رواية نور الفصل السابع 7 بقلم فاطمه شعبان

تاني يوم الصبح بدري.. نور صحيت قبل المنبه.. كانت متوترة.. قلبها بيدق بسرعة.. مش عارفة ليه.. بس حاسة ان النهاردة هيبقى يوم مختلف.. لبست هدومها بسرعة.. ولمت حاجتها.. اللاب توب بتاع الجامعة.. وكشاكيل المشروع.. وكل الورق اللي محتاجاه.. ومامتها بصت لها وهي خارجة: رايحة بدري كده ليه يا نور؟ نور: عشان عندي شغل كتير يا ماما.. وهرجع أخلص المشروع في الشركة.. مامتها: ربنا معاكي يا بنتي.. خلي بالك من نفسك.. نور: حاضر يا ماما.. ادعيلي.. ونزلت..

وصلت الشركة.. كانت لسه فاضية.. مفيش حد جه غير السكرتيرة.. السكرتيرة أول ما شافتها: ايه ده؟! انتي جيتي بدري أوي كده ليه؟ نور ضحكت: عشان ألحق أخلص اللي ورايا.. انتي عارفة.. شغل الشركة.. وشغل الجامعة.. السكرتيرة: ربنا يقويكي يا نور.. ده انتي بتتعبي أوي.. نور قعدت في مكتبها.. وبدأت ترتب حاجتها.. حطت ورق المشروع على جنب.. وفتحت ملفات الشركة على جنب.. وقالت لنفسها: يلا يا نور.. انتي قدها.. هتخلصي الاتنين..

شوية.. وبدأ الموظفين ييجوا واحد ورا التاني.. وإسلام جه.. بس مش زي كل يوم.. كل يوم كان بيدخل وهو بيهزر.. بيضحك.. بيرمي السلام على الكل بصوت عالي.. النهاردة دخل.. ساكت.. وشُّه مكشر شوية.. وبص لنور بصة سريعة.. وقال: صباح الخير.. ومشي على مكتبه على طول.. نور بصت له باستغراب.. قالت في سرها: ماله؟! ده امبارح كان بيهزر وبيضحك معايا.. وبيقولي انتي وحشتينا.. ايه اللي غيره كده؟!

نور حاولت تكلمه: إسلام.. إسلام رفع عينه: أيوه؟ نور: مالك؟ انت كويس؟ إسلام حاول يبتسم.. ابتسامة مصطنعة: كويس.. بس عندي شغل كتير.. هركز شوية.. نور: ماشي.. وسكتت.. بس جواها حاسة ان في حاجة حصلت.. حاجة هي مش عارفاها..

وفي نفس اللحظة.. آسر دخل الشركة.. كان لابس بدلة شيك.. ومظبط شعره.. وماسك اللاب توب في ايده.. أول ما دخل.. عينه راحت على طول ناحية مكتب نور.. شافها قاعدة.. حس براحة غريبة.. وقال في سره: رجعت.. قاعدة مكانها.. الحمد لله.. بس أول ما شاف إسلام قاعد ساكت.. ومش بيهزر معاها.. ارتاح أكتر.. وقال لنفسه: كويس.. كده الشغل هيمشي مظبوط.. مفيش هزار.. مفيش ضحك..

عدى من قدام مكتبها.. من غير ما يتكلم.. نور بصت له: صباح الخير يا أستاذ آسر.. آسر هز دماغه بس.. من غير ولا كلمة.. ودخل مكتبه.. نور قالت في سرها: هو كمان ماله؟! ده حتى صباح الخير مش بيردها؟!

قعد آسر في مكتبه.. فتح اللاب توب.. بس مش عارف يركز.. كل شوية يرفع عينه.. يبص من الباب الموارب.. على نور.. شايفها قاعدة بتشتغل.. مركزة.. شوية تكتب في ورق الشركة.. وشوية تفتح اللاب توب بتاع الجامعة.. وتكتب في المشروع.. وشعرها كل شوية ينزل على وشها.. وهي تشيله بايدها.. آسر فضل باصص.. وبعدين فاق لنفسه: أنا ببص على ايه؟! أنا بعمل ايه؟! ورجع يبص في اللاب توب تاني.. بس بعد دقيقة.. رجع يبص تاني.. وقال لنفسه: أنا بس بتطمن ان الشغل ماشي.. أكيد عشان كده..

