودگت الباب جايبتلي خاولي اخذتها منها وبساع بساع سبحت عمن حتى اخافت اغمض عيوني ،رديت انا وياها للغرفة اطتني مشط
اخذتها منها امشط وساكته وهي مگابلتني و گاعده من ملت من سكوتي گالت
غاية : شگد صارلج محبوسة عده ؟

_ هواااي

غاية : من مات ابنج مو ؟

هزيت رأسي ب أي ،گامت اطتني مخده وگالتلي ارتاح عمن شافت ماجاي اگدر احجي، غمضت عيوني بأمان ما حاسه بيه صار هواي ،شعور مستفقدته صار هواي غفيت وگعدت العصر اسمع صوت هوسة بره بس ما طلعت ...

فتحت الباب وطبت سدته وراها
غاية : ما جعتي ؟

_ من امس ما ماكله شي

غاية : چنج على اكل

صحت وراها بصوت ناصي من رادت تطلع ،اندارت علي
غاية : گولي

بأرتباك گلتلها
_ اهلج عارفوا بي من هنا ؟

غاية : قصدج جدي والباقين ؟

هزيت رأسي ب أي
غاية : حجالهم ليث ولا تخافين واگفين وياج وما يخلوج وابوي تحلف يطلع حگج من مرتضى عمن يعارفونه شني

جريت نفس وابتسمت براحة، هذولي الغرب يا اهلي هواي احسن من عدكم، أنتم تحسبوهم اعداء الكم و هم راح يحموني من معاشرة انسان مريض على كل مكان بروحي چان اله آثر صعب نسيانه، شوي و طبت حطت صينيه گبالي چانت مرگ دجاج حمرة و تمن ولبن وخضره وطرشي وگرصة خبز ،ما چنت احسن بروحي جوعانة الا بعد ما فرغت الصينيه كلها

غاية : سودة علي

رفعت راسي اباوعلها حاطة ايدها على خدها، نزلت الخاشوگة من ايدي
_ اعذريني جوعانة ونسيتج هنا

غاية : حگج الله أعلم صار چم يوم على لحم بطنج

أبتسمت بقهر وباوعت للمواعين الفارغة
_ اسبوع اذا الله لا يچذبني اقوى اكله عدنه شوربة

غاية : حسبي الله ونعم الوكيل ،عساه بمرض كون لا طاب منه

_ ما يصيبه شي

غاية : هو العار يصير حيله حيل صل

محترگ گلبها مفرفحة حتى خالتي حجت عليها وانا ابد ما گتلها لا ،من اقرب الناس الي عشت الخذلان ب كلشي رضيت وكلشي عن حده زاد العذاب الشفته ما اضن بيوم من الايام راح انساه

البنات اجن گعدن يمي شوي ،وگضه اليوم وانا ما طالعة من الغرفة ومن حاولت انام ما گدرت عمن الليل وهوسة افكاري بيه وصعب لو غمضت عيني من غير الخنگه
التصير عدي واضلن حايره وين اطلع واتنفس وانا محبوسة ب الغرفة ،بس هل مره گمت وطلعت من اختنگت
انا بمكان ما مقيد حريتي هسة ولا راح اتحسر على شمة الهوا

°غاية°

گاعدة ابدل ل كواكب ودگ موبايلي گلت العزيز يجيبه الي ،اطانياه
عزيز : هذا ليث .

بساع كملت كواكب واطيتها الابوها و وگفت اريدن ادگ هليه
عزيز : باعتنه امج شوفي بس دگ عليها خالج الحباب

باوعتله رافعتله حاجبي أاشر عليهم
_ على الاساس مقصره وياك أنت وبتك ،هم أخوي وحگه علي

عزيز : أي يابة ،أي صدگ

يگلي أي وصدگ ومن يشوفني يمه يغار وهيج گاضيتها وياهم ،رديت خابرته وگبل لا اگولن الو گالي
ليث : مختنگ غاية تعاليلي

_ هسة جايتك

سديته ومشيت للكنتور طلعت عباتي مخبوصة صوته مو طبيعي چان ،عزيز يباوع علي مستغرب

عزيز : وين ؟

سديت باب الكنتور وانا احطن العباة على راسي گلتله
_ ليث اعارف شبيه ،وصلني

گام نزل گبلي وانا وراه،ريحانة چانت گاعدة بالمطبخ توكل بعون بأستغراب من طلعتنه ب هل وكت گالت
ريحانة : وين ماشين ؟

_ من اجي احجيلج.

وصلني عد الباب وگلتله يرد هو وكواكب، وبس طبيت شفته چان گاعد على دچة الديوان ،رفع رأسه يباوعلي من گلت اسمه ،بس وصلت عده سألته

_ خيرك خوية ،شبيك ؟

رفع عيونه ،نشغت من شفت لونهن شلون خابط
_ ضغطك صاااعد

تنهد وهز رأسه ب أي
ليث : راسي راح يطگ

بعتب گلتله
_ ليش هيج خوية ليش ،ما تخاف على شبابك

ليث : يا شباب هذا وانا ما ضل عدي حيل بعد من ساعة الشفت الصاير بحالها

گعدت اباوع لگطوف الچگاير التارسة الگاع ،علگ وحده جديده عيونها موجهن للفراغ، نبرته انا خفت منها من گال
ليث : وحگ كل ذيج الايام الحسابهن وهي ماكو الا اطلعهن من عينه وحده وحده وما انعد على الزلم اذا ما جبته من جوه الگاع

بخوف سألته
_ شتسوي ليث ؟؟

وگف وداس گطف الچگارة بعدما شمرها للگاع وندار علي رفع ايده
ليث : اذا ما بأيدي كسرت ايده الاذتها ما راح ارتاح

_وين تحصله

كوكبة : غاية

گمت على حيلي وهو عيونه تعلگت عدها ،مشتيلها وانا لو شكد ما اگول جان التعب وأثر العاشته مبين عليها ما راح اوافي حگ ولو أثر من الآثار التارسة وجها ،كضيت ايدها اسألها
_ شعجب گاعدة لهسه ؟؟

باوعت بعيوني بعدما چانت مدنگه
كوكبة : مختنگة اريدن اشتم هوا

اجه وگف بصفي
ليث : اخذج للشط ؟

هزت رأسها ب لا ،طبگ حواجبه ما متوقعها ترفض
ليث : جا مو تحبين تمشين هناك ؟

مالت رأسها وعيونها لمعت بالدموع
كوكبة : غيروا كلشي بي .

