رواية خلخال مشوه الفصل الثالث والستون بقلم زمرده
غرگان بمحبتك أي بعد شتريد
ومدمن على عيونك الله يرزقها
أحبك ،هاك اخذها وروح دققها
لغيرك لا نگالت ولا ناطقها
°بركة°
بايدي الملزمه وافتر بالحوش ،طب حق سألني على امي ومن گلتله جوه ضل واكف بمكانه گبالي ومبين اكو شي محيره ،بأستغراب من حيرته سألته
_ شبيك ؟؟
تنهد
عبد الحق : جعفر طايح بكورونا و وضعه كلش منتهي
نشغت وطاحت الملزمه من ايدي ،دنگ شالها اطانياها وانا مستمره اللومن بجعفر ،نتر متنرفز
عبد الحق : كافي شني سالفتج انا حاير شلون احجي الامي چملتيها أنت
_تعارف شني كوروناا
عبد الحق : لا ما اعارف شو سولفيلي
يستهزء روحه بخشمه ،بس طب لحگته چانت امي بالمطبخ تطبخ بالغده، سلم عليها وبس سألته شوكت يرد جعفر گاللها
عبد الحق : اريد احجيلج بس خايف لا تگلبيها مناحه
هدت الخاشوگه وباوعتله بخوف
شيماء : يمةة شكو يا ستار ياربي
عبد الحق : بعدني ما حاجي وحطيتي ايدج على گلبج
شيماء : خايب غير طاح گلبي احجي وفضها
عبد الحق : سلامة گلبج
شيماء : لا تغير السالفة احجي ،احجي شكو ؟
عبد الحق : جعفر طايح بكورنا
لطمت على صدرها
شيماء : يمةةة جعفررر
عبد الحق : راح يطيب يمة راح يصيرله اسبوع والله
خلت حق يتندم لانه حجالها بالكوات فهمها جاي ياخذ دوه وبس ينفتح حظر التجوال يمشون يجبوه الا هدت بس ضلت طول اليوم ماعدها سالفة غير جعفر
شيماء : اكلك يمة
نزل ميمنة من حضنه وعدل گعدته ،اجت كعدت بحضني
ميمنة : حبش
دنگت بوستها وانا لو بيدي افتح گلبي واحطنها بيه
_وانا اموتن عليج
رديت ركزت وياهم من سألته
شيماء : ليش صار اسبوع وما عارفنه بطيحته لهسه ؟
عبد الحق : هو موصي ليث ما يحجي ،يخاف لا نضل نلوم بيه
شيماء : شلع گلبي وانا اگله يمة تراه وباء موش لعبة ولا هين هواي ناس ماتت بيه وهو يضحك علي ويكلي تراه فلاونزه قوية
رفعت راسي اباوع لحواري النزلت تسأل شكو حجالها حق ،باوعت الامي
حواري : شگد ما چان يستهزء بالوباء هل طاح بيه ياعمة
شيماء : وعلي گلبي هسة احسن نار وبيه ،شحاله هسه
عبد الحق :يگول ليث نسمات عينها عليه وحتى دواه مراقبته
شيماء : الله يطيها العافية ،لا تروح تنعدي منه ومناه هي بت ومناعتها ضعيفة
عبد الحق : انا هم حاجيته گال حتى كمامه تلبس من تطبله
شيماء : أي احسن ،اكلك خابره احجي وياه
ما گال لا ودگ عليه شوي وجاوب گاله امي تريد تحجي وياه واطاها الموبايل ،صوت موبايل حق چان عالي ومبين من صوته شكد تعبان ومن سألته امي گاللها چان نايم
شيماء : نوم العافية بعد روحي ،بسلا گعدناك ؟؟
جعفر : زين من گعدتوني عمن فاتتني الصلاة صار هواي نايم
شيماء : جا گوم صلي والله عليك التزم بدواك خايب من عارفت لهسه گلبي يوجعني
جعفر : عليش يمة والله كلشي مابي چن صل حتى كورونا ما طيحتني، شني شني شتردين
شوي واجانه صوت نسمات سلمت على امي وگالتلها
نمسات : حاجي ابنج خالة شلع گلبي والله دواه ب التواسيل ياخذه
مبين جر الموبايل منها لان صوتها صار بعيد وهي تگله
نسمات : جا شلعت گلبي ماكو هيج بشر يشتري المرض مشترى
جعفر : أم الكيك الفتانه
نمسات : مو مريض ومابيك حيل تحجي ،عمي طلعت انا المريضة
شگد چنه ضايجين على طيحته بس ضحكونه ب مناگرهم وشوي ورد جعفر يحجي وي امي
شيماء : لاتشلع گلبها يمة تراها فاعلة خير وجاي تدير بالها عليك
جعفر : شني فاعلة خير غير زلمتها انا ،هم ما اعارف شلونج يمة
اخذ حق الموبايل من امي
عبد الحق : شني تثولها أنت لو مصدگ عايش الدور
جعفر : ثنيناتهن
عبد الحق : بس يطلع ابوها تطلگ مو تضحك علينه
جعفر : أي عود خوش
عبد الحق : وحگ علي چذاب اعارفنك من دگيت صدرك وگلت انا أعقد عليها ماثقيت بيك وكلت وراه سالفة هذا
جعفر : اطلع مطي لو طلگتها
عبد الحق : حشه المطي ،هي راح تطلب الطلاگ وأنت رجلگ فوگ راسك تلطگها
جعفر : اكلك مدفوع علي أنت لو شني
عبد الحق : عمي محمد گالك مو تتراچع وأنت اطيته حجايه
جعفر : عود لساعتها اگله ابن اخوك مو گد حجايته
ضحك يسأله
عبد الحق : عاشگ لك ؟
تغيرت نبرة صوته ورد علي بهدوء عكس گبل
شوي يشمر بالحجي
جعفر : شتفسرها عرست ورديت انجمعت بيها وبأسمي صارت
عبد الحق : يابويةةة قديم يعني
ضحك يگله
جعفر : جا ضنك خليت العشگ بس الك والاخوك
عبد الحق : لا هذاك وحد ما ننقاس وياه
جعفر : محيرني شعجب ساكت
عبد الحق : اوگف هسة احجيلك بس خلني اطلع عمن النسوان ما ينحجي كدامهن
حواري : وين وين ؟؟
دار عليها يعارف ما تگدر تكض فضولها
عبد الحق : لا تلحگيني
چتفت ايدها
حواري : هيج صارت ؟
أبتسم وگال ل جعفر
عبد الحق : أبوي امس حجه وي عمي حتى يعقدون سيوف وبرهان
حواري : عليك الله
شيماء : يا شو ابوك ما گالي
سداه من جعفر وجواب امي
عبد الحق : السالفة بعدها بس حجي بيناتهم واضن عمي بعده حتى ما محاجي سيوف
ما اقتنعت امي وبس اجه أبوي عاتبته چي ما حجالها ،نزع جواريبه وگالي اجيبله ماي ،بساع جبتله ورديت حتى لا يفوتني شي
يوسف : ما خطبت وما حجيتلج بس گلت ل كاظم النه بت عدك حاجيها نريدها يعني سالفة زلم وبعد وكت نحجي بيها
شيماء : والله انا فلا اريدنها اله عمنها تتعنتك عليه وچن بس هي الله خالقها
طبگ حواجبه مستغرب أول مره امي تحجي هيج على وحده من بنات عمامي
يوسف : على شني تتعنتك ؟
شيماء : احسنها شايفة روحها
يوسف : شني هاي شو طلعتيها مليانه عيون ،شبيج شيماء من شوكت هيج تحجين أنت ؟
حواري : والله عمة حگ الله لا شايفة روحها ولا شي بس هي ما تثق بالحب
نزلت وگفت گبال أبوي چانت گاعدة على الدرج و تستمع
حواري : هي كل ضنها ماكو حب بهل زمن وانا اشوفن حگها عمن عاشت بغربة وگضت حياتها وحدها
أبوي جان يسمعلها بتركيز من گضت حجيهاها باوع الامي
يوسف : انا اشوفن كلام حواري منطقي لازم نفكر من هل جانب مو بساع نگول عليها شايفة روحها و غيره
ما جاوبت على أبوي وگامت للغرفة، گام وراها أبوي اجت يمي
حواري : شگد اگللها حاولي لا تبينين ضوجتج منه گبال عمه بس فلا تسمع
_ مو بيدها منابهتلها حتى تعابير وجها ما تسطير عليهن من تشوفه
حواري : انقهر عليه عمنه هو أكبر ولدنه ولهسه ضال متانيها
_ شيب سودة علي
حواري : هذاك اليوم گلتلها حني عليه تگلي حنت عليج سليمه
ضحكت اهز ايدي وبس طلع أبوي لبيت جدي يمشي يريد مشيت يم امي وحواري لحگتنه وضلينه ساعة وحده ترفع والثانية تكبس بس حتى نغير من النظره الماخذتها على سيوف
شيماء : شوفن اذا ما رضت بيه وروح أبوي امشي اخطبله من بنات الرباح
باوعتلي
حواري : لا ربحنا
شيماء : شبيج ولج ؟
حواري : دخيلج عمة انا اردن الاهلي اذا جبتيلنه وحده منهن
شيماء : ليش بيهن يبززن
_ يمة غير عمة تگول وكاحتهن ينضرب بيها المثل
شيماء : على الاساس انتن عايزات
حواري : الظلم حرام عمة وأنت جاي تتبلين علينه
شيماء : خايبات اسكتن عني انا واصله حدي كلش
جريت حواري وطلعنه وهاي من حرگة گلبها تگمز ما راضيه
_ خايبةةةة كافي شبيج
عضت اصبعها
حواري : احترگ گلبي شني تالي انتظاره هيج على الهامش وياخذ غيرها وين صايره
_ما ياخذ شبيج تراها امي العمر كله تريد تعرسله وهو ما يرضى
حواري : وعلي اخوج يموت عليها حتى مناگرها وياه يحبه وهذاك اليوم شوف عيني شفتهم تناگروا وبس مشت أبتسم
_ جا شني ما اعارف بس امي ما ترضاها عليه
حواري : جا تتذكرين بصائر وفقار شكد يتناگرون وامي ابد ما چانت تحجي
من ذكرت اسمها حسيت بغزه صارت بگلبي ،شگد چنت اگللها راح يجي يوم تحبي وعقدوا وهي ما تريد تشوفه ومره من المرات اجه توسط يمي بس حتى اخليها تطلع ويشوفها
حواري : ها وين صفنتي ؟
أبتسمت امسح بعيوني الما اعارفهن شوكت انترسن دموع
_ تذكرتها
حضنتني وانا انفچرت ابچي حايره على ياهي تصب عيوني كل وحده منهن خلت اثر بگلبي ووجع ما راح انساه
حواري : كافي عليج الله مو توج تضحكين شجاج
_ محد يدري بالبگلبي شني ،تمنيت لو بس وحده ضالتلي مو ثنيناتهن خلن حياتي فارغة بلايه طعم عگبهن
تهون علي وتحاول تسكتني وهي تعارف حجايات الدنيا كلهن ما يطيبن خاطري المكسور بروحتهن
بصائر
لو ميمنة الچنت اگولن هاي امي ،سنين هواي گضن الوادم تشوفهن بس انا عدي چن امس ،وبهل ليلة ومن الحسره العشتها وعيني الغفت بدموعها فزيت على حلم بيه
چانن ثنيناتهن جاياتني ،مبتسمات وچن مگابلاتني من صدگ عتابي الچنت احجيه بيني وبين روحي گلته الهن بس شفتهن
_ ليش ما اخذتني وياچن ليش خليتني، مشتاگتلچن
من گعدت بچيت من كل خاطري ،وبس سمعت آذان الصبح گمت غسلت وجهي وتوضيت ودموعي وي الماي انخبطن، فرشت مصلايتي وصليت وذكرتهن وانا احاول اقنع روحي بعد ما يردن وهذا الصار أمر الله والمكتوب ...