بعد ساعة.. الحاج شريف وصل.. دخل مكتبه.. وبعد شوية نادى على نور: يا نور يا بنتي.. تعالي.. نور راحت له بسرعة: أيوه يا حاج.. الحاج: اقعدي.. عايز أطمن عليكي.. المشروع عامل ايه معاكي؟ نور: الحمد لله يا حاج.. ماشي كويس.. أهو بحاول أظبط وقتي بين الشغل والمشروع.. الحاج: برافو عليكي.. انتي بنت جدعة.. وأنا فخور بيكي.. لو احتاجتي أي حاجة.. فلوس.. ورق.. أي حاجة.. قوليلي.. نور عينيها لمعت: ربنا يخليك يا حاج.. انت زي أبويا بالظبط.. الحاج ضحك: ربنا يخليكي يا بنتي.. يلا روحي كملي شغلك.. نور خرجت من مكتب الحاج.. وهي مبسوطة.. بس وهي ماشية في الطرقة.. لقيت إسلام طالع من مكتبه.. رايح يجيب قهوة.. نور: إسلام.. استنى.. إسلام وقف: في حاجة؟ نور: هو انت زعلان مني في حاجة؟! من امبارح وانت ساكت.. ومش بتتكلم معايا زي الأول.. إسلام سكت ثانية.. وكان نفسه يقولها كل حاجة.. كان نفسه يقولها: آسر زعقلي عشان بهزر معاكي.. وقالي بلاش هزار في الشغل.. وأنا اتحرجت.. بس خاف.. خاف آسر يسمع.. خاف يعمل مشكلة.. فقال: لا والله.. مفيش حاجة.. بس آسر عنده حق.. احنا لازم نركز في الشغل.. عشان الشغل كتير.. نور: بس انت عمرك ما كنت كده.. انت طول عمرك بتهزر.. إسلام: معلش.. فترة كده وهتعدي.. وسابها ومشي.. نور وقفت مكانها.. حاسة انها مخنوقة.. حاسة ان في حاجة غلط.. بس مش فاهماها..

رجعت مكتبها.. وبدأت تشتغل.. بس مش عارفة تركز.. كل شوية تبص على إسلام.. إسلام قاعد.. ساكت.. مركز.. وكل شوية تبص على مكتب آسر.. آسر قاعد.. ساكت.. بس كل شوية يبص عليها..

الضهر قرب.. نور احتاجت تطبع ورق للمشروع.. قامت.. وخدت الورق.. وراحت ناحية الطابعة.. الطابعة كانت بعيدة شوية.. وهي واقفة بتطبع.. إسلام شافها قامت.. قلبه دق.. كان عايز يقوم يساعدها زي كل مرة.. بس افتكر كلام آسر.. ركز في شغلك.. بلاش الموضوع ده هنا.. فقعد مكانه.. غصب عنه.. بس مقدرش.. بعد دقيقة.. قام.. وراح لها.. إسلام: محتاجة مساعدة؟ نور بصت له وضحكت: أخيراً اتكلمت.. إسلام ضحك غصب عنه: الطابعة دي رخمة.. سيبيني أنا أظبطها.. وفضلوا واقفين جنب بعض.. إسلام بيحاول يظبط الطابعة.. ونور واقفة جنبه بتضحك: انت بتعرف تصلح أي حاجة إلا نفسك.. إسلام: ليه؟! أنا مالي؟ نور: ساكت ومكشر من الصبح.. إسلام: أنا؟! ده أنا أجمل واحد بيضحك في الشركة دي.. وفضلوا يضحكوا..