تراجع چم خطوة ليوره وشگد ما چان حاقد على الچان السبب بحالها هذا زاد حقده وما تحمل يضل عيوني ضلت وراه معلگه وبس طلع وطبگ الباب گعدت وگتلها تجي تگعد يمي ،حاولت اسولف وياها بس چانت روحها طافية وعلى گد السؤال تجاوبني بلايه روح
_ گومي نامي مبين نعستي

هزت رأسها بأي ودارت مطيتني ضهرها تطب جوه حسيت بس رادت تشرد من اسألتي ،هواي تغيرت فلا چن ذيج الما چانت تسكت وحتى على روحها تضحك

توني فتحت الباب اريدن اطلع وشفته واگف ،اندار يسألني
ليث : نامت ؟

سديت الباب وطلعت احاجيه
_ أي ،توصلني ؟

ليث : امشي

مشى گبلي وبس طبيت رد توني صعدت واسمع صوت بجيها استعجلت للغرفة وبس فتحت الباب شفته شايلها ويفتر من شافني بساع اطانياها گبل حتى لا انزع عباتي

عزيز : شوفي شبيها

_ شبيج كواكب ماما ،حبيبتي كوكبة

عزيز : شو سكتت

_ اضن چانت تبچي علي

هز ايده ومشى تمدد
عزيز : جا مو صارلي ساعة شايلها لو هي حظوظ

أبتسمت وحطيتها على الچرباية بين ما نزعت عباتي رديت شلتها
_ كل الجهال بعمرها يردون امهم

مزغر عيونه ضايج ،أبتسم من گلتله بمداهر اريدنه يفك هل عگده
_ شني هسة ضجت لان بچت عدك ؟

عزيز : جا انا هم ابوها شني ما تسكت عدي

_ بعدها زغيرة شوفها من تكبر تصير لزگه

أبتسم بساع تغير مزاجه اطيتياه وهم زين ما ناصت بين
ما بدلت هدومي ورديت لگيته حاطها على الچرباية يلعبها
وبس گعدت يمه سألني ،متأكد من الجواب بس يرد يشوفني احجي لو لا

عزيز : احس اخوج وحرگة دمه على هل بت اللگاها مو خاليه عمن ما چانت طبيعية

_ شلون يعني مو طبيعية ؟؟

عزيز : أنت گاعدة چنتي وشفتيه شلون يتحلف ب مرتضى والشغلة عده مبينه ابد مو بس شغلة ثار وياه

_ اممم

بشك كمل كلامه
عزيز : هي القصدها جعفر من گال ليث عاشگ وخله جدي يبطل يطيه بركة

بللت طرف شفتي وهو مركز وياي ،عزيز لو راد يعارف شي يخلي الگدامه يسولفهن وهو الممنون
_ أي

أبتسم ودنگ لكواكب
عزيز : شفتي بوية انا گلت اسمج بيه أن ،اثاريه على اسم الحبيبة

شماها من رگبتها وطانياها من بچت
_ تبجيها وبعدين تبرره منها، ليش هيج عزيز

تمدد حاط ايده على عيونه مبتسم ،كمت سويتلها ممه وگعدت افكر شراح يصير وشني تالية كوكبة

لو أخوي ؟؟

اخوي الاضن هذا اصعب يوم چان عليه ،گمت حطيت كواكب بكاروكها ونمت
تعبان عقلي من التفكير و ثاني يوم الصبحية وسمعت صوت صياح جاي من بيت جدي حطيت
ايدي على گلبي وطلعت للحوش اسمع شكو و وراي چانت ريحانة

صخر : لك ويييين ماشي ،ليييث تخبلت أنت لووو شني

رأجس : امشيي وياه صخررر

ركضت لبست عباة عمة وطلعت و وي طلعتي شخط سيارته وما وراها غير بس العجاجة ضلت تنشاف

لحگه صخر و وراهم جعفر بسيارة أبوي ،صفگ ايد بايد اعصاب صاير
محمد : شوررري والنعال عدده ،گلت لا تمشي وخله الثااار ما يسمعليي ،الله اليستررر من الراح يفتعلوه

عبرتهم وطبيت وعد الباب سمعت صوت امي تلوم ما راضيه على سوايته وبس شافتني گالت
زهرة : تسودن اخوج يايمةةة ،اخذ تفگته ومشى وخاف هدنه شوي راااح يفكلنه بحر دمم جديددد

عطاء : هو هذا العشگ حلاته بالسوادين

زهرة : ديله يله باااعن هاي شلون تضوجنييي

مچتفة ايدها فلا مهتمة
عطاء : راح ازعل منج انا عطاء مو هاي

امي تدگ وتلطم وعمة تداهر بيها ،صحت ل جفون وبس اجت وكفت يمي سألتها
_ شكوو شصاير ،احجيلي راح اموتن

جفون : ليث وصاني اسأل كوكبة ب يا محافظة چانت وتورطت على روحي من گلتله تحلف الا يمشي يكتله

طگيت على. خدب
_ يااا ولج ليش گلتيله

جفون : انا غشيمه

تنهدت ومشيت اشوفن كوكبة ،سلمت على جدة چانت بالصالة وتوني اريدن امشي للغرفة وطلعت مبين سمعت صوتي من گالت وهي توجه الكلام
الي
كوكبة : شصاير ؟؟

_ ماكو شي لا تخافين

كوكبة : لا تچذبين علي

وگفت گبالها احاول ارسم ملامح طبيعية بعيد عن القلق التارس روحي على ليث
_ متعودين لا تخافين ،متريگة ؟

كوكبة : ما اگدر اكل

_ليش

اجت يمي تشتكي
نسمات : توسلت بيها ما ترضى تاكل شلعت گلبي بلكت تسمع كلامج

_ يا ليش ما تاكلين ؟

كوكبة : ما اگدر معدتي من أمس توجعني

_ حتى لو راح يصير الظهر

نسمات : راح اسويلها واجبريها تاكل

مشت نسمات للمطبخ وانا جبرتها تضل بالصالة
غضة : شبيج مستحية من عدنه مو گبل چنتي تجينه شارده