بعد عيوني ما گدرت تغفى وضليت گاعدة اباوع مسلسل متابعتها بموبايلي وبس صارت بالسبعة گمت حتى اتحظر واستغربت من سمعت صوت أشعار، رديت للموبايل من بره شفته رقم غريب
مكتوب "تداومين اليوم" وبنهاية الرسالة علامة استفهام
فتحت الموبايل ودزيت
_ منو أنت ؟
طلعلي خطين زرگ بس ماكو رد ضليت هواي انتظر ومن أيست وردت احظر الرقم تراجعت من اجتني رسالة منه
_ما شفتي الصورة ؟
باستغراب باوعت للصوره ما چان يطلعلي شي طلعت من التطبيق ورديت واتزحزحت روحي من شفت صورته، بروده صارت بأطرافي عيوني موسعتهن ما متوقعه هذا التصرف منه ..! !
كتبتله وايدي ترچف
_ رهيب ؟؟؟
_ كحيلته
بلعت ريگي متانيه رسالته الثانية جاي يكتب
_ ما ضل للصبر گد ذره، اهلج وكرونا علي وانا موش ايوب
_ شلون خطيت هل خطوة ماخفت علي
دزيتها ونزلت الموبايل على الميز افتر بالغرفة ضايعة وتصرفه ترس روحي خوف ،رديت بساع شلت الموبايل على صوت رسالته ،قريتها وجريت نفس چان كاتب بيها
رهيب : خايف عليج بس مشتاگ وروح الراد يناسب اهلج گبل
_ مايصير تصرفك غلط وهذا مو مبرر
رهيب : سمعت عدكم محاظرة اليوم ،بس جاوبيني واحظريني
كتبتله أي وطلعت بساع حظرته ورديت بدلت وانا اشجع روحي واعززلها بالسويته اصح شي بس چان اكو فد شي بداخلي يضد كل الگلته ،بدلت وطلعت بايدي عباتي وتوني اريد اصعد ونزلوا عبد الحق و حواري ،صبحت عليهم وسألتها
_ اليوم عدج محاظرة ؟
حواري : أي
_ جا هم زين عمن اضوچن وحدي
حق طلع گبلنه وانا وياها وراه وبس وصلنه گال من نگضي نخابره ،گبلها گضيت محاظرتي وطلعت اگعد بمكاني مدنگه وبايدي
العصير وشعور غريب خلاني ارفع راسي ومثل ما حسيت چان چاي متوجه علي ما تحركت وهو بلايه ما يحجي
اجه گعد بصفي ،درت راسي اباوعله من جر نفس و زفره وبضوجة گالي
رهيب : سويتها صدگ وحظرتيني ؟
_ أنت گلت
عدل شواربه باصابعه عيوني تحركت وي ايده ضحك وحركلي حواجبه
رهيب : هم كحيلات وهم صلفات بوية احبهن
دنگت منحرجه بلعت ريگي ورديت باوعتله من گال بجدية
رهيب : اهلج بركة ،اهلج اخخخ لو بيدي حكم
عليهم
طگ على رچله محترگ گلبه
رهيب : مو كافي ،بزعتتت روحي مايصير هيج
_ رهيب
شكد چان ضايج بساع تغيرت نبرة صوته ،غمض عيونه ورد فتحهن
رهيب : ها يبعد الريدج كل دنيته
ملت رأسي
_ مابيدي شي انا
رهيب : شلون وانا گلبي بين ايدج
دنگت رأسي متوتره من نضراته ،گام وگف يفتر گدامي ماخذ راحته عمن الكليه فارغة الوباء چان مسيطر على الوضع من رفعت راسي عليه تنهد
رهيب : بيا نار الله راح يحرگ اهلج على شوغتي عليج وانا اناطرج بعيوني وموش حلالي، ايدج هاي اتمنى اكضها عيونج من اباوع بيهن احس غطيت بنص الحرام بس شسوي فاض صبري بعد ،لا يوم ولا يومين وبعدهم معاندين وياي شسوي ويرضووون
_ لا تصيح شبيك
مسح وجهه بچف ايده وتلفت من ما شاف احد دنگ ثاني ركبته گبالي عيونه بعيوني
رهيب : بكلشي عدي صبر ودست على روحي هواي حتى احصلج ولهسه بعد كل واحد بينه ضال بمكان
_ يجوز الله يهديهم بيوم من الايام
رهيب : شيجيب هذا اليوم مو راح اموتن
فزيت وبنتر ما راضيه گلتله
_ اسم الله لا تحجي هيج
أبتسم ابتسامه خفيفه وگبل لا يحجي عارفت بسؤاله شني
رهيب : تخافين تخسريني ؟
_ ها
رد سألني
رهيب : تخافين من خسارة رهيب ؟
صفنت حايره شني اجاوبه وهو مبين ما راح يوخر من گدامي الا يسمع الجواب
_ رهيب
رهيب : أحبج
همسها همس وگام وگف شال چنطته وگبل لا يمشي وصاني
رهيب : شيلي الحظر
ما جاوبته وما تنفست الا مشى ،فتحت الموبايل اشوف الساعة توها بالعشره ونص ،گمت جبتلي كيكة وعصير ورديت لمكاني اكلهن وببالي اعيدن حجاياته
فززني صوتها گبالي من صاحت بوجهي
حواري : وين صافنة
حطيت ايدي على گلبي
_ صدگ تحجين
اجت گعدت بصفي اخذت من كيكتي وانا بس اباوعلها اكلتها وگالتلي
حواري : تعارفين صفنتج مال وحده عاشگه سامعتلها حجاية حلوة
_ لا والله
حواري : أي والله انا چنت هيج اصفن من اخوج يحجي وياي
_ چنتي ؟
حواري : وبعدني
ضحكت وباوعت للموبايل
حواري : هاج جبنه سيرته هل خابر
بس جاوبته اشرتلي نگوم واحنه نمشي تحجي وياه
حواري : راح نطلع ،جا ما كلت من زمان ،أي صح احنه گلنه بالعشرة بس انا تأخرت ،خوش الله وياك
سدته منه وكضت ايدي تچرچر بي ،عتيت ايدي منها من أجيت أعثر
_ شكو شبيج ؟
حواري : عزيز بره متانينه من العشره
_ جا ليش ما خابر ؟
حواري : مو متناگرين انا وياه
_ يا ليش
حواري : بعدين احجيلج امشي بساع
بس طلعنه من بوابة الجامعة چان هو واگف يم سيارته من شافنه مشى صعد
حواري : الله يستر چن راح نرد نتمالخ من جديد
_ أنت هم اتحمليه
حواري : ماگدر مو بيدي
بس شافنه قريبات عليه اشرلنه نصعد وبس صعدت انا ورا حواري اجت بصفي ندستها
_ جا ليش ما گعدتي يمه شني سايق عدنه ؟
حواري : غير زعلانه منه
وهو ما اهتم وحرك السيارة، وبس وصلنه نزلت انا وحواري وراي تونه نريد نطلب وصاحها درت انا وياها
حواري : شتريد ؟
عزيز : احجي عدل
حواري : اذا تريد تعتذر اعتذراك مو مقبول
استغفر وباوعلها
عزيز : صوجي انا الگلت اراضيج ،صوجي والله
باوعتله ما مقتنعه
حواري : أنت تراضيني ؟
عزيز : لا بطلت
ضحكت ومشتله ،ضليت واكفه صار عدي فضول اشوفنهم شلون يتراضون
حواري : گول اعتذر وبعد ما اصيح عليج واطلع مو رجال اذا سويتها
نتر بصوت
عزيز : امشي لججج
حواري : هاك شوف صيحت
اشرلها على البيت
عزيز : طبي جوه
حواري : اعتذر قابل شراح ينقص منك
عزيز : حتى تذليني
حواري : لا ابد ابد وداعة غاية
عزيز : ولي مني
حواري : غمض عيونك وگول اسف لو اعتذر نفس المعنى
رافعه رأسها وتباوعله بأبتسامه مال خباثة فر عيونه ومن باوعلي حسيته تردد، أبتسمت وغطيت حلگي ومشيت
حتى اطبن جوه واسمعها وراي تلح عليه تلگتني ميمنة شلتها ووراها طلعت حوراء تسأل على امها گلتلها بره ،طبيت لگيت امي گاعده صبحت عليها وسألتها
_ جا عون بعده يم بيت عمي باقر ؟
شيماء : أي مو تعارفينه صاير ما يلفي كل وكته يم عون
_ جا ما يجي هو عدنه يبات
شيماء : ابن اخوج عاجبه الوضع
_ هم صح
نزلت ميمنة ونزعت عباتي وشوي وطبت حواري مبتسمة
_ ها تصالحتوا ؟
هزت رأسها ب أي
شيماء : شني صلحيش ؟
حواري : انا وعزيز چنه متناگرين وصالحني
شيماء : سودة علي راح ينذل
ضحكت أايد كلام امي لان كلنه نعرف حواري من تزعل من احد ويراضيها تذله تگضيها
عليه أنت راضيتني واحد من الامثله اخوي تخليه يتندم على الساعة الصالحها بيها...
