رواية نور الفصل السادس 6 بقلم فاطمه شعبان

تاني يوم الصبح..

نور دخلت الشركة بدري كالعادة..

كانت داخلة وهي مكسوفة شوية.. حاسة انها سابت الشغل يوم كامل..

أول ما دخلت..

السكرتيرة شافتها: • نور! حمدالله على السلامة.. الشركة امبارح كانت هادية أوي من غيرك..

نور ابتسمت: • الله يسلمك..

لسه بتتكلم.. لقيت إسلام طالع من مكتبه..

أول ما شافها.. وشه نور.. وجرى عليها بهزار:

إسلام: • أخيراً الست هانم رجعت! انتي عارفة انتي عملتي فينا ايه امبارح؟ الشركة كانت ساكتة.. أنا كنت هكلم البوليس وأقولهم الموظفة بتاعتنا تاهت!

نور ضحكت وضربته على كتفه: • بس يا إسلام.. بطل هزار..

إسلام: • هزار ايه؟ ده أنا امبارح كنت تايه.. محدش بيسألني على حاجة.. محدش بيقولي أستاذ إسلام الحاج عايزك.. محدش بيجري في الطرقة رايح جاي.. انتي وحشتينا بجد..

نور: • خلاص أنا رجعت أهو.. وهصدعك تاني..

إسلام: • يا ريت.. ده أحلى صداع..

وفضلوا يهزروا مع بعض.. ونور بتضحك.. وهو بيضحك.. وكان باين عليه انه مبسوط أوي انها رجعت.. بس مداري ده كله في الهزار..

وفي نفس اللحظة.. في آخر الطرقة..

آسر كان واقف قدام باب مكتبه..

كان لسه داخل.. وبيظبط الجاكيت..

أول ما شاف نور واقفة بتضحك مع إسلام..

وقف مكانه..

فضل باصص عليها..

ولا اتكلم.. ولا قال صباح الخير.. ولا عمل أي حاجة..

بس عينيه كانت ثابتة عليها..

كان مبسوط من جواه انها رجعت.. بس هو نفسه مش فاهم ليه مبسوط..

هو آسر.. اللي بالنسبالها.. أهم حاجة عنده الشغل وبس..

عمره ما اهتم بحد.. وعمره ما سأل على حد..

نور خدت بالها انه واقف.. بصت له بصة سريعة: • صباح الخير يا أستاذ آسر..

آسر هز دماغه بس.. من غير ولا كلمة..

ودخل مكتبه.. وقفل الباب..

قعد على الكرسي.. وقال لنفسه:

• رجعت..

وحس انه ارتاح.. بس مش عارف ليه..

هو كان متعود كل يوم يعدي من قدام مكتبها.. يشوفها قاعدة بتشتغل.. وده بالنسبة له.. يعني الشغل ماشي مظبوط.. يعني الدنيا تمام..

امبارح لما ملاقيهاش.. حس ان الشغل ناقص.. حس ان في حاجة غلط..

وقال لنفسه: • أكيد عشان الشغل.. عشان هي اللي منظمة مواعيد الحاج.. أكيد عشان كده بس.. 

بعد شوية.. الحاج شريف نادى عليهم التلاتة..

الحاج: • تعالوا يا ولاد.. عايزكم في موضوع مهم..

دخلت نور.. ودخل إسلام.. ودخل آسر..

آسر دخل وقعد ساكت.. زي عادته.. ولا بيتكلم..

الحاج بص لنور وقال:

• بصي يا نور يا بنتي.. أنا فكرت في موضوع مشروعك.. انتي بنت مجتهدة.. وبتشتغلي وبتدرسي.. وأنا مش عايز أكون سبب انك تتأخري.. فأنا قررت.. الفترة الجاية.. لو احتاجتي تروحي الجامعة.. خدي إجازة.. يوم.. اتنين.. براحتك.. أهم حاجة تخلصي مشروعك.. واحنا هنا هنتصرف.. 