أبتسمت بس ابتسامه چانت هواي بيها سوالف ما حجتهن
غضة : أي يا حبوبة اضحكي عمن الدنيا ما تسوى

هزت رأسها ب أي وگالتلها
كوكبة : أن شاء الله

شوي واجت نسمات حطت الصينية و هددتها تزعل منها اذا ما تاكل ،وهذا اليگلك اليشوف مصيبة غيره تهون عليه
مصيبته ،أكلتها چم لگمه وگالت ما تگدر بعد ،شلت الصينية ومشيت للمطبخ گاعدت جانن خالة ناهدة وعمة عطاء وعمة نجوى يم امي الضاله عيونها للباب طب جدي وراه أبوي الموبايله بايده وروحه صايرة بخشمه

حط الموبايل على اذنه ونتر بصياح
محمد : وين صرررت ما تجاااوب مو جاي اخابر ،لحگتووه ؟؟

سكت شوي وكلنه وياه مركزي ،ضل يستمع للطرف الثاني وعارفته صخر من گاله
محمد : باوع صخررر اخوك وراه ضل لا تخليه من رأسه يتصرف، جيبه ورد ،خوش خوش

سداه وباوع لجدي
محمد : حفيدك على هاي سوايته حتى السيارة الا اخذها منه

رأجس : وشني بكيفك ؟

من ما حصل رد من أبوي طب جوه، ومن سألته امي وين هسة هم گاللها
محمد : راح يردون

جوابها جواب مختصر وطلع هنا الا گدرنه نجر نفس عكس اخوي الچنت بيها أول مره اشوفنه هيج متخبل طب يسب ويغلط وبس حاجاه جعفر حتى يخفف من عصبيته ،دار عليه خازره وبس صار قريب عليه فلش وجهه ببوكس خلانه كلنه نتاطفر وحتى صخر انصدم بسوايته الما چان حتى جعفر متوقعها

ليث : افلشك ببداله ،لك اررريدن اطفي نااار گلبيي بيه ،غدرتنييي وخليته يردنييي

يطگ على صدره محترگ حرگ ،كض ايده صخر يحجي وياه بصوت ناصي وهو مفرفح حتى على صخر صيح
ليث : وخرر مني وخرررر ،ضنيتك اكثر واحد يحس بي

طگاه يريده يوعه على روحه بس بعديش اضن كل الموجودين توضحتلهم سالفته، فلا اهتم وجر روحه من
صخر واجه وگف گبالي بعيونه يگلي وينها همستله

_ جوه

طب وانا وراه خايفة لا يمشيلها ويفضحنة اكثر بس هم زين من صعد فوگ ،انتبهت لباب الغرفة مفتوح شوي ومن الفتحه الزغيرة تباوع ردت طبگته وطبت تنهدت ادعي الله يجمهم ولو احسنها اشبه بالمستحيل وگفت بصفي مقهوره بصوت ناصي على حالهم گالت
نسمات : شگد خطية

_ كل واحد بيهم تعب اكثر من الثاني واضن أخوي الصبر فاض عده

نسمات : حگه

بنفس الوكت اجاني صوت عمة من المطبخ تصيحني
نجوى : غايةة عمة تمشين

گتلها أي وتونه طبينه للبيت وصارت گدامنه هيوفة تريد تطلع
نجوى : وين ماشية ؟

هيوفة : الحگچن عمن ريحانة الي ساعة اسألها شكو وشصاير وهسة الا حجتلي

نجوى : طبي عمة انحلت

هيوفة : شلون ؟

نجوى : رد اخوج ،جابوه صخر وجعفر

تنهدت تردد الحمد وانا گبلهن طبيت
ريحانة : نعمة من تذكرتن تجن أنت وعمتج ،چان فرد نوبه اخذتن غفوه

_ اممم

ريحانة : شني ما عاجبج عيني ؟

_ عاجبني

ريحانة : عبالي

اخذت منها كواكب الگاعده وخابصه الدنيا بالبجي وبالليل چنت گاعدة بالحوش انا وعزيز بعدما الكل ناموا واندگ باب بيتنه ،گام عزيز يشوف منو وانا گمت من سمعت صوت ليث وخر عزيز يسويله درب يطب ويگله وهو يأشر علي
عزيز : هاي اختك أم كواكب

من سكوته عارفت بيه مختنگ تقربت عليه وهمست لعزيز الجان واگف بصفه
_ خلينه وحدنه شوي عزيز

ما حجه وخله وطب جوه بحجة يشوف كواكب گاعده حتى يجيبها، كضيت ايده وبس گعدنه گلتله
_ شبيك خوية ؟

ليث : محترگ اخوج

_ احجيلي

ليث : هو انا جاي احجيلج عمن ما اعارف احجي لغيرج

تمدد على حاط رأسه على رچلي يباوع للگمرية ،رفعت ايدي افرك گصته عمن حسيت متوجع
ليث : اروحن فدوة الايدج

_ اسم الله، يوجعك راسك مو ؟

ليث : مو جديد وجعه

تنهد وأول حجايات گالهن
ليث : كل ما جاي المحها اموتن ،انا الاتحسر على شوفة خيالها غيري صارلها زلمة وهو الوصلها ل مرحله سوتها انسانه ثانية

_ ترد مثل الاول بس حل سالفتها وي اهلها

ليث : العارفته حسن الطاردها وگبل شوي مشيت سألت على سعد واسماعيل اخوانها طلعوا ثنيناتهم عازلين بغير بيوت

_ وانا اگولن هل هذا النذل هيج سوه وياها عمن ما خايف من احد

ليث : ضال بس اندل مكانهم وبس أامن عليها الي اذا ما حفرت الگاع وطلعته شواربي مو علي

ما اعارف ليش بوكتها اجاني احساس خلاني اخافن من كل الگاله وحسيته مو بس حجي عادي
_ شرايد تسوي ؟

ليث : لكل حادث حديث

گعد على حيله وحتى يغير الموضوع بأس ايدي يگلي
ليث : اروحن فدوة موش اصابع اليگول بيهن سحر

_ ليث شناوي ؟

نزل ايدي ورفع شعره
ليث : ما ناوي شي

_ اخوي وكلش زين اعارفك

ليث : جوعان

_ تريد تغير السالفة

ليث : سويلي اكل واحجيلج

وانا مثل الفطيره گمت بساع حطيت قوري الجاي على النار وطلعت طماطه اثرمها حتى اسويله مخلمه واجه يمي
عزيز : المن ؟