°سيوف°
تدنيت على باب الديوانية بأيدي صينينة الچاي اريدن اعرف شني السالفة العمي يوسف الخلت عمي يترددلنه اكثر من مره هل يومين
كاظم : گلتلك انا احاجيها واطيك حجاية
يوسف : واذا ما رضت يا كاظم ،عمن انا واصلني حجي بتك ما الها هوى بأبني
كاظم : جا ساعتها خوما اجبرها ياخوي
يوسف : لا يابة لا ،بس هي من صارت اله
كاظم : الله يقدم البيه الخير الهم
دگيت الباب وانا احسن بدگات گلبي مسموعة ،شوي وابوي فتح الباب اطيته الصينية ورديت بساع للمطبخ چن جبل وطاح علي ،طبت امي ومن شافت حالي وشلون مگلوبة گلب سألتني بخوف وكل ضنها بي شي
حنان : اسم الله الرحمن ،شبيج سيوف ليش وجهج أصفر
لامه وجهي بين ايدها وانا ما على لساني غير كلمة الما اريده
حنان : شبيج ،ما تردين منو حاجيني ،سيوف يااا
انصدمت من شافت دموعي ،ضلت حايرة ما مفتهمه السالفة شني مناه لمن حجيتلها چان تغمني، مسحت عيوني مقهوره
_ ليش غميتيني يمة ؟
حنان : عمنج غشميه وبثولج ماكو ،ولج وين اكو وحده تبچي لان ابن عمها اليحبها خطبها ،وين صايرة حاجيني
دلغمت مقهوره من رزالتها
_ ما احبه شبيدي يعني
حنان : أي عادي هو يحبج ويموت عليج هم
دگيت رچلي بالگاع
_ ليش اهم شي عدكم هووو
حنان : ياغشيمة الرجال لو حب المرة يعيشها مثل الملكة
ضليت ساكته وهي كملت تفهمني وبالاخير گلتلها
_ ما اغيده خوما گوة
حنان : جا خوش انا احجي ل شيماء اخليها تخطبله احسن ما ضال
وسوتها صدگ لبست عباها ومشت وخلتني بفشلة احيرن بروحي أبوي طلع ورا عمي ومن سأل على امي حرت شني اگله
_ مشت لبيت عمي يوسف
بأستغراب گالي
كاظم : شعجب ؟
رفعت اچتافي ب ما ارف ،طب أبوي لغرفته وانا ضليت احوس متانيتها وما ردت الا وره ساعة تلگيتها اعاتبها على سوايتها
حنان : دمشي امشي خوما يضل الرجال يركض وراج وأنت شايفة روحج عليه
_ ما شايفة غوحي
حنان : شايفتها ونص ،وخري
صحت وراها ما سمعتلي طبت للغرفة واسمعها بحرگة تحجي الابوي وتوني ردت اشرد فوگ وسمعت أبوي يصيحني
جمعت شكو قوة عدي ومشيت لغرفتهم وبس طبيت گالتله وهي تأشر علي
حنان : هاك اجت حاجيها بلكت تسمع منك لانها موتتني
كاظم : تعاي بوية
اشرلي اگعد يمه ،گابلته چان گاعد على الجرباية وأول سؤال سالنياه
كاظم : شني السبب المخليج ما تردين ابن عمج جواب مقنع اريدن
_ ما اتقبله مو بيدي
كاظم : هسة هو بحكم غريب عليج من يصير حلالج تختلف السالفة
_ مو بيدي بوية والله
كاظم : فكري زين بوية فكري واخذي وكتج عمن انا هاويه الج زلمة معدل يلولگ لچبيرتي
أبتسمت على اخر حجاية بس بنفس الوكت حرب بعقلي صايرة ورفض مابيه مجال
كاظم : راح اگول لعمج بس تفكرين نردله خبر
هزيت رأسي ب أي وصوت باذني يگلي من هسة گولي لا لاتفكرين حتى ،ترخصت وگمت طلعت وانا بحال ما اعرف شلون اوصفه ،صعدت للغرفة وانا اصفن وي روحي ،فتحت الموبايل وگلت اسأل بركة
شحجت وي أمها ،دگيت عليها شوي وجاوبتني وبس گالت الو سألتها
_ اغيد احجي وياج
بركة : اوگفي
شوي وگالتلي
بركة : گولي شكو ؟
_ امي اجتكم ؟
بركة : أي ،ليش ؟
_ شحجت وي امج ؟
بركة : ما اعرف چنت نايمة ومن گعدت لگيتها تريد تطلع
تأفأفت ضايجة
_ جا شلون ؟
بركة : شكو شصاير ؟
گعدت على الجرباية حايرة شلون احجيلها
_ اليوم ابوج اجانه
بركة : أي
_ وسمعته حاجه أبوي حتى يخطبني ل اخوج
بركة : أي احجي بساع
_ اطي مجال شبيج
بركة : سولفي
_ انا حجيت الامي وگلتلها ما غاضية وهي صاغت عصبية علي وحلفت تجيكم وتگول الامج تخطب لبغهان
بركة : زين سوت حتى اخوي لا يضل يتأمل بيج
_ حتى أنت ؟
بركة : عليش صرتي عصبية جا احسن خوما يضل طول عمره متانيج ما كافي شيب والبعمره بزرهم بطولهم
_ دغوحي ،شعلي تلوميني
بركة : ولو أنت أكبر مني بس امداج أي والله
_ مو اجي اطيح حظج
بركة : علاواه تعاي أخوي هناه
_ امشي امشي
سديته وانا حايرة شني الاسويه ويا قرار اليناسب
حطيت ايدي على خدي أسولف وي روحي ،انا لو رفضت عمي راح يزعل وحتى جدي ما راح يرضى
بهل ليلة النوم چافه عيني بالكوات نمتلي ساعة و من نزلت مطيفة چنت أبوي چان يريد يمشي لشغله يباوعلي
واحس بحلگه حجي بس ما گاله وخله ومشى وامي گضت
اليوم كله تحاجيني من ورا خشمها حسيت روحي انا بت حماها وهو ابنها
°نسمات°
توني وصلت للباب وما خلاني افتحه وصاح بي حتى ارد ،تراچعت چم خطوة وضليت اباوع عليه مشى فتح الباب ومثل ما توقعت چان عمي ابو علاء
جعفر : خيررر ياطيرر ؟؟
فر سبحته و باوع علي ورا جعفر
أبو علاء : انا عرفتج موش هينه ،خوش محصلتلج زلمة منهم
اندار باوع علي اشرلي بعيونه حتى اطب ،هزيت رأسي ب لا ،من راد يطب رفع ايده ثنيناتهن يمنعه
جعفر : حدك ، شعدك جاي ؟
باوع على ايد جعفر ورد رفع رأسه
أبو علاء : بيت اخوي لو ناسي يا أبن أل غضب ؟؟
جعفر : تعذرني البيت بيت حرمتي موش بيت اخوك
باستهزاء گاله
أبو علاء : خوش چذبه هاي
جعفر : رد منين ما أجيت گبل لا انسى أنت عمها
أبو علاء : ليش ما گالولك انا موش عمها ،ما دورت على اصلها گبل لا تعقد عليها لو قشمروك
جعفر : اصل شني ؟
أبو علاء : تؤ تؤ ،قشمروك بيها، البت هاي موش بت غافر
جعفر : دامها موش بت غافر ليش تلاحگون وراها
ضحك ضحكة مبينه ذيج هي مال خباثة ،متعمد بچيته يخرب علي وما يخليني اعيش براحة ويخرب علي عمنهم يختنگون لو طلعت عن شورهم وذلتهم
أبو علاء : اسباب خاصة
جعفر : خلي اسبابك الك ما رايد اعارفهن
سد الباب بوجهه وباوعلي بنضرات حرت بتفسيرهن شني
نداريت اباوع لخالة من عيونه صارت عليها واگفه عد باب المطبخ
جعفر : سؤال واحد راح اسأله واريد جواب صريح
زهرة : اعارفك شراح تسأل
جعفر : دام تعارفين اطيني الجواب راسي يوميا يفتر من حجايتهم هاي الما تطيح من لسانهم
زهرة : تعالوا جوه واحجيلكم
باوعتله مستغربة من طبت ،اشرلي حتى نمشي وانا ما اعرف بهل لحظة ليش توترت ،طبيت وياه وگعدت گبال خالة وهو بصفي بس چانت اكو مسافة تفصلنا
جعفر : احجيلي عمة
باوعتلي متردده تحجي لو لا ،هناه احوالي تخربطت وهي بعدها ببداية الكلام
زهرة : السالفة قديمة ومن الماضي غافر موصينا مانحجي بيها بس دامك تريد تعارف راح احجيلك
ضليت مركزة وياها وابد ما حجيت بس عيوني معلگه عدها وادعي الراح اسمعه ما يكسرني
زهرة : نسمات بت ناهدة موش من غافر
بلعت ريگي عيوني بيناتهم تفتر اريد استوعب الجاي تحجيه، شلون مو أبوي غافر بغرابة من الجاي تحجي گاللها
جعفر : شلون يعني ؟
زهرة : ناهدة گبل غافر تزوجت وهي حامل ومات رچلها ،ونوبة من النوبات اجتنه وبوكتها چانت حبله بس بطنها
ما مبينه كلش وما منتبه عليها ومن ذيج الساع طبعت بباله وحاجه عمتي عليها ومن گايلتله بحالها ما حجه
شي بس اهله ما سكتوا وبس ردواه ما ياخذها عمنه صاحب رتبه واله مكانته واختي ارمله بس هو عاند ولو هي
لو اهجن من الديرة لحد ما اجوي خطبوها وحتى نسمة كتبها بأسمه و الله يرحمه ابوها چان يتيم الاب والام
ما وراه احد يطالب بيها ،والله يشهد غافر صار ونعم الابو الها وعلى وصيته مشينا ومثل ما راد نسمات بته
حجاية ورا الثانية مثل الچبال طاحن علي ،الدنيا صرت احسنها تفتر بي ،اكثر من مره ردت اگوم بس غدرن بي رچليه
كضاني من ايدي يباوع بوجهي
جعفر : وين ماشية
باوعت بعيونه وانا بگلبي حسره ما اگدر اعبر عنها اريدن اشرد ابجي وحدي من سالفة
صارلها سنين وسنين ادورها جواب، جبت عمري مذلوله
جعفر : نسمه
_ طلعت موش بتهم ،اثاريهم هيج سووا وياي ،موش من دمهم انا
شهگت مختنگه وگمت بساع اريد امشي للغرفة صاحت وراي خالة درتلها وعيوني غورگن بالدموع وانا اگلها
_ فدوة خلوني وحدي
درت مطيتهم ضهري ومشيت بساع للغرفة ،سديت الباب وگعدت بسده، وما ببالي غير معاملتهم وياي كل ذيج السنين ،عيوني الچنت اضننهن
راح يبچن ويعبرن عن صدمتي چمدن ضليت بس اشهگ مختنگة مر وكت
بحدود الساعة وأكثر وبعدها حسيت بالباب اندفع تدنيت شوي وباوعتله من طب
القهر مبين عليه وهو يباوع علي ،تنهد يسألني شلون صرت
_ مابي شي
ضل يباوعلي ما مصدگ ،بتعب واگف ،مسح على گصته يريد يحجي شي بس متردد، من شافني اباوعله گال
جعفر : لا تفكرين بيهم بعد ،انا موجود حدج
_ ابوي طلع مو ابوي
جعفر : مو الا تكونين من صلبه يعني هاي هي أنت بته، تراه رباج و وصلج لهذا العمر ومافد يوم حسسج بشي ،لو عدج غير كلام ؟
هزيت رأسي ب لا
_ ما فد يوم قصر وياي بشي
جعفر : جا بعد عليش تضوجين روحج ،تناسي كل الصار وما چن عارفتي شي
_ شلون
صفن علي حاير
جعفر : حاولي
هزيت رأسي ب أي وبس شافني استجابيت الكلامة أو مثلت الاستجواب خله وطلع ،الخنگه وانا وحدي ردتلي جبرت روحي اطلع وبس شافتني خالة فتحتلي ايدها، مشيت حطيت روحي بحضنها وهي شددت علي بايدها تحجي وياي وتحاول تخفف من ثگل الحقيقة
زهرة : ابد لا تحطين ببالج انج مو بته وياه ضلي مثل گبل ولا تحسسي تراه يحبج
_ وينه هو بس خل يطلع ،طگ گلبي على شوفته
زهرة : ماضل شي وداعتج
وخرت من حضنها اعدل بحجابي من سمعت صوته طلع من الحمام ،بس شافني گال
جعفر : عفية ضلي هيج قوية وما يهزج شي .
