رواية قسوة رجال الصعيد الفصل السادس 6 بقلم هنا حسين

 

 


رواية قسوة رجال الصعيد الفصل السادس بقلم هنا حسين



﷽
وقف الجميع في مكانهم بصدمة، عيونهم متعلقة بالست اللي ظهرت قدامهم بعد غياب طويل. أما فراس، فكانت ملامحه اتبدلت تمامًا، والغضب ظهر في عينيه وهو بيتقدم ناحيتها.

فراس بغضب: إنتِ إيه اللي جابك يا مرا إنتِ

سوسن ببرود: بالراحة شوية، لا يطقلك عرق. وبعدين أنا جاية بيتي.

صقر: بيتك كيف يعني اتخبلتي يا مرا إنتِ

ياسين: يلا غوري من اهنه، أحسن  تشوفي حاجة مش هتعجبك.

سوسن: أنا جاية أقعد في حقي، وكمان جايبة حضرة الظابط معايا، عشان عارفة إنكم هتعاندوا.

جواد: شكلها ما بتجيش بالذوق.

فراس: إحنا مش كنا خلصنا، وأخدتي حقك وغورتي في داهيه 

سوسن بابتسامة مستفزة: لا، ما هو في جديد. أصل جوزي حبيبي الله يرحمه كان قبل ما يموت كاتب لي نص السرايا. فأنا جبت فؤاد ولمي وولادي، وجينا نسكن هنا.

فراس بغضب: كتب لك إيه إنتِ أكيد اتخبلتي في نفوخك.

الضابط: هي بتتكلم مظبوط، والورق اللي معاها سليم. وياريت تعيش هنا من غير شوشره، وأي خلاف يتاخد فيه الإجراءات القانونية.

سوسن: مفيش داعي يا حضرة الظابط، دول مهما كان ولاد جوزي الله يرحمه.

صقر بغضب: ياريت يا حضرة الظابط تاخد المرا دي والمقاطيع اللي جايباهم، وتطلعوا من اهنه.

فراس بتفكير: خلاص يا صقر، خليها قاعدة. دي برضه مهما كانت مرات أبويا الله يرحمه، ما يصحش نطلعها من البيت.

سوسن: اللي هو بيتي، متنساش ده.

الضابط: فراس، أنا مش عاوز مشاكل.

فراس: اطمن يا حضرة الظابط، مفيش إن شاء الله أي مشاكل.

بقلم هنا حسين

اذكروا الله

مشي الظابط، وفضلوا كلهم واقفين في مكانهم، والغضب مسيطر على ملامحهم. 

سحاب باستغراب: مين دول

صبا: دي الحيبزونة مرات أبوهم.

فراس: إنتِ مش أخدتي حقك راجعة ليه تاني

سوسن: لا يا حبيبي، حقي لسه ما أخدتوش. وبعدين أنا جاية في ملكي.

ياسين: إنتِ كدابة، أبوي مستحيل يكتب لك حاجة.

سوسن بسخرية: ليه إن شاء الله هو اللي خلاه يتجوزني،مايخلهوش يكتبلي ولا الصدمة جامدة عليكم

صقر بغضب: اسمعي يا وليه إنتِ، إحنا زمان كنا صغيرين وما كناش بنعرف ناخد حقنا، لكن دلوقتي زي ما إنتِ شايفة نقدر ننسفك من على وش الدنيا.

سوسن: أيوه صح، زمان لما كنت بديكم على قفاكم. دلوقتي كبرتوا، هههه، عشت وشوفت.

ما استحملش صقر استفزازها، واتقدم ناحيتها بخطوات غاضبة، وكان هيمد إيده عليها، لكن جواد لحقه ومسكه.

جواد: اهدى يا صقر، دي عايزة تطلعك عن شعورك.

فؤاد: أوعى تفكر تمد إيدك على ماما، البلد فيها قانون.

كانت الكلمة كفيلة إنها تزود غضب صقر أضعاف. لف ناحيته واتقدم منه، وانهال عليه باللكمات، من غير ما يسمع صراخ اللي حواليه.

سوسن ولمي: ابعد عنه سيبه

لكن صقر كان في حالة غضب شديدة، وكأنه مش شايف قدامه غير الشخص اللي بيتحداه. فضل يضرب فيه لحد ما فؤاد وقع على الأرض، وسوسن ولمي واقفين بيصرخوا من الخوف ومش قادرين يقربوا.

سوسن بصراخ: ابعد عن ابني يا متوحش، والله لأبلغ عنك

وبعد محاولات قدر ياسين وجواد يبعدوا صقر عنه بالعافية.

