رواية جزيرة غراب الوادي الفصل السابع
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«قد تحمي شهامتك غريبٍ من بطش السُّلطة لكنّ الغدر الحقيقيّ يتربّص بكَ دائماً من عينٍ تعيشُ معك في نفس الدار.»
(سـ ـلاحٌ حادّ وشهامةٌ قاطعة)
﷽
في صباح اليوم التالي اجتمع آل جهدان على مائدة الإفطار وكان الحاكم غنام يتفحص وجوه أبنائه بنظراته الصارمة يسأل كل منهم عن عمله ليتأكد أن الأمور تسير على ما يرام:
غنام: المهم.. البضاعة اتسلمت وكل حاجة تمام؟
شاهين (بنبرة يملؤها الغرور والغمز): أكيـد.. كله بسبب تخطيطي ولا إيه يا جلال؟!
جلال (بجمود ونبرة هادئة تحمل السُم): آه.. الحاجات الشيطاني تاجي منك أمّال من مين يعني؟!
خضرة (بعقد حاجبين وفضول): بضاعة إيه دي؟!
غنام (بقتطاع حازم): شغل يا خضرة.. متشغليش بالك!
خضرة (بتدخل وتفاخر): هما عيالي الله أكبر ناصحين لأمهم وواخدين الزكاوة كلها!
تذكرت كريمة حديث جلال عن "التفكير الشيطاني" وغمزاته لشاهين فلم تستطع كتمان ضحكتها وقالت بمداعبة:
كريمة: صُح.. معاكي حق يا مرت عمي!
غنام (بنظرة حادة لكريمة ثم لخضرة): قصدك إيه؟! ومين الغبي يعني؟!
خضرة (برفعة حاجب وتدارك): مقصديش حد بس بقول إنهم واخدين مني حتة الزكاوة!
غنام (بسخرية): فين دي؟!
علي (مشاركاً بضحكة خبيثة): قصدها يا أبوي إنها أذكى منك!
خضرة (وهي تزغره بعينيها بحدة): علي لم لسانك يا ولد!
علي: مقصديش.. بضحك وياكي يا أماي!
وليد (موجهاً حديثه لجلال بنبرة خفية): خير.. طالع بدري يا جلال؟
جلال: في سوق النهاردة.. طالعين نجهزوا له.
وليد (بتلميح): مقلتوش يعني.. وسوق عادي ولا إيه بالظبط؟!
غنام (بنبرة حادة قاطعة هزت المائدة): وبعدين وياكم؟!
صمت وليد في الحال ولم يزد حرفاً كي لا تفهم نساء المنزل قصده المبطن بينما استمر جلال في تناول إفطاره ببرود ثلجي يسبق العاصفة.
بعد وقت انفضت المائدة وتهيّأ الجميع وبدأوا يغادرون واحدً تلو الآخر.
وما إن خرج جلال من باب السرايا حتى وجد وليد بانتظاره على العتبة عيناه تلمعان بفضول مرتاب:
وليد: مش عاوز حد وياك في السوق؟
جلال (بدون أن يلتفت إليه وببرود): يونس معاي.
وليد (بعقد حاجبيه بضيق): اشمعنى يونس؟!
جلال (وهو يعدل عباءته بحدة): كيفي ومزاجي إيه دخلك؟!
وليد (بابتسامة باهتة حاملة للسم): وماله.. ماشي
تركه جلال وغادر ليستعد لأمر السوق بينما وقف وليد يبتسم بمكرٍ خبيث وعيناه تلاحقان أثره بوعيد حدث نفسه بنبرة يملؤها السُمّ:
وليد: حلو قوي.. الاثنين مرة وحدة وخصوصاً يونس!
ثم خرج مغادراً خلف جلال بخطوات حثيثة لِيَحِيكَ أمراً ما في الخفاء كعادته!
ــــــــــــــــــــــــــــــــــــــــــــــــ**
كانت موج في منزلهم تتجهز للذهاب إلى عملها وأثناء خروجها من الغرفة صادفت والدتها "سعدية" التي وقفت تنظر إليها بتفحص شديد:
سعدية: آه.. وده بقى اللي من عشية رابطة رأسك عشانه؟!