أبتسمت وهزيت رأسي ب أي بس الصدگ گضيتلي اكثر من يومين انا حالي مگلوب گلاب
اللهي روحي يالشغل حتى لا افكر بس اللگه روحي وانا بنص الهوسة صايره خبصه بعقلي...
سديت بوري السنك ومشيت للصالة
_ ها خالة صحتيني ؟
زهرة : أي يمة ،جعفر صاحج اكثر من مره شوفي شبيه
_ صار
مشيت لغرفته گبل لا أطب دگيت الباب ،فتحته و باوعتله متمدد بس شافني گال
جعفر : ماكو ماي هناه عادي تجيبلي
_ تدلل
جبتله ورديت صبيتله الماي بگلاصه چان على الميز شاله شرب منه ورداه لمكانه
جعفر : مليت شوكت اطيب
_ ماضل شي دامك بديت تحس بطعم الاكل
جعفر : هذيج الايام چنت احس روحي اكل طابوگ بلايه طعم حشه نعمة الله
_ سبحان الله شكد استهزأت بيها تاليها طيحتك طيحه قوية
جعفر : متشمته ؟
_ لا ابد بس خليها ببالك الحجارة الما تعجبك تفشخك
جعفر : اشو اكو حجارة عجبتني وچماله فشختني بس موش فشخة بگلبي ترس اجت
_ ضل ضل استهزء
ضحك وانا ما چنت مفتهمة شي من كلامه ،رديت طلعت من صاحتني خالة چانت لابسة عباها تريد تطلع
_ وين ماشية خالة ؟
زهرة : للسواق اجيبن زيت وچم شغلة بعد ماعدنه وهم فرد نوب بدربي امرن لفرن الصمون
_ خوش
زهرة : تردين شي اجيبلج
_ لا
جعفر : نسمه
_هااه
جعفر : اريدن كيكة تسويلي
من الغرفة يحجي ويانه ضحكت خالة وگالتله
زهرة : هذا خوش مريض يتدلل
جعفر : نستغلها فرصة
كتبت المواد بورقة واطيتهن الها، وبين ما تجي گلت اكنس البيت وتوني نزعت حجابي مأمنه منه ما يطلع بس فزيت من سمعت صوته وراي وركضت حتى اللبس الحجاب بس هو چان اسرع مني ودنگ شاله، وجهي بوخ وانا اگله
_ اطيني الحجاب جعفر ،مايصير .
جعفر : شني هو المايصير ؟؟
_ اطينياه فدوة
شمره من ايده بعيد وكضني بساع من ردت اجيبه
جعفر : لا تحوسين ،اثبتي
_ هدني جعفر ،هدنيي
جعفر : شبيج ،شمسويلج هسة انا
بس هدني گعدت ارچف ،دنگ گبالي مستغرب من تصرفي
جعفر : شني سالفتج ؟؟
_ ليش هيج سويت ؟
جعفر : شمسوي انا
ايدي ترچف رفعتها اوخر شعري النزل على عيوني
جعفر : تراج حلالي
_ بس انا ما راح اضل على ذمتك
جعفر : اطيني سبب
_ ما اطيق الزواج ،انا ماصدگت اخلص من علاء
جعفر : بس انا مو مثله
رفع رأسي بايده يريد يشرحلي
جعفر : انا زلمة متربي على الحلال والحرام و الله شاهد ما أاذيج بيوم
جريت روحي منه وانا كل حيلي يرچف ،شلون اثق وشلون اصدگ بكلامه ،حجيه صح بس روحي ما جاي تقتنع صرت اخافن من فكرة رجال بحياتي غير أبوي ،گام وگف گبالي واضن مفتهم خوفي لانه ضل مصر يشرحلي
جعفر : اطيني فرصة اثبتلج كلامي و وعد زلمة راح تغييرين رايج
_ انا شرطت بس يطلع أبوي تطلگني شني اختلف هسة ؟
جعفر : ما مختلف شي
_ يعني تلطگني ؟
جعفر : لا
فتحت عيوني مصدومة بصراحة رده، نترت بثول
_ شني بكيفك ؟؟
جعفر : جا بكيفمن ،العصمة بأيدي لو بأيدج ؟
_ أنت زلمه مايصير تتراچع بحجايتك
بس سمع صوت الباب انفتح گالي وهو ياشرلي
جعفر : اجت خالتج
رد للغرفة وخلاني ميته من القهر ،احس روحي أنضحك علي
زهرة : شبيج نسومه ؟
باوعتلها
_ جعفر يگلي ما اطلگج
زهرة : شني تردين تطلگين ؟
_مو هسة اگله من يطلع أبوي
زهرة : يا خايبة عبالي شوف شكو ،لكل حادث حديث خلي يطلع هسة والله كريم الباقي سهل
ما اطتني مجال احجي وگالتلي امشي اشوفن شني جايبة وخاف شي ناقص بعد ،طنگرت وگلت ما اسوي الكيكه بس بعدين گلت لا خطية خاف يموت بكورنا وهو مشتهي ياكلها ولان ضميري صاحي خبطتها
وحطيتها بالفرن وبس استوت تانيتها تبرد وسويت وياها چاي
بصينية حطيته الي والخالة واخذتله وبس شافني طبيت للغرفة أبتسم وانا مدلغمة ،حطيت الصينية گباله ودرت اريد اطلع بس وگفني من گال بمداهر
جعفر : شو انا من اطنگر يگلولي غثيث بس اول مره اشوفلي طنگوره تنحب
خزرته ضحك بساع
جعفر : وداعة ليث والشط تلوگلج أم الطناگير
_ مو أم الكيك
جعفر : أم الكيك وحد الها مكانتها
حجيه چان واضح لو انا ما افتهمه
_ اذا تريد شي صيحني
جعفر : وحتى اذا ما اريدن شي ؟
_ لا
جعفر : نحيسه على ابن خالتج
وره أسبوع وبعد ما صحته تحسنت بدت وياي الأعراض انا وبس اخذني فحصت اكدولي مصابه ولازم اتلاحگ الوضعي ،رديت للبيت وانا ميته من القهر مو لان انصابيت، مشتاگه الامي صار هواي مفارگتها و منا خالة صارلها فتره مشتوله
ويانه
ومن عارفت بي حلفت ما تمشي وتضل تداريني وهل مره انا انحجرت بمكانه وابد ما اطلع اخافن لا يريد هو ينتكس
لو خالة تنصاب ومناه هي ضغط وسكر وضعها تعبان بس هو چان عناد يجي يگعد گبالي لو حتى يوخر ضوجتي
ويخفف علي ولازم نختمها لو بمناگر لو مداهر وهم تاليته نتزال و وره شوي نتراضى ،وهسة مگابلني و گاعد
جعفر : اكلج
_ گول
جعفر : دام السوالف گضن شرايج نعرس من صدگ
_ اهووو
جعفر : وجعوو وطاگ الحو ،شبيج موزين اسولفلج
_ لا والله
جعفر : أي والله
_ جيبلي ماي عطشت يبست ريگي
گام جابلي ماي يدردم اخذت منه البطل وصيتيه يجيبلي بطاله احسن استخدام واحد
_ شبيك مسوي منيه علي تذكر منو طيبتك لو نسيت ؟
جعفر : ما ناسي مو انا ضال هناه علمودج لو هم نسيتي
_ لا مانسيت
جعفر : جا اسكتي
شربت من الماي وتمددت وهو گاعد گبالي من الجهه الثانية مال چرباية
_ شبيك تباوع ؟؟
جعفر : وجهج بريئ چن وجه جاهل
_ اممم
جعفر : شو ما مقتنعه ؟
_ لا مقتنعه ومتعلمه اسمع هل شي
جعفر : منو چان يگلج ؟
_ زينة دوم چانت تگلي حتى خلتني احبن ملامحي
جعفر : حبيهن يستاهلن
ما رديت عليه وضليت ساكته ،سألني خاف اريدن شي وگام طلع من الغرفة
كمت جبت الموبايل من الشحن وطبيت لمحادثتنا انا وبركة ،كتبتلها
_ شسويتي، ما راسلتيه ؟
°بركة°
طبيت للغرفة وكل فكري يمه، شسوي اشيلن الحظر عنه احجي وياه ،ضليت افتر ضايعة وما ببالي يا تصرف صح اسويه، گعدت حايرة من امس لليوم وانا وضعي متخربط ،مختفي وبكل مره مشيت بيها للكليه بعد ذيج المره ما شفته وامس لاگيت هند بت عمه وگالتلي متعاركين ومتصاوب ومسويله عمليه
وبنص تفكيري وحيرتي سمعت صوت اشعار من موبايلي چانت نسمات، رديت عليها
_ لا ما راسلته بعدني ،متردده هواي والله شلون ؟
ضلت تكتب شوي ودزتلي
نسمات : والله راح يصير باخطره منج زلمة مشتريج بروحه ما تطلع منج الحمدلله على السلامه منج اله
_ واهلي
نسمات : حاجيه وردي حظريه
وبين الراضيه و ضايعه گلتلها
_ خوش
طلعت من محادثتها ومشيت لقائمة الحظر رفعته عنه وضليت ساعة صافنة شأكتب ،ردتيلها
_ اكلج شني اگله ؟
ضليت متانيتها بين ما دزتلي
نسمات : السلام عليكم ،سمعت بيك مسوي عملية الحمدلله على سلامتك
_ ها هيج ؟
نسمات : أي واذا تگليله ورا السلام عليكم حبيبي بعد احسن
_ انجبي
طلعت بساع كتبتله مثل ما گالتلي ورديتلها لگيتها كاتبتلي
نسمات : اكضج لو لا بعيني اذا ما اطبگج أنت و اخوج
_ شمسويلج أخوي
نسمات : ملعب مخبلني والله نوبات يحجي حجي احيرن شلون افتهمه
دزيتلها ضحكة وبساع اختفت ابتسامتي حتى بالواقع من اجاني الرد منه ،قريته من الاشعارات فوگ وركضتلها
_ ولج اجه رد رد
نسمات : شكاتبلج ؟
_ عليكم السلام يابة ،أي الحمدلله عدت سلامات
نسمات : رد ثگيل وراه سالفة
_ اضنه زعلان من ذيج النوبة گالي شيلي الحظر وما شلته
نسمات : امشي حاجيه وگليلي شيصير
دزيتلها لايك وطلعت وبس كتبتله شلون ما رد عليها ودزلي
_ ويامن تحجين ؟
استغربت سؤاله ودزيتله
_ ليش ؟
_ چنت متانيج وانا نعسان گلت احجي وياج گبل لا انام
أبتسمت
_ ها ،جا نام
طول الا دزلي
_ لا صحصحت ،تعاي نتعاتب
_ اممم ،بيها عتب
_ لوما وصيت هند تگلج على الصار وياي ما چان راسلتيني
ضليت اكتب وامسح حايره شني اگله
_ مو هيج بس
_ اعرف بشني تفكرين وعاذرج بس انا مليت ،بالبنج واتلفض بأسمج ،مرض استوطن بروحي طاريج والله
كتبتها بدون ما احس بس كلامه خله غصه بداخلي
_ أسفة
_ على شني يابعد العشتهن بلايه أهل
_ مقهوره لانك مقهور
_ اهمج ؟
_ جا شلون .