صقر وهو بيحاول يفلت منهم: ابعدوا عني، والله هموته. كمان في بيتي وبتهددني يا ابن المركوب

فراس بحزم: خلاص يا صقر، خد جزاته. يلا، كله يروح على أوضته.

وبعد ما الكل مشي، قربت سوسن ولمي من فؤاد وسندوه.

سوسن بغضب: والله لهندمهم.

لمي: دول متوحشين.

فؤاد بألم: آه، أنا غلطان إني سمعت كلامك وجيت.

سوسن: إحنا معانا شغل هنا نخلصه ونمشي.

---اذكروا الله ♥

كان فراس مش جاي له نوم، واقف قدام الشباك وسرحان في اللي حصل. دخول سوسن للسرايا بالشكل ده ما كانش أمر سهل، خصوصًا بعد كل اللي عملته فيهم زمان.

قربت منه مهره بهدوء.

مهره: مش هتيجي تنام

فراس: لاه، مش جايلي نوم.

مهره: مالك يا فراس في إيه احكي لي.

بص لها فراس نظرة طويلة، وبعدها تنهد بتعب.

فراس: خايف على سند. الست دي أذتنا كتير، وإنتِ أكتر واحدة كانت شايفة معاملتها لينا.

مهره: سند كبر وبقى راجل، ما يتخافش عليه. وبعدين شوف صرفه للمرا دي وخليها تمشي من اهنه.

فراس: أني حاسس إن مجيّتها وراها حاجة. المهم، عاوزك تخلي بالك كويس، وأني مش قاعد طول الوقت.

مهره: ما تقلقش، هخلي بالي كويس.

فضل فراس ساكت، وعقله مشغول بوجود سوسن وأولادها. كان عارف إن رجوعها مش هيعدي بسهولة، وإن وجودها في السرايا ممكن يفتح أبواب هو مش عاوزها تتفتح.

اذكروا الله

---

في الصباح، كان يوم يمني في تجهيز الفطار، والبنات كلهم معاها ما عدا مهره.

صبا: أنا مش عارفة إيه الست دي، وإيه اللي جابها هنا تاني

سحاب: هو إيه اللي حصل أني معرفش حاجة.

يمني: والأحسن ما تعرفيش. اللي أقولهولك تخلي بالك من نفسك، دي ما تتأمنش.

جنه: ربنا يستر على سند.

سحاب بقلق: ماله سند

جنه: يعني ما بيحبهاش ولا بيحب يشوفها...

وقبل ما تكمل كلامها، دخلت لمى المطبخ، وكانت لابسة شورت قصير وتيشيرت كت.

اتصدمت جنه وسحاب من لبسها، أما صبا ويمني فكانوا عادي، لأنهم متعودين على النوع ده من اللبس.

لمي: هاي.

محدش رد عليها.

لمي باستغراب: هو في إيه ما بتردوش ليه

صبا بغيظ: والله إحنا حرين، نرد أو ما نردش براحتنا. إنتِ كمان هتعلمينا نرد ولا لأ

لمي: هو إيه الرد ده بعدين أنا عاوزة قهوة سادة.

يمني: اعملي لنفسك يا حبيبتي، ولا شايفة إن فيه خدامين هنا

لمي: مش بعرف أعمل، اعملي إنتِ.

يمني: لا، إنتِ اتجننتي خالص. مين دي اللي هتعملك

سحاب: المطبخ قدامك، اللي عايزاه اعمليه، لكن ما تحلميش إن واحدة فينا تعملك حاجة.

جنه: اخدمي حالك، إحنا اهنه بنعملوا كل حاجة لحالنا.

لمي باستهزاء: أوه ماي جاد إنتوا حاجة صعبة أوي بصراحة. كل ده عشان فنجان قهوة

صبا: يلا يا أختي، غوري من هنا بالقرف اللي لابساه ده.

لمي: أقول إيه ناس جاهلة

خرجت لمى من المطبخ وهي بتتمتم بكلام مش مفهوم، والبنات بصوا لبعض بضيق.

صبا: شكلنا هنشوف أيام سودة مع الناس دي.

---اذكروا الله 

جهزت البنات السفرة، وقعدوا كلهم عليها. وبعد شوية ظهرت سوسن، وبمجرد ما شافت مهره ابتسمت ابتسامة جانبية.

سوسن: كبرتي يا مهره، مبقتيش زي الأول.

مهره بغيظ: وأني ما طلبتش رأيك، خليكي في حالك.