وفي نفس اللحظة بالظبط.. آسر كان طالع من مكتبه.. رايح للحاج.. أول ما شافهم واقفين عند الطابعة بيضحكوا.. وقف مكانه.. وشه اتغير.. حس بحاجة غريبة جواه.. حاجة زي النار.. مش نار غضب شغل.. لا.. نار تانية.. هو نفسه مش فاهمها.. ليه متضايق انهم بيضحكوا؟! ليه متضايق ان نور بتضحك مع إسلام.. ومبتضحكش معاه هو؟! قال بصوت عالي.. وصوت جد.. صوت مدير متعصب: إسلام!! إسلام اتخض.. ونور اتخضت: إسلام: أيوه يا آسر؟ آسر: انت سايب شغلك ورايح فين؟! مش قلتلك ركز في شغلك؟! انت عندك شغل متأخر.. والطابعة نور تقدر تطبع عليها لوحدها.. إسلام وشه احمر.. اتحرج قدام نور.. وقدام كل الناس اللي في الطرقة.. قال بصوت واطي: حاضر يا آسر.. حاضر.. وساب الطابعة.. ورجع مكتبه بسرعة.. نور بصت لآسر.. وكانت زعلانة أوي.. نور: يا أستاذ آسر.. هو كان بيساعدني بس.. مكنش بيعمل حاجة غلط.. الطابعة كانت معلقة.. آسر بص لها.. وكان لسه متضايق.. بس حاول يهدي صوته: أنا عارف.. بس الشغل.. الشغل محتاج تركيز.. وانتوا الاتنين عندكم شغل كتير.. مينفعش نضيع وقت.. نور سكتت.. ومردتش.. خدت الورق.. ورجعت مكتبها.. وهي حاسة انها عايزة تعيط.. بس مسكت نفسها.. وقالت في سرها: هو ليه بيعامل إسلام كده؟! وليه كل ما إسلام يكلمني.. آسر يتعصب؟! هو أنا عملت حاجة غلط؟!

آسر رجع مكتبه.. وقفل الباب جامد.. قعد على الكرسي.. وحط ايده على دماغه.. وقال لنفسه بصوت واطي: أنا بعمل ايه؟! أنا ليه اتعصبت كده؟! إسلام عمل ايه؟! ده كان بيساعدها.. بس هو كان متضايق.. متضايق انه شافهم بيضحكوا مع بعض.. متضايق ان نور بتضحك مع إسلام.. ومبتضحكش معاه هو.. هو آسر.. اللي عمره ما ضحك مع حد في الشغل.. عمره ما هزر.. نور عمرها ما شافته بيضحك.. دايماً جد.. دايماً مكشر.. دايماً مدير.. فقال لنفسه عشان يقنع نفسه: أكيد عشان الشغل.. عشان الهيبة.. عشان التيم لازم يشتغل جد.. أكيد عشان كده بس..

بعد شوية.. السكرتيرة دخلت لآسر بورق.. السكرتيرة: أستاذ آسر.. الورق ده محتاج امضتك.. آسر مضى.. من غير ما يبص.. السكرتيرة خرجت.. آسر قام وقف جنب الشباك.. فضل باصص على الشارع.. وقال لنفسه: هو ليه بيهزر معاها كده؟! ليه بيضحكها؟! ليه هي بتضحك معاه هو؟! وحس انه متضايق أكتر.. متضايق من إسلام.. ومتضايق من نفسه.. لأنه مش عارف.. هو متضايق ليه أصلاً؟!

وفي نفس الوقت.. إسلام رجع مكتبه.. وهو ساكت.. مش بيهزر زي الأول.. نور خدت بالها.. وبصت له من مكتبها: مالك يا إسلام؟ سكت ليه؟ إسلام حاول يبتسم: مفيش.. بس عندي شغل كتير.. هركز شوية.. نور حست ان في حاجة حصلت.. بس مكملتش.. ورجعت تشتغل على مشروعها..

العصر.. الحاج شريف عدى على نور تاني.. الحاج: ها يا نور.. خلصتي ايه؟ نور: خلصت جزء كبير يا حاج.. الحاج: جدعة.. يلا.. كملي.. ومشي.. نور كانت عطشانة.. قامت تجيب قهوة.. وهي ماشية في الطرقة.. لقيت آسر واقف قدام مكتبه.. بيتكلم في التليفون.. أول ما شافها.. خلص المكالمة بسرعة.. آسر: نور.. نور وقفت: أيوه يا أستاذ آسر؟ آسر سكت ثانية.. وكان عايز يقول حاجة.. بس مش عارف يقول ايه.. المشروع ماشي كويس؟ نور: الحمد لله.. آسر: طيب.. لو احتاجتي أي حاجة.. أي حاجة في المشروع.. قوليلي.. أنا.. أنا ممكن أساعدك.. نور بصت له باستغراب.. دي أول مرة آسر يقولها كده.. أول مرة يعرض عليها مساعدة في حاجة مش شغل.. نور: شكراً يا أستاذ آسر.. لو احتاجت حاجة هقول لحضرتك.. آسر هز دماغه.. ودخل مكتبه بسرعة.. وقفل الباب.. وقال لنفسه: أنا قلت كده ليه؟! أنا عمري ما قلت لحد كده.. وحس ان قلبه بيدق بسرعة.. ومش فاهم ليه..