_ تحبيني ؟
كتبها وخلاني حايرة بالرد مسحت عيوني من طاحت دمعتي واول مره احس بروحي صادقه وياه لدرجة الشفافيه مثل ما سماها
_ أي
_ اريد اسمعها ،احد يمج ؟
بس گلتله لا اتصل، الموبايل چان صامت من لمعت گبالي صورته تلفتت متردده شلون احجي وياه ،بس فصل رد
خابر قفلت باب الغرفة وبايدي الموبايل ارجف رجف جاوبته وبس گلت الو گال
_ جري نفس بوية تراني بعيد موش يمج ،أي عفية
جريت نفس ومن حس بي هديت گال
رهيب : يگلك بعد مابينه اليگدر يضم محبته، عمن الصبر گضه والروح لابت على هواها
حاولت اغير الموضوع وسألته
_ شلونها عمليتك ؟
رهيب : بخير ونعمة
_ الحمدلله ،شلون تصاوبت ؟
رهيب : غدر صارت ما متفقين احد يشيل سلاح بالگعده لحد ما تلازمت وي واحد واجه الثاني صوبني چي طگيته اثاريه ابن عمه، وداعتج بنص الموت وتذكرت ولدكم
_ اممم ليش ؟
رهيب : فزعتهم مثل فزعة اخوانج واولاد عمج واحد يصد الطگ عن الثاني ومابينهم هذا موش اخوي لا كلهم ايد وحده
_ الله يحفظهم أن شاء الله
رهيب : راح نفصلهم عمن اكو شواهيد رفعة السلاح متعمده علي
_ تتنفسون فصول
رهيب : منكم نتعلم أل غضب بصمة وفسفوره بهل سوالف
_ اها
رهيب : أي وداعة عيونج
_ رهيب
رهيب : ها يابعد جروحه التشافن بصوتج
_ راح انام
رهيب : تصبحين على خير
_ وأنت من اهل الخير
سديتيه وگعدت افكر بنهايتنا شني ،تمددت ناسية الباب مقفول ،شوي وسمعته اندگ گمت فتحته وابتسمت من شفت ميمنة طبت تتثاوب مبين عليها چانت نايمة
_ ها شبيج ؟
ميمنة : ويد انام
كضيت ايدها واخذتها لفراشي
_ نامي حبيبتي
غطيتها وضليت گاعدة عد رأسها ،بين ما غفت تمددت بصفها والصبحية فزيت على صوت گحتها القوية حطيت ايدي على گصتها مصخنه كلش من امس چانت مخنطله مبين عليها راح تتمرض...
كمت چبتلها دوه من الثلاجة شربتها وضليت عيني عليها ما رديت نمت ،كل ما اتحسي گصتها صخونتها الگاها زايده، گمت شلتها وطلعت من سمعت صوت امي بره گاعده
_ صباح الخير
ردوا علي هي وابوي گعدت يمهم بحضني ميمنة
شيماء : شبيها ؟
_ مصخنه كلش وتگح
شيماء : يا اسم الله الرحمن
بس شافت حرارتها اخذتها مني ،تحجي وياها بس هي من قوة الصخونه ما الها حس ،اباوعلها واحسن ب گلبي
جاي ينمرد على حالها أبوي هم حاجاها وهي ما الها صوت من زغيره مناعتها ضعيفه وبس تصخن چانت تنتهي گعد حق
يريد يمشي لشغله وبس شافها وصانه نخابره اذا ما صارت زينة ياخذها للدكتور ،حواري ضلت اليوم كله وياها لليل وانتهت كلش ،وهم زين چان عدنه جهاز حطيناها عليه
شيماء : يا ولج حواري عليش تبچين ؟
مسحت عيونها تباوع على ميمنة بحضني
حواري : مقهوره عليها ماتتحمل المرض هي ،شوفي شصار بيها بساع انخرطت
شيماء : هسة بس خل تصير زينة وترد مثل الاول وأنت هم قوي نفسج مايصير كل ما يتمرض واحد تگابليه وتبچين
هزت رأسها ب أي وحطتها بحضنها تحجي وياها حتى تاكل بس ما رضت ،طب من بره يسأل ما صارت زينة گالتله امي
شيماء : والله يايمة بعدها على نفس الحال ،باجر اخذها للدكنور احسن
گعد گبال حواري واخذها من حضنها يحجي وياها
عبد الحق : بوية ميمنة مريضة ،حاجيني شيوجعج
حطت ايدها على رأسها ،دنگ باس راسها وضل يحجي وياها ما يريدها ترد تخنطل، على گعدتنا وطبت عمة نجوى و وراها طبوا سيف وحوراء و عون ،گمت للغرفة من سمعت صوت موبايلي يدگ
جاوبتها
_ ها سيوف ؟
سيوف : اكلج حوغاء چانت عدنه تكوب ميمنة كلش مغيضه ،صدگ ؟
_ أي والله فرد نوب طايحة
سيوف : يايمة سودة علي ،اكلج اخوج هنا لو طالع ؟
_ طالع ،ليش ؟
سيوف : مو امي تغيد تجيكم وانا اجي وياها
_ هلا بيكم
سيوف : وبيج اكثغ ،يله ماشية اتحظغ گبل لا امي تخليني
_ خوش باي
سديته منها وطلعت كلت الامي وشوي وطبن وبنص السوالف سألتها امي
شيماء : جا عمة ما گضيتي تفكير عمج متاني جواب منج
باوعت الامها ساكته
حنان : امس گالت الابوها ما گللكم ؟
شيماء : لا
حنان : اضن نسى ،حاجوا جدهم وتوكلوا ب الله ،والله يكتب البيه الخير
أبتسمت امي بس چان مبين عليها ما مقتنعة عمن سيوف ابد ما حجت بعد ولا شاركت بالسولف مبين هل موضوع ضوجها ،كتلها تجي وياي للمطبخ ،گبلها طبيت وبس اجت وراي گلتلها
_ شو ما چنج راضية من كل خاطرج ،عمي جابربج ؟
هزت رأسها ب لا
سيوف : انا گلت اطيه فغصة وهم ماغيد ابوي و واحد من اخوانه يتخاغبون
أبتسمت
_ زين تسوين والله ،عاشت ايدج ،متأكده راح تحبي
سيوف : احسن بغوحي ضايعة
_ توكلي على الله وكلشي ينحل
سيوف : ونعم بالله
أبتسمت بوجها ومشيت سويت جاي وطلعت كعك عدنه وهي ضلت يمي تسولفلي على وضع دوامها وعلى وگفتنا وطب برهان بالبداية راد يطب ما نتبه الها بس من سمعها حاجتني تراجع واندار باوعلها
سيوف : اكلج الجاي غاح يحتغگ
مشت تنصي الچاي ،اشرلي اطلع انسحبت بهدوء مصدومة بخطوته هاي وبوجودي، الظاهر برهان مل لان ماكو تفسير ثاني لحالته غير گضه صبره ...
°سيوف°
فزيت من سمعت صوته وراي قريب ،تلفتت بالمطبخ ادور بعيوني على بركة رديت باوعتله من گال
برهان : باعيلي اريدن احجي وياج لا تضلين تتلفتين
استقرت عيوني عليه مرتبكة من وگفته گبالي ،أبتسم وباوع لفرق الطول بيناتنا ،عدل شواربه گبل لا يگول
برهان : مثل الورد كل ما تگصر تحلى اكثر بعيوني
بلعت ريگي ودنگت
برهان : وكحه بس تخجل وانا على اليخجلون گلبي يطرق
نترت
_ شبيك ؟
برهان : لا تخوزرين
_ احجي شغايد
برهان : ما رايد منج شي ،بس رايدج
حجاها بصوت ناصي خلاني ابوخ، حاولت ما ابين مستحاي منه بس ما فاد
برهان : الخدود صارن حمر ،يعين حالك برهان
_ لا تحجي هيج
برهان : ليش ما تتحملين ؟؟
غمزلي بنهاية كلامه خلاني احيرن وين اطي وجهي اتعارك وياه لو اشرد منه
سالني بجدية من شاف ملامحي تغيرت
برهان : متاني منج جواب ،ما وصلني لهذا اليوم .