وضعت موج يدها على مقدمة رأسها باحراج وتوتر:
موج: احم.. إيه عادي!
سعدية (برفعة حاجب): غريب قلتلك كتير مكنش بيلد عليكي كلامي.. إيه اتغير بعدين رحتي فين؟ عديتي على زينب إياك؟!
موج (بمحاولة للهروب): أيوه.. وحدة من المشغل راحت حوّدت معاها.
سعدية (بغمزة وتفتيش): امممم.. وماله يارب يكون الاهتمام ده وراه حد يمكن نفرحوا ولا حاجة!
موج (بنفاذ صبر): حد مين وفين الاهتمام ده أساساً متزوديهاش يا أماي.. سلام عشان اتأخرت!
خرجت موج من المنزل دون انتظار رد من والدتها لتذهب إلى عملها كي لا تُسأل عن أشياء أخرى.
ـــــــــــــــــــــــــــــــ**
كان يسير اليوم بشكل عادي؛ تقف موج تنظر إلى النساء وأفعالهن بطفش وملل.
وعند خلو المكان قليلاً اقتربت منها الخالة زينب بسؤال:
زينب: مالك يا بت بتبلمي في الناس كِده ليه؟!
موج: مفيش يا خالة.. بس النسوان اتعلمت المياعة!
زينب (بضحكة خفيفة): هما ولا انتي اللي زي المصيبة مش عارفة حاجة؟!
موج (برفعة رأس): أنا ده أنا اعرف البير وغطاه بس مبحبش المسخرة!
زينب: يمكن معاكي حق.. الوحده منهم تبقى جوزها كاره سحنة اللي خلفوها وراننها علقة ليل وعلقة صبح وتاجي هنا تعمل ست الحسن اللي راجلها مسحور بجمالها!
ضحكت موج وقالت:
موج: يعني انتي كمان واخدة بالك أهو؟!
زينب: له.. أنا اتعودت أكل العيش يا بنت سعدية!
موج: صُح.. أكل العيش خالي عامل إيه؟ رنّك علقة الصبح؟!
زينب (بضحك): والله بتتريقي؟!
موج: له بهزر.. خالي غلبان!
زينب: آه اعملي زي أمك أخوي غلبان وانتي كيف سوسة القمح!
موج: ده عشان بس بتحبك!
زينب: حبك برص يلا عشان ننضفوا.. همّي!
ــــــــــــــــــــــــــــــــــ**
أكملوا عملهم بهدوء بينما كان جلال قد نظّم السوق منذ فترة وبدأت الحركة تدب به والناس يتوافدون عليه من داخل وخارج الجزيرة.
أتى هاني إلى جلال بوجه يائس واقترب منه بلهفة وقلق ثم قال
هاني: جلال.. لازم نوقفوا كل حاجة ضرورِي!
جلال (بعقد حاجبين واستغراب): ليه حصل حاجة؟!
هاني: آه.. الحكومة دخلت تاني ونفس الكلام متخفيين مش هنقدروا نطلعوا البضاعة ولا ندخلوا حاجة!
جلال (بضيق وجزّ على أضراسه): يا بوي وبعدين جياتهم كترت إحنا من يومين بنجهزوا للزفت ده عشان نخلصوا عرفوا كيف والسوق مشهور بالتجارة العادية؟!
هاني: مخابرش اللي مراقب نقطة التفتيش لما لقى طالعة غريبة مشي وراهم وعرف..
تنفس جلال بغضب مكتوم ثم قال بصرامة حازمة:
جلال: ماشي.. لِمّ دنيتك وخَبّر منعم وكلم التجار عشان أكيـد هايفتشوا ويقلبوا السوق!
هاني: ماشي.
تركه هاني وغادر ليكمل عمله بينما كان جلال يمسح وجهه بيده بقلة صبر ويحسب الخطوة القادمة
***
وقبل خروج موج من صالون الخالة زينب أتاها اتصال هاتفي من خلود فأجابت بنفاذ صبر:
موج: نعمين؟!