آخر اليوم.. الموظفين بدأوا يمشوا واحد ورا التاني.. نور خلصت شغلها.. ولمت حاجتها.. إسلام كان لسه قاعد في مكتبه.. نور راحت له: إسلام.. انت زعلان مني في حاجة؟ بجد؟ إسلام بص لها.. وحاول يبتسم: لا والله.. مفيش حاجة.. بس آسر عنده حق.. لازم نركز في الشغل.. نور: بس انت مش كده.. انت متغير من امبارح.. انت كنت بتضحكني.. وبتخليني أحب الشغل.. إسلام سكت.. وبص في الأرض.. كان نفسه يقولها: أنا مش عارف أبطل هزار معاكي.. أول ما بشوفك ببقى عايز أضحك.. ببقى فرحان.. بس خاف.. فقال: مفيش.. بس تعبان شوية.. نور: طيب.. خلي بالك من نفسك.. ومشيت..

نور وهي ماشية.. عدت من قدام مكتب آسر.. لقيت الباب موارب.. بصت من بعيد.. لقيته قاعد.. لسه بيشتغل.. ومش عايز يمشي.. حست بحاجة غريبة.. هي مش فاهمة آسر.. هو ليه بيضايق لما إسلام بيكلمها؟! وليه عرض يساعدها في المشروع؟! وليه مش عايزها تغيب؟! كلها أسئلة.. ومفيش إجابة..

روحَت نور البيت.. قعدت مع مامتها.. مامتها: مالك يا نور؟ شكلك سرحانة.. نور: مفيش يا ماما.. بس الشغل كتير.. مامتها: لا.. في حاجة.. انتي مش على بعضك.. نور سكتت.. وبعدين قالت: ماما.. هو الواحد لما يبقى متضايق من حد بيهزر مع حد تاني.. ده يبقى ايه؟ مامتها ضحكت: يبقى بيغير عليه.. نور اتخضت: بيغير؟! مين بيغير على مين؟ مامتها: انتي اللي تقوليلي يا نور.. مين بيغير على مين في الشغل عندك؟ نور وشها احمر.. وسكتت.. ومعرفتش ترد.. بس جواها كانت بتفكر في الاتنين.. إسلام اللي بقى ساكت فجأة.. وآسر اللي بقى بيراقبها من بعيد.. ومش عارفة تبص فين.. ولا تفكر في مين..

تاني يوم الصبح.. إسلام دخل الشركة.. وشه مش زي كل يوم.. لا بيهزر.. ولا بيضحك.. كان ساكت.. بس جواه نار.. كل كلمة آسر قالها له امبارح قدام نور.. لسه بترن في ودنه.. انت سايب شغلك ورايح فين؟! اتفضل على مكتبك.. إسلام طول الليل بيفكر.. هو مش زعلان ان آسر مديره.. هو زعلان ان آسر كلمه كده قدام نور.. قدام البنت اللي هو.. بيحاول يبان قدامها راجل..

دخل مكتبه.. قعد شوية.. وبعدين قام.. خد نفس عميق.. وراح ناحية مكتب آسر.. خبط.. آسر من جوه: ادخل.. إسلام دخل.. وقفل الباب وراه.. آسر رفع عينه من على اللاب توب: خير يا إسلام؟ في حاجة في الشغل؟ إسلام وقف قدامه.. وقال بصوت هادي.. بس جد جداً.. أول مرة آسر يشوفه كده: لا يا آسر.. مفيش شغل.. أنا جاي أكلمك كصاحبي.. مش كمديري.. آسر استغرب: اقعد.. في ايه؟ إسلام: لا.. هفضل واقف.. عشان الكلام اللي هقوله.. مينفعش أقوله وأنا قاعد.. آسر ساب اللاب توب.. وقعد يبص له بتركيز..

إسلام خد نفس.. وقال: بص يا آسر.. انت المفروض متعليش صوتك عليا.. أنا مش شغال عندك.. أنا شغال معاك.. وصحبك في نفس الوقت.. آسر اتصدم.. ولسه هيتكلم.. إسلام شاور له انه يكمل: استناني أكمل.. احنا من واحنا صغيرين صحاب.. عمرك ما كلمتني كده.. وعمرك ما أحرجتني قدام حد.. فمينفعش تيجي دلوقتي.. عشان الشغل.. تكلمني بالطريقة دي قدام نور.. وقدام أي حد.. آسر سكت.. وحس ان الكلام وجعه.. لأنه عنده حق..