_ ل ليث بره

عزيز : حسبي حسابي وياه

اشرت على عيوني
_ تدلل

باسني من راسي وطلع شايل كواكب ،وبس گضيت وطلعت شايلة الصينية گام اخذها مني عزيز وگعدوا يأكلون ويحجون باوضاع الزرع والدواچن ومرعى الغنهم
ليث : اليوم خابرني أبو شاكر نس العمال مبطلين عمنهم يخافون

عزيز : وينه جعفر يجي يشوف الوادم شلون خايفة

ليث : تريد الصدگ السالفة ما تطب بالعقل

عزيز : يمعود صدگ غير متسجله بالالف اصابة عدنه

كمت حميتلهم الجاي ورديت صبيتلهم ومن شفت سوالفهم تطول اخذت كواكب وصعدت بدلت هدومها ونومتها وتوني بدلت ثوبي بشي خفيف وطب عزيز

تمددت اباوعله حط موبايله على الشحن واجه تمدد بصفي
عزيز : ما بينه احد وصل سوادين ليث بالعشگ ،هذا لو صارت اله اضن راح ينجلط من الفرحة

درت عليه بقهر گلتله
_ بعدها على ذمة رچلها

رفعني على صدره وخلاني اتفائل وياه من گل
عزيز : ما تعارفين شني يصير والله يردها الاخوج

بس أخوي ما سكت عن حگها وبيوم الصدر أمر القاء القبض بحگ مرتضى گدام الضابط كاتله وشايلينه هو وياه للمركز طب صخر ببدلته العسكرية يصيح شلون أبوي يخليه يمشي وياهم

محمد : گلتله لا تمشي وحذرته عاندني ومشى

رأجس : هو شبيه متسودن هلگد

سؤاله الشك بيه چان مبين بس لا أبوي ولا صخر جاوبوه ،طلع موبايله يتحلف بليث لو طاح بايده الا يكسره على سوايته
صخر : هااا عزيز ،ضل ضل جايك انا ،گله اليمك اذا ما شربت من دمه اطلع ناقصص

الوكت كله گضيناه قلق بقلق بس الهبطة الاكلتها من الصباحيات كافي علي من خابر ليث لعزيز يگله هو بالمركز شالوه وي مرتضى ،امي سكرها صعد ركضت جفون جابتلها دواها وگلاص ماي شربت وهي تردد

زهرة : يايمة يا ليث ليش هيج ،شجاك يايمة وانا اگولن عليك عاقل

طبت ريحانة سلمت واطتني كواكب گاعدة ،حتى بتي نسيتها واجيت اركض ،جدي ضل كلساع يخابر عليهم أبوي مشى وراهم ومناه لمن طبوا حيل ما ضل عدنه ،أخير واحد طب ليث گامتله امي مقهوره منه
زهرة : سوايه هاي تسويهااا ،ما حطيتنه بين عيونك لو موش مهمين عدك ولا تحسب النه حساب

بلايه ما يرد خله وصعد فوگ من صاح جدي وراه أبوي گاله يخليه
محمد : لا تحاجوه هسة خلوه عمن طابگات عده كلش

نزع بسطاله وگعد على الدرج يغير السالفة من ليث ل مرتضى
صخر : سألت على الخسيس طلع لاگين ببيته ممنوعات وچن هل مره راح بيها

غضة : عساه بالاعدام على الظيم المشوفه لهاي البت المسكينه

خليتهم يحجون وصعدت فوگ اشوفنه، بس دگيت باب غرفته گال
ليث : طبي

فتحت الباب وطبيت اباوعله واگف يم الشباج يدخن والغرفة صايرة عبارة عن دخان ،حركت ايدي مختنگة

_ شني السالفة ما مليت من الچگاير


#خِلخال_مُشوه🪞
#بــارت__62ج2
#بقلم_الكاتبة_زُمرده

اندار علي هز رأسه ب لا
ليث : لو ما هي چان متت من زمان

_ اسم الله ليش هيج تگول

تنهد وطفه الچگارة بالنفاضة من انتبه علي ما جاي اگدر اتنفس ،كعد على الجرباية كعدت گباله بالگاع
_ كافي تهز رچلك ،شجاك مو چنت تتخبل من هل سالفة ؟

تنهد
ليث : كلشي تغير وما ضل شي يشبه گبل، حتى انا صرت احسن روحي انسان ثاني

_ وين انسان ثاني مو هذا أنت ليوثي

أبتسمت وياه من أبتسم
_ أي هيج حلو ما تلوگلك الضوجة

حجي هواي حسيت يريد يحجيه بس ما يعارف شلون ،تمدد يوصيني
ليث : گعديني فد ساعتين اريدن امشي ادور على بيت سعد

_ صار

طفيت الضوه ونزلت وبس شافتني امي سألت شلونه
_ زين وصاني اگعده بعد ساعتين

زهرة : شعده ؟

_ يريد يمشي يدور على بيت سعد اخوها

زهرة : يريد يردها الاهلها ؟

_ اضن هيج ،راح امشي انا وب الوحده صعدي عمة عطاء تگعده

زهرة : خوش

صحت لريحانة وطلعنه انا وياها عد الباب ولاگينه نوح توه جاي من المستشفى بس گلناله الله يساعدك گال
نوح : أي والله ،الله يساعدني عمن ما لگيت غير زمن كورونا اتعين بيه

ريحانة : ليش هم يمكم ؟

هز ايده
نوح : جا وحد غير مستشفى وچماله حكومية

ريحانة : يااا جا دير بالك على روحك

نوح : يطگني الوباء يطگني عمني بنصه

_ جا خلي الدوام يولي

نوح : عفية حليتيها

يحجي مستهزء طگيته على ايده
_مو صوجك

نوح : صوجج أنت الخايفة علي
مو ؟

_ أي

عزيز : ها شعدكم ؟

صاح علينه واگف الباب ،مشيتله ونوح وراي يگله
نوح : شدخلك انا واختي

عزيز : مو اجيك

نوح : تعال تعال

وعزيز صدگ بساع هم يريد يمشيله وگفت بطريقه
_ وين وين ؟

عزيز : وخري، هذا يتحداني

درت على نوح اشرتله بعيوني يطب وهو ولا چنه معاند و واگف بس من صار عزيز قريب عليه شرد صاح عليه
عزيز : هااا شو شردت ،اطلعع لك