خلود: أيوه.. أمك بتقولك وانتي جاية عدي على السوق هاتي معاكي خضار بالمرة ولو لقيتي حد بتاع مداسات هاتيلها جزمة للبيت عشان جزمتها عدمت!
موج (بصدمة وزعيق خافت): نعم يا اختي مالي أنا بالتسويقة والجزم والا عشان قربت من السوق؟
خلود: إيه يا مري؟ قربتي فين أنتي بس هاتتمشي شويه ؟!
موج (بتذكر وتنهيدة): آه.. أيوه صُح بس أنا معاييش فلوس تكمل مجبتوش خضار من عندكم ليه المرة دي؟!
خلود (بضحكة ومشاكسة): متتأخريش.. ولو لقيتي حاجة حلوة جيبي أمك فكت الكيس النهاردة!
موج: فك سنانك غوري!
أغلقت الهاتف بضيق ثم التفتت للترتيبات الأخيرة مع الخالة زينب لتخبرها بالمغادرة:
زينب: ماشي روحي.. وبكرة متتأخريش عندنا عروسة!
موج: ماشي.. سلام!
ـــــــــــــــــــــــــــــــــــــــــــــ**
خرجت من المكان متجهة إلى الطرف الآخر حيث يقام السوق. كانت تسير بطفش وملل فاليوم شارف على الانتهاء وكانت تريد العودة للمنزل بدلاً من زحمة السوق وطين أزقته.
وقبل أن تدخل بين الباعة...
دخلت موج السوق وبدأت في شراء الأغراض بتذمر حتى وصلت لسطحة بائع الأحذية، فبدأت تتفحصهم لتأخذ أحداً منها لوالدتها.
وبعد تفكير استقرت على أحدهم ونشلت ورقة بـ 200 جنيه وناولتها للبائع وقفت تنتظر الباقي.
وفي تلك اللحظة وصل إليهم "منعم" مسرعاً وقال بلهجة حادة:
منعم: بخيت يلا لِمّ ليلتك قوام!
البائع بخيت (ب استغراب): ليه؟!
منعم (بتلميح وغمزة يفهمها أصحاب الشغل): هيكون ليه يعني يلا همّ!
تركه منعم وغادر يركض نحو باقي الباعة. وقف بخيت يلملم أغراضه بتسرع يصيح:
بخيت: يلا السوق هيفض سيبي من يدك يا حاجة خلصنا النهاردة!
موج (برفعة حاجب وصبر نافذ): هات باقي الـ 200 عشان أمشي!
لم يعرها بخيت اهتماماً وكان يجمع الأحذية الظاهرة فوق الطاولات وأكياساً مخفية من تحتها بارتباك شديد فقالت موج بغيظ:
موج: مش سامع ولا أيه خلصني عايزة أمشي!
بخيت (وهو يدفع الأكياس تحت ذراعه): خدتي إيه؟
موج: المداس ده.. وليا باقي الـ 200 جنيه!
بخيت: بكرة تعالي الدكان خديهم.. يلا مش وقتك خالص!
موج (بقوة وحزم): مالك متسربع كِده ليه اديني فلوسي يا تاخد مداسك وهات الـ 200!
صاح بخيت بوجهها وهو يحمل بضاعته:
بخيت: بقولك إيه مش وقتك حرق أبوه الـ 200 على المداس.. يلا من هنا!
موج (بشرارة في عينها ونبرة حادة): اتكلم زين كلمة تسد بلعومك.. خد!
ألقت بالمداس فوق الطاولة بقوة وقالت:
موج: هات فلوسي عشان أمشي!
بخيت (بغضب وشرار): تصدقي عشان قلة ربايتك دي.. لا هتاخدي الـ 200 ولا أم المداس وامشي من هنا قلتلك!
موج (بعينين تتطايَران شراراً): لو مجبتش فلوسي هتشوف قلة الرباية على حق.. مالك صابتك شرارة كأنك عامل عملة وخايف منها!
بدأ الكلام يشتد بينهما بصياح وتراشق حتى بدأ المارّة يتلفتون إليهم في جو مشحون بالغضب والترقب.