_ ما غاضية
برهان: اها ،وليش ؟
_ بكيفي خوما انچبغ
وجهه انگلب گلب هز رأسه ب خوش ومشى وبس طلع طبت
بركة : شكو شبيه برهان ،شحجيتي وياه وهيج انگلب ؟
_ ماحجيت شي
بركة : جذابة والله
شالت قوري الجاي فرغته بالسنك
بركة : شميت ريحته احترگ بس غلست گلت لخاطر أخوي فدوة الجاي
هزيت ايدي ومشيت للصالة تراجعت من شفته گاعد وبحضنه ميمنة ،امه بس شافتني گالتله
شيماء : عمتك هسة گالتلي نحاجي جدك ونتوكل نعقدلكم
تمنيت الگاع تنشگ وتبلعني ولا هذا الموقف، ضل يباوعلي ويباوع الامه ما مفتهم شي
برهان : شلون يعني ،ياعقد ،مو ما راضية ؟؟
شيماء : لا شني ما راضية ،رضت بس عمك بعده ما محاجي أبوك
نزل ميمنة من حضنها وگام وگف گبالي ،طگطگت اصابعي متوتره
برهان : جا مو توج تكولين ما راضية ؟
ما جاوبته ومن شافني مابي مجال احجي ،أبتسم و خله وطلع ،فرحته حسيت بيها شكد چانت قوية و بس طلع سألتني
شيماء : شگايلتله ولج
اجت بركة حطت صينية الجاي والكعك وجاوبتها ببدالي
بركة : خلته يحترگ حرگ تگله ما رضية خوما انچبر
حنان : يا ولج يااا
رمشت بعيووني وتلاحگت للوضع گبل لا اكل رزاله
_ اشاقيه يمه
خزرتني لان تعرف ما چنت اتشاقه ،وبس ردينه امي حجيت الابوي يطي موافقتي لعمي وبعد يحجون وي جدي وبس وصل الخبر الهم اجت ما گدرت تصبر
غمد : هااا مو ما اريدنه ولا ارضى بيه ،وغثةةة ما ينحب
بضوجه گلتلها
_ لخاطغ ابوج ما غدت افشله وي اخوه
غمد : أي أي صدگتج
°غمد°
گمت لبست صايتي من سمعت صوت علاوي يدگ الباب
حنان : وين مو توج اجيتي
_ اجيكم غير يوم خطية هسة يريد اكل
سلمت عليهن وطلعتله ،بس شافني گال
علي : طبيت للبيت فلا ينجرع بلياج
أبتسمت
_ والله
علي : أي والله ،حسيت البيت يخنگ لانج مو بيه
_ اسم الله عليك من الخنگه
كضيت ايده ومشينا ،الهوه بارد وحجاياته الحلوة شعور هل چم خطوة وياه جان غير
علي : گلت لعمة عطاء امشي اجيبنها تگلي خلها تبات تريد تحجيني عمتج
أبتسمت وباوعتله، دار رأسه يباوعلي بعيونه التلمع
علي : بويه أم النبگ شكثر احبج
_اموتن عليك
علي : ياروح علاوي
احيرن شلون ارد عليه وبكل مره يتعثلم الكلام عدي ،بس فتح باب بيت جدي صار گبالنه عمي يريد يطلع أبتسم من شافنه
محمد : الله يديمكم أن شاء الله
علي : خيمتنة ويديدمك
طبطب على چتفه وطلع ،بس طبيت للبيت بديت اسوي العشا وهو يمي يحجلي عن وضع ابوه وشلون مقهور عليه ،شغلت النار جوه الطاوه وگلتله
_ ليش ما تقنعه يتزوج ترا بعده العمر گدامه وما يصير يضل هيج وحده
علي : گلتله امس بس ما اطاني حجاية سكت
_ اذا هاي حاجي عمي محمد
هز رأسه ب أي ،أبتسمت بوجهه وملت رأسي اريدنه يضحك
_ لا تگعد الحاجب ترا ما تلوگلك
أبتسم واجه حضني، ضحكت من حط رأسه على چتفي يگول
علي : جاي اتخيل أبوي يعرس ويصير عدي اخوان من تالي
درت اباوعله وازيدن على كلامه
_ وجهالنه واخوانك يربون سوه تعيش شعور الابوه والاخوه سوه
زغر عيونه بحيله
علي : جا خل نجيبهم گبله
_ اتفقنه من هسة
علي : جا بين ما تگضين جامعتج أبوي يعرس ويصيرون عده ثنين
_ بعد احسن عاد مو العمام وجهال اخوانهم بنفس العمر
علي : اممم قنعتيني
_اي جا شلون ما تقتنع
كملت عشاه واطيته الصينية
_ والله وكت چنت بيضة ما اطگن لروحي
باسني من راسي
علي : تعبتج
_ تدلل على الگلب علاوي
حط الصينية على الكاونتر ودنگ باسني ،وخرته خجلانه
_ اكلك برد
علي : اتعشه بيج عادي
جريت روحي منه أاشرله على الاكل ،اخذه ومشى للصالة گعد ياكل وانا بايدي الموبايل خابرت على جفون ،بس ردت گتلها
_ اكلج اذا رچلج ما ماكل خلي يجي يتعشى وي علاوي هواي سويت وانا شعبانة
جفون : الله ينقذج نقذتيني صارله ساعة يگلي جوعان وانا مابي حيل اگوم اسويلي
_ جا خلي يجي
ضليت وياها على الخط حاجته وگالتلي
جفون : دزيلي لفه وياج حبابة
_ تدللين
سديته منها وشوي واندگ الباب گام علي فتحه وطبوا ثنيناتهم ،سلم علي وگعد يشكيلي
نوح : والله يا خوية صارلي ساعة اتوسل بيها تسويلي اكل خلف الله عليج من خابرتي
_ بالعافية
علي : شوف شلون تهتوا خلاف عمة
نوح : ضالين بمنية عمة عطاء الله وكيلك اذا تطنگر علينه نضل بلايه اكل
ضحك علي وصبله جاي حطاه گباله ،گلتله يسولها لفه حتى ياخذها وياه
نوح : چنها على لفة ،لفات اسويلها
علي : استلم الصلافه
ضحك وطلع خبزه حط بيها من كلشي اضن الليله راح تخبط معدتها، بس مشى شلت الصينية وغسلت المواعين وگبل لا امشي للغرفة سبحت الا طبيت بس شافني طفر من مكانه
علي : شگد اكلج دفي روحج الا تطلعين ،غمد فلا تسمعين الكلام
طفه البنكه جان مشغلها حتى تتهوه الغرفه ،اخذت هدوم ومشيت للحمام بدلت عمن چنت لابسه بس البرنص ومن رديت لگيته مشغل الصوبة أبتسمت و شمرتله بوسه ضحك
علي : جا من بعيد هيج
اجه گعد يمي ،كض ايدي يدفيهن گبال الصوبة و يحجي وياي
علي : شكد اكلج من تسبحين دفي روحج ورا الجو يخوف
_ اممم
علي : اعارف تسوين البراسج
سحبت ايدي من ايده ورفعتهن على صدره ،باوع بعيوني
علي : لا تباوعين هيج
_ ليش ؟
تقرب بساع باسني من خدي
علي : ماتحمل اموتن
_اسم الله لا تجيب طاري الموت
شهگت كردة فعل من مددني على الگاع ،فصلت عن العالم بدنيا چن بيها بس انا وهو ،باسني من رأسي وجر النزله غطانه بيها، همسلي وهو يرفعني على صدره
علي : ماچنت اضن روحي راح اعيشن هيج أيام وانا غرگت
بنص الحزن ،بس أنت اجيتي بوكت بيه ماعدي احد وصرتيلي كلشي
حضنته وغفيت ما حاسه على روحي ومن گعدت لگيته طالع ،سبحت ومشيت لبيت جدي وتوني فتحت
باب المشتمل وحطيت ايدي على گلبي خايفة من وگفتهم ،عزيز وصخر ومبين حديثهم ابد ما چان عادي
بس من حسوا على وجودي سكتوا، عزيز طلع و صخر طب جوه مشيت وراه بوجهي صارت عمة عطاء يمها خالة ناهدة
جفون هل فتره منتبهتلها ما الها خلگ حيواناتها و طايحه بيها ام نسمات هي تحطلهن اكل و تداريهن سألت عمة عطاء
_ شكو عمة شبيهم عزيز وصخر ؟
عطاء : شبيهم ؟
_ عبالي تعرفين ،شفتهم واگفين بره ومبين اكو شي صاير
عطاء : يااا
درت بعيوني ادور عليها
_ جا جفون وين ؟
عطاء : فوگ ما نزلت اليوم ما اعارف شبيها
_ يا اسم الله ،صاعده اشوفنها
وبس دگيت باب الغرفة وطبيت لگيتها متمدده روحها رايحة
_ شبيج ولج ؟
گعدت على كيلها تلم بشعرها واباوع على وجها صاير ليمونه
جفون : امس بس اكلت هاجت علي معدتي سكنت الحمام بس ازوع
_ يا اسم الله، ليش ؟
جفون : ما اعارف اضن تحسست من شي
شوي وطبت عمة سألتها ما صارت زينة
جفون : احسن بس بعد احس بوجع بيها
گعدت بالگاع متربعة
عطاء : اضنج حامل وهاي نساوه
صفنت وهزت رأسها ب لا بهتانه
جفون : شني عمة يا حباله غير ما صارلي اربعة اشهر من عرست
عطاء : جا واذا أربعة أشهر اكو نسوان تحبل من ليلتها ،گليلي چم مره اجت ؟
دنگت تحسب بايدها وانا وعمة مركزات وياها مناه لمن گالت
جفون : مره
عطاء : جا حبله ،اخذج للدكتورة العصر
جفون : يمة اسم الله
غمتها عمة من عاطت وگامت رزلتها گبل لا تنزل
عطاء : وين اكو وحده تگول على نعمة الله اسم الله
جفون : فدوة عمة ويني وين الامومه انا وي نوح بالگوه مدبرتها مو چماله چاهل
عطاء : جا هي التعرس لازم تخلف
°جفون°
حطيت ايدي على بطني بخوف ،عمة نزلت وغمد ضلت يمي
غمد : شبيج راح تموتين
_ اخاف
غمد : يمعودة عليش
_ شلون اجيب
ضحكت وگامت تريد تمشي من طب نوح باوعت عليه عيوني بساع غورگن اجه يمي وهي نزلت
نوح : شبيج ،ليش تبچين ؟؟
شهگت وغطيت وجهي وهو متسودن يريد يعرف شني الخلاني ابجي ،جر ايدي يسأل بنفاذ صبر
نوح : شكو يابة ،شبيج حبيبتي ،جفون ،حاجيني
_ عمة تگول اضن انا حامل
طبگ حواجبه
نوح : وعلى هاي تبچين ؟
_ جا ليش ما ابجي، والله انا اخافن من الجياب
نوح : هسة عود تأكدي والله كريم