ما جاوبه وهم زين لان لو حاجي حجاية وحدة يطبله
جوه ولا بعينه ولا بحاجبه ،گبلنه مشت ريحانة وانا وياه لحگناها بس توه طب ورد طلع من دگ موبايله گال أبوي خابره ، تلگتني عمة مبين حاجيلهم عزيز تسأل شراح نسوي بعد بسالفة كوكبة وضلتها ببييت جدي كتلها راح يدورون على اخوها الچبير

نجوى : يعني هذا اخوها زين ؟

_ أي ،احسن من امها وابوها

نجوى : الحمدلله ،والله تكسر الخاطر هل بت ،كل ما اباوع بوجها ينمرد گلبي

تنهدت و باوعت ل آدم وآدريس اسأل
_ جا هيوفة وين ؟

نجوى : كتلها تصعد تنام عمن گاعدة من صبح ،ريحانة شوفي الجدوره

رديت سألتها
_ ودرة وصگر جا وين ؟

نجوى : صعدتهم تنومهم عمنهم وياها گاعدين

نزعت عباتي وگعدت حطيت كواكب يمهم على الفراش
_ خطية هواي جاي تتعب

نجوى : أي والله ،حتى رادت تجي وراچن ما خليتها

ريحانة : يمةة

مدت رأسها من المطبخ
ريحانة : المرگة استوت اطفيها ؟

نجوى : شوفي ثخنها اذا زين طافيها

ريحانة : خوش

طب ضيرم سلم وگعد يم الجهال ،شال كواكب يلعبها عمنها اللوتيه تضحكله، جعص خدودها مكزكز عليها
صخر : شلون خديدااات هذنيي، بويةةة كون اتغده بيهن

باسها منهن ورد حطاها على الگاع وگام صعد فوگ وشوي ونزل مبدل هدومه گال ل ريحانة تصبله غده طب عزيز گابله يأكلون ويحجيله على الصار ،گبل لا يگوم گاله
ضيرم : انا شاك بشي

عزيز : انا متأكد

°جفون°

طلعت من شفته طب ،أبتسم واجه وگف گبالي
نوح : بوية اذا مو احلى ملگه

_ الله يساعدك

نوح : ويساعدج يابعد سفينتي

غطيت حلگي اضحك ،شمرلي بوسة من بعيد وطبينا انا وياه بس شافتنة گالت
ناهدة : شكد حلوين الله يحفظكم

نوح : كثريلنه من هيج دعاء خالتي

اشرت على عيونها ،وصاني اصبله غده وطب جوه واسمعه يسأل شكو شبيها الوجوه مگلبه، حجوله مختصر وهو گضاهة يصنف ولا مهتم الموضوع ابد وماخذه من جانب ثاني ،صبيتله من الغده وصعدت وراه من صعد ،حطيت الصينية بالگاع بدل وگالي اگل وياه
_ بس ما تضل تتحارش

ضحك يهز رأسه ب أي وبس گضينه الغدا نزل الصينية گبلي بس شافتني وراه گالت تتحارش بي
عطاء : صار الاكل ويانه ما يعجب ،والله وكت

حركتلها حواجبي اتقصد استفزها وهي بساع ركضت وراي ،ضميت روحي ورا عمي محمد من طلع من غرفته، كضيت دشداشته حيل احتمي بيه واحجي

_ حاجي اختك عمييي

محمد : ليش وي بتييي عطاء

عطاء : تضوجنييي ،هدها محمد خلني اچفص ببطنها

محمد : تراها زغيرة

عطاء : تسعطعش سنةةة وين زغيررة

ضحك واندار علي
محمد : شو بعدني اشوفنها ذيج جفون الزغيرة الچانت وين ما امشي تركض وراي

أبتسمت وعمة تباوعلنه متنرفزه، اشرت عليها
_ اختك تغار مني

رد يباوعلها بالكوات ضام ابتسامته
محمد : صدگ تغارين ؟

عطاء : يااااع اغار من هل فصمة هاي

محمد : احلفي

عطاء : وداعة أبو جسار

محمد : صدگتج ،لخاطري هل مرة طيحيلها خطية تنكتل وهي بعدها عروس

عطاء : لخاطرك بس هل مرة

باسها من راسها ومشى ،وحتى استر على روحي ما رديت حاجيتها وشوي وعمة گالتلي اصعد اگعد ليث

بس دگيت الباب اجاني صوته
ليث : گاعد

نزلت وشوي ونزل يريد يطلع متحظر ،مبين عليه ما نايم چان
لان گضاها كلساع وغمض عيونه بوجع وهو يحجي وي
عمي، طلعت اكنس بالحوش ونوح اجه يمي وبس شاف غمد طلعت من
المشتمل سألها على علي گالتله جوه مشى يصيحه وهي اجت يمي

بمداهر گلتلها
_ لو نحترگ ما تطلعون خانسين خنسة ماكو هيج معقولة ما سمعتوا صوت

غمد : لا والله ،عمن سهرنه امس

_اممم سهرات وكذا

ردت بخباثة تسألني تريد تحرچني مثل ما حرچتها
غمد : چا أنتم ما تسهرون ؟

_ نسهر بس مو مثلكم

غمد : يجوز لان رجلج عده دوام

_ اي

غمد : اكلج الحوش يرادله غسل

_ تساعديني ؟

غمد : جا شعدي

توني مديت الصونده ولگفتنه عمة خلتني اردن اللمها عمن تگول بعدنه عرسان وما يصلح التنظيف وثاني يوم گعدني نوح راح ينشرون النتائج ،شگد چنت متأكده من روحي واجوبتي بچيت من الخوف وبس نزلن وگال هذا اسمي حسيت الدنيا افترت بي گعدت واسمه يرد درجاتي

ومن وصل يم المعدل نشغت ما مصدگه ،باسني من رأسي يضحك
نوح : بعد اسميج دكتورتي لو شحمتي

ضحكت امسح بدموعي واگله
_ شحمتي احلى

نوح : هاي هي

اخذت الموبايل منه اباوع لكل درجة حرمت روحي حتى من جهاز عرسي علمودها، كلهن اجن بتعب هواي نوبات چنت انام بنص الكتب وفترة المراجعة حسيت عقلي راح افقده ،بس هسة كلشي مو بعيني غير المعدل هذا الچنت اتمناه