وفي وسط هذه المعمعة أقبل جلال من خلفها وما إن لمح ظهرها مع صوت الصياح العالي حتى تنهد بطفش وقال في باله: هي بعينها!
صمت بخيت فجأة وابتلع لسانه عند رؤية جلال فنظرت إليه موج باستخفاف وقالت:
موج: خير بلعت لسانك يعني يلا خلصني أحسن لك!
جلال (من خلفها بنبرة جهورية ثقيلة): وبعدين وياكي انتي تاني؟!
فزعت موج من مكانها والتفتت بزعر لم تتوقع وجوده وظلت شاخصة العينين دون رد.
جلال (بعقد حاجبين ونظرة تفحصية): بتعملي إيه هنا؟!
موج (بمحاولة لاستعادة شجاعتها): بتسوّق مش ده سوق بردو؟!
جلال: واللّه واللي تتسوّق تقف تردح كيف الغجر في وسط السوق؟!
موج (بدفاع وغيظ): هو اللي غلط في الأول ومش راضي يديني باقي فلوسي!
نظر جلال لبخيت بنبرة حازمة:
جلال: خلصت؟
بخيت (بارتباك وتلعثم): لسه يا جلال بيه.. البت دي مش مخلياني ألم فرشتي ولا أتحرك!
جلال: طيب خلص شغلك قوام!
أكمل بخيت عمله بسرعة شديدة يلملم أطراف بضاعته قبل وصول الشرطة ثم أعاد جلال نظره إلى موج وقال بتهكم:
جلال: هو اللي غلط بردو؟!
موج: آه طبعاً.
جلال: سبحان الله كل مرة الناس هي اللي بتغلط فيكي وانتي مبتعمليش حاجة واصل!
صمتت موج وتراجعت خطوة للخلف دون أن تجد رداً فنظر إليها جلال بنصف ابتسامة ساخرة وقال:
جلال: انتي ليكي إخوات بنات توأم؟!
موج (باستغراب): له.. ليه؟!
جلال: أُمّال كل ما أتلفت ألقاكي في وشي ليه حد مسلطك عليا يا بت انتي؟!
موج: صدفة!
جلال (بتنهيدة مريرة): من أول يوم قطعت فيه طريقك فالليل وأنا المصايب ملاحقاني كانت شوفة نحس!
تبسمت موج رغماً عنها من طريقة كلامه فنظر إليها بحدة:
جلال: إيه يضحك؟!
موج: مفيش حاجة..
جلال: روحي يلااا!
موج (بإصرار): هروح.. بس عايزة فلوسي الول.
جلال: ليكي كام؟
موج: 200 جنيه عند الحرامي ده!
أخرج جلال محفظته ونشل منها ورقة مالية بـ 200 جنيه ومد يده بها لموج وقال:
جلال: يلا!
وقبل أن تمد يدها لتمسكها أقبل يونس يركض باتجاههما والشرر يلتهم عينيه وقال بلهاث:
يونس: يا خوي دخلوا!
جلال (بثبات وصرامة): وماله.. خليهم ياجوا وانت روح دلوك.
يونس: له.. أنا مستني معاك!
جلال: له مضمنش اللي هيحصل.. روح يا يونس
ثم التفت لموج قائلاً: وانتي يا بت روحي وامسكي!
موج (بتردد): أنا فلوسي عنده هو مش عندك!
التفت يونس إليها وإلى جلال بابتسامة خبيثة فضولية بينما صاح جلال فيها بنفاذ صبر:
جلال: امسكي وعلي بيتكم أحسن لك عشان روحي طالعة دلوك!
أخذت موج منه المال بسرعة وغادرت تهرول بينما التفت يونس إلى أخيه وسأل بابتسامة ومداعبة:
يونس: مين دي وفلوس إيه اللي أديتهالها؟!
جلال (بجمود وضيق خفيف): ومالك مبسوط كِده؟! روح يا يونس انت كمان يالا!
قبل أن يغادر أحد أقبل رجال الشرطة إلى السوق بسرعة خاطفة وأغلقوا كل مخرج فيه ليحاصروهم على غِرّة!