جراني لصدره يمسح على راسي ،وبوكت الغده نزلنه انا وياه ،كلنه التمينا حتى علي وغمد ويانة
انا ضليت بس اباوع بعيوني فلا گدرت احطن لگمه بحلگي والتفكير اكل راسي ،تدنه بصوت ناصي گالي
نوح : ما تاكلين
_ما اگدر
ما لح علي لان يعارف بالصار بي امس وشلون تبهذل حالي
غضة : شبيج خايبة جفون شو مگلوب حالج حبوبة
_ معدتي توجعني
محمد : خاف نوح وياج
باوع على عمي
نوح : مگرود يا نوح
محمد : احجي عمي لا تتردين اذا مضوجج گليلي اكسرليجاه تكسر
أبتسمت بتعب
_ لا والله حباب
محمد : جا خوش
بس گضوا غداهم غمد سوت جاي وجدي گال لعمي
رأجس : خلنه نشرب جاينه ونمشي للگياعن اريدن اشوف الزرع
محمد : صار
وبس مشوا عمة حجت لجدة راح تاخذني تشوف شبي وليش
هيج وضعي تعبان ،حظرت روحي و اخذنه نوح بسيارة ليث
انا گعدت وعمة مشت حجتزلي وشوي وردت گالت نص ساعة ويجي سراي
حسيتها اطول نص ساعة صارت بحياتي وهم زين عمة طبت وياي ،بالبداية شرحت هي للدكتورو عن حالتي وگبل لا تاخذلي سونار گالت
الدكتور : مبدئيا الأعراض كلها أعراض حمل بس لازم نتأكد
باوعتلي
الدكتورة : گومي حبيبتي اخذلج سونار
وبس حطت السونار على بطني أبتسمت ضلت شوي تحرك بالجهاز مناه لحد ما سمعت صوت مثل دگات الگلب ،نشغت من گالت
الدكتورة : اللهم صل على محمد حتى نبض صاير
عطاء : يا يمةةة صلاوات
عيوني تعلگن عد الشاشة اريد اشوف بس ما جاي أفهم منها شي ،اطتني كلنكس مسحت بطني و گمت
عطاء : دكتورة واللعبان نفس العدها شني حله ما جاي تگدر حتى تاكل
كعدت على الكرسي واشرتلي اجي اكعد ،بس كعدت گالت
الدكتورة : حاولي تاكلين حتى تتغلبين على النساوه الطفل بأول شهرين من عمره يحتاج غذاء جيد وانا هم راح اكتبلج مقويات تلتزمين بيهن
هزيت رأسي ب أي
عطاء : زين دكتورة شكد عمره بالتحديد
الدكتورة : عشر اسابيع
اطتنه الراچيته مال علاج وكتبتلي موعد جديد و طلعنه تلگانه يباوع بالوجوه أبتسمت وشكد چنت خايفة حسيت بشعور غريب وانا واگفه گدامه هل وگفه واگله
_ انا حامل صدگ
أبتسم ابتسامه عريضة وباوع لعمة
نوح : راح اصيرن أب
عطاء : ادعيلي كله بفضلي
ضحك وكض ايدي ومشينا للسيارة توه يريد يحرك وكلتله
_ اطتني دوه تجيبه ؟
طفه السيارة واخذ مني الراچيته ونزل شوي ورد گضيت الدرب كله حايره شلون بي اذا عارفوا وين اضم وجهي، بس نزلنه حس علي من ضليت واگفه متردده اطب
نوح : شبيج حبيبتي ؟
_مستحيه
ضحك وجر راسي لصدره يشجعني ويفهمني طبيعي الوضع، بالكوات كدرت اطب بعد محاولات الاقناع و گبالنه الخبر لگيته واصل جدة باركتلي وعمي طاير ما مصدگ گام باسني من راسي
محمد : الله كتب أول حفيد الي من عزيز گلب عمها
_ يابعد روحي عمي
محمد : بت الغالي ،تگومين بالسلامة
_الله يسلمك
بابتسامة گالتلي
ناهدة : اتخيلج تجيبين هيج جاهل ابيض يشبهج
أبتسمت على كلامها وشوي وطب عون كضاه نوح يوصيه
نوح : امشي لعمتك هيوفة وغاية گللهن عمو نوح يگول راح تصيرن عمات
عون : شنو يعني ؟
نوح : جفون حامل
عون : تجيب كتكوت
ضحكت مصدومة
_ يا شني كتكوت ولك
عون : يعني جاهل
كل الموجدين ضحكوا على صعوبة استعيابه للسالفة كل ضنه اجيبن كتكوت
نوح : أنت بس امشي لعماتك گللهن هيج وما عليك
عون : خوش
وبس مشى وراها بأقل الخمس دقائق طبت غاية وراها هيوفة يسألن كل ضنهن عون ناصب عليهن اكدلتهن عمة من گالت
عطاء : حتى نبض صاير بيه
أبتسمت هيوفة تصلي على محمد وغاية اجت حضنتني
غاية : خايبة وعلي ما مصدگه أنت تصيرين ام
غضة : ليش شبيها وحد
ضحكت تشرح لجده
غاية : مو هيج بس بعدني اشوفنها ذيج جفون الزغيرة التخاف تنام وحدها
نوح : بعدها تره لا يغرج راح تصير ام
غاية : وأنت راح تصير اب ،وعلي فرحتي ما اطيها الاحد هسة
بعدهم يحجون وطبت غمد تسأل وگضتها علي ب ها وشگلتلج
غضة : خليج من جفون ،وأنت شوكت تحبلين تراج موزغيره
غمد : ماريدن هسة جدة خل اتخرج والله كريم
من ذكرت التخرج شلون اطتني طگه على راسي باوعت لنوح
_ جا وانا هم شلون بي ؟
رفع أجتافه
غاية : يمعودة اشو الدوام صاير كلك عليش ضايجة أصلا من جانبج
هيوفة : جا ما تخلفين أنت هم
غاية : جا انا عدي كواكب مكفيه وموفيه
عطاء : هاي تريد الوادم مثلها
طلع نوح وهن ضلن ودزن على ريحانة والجهال وياهم اجت عمة نجوى ،گعدت ريحانة بصفي تحجيني
ريحانة : الما تريده وتشوفه مثل اخوها طلعت حامل شفتن شلون
هيوفة : قدرة قادر سبحان الله
تگابلن علي كلهن وصوت ضحكهن يجيب التايه وانا گضيتها مدلغمه، حركتلها حواجبي متشمته من طب صخر وصاح
صخر : صوووت
باوع عليها
صخر : ضحكتج بالباب سمعتها
دنگت هي وعمة تعذرت منه
نجوى : اعذرنا ياعمة تعارفها من زمان هاي صوت ضحكتها
صخر : اعارفها من دونهن ما تعارف تنصي السلولي
جان مبين عليه ضايج وحتى نغير السالفة گالتله هيوفة : ما دريت
صخر : شني ؟
هيوفة : راح تصير عم
بينت عليه ملامح الصدمة وبساع أبتسم من ردت گالتله
هيوفة : جفون حامل
باوعلته بخجل من گال
صخر : تگومين بالسلامة بعد اخوج
بس رديت عليه طلع ،ضلت عمة تلوم بريحانة وشوي ومشن ،وبس صعدت توني تمددت وطب نوح يحجي وي عمة گعد يمي
نوح : اذا اكلج فد سالفة لو گلتها الج الا هسة تخلين نسمة وهذا جعفر وتجين
فتح سبيكر وانا تدنيت عليه اسمع
زهرة : شكو ؟
نوح : جفون حامل
نشغت بفرح وانا أبتسمت من گالت
زهرة : يا يا عليك الله
نوح : أي والله
زهرة : شو وينها احجي وياها
اطاني الموبايل ضليت احجي وياها وهواي وصتني لا اصعد
ولا انزل واكل وانام زين ولا اشيل ثگل خلتني احسن روحي مسوؤله عن روح لازم احافظ عليها ،اطيت الموبايل لنوح من كالت عمة جعفر يريد يحجي وياه
تمددت اباوع عليه گاعد گبالي ويسولف
نوح : جا دامك زعلان عليه ليش توصيني امشي وياه
جعفر : يستاهل مايحترم صاير طباگات كلش
نوح : تعال شوفه زايد ما ناقص وگاضيها كله مو بالبيت
جعفر : متسودن عليها
نوح : حگه ،چماله غريبة بعيده على عيونه
جعفر : من سنين گلتله راح تطيح ليث دير بالك الدنيا ما تعارف بيها شتسوي گال ماعليك دامني هاويها اخذها
نوح : خابره أنت تراه مختنگ كلش لا تزيدها عليه بزعلك وأنت أقرب واحد اله
جعفر : خله يولي اريدن اتوبه ما يرفع ايده علي
فتحت موبايلي اشوفن الساعة وانتبهت على الشحن بملامه گلتله بس سد الخط من جعفر
_ ليش ما جبتلي شاحنة هسة شلون اشحنه
نوح : نسيت وداعتج وهم هسة عزلت المحلات
_ جا جيبلي شاحنة ليث بس اشحن واردنها
نوح : وادم طاگه أنت وليث كله ايڤونات خوما مثلي، الك الله يالفقير
ضحكت وهو هز ايده وطلع شوي ورد شكلها بالنقطة يمي
نوح : اشتغلت حرامي علمودج
_ فدوة للحرامي
غمزلي
نوح : هذا الحرامي مو بس شاحنات يبوگ ،حتى گلوب
_ لا والله
نوح : أي وداعتج
گعد گبالي
نوح : شكد حقيرة ما تگليلي احبنك
_ يعني لازم اگولها
هز رأسه ب أي ،ملت راسي وكلت بصوت ناصي
_ شحمة تعشگ على نوحها
قرب وجهه مني وجراني عليه
نوح : گوليها
باوعت بعيونه وشجعت نفسي هواي گبل لا احجيها
_ احبنك
حضني بقوة يضحك
نوح : بويةةة شحلاهااا، شوو عيديها
ضحكت وجريت روحي منه
_الطمع مو حلو
نوح : اممم
گام قفل الباب واجه تمدد بصفي ،وانا اسمع لسوالفه نمت وگعدت الصبح على وجع قوي بمعدتي، ركضت للحمام وفرغت
شكو شي بيها وهو وراي اجه مفزوع خايف النعاس بعيونه ،سندني ورديت للغرفة وانا احسن بروحي خاوية، تمددت وغطاني
نوح : ها هيج راح تضلين يوميا على نفس الاذيه؟
بتعب گلتله
_ تگول جدة بس هل شهرين بعد
ضل من القهر على وضعي حتى ما گدر ينام ،يومين وردت عمة وانا كل ما جايني اتعب اكثر حتى لوني صار اصفر على گولة جدة واسبوع وردت طلعت ل نسمات محاظرة هناه گامت تدگ وتلطم تحلف ما تمشي
زهرة : شني هي بكيفج
نسمات : خلي تولي هاي السنة ما اريدن من يطلع أبوي ونرد اكمل
