رواية عمر وليلي الفصل السابع 7 بقلم نون لاشين


 رواية عمر وليلي الفصل السابع 

«خرج عمر الراشد من السجن بريئًا بفضل تضحية ليلى، لكنه لم يكن يعلم أن حبيبته أصبحت أسيرة أعدائه... وبين رصاصة استقرت في صدره وصرخة زوجته ، تحوّل الحب إلى معركة بين الحياة والموت! فهل ينجو عمر ويعود إلى ليلى؟

خطف ليلى وإصابة عمر برصاصة دفاعًا عنها
 
ليلى.. قلبها كان بيدق بسرعة رهيبة.. بس في اللحظة دي افتكرت جملة عمر ليها : "خليكي قوية يا ليلى!"

افتكرت بسرعة ان في فلاشة تانية بنفس اللون كانت محطوطة جنب الكمبيوتر عليها أبحاث طبية قديمة!

بلعت ريقها ومثلت الخوف والانهيار.. وحطت إيدها في جيب البالطو.. وفي حركة سريعة ومن غير ما ياخد باله.. سابت الفلاشة الحقيقية جوه جيب البالطو، وقلعت البالطو الأبيض كله ورمته بإهمال على الكرسي وكأنها متوترة.. وبإيدها التانية خدت الفلاشة القديمة من على المكتب ومدت إيدها بيها لعبد الرحمن وهي بتعيط!

ليلى : "خد.. خد الفلاشة أهي.. بس أرجوك متأذنيش!"

عبد الرحمن خطف الفلاشة من إيدها بابتسامة نصر خبيثة.. وشاور لواحد من الرجالة اللي معاه.. الراجل مسك لابتوب عمر ورماه على الأرض كسره مية حتة برجله!

ليلى صرخت بخوف: "خلاص إنت خدت اللي إنت عايزه.. سيبني أمشي بقى!"

عبد الرحمن ضحك بشر وقال: "أسيبك تمشي إزاي يا دكتورة؟ إنتي شوفتي الفيديو وعرفتي كل حاجة.. وعمر لو خرج مش هيرحمني.. بس إنتي دلوقتي هتكوني كارت الضغط اللي هكسر بيه عمر الراشد للأبد.. هاتوها!"

لسه ليلى هتصرخ.. هجم عليها الراجل التاني وحط منديل فيه مخدر قوي على مناخيرها وبقها.. قاومت ليلى بكل قوتها لثواني.. وبعدها وقعت فاقدة الوعي بين إيديهم!

شالوها الرجالة وخرجوا بيها من أسانسير الخدمات الخاص من غير ما حد يحس بيهم!

بعد خمس دقايق.. تحت عند الباب الخلفي للمستشفى.

طارق كان واقف جنب العربية بيبص في ساعته بقلق وقال لندى: "ليلى اتأخرت أوي يا ندى.. دي قالت ثواني وهتنزل.. قلبي مش مطمن!"

ندى بخوف: "طب تيجي نطلع نشوفها بسرعة؟"

طلع طارق وندى يجروا على السلم لحد ما وصلوا مكتب ليلى.. وأول ما فتحوا الباب اتصدموا صدمة عمرهم!

اللابتوب متكسر على الأرض.. الكراسي مقلوبة.. والبالطو الأبيض بتاع ليلى مرمي على الكرسي.. وليلى مش موجودة!

ندى حطت إيدها على وشها وصرخت بانهيار: "يا نهار أسود! ليلى فين؟! خطفوها يا طارق.. خطفوا صاحبتي!"

طارق وشه اصفر وجسمه اتخشب من الصدمة.. جري على المكتب يدور على أي حاجة وهو بيخبط إيده على راسه: "الفلاشة! أكيد خدوا الفلاشة وخطفوها! كده عمر ضاع وليلى ضاعت!"

ندى قعدت على الأرض تعيط ومسكت البالطو بتاع ليلى تحضنه.. وفجأة حسّت بحاجة  جوه جيب البالطو.. حطت إيدها وطلعتها.. ولقت الفلاشة ومكتوب عليها بقلم جاف حرف (ع)!

ندى صرخت: "طارق! الفلاشة أهي في جيب البالطو! ليلى ضحكت عليهم وخبت الفلاشة قبل ما يخطفوها!"

طارق خطف الفلاشة وعيونه لمعت بأمل وسط الرعب اللي هما فيه وقال: "ليلي بنت ذكية! يلا يا ندى ع النيابة فوراً.. مفيش غير عمر هو اللي هيقدر يرجعها ويقلب الدنيا عليها!"