كانت موج تحاول المغادرة والهرب من الزحام لكنها لم تستطع بعد أن سُدّت المنافذ فتنحت مع النساء جانباً وهي ترتجف خوفاً.
بينما دلف الضابط إلى داخل السوق بخطوات واثقة حتى وصل إلى جلال وقال بنبرة تهكمية:
الضابط: مفاجأة.. مش كِده؟!
نظر جلال له من أعلى لأسفل ببرود ثلجي يسبق العاصفة ثم قال:
جلال: آه حلوة.. والخِلقات دي أحلى عليك يا سعادة الباشا!
صاح الضابط بصوت مرتفع هز أركان المكان:
الضابط: يلا يا بني انت وهو اقلبوا لي كل حتة في المكان هنا أي حاجة غريبة هاتوها.. وكل الناس دي تتفتش حتى جلال بيه!
ثم أعاد نبرته المنخفضة الممتلئة بالتحدي وقال لجلال:
الضابط: حاسس إنه "سَبْع" المرادي!
بدأ التفتيش في جميع أنحاء السوق بعنف وإتلاف يلقون البضائع والأشياء على الأرض بغرابة وكأن لديهم علماً مسبقاً بمكان شيء معين كانت موج تقف برعب تتلفت حولها ولا تفهم ماذا يحدث.
مرت دقائق من التفتيش الشرس حتى أتى أحد العساكر وبدأ بتفتيش جلال ويونس بدقة شديدة.. لكنهم لم يجدوا أي شيء يدينهم أو يثبت التهمة عليهم!
بدأ يظهر على وجه الضابط علامات الغضب والضيق من فشل الخطة فتبسم جلال بثقة وشماتة هادئة وقال:
جلال: السِبَاع مش بتطلع برّة الجزيرة يا سعادة الباشا!
الضابط (بشرار في عينيه): هنشوف!
التفت الضابط فجأة إلى الزاوية التي تقف فيها النساء ثم قال بشكٍّ وخبث:
الضابط: وليه متكونش مداري حاجة في الستات؟!
الضابط: فتش يا بني الستات دي!
جلال (بعينين كالجمر ونبرة حادة): يفتشوا إيه؟!
الضابط (بابتسامة خبيثة): خفت ليه اهدى!
جلال (بثبات وصرامة تهز الأرض): مين قال ده خوف محدش هيقرب على الحريم!
الضابط: مش بمزاجك.. وهيتفتشوا!
اقترب العساكر من زاوية النساء بخطوات متسارعة فاستوقفهم جلال بصوت كالرعد زلزل المكان:
جلال: وقف منك له!
اقترب جلال وسدّ الطريق بجسده أمام العساكر وعيناه تشتعلان غضباً وقال بوعيد قاطع:
جلال: لو واحد بس يده انمدت على حرمة ولا بت من اللي هنا.. هكسرها!
صاح الضابط بغضب مشتعل:
الضابط: تعمل إيه انت عارف كلامك ده يوديك فين؟!
التفت إليه جلال بعقد حاجب وثبات لا يتزحزح وقال:
جلال: ولا يفرق معاي لِمّ رجالك وفتش المكان زي ما تحب.. لكن الحريم له!
اقترب يونس من جلال بقلق شديد ليحثه على الهدوء قبل أن تتفاقم الأزمة:
يونس (بهامس مضطرب): يا خوي!
جلال (بدون أن يرفع عينيه عن الضابط): متخافش.. مهيقدرش يعمل حاجة!
الضابط (بتحدٍّ وغمز خبيث): طيب.. افرض معاهم حاجة كِده ولا كِده؟!
التفت جلال نحو منعم ثم قال بحزم قاطع:
جلال: منعم جيبلي أي طرابيزة من دول هنا!
تلفت منعم سريعاً وحمل إحدى الطاولات الخشبية الكبيرة بمساعدة أحد الحراس ووضعوها بثقل أمام جلال والضابط.
التفت جلال نحو جمع النساء وقال بنبرة هادئة ورزينة:
جلال: اللي في يدها حاجة.. تسيبها هنا.