إسلام كمل.. وصوته بدأ يهدى: وأما تحب تتكلم معايا.. اعمل زي ما أنا عملت بالظبط.. وتجي عندي.. أو تطلبني أجي عندك.. متتكلمش معايا قدام حد.. آسر بص في الأرض.. وقال بصوت واطي: عندك حق..

إسلام: وبعدين يا آسر.. انت عارف ان والدك هو اللي كلفني اني أساعد نور.. الحاج شريف هو اللي قالي.. خلي بالك منها.. ساعدها في المشروع.. متسيبهاش لوحدها.. أنا بنفذ كلام الحاج.. مش بعمل حاجة من دماغي.. آسر رفع عينه.. كان متفاجئ.. هو مكنش يعرف ان أبوه هو اللي طلب كده.. إسلام: ولو كلامي معاها.. وهزاري معاها.. هيعطل الشغل.. ممكن أتكلم معاها بعد الشغل عادي.. أنا مش هقطع كلامي معاها.. أنا محافظ على علاقتنا ببعض يا آسر.. متزعلنيش منك..

الكلمة الأخيرة.. وجعت آسر أوي.. متزعلنيش منك.. آسر قام من على الكرسي.. وراح وقف جنب إسلام.. وحط ايده على كتفه.. وقال بصوت حقيقي.. مش صوت مدير.. صوت صاحب: أنا آسف يا إسلام.. بجد آسف.. إسلام بص له: آسف على ايه؟ آسر: آسف اني عليت صوتي عليك.. وآسف اني أحرجتك قدامها.. انت عندك حق في كل كلمة قلتها.. انت صحبي.. مش موظف عندي.. وأنا غلطت.. إسلام ابتسم.. أول ابتسامة من امبارح: خلاص يا عم.. حصل خير.. بس متعملهاش تاني.. آسر ضحك ضحكة خفيفة: حاضر.. مش هعملها تاني.. وحضنوا بعض.. زي زمان.. زي الصحاب..

بس آسر.. وهو بيحضن إسلام.. جت في دماغه جملة واحدة.. فضلت تتردد جواه.. ممكن أتكلم معاها بعد الشغل عادي.. اتضايق.. اتضايق أوي.. يعني إسلام هيكلم نور بعد الشغل؟! بره الشركة؟! لوحدهم؟! من غير ما هو يشوفهم؟! من غير ما هو يبقى موجود؟! حس بنار تاني.. نار أكبر من بتاعة امبارح.. بس مقدرش يقول حاجة.. لأنه لسه معتذر له.. فبلع الكلام.. وابتسم غصب عنه..

إسلام خرج من المكتب.. وهو مرتاح.. رجع يهزر تاني.. رجع يضحك.. راح لنور: صباح الفل يا ست نور.. ايه.. نمتي كويس؟ نور ضحكت.. وارتاحت انه رجع زي الأول: أخيراً رجعت تضحك.. كنت فين امبارح؟ إسلام: كنت نايم.. بس صحيت.. وفضلوا يهزروا..

وآسر كان قاعد في مكتبه.. سامع صوت الضحك تاني.. بس المرة دي.. مش متضايق من الشغل.. متضايق من فكرة واحدة بس.. ان إسلام ممكن يكلمها بعد الشغل.. وانه هو.. مش هيبقى موجود.. وقال لنفسه وهو بيبص من شباك مكتبه: هو أنا ليه متضايق كده؟! هو إسلام هيكلمها بعد الشغل.. فيها ايه؟! عادي.. بس قلبه كان بيقوله.. لا.. مش عادي.. مش عادي خالص..

وفي آخر اليوم.. إسلام عدى على نور: ايه رأيك.. لو احتاجتي حاجة في المشروع.. نخلصها مع بعض بعد الشغل؟ عشان منضيعش وقت الشغل.. نور بصت له.. ولسه هترد.. لقيت آسر طالع من مكتبه.. واقف وراهم.. وباصص لهم.. ولا اتكلم.. ولا قال حاجة.. بس عينيه.. كانت بتقول كل حاجة..

نور حست بالتوتر.. وبصت لآسر.. وبصت لإسلام.. ومش عارفة ترد تقول ايه.. توافق؟ ولا ترفض؟

يا ترى نور هتوافق تكلم إسلام بعد الشغل؟ وآسر هيعمل ايه لو وافقت؟ وآسر.. هيعرف يخبي غيرته دي لحد امتى.. وهو كل يوم بتزيد أكتر؟