بعد نص ساعة.. في مكتب المحامي العام في النيابة.

كان المحامي العام بيتفرج على الفيديو ومعاه الأستاذ فريد المحامي وطارق وندى.. الفيديو كان واضح زي الشمس.. كريم وهو بيقتل الدكتور.. وسارة ومايا وهما بيسلموه ساعة عمر والفلوس!

المحامي العام خبط على المكتب بغضب وقال: "دي عصابة إجرامية متكاملة! أنا هأمر بالإفراج عن عمر باشا الراشد فوراً.. وإصدار أمر ضبط وإحضار للمدعو كريم، وعبد الرحمن، وبنته سارة، ومايا بنت عمة عمر ، ومنعهم من السفر!"

بعد دقايق.. اتفتح باب الحجز وخرج عمر.. كان طارق وندى واقفين مستنيينه بره.. عمر عيونه كانت بتدور في المكان بلهفة .. ولما ملقهاش قلبه اتقبض!

قرب عمر من طارق بسرعة ومسكه من دراعه وقال بلهفة وخوف: "ليلى فين يا طارق؟ مجتش معاكم ليه؟!"

ندى انفجرت في العياط.. وطارق نزل راسه للأرض وقال : "ليلى هي اللي جابتلك البراءة يا عمر.. بس التمن كان غالي أوي.. عبد الرحمن  هجم عليها في المستشفى وخطفها!"

عمر .. اتجمد الدم في عروقه.. وملامحه اتحولت لشيطان مرعب.. وعيونه احمرت .. ومسك طارق من ياقة قميصه وهزه بعنف وصرخ "خطفهااااا؟!! يعني إيه خطفها وإنت كنت فين يا طارق؟!! إزاي تسيبها لوحدهاااا؟!!"

الأستاذ فريد حاول يهديه: "يا عمر باشا اهدى.. البوليس بيدور عليها في كل مكان وهيطلعوا يقبضوا على مايا دلوقتي!"

عمر زق الكل من قدامه وقال : "أنا مش هستنى البوليس! ورحمة أمي في قبرها.. لو ليلى اتأذت بشوكة واحدة.. لأحرق الدنيا كلها باللي فيها على دماغهم!"

جري عمر وركب عربيته وساقها بسرعة جنونية.. وفي أقل من ربع ساعة كان قدام قصر الراشد!

نزل من العربية ودخل زي الإعصار!

كانت فريال ومايا قاعدين في الصالون بيشربوا قهوة وبيحتفلوا.. وأول ما شافوا عمر واقف قدامهم حر طليق وعيونه بتطلع شرار.. الفناجين وقعت من إيديهم وشهقوا برعب!

فريال بصدمة: "عـ.. عمر؟! إنت خرجت إزاي؟!"

عمر منطقش ولا كلمة.. هجم على مايا زي الفهد ومسكها من شعرها ورفعها من على الكنبة ورماها على الأرض تحت رجله!

مايا صرخت بجنون ورعب: "آاااااه! سيبني يا عمر إنت اتجننت؟! الحقيني يا مامي!"

فريال جت تقرب.. عمر بصلها بنظرة خلتها تتجمد في مكانها من الرعب.. ونزل عمر على ركبته ومسك رقبة مايا بإيده وضغط عليها لدرجة إن نفسها بدأ يتقطع  "الفيديو اللي صورتكم بيه الكاميرات المخفية وإنتي بتسلمي ساعتي لكريم بقى في النيابة خلاص.. والبوليس في الطريق عشان يرميكي في السجن.. بس قبل ما البوليس ييجي.. لو مقولتيش حالاً عبد الرحمن خطف ليلى ووداها فين.. أنا هطلع روحك في إيدي دلوقتي ومش هستنى القانون!"

مايا وشها ازرق وكانت بتطلع في الروح.. شاورت بإيدها وهي بتكح وبتعيط وقالت: "هـ.. هقولك! والله هقولك سيبني! عـ.. عنده مزرعة مهجورة في الكيلو 60 طريق إسكندرية الصحراوي.. سارة قالتلي إنهم هيهربوا من هناك بره مصر! أرجوك سيبني!"

عمر رماها على الأرض بقرف.. وفي نفس اللحظة دخلت قوات الشرطة القصر وقبضت على مايا وهي بتصرخ.. وقبضوا على أمها فريال بتهمة التستر والاشتراك في الجريمة!