ساد الصمت في المكان للحظات قبل أن تتقدم النساء واحدة تلو الأخرى يضعن ما بأيديهن فوق الطاولة.
حتى أتت موج من بينهن بخطوات مترددة ووضعت أكياس الخضار من يدها.
نظر إليها جلال بتنهيدة ثقيلة ومسح على وجهه بطفش شديد عند رؤيتها؛ فهي ما زالت موجودة ولم تغادر كما طلب منها
كان يونس يراقب نظرات أخيه باستغراب ورغم ثقل الموقف وسخونته شعر أن جلال يجمعه شيء خفيّ بهذه الفتاة بالذات.
عادت موج إلى الخلف مجدداً بين النساء فالتفت جلال للضابط وقال بثبات:
جلال: ده اللي معاهم.. فتش براحتك لكن حريم.. له!
أشار الضابط للعساكر بقلة حيلة موجهين نحو الطاولة.
ورغم أن أغلب الأكياس كانت مجرد خضروات وأغراض منزلية عادية إلا أن الضابط أراد استفزاز جلال؛ فبدأ العساكر بنثر الأشياء وبعثرتها بعنف حتى اختلطت الأغراض ببعضها.
تفرس الضابط في وجوههن وقال بصوت مرتفع:
الضابط: حد معاه شنط خاصة يجيبها هنا!
تقدمت القليل من الفتيات ومعهن موج ووضعت كل منهن حقيبتها فوق الطاولة بجانب الأغراض فقال الضابط بمرارة وهو يشير للعساكر:
الضابط: فتش لي دول كمان!
بدأوا في إفراغ محتويات الحقائب؛ كانت أغراض فتيات عادية أدوات تجميل بسيطة هواتف وبعض النقود والمرآيا حتى أمسك العسكري حقيبة موج وأفرغ محتواها فوق الطاولة.
تناثرت منها بعض النقود المعدنية و هاتفها وزجاجة العطر التي أتى بها "حليم" سابقاً ومقص صغير.
اقترب الضابط من زجاجة العطر أولاً فتحها وقرّبها من أنفه بقرف ثم انتبه للمقص الملتقى بجانب الأغراض فابتسم بخبث ليثير غضب جلال وقال:
الضابط: حلو ده سـ ـلاح أبيض.. اركنلي البت دي على جنب!
موج (بتسرع وانقضاض): يعني إيه سـ ـلاح أبيض؟! ده قصافة خيط 4سم!
التفت إليها الضابط ببرود مستفز:
الضابط: مش مهم المهم إنه سـ ـلاح أبيض وبعدين مخلياه معاكي ليه يعني؟!
موج (بدفاع غاضب): كنت شغالة في مشغل وبحتاجه عادي!
تدخل جلال بصوته الحاسم وأشار بيده لجمع الأغراض وقال للجميع:
جلال: لِمّوا حاجتكم يلا!
الضابط (بتمسك واستفزاز): وماله.. لِمّوا يا بنات إنما البت دي لا معاها سـ ـلاح أبيض وهتتاخد على النقطة!
امتدت يد جلال بثقل وأمسك بالمقص الصغير وقال بنبرة تهكمية:
جلال: عشان ده؟!
الضابط: آه.. عشانه!
وقبل أن يرتد طرف الضابط قسّت يد جلال على المقبض وكسره وفصله عن بعضه بقوة حاسمة ثم ألقى بكل جزء منه في اتجاه مختلف وقال بنبرة حادة كالسيف:
جلال: بكفاية بقى عشان خلقي ضاق لِمّ رجالك وعاود مطرحك.. صدقني أقدر أخلي غنام بيه يشيعك مطرح يليق بيك!
الضابط (بعينين تتطايران شراراً): انت بتهددني؟!
جلال (بجمود لا يلين): ملقتش حاجة تِلف وترجع! مش تقف تعمل شوية هوجة فاضية وتضايق الحريم بحجة التفتيش!
التفت جلال إلى جمع النساء وصاح بصرامة:
جلال: يلا.. روحوا!