نور عينيها لمعت: • بجد يا حاج؟! ربنا يخليك..

إسلام قال بهزار: • ايه ده يا حاج؟! كده هتسيبني لوحدي؟! أنا كده هتعب..

بس فجأة..

آسر اللي كان ساكت طول القعدة.. اتكلم..

آسر: • لا يا حاج.. مينفعش..

الكل بص له باستغراب..

الحاج: • ليه يا آسر؟

آسر: • يعني ايه تاخد إجازة؟! هيا تخلص مشروعها.. واحنا شغلنا يقف؟! الشغل كله عليها.. مواعيدك.. ملفاتك.. كل حاجة.. لو غابت.. مين هيعمل ده؟!

نور بصت له.. وكانت زعلانة.. هي عارفة ان آسر أهم حاجة عنده الشغل.. وعارفة انه شايفها موظفة وبس..

بس آسر كمل كلامه وهو بيتكلم بجدية الشغل:

• أنا عندي حل.. هيا تروح الجامعة الصبح.. تخلص اللي وراها.. وبعد كده تيجي الشركة.. تكمل شغلها بتاع تاني يوم.. وهكذا.. ولو عايزة تمشي بدري.. تمشي.. مفيش مشكلة..

ولو خلصت شغلها هنا.. ممكن تكمل مشروعها هنا في المكتب.. كل حاجة متاحة.. ممكن تستعمل اللاب توب.. أو أي أدوات محتاجاها.. النت.. الطابعة.. أي حاجة.. 

الحاج فكر وقال: • يعني انت عايزها متغيبش؟

آسر: • أيوه يا حاج.. ليه تغيب؟! احنا نقدر نظبطها هنا.. تخلص جامعتها وشغلها في نفس المكان..

إسلام سكت.. ومتكلمش خالص.. فضل يبص لنور ويهزر معاها زي ما هو.. كأن اللي حصل ده عادي.. شغل..

آسر من جواه.. كان مستغرب من نفسه..

هو ليه مش عايزها تغيب؟! ليه متضايق من فكرة انها تاخد إجازة؟!

هو عمره ما فكر كده في أي موظف..

بس هو مش عايز المكتب يبقى فاضي تاني..

مش عايز ييجي الشركة وملاقيهاش..

وهو مش عارف ليه..

وقال لنفسه: • أكيد عشان الشغل.. عشان الشغل محتاجها.. أكيد عشان كده..

الحاج بص لنور: • ايه رأيك يا نور؟

نور بصت لآسر.. وبصت للحاج..

هي كانت خايفة.. خايفة لو قالت لا.. تخسر شغلها.. هي لسه جديدة.. والحاج لسه معتمد عليها.. ومش عايزة حد يقول عليها انها مقصرة..

فقالت بسرعة: • موافقة يا حاج.. موافقة.. كده أحسن ليا.. أخلص شغلي.. وأكمل مشروعي هنا.. ومغيبش.. أنا مش عايزة أخسر شغلي..

آسر أول ما سمع كلمة "موافقة".. بص في الأرض.. عشان محدش ياخد باله انه ارتاح..

ارتاح انها هتفضل موجودة.. مش هتغيب..

من غير ما يفهم ليه..

خرجوا من مكتب الحاج..

إسلام ماشي جنب نور وبيهزر: • شوفتي؟! كده هتفضلي قاعدة على دماغنا.. مش هنخلص منك..

نور: • بس يا إسلام.. ده انت اللي مش هتخلص مني..

وفضلوا يهزروا..

ونور دخلت مكتبها.. وبدأت تشتغل..

وإسلام دخل مكتبه.. بس كل شوية يعدي من قدام مكتبها.. يهزر معاها.. يرمي كلمة.. يضحكها.. وهي تضحك..

وآسر كان قاعد في مكتبه.. سامع صوت الضحك والهزار اللي طالع من بره..

كل شوية يرفع عينه من على اللاب توب.. ويبص ناحية الباب..