عمر مبصلهمش حتى.. وخرج يجري ومعاه طارق وأسطول من الحراسة الخاصة بتاعته المسلحين.. وطلبوا من الشرطة تحصلهم على طريق إسكندرية الصحراوي!

في نفس الوقت.. في المزرعة المهجورة في الصحرا.

فتحت ليلى عيونها.. لقت نفسها مربوطة بالحبال في كرسي في مخزن قديم ومقرف.. وقدامها واقفة سارة بنت عبد الرحمن.. وجنبها كريم اللي كان شكله مرعوب وبيرتعش!

سارة قربت من ليلى وابتسمت بغل ورفعت إيدها وضربت ليلى بالقلم على وشها : "فوقي يا قطة.. عشان تشوفي نهايتك بعينك قبل ما نقتلك ونسافر!"

ليلى بصت لها بتحدي رغم الألم وبصت لكريم وقالت باحتقار: "بقيت قتال قتلة يا كريم؟ بعت آخرتك ودينك عشان شوية فلوس من واحدة رخيصة زي دي؟!"

كريم نزل راسه للأرض بضعف وقال: "غصب عني يا ليلى.. هي وأبوها ورطوني ومكانش قدامي حل تاني!"

فجأة.. اتفتح باب المخزن بعنف.. ودخل عبد الرحمن ووشه كله غضب أعمى.. ومسك ليلى من شعرها بعنف وصرخ في وشها: "الفلاشة اللي اديتهالي طلع عليها أبحاث طبية يا بنت الكلب! الفلاشة الحقيقية اللي عليها الفيديو فيييين؟!!"

ليلى رغم الوجع اللي في راسها.. ضحكت بصوت عالي وقالت بشموخ: "الفلاشة دلوقتي في النيابة يا عبد الرحمن ! وجوزي عمر الراشد زمانه خرج.. وجاي في السكة عشان يدفنكم كلكم بالحيا هنا!"

عبد الرحمن اتجنن لما سمع الكلام ده.. وسارة صرخت برعب: "يا بابا يعني البوليس عرف؟! إحنا لازم نهرب حالاً قبل ما يوصلوا!"

عبد الرحمن طلع المسدس من جيبه وعمره ووجهه لراس ليلى مباشرة وقال بجنون: "مش هنتحرك من هنا غير لما أفرغ خزنة المسدس دي في دماغها الأول عشان أحرق قلب عمر عليها طول عمره!"

كريم صرخ: "لا يا عبد الرحمن بيه كفاية دم بقى!"

عبد الرحمن زقه وقال لليلى: "اتشهدي على روحك يا دكتورة!"

غمضت ليلى عيونها بقوة ونطقت الشهادة.. وفي اللحظة اللي صباع عبد الرحمن كان بيضغط فيها على الزناد..

بووووووووم!!

باب المخزن اتخلع من مكانه لما دخلت فيه عربية عمر وكسرته نصين!

ونزل عمر من العربية زي الوحش  ومعاه طارق والحرس.. واشتبكوا مع بلطجية عبد الرحمن اللي بره في ثواني!

أول ما عمر لمح عبد الرحمن موجه المسدس لراس ليلى.. قلبه وقف من الرعب.. وصرخ بأعلى صوته: "ليلىىىىىىى!!"

عبد الرحمن اتفزع لما شاف عمر قدامه.. ومن جنونه وحقده.. صمم يضغط على الزناد عشان يقتل ليلى قبل ما عمر يوصلها!

لكن عمر كان أسرع جري بأقصى سرعة عنده.. ورمى جسمه قدام  ليلى وحضنها بجسمه عشان يحميها!

وطلعت الرصاصة من مسدس عبد الرحمن.. 

وفجأة.. ساد الصمت !

فتحت ليلى عيونها المرعوبة.. لقت عمر حاضنها بقوة.. ووشه قريب من وشها.. بس ملامحه بتتألم بشدة.. وبصت لقميصه الأبيض  لقته بيتحول للون الأحمر والدم بينزف منه بغزارة!

ليلى صرخت  "عمرررررررررررررررررررر!! لاااااااااااااا!!"

وقع عمر على ركبه قدامها وهو لسه ماسك فيها.. وعينه بتقفل .. وهمس بصوت ضعيف
 "مـ.. متخافيش يا.. يا قلبي.. المهم.. إنك.. بخير.."

ووقع عمر على الأرض غرقان في دمه وفاقد الوعي تماماً تحت رجلين ليلى اللي كانت بتصرخ بجنون وهي مربوطة ومش قادرة حتى تلمسه!


تعليقات