تلفتت الفتيات والنساء بفتور وسرعة للمغادرة واقتربت موج وهي ترتجف لملمت أغراض حقيبتها لتغادر في زحمة المغادرين.
وقبل أن تخطو خطوتها الأخيرة التفتت إلى جلال بنظرة امتنان وشكر خفية.. ورغم أنه لم يَرها وكان يثبت نظره الحاد على الضابط إلا أن يونس كان يراقبها بابتسامة وعينين يملؤهما الشك!
لم يجد الضابط ثغرة واحدة أو أي غرض مخالف ليدين به جلال فأجمع عساكره ليغادر بقلة حيلة لكنه قال بنبرة توعد قبل أن يولي ظهره:
الضابط: ملحوقة يا جلال بيه.. الجايات أكتر!
لم يرد جلال على حديثه واكتفى بنظرة حادة ليلتفت رجال الشرطة مغادرين السوق مرة أخرى بعد أن أفسدوا حركة البيع وبعثروا المكان.
وقف جلال بغضب عارم يتأكل في صدري وفي لحظة انفعال ضرب إحدى الطاولات بقدمه لتقلب رأساً على عقب وصاح هادراً:
جلال: الجيّة دي مش صدفه في حد موصلهم إن السوق فيه حاجة!
هاني: مين هيوصل بس يا جلال ما هما كل شوية يكبسوا علينا كِده!
جلال (بعينين تشتعلان ذكاءً وغضباً): له المرة دي له طريقتهم بتأكد كلامي.. ليه العساكر ركزت تدور تحت الفرش أكتر من فوق كل همهم يدوروا تحت أي فرشة قولي ليه؟!
صمت هاني ونظر نحو منعم بحيرة فقال منعم:
منعم: بس مين يا جلال بيه متحصلش من حد تبع الجزيرة واصل!
جلال: والله واللّي برّه عرف منين يعني وأنا واقف وهو بيبعزق في حاجات الحريم والبنات بيامين الله لو أعرف مين عملها ليندفن صاحي!
التفت للحراس والعمال بغضب عارم:
جلال: خير مش الفرجة خلصت يلا لِمّوا كل حاجة هنا الحريم اللي سابت حاجتها هنا دي.. شوفوا لو كلها خضرة ووكل تجيبوا بدالها لكل بيت زي بعضه لو تعرفوا حد منهم وتوصلوه!
يونس (باستغراب): ونعرفوا منين الحريم دول يعني كم حرمة سابوا حاجتهم نقوم نشيعوا غيرها؟!
جلال (بصرامة قاطعة): آه وتوزعوه وانت معاهم.. مش عاجبك ولا إيه؟!
يونس: له مش القصد.. بس..
جلال: يبقى تسكت!
تركهم جلال وانزوى بعيداً ليجلس ويهدئ من ثورة غضبه بينما اقترب يونس من هاني وقال بفضول وابتسامة مريبة:
يونس: خير.. ماله جلال النهاردة؟!
هاني: البيعة باظت تاني.. وشاهين هيستلمه قدام غنام بيه زي ما أنت خابر!
يونس: له.. في سبب تاني حاسس كِده بقولك إيه.. تعرف البت اللي لقوا معاها المقص؟!
هاني (بعقد حاجبين): آه.. ليه؟!
يونس: مين دي؟!
هاني: غريب بتسأل ليه يعني؟!
يونس: عادي.. فضول!
هاني: معرفش حاجة عنها بس اعرفها عشان صاحبة مرتي.
يونس: آه.. بس كِده وجلال؟!
هاني: خلي بالك عشان روحه طالعة واللي عمله ده العادي بتاعه مش حاجة تاني!
ثم أكمل هاني ضاحكاً وهو يربت على كتفه:
هاني: أروح ألمّ خضرة وأشوفلي ميزان بقى.
ــــــــــــــــــــــــــــــــــــــــــ**
عادت موج إلى المنزل بعد أذان المغرب بتعب وخوف شديدين واستقبلتها أمها وأخواتها في الصالة فور دخولها:
سعدية: كل ده يا موج اتأخرتي ليه كِده؟!
موج (وهي تتنفس الصعداء): أحمدي ربنا إني رجعت أساساً يا أماي!