زهرة : حتى لو طلع ابوج ما راح تضلون هناك وهم ما ضللها شي ليش حرامات تروح عليج
وبالگوات اقتنعت ومشوا ثاني يوم الصبح والعصر اجه جعفر يسأل على ليث گالتله عمة
عطاء : مشوا هو وعمتك اخذوا نسمات للكلية
عگد حواجبه ومبين عليه ضاج لان ما احد گاله
جعفر : شوكت مشوا ؟
عطاء : الصبح
هز رأسه ب خوش ومشى ،وبيوم الردوا چان هو عدنه يقلمون الاشجار هو وعلي ،وطبت نسمات و عمتي
ابد ما تحرك ولا دار رأسه عكس علي الهد كلشي من ايده ومشى يسلم على عمة
زهرة : شبيه جعفر ؟
علي : ما اعارف والله ،اضن اكو سالفة مخليته يطنگر هيج
اباوع لنسمات عيونها عده بس ما حجت وخلت وطبت، بس سلمت علي سألت أول شي على أمها نوبة گالت
نسمات : ما تعارفين ليش ضايج ؟
هزيت رأسي ب لا
_ بس اضن لان مشيتي ومحد گاله
صفنت بوجهي
نسمات : بس هو مو وصي علي
_ انا كلتلج اضن يعني مو اكيد
نسمات : عاشرته وعرفت طينته شني وماكو غير هذا السبب
_ بعد ما اعار انا
نزعت عباتها وطبت جوه شوي وصاحتني غمد من باب المشتمل، مشيتلها ولحگتني نسمات ورا شوي
غمد : سويتلهم گهوة ويدها الهم نسمات وانا اجيبن الكرزات وراج
_ شني خبط مالح مر
غمد : علاوي هيج يحب
غميتها واخذت من چيس الكرزات اكل ونفسي تلعب رديتهن الچيس باوعتلي تضحك
غمد : تقهرين
_ يجيح يوم
غمد : صدگ ما سألتج حواري شسوت من درت
_ ذلتني
غمد : عرفتها والله ،احجي وياها وكلتلها ما دريتي جفون
حامل جان هاي بس قرت اختفت بس ما توقعت راح تجيج
_ عود انا توني اريد اصعد وهجمت علي وما سكتت الا من شافت ليث وصخر طبوا
نسمات : الگهوه بردت
غمد : جا مو گلتلج اخذيها
اخذتها وطلعت تدردم علينه وراها غمد وانا لحگتهن بس شافها اجت عليهم نزع الجفوف واجه اخذ منها الصينية بس ابد ما حاجها، ردت يمي ضايجة تباوع عليه
_ شبيج ؟
نسمات : يغثثث هذا فلا ينجرع
_ حقنه شوي الله يساعدج عليه
نسمات : عليش الله يساعدني انا ما راح اضلن على ذمته
_ اممم
ضلوا كل ما يتلاگون حتى سلام ما بيناتهم، انا طبيت بالشهر الرابع و بديت اتقبل الاكل وبالخامس بطني بدت تبين ومن اخذت سونار عارفت بي ولد ،نوح من بشرته ضاج
نوح : چنت رايد بنيه
زهرة : احمد الله واشكره يمة نعمة ولد لو بت
نوح : الحمدلله
بس ردينا بوجهنا صارت هوسة البنات يغسلن بالفراش الشتوي على خطوبة سيوف وبرهان الضلت يوميا متأجله، هدت الفرچه من ايدها
هيوفة : ها بشررن
زهرة : طلع وليد
وكلنه اضن چنه متانين جية يوم الجمعة عمن راح ينتهي انتظار سنين بعقد بيه تصير حلاله ،نزلت من فوگ على كيفي امشي رافعة فستاني صاحت علي
غاية : ديري بالج ترا اكو ماي مگلوب
كتلها خوش وانتبهت گبل لا احطن رچلي على كل باية بس صرت يمهن گالت بمدح
نسمات : طالعة تخبلين لايگلج الفستان
أبتسمت وباوعت على روحي ،فستان سمائي مال حوامل مستور چان ،ما لبست الحجاب چنت خالته على اچتافي ،مشيت يم سيوف
_ شلونها العمنويات ؟
سيوف : زفت
مديتلها ايدي عود مايك
_ كلمة واحدة تعبر عن شعورج هسة
سيوف : وخغي مني
_ الله يهديج ليش تعيطين مو حامل خرعتي الجاهل
سيوف : يمةةة
ضحكت وحطيت ايدي على بطني انگلبت گلب من گالوا راح يعقدولهم ،طببوها للغرفة وبساع رفعت شالي على راسي طب برهان وجدي وعمامي كاظم ويوسف والسيد، تلگيناهم بالهلاهل
اجت وگفت بصفي
غمد : اختي اضنها راح تتخربط جوه
شوي وفتحوا الباب ونسمع الشيخ يردد
_ الحمدلله اللذي بنعمته تتم الصالحات ،مبارك لكم
هلاهلنه ترست البيت واضن كلنه فرحانين لفرحته ومو مهتمين لضوجتها، طبت عمه حنان من ضلوا بس هو وياها ،جرت منها البرگع وهو عيونه اكلتها اكل ندست غمد
_ باعي النظراااات تحجي وعلي ،اريد ابجي من الفرح
غمد : راگعة اختي بعرض الحايط وفرحانتله عمن يستاهل
طلعوا من الغرفة وگعدوا على الكراسي ثنيناتهم چانوا مخربطة اوضاعهن بس هو أكثر بايده كلنكس چان
كلساع يمسح گصته ماكو احد غريب غير شي قليل عمن ما عزمنه
بسبب الاوضاع بس هو حاله مگلوب گلب جابتلهم الحلقات عمة شيماء أول شي هو اخذ حلقته واندار عليها ماد ايده،حطت ايدها بين ايده وبس
لبسها الحلقة هلهلنه وبعد ما لبسته حلقته هوستله ريحانة
ريحانة : حبها ولك حبها ولا تخاف من أمها
أبتسم وباوعلها خزرته بس ما اهتم تدنه باسها من راسها و وخر ،اضن چانت اكثر خطوبة وصلتني المشاعر البيها، هو انتصر بحبه فرحته ما يطيها الأحد وهي جاي تعيش شعور التناقض وعدم الرضى بكل الجاي يصير
بس مشى گالت
سيوف : انزع فستاني اختنگت
كومتها غمد وريحانة واخذنها تبدل ،أجواء خطوبتهم چانت بيها نوع من الهدوء اخذنه راحتنا بيها ،گعدت انا اباوع
على دره وميمنة وحوراء يرگصن وي حواري صاحت علي
حواري : ها الحامل ما تجين ترگصين وياي ؟؟
زهرة : يا وين ترگص خايبة اسكتي لا تصدگ وتگوم
حواري : جا ضوجة عمة شني ارگص وحدي ؟
چانت رقية شايلة آدم ابن هيوفة اطته لعمة زهرة وگالتلها
حواري : انا جاية وياج
حواري : أي عفية ،شدي الشال
وهاي ما چذبت خبر نزعت شالها وشدته ونزلت وياها وامها كلساع وصايحتلها ومن حاحتها عمة زهرة الا كفت عنها بس ضلت تباوعلها ما راضية
ومثل ما متعودين وكل مرة يلتمون عمامي وكل الولد يباركون للعروس، انا گضيتها بس حاطة ايدي على خدي واباوع بعيوني ،ولا باوعتله وهو عيونه معلگه
عدها
تدنه عليه صخر حاجاه بصوت ناصي مبين گاله ينزل عينه لان بساع دنگ ،ومن گضه اليوم گعدت مفصخة عود كلشي ما مسوية
سبحت وتمددت ،وبنص غفوتي وفزيت على حركته يمي ،تدنيت ضميت روحي بحضنه بردانه، تحسس شعري بأيده وبملامه گال
نوح : ما منشفته ،ليش هيج ؟
وانا مغمضه جاوبته
_ گلت الجو زين
حسيت عليه من گام بس ثگل بعيوني ما اگدر افتحهن شوي وصار يشسور شعري بس تأكد منه نشف طفه الشسوار ورداه لماكنه واجه يمي
وثاني يوم فزيت على صوت الباب وليث يصيح باسم نوح گعدته يطعله لان متفقين اليوم كلهم يشمون للكيعان عمن بدوا يحظرون للحصاد ...
°غاية°
نزلت علمود اسويلهم ريوگ گبل لا يمشون ،گبلي لگيت ريحانة گاعدة صبحت عليها وسألتها شني نسوي گالت
ريحانة : انا سلگت بيض وبعد گلت اگلي طماطه وعودنه باسطرمه هم اسويها
_ خوش
بدينا انا وياها نركض مراكض گبل لا يگعدون وبس گضينا گعدناهم ،حطيت الصنينة بالدوانية وشعلت الصوبة علمود الجاي ومشيت اشوفن الباب من اندگ
صحت بصوت ناصي
_ منو
بس اجاني صوت صخر فتحته
_ ها خوية صباح الخير
صخر : صباح النور بعد اخوج ،گعدوا الولد ؟
_ أي ،تطب يمهم
سكت شوي گبل لا يگلي
صخر : سويلي درب اذا احد گاعد
_ ريحانة گاعدة بس أنت طب من الباب الخارجي
سويتله درب طب گبلي وانا كملت للمطبخ ،بأستغراب سألتني من سمعت صوته
ريحانة : صخر هنا ؟
_ أي
اخذت قوري الجاي ومشيت للديوانية گعدت اصبلهم
ضيرم : ماتجي تاكل ويانة ؟
چان گاعد على التخم ،نزل وياهم ياكل من سمعت صوتها تصيحني
_ ها ؟
ريحانة : اخذي الزيتون ناسيته
اخذتها منها اطتهمياه وضليت واگفه مركزه متأكده ما يتخيالي صخر وعزيز صاير بيناتهم شي واحد ما باوع بوجه الثاني ابد
ضيرم : انا تعبان من المستشفى ساحليني وياكم ليش ؟
عزيز : جا انا هم تعبان من المحاكم
فقار : وانا من التصليح مسموطين اهلي
صخر : شرايكم تضلون كلكم واهدن ليث عليكم
طلعت من سمعت صوت نوح بره صحتهم طبوا هو وعلي يمهم وبس گضوا كلهم مشوا للگياعن بس گبل لا يمشون سألت نوح على ليث گال گبلهم هناك ،قهر اليمرني على حاله صعب اوصفه
ضليت واگفه بالحوش اسمعهم يتداهرون وي برهان وبس اجاهم سياف سكتوا
طبيت جوه وعلى الأساس اردن انام عمني تعبانة من أمس الخطوبة والركضة گبلها بچم يوم بس گعدت علي كواكب وضليت حايره بيها ومن عجزت تنام نزلت حتى اطيها لعمة بس لگيت جهال هيوفة يمها ...
شكرا لزيارتكم عالم روايات سكيرهوم