_99.86

نوح : بعد درجة الدور الأول ،يعني طبية

هزيت رأسي ب أي وحضنته ،رفع ايده ايده يحضني ويحجي
نوح : شفتي شلون تأجيل الامتحانات فادج ،عمن ضبطتي الماده

وخرت منه وهزيت رأسي ب أي ،ولهناك واندگ الباب وصوت ليث يحجي
ليث : نووح نشروا النتائج

گام طلع يمه وانا بدلت هدومي بثوب مستور وحطيت حجابي على راسي وطلعت بس شافني ابتسم يذكرني
ليث : مو گلتلج تصيرين دكتورة

_ ما مصدگة والله

ليث : حگج ،اطلبي شتردين هدية

نوح : دراجة جديدة

ليث : ليش أنت النجحت ؟

نوح : انا وياها واحد ،مو هيج جفون ؟

هزيت رأسي ب لا وليث شكد جان مبين التعب على ملامحه بس ضحك متشمت
نوح : ايا نذله

_ نذله لو بطانية

نوح : ما تضحك

حركت چتفي وميلت راسي ما مهتمة وباوعت ل ليث
_اريدن ايڤون

نوح : الاستغلال صورة وصوت

ليث : ما عليك بيها
دار عيونه من نوح علي
ليث : تدللين

نوح : جا انا هم اطلبك هدية نجاحي

ليث : توضفت ،جيب الايفون من فلوسك

كل واحد واعدني بهدية شكل والعصر اجتنه حواري بس شافتني گالت
حواري : مو تتبدلين علي لان صرتي دكتورة

ضحكت اهزن رأسي ب لا ،باركتلي ودارت على عمة من سألتها شوكت تمتحن دور ثاني
حواري : بعد مو هسة ،بس كون ما ينزل معدلي جوه التسعين

زهرة : تفائلي وان شاء الله خير

حواري : أن شاء الله

عطاء : جا شو وحدج جهالج وين ؟

اشرت بايدها
حواري : برا يسلمون على دجاجات جفون

بس كالت هيج عطت وركضت وبس شافوني تطافروا حتى ميمنة الحبابة چانت وياهم ،سديت باب الگن احجي عليهم
_ الله وأكبر بالينيي بلوووه مايصير هيييج ،انا الك سييف

بس امنت عليهن بخير رديت، تخصرت گبالها
_ ترا مايصير هييج مخرعيهنن

حواري : ليش هن همين يخترعن ؟

_ جا اذا جهالج هاجمين عليهن شمتانيات ما يتخرعن

حواري : ضالمتهم أنت

_ ضالمه جهالج ؟؟

هزت رأسها ب أي ،عدلت وگفتي
_ والله ماكو غير جهالج الظالمين حيواناتي حاطين دوبهم من دوبهن

حواري : مگرودين

ضلينه انا وياها نتناگر وبالليل چان عمي وجدي و جدة گاعدين ويمهم عمي كاظم
ليث : السلام عليكم

صعدت بساعة حطيت علاكة الحلويات بالغرفة جابها الي نوح ونزلت ما اريدن شي يفتوني من سمعته گبل لا اصعد گاللهم
ليث : عدي حجي وياكم وطلب منك بوية ماكو غيرك يسويه

رأجس : خير ؟

ليث : كل خير جدي

كعدت بمكاني على الدرج استمع
ليث : سالت جوارين اهلها على سعد وعارفت بيه شايل بمنطقة ***** ،اريدك بوية بأيدك توديها واخذ وياك واحد من الولد ،احجوله عن كل الصاير ييها و وين لگيتها

باستغراب گاله
محمد : جا ليش ما تمشي وياي أنت ؟

ليث : تعبان بوية وما نايم ،اخذها أنت وكله عينه عليها

رأجس : شني قصتك وياها، ليش هلگد مهتم بيه أنت ؟

ليث : ماكو قصة جدي بس لان البت انا جبتها و حمايتها واجبي صارت

ابد ما اقتنع بالگاله بس عبرها اله ،گالي عمي امشي اكلها تتحظر بس لكيتها حتى حجابها لابسته ومبين سمعت
_ راح تمشين لبيت اخوج

هزت رأسها ب أي وبخجل گالت
كوكبة : عباتي مشككه وزحمه اطلع بيها ،اريدن عباة

_ تدللين هسة اشوفلج من عمة زهرة عمنج نفس طولها

حاجيت عمة اطتني عباة الها ورديت لبستها وسألتني
كوكبة : شوكت نمشي ؟

_ هسة بس عمي يبدل وخابر على عزيز يمشي وياه

ضلت تفتر بالغرفة وبس صاحوا يله طلعنه انا وياها ودعناها ومشت، ما اعارف ليش بوكتها رفعت راسي ومثل ما توقعت ليث فاتح شباچ غرفته چگارته بايده عيونه وراها ...

°كوكبة°

الدرب ما يگضي بس اريدن اشمر روحي بحضنه واشيكيله ضيم الايام العشتهن يم مرتضى طبگوا السيارة گبال بيت زغير بس جديد وگالولي انزل رچليه
احسن بيهن ثگال ،دگوا الباب مره وبالثانية انفتح وشفته گبال
عيني ،بأستغراب باوع ل ابو صخر وعزيز الواگفين گبالي
محمد : تخلينه واگفين بالباب لو تستقبلنه احنه و اختك

عگد حاجبه من أخر حجاية وخرت اوجهه، فك عيونه مصدوم وطلع بساع يسأل بيهم ما مصدگ شوفتي
سعد : وين ،وين چانت ؟؟

محمد : خلنه نطب ونحجيلك

سوالهم درب وراهم انا طبيت وبس گعدوا گاللهم
سعد : احجولي شجابها عليكم وانا عجزت الگاها

بده يحجيله ابو صخر وهو كل حجاية چان يشتعل بالزايد ومبين عليه شكد سالفتي متعبته من گال