سوسن: أنا ما قصديش حاجة يا حبيبتي. أنا كل همي إنك تهتمي بنفسك شوية، أحسن تبصي تلاقي جوزك اتجوز عليكي.

كانت مهره هترد عليها، لكن قبل ما تنطق، قرب فراس منها ومسك إيدها وباسها قدام الجميع.

فراس: مهره هتفضل ست الستات، وضفر رجلها برقبتك. وما فيش مرة تقدر تملى عيني غيرها. الدور والباقي على اللي راجلها في القبر، وعاملة نفسها بت عشرين سنة.

ضحكوا كلهم، ما عدا مهره اللي كانت قاعدة مش مصدقة اللي سمعته. فضلت باصة لفراس، وكأنها بتحاول تستوعب إنه دافع عنها بالشكل ده قدام سوسن.

أما سوسن، فاختفت ابتسامتها، وظهر الغيظ على وشها.

سوسن: ماشي يا فراس، كله ساهل.

قامت ومشيت، ولمى لما لقت نفسها لوحدها قامت وراها.

وطبعًا فؤاد كان في أوضته، وما قدرش ينزل بعد اللي حصله.

وبعد شوية قام الشباب وراحوا أشغالهم، بعد ما وصوا البنات محدش يتكلم مع فؤاد أو يقعد معاه في نفس المكان.

بقلم هنا حسين

اذكروا الله

---

في المساء، كانت سحاب قاعدة في غرفتها بتقرأ في المصحف، لحد ما دخل سند فجأة.

سند: قومي جهزيلي الحمام.

سحاب بخضة: صدق الله العظيم خضتني.

سند باستهزاء: لاه، سلامتك يا ختي. يلا قومي.

سحاب: بذمتك، ليك عين بعد ما تغيب باليوم، وما حدش عارفك فين، تيجي تطلب مني حاجة

سند: لاه، المرة الجاية أبقى أخد منك الإذن. بعدين إنتِ ناسية إنتِ اهنه ليه اهنه لخدمتي وبس. ويلا بطلي كلام كتير وقومي اعملي اللي قلتلك عليه.

سحاب: أني هقوم أعمل اللي قولت عليه، بس يا ريت تبقى مسؤول أكتر من اكده.

قرب منها سند، وفضل باصص لها شوية، وبعدها سألها سؤال ما كانتش متوقعاه.

سند: هو إنتِ في حد في حياتك

وقفت سحاب مكانها لثواني، وبصت له باستغراب، مش مستوعبة السؤال اللي سمعته.

سحاب: إيه اللي بتقوله ده

سند: أني عاوز إجابة. إنتِ في حد في حياتك

سحاب: لا، مفيش.

سند: إنتِ عارفة كنت فين ومع مين وبعمل إيه

سحاب: دي حاجة تخصك، ماليش صالح بيك. إنت حر.

سند: أني حر في كل حاجة، بس عاوز سبب مقنع يخليني ما أقربلكيش، غير إنك ما بتحبينيش وإنك مغصوبة عليا. ما فيش سبب غير إن فيه راجل في حياتك. قولي، ما تخفيش. أني بحب الصراحة، عشان بعد اكده لو عرفت من حالي، مش هتلومي غير نفسك.

سحاب بدموع: أقسم بالله العظيم ما في حد في حياتي خالص. حرام عليك الاتهام ده. أني عمري ما فكرت في حد، ولا حد جه في بالي. بس إنتوا اللي تفكيركم اكده، لدرجة إن الست لما ترفض وتقول لأ، تعتبروا إن فيه راجل في حياتها. وعشان تريح نفسك، أني ما كنتش عاوزة أتجوز، لا إنت ولا غيرك.

سند: ماشي، كل حاجة هتبان قريب، ووقتها مش هرحمك.

راحت سحاب تحضر الحمام، وهي مش قادرة تستوعب إزاي بقى بيشك فيها بالشكل ده، رغم إنها عمرها ما عملت حاجة تستاهل الاتهامات دي.

وبعد وقت، نزلوا لتحت، لأنه كان وقت العشا، وكانوا كلهم متجمعين على السفرة، حتى سوسن وأولادها.

نزل سند ومعاه سحاب، لكن بمجرد ما وصلوا للسفرة، وقف مكانه للحظات.

اتغيرت ملامحه، واتحولت نظراته لحدة وغضب مكتوم، قبل ما يعلو صوته فجأة.

سند بغضب وزعيق: إيه اللي جاب الحيوانة دي اهنه


شكرا لزيارتكم عالم روايات سكيرهوم

تعليقات