خلود (بقلق): في إيه حصل حاجة؟!
موج (وهي تجلس على أقرب كرسي بإرهاق): الحكومة كبست على السوق وفتشونا.. وكان يوم أسود الله يسامحك يا أماي انتي وخلود!
خلود: صُح.. فين الطلبات؟!
موج (بذهول): يا باردة ده اللي هامك بقولك الحكومة كبست وفتشتنا وكانوا هياخدوني على النقطة!
سعدية (بلطم على صدرها): يا مري ياخدوكي ليه يا بت؟!
موج: لقيوا معايا مقص صغير في الشنطة!
خلود: يا سلام؟!
موج: الباشا الضابط يقول سلاح أبيض كنت هموت من رُعبي والله!
فرح: وحصل إيه بعدين؟!
موج: جلال كسره ورماه.. احم جلال بيه ده لولا كِده كان زماني بتفسح في النقطة دلوك!
ليلى (بفضول وابتسامة): الله جلال بيه شفتيه من قريب حلو ولا له؟! يا بختك!
التفت الجميع إليها باستغراب وذهول فقالت ليلى بقهقهة:
ليلى: إيه.. بهزر!
موج (بغيظ): بقولك كنت هتنحبس تقولي لي حلو وعفش؟ عود سريس يمزع رقبتك!
في تلك اللحظة دخل عليهم والدهم "فايز" ونظر إليهم بتفحص وحيرة:
فايز: السلام عليكم.
ردوا جميعاً: وعليكم السلام ورحمة الله وبركاته.
فايز: خير.. إيه الجمعة دي؟!
ثم نظر إلى موج التي بدا عليها أنها عائدة لتوها وملابسها يكسوها الغبار:
فايز: انتي لسه جاية ولا إيه؟!
وقفت موج بسرعة وقالت بمحاولة للتهرب:
موج: أيوه يا بوي.. كنت هروح في شربة مية أُمي تحكيلك بقى.. أدخل أغير!
ثم التفتت لأمها وقالت بصرامة:
موج: اعملي حسابك.. جبت خضرة بـ 170 جنيه وبهدلوها في التفتيش ماليش صالح ليا عندك 170 جنيه هاخدهم!
ثم دلفت إلى الداخل سريعاً قبل أن تستقبل أي أسئلة أخرى.
ـــــــــــــــــــــــــــــــــــــــــ**
مر الوقت وأثناء جلوس موج وأخواتها أمام المنزل تحت نسمات الليل أتى أحد الحراس يحمل بعض الأكياس والأغراض ثم سأل:
الحارس: بيت عم فايز أبو موج؟!
نظرت موج لأخواتها باستغراب ثم وقفت وقالت:
موج: آه هو!
مد الحارس الأكياس نحوها قائلاً:
الحارس: جلال بيه مشيّع الحاجات ديتي بدال اللي اتبهدلت في السوق.
موج (بتردد وعزة نفس): ملوش لازمة..
الحارس: شغلتي أوصلهم!
أخذت موج منه الأغراض ليلتف الحارس ويغادر مرة أخرى.
خلود (بذهول وابتسامة): إيه الأدب ده كله؟!
ليلى (بغمزة وخبث): سيبك من الأدب.. هم عرفوا منين بيت موج أصلاً المهم ورّيني فيهم حاجة عدلة ولا كلهم خضرة؟!
بدأوا يتفحصون الأكياس بفضول شديد فصاحت خلود:
خلود: فكّها والله لو انتي ما كنتي هتيجي كل ده.. حلو ياريت كل يوم يمسكوكي.. تعالي يا فرح نعمل "فروت سلط".
مرّت الكلمة على أذن موج فهمست ضاحكة بنبرة تهكمية:
موج: "فروت سلط" الله يرحم جدك.. مات وهو فاكر الكُمترى منطقة في البندر!
دلفت خلود للداخل لتدخل الأغراض لوالدتها بينما أكملت موج بنفاذ صبر:
موج: أمّال لو تعرفوا إنها حرام أساساً.. يلا المهم هاخد الـ 170 من أمي!