سعد : انا حتى بلاغ بأسمها مقدم، ما خليت مكان بالمحافظة ما دورته بيها

محمد : مو بيها جانوا ولوما شارده منه چان ضليت اخبار اختك لهذا اليوم مجهوله

چنت گاعده بصفه اندار علي والقهر بعيونه ينشاف و وصلني ،گالي اگوم اطب جوه يم سكينة ،بس فتحت باب الاستقبال الداخلي صارت بوجهي
وشكد ما چنت تعبانة أبتسمت من شفت شايله جاهل يطلع عمره ثلاث اشهر لو اقل ،اجت بساع حضنتني وانا كل بالي
عد البيدها بس وخرت سألتها وجوابها خلاني انسى تعبي كله

_ ابنج هذا ؟

هزت رأسها ب اي
سكينة : هاشم هذا ،طلبته من أبو فاضل

دموعي طاحن اخذتها منها اباوع بوجهه ما مصدگة الله جبر خاطرها
سكينة : تمنيتج وياي ساعة الچبت

رديت حضنتها حايره شلون اعبر على فرحتي شوفة هاشم بحضنها خلتني انسى نص تعبي اذا مو كله كضت ايدي
وخلتني اكعد على الكرسي مال ميز الطعام وگابلتني بعدما اخذت هاشم

سكينة : سولفيلي شسووا بيج هذا النذل

اشرتلها على وجهي ،عضت شفتها بقهر وكالتلي احجي، جريت نفس وبديت احجيلها على بس
چم
يوم صعب شفتهن ومن طلعتلها الاثر الي برچلي بچت تدعي اليه

سكينة : الله ياخذه أن شاء الله

_ ادعي يخيس بالسجن وما ارد اشوفنه بعد

سكينة : انسجننن

_ أي ،عمن سالفته صارت سالفتين، لكوا شكو ممنوعات عده

حطت ايدها على گلبها فرحانة
سكينة : يمةةة الحمدلله ،الله يبشرررج بالخير

نزعت عباتي ورديت گعدت وبس مشوا طب سعد گمت على
حيلي من فتحلي ايده، تقدمت عليه وبس حضني بجيت وبين عيوني كل يوم بيه تأذيت وماكو احد يمي

لم وجهي بين ايدن يعتذر مني
سعد : اعذريني خوية ،اعذريني والله ما حصلت حتى اثرج ،من ساعة الاختفيتي وانا ما هاديلي بال بس عجزت

_ معذور خوية

باسني من راسي وسألني
سعد : ماكله ؟

_اي

سعد : جا ماشي للسواق اجيبلچن نواعم تاكلنها

وصته سكينه على جم حاجة ومن سألني انا هم شرايده كلتله
بكيفه ،ما چان الي نفس بشي وحتى هو انتبه علي عمن سمعته يوصي ب سكينة ويگلها تحاول تسولف وياي

°نسمات°

طلعت مصفي ابزل التمن عمن انا اليوم طبخت خالة فرد نوب سكرها صاعد ،توني علگت النار جوه الجدر الراح اهدر
بيه التمن وسمعت صوت وراي ،گبل لا اشوفه عرفت نبرة صوته
جعفر : السلام عليكم

درت عليه وبصوت خافت رديت السلام
جعفر : بلا زحمة اريدن ماي

_صار

ترستله الماي بدولكه واطيته ،اخذها مني شرب وحطاها على السنك يسأل
جعفر : ليث وين ؟

_ جوه

حمحم يريد يحجي بس متردد ومن شافني اباوعله گال
جعفر : أنت هيج قليلة كلام لو تستحين مني ؟

_ ليش استحي منك ؟

جعفر : سألتج ركزي

أبتسمت ابتسامه خفيفة
_ لا هاي طبيعتي

جعفر : نقطة حلوة

حجه هيج وگالي
جعفر : سويلي درب اطبن يم جدة

مشيت گبله ومن شفت ماكو غير جدة وعمة زهرة گاعدت رديت گلتله يطب وانا كملت الاكل ولان كلي ريحة بصل صارت عمن ركبت مركة دجاج كلت ابدل هدومي وبس بدلت رديت طلعت على صوت خالة تصيحني

زهرة : نسمات تعاي شوفي المرگه طلعت ريحتها

طلعت بساع اللبس بحجابي متوجهه للمطبخ وبس شفتها طفيت النار جواها وبس التموا اجت وياي جفون تصب
جفون : الدكتورة لازم ما تشتغل

رفعت الماعون الكرزاز اهددها
_ راح اطگج بيه

جفون : وين اكو دكتورة هيج تتعنف

اشرت على روحي وهي ضحكت بساع
جفون : نسيتج تعارفين

_ ديله يله استعجلي

عود اطيتها التمن تصبه لو تورطت على روحي
_ شهل مواعين المخربطة

جفون : اعذريني هذا الاگدر عليه

اخذت منها الجفجير وكتلها تحظر الخضره والطرشي عاد
شي مگدور عليه ،بس گعدنه على السفره نزلوا ليث وجعفر وبلايه ما احد يعزمه عزم روحه وگعد يگول

جعفر : مبين خوش اكل

كعد بصفه ليث بيناتهم يحجون بس صوتهم چان عالي
ليث : بعدك ما ماكل منه وگلت طيب

جعفر : نفسها مبينه طيبه من الكيكه

ليث : اهاا

جعفر : أي وداعة الشط ياخوية

ندسه ليث حتى يسكت من حسوا جاي اسمع عمن چنت گاعدة بصف خالة وهي بصف ليث ،چم يوم گضن و چنت گاعده يم غمد بالمشمل وطبت جفون وجها اصفر
گبلي سألتها
غمد : شبيج اسم الله

جفون : اكلت ككو هواي ولعبت روحي ،شعدچن هنا خانسات ؟

غمد : ما عدنه شي بس اريد افرش البيت وصحت نسمات تطلع وياي الفراش وبعد اخذتنه السوالف

جفون : وتالي ما فرشتن

ضحكت تهز رأسها ب أي ،گبل لا يبدي دوام الجامعات حاولوا حتى ينقلوني وما صارت ،بيومها بجيت ومتت
من القهر بس بعدين عارفنه نظام التدريس راح يصير الكتروني ،چانت تنطبق وياي رب ضارة نافعة ما فاتتني السنة وكلنه مشنيا على هذا النظام وحتى عون الچان فرحان راح يداوم گظاها الكتروني مثلنه ويوميا يجي يشكي