كان متضايق.. متضايق أوي.. بس مش عايز يبين..

قام وقف.. وقال للسكرتير بتاعه: • ناديلي إسلام..

إسلام جه بسرعة.. ودخل مكتب آسر.. وهو لسه بيضحك:

إسلام: • خير يا آسر؟ عايزني في حاجة؟

آسر بص له بصة جد.. وقفل الباب..

آسر: • اقعد يا إسلام.. عايز أكلمك..

إسلام قعد: • في ايه؟ شكلك جد كده ليه؟

آسر: • ايه الدنيا يا إسلام؟! انت كنت جاد جداً في الشغل.. انت طول عمرك جاد.. مبتعرفش تهزر في الشغل.. دلوقتي بشوف التهريج والضحك اللي مكنتش بشوفه غير واحنا خارجين.. ايه الحكاية؟!

إسلام اتلخبط.. وسكت ثانية.. وبعدين قال وهو بيحاول يضحك:

• والله ما عارف يا آسر.. ايه اللي حصل.. أول ما أشوفها.. أحس اني فرحان.. وأهزر معاها زي ما انت شايف كده.. مش عارف.. ببقى عايز أضحكها.. ببقى مبسوط انها موجودة..

آسر سمع الكلام ده.. وحس بحاجة غريبة جواه..

اتضايق.. اتضايق أوي.. بس محبش يبين..

وشه فضل زي ما هو.. جد.. بارد..

وقال بصوت حازم.. صوت مدير.. صوت واحد أهم حاجة عنده الشغل: • احنا هنا في شغل يا إسلام.. ومحتاجين كل دقيقة.. خليك جاد في شغلك كده.. الهيبة في الشغل هتتأثر جامد.. واحنا عايزين كل التيم يشتغل كويس جداً.. بلاش الموضوع ده هنا يا إسلام..

إسلام بص له.. وحس انه اتحرج: • حاضر يا آسر.. حاضر.. انت عندك حق.. أنا آسف..

آسر: • مفيش آسف.. بس ركز في شغلك.. احنا عندنا شغل كتير..

إسلام قام.. وخرج من المكتب.. وهو ساكت..

أول ما خرج.. آسر قعد على الكرسي.. وحط ايده على دماغه..

وقال لنفسه بصوت واطي: • هو ليه بيهزر معاها كده؟! ليه بيضحكها؟! ليه هي بتضحك معاه هو؟!

وحس انه متضايق أكتر.. متضايق من إسلام.. ومتضايق من نفسه..

لأنه مش عارف.. هو متضايق ليه أصلاً؟!

هو آسر.. بتاع الشغل.. اللي مبيهتمش بحد..

ليه مضايق ان إسلام بيهزر مع نور؟!

وقال لنفسه عشان يقنع نفسه: • عشان الشغل.. عشان الهيبة.. عشان التيم لازم يشتغل جد.. أكيد عشان كده بس.. 

وفي نفس الوقت..

إسلام رجع مكتبه.. وهو ساكت.. مش بيهزر زي الأول..

نور خدت بالها.. وبصت له من مكتبها: • مالك يا إسلام؟ سكت ليه؟

إسلام حاول يبتسم: • مفيش.. بس عندي شغل كتير.. هركز شوية..

نور حست ان في حاجة حصلت.. بس مكملتش..

ورجعت تشتغل على مشروعها.. في مكتبها.. في الشركة..

زي ما اتفقوا..

بس جواها سؤال واحد:

هو آسر ليه مش عايزها تغيب؟! وليه إسلام فجأة بقى ساكت؟!

يا ترى آسر هيعرف يخبي غيرته دي لحد امتى؟ وهو فاكر انها عشان الشغل؟

وإسلام.. هيسمع كلام آسر ويبطل هزار؟ ولا مش هيقدر.. عشان أول ما بيشوف نور بيبقى فرحان غصب عنه؟

ونور.. لما تشتغل على مشروعها في الشركة.. جنب الاتنين.. ايه اللي هيحصل؟