گعد يم خالة زهرة مقهور يگللها
عون : اريد اروح للمدرسة جدة

زهرة : شلون تروح غير تتمرض اذا طلعت

عون : جا شلون

زهرة : مو جاي تقره ؟

هز رأسه ب أي وخالة تحاول تقنعه گالتله
زهرة : من تصير ثاني داوم

عون : اوووف

يتأفأف ضايج ونوح يضحك عليه
نوح : خايب احمد الله واشكره الوادم تتحسد بيكم هسة

وهو ولا سمع النوح كضاها ضايج وما عاجبه وخله وطلع وشوي وطب سيف يضحك من سألناه شبيك گال
سيف : ما داوم حل

غضة : يااا شوف الشمات

سيف : جا يداوم وانا اضو بالبيت

صدمنه بتفكيره وكل ما يشوف عون يتقصد يكله
سيف : يله لا تضوج

ويخلي عون يعصب عليه، وبعد ما مشت حياتنة الدراسية على الالكتروني بلغونه عدنه محاظرة حظوري باجر ،ضليت افر بأذاني طلعت احجي ل خالة گالت
زهرة : عليش ضايجة واحد من الولد يمشي وانا نمشي ناخذج

_ والله

زهرة : اي والله

ضحكت ومشيت بستها وهي تگلي
زهرة : كلشي ولا تضوجين

وصدگ اخذتني هي وليث گالوا نگعد بفندق ما رضيت وگتلهم بيتنة موجود ،دليت ليث عليه وبس وصلنه كل ذكرياتي تجددن ،نزلت وانا اباوعله من الباب مبين متروك عمن تارسه التراب ،المفاتيح عدي اطيتياه فتحه وطب واحنه وراه

بكل مكان الي ذكرى هناك ،هذا البيت شهد على احلى ايام حياتي
زهرة : يايمة هاي شصاير بحال البيت

_ هسة انضفه

زهرة : جا ومحاظرتج ؟

_ بعد عدي وكت

طبيتنا صارت بالليل للبيت ،نزعت عباتي وليث مشى يگول الأبو السحب يطينا كهرباء عمنها هسة وطنيه، بساع
شغلت الماطور وبديت اغسل بالبيت وخالة خطية تفتر وراي
تريد تساعدني بس ما تگدر ،ركضت فتحت الباب من اندگ جان ليث ،رفع بجامته وطب يحاجيني

ليث : تردين اساعدج ؟

_ لا راح اكمل طب ارتاح كملت البيت الجوه ضل بس الحوش

ليث : عاشت ايدج

أبتسمت
_ وأيدك

بس كملت حبيت فرشت البيت وعلگت الصوبة على الوطنيه حتى يدفه ،مشى ليث جابلنه عشه تعشينا ودليته على غرفة ابوي نضفتها اله حتى يرتاح بيها

زهرة : لملي بساع حتى تنامين

_ بس اسبح

زهرة : مو خاف تتمرضين

_ ماگدر خالة

زهرة : بعد براحتج بس دفي روحج زين

_ صار

ضلت متانيتي بالصالة بين ما سبحت وتدفيت وگالت نگوم انام ،فرشتلها فراش جديد وانا نمت على چربايتي
وثاني يوم وعلى الأساس بس تگضي المحاضرة نرد بس گالوا نكملها بعد ثلاث أيام ،ليث ضل حاير عمن ما يگدر يخلي شغلة كل هل أيام ،خابر جعفر خلاه يجي الا مشى ،وبس شفته انتبهت ل وضعه ابد ما چان طبيعي
جعفر : مي مي بلا زحمة

ركضت جبتله ماي من گح بقوه مختنگ ،شرب وضل بالگوات يجر النفس
_ بسلا بيك كورونا

شكد چان مبين عليه التعب بس ما گدر ما يستهزء بيها
جعفر : ياهي هاي ؟

_ كورونا الحبابة

بلع ريگه اكثر من مره وگال
جعفر : باجر ماشي افحص

وثاني يوم چنت گاعدة على نار بس طب وسألته خالة كاللها
جعفر : رادوا يحطوني بالحجر وفلتت

لطمت خالة على وجها وانا ضليت اباوعله بصدمه شو هذا ولا مهتم
جعفر : شبيج عمة ،استهدي بالحرمن كلمن يموت بيومه

زهرة : يخاااب ولك جعفررر كله من ايدك هل طحت بيها

جعفر : الله يرحمني

يضحك مشى لغرفة أبوي وسد الباب على روحه بوكتها وعلى حضنه صار حظر تجوال وانحبسنه

دگيت باب الغرفة عليه
_ جعفر

فتح الباب وجهه لونه مگلوب گلب
_ عليك الله امشي جيب دوه مايصير تضل هيج والله

جعفر : اطيين وحدي

اسبوع ضل وهو معاند وبعد ما شاف روحه انتهى الا جاب دوه وحتى جهاز أوكسجين
زهرة : وديله الاكل بعد خالتج واللبسي كمامه

هزيت راسي ب أي زشلتها و مشيت ،فتحت باب غرفته المحجور بيها وطبيت شايلة الصينية
رفع عيونه باوعلي ،وذيج النضره الحادة الچنت اشوفها اختفت
_ جبتلك غداك ،اكل زين حتى تاخذ الدوه

عدل گعدته وكح ،چنت لابسه كمامه وماخذه كل انو الوقاية مثل ما وصتني خالة ،مأمنه مشيت ،اطيته الصينية وبس دنگت جر كمامتي وهمس

_ تمرضي وياي حتى تضلين يمي

ما لحگت اجاوبه وفزيت مرعوبة اركض على صوت دگة الباب وكل بالي چان يم عمامي عارفوا بي عمله ...

─── ⋆⋅☆⋅⋆ ───

اقتربت نهاية تلك الحكاية

اذكروا هنا ذكروا ل احاولاكم بزمن كورونا

الاحداث كلش احبهن كلش

جفون صارت متسوجه

وعون كبر وصار بالمدرسة

وكواكبنه رجعت الاهلها

يعز علي اكلكم بدت تنرسم خطوط النهاية

وخلال الايام الجاية راح نودع خلخال

كتبت كلشي بتفاصيل بدون اختصار مثل ما تحبون أنتم
بس انحذف هواي من البارت للأسف




شكرا لزيارتكم عالم روايات سكيرهوم

تعليقات